1. Hebreǁîn 12:1 ǃoagu da tae-e nî dī, î da ûib di ǃkhoeǀnûgusa ǀams kōse ǃkhoe toa?

 ELOBMÎS ge sada Xristeǁî ûiba ǃkhoes ǀkha ra ǀgopeǀnō. ǃKhoe-aon hîna nē ǃkhoeǀnûgusa ǀams kōse ra ǃkhoe toan ge ǀamo ûiba nî māhe. (2Tim. 4:7, 8) ǁGūtsâ da ge nî î da ǃkhoe ǀgara, ǃgōsase ǃkhoeǀnûgus ǀams go ǀū amaga. Apostel Paulub hîna ge ǁîb ûib di ǃkhoeǀnûgusa ǀoasase a ǃkhoe toab ge xū-e ge mî, hîna nî huida-e î da nē ǃkhoeǀnûgusa dan. ǁÎb ge ge mîba da, ‘Mâ ǃgom-i hoa-e dībē, tsî sada aiǃâ ǁgoe ǃkhoeǀnûgusa ǁaposa mâǃkharus ǀkha ǃkhoe.’—Khomai re Hebreǁîn 12:1 sa.

2. ‘Mâ ǃgom-i hoa-e dībēsa’ tae-e ra ǂâibasen?

² Paulub ge ‘mâ ǃgomsi-i hoa-e dībē’ ti a xoa, ob ge ǁîba gere ǂâibasen Xristeǁî-i nî tani ǃgom-i a ǀkhai ti? Hî-i, ǁîb ge ti ge ǂâibasen tama hâ-i. ǁÎb gere ǂâibasens ge î da ǂhâbasa tama ǃgom-i hoa-e aoǁnâ. Nē ǃnôa ǃgomsin ge ǂhani da tsî nî tsau kai da. ǃKhaese da ge nēti-i ǃgomsi-e da ūhâsa nî mûǃā, î da ǃkhaese aoǁnâ. Xawe ǁkhā ǁaeb ai da ge tā tani da nî xūna nî aoǁnâ. Nē ǃgomsina da ga tani ǀû, o da ge ǃkhoeǀnûgus ǃnâ ǃâ-e ūhâ tide. (2Tim. 2:5) Mâ xūna da nî tani?

3. (a) Galateǁîn 6:5 ǃoagu da mâ xū-e nî tani? (b) Tae-e da nē ǁkhāǁkhāǃâs ǃnâ nî ǃhoaǃgao? Tsî tae-i ǃaroma?

³ Galateǁîn 6:5 sa khomai re. Paulub ge xū-i hîna da nî tani-e ge ǁgauǂui. ǁÎb ge “mâ-i hoa-i ge ǁî-i di ǃgommi ǂûba nî tani” ti ge xoa. Paulub ge nēba Elob sada hoada xu ǃâubasen hâ xū-e ǃoa ra ǁnaeǁgau, nē î ge xū-i hîna da aitsâma  nî tani-e. Nē ǁkhāǁkhāǃâs ǃnâ da ge nî ǃhoaǃgao tae-i sada di ‘ǃgomga tanis’ ǃnâ ǃkhōǂgāsas tsî mati da ǁî-e nî taniǁkhāsa. Tsî ǂhâbasa tama ǃgomsigu hîna da ǀnîsi tani hâgu tsîna nî ǁgauǂui. Tsî ǀgaugu hîna da mati ǁîga nî aoǁnâ ga. ǂHâbasa tama ǃgoma aoǁnâs ge nî huida, î da ûib di ǃkhoeǀnûgusa ǀams kōse ǃkhoe toa.

