1-2. Tae-e da a dī ǁkhā ǀasa ǃhūbaiba da ǃâuhâ hîna?

 KAISE da ge Jehovab di mîmâis ǃaroma ra gangan. Nē ǃhūbaibab ǀasa ǃhūbaib ǂhanu-aisib dib ǀkha nî ǃkhōǃkhuni ǃkhais ǃaroma. (2 Pet. 3:13) Nē ǃhūbaib mâǁae nî hāsa da ga ǀū xawe î ge xūn hîna ǃhūbaib ǃnâ ra īna ra ǁgau, gaxuse da ǃnâu tidesa.—Mat. 24:32-34, 36; ǃNǃkh. 1:7.

² Gaxuse da ga amab ǃnâ a hâ xawe î ge a ǂhâbasa, î da sida ǂgomsa nē mîmâis ǃnâ ǀgaiǀgai. Tae-i ǃaroma? ǀGaisa ǂgoms tsîn a ǂkhabu ǁkhā amaga. Apostel Paulub ge ǂgomoǃnâsiba ‘ǁoreb hîna sada ai supuse ra ǂaeb’ di ge ǂgai. (Heb. 12:1) Sida ǂgomsa ǂkhabusa xu ǁkhaebas ǃaroma î ge a ǂhâbasa, hoaǁae da xūn hîna ǀasa ǃhūbaib ǀgūǁae nî ama kaib ra ǁgaun xa ǃgamse nî ǂâiǃgâsa.—Heb. 11:1.

3. Tae-e da nē ǁkhāǁkhāǃâs ǃnâ nî ǃhoaǃgao?

³ Nē ǁkhāǁkhāǃâs ǃnâ da ge ǃnona ǀgaugu sada di ǂgomsa da Jehovab di mîmâis ǀasa ǃhūbaib dis ǃnâ a ǀgaiǀgaiǃnâ ǁkhā ga nî ǃhoaǃgao: (1) xoremarib xa ǃgamse ǂâiǃgâs, (2) Jehovab di ǀgaib xa ǂâis, (3) gagasi xūna dīs. ǁNāpaxu da ge matis Jehovab di haisi-ams hîna ge Habakuki ǃoa hâ īsa sada di ǂgomsa nētsē ra ǀgaiǀgais xa nî ǃhoaǃgao. ǂGuro da ge ǀnî mâsigu hîna da ǀnîsi nēsi ra hōǃâgu xa nî ǃhoaǃgao. Hîna ǀgaisa ǂgomsa hānî ǀasa ǃhūbaib ǃnâ ǂgaoǀkhā hâ ga.

 ǀGAISA ǂGOMSA ǂGAOǀKHĀ HÂ MÂSIGU

4. Mâ mîǁguiga ǀgaisa ǂgomsa ǂgaoǀkhā hâ?

⁴ Tsēs hoasa da ge mîǁguiga ra dī hîna ǀgaisa ǂgomsa ǂgaoǀkhā hâ ga. Aiǁgause mîǁguiga da ge ra dī hîna sida ǀhōsan, ǁkhoaxa ǁaeba da nî ūhâ ǀgaus. ǁKhāǁkhāsens, ǃgammeb, ǀgôan tsî sida sîsenni tsîna ǃkhōǂgā hâga. ǃGâise da ge ra dī dîsen da ga o: ‘Ti mîǁguiga ǁgau i ra tita ra ǂgom ǃkhaisa nē ǃhūbaib nî ǀam tsî ǀgūǁae nî ǃkhōǃhunihesa Elob ǀasa ǃhūbaib ǀkha? Tamas ka io ti mîǁguiga ra ǂgaeǂkhabuhe, khoen hîna ǁōb tawan hoa xūna ra ǀamse ra ûin xa?’ (Mat. 6:19, 20; Luk. 12:16-21) Sada di ǂgomsa da ga ǀasa ǃhūbaib ǃhaese nî ǀkhīs ǃnâ ga ǀgaiǀgai, o da ge ǃgâi mîǁgui ga nî dī.

5-6. Tae-i ǃaroma da ǃgom ǁaegu ǃnâ ǀgaisa ǂgomsa ǂhâhâ? Aiǁgau-e mā re.

