1. Tae-i ǃaroma da ǀhaodi dawa ra ǃeream?

 TAE-I ǃaroma da ǀhaode ra hâǃnâ? ǂGuro ǃaromas ge Jehovaba da ra koa ǂgao amaga. (Psa. 26:12; 111:1) ǀKhara ǃaromas ǀhaode da ra hâǃnâbas ge, î da sida ǃgâsana ǂkhâǃnâ nē ǃgomǁaegu ǃnâ. (1Tes. 5:11) ǀHaodi tawa da ga ǃeream, o da ge nē ǀgam xūna ra dī.

2. Mâ ǃēde da ūhâ ǀhaodi tawa ǃereamsa?

² Mâ wekheb hoaba da ge ǃēde ūhâ sida di ǀhaodi tawa ǃereamsa. Aiǁgause da ge ǃKhē xu ǂgō-ommi ǁkhāǁkhāǃâs ai a ǃeream ǁkhā. Wekheb ǁaegub ǃnâ da ra ūhâ ǀhaos tawa da ge gagasi xūn. Tamas ka io ǀhaohâb Elobmîs ǁkhāǁkhās tsî ǀkhara ǃhoaǃâgu ai a ǃeream ǁkhā.

3. Mâ ǃgomsiga da a hōǃâ ǁkhā? Tsî Hebreǁîn 10:24, 25 sa mati a hui da ǁkhā?

³ Sida hoada ge Jehovaba koa tsî sida ǃgâsana ra ǂkhâǃnâ ǂgao. Xawe xūn ge hâ ǁnāsa a ǃgom kai ǁkhāna, ǃeream ǂgoa da ga o, da ge a ǃao ǁkhā ǃereamsa. Tamas ka io da ge ǀnîsi turaba ūhâ ǃereamsa xaweb ge ǃgâsaba ǃereams ǃēsa māda tama hâ. Tae-e a huida ǁkhā nē ǃgomsiga sîsen ǂamsa? Apostel Paulub ge Hebreǁîna ǃoa a xoa sîǂkhinis ǃnâ da ge ǃereamsa a hō ǁkhā. ǀHaos di ǂhâǂhâsasibab gere ǃhoaǃgao, ob ge ge mî î da ‘hōhōǃnâgus’ ai sida di ǂâisa ǂnûi. (Khomai re Hebreǁîn 10:24, 25 sa.) Mû da ga o naun mati ra ǂkhâǃnâhesa,  sida di ǂgomsa da ǃnubu ǃereamdi ǃnâ-ū ra ǁguiǃā ǀgauba. O da ge nî ǂkhâǃnâhe ǃnāsase ǃereamsa. Tsî da ga ǀnî ǁaegu ai ǃereams ǃēsa māhe tama io, o da ge nî ǂkhî naun ǃēsa ra māhe amaga în ǁîn tsîna ǃeream ǁkhā.—1Pet. 3:8.   

4. Mâ ǃnona xūna da nē ǁkhāǁkhāǃâs ǃnâ nî ǃhoaǃgao?

⁴ Nē ǁkhāǁkhāǃâs ǃnâ da ge ǂgurose nî ǃhoaǃgao, mati da ǂkhari ǀhaohâb ǃnâ nî ǂkhâǃnâgu ǀgauba. ǁNāpaxu da ge nî ǃhoaǃgao mati da kai ǀhaohâb ǃnâ a ǂkhâǃnâgu ǁkhā ǀgauba, ǂgui khoen ra ǃereamba. ǀUnigase da ge ǀgauga nî ǃhoaǃgao mati da sida di ǃeream di ǃnâ da ra mî xūn ǃnâ-ū nauna ǂkhâǃnâ ǁkhā ǀgausa.

5. Mati da nauna a ǂkhâǃnâ ǁkhā, ǀhaos tawa da ga ǀoro o?

⁵ ǂKhari ǀhaohâb tamas ka io groeps ǃnâ i ge ǁnātikōse ǂgui ǃereamde a mā ǁkhā khoena a ǀkhai. Tsîb ge ǃhoaǃgao ra ǃgâsaba ǀnî ǁaegu ai nî ǃâu, în khoena ǃeream ǁkhā. Nēs ge ǀhaosa a ǁhoao kai ǁkhā tsî ǂkhâǃnâ da tide. Tae-e du a dī ǁkhā? Māsenxase sadu ǃomma ūkhâi re. ǁNāsa du ga dī, o du ge nauna nî ǂkhâǃnâ în ǁîn tsîna ǃnāsase ǃeream ǁkhā.

6-7. Mati da ǃereamsa mās ǃao tsâsiba a ǀoroǀoro ǁkhā?