4. Tae-i ǃaroma i sada māǁnâsens mîmâisa ǃgom tama?

⁴ Sada māǁnâsens mîmâis. Jehovab ǃoagu da ga māǁnâsen, o da ge ra mîmâi ǁîba ǃoaba tsî ǁîb ǂâisa dīsa. ǁNā mîmâisa da ge nî ǃkhōǀgara. Sada di māǁnâsens ǃoagu ûis ge kai ǃereamsa, xawe î ge ǃgom tama hâ. Jehovab ge ǁîb ǂâisa da nî dīse a kuru da amaga. (J.ǂHa. 4:11) ǁÎb ge sada ǁîba ǂan tsî ǃoabas turab ǀkha ge kuru. Tsî ǁîb īsib ǃoas tsîna ge kuru da. ǁNās xa ǃaromahe hâse da ge ǁîba a ǀgū ǁkhā tsî ǃgâiǃgâibasensa ǁîb ǂâisa dīs ǃnâ ra hō. (Psa. 40:8) Elob ǂâisa dī tsî da ga ǁîb di ǀGôaba ga sao, os tsîna da ge aitsama ‘khoakhoasensa nî hōbasen.’—Mat. 11:28-30.

5. Tae-e a huidu ǁkhā, î du sadu māǁnâsensa dīǀoaǀoa? (1 Johaneb 5:3)

 ⁵ Mati du māǁnâsens mîmâisa tani ǁkhā? Nē ǀgam xūn ge hui ǁkhā. ǂGurose, Jehovaba du ūba hâ ǀnamma aiǃgû tsî ǀgaiǀgai ǀgara re. ǁNā-e du ge a dī ǁkhā hoa ǃgâi xūn hînab ge ǁîba dīn tsî hānîǁaeb ǃnâb nî dība du ǃgâi xūn xa ǂâis ǃnâ-ū. Eloba du ūba hâ ǀnammi ǃnāsase ra kai khami, î ge nî supuba du ǁîba ǁnâuǀnamsa. (Khomai re 1 Johaneb 5:3 sa.) ǀGamǁîse, Jesuba ǁgae. ǁÎb ge Elob ǂâisa ge dīǀoaǀoa, Jehovaba ǃoab ge huib ǃaroma ǀgore tsî ǁîb mādawa-ams ai ǂâisa ǂnûi hâ-i amaga. (Heb. 5:7; 12:2) Jesub khami Jehovaba ǃoa ǀgaib ǃaroma ǀgore tsî ǀamo ûib ǃâubasensa ǂâis ǃnâ ǃgāsase ūhâ ǀgara re. Eloba du ūba hâ ǀnammi ra kai tsî du ǁîb ǀgôaba ra ǁgae khami du ge, sadu māǁnâsens mîmâisa nî dīǀoaǀoa ǁkhā.

6. Tae-i ǃaroma da omaris ǃnâ da ūhâ ǃereamde nî kōǃgâ?

⁶ Omaris ǃnâ da ūhâ ǃereamdi. Sada ûib di ǃkhoeǀnûgus ǃnâ da ge Jehovab tsî Jesub tsîna ǃnāsase nî ǀnam, omaris khoena da a ǀnams xa. (Mat. 10:37) Nēs ge ǂâibasen tama sada omaris ǃereamde da nî ǁnāxūǃnâsa, ǁî-i Elob tsî Xristub tsîna ǂkhîǂkhîsa xu ra ǃkhō-oadase. Xawe Elob tsî Xristub tsîna ǂkhîǂkhîs ǃaroma î ge a ǂhâbasa, sida di omaris ǃereamde da nî kōǃgâsa. (1Tim. 5:4, 8) ǁNāsa da ga dī, o da ge ǃnāsa ǂkhîba nî hō. ǁNās ǂam-aib ge Jehovaba a ǂan omaridi nî ǂkhîsa, aob tsî taras tsîn ga ǀnammi tsî ǃgôasib ǀkha hâ-ūgu. ǁÎra ǀgôana ǀnam tsî ǁkhāǁkhā tsîn ga ǀgôana ǁgûna ǁnâuǀnam o.—Efe. 5:33; 6:1, 4.

