1. Matin ǀnîna naun ǀkha aoǁnâ sîsenni ǃnâ ǃhoas xa ra tsâ? (Ai-īsiba mû re.)

 JEHOVAB khoen ase da ge nau khoena ra aoǁnâba sida ǀhomsi ǁGûba da a ǀnam amaga tsî da ge ra hui nî ǂgao in ǁîba ǂan. ǂGui aoǁnâ-aon ge aoǁnâ sîsenni xa a ǃgâibahe xawen ge nauna a ǃgombahe. Tae-i ǃaroma? ǀNîn ge kaise ra tao tsî ǃgâi ǁkhāǁkhā-ao taman hâ khami ra tsâ. ǀNîn ge ǃgâi tamase ra tsâ ǁkhauhe taman hâ hîna nau khoen omde ǃoa īsa. ǀNîn ge ǁaixa ūhesa ra ǃao. ǀNîn ge ǂkhababa xu ǂgōsa ge ǁkhāǁkhāhe. Jehovaban kaise a ǀnam xawen ge nē ǃgâsana a ǃgombahe ǃgâiǂhôasa ǀūn a khoen ǀkha ǀgoragusa. Xawen ge ra mûǂan nē sîsenni matikōse a ǂhâǂhâsasa tsîn ge hoaǁae ra aoǁnâ. Jehovab ge ǁîn ǀkha kaise a ǂkhî.

2. Aoǁnâ sîsenni ǃnâ du ga ǃgâiaǂgaoba hōǃâ tama i, o du tae-i ǃaroma ǂkhabuǂâi tide?

² ǁNā tsâsigu xa ǃaromahe hâse da ǃgombahe ǂkhîba aoǁnâ sîsenni ǃnâ ūhâsa? ǁNati ī ga io tā ǂkhabuǂâi re. Sadu ǀgaub ge ra ǁgau ǃgamǃgamsen xa du asa tsî du sadu xa ǀgui ǂâi tamasa. Nēs tsîn ge ra ǁgau khoen ǀkha du ǂkhaba ǂgao tama hâsa. Khoena da ge ǁaixa kai ǂgao tama ǃgōsase ǃgâi xuna da ra dī hîna. Sada ǀHomsi ǁGûb ge ǃkharuǃnâ da ra xuna ǂan tsî ǂhâ da hâ huiba ra mā da ǂgao. (Jes. 41:13) Nē ǁkhāǁkhāǃâs ǃnâ da ge koro xuna nî ǃhoaǃgao hîna nî huida na, î da ǁnāti ī tsâsiga sîsenǂam. Tsî ǃgâiaǂgaoba aoǁnâ sîsenni ǃnâ ūhâ.

 ELOBMÎSAS ǀGAIǀGAI DA

3. Tae-e kēbo-aob Jeremiaba ge hui îb nauna aoǁnâba?

³ ǃKharu gere ǁaeb ǃnâ i ge Eloba xu hâ haisi-amsa ǁîb di ǃoaba-aona gere ǀgaiǀgai, ǃgom ǁgaumâiden gere hōǃâ o. Kēbo-aob Jeremiab di aiǁgausa kō re. Jehovab ge aoǁnâs di ǁgaumâisa a mābi ob gere îganǀge. Jeremiab ge ge mî: “ǃKhū Elotse tita ge a ǃhoa ǁoa, kaise ta ge a ǂkham.” (Jer. 1:6) Tae-e ge huibi îb aoǁnâs ǃaroma ǁkhoaǂgaosiba ūhâ? Elobmîsa xub ge ǀgaiba ge hō. ǁÎb ge ge mî Elobmîs ge “ti ǂgaob ǃnâ khau ra ǀaes ǂkhōgu ǃnâ ǂganamhe hâs ase nî ī.” (Jer. 20:​8, 9) Jeremiab ge ǃgom ǁgaumâisa ūhâ i xawe i ge ǁgaumâiheb ge hâ i haisi-amsa, ǂhâb ge hâ i ǀgaiba gere mābi îb sîsen-e dī.

