1. Tae-i ǂgomǃgâsiba da ūhâ?

 JEHOVAB khoen ase da ge a ǂan ǁîb a ǀnamdasa. Tsîb ǃgâi ûiba da nî ūhâsa ǂhâba hâsa. (Rom. 8:35-39) ǂGoms tsîna da ge ra dī Elobmîs daoǁgaude da ga ǀnam, o da hoaǁae ǃgâiba ra hōsa. (Jes. 48:17, 18) Xawe tae-e da nî dī ǃâubasen tama da hâ ǃgomsina da ga hōǃâ o?

2. Mâ ǃgomsina da a hōǃâ ǁkhā? Tsî nē ǃgomsina mati a tsâ kai da ǁkhā?

² Hoa ǃoaba-aon Jehovab din ge ǃgomsina ūhâ. Aiǁgause, ǀnîsi da ge omaris ǁani-i xa ǀnî ǀgau-i ǃnâ tsûtsûhe hâ. ǁKhōǁkhōsa ǀae-i tsîna da ge a ūhâ ǁkhā, hîna a ǃaroma ǁkhā-e î da tā ǃnāsa-e Jehovab ǃoabas ǃnâ dī. Tsūkēǃgâb xa ǃaromahe hâ ǃgomsin tsîna da ge a hōǃâ ǁkhā. Tamas ka io da ge sada di ǂgoms ǃaroma a ǃgôaǃgonhe ǁkhā. Nēti-ī ǃâitsâna da ga ǃkharuǃnâ, o da ge ǀnîsi ra dîsen: ‘Tae-i ǃaromas nēsa tita ǀkhā ra ī? Tsū xū-e da ge dī? Nē ǃgomsina Jehovab xa da ǀkhaehe tama hâ di ra ǂâibasen?’ Nē ǀgaub ǃnâ nēti ǂâi tsâ î du ge hâ i? ǁNāti i ga īo, o tā ǂkhabuǂâi. ǂGui ǂgomǂgomsa ǃoaba-aon Jehovab din ge ǁkhā tsâsiga gere hōǃâ.—Psa. 22:1, 2; Hab. 1:2, 3.

3. Tae-e da Psalmdi 34:19 sa xu a ǁkhāǁkhāsen ǁkhā?

³ Khomai re Psalmdi 34:19 sa. ǃGaoǃgâ re 2 ǂhâǂhâsa xūna nē psalms ǃnâ: (1) ǂHanu-ai khoen ge ǃgomsina ra hôǃâ. (2 )Jehovab ge ǃgomsina xu ra ǃnoraǃnora da. Jehovaba  mati ra ǃnoraǃnora da? ǀGui ǀgaub hînab da hui dab ge ǂhanu ǂâi ǀgauba, nē ǃhūbaib ǃnâ ūhâsa. Jehovab ge ra mîmâi ǁîba da ga ǃoaba, o da ǃgâiaǂgaoba nî hōǃâ ti. Xaweb ge nēsi da sada ûib ǃnâ ǃgomsina hōǃâ tide ti mîmâi tama hâ. (Jes. 66:14) ǁÎb ge ra ǂkhâǃnâ da î da hānîǁaeb ai ǂâisa ǂnûi, hîna da ǀamose ǁîb ǂhâba hâse ǃgâiaǂgaob ǀkha nî ûiba. (2Kor. 4:16-18) Xawe nē ǁaeb ǃnâb ge ra hui da, î da ǁîba tsēs hoasa ǃoaba ǀgara.—ǃG.am. 3:22-24.