⁶ Tae-e du nî dī ǃeream ǂgao du ga xawe du ga ǃao o? ǂGuin ge ǁnāti ra tsâ xawe sida di ǃgâsana da ga ǃnāsase ǂkhâǃnâ ǂgao. O da ge ǀgauga nî ôa, sida ǃao tsâsiga nî ǀoroǀoro ǁkhāga. Mati da ǁnāsa dī ǁkhā?

⁷ ǀNai māǂuisa ǃKhē xu ǂgō-ommi  b ǃnâ hâ ǀapemāde saos ǃnâ-ū du ge huiba a hō ǁkhā. Aiǁgause ǃgâise aiǂhomisen. (ǂKhm. 21:5) ǃHoaǃgaohe ra xūna du ga ǃgâise ǂan, o du ge supuse nî ǃeream. Sadu di ǃereams tsîna ǃnubuse ūhâ re. (ǂKhm. 15:23; 17:27) ǃNubu ǃereamsa du ga mā, o du ge ǁnātikōse ǃao tide. ǃNubu ǃereams hîna ǀgui tamas ka io ǀgam ǁgaraga ūhâs ge sida ǃgâsana nî supuba ǁnâuǃāsa, gāxu ǃereams hîna ǂgui ǂâide ūhâs xa. ǃNubu ǃereamsa du ga sadu mîdi ǃnâ mā, o du ge nî ǁgau ǃgâise du aiǂhomisen hâsa. Tsî du ǁnāpa ra ǃhoaǃgaohe xūn tsîna ǃgâise ra ǁnâuǃāsa.

8. Jehovaba mati sida di dītsâde ra mû?

⁸ Tae-e du nî dī nē ǀapemāde du dītsâ hâs khoaǃgâ du ga noxoba ǀgui tamas ka io ǀgam ǃeream ra māsa ǃao o? ǂGomǃgâsiba du ge ūhâ ǁkhā, Jehovab sadu ǁgūtsâde ra ǃgôaǃgâsa. (Luk. 21:1-4) Jehovab ge dīǁkhā da as xa ǃnâsa-e dī kai da tama hâ. (Fil. 4:5) Kō re tae-e du a dī ǁkhāsa, mîǁguiba ǁî-i xa dī re. Tsî ǃnomsa ǂgaoba ǀgoreba re. ǁNā mîǁguib ge ǀnîsi ǃnubu ǃeramsa māsa.

9. Mâ ǃgomsina da kai ǀhaohâb ǃnâ hōǃâ ǁkhā?

⁹ Sadu di ǀhaohâb ga ǂgui ǃgâsana ūhâ, o du ge ǀnîsi ǀkhara ǃgomsiba a ūhâ ǁkhā. ǀNîsi î ge ǁnātikōse ǂgui ǃgâsana ra ǃeream ǂgao. Tsî î ge sadu ǃomma mûhe tama hâ. Aiǁgause Danielles  ge hoaǁae ǀhaodi tawa ǃereams xa ge ǃgâibahe i. c ǁÎs ge ǁnāsa ǃoabas ǃâ-i ase ra mû. Tsî naunas ra ǂkhâǃnâ ǀgaub ases tsîna. Tsî Elobmîs ra ǁkhāǁkhā xūn ǁîs di ǂgomsa a ǀgaiǀgai ǁkhā ǀgaub ase. Xawes ge kai ǀhaohâba ǃoa a doe, os ge ǀorose gere dîhe. ǀNî ǁaegas ge hoa ǀhaos ǃnâ ǃereams di ǃē-i tsîna ge hō tama hâ i. “Kaise ta ge gere ǀara” tis ge ra mî. “ǃĒsa ta ge ǂoaǃnâ khama ta ge gere tsâ. ǃNās hoasa i ga ī, ots ge ǀnîsi i ǂanapegas ǃnâ dīhe tama ti ra ǂâi.”     

