1. Jehovaba tae-e ra ǂgaoǀkhā da?

 AOB tsî taras tsîn di kai ǃgâiaǂgaob ge ǁîra ǀgôaro-i ga ǃnae o. ǁGûra ge ǁîra ǀgôaro-e ra a ǀnam xawe ra ǁkhore î-i kai. ǁÎra ge nî ǂâiǂhansen ǀgôaro-i ga kai tama io. ǁNās ǁkhās khamib ge Jehovaba ra ǂkhî ǁîb xa da ga ǁkhāǁkhāsen tsoatsoa o, ǁîb ge ǂgao tama hâ î da ǁnāpa ǀgui mâǀgara. (1Kor. 3:1) ǁÎb ge ra ǂhâba î da Xristeǁî “kaikhoe kai” sada ǁnâuǃāb ǃnâ.—1Kor. 14:20.

2. Tae-e da nē ǁkhāǁkhāǃâs ǃnâ nî ǃhoaǃgao?

² Sada ǁnâuǃab ǃnâ Xristeǁî kaikhoe kaisa tae-e ra ǂâibasen ? Mati da Xristeǁîse ra kaiǀoa? Matis Elobmîs ǃgam amaba ǁkhāǁkhāsensa sada ǀhōsagusis Jehovab ǀkha da ūhâsa ra hui is ǀgai? Kaise ǂgomǃgâsensa xu da mati a ǂgōsen ǁkhā? Nē ǁkhāǁkhāǃâs ǃnâ da ge nē dîdi ǃereamde nî ǃhoaǃgao.

XRISTEǁÎ ǀOASASIBA TAE-E RA ǂÂIBASEN?

3. Xristeǁîn ase kaikhoe kaisa tae-e ra ǂâibasen?

³ Elobmîs ǃnâs ge Xrikegowab mîs “kaikhoe” ti hâsa “kaiǀoa” tamas ka io “ǀoasasib” ti ra ǂâibasen. a (1Kor. 2:6) ǂKhari ǀgôaro-i kai tsî ra kaikhoe kai, khami da ge sada tsîna Jehovab ǀkha da ūhâ ǀhōsagusis ǃnâ nî kai. ǁNā ǀgaub ǃnâ da ge Xristeǁî-i ase gagasise ra kaiǀoa. Xristeǁî-i  ase da ga kaiǀoas khaoǃgâ da ge tā nî ǀû gagasise ǀāǀāsensa. (1Tim. 4:15) Hoa da ge gagasise kaiǀoa hâ Xristeǁî kai ǁkhā ǂkhaman tsîna ǃkhōǂgā hâse. Mati da a ǂan ǁkhā gagasise da kaiǀoa hâsa?

4. Gagasise kaiǀoa hâ Xristeǁî-e du mati nî ǁguiǃā?

⁴ Gagasise kaiǀoa hâ Xristeǁîn ge Jehovab ra ǂgaoǀkhā xūn hoana ra dī tsî ǁî-i ra ǂgao xūn ǀguina dī tama hâ. ǀOasa kurusa i ūhâ tama amaga i ge a dīsā ǁkhā. ǁÎ-i ge tsēkorobes tsîna ra ǁgau Jehovab ǂâis ǃoagu i ǂâi tsî ra xūna ra dīsa. Aiǃgû tsî i ge ǀasa khoeba ana tsî ra ǁgūtsâ Elob khami ǂâisa. (Efe. 4:​22-24) ǃGâi mîǁguiga dīs tsîna i ge ǁî-e ǁkhāǁkhāsen hâ, Jehovab ǂhanugu tsî tsoatsoadi ǃoagu ûis ǃnâ. ǁNās ǀkha i ge xoamâisa ǂgui ǁgaraga ǂhâ tama hâ, î-i ǁî-e ǁgau tae-e i nî dīsa. ǃGâi mîǁguiga dīs tawa i ga hā, o i ge ǃkhō-oasensa ra sîsenū nēsa dīs ǃnâ.—1Kor. 9:​26, 27.

5. Mâ ǃgomsiga i gagasise ǀgaisa tama hâ Xristeǁî-e a hōǃâ ǁkhā? (Efeseǁîn 4:​14, 15)

⁵ Gagasise kaiǀoa tama hâ Xristeǁî-i ge “ǂgaeǂkhapu-aon” “ǀhôagao ǀāpedi” tsî “ǂhûmi ǁkhāǁkhādi” tsî “ǁnaǁgôa-aon” xa a ǂgaeǂkhapuhe ǁkhā. b (Khomai re Efeseǁîn 4:​14, 15 sa.) ǁÎ-i ge surib, ǂkhaba-ôas, ǃhaese ǁaixas tamas ka io ǃâitsâ-i ǃnâs tsîna a māǁnâsen ǁkhā.—1Kor. 3:3.