4. Tae-e da nē ǁkhāǁkhāǃâs ǃnâ nî ǃhoaǃgao?

⁴ Hā re î da ǃhoaǃgao, taena da a ǁkhāǁkhāsen ǁkhāsa ǂgomǂgomsa ǃoaba-aon Jehovab dina xu tsî sada tsēdi ǃnâ hâna xus tsîna. Mû da nî khami da ge ǃâubasen tama da hâ ǃgomsina nî hōǃâ. Xawe da ga Jehovab ai ǂgomaiǂnûi, ob ge tāstē ǁnāxuǃnâ da tide. Tsî hoaǁae nî hui da. (Ps. 55:22) Nē aiǁgaude da ra ǃhoaǃgao hîna dîsen re: ‘Mati ta ga ǁnā mâsib ǃnâ tanisen hâ? Mati di nē aiǁgaude, ti ǂgomǃgâsiba Jehovab ǃnâ ra ǀgaiǀgai? ǁKhāǁkhāsen ta ra xûna da mati ti ûib ǃnâ a sîsenū ǁkhā?’

5. Mâ ǃgomsinab Jakoba gere hōǃâ, Labani xa ǃaromahe hâse? (Tsoatsoas ai hâ ai-īsiba kō re.)

⁵ Elobmîs ǁaeb ǃnân ge Jehovab di ǃoaba-aona, ǃâubasen taman ge hâ i ǃgomsina gere hōǃâ. Jakob aiǁgausa kō re. ǁÎb ge dadasab xa ge mîbahe îb tara-e, Labani di ǀgôati hîna Eloba ra ǃoabatexu sī ū. Tsî ǁîb dadab xa ge mîbahe Jehovab nî ǀkhaebi ǃkhaisa. (Gen. 28:1-4) ǁNās ǀkhab ge Jakoba ǂhanu xū-e ge dī. ǁÎb ge Kanaani ǃhūba xu Labani omsa ǃoa ge ī. Hîna ge 2 ǀgôara Leas tsî Raxels tsîna ūhâ îba. Jakobi ge Labani di ǂkham ǀgôas Raxelsa ge ǀnam. Tsî ǁîs dadasaba ge mîǁguiba ǃgammeb nîs aiǃâb ǁîba 7 kuriga nî sîsenbasa. (Gen. 29:18) Xawe xūn ge Jakob ge ǃâubasen tama hâ i khami ge sîsenǂui tama hâ i. Labani ge ge gāxaǃnâ bî tsîb ge ǂguro ǀgôas Leasa ge ǃgamme. Labani ge Jakoba ge mā-am îb Raxelsa ǃgamme xaweb ga ǁkhawa hû kuriga sîsen o ǀgui. (Gen. 29:25-27) Labani ge ǂhanuoǃnâses tsîna Jakobi ǀkha gere sîsen. Hoanǂam aib ge Labana Jakoba 20 kuriga ǂhanuoǃnâse ge sîsen-u.—Gen 31:41, 42.

6. Mâ ǀnî hâ ǃgomsin tsînab Jakoba ge ǃkharuǃnâ?

⁶ Jakob ge ǀnî hâ ǃgomsin tsîna ge ǃkharuǃnâ. ǁÎb ge kai omaris tsîna ge ūhâ-i. Xawe î ge ǁîb di ǀgôagu ǀnîga, ǂkhîb ǃnâ ǀguiba ge hâ ǀhao tama hâ i. ǁÎgu di ǃgâb Josefi tsîna gu ge ǃgāb ase ge ǁamaxū. Jakob di ǀgam ǀgôakha Simeoni tsî levib tsîkha ge taoba ǁîga omarisa ge ǀkhī-u ba. Tsî Jehovab ǀônsa ge ǁgaiǁgai. ǁNās xōǀkha î ge ǁîb di ǀnamǀnamsa taras Raxelsa, ǁîra di ǀgami ǀgôabas ra hō hîna ge ǁō. ǁÎb kaira tsēdi ǃnâb ge Jakoba ǃâtsūǀkhāb xa ǃaromahe hâse, Egibteba ǃoa ge doe.—Gen. 34:30; 35:16-19; 37:28; 45:9-11, 28.

