1. Tae-i ǃaroman ge Babilonǁîna kebo-aob Danieli xa ge mâǂoabahe?

 DANIELI ge ge ǂkhamkhoe-i Babilonǁîn xab ge ǃkhōsisa ǃoa ūhe o, ǁîb ǁgûs ǃhūba xu. ǂKhami ge i xaweb ge Daniela Babilons di ǂamkhoega ge mâǂoaba. ǁÎgu ge ‘ǃaugab īsib ai ge kō,’ Danieli ge ‘sorosi ǃnūbisi-i’ xare-e ūhâ tama hâ isa. Tsîb ge ǂhâǂhâsa omarisa xu gere hāsa. (1Sam. 16:7) ǁNā-amaga gu ge ge ǁkhāǁkhābi îb gao-ommi ǃnâ sī ǁkhāǁkhāsen.—Dan. 1:3, 4, 6.

2. Matib ge Jehovaba Danieli xa gere tsâ? (Esegieli 14:14)

² Jehovab ge Daniela ǁîb îxa ai-īsib tamas ka io ǀō-aisa aiǂhanugu hînab ge gao-ommi ǃnâ ūhâ-i gu ǃgao ge ǀnam tama hâ i. Xawe nē ǂkhamkhoeb nî tae kaisa ǁhûi ǃkhais ǃaroma. Jehovab ge Danieli Noaxi tsî Jobi khami i ti a mî o, ob ge Daniela ǁaubexa 20 kurixas ǀguisa ge ī-i. Xaweb ge Jehovaba ǂkham Daniela, Noaxi tsî Jobi hîna ǁîba ǂgui kuriga ǂgomǂgomsase ge ǃoaba gu khami ǂhanu-aise gere mû. (Gen. 5:32; 6:9, 10; Job. 42:16, 17; khomai re Esegieli 14:14 sa.) Tsîb ge Jehovaba Daniela aiǃgû tsî ǁîb di ǂhâǂhâsa ûi kurib hoab ǃnâ ge ǀnam.—Dan. 10:11, 19.

3. Tae-e da nē ǁkhāǁkhāǃâs ǃnâ nî ǃhoaǃgao?

³ Nē ǁkhāǁkhāǃâs ǃnâ da ge Danieli ǀgam ǀgauga nî ǃhoaǃgao, hîna ǁîba Jehovab aiǃâ a ǀō-aisa kai ga. ǂGurose, da ge mâ ǀgaub hoaba nî ǁguiǃā tsî ǁgaub gere ǃnāde nî kō. Saorase da ge nî ǃhoaǃgao, tae-i ge Daniela a huisa îb nē ǀgauga omkâi. ǀAms ai da ge nî ǃhoaǃgao, ǁîba da mati a ǁgae ǁkhā ǀgauba. Nē ǁkhāǁkhāǃâs ge ǂkhamkhoena ǂâis ǃnâ ūhâse xoahe xawe da ge sida hoada Danieli di aiǁgausa xu a ǁkhākhāsen ǁkhā.