7. Mati du omaris ǃnâ du ūhâ ǃereamsa a dīǀoaǀoa ǁkhā?

⁷ Mati du sadu omaris ǃereamsa a tani ǁkhā? Nēsits ga ao, tara tamas ka io ǀgôa xawe Elobmîs gā-ai ǀapemāde sao. Tā sadu ǂhanu a ti ra ǂâi xū-e dī tsî khoen hoaǃnâ-aixase ūhâ ǁnaetiga sao. Tamas ka io ǂansa ūhâ khoen ra mî xūna dī. (ǂKhm. 24:3, 4) Elobmîs ai a ǃgaoǃgaosa ǂkhanina ǃgâise sîsenū. ǁÎn ge mati da Elobmîs tsoatsoade nî sîsenū ǀapemāde ǃkhōǂgā hâ. Aiǁgause, “Help for the Family” ti hâ khomaiǃâdi ge ǃgōsase ǃgomsin hîna, ǃgamme hâ khoen, ǁgûn tsî ǂkhamkhoen tsîn xa nētsē ra hōǃâhen xa ra ǃhoa. b Elobmîs ta mî-e mîǁgui tsî ûiǂui, nau omaris ǁanin ga dī tama-i xawe. ǁNāsa du ga dī, os ge sadu omarisa ǃgâiba nî ūhâ tsî Jehovab ǀkhaeba nî ǃkhōǃoa.—1Pet. 3:1, 2.

8. Dī da ra mîǁguiga mati a tsâǀkhā da ǁkhā?

⁸ Dī da ra mîǁguigu ǃoagu da ūhâ ǃereams. Jehovab ge aitsâma mîǁguiga dīs ǀkhaeba ge mā da. Tsîb ge ǂhâba hâ î da ǃgâi mîǁguiga dīsa xu ra hā ǃgâiba hōǃâ. Xawe da ga ǁgai mîǁguiga dī, ob ge ra mā-am î da ǁgai mîǁguigu xa go ǃaromahe xūna hōǃâ. (Gal. 6:7, 8) ǁNā-amaga da ge ǃereamsa ra tani ǁgai mîǁguigu, ǂâi tamase da ra ǃhoa mîdi tsî dīsa da ra xūn xa ǃaromahe hâ ǃgomsigu ǃgao. ǀNîsi da ge ǀhapitsâsen tsî sada ǃgâiǂâis xa a ǂhanihe ǁkhā. Dī da ra mîǁguigu ǃaroma da ǃereamsa tani hâs ge a ǂkhâǃnâ da ǁkhā î da sida ǁorena ǁguiǁnâ, dīsana ǂhanuǂhanu tsî tā ǁkhāpa ǁkhā dīsāna dī. ǁNā xūna dīs ge a huida ǁkhā, î da ûib ǃkhoeǀnûgus ǃnâ ǃkhoeǀgara.

9. ǁGai mîǁguiga du ga dī, o du tae-e a dī ǁkhā?

⁹ Mati du dī du ra mîǁguigu ǃaroma ǃereamsa tani ǁkhā? Tae-e du dī ǁkhā, dī du ge  ǁgai mîǁguib ǃgao? ǂAnǃgâ re ǃkharuge xū-e du a tawa ǁoasa. Tā sadu ǁaeb tsî ǀgaib tsîna sîsenū, tae-i ǃaroma du ge ǂhanu isa ǁgaus ǃaroma. Tamas ka io tā nau khoena sadu ge dīsā xū-i ǃaroma ǀhapiǂgā-am re. Xawe ǂanǃgâ re sadu dīsāna tsî dī ǁkhā du ana nēsi dī re. Dīsā du ge xū-i xa du ga ǀhapixase tsâ, o ǃgamǃgamsenxase Jehovaba ǃoa ǀgore, ǁore du go sa ǂanǃgâ tsî ǁîb ai ǀûbaba ǂgan. (Psa. 25:11; 51:3, 4) ǀNîsi du ge tsūdī du ge khoen ai ǀûbaba ǂgan tsî ǂhâbasa î ga o, ǀhaohâb ǃûi-aogu di huiba a ôa ǁkhā. (Jak. 5:14, 15) Sadu dīsāna xu ǁkhāǁkhāsen tsî dītsâ, î du tā ǁkhāwa ǁîna dī. Dī du ra khami du ge ǂgomǃgâ ǁkhā, Jehovab ǀkhomxaǂgaosiba ǁgau tsî ǂhâ du hâ ǂkhâǃnâsa nî mādusa.—Psa. 103:8-13.