10. Tae-e da a dī ǁkhā, î da ǃnāsase ǃereams ǃaroma ǃē-e hō?

¹⁰ Danielles gere tsâ ǀgauba du ge hōǃâ tsâ? ǁNāti i ga ī, o du ge ǀnîsi nî ǃâitsâhe tsî nî dītsâ ǀû tsî ǀhaodi tawa ǃgâs ǀguisa nî di. Xawe tā ǀûsen re ǃereamsa māsa. Tae-e du a dī ǁkhā? Mâ ǀhaos hoas ǃaroma du ga ǂgui ǃereamde ga ra aiǂhumi, o i ge nî hui du. Xawe du ga ǁkhāǁkhāǃâs tsoatsoas ǃnâ ǁhûihe tama ga io ǃereamsa mās ǃaroma, o du ge noxopa ǂgui ǃēde nî hō ǀhaos ra aiǃgû khami ǃereamsa. ǃKhē xu ǂgō-omma du ra aiǂhomi khami, mâ xoaǀgoras hoas mati xoaǂams ǀkha ra ǃgûǀhao ǀgauba ǂâi re. ǁNāsa du ga dī, o du ge hoa ǁkhāǁkhāǃâhoas ǃnâ ǃēde nî hō ǃgâi ǃereamsa mās ǃaroma. ǁNās xōǀkhā du ge ǀnîsi a aiǂhomisen ǁkhā î du ǃgam xūna ra ǃhoaǃgao xoaǀgoradi ai ǃeream ǁkhā, hîna ǁguiǃās ǃaroma a ǃgomro ǁkhāga. (1Kor. 2:10) Tae-i ǃaroma? ǀNîsi i ǀoro khoena ǁnā ǃâb ai nî ǃeream ǂgao amaga. Nē ǀapemāde du ra sao hîna du ga ǀnî ǀhaodi khaoǃgâ ǃereams ǃēsa hō tama ga ra ī o du tae-e a dī ǁkhā? ǁNā ǃâba ra dī ǃgâsaba du ge ǀhaos aiǃâ, ǃeream ǂgao du ra dîs xa a mîba ǁkhā.

11. Filipeǁîn 2:4 sa tae-e dīsa ra ǂkhâǃnâ da?

¹¹ Khomai re Filipeǁîn 2:4 sa. ǃAnu gagab xa ǂkhâǃnâhe hâseb ge apostel Pauluba ǃgâsana ge ǂkhâǃnâ în naun di ǃgâb xas tsîna ǂâi. Mati da ǁnâ  ǀapemāsa ǀhaodi tawa a ûiǂûi ǁkhā? ǁNāsa da ge a dī ǁkhā ǂâis ǃnâ da ga ūhâ o, naun sida khami ra ǃeream ǂgaosa.        

12. Mâ ǃgâi ǀgaub ǃnâ da nauna ǀhaodi tawa ǂkhâǃnâ ǁkhā? (Ai-īsiba mû re.)

¹² Nē ǀgaub ǃnâ ǂâi re. Sadu ǀhōsan ǀkha du ga ǁgamǀhao, o du kaise nî ǃhoa în sadu ǀhōna ǃhoas di ǃē-e tā hō? Tātsēs tsîna. Sadu ge ra ǂhâba în ǁîn tsîna ǁgamǀhaos ǃnâ ǃē-e ūhâ. ǁKhā ǀgaub ǃnâ ǀhaodi ai nauna ǃēde ra mā ǂgao, în ǁîn tsîna ǃeream ǁkhā. ǀGui ǀgaub hîna da sida di ǃgâsana ra ǂkhâǃnâb ge, ǁîna ǃēsa māsa în ǁîn di ǂgomsa ǁguiǃā. (1Kor. 10:24) Hā re î da kō ǁnāsa da mati a dī ǁkhāsa.       

13. Mati da naun tsîna ǃēsa mā ǁkhâ în ǃeream ǁkhā?

¹³ ǀGui ǀgaub ge sida di ǃereamde ǃnubuse ūhâsa. Î-i ǂâusa ǁaeba hâ, în naun tsîna ǃeream ǁkhā. ǀHaohâb ǃûi-aogu tsî ǂansa ūhâ ǃgâsan tsîn ge aiǁgaus ase a īǁkhā. ǃNubu ǃereams tsîna du ga ra mā, o tā ǂgui xūn xa ǃhoa re. Xoaǀgoras ǃnâ hâ xūn hoana du ga mî o, on ge nauna ǃereaman nî xūna ūhâ tide. Nē xoaǀgoras ǃnâ i ge aiǁgause, ǀgam ǀapemāde ra māhe. Sadu ǃereamde ǃnubuse ūhâ tsî tā hoa xūna ǃeream re. Sadu ga ǂgurose ǃereamsa māo, tae-i ǃaroma du ǀgui xū-i xa ǀgui ǃhoa tama hâ?

14. Tae-e nî huida ǂgui ǃnāde da ga ǃeream ǂgao o? (Ai-īsiba sîsenū re.)

¹⁴ Matikō ǃnāde du nî ǃereams ǃaroma, sadu di ǁnâuǃāba sîsenū re. ǂGui ǃnāde da ga sida di ǃomma ūkhâi, o da ge ǀnîsi ǃgâsaba a ǁgari ǁkhā îb sida ǂgai naun noxoba ǃēsa hō tama hîna. Nēs ge nî ǃaroma în nauna ǃereamsa xu ǃkhō-oasen.—Aoǁn. 3:7.        

15. (a) Mati da nî tanisen ǃereams ǃēsa da ga māhe tama i o? (b) ǁKhāǁkhāǃâsa ra ǃhoaǃgao ǃgâsaba mati hoa khoen xa a ǂâi ǁkhā? (Boksisa kō re “ ǁKhāǁkhāǃâsa du ga ǃhoaǃgaos.”)

