1. ǁGuiǃā re tae-i ge īsa Jesub ge ǁîb ǂguro buruxa dība a dī o.

 MÛNANAI re, 29ǁî kuri Jesub ge ǁîb di aoǁnâ sîsen-e a tsoatsoa o, Kanas ǃgāros ǃās Nasarets noordes ǀkhāb ai hâs ǃnâ. Jesub, ǁîb ǁgûs Marias tsî ǀnî ǁkhāǁkhāsabegu tsîn ge ǃgammeba ǃoa ge ǁkhauhe. Marias ge a ǀaokhoe tsî īǁkhā î ga o, ǀnîsi ǃhaokhoena ǃkhōǃoas ǀkha gere hui. Xawe ǃgammeb ǁâudib tawa î ge xū-e ge ī hîna omaris tsî ǃgamme ra khoera ga taotao hâba. Xûi-i ge ge toa. b Īǁkhā î ga o, on ge ǃhaokhoena ǀnîsi ge ǂgui i. Marias ge ǁîs di ǀgôaba ǃoa ge mî: “ǂAuxûi-i ge go toa.” (Jhn. 2:1-3) Jesuba tae-e ge dī? ǁÎb ge buruxa xū-e di tsî ǁgamme “ǃgâi ǂauxûi-e” ǃoa ge tawa.—Jhn. 2:9, 10.

2-3. (a) Mâ buruxa dīgab ge Jesuba gere dī? (b) Mati da ǃgâiba a hō ǁkhā, Jesub di buruxa dīgu xa ǂâiǃgâsa xu?

² Jesub ge ǂgui buruxa dīga ǁîb gere aoǁnâ ǁaeb ǃnâ ge dī. c ǁÎb buruxa ǀgaib ǀkhab ge ǂgui khoena gere hui. Aiǁgause da ge ǁîb di 2 buruxa dīga xu ra ǁkhāǁkhāsen, ǂguroseb ge 5 000 khoega ge ǂûma tsî ēga 4 000 khoega. Nēn ge ǀnîsi ge 27 000 khoe-i, tarekhoedi tsî ǀgôan tsîna ǃkhōǂgā hâse. (Mat. 14:15-21; 15:32-38) Hoa ǀgam ǃnāra  aib ge Jesuba, ǀaesen ge hâ i khoena ge ǂgauǂgau. (Mat. 14:14; 15:30, 31) Mûnan-ai re khoen ge mati gere buru ǀgauba, Jesub ge ǁîna ǂgauǂgau tsî a ǂûmā o.

³ Jesub di buruxa dīga xu da ge ǂgui xūna netsē ra ǁkhāǁkhāsen. Nē ǁkhāǁkhāǃâs ǃnâ da ge ǁnā buruxa dīga xū, ǀnî xūn hîna sida ǂgomsa a ǀgaiǀgai ǁkhāna nî ǃhoaǃgao. Tsî da ge nî ôaǃnâ mati da Jesub ǃgamǃgamsenxasib tsî ǀkhomxaǂgaosib tsîna a ǁgae ǁkhā ǀgausa, nē buruxa dīgab gere dī o.