4. Tae-e ra ī Elobmîsa da ga khomai tsî ǂâiǃgâ o? (Koloseǁîn 1:​9, 10)

⁴ Xristeǁîn ge Elobmîs ǃnâ hâ mîde xu ǀgaiba ra hō. Koloses ǀhaohâba ǃoab gere xoa ob ge apostel Pauluba, amaba ǁkhāǁkhāsens ǃgâsana nî ǂkhâǃnâ în “ǃKhuba anu hâse ûi ǁîba ǃgâiba ǀgaus hoas ai . . .în mâ ǃgâi sîsenni hoab ǃnâ ǂûtani” ti ge mî. (Khomai re Koloseǁîn 1:​9, 10 sa.) ǁNā ǃgâi sîsenni ge ǃgâiǂhôasa aoǁnâs tsîna ǃkhōǂgā hâ. ǁNā-amaga da ga Elobmîsa khomai tsî ǂâiǃgâ, o i ge sida di ǂgoms Jehovab ǃnâ da ūhâsa ra ǀgaiǀgaihe. Tsî da ge ǃgāsase ra ǁnâuǃā tae-i ǃaroma i a ǂhâǂhâsa î da Gaosib xa aoǁnâ.

5. Mati da ǃnāsa-e Elobmîs khomais tsî ǁkhāǁkhāsensa xus tsîna hō ǁkhā?

⁵ Elobmîs khomais xu da ga ǀama ǂgao, o da ge tā nî ǃnoe tsî ǁaeba nî ū. Nēs ge Elobmîsa ǃamkuse ǁnâuǃās ǀkha nî hui da. Xoasa du ga khomai tsî ǁnâuǃā tama i, o tā ǃkhaesa khomai ǃkharu re. Xawe Watch Tower Publications Index tamas ka io Ôaǃnâs ǀkha ra hui ǂkhanib Jehovab di ǃoaba-aon tib ǃnâ xoas ra ǁguiǃāhe ǀgauba ôaǃnâ re. Sadu ǁaeb ǀkha du ga ǁkhāǁkhāsen, o du ge ǂgomǃgâsiba Elobmîs ǃnâ ra ǀgaiǀgai. (1Tes. 5:21) ǃNāsa ǂgomǃgâsiba du ra ūhâ khami du ge nî ǃgâibahe, ǁkhāǁkhāsen du ra xuna naun ǀkha ǀgoragusa.

AOǁNÂ SÎSENNI ǃAROMA ǃGÂISE AIǂHOMISEN

6. Mati io da aoǁnâ sîsenni ǃaroma ǃamkuse nî aiǂhomisen?

⁶ Aoǁnâ sîsenni ǃaroma du ga ǃgâise aiǂhomisen, o du ge naun ǀkha du ga  ǃhoa ǁaeb ai ǁkhoaǂgaosiba nî ūhâ. Jesub ge ǁîb di ǁkhāǁkhāsabega ge hui, î gu aiǂhomisen aoǁnâ sîsenni ǃnâb ǁîga nî sîs aiǃâ. (Luk. 10:​1-11) Jesub ge ǁkhāǁkhāgu xuna gu ge sîsen-ū amaga gu ge ǂgui ǃgâi xuna ge dī ǁkhā i tsî nēs ge ǁîga ge ǃgâiaǂgao kai.—Luk. 10:17.

7. Mati da aoǁnâ sîsenni ǃaroma a aiǂhomisen ǁkhā? (Ai-īsiba mû re.)

⁷ Mati da aoǁnâ sîsenni ǃaroma nî aiǂhomisen? Tae-e da ra mî ǂgaos xa da ge nî ǂâi tsî da ge ǁnāpaxu ǃgâi tsî ǁnâuǃāxa mîde ra sîsenūse a ǃhoa ǁkhā. ǀGam tamas ka io ǃnona ǀgaugu khoen nē haisi-amsa nî ǃkhōǃoagu xa da ge nî ǂâi tsî mati da nî ǃereams tsîna. Tsî da ge khoen ǀkha da ga ǃhoa o, ǀnom tsî ǃgâi ǀgaub ǃnâ a ǃhoa ǁkhā.

