1. Gagasi paradaisa a tae tsî tae-e dīsa da nî mîǁgui?

 GAGASI paradaisa da ge nētsē ǃhūbaib ai ūhâ. Miliundi khoen ama ǂkhîba ra hōǃân xa ǀoa hâsa. ǀNai nē paradais ǃnâ hâ khoen ge mîǁgui hâ în tā tātsē nē paradaisa ǁnāxū. ǂGui khoen ǁîn ǀkha nēs ǃnâ nî ǁhaosan ge ǂhâba hâ. Nēsa a tae? Nēs ge gagasi paradaisa. a

2. Tae-e nē gagasi paradais ǃnâ ra mâǂoa?

² Buruxa ǀgaub ǃnâb ge Jehovaba ǃkhai-e kuru hâ, ǁîb khoen ǂkhîb tsî ǀguiǃnâxasib tsîna ūǃnâ hâba. ǁGâuab di eloxoresa tsî ǁkhōǁkhōsa ǃhūbaib khoen ǃhuigu hâb ǃnâ. (1Jhn. 5:19; J.ǂHa. 12:12) Sida di ǀnamxaǃnâ Elob ge ra mû, nē ǃhūbaib mati khoena ra tsûtsûsa. Xaweb ge ǁîb ǃoaba-aona ǃnōrasase ra tsâ kai, în aiǃgû tsî ǁîba ǃgâiaǂgaob ǀkha ǃoaba ǁkhā. ǁÎb mîs ge gagasi paradaisa “sâusen ǃkhais” tsî “ǃgâise ǂnâsa ǃhânab” ase ra ǁguiǃā. (Jes. 4:6; 58:11) Jehovab ǀkhaeb ǀkhan ge ǁnān hîna nē gagasi paradais ǃnâ ra hâna ǂkhîxase tsî ǃnorasase ra tsâ nē ǃgom ǀuni tsēdi ǃnâ.—Jes. 54:14; 2Tim. 3:1.

3. Jesajab 65ǁî danaǃâs ǃnâ xoamâihe hâ kēbosa mati Israelǁaes ǁaeb ǃnâ ge dīǀoaǀoahe?

³ Jehovab ge kēbo-aob Jesajab ǃnâ-ū ge ǁguiǃā, matib  ûiba nî īsa ǁnān hîna gagasi paradais ǃnâ ûi hân ǃaroma. Jesajab di 65ǁî danaǃâs ǃnâ du ge nē ǁguiǃāsa a hō ǁkhā hîna ge 537ǁî kuri Jesub ǃnaes aiǃâ ǂgurose a dīǀoaǀoahesa. ǁNā ǁaeb ai i ge ǃhausen gere Jodeǁîna Babilons ǃkhōsisa xu gere ǃnorakaihe tsî ǁîn omde ǃoa gere oa. Jehovab ge ǁîb khoena ge ǀkhae tsî ge hui în dīkākāhe hâ ǃās Jerusalemsa ǁkhawa îxa kai. Tsîn ge tempeli tsîna ge dī-ūnu în ǁkhawa Jehovaba ǁnāpa ǃoaba Israeli ǃnâ.—Jes. 51:11; Sax. 8:3.

4. Jesajab 65ǁî danaǃâs ǃnâ hâ kēbosa mati nētsē ra dīǀoaǀoahe?

⁴ ǀGamǁî dīǀoaǀoas Jesajab di kēbos dis ge 1919 Jesub di ǃnaes khaoǃgâ ge tsoatsoa, Jehovab ǃoaba-aon ge ǃnorakaihe o Babilons kaisa xu. ǁNās khaoǃgâs ge gagasi paradaisa ǃhūbaib ǂhawase ge khoraǂuisen. ǁKhoaǂgaoxa aoǁnâ-aon ge ǂgui ǀhaohâga tsoatsoa tsî Xristeǁî ǀgauga gere ǁgau. Khoen hîna ge ǂguro ǃkhamxa tsî ǀaib ǃnâ ûi hâ în ge “ǀasa khoesib, Elob īb ǃoa ge kuruheb tsî ǁîb di ǂhanu-aisib tsî ǃanusib” ǃnâ ge ûi tsoatsoa. (Efe. 4:24) Ama as ge ǃnāsa ǀkhaegu Jesajab ge ǃhoaǃgao gu hānîǁaeb ǀasa ǃhūbaib ǃnâ ǀgui nî dīǀoaǀoahesa. Xawe da ge nēsis tsîna ǂgui ǀgaugu ǃnâ gagasi paradaisa xu ǃgâiba ra ǀama. Nēsi da ge nî ǃhoaǃgao nē gagasi paradais mati ra tsâǀkhā dasa tsî tae-i ǃaroma da ǁîsa ǁnāxūǃnâ tidesa.