⁵ ǀGaisa ǂgomsa ǂgoaǀkhā hâ ǃgomsin tsîna da ge ra hōǃâ. ǀNîsi da ge ǃgôaǃgonhe, ǂgauhe ǁoasa ǀaeb tamas ka io da ge ǀkhara xūn hîna a ǂkhabuǂâi kai ǁkhā dana ra hōǃâ. ǂGuro da ge ǀnîsi a tsâ ǁkhā sida di ǃgomsigu ǃnâ da a mâǀgai ǁkhā di. Xawe nēti ī ǃgomsin ge gaixu ǁaeba a aiǃgû ǁkhā. ǁNā-amaga da ge ǀgaisa ǂgomsa ǂhâba hâ î da mâǀgai ǁkhā. Tsî Jehovaba ǃgâiaǂgoab ǀkha ǃoaba ǀgara.—Rom. 12:12; 1Pet. 1:6, 7.

⁶ ǃGomsiba da ra hōǃâ ǁaeb ai da ge ǀnîsi a tsâ ǁkhā Jehovab ǀasa ǃhūbaib tātsē ǀkhī tide di. Nēsa sida ǂgoms a ǂkhabusa di ra ǂâibasen? Hî-i. Nē aiǁgaus xa ǂâi re. Saob ǁaegub ǃnâ da ge kaise i ga ǃkhaio, a tsâ ǁkhā tātsē i ǀgammi ǁaeba hā tide di. Xaweb ge ǀgammi ǁaeba ra hā. ǁNās khami da ge kaise da ga ǂkhabuǂâio, ǀnîsi ǀasa ǃhūbaib tātsē hā tide khami a tsâ ǁkhā. ǀGaisa ǂgomsa da ga ūhâ, o da ge a ǂan Elob mîmâidi nî dīǀoaǀoahesa. (Psa. 94:3, 14, 15; Heb. 6:17-19) ǁNā ǂgomǃgâsib ǀkha da ge aiǃgu tsî Jehovab di ǃoabasa ǂgurose sada ûib ǃnâ a mâi ǁkhā.

7. Mâ ǂâiǀgauba xu da nî ǂgōsen?

⁷ Aoǁnâ sîsenne dīs ǃaromas tsîna da ge ǀgaisa ǂgomsa ǂhâhâ. ǂGui khoen hîna da ra aoǁnâban ge ra tsâ “ǃgâiǂhoâs” hîna Elob ǀasa ǃhūbaib xa hâs ama hā tidesa. (Mat. 24:14; Ese. 33:32) ǂAnbasen da ge nî î da tā Jehovab ra ǁkhāǁkhāda xūn ǃnâ ǂgomoǃnâ, ǁîn ra dī khami. ǁNā-i nî īs aiǃâ da ge aiǃgû tsî sida ǂgomsa nî ǀgaiǀgai ǀgara. Hā re î da ǃnona ǀgaugu hîna da ǁnāsa a dī ǁkhā ga ǃhoaǃgao.

XOREMARIB XA ǂÂIǃGÂS

8-9. Xoremarib xa ǂâiǃgâsa mati sida ǂgomsa a ǀgaiǀgai ǁkhā?

⁸ ǀGui ǀgaub sada di ǂgomsa da a ǀgaiǀgai ǁkhāb ge xoremarib xa ǂâiǃgâsa. Xoremarib ge Elob mîmâidi nî ama dīǀoaǀoahesa ra ǁapoǁapo. Xoremarib ge tae-i ǃaroma māhes. Tsî tae-e î ge ǃkhōǂgā hâ is xa da ga ǃgamse ǂâiǃgâ, o da ge sida ǂgomsa ra ǀgaiǀgai. Elob mîmâis ǀamo ûib ǃgâi ǃhūbaib dis nî dīǀoaǀoahe ǃkhaisa. Tae-i ǃaroma da ǁnāsa a mî ǁkhā?

⁹ Xoremariba tae-e ge ǃkhōǂgā hâ i? Jehovab ge ǁîb di ǀnamǀnamsa ǀguise ǃnae hâ ǀgôaba. ǀHomma xu ǃhūbaiba ǃoa ge sî, îb ǀoasa kurusa ūhâ khoese ǃnaehe. Jesub ge ǃhūbaib aib ge hâ io ǃkharagagu ǃgomsin ǃnâ ge mâǀgai. ǁNāpaxub ge tsâ tsî tsûtsûsa ǁōba ge a ǁō. Jehovab ge kaise ǀgapi marisa ge matare. Sada ǀnamxaǃnâ Elob ge tātsē ga mā-am tama hâ ǁîb ǀgôaba ǃgoma tsâ tsî ǁōsa. Sada ǃgâi xawe ǃnubu ûiroba mās ǃaroma. (Jhn. 3:16; 1Pet. 1:18, 19) Jehovab  ge ǁîb ǀo-aisa ǀGôaba sada huis ǃaroma a mā, amagab ge nî īǁkhā kai î da ǀamose ǀasa ǃhūbaib ǃnâ ûi ǁkhā.