8. Apostel Paulub di aiǁgaus ǃnâ hâ ǂgoasūdi khamin Xristeǁîna mâǀgaub ǃnâ nî ûi?

⁸ Apostel Paulub ge aoǁnâ sîsenni ǃnâ da ūhâ ǃâba saora ǀgaub ai ge ǁguiǃā. Xawe ge ge “sige nē gagasi ǁuiba ūhâ ge ǂgoasudi khami ī.” (2Kor. 4:7) Nē ǁuiba a tae? Nē i ge ûiga ga ra sâu Gaosib ǃgâiǂhôasa aoǁnâsa. (2Kor. 4:1) ǂGoasūde a tae? ǂGoasūdi ge Elob ǃoaba-aon hîna ǃgâiǂhôasa nauna ra mîba na ra ǂnûǁkhaeba. Paulub di tsēdi ǃnâ i ge ǁamaxu-aoga ǂgoa-i ǀkha kurusa xawana gere sîsen-ū. Î gu ǀō-aisa xūna tani ǃnâ ǁkhā aiǁgause ǂû-i, xûi-i tsî mari-i tsîna. ǁNās ǁkhās khamib ge Jehovaba sida ǀō-aisa haisi-ams ǃgâiǂhôas dis ǀkha ǂgomǃgâ hâ. Jehovab huib ǀkha da ge ǂhâ da hâ ǀgaiba a ūhâ ǁkhā, nē haisi-amsa ǂgomǂgomsase aoǁnâsa.

ǁKHOAǂGAOSIBA ǀGOREBA

9. Mati da khoena ǃaosa a dan ǁkhā? (Ai-īsiba mû re.)

⁹ ǀNî ǁaegu ai da ge khoen xa aoǁnâ sîsenni ǃnâ mâǃoahesa a ǃao ǁkhā. Mati da ǁnā ǃaoba a dan ǁkhā? Aoǁnâ sîsen-e dīsa gu ge ǂkhāhe, o gu ge apostelga ǀgore ǀgores xa ǂâiǃnâ re. ǃAo tsî gu ge ge aoǁnâ ǀû tama hâ i xawe gu ge sao rase Jehovaba ge ǂgan î gu hui-e. “Îts sida sa ǃgāda ǁkhoaǂgaose sa mîsa ǂhôas di ǀgaiba mā.” Jehovab ge ǁkhā ǁaeb ai ǁîgu ǀgoresa ge  ǃeream. (ǃNǃkh. 4:​18, 29, 31) Khoena ǃaos ga ǀnî ǁaegu ai ǂâiǂhansen kai da, o da ge sida tsîna Jehovaba ǃoa huib ǃaroma nî ǀgore. ǂGan re Jehovaba î du sadu ǀnammi khoena du ūba hâba ǀgaiǀgai. Î du tā ǃao ǁîna ǃgâiǂhôasa mîbasa.

10. Jehovaba mati ǁîb ǃkhō-am-aon ase ra hui da? (Jesajab 43:​10-12)

¹⁰ Jehovab ge ǁîb ǃkhō-am-aoda ase ge ǁgaumâi da tsîb ge ge mîmâi hui dab nîsa î da ǁkhoaǂgao. (Khomai re Jesajab 43:​10-12 sa.) ǃGaoǃgâ re haka ǀgaugu ǃnâb mati ǁnāsa ra dīsa. ǂGurose, Jesub ge ǃgâiǂhôasa da ga aoǁnâ ǃnās hoasa sida ǀkha hâ. (Mat. 28:​18-20) ǀGamǁîse, Jehovab ge ǀhomǃgāna ge ǁgaumâi în hui da. (J.ǂHa. 14:6) ǃNonaǁîse, Jehovab ge ǁîb di ǃanu gagaba hui-aob ase mā da hâ, î-i sida di ǂâidi ǃnâ ǁkhāǁkhāsen da ge xūna ǂâi-oa kai. (Jhn. 14:​25, 26) Hakaǁîse, Jehovab ge sida ǃgâsana mā da hâ î da ǁîn ǀkha ǀguiba sîsen. Jehovab tsî sida ǀnamxaǃnâ ǃgâsan ǂkhâǃnâs ǀkha da ge ǂhâ da hâ xūn hoana ūhâ, î da nē aoǁnâ sîsenni ǃnâ ǁkhoaǂgaose aoǁnâ ǀgara.