4. Jesub gere dī buruxa dīgu hîna sida ǂgomsa ra ǀgaiǀgaiga tae-e ham-i xa ra ǁkhāǁkhāda?

⁴ Jesub gere dī buruxa dīgu ge, sida ǂgomsa ra ǀgaiǀgai xūna ǁîb xa ǀgui ǁkhāǁkhā tama hâ xawe ǁîb di ǁgûb xas tsîna. Nēs ge Jehovab ge Jesub di buruxa dīga gere īǁkhā kai amaga. ǃNaeǃkhaidi 10:38 ge ra mîba da: “Elob ge Jesub, Nasaretǁîba ǃAnu Gagab tsî ǀgaib ǀkha ǀnau ǃkhaisa du sado ǂan ǃkhaisa. Tsîb kom Jesuba ǁnās khaoǃgâ ǁgâuab xa ǁgâiǀāhe hân di ǂuruǂurus tsî ǃgâi sîsenga gere dīo, Elob ge hâǀkhā bi i xui-ao.” ǂÂis ǃnâs tsîna ūhâ re, Jesub ge ǁîb gere mî tsî dī xūn ǃnâ ǀoasase ǁîb di ǁGûb ǂâiǀgaub tsî tsâsiga gere ǁgae. ǁÎb di buruxa dīgu tsîna ǃkhōǂgā hâse. (Jhn. 14:9) Jesub di buruxa dīga xu da a ǁkhāǁkhāsen ǁkhā xūna ǃgaoǃgâ re.

5. Tae-e Jesuba ge ǂkhâǃnâ buruxa dīga dīsa? (Mateub 20:30-34)

⁵ ǂGurose, Jesub tsî ǁîb ǁGûb tsîn ge kaise a ǀnamda. Jesub ge ǃhūbaib aib ge hâ io ǁîb di kai ǀnamma, buruxa dīgu ǃnâ-ū gere ǁgau ǃgomma ra tsâ khoena huis ǃnâ-ū. ǀNî ǃnā-e kha ge ǀgam ǂgī khoekha ge ǀkhomabi îb hui kha. (Khomai re Mateub 20:30-34 sa.) ǃGaoǃgâ re, Jesub ge ǁîkha “kaise ge ǀkhom” tsî ge ǂgauǂgau kha. Nēba ra sîsenūhe Grike gowab mîs, “ǀkhom” di hâs ge ǂgaob ǃgamsib ǃnâ da ra tsâ ǀgauba ǃoa ra ǁnaeǁgau. ǁNā ǀkhomi ǃnâ-ūb ge Jesuba gere ǁgau, khoenab a ǀnam ǃkhaisa. ǁNās ge Jesub tsîna gere ǂkhâǃnâ ǃâ a khoena ǂûmā tsî ǃomamaxa ǁōsa ge ūhâ i khoeba ǂgauǂgau. (Mat. 15:32; Mrk. 1:41) ǂGomǃgâ ǁkhā da ge a, Jehovab “ǀkhomxaǂgaosib” di Elob tsî ǁîb ǀGôab tsîn kaise a ǀnam dasa. Tsî sida ǃgomsigu xa tsūse ra tsâsa. (Luk. 1:78; 1Pet. 5:7) ǁÎkha ge ra ǁkhore, ǃgomsin hîna khoesiba ra tsâǀkhāna ūbesa.

6. Eloba mâ ǀgaiba Jesuba ge mā?

⁶ ǀGamǁîse, Elob ge Jesuba ǀgaiba ge mā îb hoa ǃgomsigu khoesib diga ūbe. Jesub ge buruxa dīga gere dī o, ob ge ge ǁgau sida tātsē a ūbe ǁoa ǃgomsigab a ūbe ǁkhāsa. Aiǁgauseb ge ǀgaiba ūhâ, sida ǃgomsiga xu oresa. ǁNāp ge ǀumi da ge ǁoreb tsî hoa xūn hîna ge ǁoreb xa a ǃaromahena, ǀaen tsî ǁōb tsîna ǃkhōǂgā hâse. (Mat. 9:1-6; Rom. 5:12, 18, 19) ǁÎb buruxa dīn ge ge ǁgau, ‘hoa ǀaesenainab’ a ǂgauǂgau ǁkhāsa tsî ǁō hân tsîna khâisa nî māsa. (Mat. 4:23; Jhn. 11:43, 44) ǁÎb ge ǀgaib tsîna ūhâ, ǀgaisa ǂoade ǃnomǃnom tsî khoena demoga xu ores diba. (Mrk. 4:37-39; Luk. 8:2) Nēs ge ǂgomǃgâsiba ra māda, ǂansa Jehovab ge ǁnāti-i ǀgaiba ǁîb di ǀgôab ǃomdi ǃnâ a māsa.