GAGASI PARADAIS ǃNÂ HÂ KHOEN RA TSÂ ǀGAUB

5. Jesajab 65:13 ǃnâ i mîmâihe hâ khami taena da gagasi paradais ǃnâ ra hōǃâ?

⁵ Gagasise ǂuru tsî khoakhoahe. Jesajab kēbos ge ǃkharagagusiba ra ǁgauǂui ǁnān gagasi paradais ǃnâ hân tsî ǁnān gagasi paradais ǃauga hân ǁaegu. (Khomai re Jesajab 65:13 sa.) Jehovab ge māxase ǁîb ǃoaba-aon hoana ǂhân hâ xūna ra mā, în ǁîb ǀgūse hâ. ǁÎb ǃanu gagab, ǁîb mîs tsî ǂgui gagasi ǂûn tsîna da ge ūhâ î da “ǂû, . . . ā, . . . tsî ǃgâiaǂgao.” (ǀGopeǀnō re ǂHaiǂhais 22:17 sa.) Xawe mâsib ge a ǀkhara ǁnān hîna gagasi paradais ǃnâ hâ taman ǃaroma, ǁîn ge “ǃâ . . . , ǁgâ . . . , tsî ra taotaohe.” ǁÎn ge Elob ǀkha ǀhōsagusisa ūhâ tama.—Amo. 8:11

6. Joeli 2:​21-24 sa mati Jehovaba xu da ra hō ǀkhaega ra ǁguiǃā? Mati da ǁnāsa xu ǃgâiba ra ǀama?

⁶ ǁÎb di kēbos ǃnâb ge Joela ǂhâ da hâ xūn xa ge ǃhoa. Aiǁgause ǃhoro-i, ǂâu xûi-i tsî oli-i tsîna. Jehovab hoa xūn ǂhâ da hâna ra māda sa ǁgaus ǃaroma. Nēn ge gagasi ǂûn tsîna ǃkhōǂgā hâ, î da sida di ǂgomsa ǀgaisase ūhâ ǀgara. (Joe. 2:​21-24) Aiǁgauseb ge Elobmîs tsî Elobmîs ai ǃgaoǃgaosa ǂkhanin, sida internets ǂhaweb, ǀhaodi, ǀkharib kai ǀhaodi tsî ǂkharis kai ǀhaodi tsîna ra mā da. Nē gagasi xūna xu da ge ǃgâiba tsēs hoasa a ǀama ǁkhā. ǁNās xa ǃaromahe hâse da ge ǃgâise ǂûmâhe tsî khoakhoasases tsîna ra tsâ.

7. Taena ‘ǃgâi mâsib ǂgaob’ diba ra mā da? (Jesajab 65:14)

⁷ ǂKhî tsî ū du hân ǀkha ǂâu. Elob khoen ge ra “ǃgâiaǂgao” ǁîb ra dība nî xūnan ra ǃgâoǃgâ amaga. (Khomai re Jesajab 65:14 sa.) ǀGaisa ǂgomsa ra omkhâi amab, ǁkhoaǂgaosiba ra mā da mîmâidi Elobmîs ǃnâ hâdi tsî ǁaposa ǃâubasens hānîǁaeb ǃaroma da ūhâs, Jesub xoremarib ai ǃgaoǃgaosas ge ‘ǃgâi mâsib ǂgaob’ diba ra mā da. Nē xūn xa da ga sida gagasi ǃgâsan ǀkhā ǃhoa, o da ge ama ǂkhîba ra hōǃâ.—Psa. 34:8; 133:​1-3.

