1. Jehovaba hoa khoen ǃaroma tae-e ra ǂhâba?

 JEHOVAB ge khoena aitsama ǁhûis di ǃnorasasib ǀkha ge kuru. ǁNā ǀkhaeba du ge mîǁguiga du ga dī o ra sîsenū. Mâ khoe-i hoa i a dī ǁkhā ǂhâǂhâsa mîǁguib ge Jehovaba ǃoa māǁnâsen tsî sida ǃgâsan ǀkha ǃoababisa. Jehovab ge ǁnāsa mâ khoe-i hoa-e ra turaba. Tae-i ǃaroma? ǁÎb khoena ǀnam tsî ǃgâib ǀguiba ra ǂhâbaba nî amaga. ǂHâbab ge ra în khoena ǁîb ǀkha ǀgū ǀhōsagusisa ūhâ tsî ǀamosib kōse ûi.—Deu. 30:​19, 20; Gal. 6:​7, 8.

2. Jehovaba tae-e ǃhobasen tama hân ǃaroma ra ǂhâba? (1 Johaneb 2:1)

² Jehovab ge khoe-e ǁgari tama hâ ǁîba ǃoabasa. ǁÎb ge mâ khoe-i hoa-e ra mā-am î-i mîǁgui tae-e î ra dī ǂgaosa. ǀHaohâb ǃûi-aoga tae-e nî dī ǁāǁnâsa Xristeǁî-i ga Jehovab ǂhanuba khôa tsî ǀgaisa ǁoreba dī o?  ǃHobasen tama î ga ī, o i ge ǀhaohâba xu nî ūǂûihe. (1Kor. 5:13) Khoe-i ga ǀgaisa ǁoreba dī tsî ǀhaohâba xu ūǂûihe xaweb ge Jehovaba ra ǂhâba î-i nē khoe-e ǃhobasen tsî ǁîb ǀkha ǀgū ǀhōsagusisa ūhâ. ǂHâǂhâsa ǃaromas Jehovab ge xoremariba mābas ge îb ǁnān hîna ra ǃhōbasenan di ǁorena ǀûba. (Khomai re 1 Johaneb 2:1 sa.) Jehovab ge a ǀnamxaǃnâ Elo tsîb ge ǁnān hîna tsū ǁorena ra dīna ra ǂkhâǃnâ în ǃhobasen.—Sax. 1:3; Rom. 2:4; Jak. 4:8.

3. Tae-e da nē ǁkhāǁkhāǃâs ǃnâ nî ǃhoaǃgao?

³ Jehovab ge ra mîba da matib ǁoren xa ra tsâsa tsî ǁnān ǀgaisa ǁorena ra dīn ǃoagu. Tsîb ge ǂhâba hâ î da sida tsîna ǁkhā ǀgauba omkhâi. Nē ǁkhāǁkhāǃâsa da ra ǁkhāǁkhāsen khami saora-e ǃgaôǃgâ re: (1) ǂGuroǁaeb ǀhaohâb Korintes ǃnâ ge hâ îb mati tsū ǁoreba sîsenǂam ǀgaus. (2) Pauluba mâ daoǁgausa ǃhobasen ge ǁore-aob ǃaroma ge mā? (3) Jehovab tsū ǁorena ra dīn xa ra tsâ ǀgaub.

TSŪ ǁORE-I ǂGUROKAM ǀHAOHÂB ǃNÂ GE SÎSENǂAMHE ǀGAUS

4. Tae-e Korintes ǀhaohâb ǃnâ ge ī? (1 Korinteǁîn 5:​1, 2)

⁴ Khomai re 1 Korinteǁîn 5:​1, 2 sa. ǁÎb di ǃnonaǁî sîsabe sîsenni ǃnâb ge Pauluba Korintes ǃnâ ǀasase tsoatsoahe hâ ǀhaohâb ǃnâ tsū xū-e ge ǁnâu. ǁNā ǀhaohâb ǃnâ ge hâ i ǃgâsab ge ǁîb îb di taras ǀkha gere ǁgoe. ǁNāti ī ǁgaisi ǀaib ge uiuisa tsî “ǀūben ǃnâs tsîna” ge hōhe tama hâ i. ǁNā ǀhaohâb ge ǃgâsab di ǀgaub ǀguiba ge ūǃoa tama hâ i xawe dīb gere xū-i ǀkhas tsîna ge ǂkhî i. ǀNîsin ge ǀnîn ǀhaohâb ǃnâ ge hâ îna gere ǂâi Jehovab khamin ǀkhomxasiba gere ǁgausa. Xawe Jehovab ge tsū ǁorena ǁîb khoen ǁaegu ūǃoa tama hâ. ǁNā ǃgâsab di ǁgauoǃnâ tanisen ǀgaub ge ǀhaohâb ǃgâi ǀonsa gere ǁgaiǁgai. Tsîb ge ǀhaohâb ǃnâb ga ra hâ ǀgara, o nauna a ǂgaeǂkhapu ǁkhā. ǁNā-amagab ge Pauluba tae-e ǀhaohâba dī kai?

