• “Tita ge ti aob ge ǃnās hoasa gere ǀai khami gere tsâ.”

• “Tita ge taotaohesa, ǁgaisi tsî anu tama khoe-i khami gere tsâ.”

• “ǀGui khoe-i ǀkhas tsîna ta ge nē xū-i xa ge ǃhoa ǁoa-i, ǀguri ta ge ǃgoma gere tsâ.”

• “Jehovab ge tita ǀkha ǁae tama hâ i khami ta ge gere tsâ.”

ǀGapiga hâ ǁgâiǂuisen ti ge ra ǁgau, matikōses tarasa ǃgoma ra tsâsa, ǁîs aob ga ǁgoe-ūgub vidion tamas ka io ǀōǀkhā khoen ai-īsiga kō o. Tsîb ga ǁnāsa ǀnîsi ǂganǃgâsib ǃnâ ǁkhâgu tamas ka io kuriga dī, os ge ǁîbas tātsē ǂgomǃgâ ǁoa khami a tsâ ǁkhā. ǀGui taras ge ge mî, “tātsē ta ti aoba ǂan tama khami ta ge gere tsâ? ǀNî xūna hâ tita xub ra sâuna?”

Nē khomâiǃâs ge aob hîna ǁgoe-ūgub vidion tamas ka io ǀōǀkhā khoen ai-īsiga ra kēb, taras ǃaroma aiǂhomisa. a Nēba i ge Elobmîs tsoatsoadi hîna ǁîsa ǁkhaeǂgao ǁkhā di xa nî ǃhoahe. Matib Jehovaba ǁîsa ǀnam, ǂgomǃgâ kai tsî ra hui ǂgaosa îs ǃnāsa ǂkhîba ūhâ tsî Jehovab ǀgūse hâ. b

Aob ra dī xū-i hoa-es tarasa ǁkhae ǁoa, xawen ge ǀnî xūna hâ taras a dī ǁkhāna, îs ǃnāsa ǂkhîba ūhâ ǁkhā. Saora xūn xa ǂâi re.

Tā ǀhapi tsâsen. Taras ge xū-es dīsā hâ amagab ǁîs aoba, ǁgoe-ūgub vidion tamas ka io ǀōǀkhā khoen ai-īsina ra kē ti ǂâi ǁkhā. Danielles c ge ra mî, “Kaise ta ge ǂâiǂhansen tsî ge ǁaixa hâ i, ti aob ge ǁgoe-ūgub vidion, tamas ka io ǀōǀkhā khoen ai-īsina gere kē amaga. Tsî i ge mâsiba ge ǃgâiǃgâi tama hâ i.” |Nî tara di ge tanisen ti ra |gaub xa ra |hapitsâsen tsî ra ǂâi |nai hâ mâsib ai ti ra |aro ti. Alise ge ǁîs aob ǃaromas îxa tama hâ khami gere tsâ. ǁÎs ge gere ǂâi, “ti aoba tae-i ǃaroma ǀnî hâ khoede ra kē titab nî kēs xa?”

ǁNā tsâsiga du ga ūhâ o, ǂâis ǃnâ ūhâ, Jehovab ge ǀhapi ǂgā-am du tama, aob ra dī xūn  ǃaroma. Jakobub 1:14 ge ra mî: “Mâ-i hoa ge ra ǃâitsâhe, ǁî-i di turab ǂûb xa i ra ǂgaeǁnâhe tsî nanaheo.” (Rom. 14:12; Fil. 2:12) Sado ǀhapimās xab ge Jehovaba sadu di ǂgomǂgomxasib ǁîb ǃoagu du ūhâba ra ǃgôaǃgâ.—2Kro. 16:9.