8. Mâ ǀgam mâǂoa ra ǀgaukha gagasi paradais ǃnâ ra hōhe?

 ⁸ ǀNammi tsî ǀguiǃnâxasib Jehovab khoen ǁaegu hâb ge ǀgam mâǂoa ra ǀgaukha gagasi paradais di kha. Nē “ǀguiǃnâxasib” ge ra hui da, î da ǂâi ǁkhā matib ûiba ǀasa ǃhūbaib ǃnâ nî ī ǀgausa. Nētsēn ge Jehovab ǃoaba-aona nētsēs xan ra hōǃâ ǀnammi tsî ǀguiǃnâxasib xa ǃnāsa-e nî hōǃâ. (Kol. 3:14) Xristeǁî ǃgâsas ge ra ǁguiǃā tae-es ge ǂguro ǃnāsas ge Jehovab ǃoaba-aona ǀhao-ū, o a ǃgaoǃgâsa: “ǀŪ ta ge ge ī mati ta ǂkhîse nî hâsa ti omaris ǃnâs tsîna. ǂGuro ǃnās ama ǀnamman khoena ra ǁgaugusa ta ge mûs ge Jehovab ǃoaba-aona ta ge ǀhao-ū o.” Khoe-i ga ama ǂkhîba hōǃâ tsî ūn hân ǀkha ǂâu ǂgao, on ge sida gagasi paradais ǃnâ nî hâ. Mati ǀguin ga khoena Jehovab ǃoaba-aon xa ǂâi, xawen ge ǃgôasib tsî ǃgâi ǀons tsîna ǁîba ra ǃoaban hoan ǀkha ūhâ.—Jes. 65:15.

9. Jesajab 65:​16, 17 tsîna tae-e hōǃâ da ra ǃgomsin xa ra mîmâi?

⁹ ǃNomsa tsî sâsa ǀgaub. Jesajab 65:14 ge ra ǁguiǃā ǁnān hîna gagasi paradais ǃauga ra hân ge “ǂgaob tsûb xa nî ā tsî nî ǃoa,” ǁîn gagas dāǂkhūhe hâ xui-ao. Tae-e Elob khoen ra hōǃâ tsûb tsî ǂâiǂhansen di ǀkha nî ī? Amase “aiǃâ ge hâ i ǂōǂōsigu ge ǀuruhe” tsî ǁîn aisa xu nî sâuhe. (Khomai re Jesajab 65:​16, 17 sa.) Jehovab ge sida ǃgomsiga nî ūbē tsî i ge ǁnā tsûb hōhōǃnâde nî ǀkhai.

10. Tae-i ǃaroma du Elob khoen ǀkha ǀguiba ǃoaba ǀhaosa ra ǃgôaǃgâ? (Ai-īsiba mû re.)

¹⁰ Xristeǁî ǀhaode hâǃnâs ge kaise sâsasiba ra mā da. Tsî î ge ra hui da ǃnomsase nē ǁgai ǃhūbaib ǃnâ hâsa. Sida ǃgâsan tsîna da ge ra hui în ǁîn tsîna ǃnomsasib, ǀnammi, ǂkhîb, khoexaǃnâsib tsî tsamtsiǃnâsib tsîna hōǃâ. Nēn hoan ge gagab di ǂûn ǃâ. (Gal. 5:​22, 23) Kaise da ge ra ǃgôaǃgâ Jehovab ǀapeǂhumis di ǃâ da a amaga. Nē gagasi paradais ǃnâ ra hâ ǀgaran ge nî mû matib Eloba ǁîb mîmâis “ǀasa ǃhūbaib tsî ǀasa ǀhommi” dis tsîna ra dīǀoaǀoa ǀgausa.

11. Jesajab 65:​18, 19 ǃoagu i gagasi paradais Jehovab ge kurusa sida nî tsâǀkhā?

¹¹ ǃGôaǃgâsib tsî ǃgâiaǂgaob. Jesajab ge aiǃgû tsî ra ǀaro ǃaromasa da ūhâsa î da “ǃgâiaǂgao” gagasi paradais ǃnâ. Nē gagasi paradais ge Jehovab di kurus  ǃâ. (Khomai re Jesajab 65:​18, 19 sa.) ǁNā-amaga da ge buru tama Jehovab sida ra sîsenūsa, î da khoena hui în nē ǃhūbaib di ǀapeǂhumide ǁnāxu Elob xa hâ amaba ǁkhāǁkhā tamate. Tsî ǁîna hui în sida gagasi paradais di ǃâ kai. Amab ǃnâ da hâ amaga da ra hōǃâ ǀkhaegu ǃgao da ge kaise a ǂkhî. ǂKhâǃnâhe da ge ra î da nauna nē ǀkhaegu xa mîba.—Jer. 31:12.