 ¹⁵ ǂGui ǃgâsan ga ǁîn di ǃomma ǃhoaǀhaos ǁaeb ai ûkhâi, o da ge ǀnîsi ǂhâba ta ra khami ǃēsa hō tide ǃereamsa. ǀNî ǁaegu aib ge ǃgâsaba sida ǂgui ǃnāde ǂgai hō ǁkhā tide. ǁNās ge ǂkhabuǂâi kai da ǁkhā. Xawe da ge nî dītsâ î da tā ǁnās xa ǁaixa.—Aoǁn. 7:9.

16. Mati da naun hîna ra ǃereamna a ǂkhâǃnâ ǁkhā?

¹⁶ ǂHâba du hâ khami du ga ǃnāsa ǁaeba ǃeream tama io. Tae-i ǃaroma du ǃgâise naun ra ǃeream ǀgauba ǃgâ tama hâ. Tsî ǀhaos khaoǃgâ ǁîna, ǁîn di ǃereams ǃaroma gangan tama hâ? (ǂKhm. 10:21) ǃEreamdi ǃaroma gangan gus ge ǀkhara ǀgaub hîna da a gangan gu ǁkhāba.

17. (a) Matin ǁgûna ǁîn di ǀgôana a hui ǁkhā, în ǃgâi ǃereamde mā? (b) Vidiob ǃoagu mâ haka ǀgauga hâ ǃereams ǃaroma aiǂhomisensa? (ǀGamirosa khomai re.)

¹⁷ Mâ ǀgaugu ai da ǀhaodi ai a ǂkhâǃnâgu ǁkhā? ǁGûn ase ǀgôana hui re în, ǁîn a mā ǁkhā ǃeream di ǃaroma aiǂhomisen. (Mat. 21:16) ǀNî ǁaegu ai î ge ǂhâǂhâsa xūna ra ǃhoaǃgoahe aiǁgause, ǃgammeb ǃgomsin tsî ǁōreb xa hâ xūn  tsîna. Xawe i ge ǀnîsi xoaǀgorasa nî hâ i, ǀgôaro-i a ǃeream ǁkhā-e. ǁNās xōǀkhā sadu ǀgôan tsîna hui re în ǁnâuǃā. Tae-i ǃaroman ǁîn di ǃomgan ga khui xawe ǃereams ǃēsa māhe tidesa. ǁNāsa du ga dī, o du ge sadu ǀgâona nî hui în tā ǂkhâbuǂâi naun ga ǃēsa māhe o.—1Tim. 6:18. d

18. Tae-e da a dī ǁkhā, î da tā sida ai ǂâisa ǂnûi ǃeream da ga ao? (ǂKhoamîdi 27:2)

¹⁸ Sida hoada ge ǂkhâǃnâxa ǃereamde a aiǂhomi ǁkhā. Î da Jehovaba koa tsî sida di ǃgâsana ǂkhâǃnâ. (ǂKhm. 25:11) ǀNîsi da ge ǀnî ǁaegu ai sida ǀkha ge ī xū-i xa ǃnubuse a ǃhoa ǁkhā. Xawe da ge nî ǂanbasen î da tā sida xa kaise ǃhoa. (Khomai re ǂKhoamîdi 27:2 sa; 2 Korinteǁîn 10:18) Dītsâ da ge ra î da Jehovab, ǁîb mîs tsî hoa khoen ai sida ǂâisa ǂnûi. (J.ǂHa. 4:11) Ama as ge xoaǀgoras ǃnâ hâ dîs ga dî da o, î da sida ǀkha ge ī xū-i xa ǃhoa o î ge a ǃgâi ǁnāsa da ga dī o. Nēs di aiǁgaus ge saora xoaǀgoras nē ǁkhāǁkhāǃâs dis ǃnâ hâ.

19. (a) Tae-e nî hā, hoa khoena da ga ǂâis ǃnâ ūhâ o? (Romeǁîn 1:11, 12) (b) Sado tae-e ra ǃgôaǃgâ ǀhaodi tawa ǃereams xa?

¹⁹ Mati da nî ǃeream ǀgaus di ǁgaragu a ǀkhai. Xawe da ge sida hoada ra dītsâ î da ǂkhâǃnâgu. Nēs ge ǀnîsi a ǂâibasen ǁkhā î da ǃnāsase ǃeream. Tamas ka io i ge ǀnîsi a ǂâibasen ǁkhā î da hō da ra ǃēs xa ǂkhîǂâixa. Tsîn naun tsîna ǃereamsa ǃēsa ūhâ amaga. ǀHaodi ai da ga naun di ǃgâib xa sida ǂâisa ǂnûi, o da ge sida hoada ǃgâiba nî hō ‘ǂgaoǂgaoǃnâgus’ ǃnâ.—Khomai re Romeǁîn 1:11, 12 sa.