4. Daniela mati ǁkhoaǂgaosiba ge ǁgau? Aiǁgau-e mā re.

⁴ Danieli ge kaise ge ǁkhoaǂgaoxa i ǂkham khoeba. Kō re matib  ge ǀgam ǃnā ra ai ǁkhoaǂgaosiba a ǁgau ǀgausa. ǂGuros ge ǀnîsi Babilons ǀgam kuriga Jerusalemsa dīkākās khaoǃgâ ge i. Babilons di gao-aob Nebukadnessari ge kaise ǃaoǃaoxa ǁhaposa ge ūhâ i, kai ai-īsib xa. ǁÎb ge ǁîb di gā-ai khoegu tsî Danieli tsîna ǃkhōǂgā hâse ge mîba î gu ǁîb ǁhapos xa mîba bi tsî tae-es ra ǂâibasens tsîna. Tsî gu ga nēsa dīhō tama io, ob ge ǁîga nî ǃgam. (Dan. 2:3-5) Danieli ge ǃkhaese xū-e ga dī hâ tamas ka ion ge ǂgui khoena ga ǃgam-e hâ. ǁÎb ge “sī tsî gao-aob mîmās ǁaeb aibe nî mâiǂuihesa ge ǂgan, îb gao-aoba ǁhapos di ǂâibasensa mîǃāba ǁkhā.” (Dan. 2:16) ǁNās ge ǂgoms tsî ǁkhoaǂgaosib tsîna ge ǂhâ hâ i. Elobmîs ge mî tama hâ, Danieli ge ǁhapode ǀnai gere ǁguiǃāsa. ǁÎb ge ǁîb ǀhōsaga Sadraxi, Mesaxi tsî Abednegob tsîna ge ǂgan î gu “ǀhommi di Elob ai ǀkhomxaǂgaosiba ǂgan, îb nē ǂganǃgâsiba ǁîga ǂhaiǂhaiba.” (Dan. 2:18) Jehovab ge ǁnā ǀgorede ge ǃeream. Jehovab huib ǀkhab ge Daniela gao-aob Nebukadnesari ǁhaposa ge ǁguiǃā. Danieli tsî ǁîb ǀhōsagu di ûib ge ge sâuhe.

5. Mapa ge ǀkhara ǁae-i Danieli ge ǁkhoaǂgaosiba ǂhâ hâ iba?

⁵ ǁAero-e ǃkharu tsîb ge Daniela kai ai-īsib xa hâ ǁhaposa ǁguiǃā toa hâs khaoǃgâ, î ge ǁîb ǁkhoaǂgaosiba ǁkhapa ge ǃâitsâhe. Nebukadnesari ge ǀnî hâ ǁgai ǁhaposa ge ūhâ i. Nē ǁhapos ge kai hais xa ge hâ i. Danieli ge ǁkhoaǂgaoxase ǁhapos di ǂâibasensa gao-aoba ge mîba. ǁÎb tsînab ge ge mîba, ǃkhaub nî ǃkhaisa. Tsîb gao-aose ǁaerob di ǀgaiba, hâ tidesa. (Dan. 4:25) Gao-aob ge ǀnîsi ga ǂâi hâ, Danieli ǁǀîba ra mâǃoasa. Xawe Danieli ge ǁkhoaǂgaosiba ǁgau tsî ǁhaposa ge ǁguiǃā.

6. Tae-e Daniela ga hui hâ, îb ǁkhoaǂgaoxa?

⁶ Tae-e Daniela ga hui hâ, îb ǁîb ûiǁaeb ǃnâ ǁkhoaǂgaoxa? ǂGomǃgâ ǁkhā da ge a Danieli ǁgûra ge ǁîba ǃgâi aiǁgause îba isa ǂkham î ge īo. ǁÎra ge Jehovab ge Israelǁaes ǁgûna a mā ǂhanuga ǁnâuǀnam tsî ǁîra ǀgôana Elob di ǂhanuga gere ǁkhāǁkhā. (Deu. 6:6-9) Danieli ge disi mîmādi ǀguiti ge ǂan tama hâ i. Xaweb ge Israelǁaes tae-e a ǂû ǁkhās tsî tae-e ǂû tides daoǁgaudi tsîna ge ǂan-i. b (Lev. 11:4-8; Dan. 1:8, 11-13) Danieli ge Jehovab khoen  ǀkha î ge tae-e a isa ge ǁkhāǁkhāsen, ǁîban ge ǁnâuǀnam tama hâ io. (Dan. 9:10, 11) ǁÎb di ûib ǃnâb ge hōǃâ xū-i ge Daniela ǂgomǃgâsiba ge mā, Jehovab tsî ǁîb ǀgaisa ǀhomǃgāgu tsîn ǁîba nî huisa.—Dan. 2:19-24; 10:12, 18, 19.