7-8. (a)Jesub di buruxa dīna tae-i ǂgomǃgâsiba ra māda? (b)Mâ buruxa dīna ǃoa du ra mûǂui ǀasa ǃhūbaib ǃnâ?

⁷ ǃNonaǁîse, da ge ǂgomǃgâsiba a ūhâ ǁkhā hānîǁaeb ǀkhaeb nî ama kaisa Elob  gaosib ǃnāga. Jesub ge ǃhūbaib ai hâ i ob gere dī buruxa dīn ge gere ǁgau, taenab hoa ǃhūbaib ǂhawase nî dīsa. ǁÎb a Elob gaosib di ǀhomsi gao-ao amaga. ǂÂi re taena da ǀgū ǁaeb ǃnâ nî hōǃâsa. Xristub hoaraga ǃhūbaiba ga ra ǂgaeǂgui o. ǀOasa ǂurusiba da ge nî hōǃâ. ǁîb hoa ǀaegu tsî sorosi ǃnubusin hîna khoena ǃgomsina gere ǃaromaba na nî ūbē amaga. (Jes. 33:24; 35:5, 6; J.ǂHa. 21:3, 4) Tātsē da ge ǃâ tide tamas ka io tsūkeǃgâgu hîna ǃgomsina ra ǃaromaga hōǃâ tide. (Jes. 25:6; Mrk. 4:41) Kai ǃgâiaǂgaoba da ge nî ūhâ sida di ǀnamsaben hîna, ‘ǀhōbade’ xu ra ǂkhaiǂkhaihena da ga ra ǁkhoreǁhare o. (Jhn. 5:28, 29) Hā nî ǀasa ǃhūbaib ǃnâ du ma buruxa dîga ǃoa ra mûǂui?

⁸ Jesub ge buruxa dīgab gere dīo kai ǃgamǃgamsenxasib tsî ǀkhomxaǂgaosib tsîna gere ǁgau. Sada tsîn ge ǁnā ǀgauga a ǁgae ǁkhā. Hā re î da ǀgam aiǁgaura ǃoa kō. ǂGurose da ge Kanas tawa ge hâ i ǃgamme ǁâudīb xa nî ǃhoaǃgao.

9. Jesuba tae-e ge dī ǃgammeb ǁâudīb tawa? (Johaneb 2:6-10)

⁹ Khomai re Johaneb 2:6-10 sa. Xûi-i ge ǃgammeb tawa a toa, o î ge ǂhâbasa i Jesub ga xū-e ǁî-i xa dī hâsa? Hî-î, kēbo î ge ge ǀgai i hîna gere mî-e Messiab xûi-e nî kurusa. Xawe ǂâi re, sadu ǃgammeb tawa i ga xûi-e toa hâ o, mati du ga tsâ hâ? Jesub ge ǀnîsi omaris khoena gere  ǀkhom ǃgōsase ǃgamme ra khoera. Tsîb ge ǁîra taob ǃnâ ge mâi ǂao tama ge hâ i. ǁNā-amagab ge buruxa dī-e ge dī. ǁGameb ge xûi-e ǃoa ge dawa, 390 litergab ge ǃgâi xûi-e ǃoa ge tawa. ǀNîsib ge kaise ge dī, î-i ǀnî-e ǃgau tsî ǁamaxuhe. Tsî ǃgamme ge khoera marisise hui tamas ka io hanîǁaeb ǃaroma sîsenūhe ǁkhā. ǃGamme khoera ge amase kaise ge gangan.