5. Pauluba tae-e ǀhaohâba ge dī kai tsî tae-eb gere ǂâibasen? (1 Korinteǁîn 5:13) (Ai-īsiba mû re.)

⁵ Khomai re 1 Korinteǁîn 5:13 sa. ǃAnu gagab xa daoǁgauhe hâseb ge Pauluba sîǂkhanisa ǀhaohâba ǃoa ge xoa î-i ǃhobasen tama ǁore-ao-e ǀhaohâba xu ūǂûihe. ǂGomǂgomsa Xristeǁî-e mati ǁnā khoe-i ǀkha nî hâ? Paulub ge ǁîna ge mîba “tā ǁîn ǀkha hâ ǀhao” ti. ǁNāsa  tae-e gere ǂâibasen? Paulub ge ge ǁguiǃā ǁnāti ī khoe-i ǀkhan “ǂûs xawesa hî tide” ǃkhaisa. (1Kor. 5:11) ǁNāti ī khoe-i ǀkha ǂûǀhaos ge ǃnāsa ǁaeba ǁî-i ǀkha hâsa ǃaroma ǁkhā. ǃGāsaseb ge Pauluba gere ǂâibasen ǀhaohâb ǁnāti ī khoe-i ǀkha hâǀhao tidesa. ǁNās ǀhaohâba ǁnā khoe-i di ǁgai ǀgauba xu nî ǁkhauba amaga. (1Kor. 5:​5-7) ǁNās xōǀkha nēti ī khoe-i ǀkha hâ ǀûs ge ǁî-e nî hui, î-i mûǂan tsū xū-e i dī hâsa tsî î ge nî ǃhobasen.

6. Paulub sîǂkhanisa tae-i sîsenǂûiba ǀhaohâb tsî tsūdī-aob ai ge ūhâ i?

⁶ Sîǂkhanisab Korintes ǃnâ hâ ǃgâsana sîba toa hâs khaoǃgâb ge Pauluba gere ǂâi, matib ǀhaohâba ǁnā sîǂkhanisa nî ūǃoasa. Titub ge Pauluba ǂkhî kai bi nî ǃgâi ǂhôa-e ge mîba. ǀHaohâb ge Paulub sîǂkhanisa ǃgâise ge ǃkhōǃoa tsî tsūdī ge khoeba ge ūǂûi. (2Kor. 7:​6, 7) ǀHaohâb ge Paulub ge sî sîǂkhanisa sîsenū toas khaoǃgâb ge tsūdī ge khoeb tsîna  ge ǃhobasen. ǁÎb tanisen ǀgaub tsî ǂâiǀgaub tsîna dawa tsîb ge Jehovab ǂhanu-ai ǀgauga ge sao tsoatsoa. (2Kor. 7:​8-11) Pauluba tae-e sao rase ǀhaohâba ge dī kai?

MATIB ǀHAOHÂBA ǃHOBASEN GE KHOEBA NÎ HÂ-Ū ǀGAUS

7. Tsūdī-aoba tae-e ge dī ǀhaohâba xub ge ūǂûihes khaoǃgâ? (2 Korinteǁîn 2:​5-8)

⁷ Khomai re 2 Korinteǁîn 2:​5-8 sa. Paulub ge ge mî, “ǁnāti īb ǃaromab ge ǂguin âdu ge mā bi ǁkharaba ǂâu hâ.” Nēs ge gere ǂâibasen ǁore-aob ǀhaohâba xub ūǂûihe hâs khaoǃgâ gere mûǂansa ǃhobasen i nîsa. Tsî î ge ǁnās ǀkha ge ǂhâbasa tama hâ i îb aiǃgû tsî ǁnamahe.—Heb. 12:11.

8. Pauluba saorase tae-e ǀhaohâba ge dī kai?

⁸ Tsūdī-aob ge ǃhobasen amagab ge Pauluba ǀhaohâb ǃûi-aoga ge mā-am, î gu khoeba ǀhaohâba ǃoa oaǀkhī kai. Tsîb ge ǁîna ge mîba în ‘ǀûba tsî ǁkhaeǂgao’ tsî ǀnamma ǁgaubi. Paulub ge ǀhaohâba ge mîba în ǁîn mîdi tsî tanisen ǀgaub ǃnâ ǁgau khoeban amabes ǃnâ ǀnam ǃkhaisa. Nēs ǀkhab ge ǃgâsaba ǁkhoreǁharesase oaǀkhī ǁkhā ǀhaohâba ǃoa.