7. Mâ ǀkhara xū-e Daniela ge hui îb ǁkhoaǂgaosiba ūhâ?

⁷ Danieli ge Elob kēbo-aogu di xoade gere ǁkhāǁkhāsen. Nēs ge Jeremiab di kēbode ǃkhōǂgā hâ. ǁNā ǁkhāǁkhāsa xub ge Daniela ge ǁnâuǃā, Jodeǁîn hîna ge Babilons ǃnâ ǃkhōsis ǃnâ hâ în ǀgūǁae nî ǃnorakaihesa. (Dan. 9:2) Danieli ge mû o Elobmîs kēbodi mati ra dīǀoaǀoahesa, os ge ǁnāsa ǁîb Jehovab ǃnâ ūhâ ǂgomǃgâsiba ge ǀgaiǀgai. Tsî ǁnān hîna Jehovab ǃnâ ǀgaisa ǂgomsa ūhân ge kai ǁkhoaǂgaosiba nî ūhâ ǁkhā. (Romeǁîn 8:31, 32, 37-39 sa ǀgopeǀnō re.) Xawe hoan ǃnâb ge Daniela, ǁîb di ǀhomsi ǁGûba ǃoa hoaǁae gere ǀgore. (Dan. 6:10) ǁÎb di ǁkhorebab ge Jehovaba ge mîba tsî ǁîb ra tsâ ǀgaub tsîna ge ǀgoragu. Tsîb ge Daniela huiba ge ǂgan. (Dan. 9:4, 5, 19) ǁÎb ge sida khami khoes ǀguisa ge i-i tsî ǁkhoaǂgaosib ǀkha ge ǃnaehe tama hâ i. Xaweb ge ǁnā ǀgauba ǁkhāǁkhāsens, ǀgores tsî ǂgomǃgâsiba Jehovab ǃnâ ūhâsa xu ge omkhâi.

8. Mati da ǁkhoaǂgaosiba a omkhâi ǁkhā?

⁸ ǁKhoaǂgaosiba omkhâis ǃaroma da, tae-e nî dī? Sida di ǁgûn ge a ǂkhâǃnâ da ǁkhā, î da ǁkhoaǂgaoxa. Xawen ge ǁîna sida ǁkhoaǂgaoxa kai ǁoa, ǁîn ǁnā ǀgauba ūhâ amaga. ǁKhoaǂgaosiba ūhâs ge ǀasa xū-e ǁkhāǁkhāsens khami i. ǀGui ǀgaub hîna du ǁnā xū-e ǃgâise a ǂan ǁkhāb ge, sadu ra ǁkhāǁkhā khoe-i ǁî-e ra dī ǀgauba ǃgâise kō tsî ǁî-i aiǁgausa ǁgaesa. ǁKhā ǀgaub ǃnâ da ge sida tsîna ǁkhoaǂgaoxa ǁkhā, naun di aiǁgausa da ga kō tsî ǁgae o. Tae-e da go Daniela xu ǁkhāǁkhāsen? ǁÎb khami da ge Elobmîsa ǃgâise nî ǂan. Tsî da ge Jehovab ǀkha ǀgū ǀhōsagusisa nî omkhâi, ǁîba ǃoa hoaǁae ǃhoas ǃnâ-ū. Jehovab ǃnâs tsîna da ge ǂgomǃgâsib nî ūhâ ǁîb sida ra kōǃgâsa. Tsîs ga sida ǂgomsa ǃâitsâhe, o da ge nî ǁkhoaǂgaoxa.

9. ǁKhoaǂgaosiba xu da mati ǃgâiba ra hō?