10. Mâna ǀnî ǂhâǂhâsa xūn hîna Johaneb di 2ǁî danaǃâs ǃnâ a xoasa na? (Ai-īsiba mû re.)

¹⁰ Kō re, ǀnî ǂhâǂhâsa xūn hîna Johaneb di 2ǁî danaǃâs ǃnâ a xoasan xa. ǃGaoǃgâ i du go Jesub ge xapade ǁgammi ǀkha ge ǀoaǀoa tama hâ i. ǁÎb ai ǂâisa ǂnûi tama i tsîb ge ǃgāga ge mîba î gu ǁgammi ǀkhā xapade ǀoaǀoa. (6, 7ǁÎ ǁaraǃāra) ǁGammeb ge xûi-e ǃoa a dawa toas khaoǃgab ge Jesuba aitsama, ǀnî xûi-e ǁâudīb ǂgaeǂgui-aoba sī ge mā tama hâ i. Xaweb ge ǃgāga ge mîba i gu ǁnâsa dī. (8ǁÎ ǁaraǃās) Jesub ge ǁkhausa khoen aiǃâ xûi-ī kopiba ǀgapise ǃkhōkhâi, koasen tsî ge mî tama hâ i: ‘Tita nēsi go kuru xûi-e tsâ re’ di.

11. Tae-e da Jesub buruxadība xu a ǁkhāǁkhāsen ǁkhā?

¹¹ Tae-e da Jesub ge ǁgamme ǂauxûi i ǃnâ a dawa, buraxa dība xu a ǁkhāǁkhāsen ǁkhā? ǃGamǃgamsenxasib xa da ge ra ǁkhāǁkhāsen. Jesub ge buruxadīb xa ge koasen tama hâ i tsîb ge tātsēs tsîna ǁîb gere dī xūn xa ge koasen tama hâ i. Xaweb ge hoaǁae ǃgamǃgamsenxasib ǀkha, hoa ǂkhaisib tsî koas tsîna ǁîb ǁGûba gere mā. (Jhn. 5:19, 30; 8:28) Jesuba ǁgae tsî da ga ǃgamǃgamsenxa ǂâiǀgauba sida xa ūhâ. O da ge dī da ra xū-i xare-i xa koasen tide. Tae-i ǀgui-e da ga Jehovab ǃoabas ǃnâ gara dī xawe da ge tā aitsama nî koasen. Tsî buruxa Eloba da ra ǃoabas aiǂhanub xa nî koasen. (Jer. 9:23, 24) Anub hâ ǃgôasiba da ge nî mā bi. Tātsē da ge Jehovab di huib ose, ǃgâi xū-i xare-e a dī ǁoa.—1Kor. 1:26-31.

12. Mâpa a ǀgui ǀgau, Jesub ǃgamǃgamsenxasiba da a ǁgae ǁkhāba? Aiǁgau-e mā re.

¹² Kō re ǀnî ǀgaub hîna da, Jesub ǃgamǃgamsenxasiba a ǁgae ǁkhāba. Saora aiǁgausa mûnanai re. ǀHaohâb ǃûi-aob ge ǃnāsa ǁaeba ǁamaǂui tsî ǂkham ǀhaohâb hui-aoba ǁîb ǂguro ǃhoasa aiǂhumis ǀkha ra hui. ǀHaohâb ǃûi-aob xab ge huihe amagab ge ǂkham ǃgâsaba, ǂkhâǃnâ ra ǃhoasa ge mā ǀhaohâba ge ǃgâiba īsa. ǀHaos khaoǃgâ î ge khoe-e ǀhaohâb ǃûi-aoba ǃoa ra mî: ‘Kaise go ǃgâi ǃhoasa mā khoeb ge tox amae?’ ǂHâbasa-e ǀhaohâb ǃûi-aob nî mîsa: ‘Îo xawe kai ǁaeba î ge ge ū ǁîba huisa.’ Tamas ka iob ǃgamǃgamsenxase nî mî: ‘Kaise ta ge ǁîb ai a ǂnîsa.’ ǃGamǃgamsenxa da ga, o î ge ǂhâbasa tama nau khoena da ra dība ǃgâi xūn ǃgao da koasa nî ūsa. Jehovab dī da ra xūna mû tsî ra ǃgôaǃgâsa ǂans ǀkha da ge ǂâu hâ. (ǀGopeǀnō re Mateub 6:2-4 sa; Heb. 13:16) Jesuba ǁgae tsî da ga ǃgamǃgamsenxasiba gara ǁgau, o da ge Jehovaba ra ǂkhî kai.—1Pet. 5:6.