Taras ge ǀnîsi a tsâ ǁkhā, aob ǁgoe-ūgub vidion tamas ka io ǀōǀkhā khoen ai-īsina ra kēs, ǁîs xa ra ǃaromahesa îxa tamaas hâ amaga. Xawe ǁnā i ge ama tama. ǁKhāǁkhāsen hâ gā-ai khoen ge ra ǁguiǃā. ǁGoe-ūgub vidion tamas ka io ǀōǀkhā khoen ai-īsina kēs khoe-i ǃnâ sorosi ǂharugu turaga ra omkhaisa, tarekhoe-i a dīǀoaǀoa ǁoana.

Kaise ǂâiǂhansensa xu ǂgōsen. Catherines ge ra mî, ǁîs aob ge ǁgoe-ūgub vidion tamas ka io ǀōǀkhā khoen ai-īsina gere kē ǃkhais xa ǀguis ge gere ǂâi. Franses ge ra mî: “Ti aob mapa hâsa ta ga ǀû, o da ge kaise ra ǂâiǂhansen.” ǀNî taradi ge ra mî ǀnî hâ Xristeǁî ǃgâsa-i hîna aob ǃgomsiba ǂan-i ǀkha di ga hâ, o di kaise ra taosa. ǀNî di ge ra mî ǁîdi ra ǀguritsâsensa khoe-i ǁîdi mâsiba ǁnâuǃā tama amaga.

Nē tsâsigu ge a hoaǃnâ-aixa. Xawe ǂgui ǁaeba nē xūn xa ǂâis ge ǃnāsase nî ǂâiǂhansen kai du. Jehovab ǀkha du ūhâ ǀhōsagusis ai sadu ǂâisa ǂnûi. ǁNāsa du ga dī, o du ge ǁaeb ra ī khami nî ǀgai tsî i ge nî hui î du mâǀgai.—Psa. 62:2; Efe. 6:10.

Elobmîs ǃnâ hâ taradi hîna ge Jehovaba ǃoa ǀgore. Tsî ǁkhaeǂgaohe di xa khomai tsî ǂâiǃgâs ge nî huidu. Jehovab ge ǁîdi ge ūhâ i ǃgomsina ge ūbē tama hâ i, xawe ǂkhîba ge mā di. Hanas ge aiǁgause kaise ǁîs mâsib xa gere ‘ǂâiǂhansen.’ Tsîs ge ǁaeroba Jehovab ‘ǃoa a ǀgores’ khaoǃgâs ge ǂkhîba ge hōǃâ. Tae-i hānîǁaeb ǃnâ nî īsas a ǀū xawe.—1Sam. 1:10, 12, 18; 2Kor. 1:3, 4.

ǀHaohâb ǃûi-aoga xu ǂkhâǃnâsa ôa. ǁÎgu ge “ǀgaisa ǂoab ǃnâ sâuǃkhaise nî ī; ǀgaisa ǀnanub ǃnâ ǃgareǀuise.” (Jes. 32:2) ǁÎgu ge ǀnîsi aiǁgause ǃgâsas xa a mîba du ǁkhā, hîna du a ǃhoa-ū tsî ǁkhaeǂgao du ǁkhāsa.—ǂKhm. 17:17.

Sadu aoba du a hui ǁkhā, îb ǁgoe-ūgub vidion tamas ka io ǀōǀkhā khoen ai-īsina kēs ǁnaetiba ǀû? ǀNîsi. Elobmîs ge ra ǁgau da, ǃgomsib tamas ka io khākhoeb ǃoagu da ga ǃkham, o i ‘ǀgam khoena ǀgui-i ǃgâ-ai a ǃgâisa.’ (Aoǁn. 4:9-12) ǁKhāǁkhāsen hâ gā-ai khoen  ge ǂanǂui hâ ǃgamme hâ khoera ga ǀguipa sîsen, ob aoba ǁîb ūhâ ǁnaetiba ǀû ǁkhāsa. Tsîs ǁîb tarasa ǁîb ǃnâ ǂgomǃgâsiba omkhâi ǁkhāsa.