10. Tae-i ǃaroma i sīǃnâhe ǁoasa ǃgomsina a kai ǃgomsi? (Galateǁîn 6:4)

¹⁰ Sīǃnâhe ǁoa ǃâubasenan. Sīǃnâǁoa da a ǃâubasena da ge nî tani, nau khoen ǀkha da ga ǀgopeǀnōsen o. (Khomai re Galateǁîn 6:4 sa.) Hoaǁae da ga nau khoen ǀkha ga ra ǀgopeǀnōsen, o da ge surixa tsî nî ǀnûgu tsoatsoa. (Gal. 5:26) Nau khoen ra dī xūna da ga dīǁoa da a hîna ga ra dītsâ, o da ge aitsama tsûtsûsen ǁkhā. Nē i xa ǂâi re, Elobmîs ge ra mîba da: ‘Mâiǂuihe hâ ǃâubsens ra ǂgaoba tsûtsûsa.’ ǁNā-amaga î ge kaise nî ǂkhabuǂâi kai da, tātsē da ǀnîsi hō ǁoa xū-i ai ǃâusa. (ǂKhm. 13:12) ǁNā-e da ga dī, o da ge kaise a tsau ǁkhā tsî sada ûib di ǃkhoeǀnûgus ǃnâ nî ǂau.—ǂKhm. 24:10.

11. Tae-e a huidu ǁkhā i du sīǃnâǁoa du a ǃâubasena xū ǂgōsen?

¹¹ Mati du ǁnā ǃgomsiba a dībē (aoǁnâ) ǁkhā? Tā sado xu ǃnāsa-e ǃâubasen, Jehovab ǂgaoǀkhā hâs xa. ǁÎb ge tātsē ǃâubasen tama hâ, ūhâ tama du hâ xū-e du nî māsa. (2Kor. 8:12) ǂGomǃgâ re, Jehovab ge dī du rana naun ra dīn ǀkha ǀgopeǀnō tama. (Mat. 25:20-23) ǁÎb ge sadu di ǂgaob hoaba xu hâ ǃoabas, sadu ǂgomǂgomsasib tsî sadu mâǀgaisa ra ǃgôaǃgâ. ǃGamǃgamsenxa tsî mûǂan, ǀnîsi du nēsi ra dī ǂgao xūn hoana du a dīǁoasa. Sadu kurin, ǂurusib tsî mâsigu xa ǃaromahe hâse. Barsiliab khami aiǂhanuga du ga māhe o, māsenxase hî-î ti mî, sadu ǂurusib tamas ka io kurin ga ǁgaumâi-e dīsa ǃgom kai o. (2Sam. 19:35, 36) Moseb khami huiba ūǃoa tsî nau khoena ǂhâbasa i ga o, ǁgaumâite mā re. (Eks. 18:21, 22) ǁNāti-i ǃgamǃgamsenxasib ge nî ǁkhae du, sīǃnâǁoa du a ǃâubasena mâibasensa xu hîna ûib di ǃkhoeǀnûgus ǃnâ a tsau kai du ǁkhāna.