13. Nain di ǀon hâ ǃās ǀgāseb ge Jesuba tae-e mû tsî ge tae-e dī? (Lukab 7:11-15)

¹³ Khomai re Lukab 7:11-15 sa. Saora xū-e mûnanai re, Jesub ǃkhare ǁaeba aoǁnâ hâ hîna ge ī-e. Nainsa ǃoab ge ge ī, Sunemsa xu ge ǃnū tama hâ īsa. Kēbo-aob Elisab ge kaikhoes ǀgôaba 900 kurina ǃkharu tsî ǂkhaiǂkhaiba. (2Gao. 4:32-37) ǃGûb ra hînab ge Jesuba ra mû, ǁō hâ soros ǃāsa xū ra ǂoaxa ūhe hîna. Nē mâsib ge kaise a tsûaǂgaosa, ǃoataras ǀgôab  ge a ǁō amaga. Nē ǁgûs ge ǀguri ge hâ tama hâ i, ǂgui khoen ǃās din ge ǁîs ǀkha ge hâ i. Jesub ge ǁîna mâ kai tsî buruxa xū-e ge dī, ǁîs ǀgôabab ge khâisa ge mā. Nēs ge a ǂguro ǃnona khâidi di ǀguis hînab ge Jesuba a dīde Elobmîs ǃnâ hâde.

14. Mâna ǀnî ǂhâǂhâsa xūn hîna Lukab 7ǁî danaǃâs ǃnâ ra hōhena? (Ai-īsiba mû re.)

¹⁴ ǀNî ǂhâǂhâsa xūn hîna Lukab 7ǁî danaǃâs ǃnâ hâna kōǃgâ re. Jesub ge ǃoara ǁgûsa ge “mû” tsîb ge “kaise ge ǀhomsi.” (13ǁÎ ǁāraǃās) Tae-eb ge mû? ǀNîsib ge ǁîs soros aiǃâ ra āsab ge mû, o ǁîsa kaise ge ǀkhom. Jesub ge nē ǁgûsa ǀkhom tsâsib ǀguiba ge ūhâba tama hâ i. Xaweb ge ge ǁgau ǁîsab ra tsâbasa. ǁÎb ge ǁîsa tsaura dommi, ǂgomǃgâsiba ra ǁgaub ǀkha ge ǃhoa ū tsî ge mîba si: “Tā ā re” di. Tsîb ge māsenxase xū-e ge dī, ǁîb ge ǀgâoba ǁōba xu ge ǂkhaiǂkhai tsî “ǁgûsa ǀgôaba . . ge mā-ao.”—14, 15ǁÎ ǁāraǃāra.

15. Tae-e da Jesub ge dī buruxa dība xū a ǁkhāǁkhāsen ǁkhā?

¹⁵ Tae-e da Jesub di buruxa dīb, ǃoataras di ǀgôaba khâisa mās dība xū ra ǁkhāǁkhāsen? ǀKhomxaǂgaosiba nauna ǁgausa da ge ra ǁkhāǁkhāsen. Ama-as ge Jesub khami da ge ǁō hâna khâisa a mā ǁoa. Xawe Jesub khami da ge ǃoaran ǃaroma ǀkhomxaǂgaosiba omkhâi ǁkhā, ǁîna kōǃgâs ǃnâ-ū. ǀKhomxaǂgaosiba da ge ǁgau ǁkhā ǁîna hui tsî kōǃgâs ǃnâ-ū. d (ǂKhm. 17:17; 2Kor. 1:3, 4; 1Pet. 3:8) Mî tsî da ra dī ǂkhari xūron ge a ǁkhaeǂgao nî ǁkhā.