7. Jehovaba mati ge ǁgau Jakobi ǀkhab a ǂkhîsa?

⁷ Nē ǃgomsin hoan ǃnâb ge Jakoba, ǁîb di ǂgomsa Jehovab ǃnâ tātsē ge ǂoaǃnâ tama hâ i. Tsî ǁÎb di mîmâidi ǃnâ. Tsîb ge Jehovaba Jakoba ge ǁgau, ǁîb ǀkhab a ǂkhî ǃkhaisa. Aiǁgause, Labani ge Jakoba a gaxaǃnâ xaweb ge Jehovab xa ǂgui xūn ǀkha ge ǀkhaehe. Tsî ǂâis ǀguisa di re matikōseb Jakoba Jehovab ǃoa ge ganganxa isa. ǁÎb di ǀgôab Josefi ge ǁō dib ge ǂâi hâ îbab, ge ǁkhawa mû  o. Jehovab ǀkhab ge ûhā i ǀgū ǀhosagusis ge Jakoba ge hui, îb ǁîb di ǃgomsigu ǃnâ mâǀgai. (Gen. 30:43; 32:9, 10; 46:28-30) Jehovab ǀkha da ga ǀgū ǀhosagusisa ga ûhā ǀgara. O da ge sîda tsîna, ǃâubasen tama da hâ ǃgomsin ǃnâ a mâǀgai ǁkhā.

8. Tae-eb ge Gao-aob Daviba gere dī ǂgao?

⁸ Gao-aob Davib ge Jehovab ǃoabas ǃnâb gere dī ǂgao xūn hoana ge dīǁoa i. Aiǁgause, Davib ge amabes ǃnâ gere ǁkhore tempela ǁîb di Eloba ombasa. Kebo-aob Natanab ge ǁîb ǁkhoreb xa ge mîba. Ob ge Natana ge ǃeream: “Dī ǂgaots ra xūn hoana dī re, Elob sats ǀkha hâ xuige.” (1Kro. 17:1, 2.) Mûnanais ǀguisa da ge di ǁkhā, mati di ge ǁnā mîde Daviba a ǂkhâǃnâsa. ǀNîsib ge ǁnā ǁaeb ǃnâ, nē om sîsen-e ge ǀape tsoatsoa.

9. Daviba ǃgâi tama ǂhôa-eb ge ǁnâu, o tae-e ge dī?

⁹ ǁNās khaoǃgâb ge Jehovab kebo-aoba ǃgâi tama ǂhôa i ǀkha ge oa ǀkhī. ‘ǁNā tsuxub ǁkhāb ǃnâb ge’ Jehovaba, Natana ge mîba Davib tempela om tidesa. Xawe i ǁîb ǀgôagu di ǀguiba ǁnāsa nî dīsa. (1Kro. 17:3, 4, 11, 12) Daviba mati ge tanisen ne haisi-amsab ge hō o? ǁÎb di mîǁguibab ge ge tawa. Tsîb ge mari-e ǀhaoǀhao tsî xūn ǁîb ǀgôab om sîsen-i ǃaroma nî ǂhâ xūn ai ǁîb ǂâisa ge ǂnûi.—1Kro. 29:1-5.

10. Jehovaba mati Daviba ge ǀkhae?

¹⁰ Jehovab ge Davib ǁîb tempela om tide di a mî toas khaoǃgâb ge, ǁkhā ǁaeb ǃnâ ǁîb ǀkha ǃgaeǁaesa ge dī. Jehovab ge Daviba ge mîmaiba, ǁîb suriba xu ra hā khoe-i ge ǀamosib kose ni ǂgaeǂgui. (2Sam. 7:16.) ǀAsa ǃhuibaib, Jesub di 1000 kurigu di ǂgaeǂguis ǃnâb ge Daviba. Kaise nî ǃgâiaǂgao ǁkhāǁkhāsen nîb gara o. Gao-aob Jesub ǁîb di suriba xu hâsa. Nē ǃnaeǃkhais ge ra hui da, î da mûǂân. Jehovaba da ra dība ǂgao xūn hoana da ga dī ǁoa. Xaweb ge sada Eloba, ǃâubasen tama da hâ ǀkhara ǀkhaega a mā da ǁkhāsa.