12. Naun ra dī ǁgai mîǁguigu, ǃaroma du ǃereamsa tani hâ khami du ra tsâ? ǁGuiǃā re.

¹² Naun ra dī ǁgai mîǁguigu ǃereamsa tani hâse tsâs. Nau khoena da ge mîǁguiga a dība ǁoa, tamas ka io da ge ǁîn ra dī ǁgai mîǁguigu xa ǃaroma-e hâ xūna xu hoaǁae a sâu nî ǁoa. Aiǁgause, i ge ǀgôab tamas ka io ǀgôasa ǀnîsi a mîǁgui ǁkhā, Jehovaba î go ǃoaba ǀû ti. ǁNā mîǁguib ge kai tsûba ǁgûra ai a hau ǁkhā. Xawe ǁgûn hîna ǁîn ǀgôan ge dī ǃgâi tama mîǁguigu ǃgao ra ǀhapitsâsenan ge kaise ǃgoma ra ǁgui-aisen. Jehovab ge ǃâubasen tama hâ în ǁîna ǁnā ǃgomsiba tani.—Rom. 14:12.

13. Mati-i ǁgû-e ǁî-i ǀgôa-i ge dī ǁgai mîǁguiba sîsenǂam ǁkhā?

¹³ Mâ ti du ǁnā ǃgomsiba a dībē (aoǁnâ) ǁkhā? Mûǂan re Jehovab ge hoada, aitsâma ǁhûibasens di ǃnōrasasiba a māsa. ǁÎb ge ra mā-am î-i mâ khoe-i hoa-e aitsama ǁî-i mîǁguiba dī. ǁNās ge ǁîba ǃoabas tsîna ǃkhōǂgā hâ. Jehovab ge a ǂan, ǁgûn ǀoasa kurusa ūhâ tama hâsa, ǁîb ge ra ǂhâba î du dī ǁkhā du a-i ǀgui-e dī. Sadu ǀgôa-i ra dī  mîǁguib ge ǁî-i di ǃeream tsî sadu di tama. (ǂKhm. 20:11) Xawe du ge ǀnîsi ǁgûdu ase du ge a dī, dīsān xa noxopa a ǂâiǂhansen ǁkhā. ǁNāti i ga ī, o Jehovaba tsâ du ra ǀgauba mîba tsî ǁîb ai ǀûbaba ǂan re. ǁÎb ge a ǂan, ǁkhapa du ǃkharu ge ǁaeba ǃoa oa tsî xūna a ǀkharaǀkhara ǁoasa. Xawe ǁkhā ǁaeb ais tsînab ge Jehovaba ǂhâba tama hâ, î du sadu ǀgôa-e ǁî-i ǁoreb ǃaroma î nî hōǃâ xū-e xu sâu. ǂÂis ǃnâ ūhâ re, sadu ǀgôa-i ga ǁgūtsâ tsî Jehovaba ǃoa oaǀkhī, ob ge Jehovaba ǁî-e ǀnamxaǃnâse nî ǃkhōǃoa.—Luk. 15:18-20.

14. Hoaǁae ǀhapixase tsâsa da, tae-i ǃaroma nî aoǁnâ?

¹⁴ Hoaǁae ǀhapixase tsâs. ǁNâuǃāxa i ge a ǁore da ga, o da ǀhapixase nî tsâsa. Xawe Jehvoab ge ǂgao tama hâ, î da hoaǁae ǀhapixase tsâ. ǁNāb ge ǃgomi hîna da nî aoǁnâba. Xawe mati da nî ǂan, kaise da ra ǀhapi tsâsensa? Sada ǁoreba da ga ǁguiǁnâ, ǃhobasen tsî ǂhâbasa xūn hoana gara dī, o tā ǁkhapa ǁnā ǁoreba dī re. O da ge ǂgomǃgâ ǁkhā Jehovab nî ǀûba dasa. (ǃNǃkh. 3:19) Nē xūn hoana da ga a dī toa, ob ge Jehovaba ǂhâba tama hâ i da aiǃgû tsî ǀhapixase tsâ. ǁÎb ge a ǂan, hoaǁae da ga ǀhapixase tsâ, o i sida ǃaroma a tsūsa. (Psa. 31:10) Kaise da ga ǀhapitsâsen, o da ge ǀnîsi ûib di ǃkhoeǀnûgusa a ǃkhoe ǀû ǁkhā.—2Kor. 2:7.