⁹ ǃGâiba da ge ǂgui ǀgaugu ǃnâ ra hō, ǁkhoaǂgaoxa da ga o. Beni aiǁgausa kō re. ǁÎb ge Duitsǃhūb ǃnâ skola gere ǂgâ. ǁNāpan ge hoa khoena kurus ǃnâ ǂgom tama hâ. Tsî gere tsâ Elobmîs ǃnaeǃkhais kurus xa hâs ama tama hâ ti. ǀGuitsēb ge Bena ǃgubis (klas) ǃnâ, ǃēsa ge māhe îb ǀgôan aiǃâ mā tsî ǁguiǃā tae-i ǃaromab ûib ge kuruhesa ra ǂgomsa. ǁÎb ge ge ǁkhoaǂgaoxa i tsî tae-eb ra ǂgomsa hoa khoena ge mîba. Mati î ge ǀamǂoa? Beni ge ge mî: “Ti ǁgauǃnâ-aob ge ǂōrisase ge ǃgâ. Tsî ǃhoaǃgao ū ta gere ǂkhaniga xu ǁnâiǁnâga dī. Tsî mâ ǀgôa-i hoa-e ǃgubis (klas) ǃnâ ge mā.” Beni ǃgubis (klas) ǀhōsana mati ge tanisen? Beni ge ra mî: “ǂGuin ge ǃhoa ta gere xūna ǃgâ tsî ge tita xan a ǃgâibahe ti ge mî.” Beni aiǁgaus khamin ge ǁkhaoǂgaoxa khoena ǀnî ǁaegu ai khoena xu ǃgôasiba ra hō. ǁÎn ge ǂhauǃnâ ǂgaoga ūhâ khoen tsîna Jehovaba ǃoa a ǂgae ǁkhā. Amase da ge ǁkhoaǂgaosiba da nî omkhâiba ǃgâi ǃaromade ūhâ.

10. ǂGomǂgomsasiba a tae?

¹⁰ Elobmîs ge ǂguiǃnāde “ǂgomǂgomsasib” tamas ka io ‘hâhâ ra ǀnammi.’ Hînab Jehovaba ǁîb di ǀhōsan ǃoagu ra ǁgauna ǃoa ra ǁnaeǁgau. ǁKhā mîs tsîn ge ra sîsenūhe, Elob ǃoaba-aon ǁîn ǁaegu ra ǁgaugu ǀnamma ǁguiǃāsa. (2 Samueli 9:6,7) Sada ǂgomǂgomsasib tsîn ge ǁaeb ǀkha a ǀgai ǁkhā. Hā re î da kō, matib ge Danieli di ǂgomǂgomsasiba a ǀgaisa ǀgausa.

11. Daniela mati kairab a hîna ǂgomǂgomsasiba ge ǁgau? (Tsoatsoas ai hâ ai-īsiba mû re.)

¹¹ Danieli di ǂgomǂgomsasib Jehovab ǃoagub ge ūhâ îb ge, ǁîb di ûib hoaba gere ǃâitsâhe. Xawe î kaise ǃgom xū-e, ǁîb 90 kuriga ǃkharuhâ ǁaeb ǃnâ ge i. Nē ǁaeb ǃnâs ge Babilonsa  Mediaǁîn tsî Persiaǁîn xa ge danhe. Tsî Gao-aob Dariub xa gere ǂgaeǂguihe. Gao-aob Dariuba gere sîsenba mûǂam-aogu ge Daniela ge ǃhui hâ i. Tsî ǁîb Elob tsîna ǃgôasiba ge ūhâba tama hâ i. ǁNā-amaga gu ge ge ǀape îb Daniela ǃgamhe. ǁÎgu ge Gao-aoba xoaǁguisa ǂkhaniba ge xoaǃgao kai. Hîna nî ǃâitsâba, Danieli ǁîb Elob tamas ka io Gao-aob ǃoagu ǂgomǂgomsase nî hâsa. Danieli ga dī hâs ge, Gao-aob ǃoagu ǂgomǂgomsase hâ tsî hoan khami 30 tsēdi di ǁaeba Jehovaba ǃoa ga ǀgore tama hâ. Danieli ge ge ǁhûi Jehovab ǃoagu ǂgomǂgomsase hâsa. ǁNās xa ǃaromahe hâseb ge xamgu ās ǃnâ ge aoǂgāhe. Xaweb ge Jehovaba Danieli di ǂgomǂgomsasiba ge mādawa-am, ǁîba xamgu am-ǃnâde xu ores ǃnâ-ū. (Dan. 6:12-15, 20-22) Mati da Danieli ge ǁgau khôahe ǁoasa ǂgomǂgomsasiba Jehovab ǃoagu omkhâi ǁkhā?