6. Tae-e ǃaroma da ǀoasasiba ǀgôaro-i hîna ra kaikhâi i ǀkha a ǀgōpeǀnō ǁkhā? (Ai-īsiba mû re)

⁶ ǃHoaǃgaohe i go khami i ge Elobmîs xoade gagasise kaisa sorosi kais ǀkha ra ǀgōpeǀnō. ǀGôan ge ǂgui xūna a ǀū tsî ǁnās ǀkha ǁkhara khoe-e ǂhâha, î-i ǁî-e ǁkhauba tsî daoǁgau. Aiǁgause mamasas ge audodi hâbas ga ǀgôaros ǀkha ǃgû, o ǁîs ǃoma a ǃkhō ǁkhā. Xawe nē ǀgôaros ra kai khamis ge ǁgûsa ǁîsa a mā-am ǁkhā is aitsama audodi daoba ǃgâu. Xawes ge noxoba ǁîsa a hōhoǃnâ ǁkhā, is hoaǁae kō mâpas ra ǃgûsa. Tsîs ge nē ǀgôarosa kaikhoe kais ga, o ra dītsâ is ǁnā ǁkhōǁkhōsa mâsiga xu ǃkhō-oasen. ǂKham ǀgôaron kain ra khami ǁîn ǁgûn xa a huihe ǁkhā, în ǁkhōǁkhōsa mâsiga xu ǂgōsen. ǁNās ǁkhās khami i ge gagasise kai ǂgâu tama  hâ Xristeǁîna gagasise kaihân xa a hui ǁkhā, în ǁkhōǁkhōsa gagasi mâsiga xu ǁkhaubahe tsî ǂhanu mîǁguiga dī. Gagasise kaiǀoa hâ Xristeǁîn ge mîǁguigan ga dī, o Elobmîs di tsoatsoadi ai ra kō în Jehovab ǂâiǀgauba nēs ai ôa tsî ǁnās ǀkha ǁkhāǁkhāsenan go xūna ra sîsenǂûi.

7. Gagasise kaiǀoa hâ Xristeǁîn tsîna nauna xu huiba ǂhâhâ?

⁷ Nēsa ra ǂâibasen gagasise kaiǀoa hâ Xristeǁîn nauna xu huiba ǂhâ tamasa? Hî-î, ǁîn tsîn ge ǁaeba xu ǁaeb ǀkha nauna xu huiba a ǂgan ǁkhā. Xawe nēsi ǀgui ra kai khoe-i ge ǀnîsi nî ǂhâba în nauna tae-en nî dīs, tamas ka io mâ mîǁguiba i nî ūsa mîba nî. ǃKharagagusib hîna hâb ge gagasise kaiǀoa hâ Xristeǁî-i ge gā-aisiba ûhâna xu huiba a ǂgan ǁkhā. Xawe i ge a ǂan ǁî-i aitsama nē mîǁguiba nî ūsa tsî i ǁî-i “tanisensa nî ǃereamba” ǃkhaisa.—Gal. 6:5.

8. Mâ ǀgaub ǃnân Xristeǁîna ra ǃkharagagu?

⁸ Kai hâ khoen īsib ǃnâ a ǀkhara ǁkhās khamis tsînan ge Xristeǁîna gagasi ǀgaugu ǃnâ ǀkharagagusiba ūhâ. Aiǁgause, gā-aisib, ǁkhoaǂgaosib, māxasib tsî ǀkhomxaǂgaosib khami. ǀGam gagasise kaiǀoa hâ Xristeǁîra ge ǀgui mâsib ǃnâ ǃkharagagu ǀamǂoasa ūhâ ǁkhā Elobmîs ai ǃgaoǃgaosa ra. Nēs ge ǃgōsase ǃanu ǃgâiǂâis ai i ga ǃgaoǃgaosa o. Nēsa mûǂans ge nî hui da, î da tā ǃkharagagusib hîna hâb ai ǀgoraǃgâgu. ǀGuiǃnâxase hâs ai da ge ǂâisa nî ǂnûi.—Rom. 14:10; 1Kor. 1:10.

MATI DA XRISTEǁÎ ǀOASASIBA ǃOA RA KAI?

9. ǀOasase da gagasise kais ǀguisa ra dī? ǁGuiǃā re.