JEHOVAB DI ǀGAIB XA ǂÂIS

10. Efeseǁîn 3:20 ǃoagub Jehovaba tae-e a dī ǁkhā?

¹⁰ ǀGamǁî ǀgaub hîna da sida ǂgomsa nî ǀgaiǀgaib ge Jehovab di ǀgaib xa ǂâisa. ǁÎb ge mîmâib ge xūn hoana dīs di ǀgaiba ūhâ. Ama asa ge ǀamose ǀasa ǃhūbaib ǃnâ ûis di mîmâis nî dīǀoaǀoahes, ǂgui khoena īǁoabase ra mûsenbasa. Xawe xūn hîna khoena tātsē a dīǀoaǀoa ǁoanab ge Jehovaba hoaǁae ra mîmâi. Nēsab ge a dī ǁkhā Hoaǀgaixa Elob a amaga. (Job. 42:2; Mrk. 10:27) ǁNā-amaga da ge buru tama hâ, ǁîb ge buruxa xūna mîmâiba da o.—Khomai re Efeseǁîn 3:20 sa.

11. ǀGui aiǁgau-e mā re Elob di buruxa mîmâide xu. (Boksisa khomai re “ ǀNî buruxa mîmâidi hîna dīǀoaǀoasa di” di hâsa.)

¹¹ Hā re î da ǀnî xūna ǃhoaǃgao, Jehovaba ǃkharu ge ǁaeb ǃnâ ǁîb khoena a mîmâibana. Hîna ge īǁoase gere mûsenan xa. ǁÎb ge Abrahammi tsî Saras tsîna ge mîba, ǁîra kairasis ǃnâ ra ǀgôaba nî hōsa. (Gen. 17:15-17) ǁÎb ge Abrahammi tsîna ge mîba ǁîb surib Kanan ǃhūba nî māhesa. Abrahammi surib Israelǁîn ge ǃgāse Egipteb ǃnâ hâ i ǂgui kurigu di ǁaeb ǃnâ i ge ǀnîsi gere mûsen ǁnā mîmâis tāstē dīǀoaǀoahe tidesa. Xawe î ge ge ama kai. ǂGui kuriga ǃkharu tsîb ge Jehovaba ge mî, Elisabets kairas ge ī xawe ǀgôaba nî hōsa. ǁÎb ge Marias hîna ge ao-i ǀkha ge ǁgoeǀhao tsâ tama hâ īs tsîna ge mîba, ǁîb di ǀgôabas nî ǁorasa. Nēs ge mîmâis hînab ge Jehovaba duisend kuriga ǃkharu. Tsî Eden ǃhanab ǃnâ a mîmâisa nî dīǀoaǀoa.—Gen. 3:15

12. Josuab 23:14 tsî Jesajab 55:10, 11 tsîna tae-e Jehovab ǀgaib xa ra ǁapoǁapoba da?

¹² Jehovab ge dī mîmâidi hoadi xa da ga ǂâi. Tsî matib ge ǁîde a dīǀoaǀoasa, o da ge ra ǁnâuǃā kai ǀgaibab ūhâsa. Tsîs ge sada ǂgomsa nî ǀgai, ǁîb di mîmâis ǀasa ǃhūbaib dis ǃnâ. (Khomai re Josuab 23:14; Jesajab 55:10, 11 sa.) ǁNās ge ra huida î da ǃgâise aiǂhomisa tsî nauna hui în ǁnâuǃā ǀasa ǃhūbaib mîmâis ǁhabo tama ǃkhaisa. Jehovab ge ‘ǀasa ǀhom-i tsî ǀasa ǃhūb’ xa aitsama ge mî: ‘Nē mîde ge a ama tsî ǂgomǂgomsa.’—J.ǂHa. 21:1, 5.

JEHOVABA ǃOA NÎ ǀGŪ KAI DU XŪNA DĪ RE

13. ǀHaohâb ǀhaode mati sida ǂgomsa a ǀgaiǀgai ǁkhā? ǁGuiǃā re.