12. Matib ge Daniela khôahe ǁoasa ǂgomǂgomsasiba Jehovab ǃoagu omkhâi?

¹² ǂGuro i go mîhe khami i ge ǂgomǂgomsasiba ǀnammi xa ra ǂkhâǃnâhe. Danieli ǂgomǂgomsasib Jehovab ǃoagub ge ūhâ îb ge ge khôahe ǁoa i, kaiseb ge ǁîb di ǀhomsi ǁGûba ǀnam-i amaga. Danieli ge amase ǁnā ǀnamma ge omkhâi Jehovab di ǀgaugu xa ǂâis tsî ǁîkhab a ǁgau ǀgaub xa ǂâiǃgâs ǃnâ. (Dan. 9:4) Danieli ge hoa ǃgâi xūn hînab ge Jehovaba ǁîb tsî ǁîb khoena a dīban xas tsîna ganganxase gere ǂâiǃgâ.—Dan. 2:20-23; 9:15, 16.

13. (a) Mâ ǀgaub ǃnân sada ǂkhamkhoen di ǂgomǂgomsasiba ra ǃâitsâhe? Aiǁgau-e mā re. (b) Vidiob ǃnâ i go ǁgauhe khami mati du a ǃeream ǁkhā naun ga dî du o, Jehovab ǃoaba-aona ǁgoe-ūgu ra aorekhoegu tsî tarekhoedi di ûiǀgauga ra ǂkhâǃnâ?

¹³ Danieli khamin ge sada ǂkhamkhoena, khoen hîna Jehovab tsî ǁîb di ǂhanuga ǃgôa taman ǁaegu hâ. ǁNāti i khoen ge khoe-i hîna Jehovaban a ǀnam ti ra mî-e ǃhui ǁkhā. ǀNîn ge dītsâ tsî sida ǂkhamkhoena ra ǁore, în Jehovab ǃoagun ūhâ ǂgomǂgomsasiba khôa. Kō re nē aiǁgausa, tae-i ge īsa Greaeme ti ǀon hâ ǂkhamkhoeb ǀkha Australiab ǃnâ ra hâba. ǁÎb ge ǀgapi skoli dawab hâ hîna ǃgom ǃâitsâ-e ge hōǃâ. ǁGauǃnâ-aos ge ǃgubis (klas) ǀgôana ge dî, matin nî tanisensa ǁîn ǃgubis (klas) ǃnâ hâ ǀgôa-i ga mîba nî o, ǁî-i aorekhoegu hîna aorekhoegu ǀkha ra ǁgoe-ūgu-i ti ǀguisa. ǁGauǃnâ-aos ge ge mî, în ǁîn hoan hîna ǁnāti-i ûi ǀgauba ra ǁhûina ǀgui ǀkhāb ai mâ. Tsî ǁnān hîna ǂkhâǃnâ tamana nau ǀkhāb ai. Hoaraga ǃgubis (klas) ǀgôan ǁnā ûiǀgauba ra ǂkhâǃnân ge ǀgui ǀkhāb ai ge mā. Graemi ge ra mî: “Xawe tita tsî ǀnî hâ  Jehovab ǃoaba-aon tsîn ge ǂkhâǃnâ tama hân ǀkhāb ai ge mâ.” ǁNāpaxūb ge mâsiba kaise ge ǃgom tsoatsoa tsîb ge Graema nî ǁgau ge îs ge Jehovab ǃoagub a ǂgomǂgomsa. ǁÎb ge ra mî: “Hoara ga īri ǀgaiban ge nau ǀgôan tsî ǁgauǃnâ-aos tsîna ǁîna gere mîǁgaiǁgai. ǁKhā ta a ǀgaub ǃnâ ta ge ǃnomsa tsî ǁnâuǃāxa ǀgaub ǃnâ ti ǂgomsa ge ǁkhauba. Xawen ge ǀgui mî-i tita ra mî-i tsîna ge ǃgâ tama hâ i.” Graema mati gere tsâ? ǁÎb ge ra mî: “Tita ge ti ǃgubis (klas) ǀgôan xa ta ge mîǁgaiǁgaihe xawe kaise gere ǃgâiaǂgao. Jehovab ǃoagu ta ge ǂgomǂgomsase hâ tsî ti ǂgom ǀgauga a ǁkhauba o.” c