⁹ ǀGôa-i ge ǁaeb ra ī khami ra kai, xawe i ge aitsama Jehovab ǀkha i ūhâ ǀhōsagusis ǃnâs tsîna nî kai. Aiǁgause, Korintes ǃnâ ge hâ i ǃgâsan ge ǃgâiǂhôasa ūǃoa, ǁāǁnâhe, ǃanu gagaba ǃkhōǃoa tsî Apostel Paulub ge mâ daoǁgaude xus tsîna ǃgâiba ge hō. (ǃNǃkh. 18:​8-11) Xawen ge ǀnîna ǁîn di ǁāǁnâs khaoǃgâ noxoba gagasise ge kaiǀoa tama hâ i Xristeǁîn ase. (1Kor. 3:2) Tae-e da a dī ǁkhā î da gagasise kaiǀoasa tā ǀû?

10. Xristeǁî ǀoasasiba sīǃnâs ǃaroma da tae-e nî dī? (Judab 20)

¹⁰ Gagasise da ga kai ǂgao, o da ge ǁnā turaba ǂgurose nî omkhâi. ǁNān hîna gagasi ǀgôaron ase ra hâhâ ǂgaon ge ‘gâresiba a ǀnam’ tsî ǁnās ǀkhā aiǃgû tama hâ gagasise kaisa. (ǂKhm. 1:22) Sada ge kaikhoe-i hîna ǁî-i ǁgû-i ǃoa mîǁguiba dīs ǃgao ra kō-i khami ī ǂgao tama hâ. Xawe da ge aitsama gagasise kais di mîǁguiba ra dī ǂgao. (Khomai re Judab 20 sa.) Xristeǁî ǀoasasiba du ga sīǃnâ ǂgao, o Jehovaba ǃoa ǀgore îb ‘māsenxasib . . tsî . . ǁkhāsib’ tsîna mā du.—Fil. 2:13.

11. Jehovaba tae-e ra mā da, î da Xristeǁî ǀoasasiba gagasise sīǃnâ ǁkhā? (Efeseǁîn 4:​11-13)

¹¹ Jehovab ge ǃâubasen tama hâ, î da Xristeǁî ǀoasasiba ǃoa aitsama kai. ǁÎb ge ǀhaohâb ǃûi-aogu tsî ǁgauǃnâ-aogu tsîna ǀhaohâb ǃnâ ge mā da îgu hui da, î da “kaikhoe” kai Xristeǁîn ase tsî ǁnās ǀkha “dīǀoaǀoasa kaikhoesis Xristub disa sīǃnâ” ǁkhā. (Khomai re Efeseǁîn 4:​11-13 sa.) Jehovab ge ǁîb ǃanu gagab ǃnâ-ūs tsîna ra hui da, î da “Xristub di ǂâisa ūhâ.” (1Kor. 2:​14-16) ǁNās xōǀkhab ge Eloba noxoba aiǃgû tsî haka ǂkhanidi Jesub ûib xa hâ di ǃnâ-ū Jesub ge ǂâi, ǃhoa tsî aoǁnâ sîsenni ǃnâ gere tanisen ǀgaub xa ra ǁkhāǁkhā da. Jesub ǂâiǀgaub tsî tanisen ǀgaub tsîna ǁgaes ǃnâ-ū da ge Xristeǁî ǀoasasiba gagasise a sīǃnâ ǁkhā.

 GAGASI HUIB

12. “ǂGuro ǁkhāǁkhādi Xristub” xa hâde taena ǃkhōǂgā hâ?

¹² Xristeǁî ǀoasasiba da ga sīǃnâ ǂgao, o da ge “tā ǂguro ǁkhāǁkhādi Xristub xa hâdi tawa nî mâǃari” xawe ǁnās ǂam-ai ǃnāsase nî dī. ǂGuro xūn ǁkhāǁkhāsen da ran ge ǃhōbasens, ǂgoms, ǁāǁnâs tsî khâis tsîna ǃkhōǂgā hâ. (Heb. 6:​1, 2) Nēn ge xūn mâ Xristeǁî-i hoa-i tsoatsoas ai ǁkhāǁkhāsen tsî ra ǂgom tsoatsoana. Petrub ge Pentekos tawab ge khoen ǀkha gere ǃhoa, o nē xūn xas tsîna gere ǃhoa. (ǃNǃkh. 2:​32-35, 38) Xristub di ǁkhāǁkhāsabe kai ǂgao da ga, o da ge nē ǂguro ǁkhāǁkhāde nî ūǃoa. Aiǁgause, Paulub ge ge mî khâis ǃnâ da ga ǂgom tama io, o da a mîǁoasa ama Xristeǁî ta a ti. (1Kor. 15:​12-14) Xawe hâs ge ǀoasasib ǃnâ da ga Xristeǁî kai ǂgao, o da ge ǂguro ǁkhāǁkhādi xa ǃnāsana nî ǁkhāǁkhāsen.