12. Jesajab 65:​20-24 ǃnâ hâ mîmâisa mati ra tsâ kai du tsî tae-i ǃaroma?

¹² Kaise da ge ra ǃgôaǃgâ tsî da ge a ǂkhî gagasi paradais ǁanǂgāsaben ase da ūhâ ǃâubasens ǃaroma. Elob di ǀasa ǃhūbaib ǃnâ da mû tsî nî dī xūna mûnanai re. Elobmîs ge ra mîmâi: “ǁÎs ǃnâ i ge ǃaruǀî ǀgôaro-e ǀoro tsēdi ǀguide ûi tide, tamas ka io kai khoe-i ûib â-e ûiǂui tama-e.” Tsî da ge “omde om tsî ǁîdi ǃnâ nî ǁan . . . draibeǃhanaga ǂgā tsî ǁîgu ǂûna nî ǂû.” Jehovab xa da nî “ǀkhaehe” amaga. ǃNorasa tsî ǃgâi ûib ǂâibasensa ūhâbab ge ra mîmâiba da. “ǁÎn nî ǂgais” aiǃâb ge mâ ǀguiǀguibe khoe-i hoa-i di ǂhâsiga a ǂan tsîb ge “ûitsaman hoana ǂhâban hân ǀkha ra ǁâǁâ.”—Jes. 65:​20-24; Psa. 145:16.

13. Jehovaban nî ǃoaba tsoatsoas aiǃân khoena ra dī ǀkharaǀkharanas Jesajab 65:25 sa mati ra ǁguiǃā?

¹³ ǃNorasasib. Elob di ǃanu gagab huib ǀkhan ge ǂguin hîna ge ǂkhabaxa tamas ka io ǂhauǃnâ tama ina ǁîn ûib ǃnâ ǀkharaǀkharna ge dī. (Khomai re Jesajab 65:25 sa.) ǁÎn ge ǃgarise ge sîsen în ǁîn ǁgai ǁnaedīga ǀû. (Rom. 12:2; Efe. 4:​22-24) Elob khoen ge noxoba ǀoasa kurusa ūhâ tama tsî aiǃgû tsî nî dīsā. Xaweb ge Jehovaba ‘hoaraga khoena’ ge ǀhaoǀhao hîna ǁîba ǀnam tsî a ǀnamguna. Tsîn ge ǁnās xa ǃaromahe hâse ama ǀnammi tsî ǀguiǃnâxasib tsîna ūhâ. (Tit. 2:11) Nē buruxa xū-eb ge Hoaǀgaixa Elob ǀguiba a dī ǁkhā.

14. Jesajab 65:25 sa mati ǀnî ǃgâsab ûib ǃnâ ge ama kai?

¹⁴ Khoena amabes ǃnâ ǁîn ûiga dawa ǁkhā? Saora aiǁgaus xa ǂâi re. ǂKhamkhoeb ge tronkedi ǃnâ gere ǂgâ ga ǂoa, 20 kurixab nîs aiǃâ. ǁÎb ge ǀaib tsî ǂkhabadīb tanisen ǀgauga ge ūhâ i. Tronkes ǃnâb ge audo ǃnaris, oman ǃnâ khôaǂgâs tsî ǀnî ǁkhōǁkhōsa xūn ǃaroma ge ǂnôa i. Hoaǁaeb ge ǃkhamsa tsoatsoas ǃaroma ge aiǂhumisa i. Amabab ge ǂguroǃnās ase ǁnâu tsî ǀhaodi Jehovab ǃoaba-aon dide hâǃnâ tsoatsoa, ob ge ge ǂanǃgâ ama ûibab ge hōsa. ǁNās ge gagasi paradaisa. ǁĀǁnâheb ges khaoǃgâb ge Jesajab 65:25 ǃnâ hâ mîdi ǁîb ǃoa ra sîsen ǀgaus xa gere ǂâi. ǁÎb ge xammi di ǂkhābaxa khami ī ǀgauba xu dawa tsî gū-i khami ī ǀgauba ge omkhâi.

15. Tae-i ǃaroma da nauna ra ǁkhau ǂgao în gagasi paradais di ǃâ kai tsî nēsa da mati a dī ǁkhā?

¹⁵ Jesajab 65:13 ge saorase ra tsoatsoa: “ǁNā-amagab ge ǃKhūb Eloba ge mî.” Tsî 25ǁî ǁaraǃās ge saora mîdi ǀkha ra ǀam, “tib ge ǃKhūba ra mî.” ǁÎb mîdi ge hoaǁae ra ama kai. (Jes. 55:​10, 11) Gagasi paradais ge ǀnai nēsi hâ. Jehovab ge ǀō-aisa ǃgâsana ge kuru. ǁÎb khoen ǁaegu da ge ǂkhîb tsî ǃgâiaǂgaob tsîna nē ǂkhābaxa ǃhūbaib ǃnâ hō ǁkhā. (Psa. 72:7) Nēs ǃaroma da ge ǁkhā da as kōse ǂgui khoena ra hui ǂgao în sida Xristeǁî ǃgâsan di ǃâ kai. Nēsa da ge a dī ǁkhā ǁkhāǁkhāsabedīs sîsenni ai da ga sida ǂâisa ǂnûi o.—Mat. 28:​19, 20.