14. Mapa ǀgui ǀgaub khôahe ǁoasa ǂgomǂgomsasiba da Jehovab ǃoagu a ūhâ ǁkhāba?

¹⁴ Danieli khami da ge sada tsîna khôahe ǁoasa ǂgomǂgomsasiba Jehovab ǃoagu omkhâi ǁkhā, ǀgaisa ǀnamma da ga ǁîba omkhâiba o. ǁNā ǀnamma da ge ra omkhâi Jehovab di ǀgaugu xa ǁkhāǁkhāsens ǃnâ-ū. Aiǁgause da ge ǁîb ge kuru xūn xa a ǁkhāǁkhāsen ǁkhā. (Rom. 1:20) Jehovab ǃoagu du ūhâ ǀnammi tsî ǃgôasib tsîna du ga ǀgaiǀgai ǂgao, o du ge saogu ra ǃâgu ǃnāga “Was It Designed?” ti hâ ǂkhiniba nî khomai tamas ka io vidioga nî kō. Tsî du ge Was Life Created? tsî The Origin of Life—Five Questions Worth Asking ti hâ ǂkhanigu tsîna a khomai ǁkhā. Kō re tae-es ǂkham ǃgâsas Ester ti ǀon hâs, Denmarki ǃnâ ra hâsa nē ǂkhanigu xa ra mîsa: “Supu ǃgâi ǀgaub ǃnâ i ge ra ǁguiǃāhe. Nē ǂkhanigu ge mîba tsi tama hâ tae-ets nî ǂgomsa. ǁÎgu ge amab ǀguiba ra mî tsî aitsama mîǁguiba ra dī kaitsi.” Beni hîna go ǂguro goro ǃhoaǃgaoheb ge ra mî: “Nē ǂkhanin ge kaise ti ǂgomsa gere ǀgaiǀgai. Tsî ge ǂgom kaite Elob ge ûiba a kurusa.” Nē xūna du ga ǁkhāǁkhāsen toa, o du ge ǀnîsi Elobmîs ra mî-e nî ǃkhō-am, nēti ra mî: ‘Jehovah Elotse! Sats ge anu ǂkhaisib, ǃgôasib tsî ǀgaib tsîna ǃkhōǃoasa. Sats ge hoaraga xūna kuru xui-ao, tsî sa ǂâisa xun ge ge kuruhe tsî hâ.’—J.ǂHa. 4:11. d

15. Mapa ǀgui ǀgaub hîna da ǀgū ǀhōsagusisa Jehovab ǀkha a omkhâi ǁkhāba?

¹⁵ ǀNî ǀgaub hîna da ǃgam ǀnamma Jehovaba a omkhâi ǁkhāb ge, ǁîb ǀGôab Jesub di ûib xa ǁkhāǁkhāsensa. ǂKham ǃgâsas Samira ti ǀon hâs Duitsǃhūb ǃnâ ra hâs ge nēsa ge dī. ǁÎs ge ra mî: “Tita ge Jehovaba Jesub ǃnâ-ū ǃgâise ge ǂan tsoatsoa.” ǂKhams ge ī os ge Samirasa ge ǃgombahe-i ǁnâuǃāsa matib Jehovaba tsâsiga a ūhâ ǁkhāsa. Xawes ge ge ǁnâuǃā ǁkhā-i Jesub ge mati gere tsâsa. ǁÎs ge ǀaro tsî ra mî: “Tita ge Jesub xa a ǃgâibahe ǁîb ge khoexaǃnâ-i tsî ǀgôarona ǀnam-i amaga.” ǃNāsases Jesub xa ra ǁkhāǁkhāsen khamis ge, ǃnāsase Jehovaba ǂan tsî ge ǀnam. Tae-i ǃaroma? ǁÎs ge ra mî: “ǁAeb ǀkha ta ge ge ǁnâuǃā, Jesub ge ǀoasase ǁîb ǁGûb ǀgauga gere ǁgaesa. ǁÎkha ge ǀgui ǀgauga ūhâ. Tita ge ge mûǂan nēb ge ǃaromadi ti ǀguib, Jehovab ge Jesuba ǃhūbaiba ǃoa a sîba. Î-i īǁkhā khoena Jehovaba ǃgâise ǂansa.” (Jhn. 14:9) Sadu ǀhōsagusisa du ga Jehovab ǀkha a ǀgaiǀgai ǂgao o, tae-i ǃaroma du ǁaeba ǁamaǂui tsî ǃnāsase Jesub xa ǁkhāǁkhāsen tama hâ? ǁNāsa du ga dī, o î ge sadu ǀnammi tsî ǂgomǂgomsasib Jehovab ǃoagu du ūhâba nî kai.