KHOEN ǂHÂSIGU ǃOAGU DAWA TSÎ ǃGÂI MÛǂUIBA ŪHÂ

11. Aoǁnâ sîsenni ǃnâ da mati ǃnāsa khoena a ǀhao-ū ǁkhā? (Ai-īsiba mû re.)

¹¹ ǀOro khoena du ga oms ai ǀhao-u, o du ra ǂkhabuǂâi? Tae-i ǃaroma du dîsen tama hâ, ‘ti ǂkharis ǃnâ hâ khoena nēsi mâpa hâ?’ (ǃNǃkh. 16:13) ‘Sisen-i tamas ka io ǁamaxū ǃkhaib tawan hâ?’ ǁNās ga ī, o du ge ǀnîsi ǃnāsa khoena ǃgangu ǃnâ aoǁnâs ǃnâ-ū a ǀhao-ū ǁkhā. Josua ti ǀon hâ ǃgâsab ge ra mî: “Tita ge ǁamaxū ǃkhaib tsî khoen ǂguise ra hâ ǃkhaigu ai aoǁnâs ǃnâ-ū ǂgui khoena ge aoǁnâba ǁkhā-i.” ǁÎb kaikhoes Bridgets ǀkhas tsînab ge ǂgui khoena omdi ai gere ǀhao-ū, ǃui karagu ai ra gere aoǁnâ o tsî Sontaxtsē kham tsēǃgâǁaeb ais tsîna.—Efe. 5:​15, 16.

12. Mati da khoen tae-i ǃnâ ra ǂgoms tamas ka io mâ ǂâiǂhâsende ūhâsa nî ǂanǂui?

¹² Tsoatsoas ǃnâ i ga ǃhoa-ū du ra khoe-e ǃgâiǃgâbasensa ǁgau tama io. ǂAnǂui re ǁî-i tae-i ǃnâ ra ǂgom tamas ka io tae-i xa ra ǂâiǂhânsensa. Josuab tsî  Bridgets tsîra ge ǂkhanib aisǀkhāb ai hâ dîsa ra sîsen-ū. Aiǁgause, Elobmîsa matits ta mû? ti hâ ǂkhaniba ra ge ra sîsen-ū. ǁÎra ge ra mî: “ǀNî khoen ge ra mî Elobmîs, Eloba xu hâ ǂkhanis ǀguisa īsa. ǀNîn ge nēs xa ǃhoa ǂgao tama hâ. Sado mati ra ǂâi?” Nēs ge ǃnāsa ǁaeba ǃgâi ǁgamǀhaode ra hau.

13. Tae-i ǃaroma da ra ǃgâiǃgâ khoen ga ǃgâ tama i xawe? (ǂKhoamîdi 27:11)

¹³ Aoǁnâ da ga tsîn ga khoena ǃgâ tama i xawe da ge sida mîǁguiba ra sīǃnâ. Tae-i ǃaroma? Jehovab tsî ǁîb ǀGôab ǂgan da hâ xu-e da ge ra dī, ǁnās ge aoǁnâsa. (ǃNǃkh. 10:42) ǃHoa-ū da nî khoe-e da ga ǀhao-ū tama i, tamas ka io i ga sida haisi-amsa ūǃoa-e tama i xawe da ge ǃgâiaǂgaoba a ūhâ ǁkhā. Sida di ǀHomsi ǁGûba da ra ǂkhîǂkhî ǃkhaisa da a ǂan amaga.—Khomai re ǂKhoamîdi 27:11 sa.

14. Tae-i ǃaroma da ǃgâiaǂgao ǁkhā nau ǃgâsa-i ga ǃgâiǃgâibasensa ūhâ khoe-e ǀhao-u o?

¹⁴ Nau ǃgâsa-i ga ǃgâiǃgâibasensa ūhâ khoe-e ǀhao-ū os tsîna da ge a ǃgâiaǂgao ǁkhā. ǃKhē xu ǂgō-ommi ge sida sîsen-e kā hâ ǀgôa-e da ra ôas ǀkha ra ǀgōpeǀnō. ǂGuin ge ǁnā ǀgôa-e ǃkharagagu ǃkhaigu ai ôas ǀkha ra hui. ǀGôa-i ga hō-e on ge hoana ra ǃgâiaǂgao. ǁNās ǁkhās khami i ge ǀhaohâb ǃnâ hân hoana ǀasase ra ǂgâxana ra hui. ǀHaohâb ǃnâ hân hoan ge ǂhâ-e hâ in hoa khoena aoǁnâba. Tsî ǃgâiaǂgao ǀasa khoe-i ga ǀhaode hâǃnâ tsoatsoa o.