11. ǂGurokham ǁaeb Xristeǁîna mati ge ǀkhae-e, Gaosib ge ǃâubasen taman ge hâ i ǁaeb ai hā tama i xawe? (ǃNaeǃkhaidi 6:7)

¹¹ ǃKharu ge ǁaeb Xristeǁîn ge, ǃâubasen taman ge hâ i ǃgomsina gere hōǃâ. Aiǁgausen ge Elob Gaosib di hāsa ge ǃâubasen hâ i. Xawen ge ge ǀū i ǁnās mâǁae ni īsa. (ǃNǃkh. 1:6, 7) O ǁîna tae-e ge dī? ǁÎn ge aiǃgû tsî aoǁnâ sîsen-i ǃnâ ge ǀkhabe i. ǃGâiǂhôas haisiamsan ra khoraǂûi, khamîn ge ge mû Jehovab ǁîn ǁgūtsâde ra ǀkhaesa.—Khomai re ǃNaeǃkhaidi 6:7 sa.

12. ǂGurokham ǁaeb Xristeǁîna tae-e ge dī, ǃâtsūǃkhāb ge hâ io?

¹² ǀNî ǁae î ge ‘hoaraga ǃhūbaib ǃnâ kai ǃâtsūǀkhāba’ ge hā. (ǃNǃkh. 11:28) ǂGurokham ǁaeb Xristeǁîn tsîn ge ǁnā ǃâtsūǀkhāb xa ge tsâǀkhāhe. Mûnanai re matin ge ǃgomma gere tsâsa nē ǃâtsūǀkhāb xa ǃaromahe hâse. Amase gu ge oms di danaga mati gu ǁîgu omaride nî kōǃgâs xa gere ǂâiǂhansen. Tsî ǂkhamkhoen hîna ǃnāsase gere aoǁnâ ǂgaona mati nēs xa ge tsâǀkhāhe? ǀNîsin ge gere ǂâi ǁnā mîmâiden ǃâtsūǀkhāb ga toa o ǀgui nî sīǃnâsa. Mâsib ge mati ǀgui-i ī xawen ge ǁnā Xristeǁîna ǁnā mâsiga ge ūǃoa. ǁÎn ge ǁkhān a ǀgaub ǃnâ ge aoǁnâ ǀgara. Tsî ǂkhî ǂgaob ǀkha ūn ge hâ xūna, Judeab ǃnâ ge ǁan hâ i ǃgâsan ǀkha gere ǀgoragu.—ǃNǃkh. 11:29, 30.

13. Mâ ǀkhaegan ge ǂgurokham ǁaeb Xristeǁîna ǃâtsūǀkhāb ǁaeb ǃnâ gere hōǃâ?

¹³ Mâ ǀkhaegan Xristeǁîna gere hōǃâ,  ǃâtsūǀkhā di ǁaeb ǃnâ? ǁNān hîna ge huiba a hōn ge Jehovab di ǃomma ge mû. (Mat. 6:31-33) Tsî ǁnān hîna ge ǂhâsib xūna gere mān. Tamas ka io ǀkhara ǀgaugu ǃnâ gere huin ge mās ra ǃaroma ǂkhîba ge hōǃâ. (ǃNǃkh. 20:35) Jehovab ge ǁîn hoana nē mâsib ǃnân gere hâ ǀgara khami gere ǀkhae.