16. Mati da ǃgâiba ǂgomǂgomsasiba xu ra hō? (Psalmdi 18:25; Mixab 6:8)

¹⁶ ǁNān hîna a ǂgomǂgomsan ge hoaǁae, ǀgū tsî hâhâ nî ǀhōsagusisa naun ǀkha ra kuru. (Rut. 1:14-17) ǁNās ǂam-ain ge khoen hîna Jehovab ǃoagu a ǂgomǂgomsana, ǃgâi ǃaromasa ūhâ ǂganagaba xu hâ ǂkhîba hōǃâsa. Tae-i ǃaroma? Jehovab ra mîmâi amaga,  ǁnān ǁîb ǃoagu ǂgomǂgomsan ǃoagub nî ǂgomǂgomsa ti. (Khomai re Psalmdi 18:25; Mixab 6:8 sa.) Nē-i xa ǂâi re, hoaǀgaixa Kuru-aob ge a māsenxa ǀgaisa ǀhōsagusisa sida ǀkha kurusa. Tsî da ga nē ǀgū ǀhōsagusisa Jehovab ǀkha ūhâ, o î ge ǃâitsâ-i, mâǃoa-i tsî ǁō-i xare-i tsîna ǁîb ǀkha da ūhâ ǀhōsagusisa a khôa ǁoa. (Dan. 12:13; Luk. 20:37, 38; Rom. 8:38, 39) Kaise î ge a ǂhâǂhâsa sada Daniela ǁgae tsî Jehovab ǃoagu ǂgomǂgomsase nî hâ ǀgarasa.

17-18. Tae-i tsîna da Daniela xu ǁkhāǁkhāsen ǁkhā?

¹⁷ Nē ǁkhāǁkhāǃâs ǃnâ da ge Danieli ǀgam ǀgauga go ôaǃnâ. Xawen ge ǃnāsana hâ ǁîba xu da a ǁkhāǁkhāsen ǁkhāna. Aiǁgause, Jehovab ge Daniela ǂgui ai-īsigu tsî ǁhapodi tsîna gere mā. Tsî ǁîba ǁkhāsib tsîna ge mā, îb kēbosi haisi-amde ǁguiǃā. ǁNā kēbodi xa î ge ǂguite ǀnai dīǀoaǀoahe hâ. Tsî nau di ge hāniǁaeb ǃnâ nî ī xūna ǃamkuse ra ǁguiǃā, hîna ǃhūbaib ai hâ khoe-i hoa-e nî tsâǀkhāna.

¹⁸ Saora ǁkhāǁkhāǃâs ǃnâ da ge ǀgam kēbo ra hîna Danieli xa xoahe hâ ra ǃgâise nî ôaǃnâ. ǁÎde ǁnâuǃās ge hoa da a hui ǁkhā, ǂkhaman tsî kairan tsîna î da nēsi ǃgâi mîǁguiga dī. ǁNā kēbodi ge sada di ǁkhoaǂgaosib tsî ǂgomǂgomsasib tsîna a ǀgaiǀgai ǁkhā. Î da ǀgūǁae nî hā ǃâitsâb ǃaroma aiǂhomisa.