JEHOVAB TSÎ SADU ǀGŪKHOENA DU ŪBA HÂ ǀNAMMI AI ǂÂISA ǂNÛI

15. Mateub 22:​37-39 sa mati nî huida î da aoǁnâ sîsenni ǃaroma ôasa? (Tsoatsoas ai hâ ai-īsiba mû re.)

¹⁵ Aoǁnâ sîsenni ǃaroma da ūhâ ôasasiba da ge a ǀaro ǁkhā. Jehovab tsî sida ǀgūkhoena da uba hâ ǀnammi ai da ga ǂâisa ǂnûi o. (Khomai re Mateub 22:​37-39 sa.) Mûnan-ais ǀguisa di re matikōseb Jehovaba nî ǂkhîsa mûb ga o sîsen-e da ra dīsa. Tsî matikōsen khoena nî ǂkhîsa Elobmîsan ga ǁkhāǁkhāsen tsoatsoa o. Sida haisi-amsa ra ǃkhōǃoan di ores xas tsîna ǂâiǃgâ re.—Jhn. 6:40; 1Tim. 4:16.

16. Mati da ǃgâiaǂgaoba sida aoǁnâ sîsenni ǃnâ a ūhâ ǁkhā omsa xu da ga īǁoa xawe? Aiǁgaude mā re.

¹⁶ Sadu omsa xu du ga ī ǁoa, o dī ǁkhā  du a xūn ai ǂâisa ǂnûi re. ǁNās ge Jehovab tsî sadu ǀgūkhoen tsîna ǀnamsa. Koronas ǁaeb ǃnâ ra ge Samueli tsî ǁîb taras Danias tsîra omsa xu ge ī ǁoa i. ǁNā ǃgomǁaeb ǃnâ ra ge telefonni ǃnâ-ū aoǁnâ, sîǂkhanide xoa tsî Elobmîs ǁkhāǁkhāde zooms ǃnâ-ū gere dī. Kankers ǃaromab gere ǀaeǃkhōhe kliniks tawab ge Samuela ǀhao-ūb gere khoena gere aoǁnâba. ǁÎb ge ra mî: “ǃGomsina da ga hōǃâ, o da ge ǂâiǂhânsen tsîra tsau tsî i ge sida di ǂgomsa ra ǃâitsâhe. Jehovaba ǃoabas ǃnâ da ge ǃgâiaǂgaoba nî hōǃâ.” Nēn hoan ǂam-ais ge Daniasa ǁnā ǃnona ǁkhâga kharob ǃnâ ge ǁgoe ī, ǁnāpaxus ge ǃnani ǁkhâna rolstoels ǃnâ ge ǂnôa ī. ǁÎs ge ra mî: “Ti ǁkhāsib ǃnâ hân hoana ta ge gere dītsâ. Sarite gere ǀaeǃkhō-aos tsî oms tawa xūna gere haubate khoen tsîna ta ge gere aoǁnâba. ǀAeǃkhō-aos ǀkha ta ge telefonni ǃnâ-ū ǃgâi ǁgamǀhaode ge ūhâ i.” Samueli tsî Dania hâra ge ǂguros khami ǃnāsa-e ge dī ǁoa i, xawe ra ge ǁkhā ra a-e gere dī tsî ǃgâiaǂgaoba gere hōǃâ.

17. Mati du nē ǁkhāǁkhāǃâs ǃnâ mā-e hâ xūna xu ǃgâiba nî ǀama?

¹⁷ Dī da nî ga da ra mā-e xūn ge reseps khami ī. Sâi-ūhe ra xūn hoan ga ǀhaoǀhao-e o du ge ǁkhoaxa ǀamǂoasa nî ūhâ. Māhe hâ xūna sîsen-ūs ge nî hui du, î du ǁgai tsâsiga ǃkhamǃoa tsî ǃnāsa ǃgâiaǂgaoba aoǁnâ sîsenni ǃnâ ūhâ.