ISRAELǁÎ tama khoegu ge ge Davidi toroǂnubis ǃâ-i, aiǁgause Seleki Amonǁîb, Uriab Hetǁîb tsî Itmab Moabǁîb. a (1Kro. 11:​39, 41, 46) Davidi toroǂnubis ge Keretǁî khoegu tsî “Gaoba ra ǃûi-khoegu” tsîna ge ūhâ i. (2Sam. 15:18) ǁAubexa i ge Keretǁîn tsî Peletǁîn tsîna Filisteǁîn ǃoagu ge ǀgū i. (Ese. 25:16) Keretǁîn ge Filisteǁîn ǃās Gatsa xu ge hâ i.—Jos. 13:​2, 3; 1Sam. 6:​17, 18.

Davida tae-i ǃaroma nē khoega ge mā-am î gu ǁîb toroǂnubis di ǃâ kai? ǁÎb ge ǂgomǃgâsiba ge ūhâ i, ǁîgu ǁîb ǃoa nî ǂgomǂgomsasa tsî ǁnās xa ǃnāsase ǂhâǂhâsasase Jehovab ǃoa nî ǂgomǂgomsasa. Keretǁîn tsî Peletǁîn tsîn xab ge ǀnî Elobmîs mîdi ǂkhanisa ge xoa khoeba saorase ge mî: “ǁÎgu ge Davidi ǃoagu ǂgomǂgomsase ge hâ ǀgara, ǃgom ǁaegu ǁîb ǂgaeǂguis digu ǃnâ.” Mati gu ge ǁîgu ǂgomǂgomsasiba ǁgau? ‘Hoaraga Israelǁî-aogu ge Davida ǁnāxū’ tsî “Seba ti ǀon hâ xūtama” khoeba ge sao-ai. Keretǁîn tsî Peletǁîn tsîn ge ǂgomǂgomsase Davidi ǃoa-ai ge hâ tsî ge hui î-i Sebab ǁgâiǀkhāba toa. (2Sam. 20:​1, 2, 7) ǀNî ǃnā-i aib ge Gao-aob Davidi ôab, Adoniaba gere gao-ao kai ǂgao Salomonni amǃnâs ai. Xawen ge Keretǁîn tsî Peletǁîn tsîna Davidi ǃoa ǂgomǂgomsase ge hâ tsî ge hui îb Salomona saorase gao-ao kai, Jehovab xab ge ǁhûihe hâ i amaga.—1Gao. 1:​24-27, 38, 39.

ǀNî hâ khoeb hîna Israelǁî tamab, Davidi ǃoa ge ǂgomǂgomsa îb ge Ittaib Gatǁîba. Ittaib tsî ǁîb 600 khoegu tsîn ge Gao-aob Davida gere ǂkhâǃnâ ǁîb ǀgôab Absalommi ge ǁîb ǃoa khâikhâisen tsî khoena gere ǂgaeǂhapu o în ǁîba sao-ai Davidi ose. Davidi ge Ittiaba ge mîba Israelǁî tamab hâ amaga î ge ǂhâbasa tama hâ isa îb ǁîba ǃkhamba. Xaweb ge Ittaiba ge mî: “ǃGôahesa gao-aotse, ǃKhūb ǀons ǃnâ ta ra nūba tsi, sats ǀkha ta ǃgûts ga ǃkhai-i hoa-i ai nî hâsa, ûib ǃnâs kas, ǁōb ǃnâs kas hoasa.”—2Sam. 15:​6, 18-21.

Keretǁîn, Peletǁîn tsî Gatǁîn tsîn hoan ge ǃhaokhoe-i xawen ge Jehovab a ama Elo tsî Davidi Jehovab ǂkhauhesa ǃkhais di ǂgomǃgâsib tsî ǃgôasib tsîna ge ūhâ i. Amaseb ge Daviba ǀnîsi ǁnāti ī ǂgomǂgomsa ǀhōsanab ūhâ ǃkhaisa gere ǃgôaǃgâ.