14. Tae-e Barnabasi tsî Paulub ǀkha ge ī tsî mâ ǀamǂoas ǀkha? (ǃNaeǃkhaidi 14:21, 22)

¹⁴ ǂGurokham ǁaeb Xristeǁîn ge ǂgui ǁaegu ai gere mâǃoahe, ǃâubasen taman hâ ǁaegu ais tsîna. Paulub tsî Barnabab tsîn Listras ǃnâ ra aoǁnâ, hîna ge ǁîgu ǀkhā a ī xū-i xa ǂâi re. ǁÎkha gere ǃâ khoen xa gu ge tsoatsoas ǃnâ ǂgurose ǃgâise ge ǁkhoreǁharehe. Xawe î ge ēga, mâǃoa-aoga ‘khoena ge khâikhâiǃnâ.’ Tsîn ge ǀnî khoena Pauluba ǀuidi ǀkha gere ǂnoa. Tsî ge ǁnāxūbi ǁōb ge din ge ǂâi o. (ǃNǃkh. 14:19) Xawe Paulub tsî Barnabab tsîn ge aiǃgû tsî ǀkhara ǃkhais ai sī ge aoǁnâ. Tsî tae-e ǁnās ǃnâ-ū ge hā? ǁÎgu ge ‘ǀnî khoena ge ǁkhāǁkhāsabedī’ tsî î ge ǁîgu di mîdi tsî aiǁgaus tsîna nau ǃoaba-aona ge ǀgaiǀgai. (Khomai re ǃNaeǃkhaidi 14:21, 22 sa.) Paulub tsî Barnabab tsîn ge mâǃoahe kha gere o, ǀû tama hâ i ǃkhais ǃaroman ge ǂguina ǃgâiba ge hō. Jehovab ge māda sîsenni ǃnâ da ga ǀûsen tama io, ob ge ǁîba nî ǀkhaheda.

15. Tae-e da ǃGâsab Macmillanni aiǁgausa xu ra ǁkhāǁkhāsen?

¹⁵ 1914 Nî aiǃân ge Jehovab khoena ǀnî ǃâubasende ge ūhâ i. Aiǁgause ǃgâsab A. H. Macmillanni xa ǂâi re. ǁNā ǁaeb ǃnâ ge ûi hâ i ǂgui khoen khamib ge ǃgâsab Macmillanna gere ǂâi, ǀgūǁaeb ǀhomma ǃoa nî īsa. ǁÎb di ǃhoas hînab ge Septemberi ǃnâ, 1914 a mās ǃnâb ge ge mî: “Nēs ge ǀnîsi ǀuniga ǃhoas hîna ta nî māsa.” Xawe ǁnās ge ǁîb di ǀuniga ǃhoa tama ge īsa. ǁIb ge ǀaro tsî ra mî: “Sida ga dī hâs ge ǃnāsase ǃKhūb di sîsenni ǃnâ ǀhabesa.” ǃGâsab Macmillanni ge ge ǀhabe ī. ǁÎb ge aoǁnâ sîsenni ǃnâ ǃgarise gere sîsen. Tsîb ge ǂgui ǃgâsan hîna ge ǀkhā-en ge ǁhûi tama hâ i amaga toronkhoes ǃnâ ǂnôa īna gere ǂkhâǃnâ. Tsîb ge ǀhaode ǂgomǂgomsase gere hâǃnâ, kairab ge hâ i xawe. ǃGâsab Macmillana mati ǃgâiba ge hō, aiǃgû tsîb ge Jehovaba ǃoaba ǀgara o, ǁîb di mātaresab ǃaûhâ hîna? 1966 î ge ǁōb nîs aiǃâ ge xoa: “Ti ǂgoms ge ǂguros xa nēsi ǃnāsase a ǀgaisa.” ǁNāb ge a ǃgâi ǀgau sida hoada nî ǁgaeba. ǃGōsase da ga sida ǃgomsin ǃnâ gaxu ǁaeba gara mâǃkharu o.—Heb. 13:7.

16. Herbert Jenningsi tsî ǁîb kaikhoesa tsîna mâ ǃâubasen tama ra ge hâ i xū-e ge hōǃâ? (Jakobub 4:14)

¹⁶ ǂGui ǃoaba-aon Jehovab din ge ǃgâubasen taman ge hâ i ǀaen ǀkha ǃgoma ra tsâ. Aiǁgause ǁîb ûib xa hâ khomaiǃâs ǃnâb ge ǃgâsab Herbert Jenningsa  b gere ǁguiǃā. ǁÎb tsî ǁîb kaikhoes matikōse ǁîra di sîsabē ǁgaumâis ǃnâ gere ǃgâiaǂgao ǀgausa, Ghanab ǃnâ. Xaweb ge ēga ǁkhōǁkhōsa ǀaeba ge hō hîna ǁîb di tsâsiga gere tsâǀkhāba. ǁÎb di mâsibab ge Jakobub 4:14 sa ǃoa ge ǁnaeǁgau mî rase ‘ǁari nî īn xa ta ge a ǀū.’ (Khomai re) ǁÎb ge ge xoa: “Mîǁguim ge ge îm Ghanab tsî sim ǀgū ǀhōsan tsîna ǁnāxu tsî Kanadaba ǃoa doe-oa [ǀaeǃkhōhes ǃaroma].” Jehovab ge ǃgâsab Jenningsi  tsî ǁîb kaikhoes tsîna ge hui, î ra ǁîba ǂgomǂgomsase ǃoaba hōǃâ ra ge ǃgomsin ǃnâ.   