15. Tae-e ǀhapixase da ga tsâ ǁaeb ai a huida ǁkhā? (1 Johaneb 3:19, 20)

¹⁵ Mati du ǁnā ǃgomsiba dībē (aoǁnâ) ǁkhā? Kaise du ga ǀhapixase tsâ, o Elob di ama ‘ǀûbas’ hînab ra mādas ai ǂâisa ǂnûi re. (Psa. 130:4) ǁNān hîna amase ra ǃhausenab ga ǀûba, ob ge nēti ra mîmâi: ‘Tita ǁîn ǁoren xa ǃaruǀî ǂâi tide.’ (Jer. 31:34) ǁNās ge ra ǂâibasen, Jehovab ge ǀnaib ǀûba da hâ ǁoren xa ǁkhapa ǂâi tidesa. ǁNā-amaga tā ǂâi, sadu ge dī ǁoren ǃaroma du ra hōǃâ ǃgomsin Jehovab ǀûba du tama hâ amaga ra ī di. Tsî tā ǁaixa-ūsen, ǀnîsi du ga ǁgaumâide ǀhaohâb ǃnâ ga ra ǂoaǃnâ o. Jehovab ge sadu di ǁoren xa ǂâi tama hâ tsî  du ge sadu tsîna ǁnāsa nî dī.—Khomai re 1 Johaneb 3:19, 20 sa.

16. ǃKhoe-aon ase da tae-e nî ǂanǃgâ?

¹⁶ Ûib di ǀnûgus ǃnâ da ra ǃkhoe hîna, da ge ‘ǁnā ǀgaub ǃnâ nî ǃkhoe, danao kai’ da nîse. (1Kor. 9:24) ǁNāsa da ge dī ǁkhā, taena da nî tanis tsî taena da nî aoǁnâs ǁaegu da ga ǁnâuǃā o. Nē ǁkhāǁkhāǃâs ǃnâ da ge go ǃhoaǃgao, mâ xūna da nî tanis tsî mâ xūna da nî aoǁnâsa. Xawe ǀkhara xūn tsîn ge a ǂgaihe ǁkhā. Jesub ge ge mî: Tā “ǃnāsa ǂûb tsî āb tsî ǂgui ǂhansenain ǀkha ǂgaogu âdo ǃgomǃgom.” (Luk. 21:34) Nē xoas tsî ǀnî hâdi tsîn ge huidu ǁkhā, î du mû mâ ǀkharaǀkharana du nî dīsa, ûib di ǃkhoeǀnûgusa du ra ǃkhoe hîna.

17. Mati da a ǂan ǁkhā ûib di ǃkhoeǀnûgusa da nî dansa?

¹⁷ ǂAn ǁkhā da ge a ûib di ǃkhoeǀnûgusa da a dan ǁkhāsa, Jehovab ǂhâ da hâ ǀgaiba ra mā da amaga. (Jes. 40:29-31) ǁNā-amaga, tā ǂau re. Apostel Pauluba ǁgae, ǃgarise ǃkhoe tsî ge ǁîb aisi mâ dansa gere ǁgūbaba. (Fil. 3:13, 14) ǀNî khoe-i ge nē ǃkhoeǀnûgus ǃnâ ǃkhoebatsi ǁoa, xawe Jehovab di huib ǀkha ǀgui. Jehovab ge a huidu ǁkhā nē ǃgomsina tanisa tsî ǂhâbasa tamana aoǁnâsa. (Psa. 68:19) ǁÎb di huib ǀkha da ge nē ǃkhoeǀnûgusa mâǀgai tsî nî dan.