9. Tae-i ǃaroman ge ǀnîna ǃgombahe i, ǃhobasen ge ǃgâsaba ǀûbasa?

⁹ ǀNîna î ge ǀnîsi kaise ge ǃgomba î ǁnā khoeba ǃgâi ǀgaub ǃna hâ-ūsa ǀhaohâba ǃoab ge oaǀkhī o. Xoas ge ti mî tama hâ xawe tae-i ǃaroma da ti ra mî? ǀNîn ge ǀnîsi ge ǁaixa hâ i ǃgomsinab ge ǀhaohâb ǃnâ ǃaroma amaga tsî ǀnîn ge noxopa gere ǂâiǂhansen ǁîb xan ge tsûtsûhe amaga. ǁNān hîna ǀhaohâb ǃnâ hân ge ǃgarise sîsen tsî Jehovab di mîmāde gere ǁnâuǀnam. ǁNā-amagan ge ǀnîna ǃgâi tamase gere tsâ tsū ǁoreba dī hâ khoe-i gere mā-amhesa, î-i ǀhaohâba ǃoa oaǀkhī. (ǀGopeǀnō re Lukab 15:​28-30 sa.) Tae-i ǃaroma î ge ǀhaohâba ǂhâǂhâsaba i, în ǃhobasen ge ǃgâsaba ama ǀnambin asa ǁgau?

10-11. Tae-e a īǁkhā ǀhaohâb ǃûi-aogu ga ǃhobasen go ǃgâsa-e ǀûba ǂgao tama io?

¹⁰ Matib ga ǀnîsi aoba tsâ hâ ǀhaohâb ǃûi-aogu xab ga mā-amhe tama hâ o, ǀhaohâba ǃoa oaǀkhīsa ǃhobasen i hâs khaoǃgâ? ǁÎb ge “ǃnāǂamsa ǃoab xa hapuhe” tsî Jehovabab ǁnāpa ǃoaba tide khami ga tsâ hâ. Tsîb Jehovaba tātsē ǁîba ǀûba tidesa. Tsî î ǀkharaǀkharasens di ǃaroma-e a ǀkhaisa.

¹¹ Tae-i tsîna a īǁkhā ǃgâsan ga ǃhobasen hâ ǃgâsaba ǀûba ǂgao tama io. Nēs ge ǁîn ǀhōsagusis Jehovab ǀkhan ūhâsa a tsûtsû ǁkhā. Tae-i ǃaroma? ǁÎn Jehovab ǃhobasen ra na ra ǁgau ǀûbaǀnamxasiba ǁgae tama i tsîn ǁGâuab hîna ǀkhomoǃnâ tsî ǃgariǂgaoxaba ra ǁgae amaga. Tsîn ge aoba nî ǂkhabuǂâi kai Jehovaba ǃoabasa xu.—2Kor. 2:​10, 11; Efe. 4:27.

12. Matib ga ǀhaohâba Jehovaba ǁgae hâ?

¹² Matib Korintes ǀhaohâba Jehovaba ǁgae ǁkhā, ǁGâuab ose? ǃHobasen rana ǀûbas ǃnâ-ū, Jehovab ra dīs ǁkhās khami. ǃGaoǃgâ re tae-en ǀnî xoa-aona Jehovab xa ra mîsa. ǁÎb ge “ǃgâi tsî a ǀûbaǀnam” tib ge Daviba ge mî. (Psa. 86:5) Mixab ge ge xoa: “Sats khami ī Elo-i ge a ǀkhai. Sats ge ǁorena ra ǀûba tsî ûiǃgau hân sa ǁaes din di ǃûǂamsa ǁkhara tama hâ.” (Mix. 7:18) Jesajab ge ge xoa: “An eloxoresana ǁîn daoga ǁnāxū tsî ǂkhabadī-aona ǁîn ǂâide. An ǁîna ǃKhūb ǃoa ǃhobasen, îb ǁîna ǀkhomma mā tsî sada  Elob ge ǁîna ǃnāǂamsase nî ǀûba.”—Jes. 55:7.

13. ǃHobasen ge khoeba tae-i ǃaroma ǀhaohâba ǃoa ge oaǀkhī kaihe? (Boksis “ Korintes ǃnâ ge hâ i aoba mâǁae ge oaǀkhī?” ti hâsa khomai re.)