17. ǃGâsab Jenningsi aiǁgausa mati ǃgâsana ge ǂkhâǃnâ?

¹⁷ ǃGâsab Jenningsi ǂhauǃnâ ǃereamdi ge ǂgui khoena kaise ge hui. ǀNî ǃgâsas ge ge xoa: “ǂKhâǃnâhe tsâ tama ta hâ khami ta ge ge ǂkhâǃnâhe, nē khomai ǃâsa da ge khomai o . . . ǃGâsab Jenningsi ge mati ǁîb ǁgaumâisa ǁnāxu tsî ǁîb di ǂurusiba sī kōǃâsa mûs ge tita ge hui î ta ti mâsib xa ǀnōsa mûǂuiba ūhâ.” ǀGui ǃgâsab tsîn ge ge xoa: “10 Kuriga ta ǀhaohâb ǃûi-aose gere ǃoaba xawe ta ge ǁnā ǁgaumâisa nî ǀûs ge ge ī. Ti ǂkhûs ǃnâ ta ge ūhâ i ǀaeb [depresib ] xa ǃaromahe hâse. Kaise ta ge hoaǁae gere ǂkhabuǂâi tsî ta ge ǃgâsan ûib xa hâ khomaiǃâ di tsîna ge khomai ǁoa i. . . . Xawe ǃgâsab Jenningsi ge mati mâǀkharas xa khomais ge tita ge hui.” Nēs ge sida ra ǂâiǂâiǃnâ î da ǃâubasen tama da hâ ǃgomsina da ga hōǃâ, o nauna ǂkhâǃnâ. Sida ûiba ra ǃgom kai xūn ga ǃâubasen tama da hâse ǀkhara. Xawes tsîna da ge naun ǃaroma aiǁgause a īǁkhā, ǂgoms tsî mâǃkharus ǃnâ.—1Pet. 5:9.

18. Nē ai-īsib ǃnâ i ra ǁgauhe khami da tae-e Nigiriab ǃoatarasa xu a ǁkhāǁkhāsen ǁkhā?

¹⁸ Coronas khami ī tsūkeǃgâgu ge ǂgui khoen Jehovab dina ge tsâǀkhā. Aiǁgauses ge Nigiriab ǃnâ ra hâ ǃoatarasa, ǀoro ǂû-i tsî mari-i tsîna ge ūhâ i. ǀGui ǁgoas ge ǁîs ǀgôarosa ge dî tae-e ra nî ǂûsa, ǁîra ǀuniga rysi-e ra ge sâi toao. Sida di ǃgâsas ge ǁîs ǀgôarosa ge mîba ǂû-i tsî mari-e ra ūhâ tamasa. Xawe ra ge Sarefats di ǃoatarasa nî ǁgae. ǁÎra di ǀuniga ǂûro-e aiǂhumi tsîra ge ǀoasase Jehovab ǃnâ ge ǂgomǃgâ. (1Gao. 17:8-16) ǁNā tsēs di garab ai ra nî ǂû xū-i xa ra nî ǂâis aiǃâ ra ge  ǃgâsana xu ǂû-e ge hō. ǁNā ǂû-i ge ǀgam wekhegu ǃaroma ge ǂâu hâ i. ǃGâsas ge ra mî ǀūs ge ge ī Jehovaba matikōse ǁîs ǀgôasas gere mîba xūna gere ǃgâ ǀgausa. Amase da ga Jehovab ai gara ǂgomǃgâ o, o î ge ûib di ǃgomsina ǁîba ǃoa a ǂgae da ǁkhā.—1Pet. 5:6, 7.