Sadu aoba xu i ge hâ ǁîb ǀguipa sîsenǀhao tsî nē ǁnaetiba ra ǀû ǂgaosa. Jehovabab ǀkhoma hâ îb ǀgaiba māhe. Tsîb huiba ǀhaohâb ǃûi-aoga xus tsîna ǂgan hâ? (2Kor. 4:7; Jak. 5:14, 15) Xū-eb dī hâ hîna nî huibi-e îb nē ǃâitsâga xu hâbe? Aiǁgause ǁaebab ra mîǁgui internetsab nî sîsenūse. Tsîb ǃâitsâbi nî mâsiga xu ra ǂgōsen? (ǂKhm. 27:12) Sadu huiba ūǃoa tsîb a ǂhauǃnâ? Ti-i nî īs ga, o du ge a huibi ǁkhā.

Mati? Saora aiǁgaus xa ǂâi re. Felicias ge Ethanni hîna ge ǂkhamsisa xu ǁgoe-ūgub vidion tamas ka io ǀōǀkhā khoen ai-īsiga kēs ǁnaetiba ǀû ǁoa-i ba ge ǃgamme. Felicias ge ǁîba kaise ge supusuba ǁîs ǀkha ǃhoasa, ǁnā turab ga ǁîb ǃnâ khâi o. Ethanni ge ra ǁguiǃā: “Tita ge ǂhauǃnâ tsî harase ti kaikhoes ǀkha ra ǃhoa. ǁÎs ge ǀnamxaǃnâ ǀgaub ǃnâ ra huite î ta, tā ǃâitsâgu ǃnâ ǂgâ. Tsîs ge ǁaeba xu ǁaeb ǀkha ra dîte mati ta ra dīsa. Tsîs ge ra huite î ta mîǁgui matikō ǁaeba ta internetsa nî sîsenūsa.” Ama as ge Felicias ra tsûsa Ethanni ǁgoe-ūgub vidion tamas ka io ǀōǀkhā khoen ai-īsina kēs turaba ūhâsa. Xawes ge ra mî “ti ǁaib tsâsigu tsî tsûaǂgaob huibi titesa, îb nē ǁgai ǁnaetiga ǀû. ǁÎb tsâsigam ga kōǃgâ tsî ǃhoaǃgao toas khaoǃgâb ge tita ra hui î ta ti tsûba sîsenǂam.”

Nēti i ǁgamǀhaon ge aoba a hui ǁkhā, îb ǁgoe-ūgub vidion tamas ka io ǀōǀkhā khoen ai-īsina kēsa xu ǂgōsen. Tsî ǁîb taras tsîna a hui ǁkhā îs ǁkhapa ǁîb ǃnâ ǂgomǃgâsiba ūhâ. Aob ga ǁîb tarasa ǁîb ǂhabusasigu, turagu, mapab hâs. Tsî taenab ra dīs tsîna mîba, o i ge tarasa nî supuba ǁîba ǂgomǃgâsa, sâub ra xū-i ǀkhai amaga.

ǂGom î du ra ǁnāti-i ǀgaub ǃnâ du sadu aoba a hui ǁkhāsa? Ama i ga, o ro ge ǀnîsi nē khomaiǃâsa ǀguiba khomai tsî a ǃhoaǃgao ǁkhā. O î ge ǁîb mîǁguib ǁgoe-ūgub vidion tamas ka io ǀōǀkhā khoen ai-īsina kē ǀûs diba nî ǃkhōǂgā. Tsî sado ǃaromasa nî mā î du ǂgomǃgâbi. Nē ǃgomisib ǃaroma ǁaixas xab ge nî ǁnâuǃā, nē ǃgomisib mati sadu ra tsâ kai ǀgausa. Sadu aob di ǁgūtsâde du ge nî ǂkhāǃnâ îb nē ǁgai ǁnaetiba ǀû. Tsî ǁîb tsîna ǃēsa nî mā îb sadu ǂgomǃâsiba hō-oa. Saro hoa ro ge nî kē tae-i ra ǃaromasa, î-i khoe-e ǁkhapa tā ǁgoe-ūgub vidion tamas ka io ǀōǀkhā khoen ai-īsiga kē tsî nē ǃgomisiba dan ǁkhā. d