13. Hebreǁîn 5:14 ǃoagu da tae-e nî dī î da ǀgaisa gagasi ǂûna xu ǀama? (Ai-īsib tsîna mû re.)

¹³ ǁNās ǂam-ai i ge ǂguro ǁkhāǁkhādi xa ǀgaisa ǂû-e Jehovab ǁgaragu ǀguiga ǃkhōǂgā tama, xawe ǁîb tsoatsoadi tsîna. Nēn ge ra huida î da ǁîb ǀgauba ǁnâuǃā. Nē ǀgaisa ǂû-e xu da ga ǀama ǂgao, o da ge Elobmîsa ǂōrisase ǁkhāǁkhāsen, ǂâiǃgâ tsî ǁkhā da as kōse nî sîsenǂui sida ûigu ǃnâ. Nēsa da ga dī, o da ge ra ǁkhāǁkhāsen mati da Jehovaba a ǂkhî kai ǁkhā mîǁguiga a dī ǁkhāsa. c—Khomai re Hebreǁîn 5:14.

14. Pauluba mati Korintes ǃnâ hâ Xristeǁîna ge hui în gagasise kai?

¹⁴ Gagasise kaiǀoa tama Xristeǁî i ge ǃnāsa ǁaeba mîǁguiga dīs xa a ǃgombahe. ǃGōsase i ga Elobmîs ǁgara-e ǀkhai i o. Tsîn ge nēs xa ǃaromahe hâse ǁîn ra ǂhâba ǀgaub ai mîǁguiga ra dī. ǀNîn ge ǁgaraga ra ôa, ǁgara-i ga ǀkhai o. Aiǁgause, Korintes ǃnâ hâ Xristeǁîn ge Pauluba gere dî ǁgoatsuiǁgoa elogu ǃgao ra dīhe ǁguibas ǂû-en a ǂû ǁkhās ǁgaragu hâsa. Paulub ge ǁîna ge hui în mûǂan mâ-i hoa-i ‘ǃnorasasiba’ ūhâsa, aitsâma  ǁhûibasensa nēs dawa i ga hā o. ǁÎb ge Elobmîs tsoatsoade gere sîsenū, îb ǁîna hui în ǁîn ǃgâiǂâisa ra mā-am mîǁguiga dī tsî tā nauna ǃnôa kai. (1Kor. 8:​4, 7-9) Paulub ge Korintes ǃnâ hâ Xristeǁîna gere ǁkhāǁkhā în Elobmîs xoade ra sîsenūse mîǁguiga dī nau khoen ai dîs, tamas ka io ǁgaraga ôas xa. Nēs ǃnâ-ūb ge gere hui nî, în gagasise kaiǀoa hâ Xristeǁî kai.

15. Pauluba mati Xristeǁîna ge hui în gagasise kai?

¹⁵ Paulub ge Hebre Xristeǁîna a sîba sîǂkhanisa xus tsîna da ge ǀnîhâ ǂhâǂhâsa xū-e ra ǁkhāǁkhāsen. ǀNîn ge aiǃgû tsî Jehovab ǀkhan ge omkhâi ǀhōsagusisa ge ǀgaiǀgai tama hâ i. ǁÎn ge ǁkhapa “dai-e ǂhâba tsî ǀgaisa” ǂû-e ǂgao tama. (Heb. 5:12) ǁÎn ge Jehovab ge ǀhaohâb ǃnâ-ū gere ǁkhāǁkhā nî ǀasa xūna ge ūǃoa tama hâ i. (ǂKhm. 4:18) Aiǁgause ǂgui Jodeǁîn ge noxoba aiǃgû tsî Moseb ǂhanuba gere sao, Jesub ge ǁîb ǁguibas ǃnâ-ū nēsa ǀam kai xawe. (Rom. 10:4; Tit. 1:10) Jode Xristeǁîn ge ǁnā 30 kurigu ǃnâ ga ǁkhāǁkhāsen hâ, nē ǂhanuban nî sao ǀûsa. ǁNās ǀkhab ge Pauluba nē sîǂkhanidi ǃnâ-ū ǁîna gere hui în Elobmîs amaba ǃgamse ǁkhāǁkhāsen tsî ǁkhāǁkhāhen gere xūna ūǃoa. Nē sîǂkhanis tsîn ge Xristeǁîna ge hui, în mûǂan Jehovab Jesub ge ǂnûiǂgā ǀgaub ǃnâ-ū ǃoabas a ǃgâisa. Nēs tsîn ge ǁîna ge hui în aiǃgû tsî aoǁnâ Jodeǁîn xan ga mâǃoahe xawe.—Heb. 10:​19-23.