19. Aleksey Yershova mâ mâǃoasa ge ǃkharuǃnâ?

¹⁹ Nē ge ǃkharu kurin ǃnâ î ge sida di ǂgui ǃgâsagu. Tsî ǃgâsadi tsîna ǃâubasen taman hâ mâǃoade gere mâǃkharu. ǃGâsab Aleksey Yershovi hîna Russiab ǃnâ ra hâb xa ǂâi re. Yershovi ge 1994 a ǁāǁnâhe, on ge Jehovab ǃoaba-aon hîna ǁnā ǃkhais dawa ra hâna ǃnorasasiba ge ūhâ i. Ega î ge mâsiba Russiab ǃnâ sī ge ǀkhara. 2020ǁÎ kurib ǃnâb ge ǃgâsab Yershovi omsa ge ôaǃnâhe. Tsî îge ǁîb ge ūhâ i xūna ge ūhe. ǀNî ǁkhâga ǃkharu tsîb ge ǂhanub xa ǂkhābadī-ao-i ase ge ǃnuriǃgâhe. Nē xūn ǂam-ai îi ge nē ǃnuriga, Elobmîs ǃnâ ǃgâiǃgâibasensa ūhâ khami gere dīsen khoe-i ge ǃkhōǁnâ hâ i vidiob ai ge ǃgaoǃgaosa i. ǁGai ǀapēxu ge īs ge.   

20. ǃGâsab Yershova mati ǁîb ǀhōsagusisa Jehovab ǀkha ge ǀgaiǀgai?

²⁰ ǃGâi xū-e ge ǂoaxa, ǃgâsab Yershovi ge mâǃoahe ǀgauba xu? Îo. Jehovab ǀkhab ūhâ ǀhōsagusis ge kaise ge ǀgai. ǁÎb ge ra mî: “Tita tsî ti kaikhoes tsîn ge ǃnāsa ǁaega ǀguiba ra ǀgore. Mûǂan ta ge ra nē mâsiba ta Jehovab huib ose a mâǃkharu ǁoasa.” ǁÎb ge ǀaro tsî ra mî: “Elobmîsa ôaǃnâs ge ǂkhabuǂâi ta ga ra, o ra huite î ta ǃkhamǃoa ǁkhā. ǃKharu gere ǁaeb ǂgomǂgomsa khoen aiǁgaudi xa da ge ra ǂâiǃgâ. ǂGui ǃnaeǃkhaidi ge Elobmîs ǃnâ hâ hîna ra ǁgaude, matikōse i a ǂhâǂhâsasa î da ǃnomsase hâ. Tsî Jehovab ai ǂgomǃgâ.”

21. Tae-e da go nē ǁkhāǁkhāǃâs ǃnâ ǁkhāǁkhāsen?

²¹ Tae-e da go nē ǁkhāǁkhāǃâs ǃnâ ǁkhāǁkhāsen? ǀNî ǁaegu ai da ge ǃâubasen tama da hâ ǃgomsina nē ǃhūbaib ǃnâ ra hōǃâ. Mati i ga ī xaweb ge Jehovaba, ǁîb ǃoaba-aona hoaǁae ra hui. ǁÎb ain ga ǂgomaiǂnûi o. Sida dana xoas ra mî khami: ‘ǂHanu-ai khoen di tsûgu ge a ǂgui xaweb ge Jehovaba ǁîna hoana xu ra ǃnoraǃnora.’ (Psa. 34:19) Hā da dītsâ tsî aiǃgû, Jehovab ǀgaib ai sida ǂâisa ǂnûisa, sida ǃgomsin ose. ǁNāsa da ga dī o da ge apostel Paulub khami a mî ǁkhā: “Tita ge hoa xūna a ǁkhā, ǁnāb tita ra ǀgaiba māb ǃnâ-u.”—Fil. 4:13.