 ǃAo du ga o, sadu tsî sadu aob ǃnomsase nē xū-e ǃhoaǃgao tudesa. O ǀhaohâb ǃûi-aob saro hoaro hārase ra tsâ-ūb ǀkha ǃhoa re. Îb ǂnû tsî saro di ǁgamǀhaosa daoǁgau. ǂÂis ǃnâ ūhâ re sadu ǃgamme hâ khoe-i ga nē ǁgai ǁnaetib ǁgoe-ūgub vidion tamas ka io ǀōǀkhā khoen ai-īsiga kēsa ǀû. Xawe i ge ǁaeroba nî ū î du ǁkhapa ǁîba ǂgomǃgâ. Tā ǀûsen re. ǂKhari ǀkharaǀkhararona ǃgaoǃgâ re. ǂGomǃgâsiba ūhâ re ǁaeb ra ī khami ro ga saro hoaro ǃnūǃnâxa, o i ge saro ǃgammeba ǁkhapa nî ǀgaisa.—Aoǁn. 7:8; 1Kor. 13:4.

Sado di aob ǁkhapa ǁgoe-ūgub vidiona kē, o i ra ǂâibasen ǃhobasen tsîb tātsē nē ǁgai ǁnaetiba ǀû tidesa? Hî-i, nēti i ǁgai ǁnaetibab ga ūhâ, o i ge ǀnîsi ǁaeroba a ū ǁkhā îb ǀû. Kurinab nē ǁgai ǁnaetiba ǀû hâ hînab ge ǁkhapa a ǁnā-oa ǁkhā. ǁNāsa ǀûs ǀkha huibis ǃaromab ge ǃnāsa xūna nî dī hîna mā-ambi tidena ǁkhapa kēsa. Nēsib ga ǀnai ǀû xawes tsîna. (ǂKhm. 28:14; Mat. 5:29; 1Kor. 10:12) ǁÎb ge ǀasa ǂâiǀgauba nî omkâi tsî nî ǁkhāǁkhāsen îb “ǂkhababa” ǃhui. ǁNā i ge ǁgoe-ūgub vidion tsî ǀurixa ǁnaediga aiǁgause, skomolsens tsîna ǃkhōǂgāse. (Efe. 4:23; Psa. 97:10; Rom. 12:9) ǁÎba māsenxase ra dītsâ ǂgao? ǁNāti i ga i, ob ge nē ǁgai ǁnaetiba a ǀû ǁkhā. e

Sadu ǃgamme hâ khoe-i ga nē ǁgai ǁnaetiba ǀû ǂgao tama ios? O du ge ǁnâuǃāxase ǁaixa, tsûaǂgao tsî gāxaǃnâhe ra khami a tsâ ǁkhā. ǂKhîba du ge a hō ǁkhā sadu ǂhânsende du ga Jehovab ai ao o. (1Pet. 5:7) Aiǃgû re ǁkhāǁkhāsen, ǀgore tsî ǂâiǃgâs ǃnâ-ū Jehovab ǃoa ǀgūsa. ǁNā-e du ga dī o du ge ǂgomǃgâsiba a ūhâ ǁkhā ǁîb sadu ǀgūse nî hāsa. Jesajab 57:15 da mî khami, ‘ǂkhūǂkhūhesa tsî ǃgamǃgamsenxa gagasa’ uhân ǀkhab ge ǁan hâ îb hui nî. Dītsâ î du ǃgâi Xristeǁî kai, ǀhaohâb ǃûi-aoga xu huiba ǂgan re. Tsî ǃâubasensa ūhâse hâ ǀgara re, hānîǁaeb ǃnâb sadu aob ǂgaoba xu ǀkharaǀkharana nî dīsa—Rom. 2:4; 2Pet. 3:9.