16. Ai-īsiba ǃnâ i ra ǁgau-e khami, tae-e du ǁgûs hîna ge ǁîs ǀgôasa ǁōb ǃnâ ǂoaǃnâs ǀkha ge ī xū-e xu ra ǁkhāǁkhāsen?

¹⁶ Nē aiǁgausa kō re ǀnî kuriga ǃkharu hâse. ǀHaos tawan da ǁnae hînas ge ǃgâsasa, ǁgûs ra āsa ge mû. ǁÎs ge ǀgūǁae ǁîs ǀgôasa ǁōb ǃnâ ge ǂoaǃnâ tsî ams ge khâis di ǃâubasens xa ge hâ i. ǁNāsas a ǂgan amagas ge ǃgâsasa ǁîs ǃoa ī tsî ǁnamǂgāsi tsî ǁîs ǀkha hoa amsa ge ǁnae toa. ǁGûs ge ega ge mî: “ǃGâsana ta ge kai ǀnamma  ra tsâba.” ǁÎs ge ǃgâise ge tsâ ǀhaosa ǃoas ge ī amaga. “ǁNāpa î ge sida ǃgao huiba hâ,” tis ge ge mî “ǁnāpa ǀhaohâb tawa.” ǂGomǃgâ ǁkhā da ge a Jehovab ǂkhari xuron hîna da ǃoa hân tsî ǁnān hîna “ǂgaogu ân khôaǂkhūsan” ǃaroma ra dīna mû tsîra ǃgôaǃgâsa.—Psa. 34:18.

17. Tae-e da go nē ǁkhāǁkhāǃâs ǃnâ ǁkhāǁkhāsen?

¹⁷ Jesub ûib xa hâ buruxa dīgu ǃnaeǃkhaide da ga Elobmîs ǃnâ ga ra ôaǃnâ, o î ge kaise a ǂkhâǃnâ da ǁkhā. ǁÎn ge ra ǁkhāǁkhāda Jehovab tsî Jesub tsîn kaise a ǀnamdasa. Tsîb Jesuba ǁnā ǀgaiba ūhâsa khoesib ǃgomsin hoana ǀam kaisa. Tsî da ǂgomǃgâsiba a ūhâ ǁkhāsa hānîǁaeb mîmâidi nî ama īsa. Nē ǃnaeǃkhaide da ga ôaǃnâ, o da ge nî ǂâiǃgâ mati da Jesub ǀgauba a ǁgae ǁkhāsa. ǀNîsi du ge ǀapeǁguiba dī tsî sadu omaris ǃoabas ǃnâ ǀkhara buruxa dīn Jesub dina ôaǃnâ ǁkhā. Kō re tae-e du a ǁkhāǁkhāsen ǁkhāsa tsî naun ǀkha ǁkhāǁkhāsen du go xūna ǀgoragu re. ǁNāsa du ga di, o du ge ǂgui omkhâi ra ǁgamǀhaode a ūha ǁkhā.—Rom. 1:11, 12.

18. Tae-e da saora ǁkhāǁkhāǃâs ǃnâ nî ǃhoaǃgao?

¹⁸ ǁÎb di aoǁnâ sîsenni ǀams aib ge Jesuba, ǃnonaǁî tsî ǀuniga khâis hîna Elobmîs ǃnâ xoasasa ge dī. Nē khâis ge ge ǀkhara i, ǁîb di ǀhōsabab ge ǁōba xu a ǂkhaiǂkhai amaga. Tsî ǁnāsab ge ǀkhara mâsib ǃnāga ge dī. Tae-e da Jesub ge dī buruxa ǃnaeǃkhaisa xu a ǁkhāǁkhāsen ǁkhā? Tsî mati da sida di ǃâubasensa khâis ǃnâ a ǀgaiǀgai ǁkhā? Saora ǁkhāǁkhāǃâs ǃnâ di ge nē dîde nî ǃhoaǃgaohe.