 NAUNA DA NI HUI ǀGAUB ÎN GAGASI PARADAIS DI ǃÂ KAI

16. Matin khoena gagasi paradaisa ǃoa ra ǂgaehe?

¹⁶ Hoa da ge xū-e nî dī, în nauna gagasi paradaisa ǃoa ǂgaehe. Nēsa dīs ǃaroma da ge Jehovaba nî ǁgae. ǁÎb ge khoena ǁgari tama hâ în Jehovab ǀapeǂhumis ǃâ kai, xaweb ge ǃgâi ǀgaub ǃnâ khoena ǁîb ǃoa ra “ǂgae”. (Jhn. 6:44; Jer. 31:3) ǃGâi ǂgaoga ūhâ khoen hîna Jehovab di ǀnammi tsî ǁîb di ǃgâi ǀgaugu xa ra ǁkhāǁkhāsenan ge aitsama ǁîb ǃoa ra ǂgaehe. Mati da sida ǃgâi ǀgaugu tsî tanisen ǀgaugu ǃnâ-ū khoena gagasi paradaisa ǃoa nî ǂgae?

17. Mati da nauna gagasi paradaisa ǃoa nî ǂgae?

¹⁷ ǀGui ǀgaub hîna da nauna gagasi paradaisa ǃoa a ǂgae ǁkhāb ge sida ǃgâsana ǃgâise ǀnammi ǃnâ hâ-ūsa. ǀAsa khoen ga sida ǀhaohâb ǀhaode hâǃnâ tsoatsoa, o da ge ra ǂhâba în saora mîdi aibekam ǁaeb Korinteǁîn ge mîde mî: ‘Amaseb ge Eloba sadu ǁaegu hâ.’ (1Kor. 14:​24, 25; Sax. 8:23) ǁNā-amaga da ge “î du ǂkhîb ǃnâ ûi-ūgu” ti hâ ǀapemāsa nî sao ǀgara.—1Tes. 5:13.

18. Tae-e khoena sida ǀapeǂhumisa ǃoa nî ǂgae?

¹⁸ Dītsâ da ge nî î da sida ǃgâsana Jehovab xan ra mûhe ǀgaub ǃnâ mû. Nēsa da ge ra dī ǁîn ra dī ǃgâi xūn ai sida ǂâisa ǂnûis ǃnâ-ū. Tsî da ge ǁîn ǀoasa tama kurus ai kō tama hîna ǀgūǁae nî bēsa. ǁNâusāguna da ge ‘ǀkhomxaǃnâ tsî khoexaǃnâ’ ǀgaub ǃnâ ra sîsenǂam ǂgao. Tsî da ge mâ khoe-i hoa-e harase ra ǀûba ǂgao. (Efe. 4:32) ǁNāpaxu i ge khoen hîna nēti ī ǀgaub ǃnâ ra hâ-ūhe ǂgaona nî nē paradais di ǃâ kai ǂgao. b

 GAGASI PARADAIS ǃNÂ HÂ RE

19. (a) “ ǂOa tsîn ge ge oaǀkhī” ti hâ boksis ra ǁgau khami tae-en ge ǀnîna mî, gagasi paradaisa ǃoan ge oaǀkhī o? (b) Tae-e da nî mîǁgui dīsa? (Ai-īsiba mû re.)

¹⁹ Sida di gagasi paradaisa da ge kaise ra ǃgôaǃgâ. Nēsisa i ge ǃnāsase a îsa tsî i ge ǃnāsa ǃoaba-aon Jehovab dina hâ. A da aiǃgû tsî ǃgôaǃgâsiba gagasi paradaisa ǁgau re. Khoakhoahe tsî ǃnomasase ra tsâ ǂgao khoe-i hoa-i ge gagasi paradais ǃnâ nî ǂgâxa tsî ǁîsa tātsē ǁnāxu tide. Xawe ǂanbasen re ǁGâuab ge ǁkhāb a xū-i hoa-e ra dī îb nēsa xu nanabē da. (1Pet. 5:8; J.ǂHa. 12:9) Tā da ge nî mā-ambi îb nēs ǃnâ dan. Hā re î da ǃgarise sîsen tsî sida îsa, ǃanu tsî ǃnomsa gagasi paradaisa ǁkhauba.