¹³ Jehovaba ǁgae tsîb ge Korintes ǀhaohâba ǃhobasen ge khoeba ga ǀûba hâ tsî ga ǁgaubi hâ ǀnambin asa tsîn oaǀkhīb hâ ǃkhais xa a ǂkhîsa. Paulub daoǁgausa sao-ai tsî ǃhobasen hâ ǁore-ao-e ǁkhoreǁhares ǃnâ-ūb ge ǀhaohâba ra ǁgau ǁîn hoa xūn ǃnâ a “ǁnâuǀnamxa ǃkhaisa.” (2Kor. 2:9) ǀOro ǁkhâgab ge ǀhaohâba xu ūǂûihe hâ i xaweb ge ge ǃhobasen. ǁNā-amaga î ge ge ǂhâbasa tama hâ i î gu ǀhaohâb ǃûi-aoga gaxuse ǃâu ǁîba ǀhaohâba ǃoa oaǀkhī kaisa.

MATI DA JEHOVAB ǂHANU-AISIB TSÎ ǀKHOMXAǂGAOSIB TSÎNA ǁGAE ǁKHĀ?

14-15. Tae-e da ra ǁkhāǁkhāsen Korintes ǃnâ ge ī xū-i ge sîsenǂamhe ǀgauba xu? (2 Petrub 3:9) (Ai-īsiba mû re.)

¹⁴ ǀOrokam ǁaeb Korintes ǃnâ ge ī xū-i ge sîsenǂamhe ǀgaub ge “sada ǁkhāǁkhās ǃaroma xoahe hâ.” (Rom. 15:4) ǁKhāǁkhāsen da ge go, Jehovab tsū ǁorena dī tsî ǃhobasen tamana mā-am tama hâsa în ǀhaohâb ǃnâ hâ ǀgara. ǀNîn ge a ǂâi ǁkhā Jehovab a ǀkhomxaǃnâ amagab nî mā-amsa î-i ǃhobasen  tama khoe-e ǀhaohâb ǃnâ hâ ǀgara. Xawe Jehovab ge ǁnāti ī ǀgaub ǃnâ ǀkhomxaǂgaosiba ǁgau tama. Jehovab a ǀkhomxaǃnâ xaweb ge hoa ǀgauga ūǃoa tama. ǁÎb tsū tsî ǂhanu tama xūna ra mû ǀgaub ge dawa tama. (Jud. 4) Jehovab ga ǃhobasen tama ǁore-ao-e mā-am î-i ǀhaohâb ǃnâ hâ ǀgara, os ge ǁnāsa ga ǀkhomxaǃnâ tama hâ, ǀhaohâb ǃnâ hân hoan nî tsûtsûhe amaga.—ǂKhm. 13:20; 1Kor. 15:33.

¹⁵ Noxopa da ge ra ǁkhāǁkhāsen Jehovab ǂgao tamasa î-i ǀgui î xare-e dīkākāhe. ǁÎb ge ǁkhāb as kōse khoena ra sâu ǂgao. ǁÎb ge ǀkharaǀkharasen tsî ǁîn ǀhōsagusisa ǁîb ǀkha ra ǃgâiǃgâi ǂgao khoena ǀkhomma ra ǁgau. (Ese. 33:11; khomai re 2 Petrub 3:9 sa.) ǁNā-amagab ge khoeba Korintes ǃnâ ǃhobasen tsî ǁîb di ǀgauga dawa, ob ge Jehovaba ǀhaohâba ge daoǁgau în ǁnā khoeba ǀûba tsî ǁkhoreǁhare.

16. Korintes ǃnâ ge ī xū-i ge sîsenǂamhe ǀgaub xa du mati ra tsâ?

¹⁶ Korintes ǃnâ ge hâ i khoeb aiǁgaus ge ra ǁgau da Jehovab ǀnamxaǃnâ tsî a ǂhanu-aisa dīb ra xūn hoan ǃnâ. (Psa. 33:5) Jehovaba da ge ǁîb ǃgâi ǀgaugu ǃaroma ra koa. ǁÎb ǀkhomxaǂgaosiba da ge ra ǃgôaǃgâ hoa da ǁore-ao tsî ǁîb ǀûbaba ǂhâ hâ amaga. Hoa da ge Jehovaba xoremarib ǃaroma ra ǃgôaǃgâ, nēs sida ǁoren ǀûbasa ra īǁkhā kai amaga. Jehovab ǁîb khoena ǀnam tsî ra ǂâibasa ǂans ge kaise ra ǁkhaeǂgao da.

17. Tae-e da sao ra ǁkhāǁkhāǃâs ǃnâ nî ǃhoaǃgao?

¹⁷ Nētsē î ga khoe-e tsū ǁoreba dī, o gu mati ǀhaohâb ǃûi-aoga Jehovaba a ǁgae ǁkhā, î gu nē khoeba hui? ǀHaohâba mati nî tanisen ǀhaohâb ǃûi-aogu ga khoe-e ǀhaohâba xu ūǂûi tamas ka io ǁgaumâi oa o? Nē dîdi ge saora ǁkhāǁkhāǃâdi ǃnâ nî ǃhaoǃgaohe.