TĀ KAISE ǂGOMǃGÂSEN

16. Xristeǁî ǀoasasiba sīǃnâs ǃgao da tae-e nî dī?

¹⁶ Xristeǁî ǀoasasiba sīǃnâs ǃgao da ge tā sîsens ǀguisa nî dī xawe nî aiǃgû ǁî-e ǃkhōǀgarasa. Nēs ge ra ǂâibasen î da tā hoaǁae ǂgomǃgâsen. (1Kor. 10:12) ǁNās ǀkha da ge aitsama “ǃâitsâsen” tsî ǀkharaǀkharana nî dī ǀgara.—2Kor. 13:5.

17. Paulub ge Koloseǁîna ǃoa a xoa sîǂkhanisa xu da tae-e ra ǁkhāǁkhāsen?

¹⁷ Koloseǁîna ǃoab ge xoa sîǂkhanis ǃnâb ge Pauluba ra ǁgau, mati da aiǃgû tsî ǀoasasib ǃnâ nî kai ǀgausa. Nē Xristeǁîn ge ǀoasasib ǃnâ kai hâ i xaweb ge Pauluba ǁîna gere hōhōǃnâ, în tā nē ǃhūbaib khoen di ǂâiǀgaugu xa ǂgaeǂhapuhe.  (Kol. 2:​6-10) ǁNās ǀkhab ge Epafraba ǀhaohâb ǃnâ hâna gere ǀgoreba în ǀams ai “ǁaposase” mâ tamas ka io kai. (Kol. 4:12) Tae-e da nēsa xu ra ǁkhāǁkhāsen? Paulub tsî Epafrab tsîkha ge ge ǂan-i Xristeǁî ǀoasasib aitsama ǁguiǂgāsens tsî Elob ǂkhâǃnâs tsîna ǂgaoǀkhā hâsa. ǁÎkha ge gere ǂhâba în Koloses Xristeǁîna, Xristeǁî ǀoasasib ǃnâ mâǀgara ǃgomsinan ga hōǃâ xawe.

18. Xristeǁî ǀoasasiba sīǃnâ hâ Xristeǁî-i ǀkha i tae-e a ī ǁkhā? (Ai-īsiba mû re.)

¹⁸ Paulub ge Hebreǁîna ge ǃkhâikhom Xristeǁî ǀoasasiba sīǃnâ hân ǂanbasen taman ga īo, on Elob xa ūǃoahe tidesa. Jehovaba î ga ǁnâuǀnamoǃnâ, o i ge ǁîb ǀkha i ūhâ ǀhōsagusisa a ǂoaǃnâ ǁkhā tsî Elob xa ǀûbahe tide. ǃGâi ǃkhaisan ge Hebreǁîna ǁnāti ī mâsib ǃnâ ge hōsen tama hâ i. (Heb. 6:​4-9) ǁNān gagasise ǃkhai hân tamas ka io ǂnûiǂnuihe hân ga ǃhōbasen, o tae-e ǁîn ǀkha nî ī? ǃGamǃgamsenxasen ga ǃhōbasen, on ge ǁîna Paulub ge xoa khoena xu a ǀkhara. Xawe Jehovab ge ǁîn ga oaǀkhī, o ǁîna ǂhân hâ huiba nî mā. (Ese. 34:​15, 16) ǀHaohâb ǃûi-aogu ge ǀnî hâ ǃgâsa-e ǀnîsi a ǂgan ǁkhā, î-i amab ǃnâ go oaǀkhī khoe-e hui ǁkhapa gagasise kais ǀkha.

19. Mâ mîǁguiba da nî ūhâ?

¹⁹ Xristeǁî ǀoasasiba du ge a sīǃnâ ǁkhā. Aiǃgû tsî ǀgaisa gagasi ǂûna ūǂgā re tsî ǁkhā du as kōse sadu ǂâiǀgauba, Jehovab di ǂâiǀgaub ǀkha ǀguiǃnâxa kai re. Aiǃgû tsî Elobmîs ǃgam amaba ǁkhāǁkhāsen tsî gagasise kaiǀoa hâ Xristeǁî kai.