¹³ ǃNonaǁî ǀgaub hîna da sada ǂgomsa ǀgaiǀgai ǁkhāb ge ǁaeba ǁamaǂui tsî gagasi xūna dīsa. Aiǁgau-e kō re mati da sada ǀhaohâb ǀhaode xu ǃgâiba ra hōsa. Annas, hîna ge ǂgui kuriga ǃkharagagu ǃâgu aoǁnâ sîsenni di gu ǃnâ ǀoasase ǁhao hâ îs ge ra mî: “ǀHaodi ge ti ǂgomsa ǀgaisase ūhâ ǀgaras ǀkha ra huite. ǃHoa-aob ga ǃgâi ǁkhāǁkhā-ao tama i. Tamas ka io ǀasa xū-e mî tama i xawe. Hoaǁae ta ge xū-e ra ǁnâu hîna ra huite-e î ta Elobmîsa ǃgâise ǁnâuǃā. Tsî ǁnās ge ti ǂgomsa ra ǀgaiǀgai.” b Sida ǂgoms tsîn ge ǀgai ǁkhā, sida ǃgâsan ǃereamde da ga ǀhaodi tawa ǃgâise ǃgâ o.—Rom. 1:11, 12; 10:17.

14. Aoǁnâ sîsenne mati sida ǂgomsa ra ǀgaiǀgai?

¹⁴ Sida ǂgoms tsîna da ge ra ǀgaiǀgai aoǁnâ sîsenni ǃnâ da ga ǁkhao o. (Heb. 10:23) Barbaras hîna Jehovab 70 kurina ǃoaba hâs ge ra mî: “Aoǁnâ sîsenni ǂgomsa hoaǁae ra ǀgaiǀgaisa ta ge ra hōǃâ.  Nau khoen ǀkha da ǃnāsase Jehovab di buruxa mîmâidi xa ra ǁgam khamis ge ti ǂgomsa ûitsama tsî ǀgaisase ra ūhâ ǀgarahe.”

15. Elobmîsa aitsama ôaǃnâsa mati ǂgomsa ra ǀgaiǀgai? (Ai-īsiba mû re.)

¹⁵ ǀKhara Gagasi xū-i tsîn ge hâ sida ǂgomsa ra ǀgaiǀgai-e: Elobmîsa aitsama ôaǃnâs. Susans ge ra mî, mâǁaes nî ǁkhāǁkhāsensas ga ǀapeǁgui os ge ǁnāsa ǁîsa ra hui. ǁÎs ge ra mî: “Sontaxtsēs ai ta ge saora wekheb di ǃKhē xu ǂgō-ommi ǁkhāǁkhāǃâsa ra ǁkhāǁkhāsen. Mantaxtsēs tsî Dinstaxtsēs ai ta ge Wekheb ǁaegu hâ ǀhaosa ra aiǂhomiba. ǃGau ra tsēdi ai ta ge Elobmîsa aitsama ôaǃnâs ai ra sîsen.” ǁÎs ǁkhāǁkhāsens ǀapeǁguibas hoaǁae ra sao amagas ge Susansa ǀaro tsî ǁîs ǂgoms ai ra om. Irenes hîna ǂgui kuriga dana beros tawa gere ǃoabas ge Elobmîs kēbode ǁkhāǁkhāsens ǁîs ǂgomsa ra ǀgaiǀgaisa ge hōǃâ. ǁÎs ge ra mî: “Kaise ta ge a buruxabahe mati di Jehovab kēbode hoaraga ǂkhari xūron ǃnâs tsîna ra dīǀoaǀoahe ǀgaub xa.” c

‘AMASE NÎ HĀ’

16. Tae-i ǃaroma i Jehovab ge Habakuka ǃoa a mî mîde nētsē sida ǂâibasensa ūbâ hâ? (Hebreǁîn 10:36, 37)

¹⁶ ǀNî ǃoaba-aon Jehovab din ge nē ǃhūbaib di xūn ǀamsa gaxuse ǃâuhâ. ǀNî khoen ge ra ǂâi ǀams hās gaxuse ra ūsa. Xawe Jehovab ge a ǂan matin ǁîb ǃoaba-aona ra tsâ ǀgauba. ǁNā-amagab ge ǁîb kēbo-aob Habakuba ge mîba: “ǂHaiǂhais ge mîmâisa ǁaeba nî ǃâu, xawes ge ǃhaese nî hā tsîs ge nî ǂgomǂgomsa. Tsîs ga ǀhabe xawe ǃnūǃnâxasib ǀkha ǃâu, amases nî hā tsîs ǃonkhao tide xuige.” (Hab. 2:3) Eloba ǁnā ǂgomǂgomsa mîde Habakuki ǃgâib ǃaroma ǀgui ge mā? Tamas ka io  ǁîb mîde nētsē î sida tsîna ǂâibasensa ūba hâ? Jehovab ge apostel Pauluba ge mîba îb ǁnâ mîde Xristeǁîn hîna turaxasib ǀkha ǀasa ǃhūbaiba ǃâuhân ǃoagu sîsenū. (Khomai re Hebreǁîn 10:36, 37 sa.) ǂGomǃgâ ǁkhā da ge a Jehovab di mîmâis sada ores dis ga ǀhabe ǁaeba ga ra ū dīǀoaǀoahesa xawes ‘amase nî hā tsîs ǃonkhao tidesa.’

17. ǀGui ǃgâsasa mati Jehovab ge Habakuka a mā ǀapemāsa ge sîsenū?

¹⁷ ǂGui ǃoaba-aon Jehovab din ge ǁnā ǀapemāsa sao. Tsî “ǃnūǃnâxasib ǀkha” ǃâuhâ. ǂGuin ge ǂgui kuriga nēsa ǃâuhâ. Aiǁgause Louise di ǀon hâ ǃgâsas ge 1939 i ǃnâ Jehovaba ge ǃoaba tsoatsoa. ǁÎs ge ra mî: “ǁNā ǁaeb ai ta ge gere ǂâi Armagedons tita ǀgapi skoli ǀkha nî toas aiǃgâ nî hāsa. ǁNās ge ī tama ge ī. ǃKharu gere kurigu ǃnâ da ge ge khomai khoen hîna ge Jehovab ǁîb mîmâide nî dīǀoaǀoasa ge ǃâuhâ în xa. ǁNās ge ge huite î ta Jehovaba ǃâu, îb ǁîb mîmâide dīǀoaǀoa. Khomais tsîna ta ge ge dī, Noaxi, Abrahammi, Josefi tsî ǀnî hân hîna ge gaxu ǁaeba ǃâuhâ în xa. Mîmâisa ǀkhaeban Jehovaba xu nî hōs aiǃâ. Mîmâidi nî dīǀoaǀoahes ǃnâ hoaǁae ǂgoms ge tita. Tsî naun tsîna ge hui î da ǂgomǃgâ ǀasa ǃhūbaib kaise a ǀgūsa.” ǂGuin hîna Jehovaba gaxu ǁaeba ǃoaba hân ge nēsa ra ǃkhō-am.

18. Mati i kurus xa ǂâisa sida di ǂgomsa ǀasa ǃhūbaib xa ǀgaiǀgai ǁkhā?

¹⁸ Ama as ge ǀasa ǃhūbaib ge noxoba hā tama. Xawe ǀnî xūn hîna nēba hân xa ǂâi re. Aiǁgause ǀgamirodi, hain, xamanin tsî sadu ǀgū khoen. ǀGui khoe-i tsîn ge îganǀgē tide nē xūn hoan a ama ǃkhaisa. Nē xūn ge ǀkhai i ǁaeb tsîn ge hâ i xawe. Jehovab ge ǁîna a kuru amaga ǀguin ge nēsi nēba hâ. (Gen. 1:1, 26, 27) Sada Elob ge ǀasa ǃhūbaibab nî kuru dis tsîna ge mîmâi. ǁÎb ge ǁnā mîmâisa nî dīǀoaǀoa. ǀAsa ǃhūbaib ǃnân ge khoena ǀam-e ūhâ tama ûiba ǀoasa ǂurusib ǀkha nî ūhâ. ǂGomǃgâ ǁkhā da ge a ǀasa ǃhūbaib Elob mîǁgui hâ ǁaeb ai nî ǀkhīsa.—Jes. 65:17; J.ǂHa. 21:3, 4.

19. Mati du sadu di ǂgomsa a ǀgaiǀgai ǁkhā?

¹⁹ Nē ǁaeb ǃnâ ǁkhā du a i hoa-e dī tsî sadu ǂgomsa ǀgaiǀgai re. ǃGôaǃgâsiba omkhâi xoremarib ǃaroma. Jehovab ǀgaib xa ǂâiǃgâ re. Sadu di ûiba Gagasi xūna dīs ǀkha ǀoaǀoa re. Jehovaba ǃoa ra ǀgū kai du xūna dī re. ǁNāsa du ga dī, o du ge ǁnān “ǂgoms tsî ǃgûǃnâxasib” ǃnâ-ū ge Elob mîmâi hâ xūna a ǀumin ǁaegu nî hâ.—Heb. 6:11, 12; Rom. 5:5.