31ǁÎ ǁKHĀǁKHĀǃÂS
12ǁÎ ǁNAETSANAS Jehova Buruxa Elob
Jehovab ge ǁore-aona sâus ǃaroma dī xū-i
“ǁNātikōseb ge Eloba ǃhūbaiba ge ǀnam tsîb ge ǁîb di ǀguise ǃnae hâ ǀGôaba ge mā.”—JHN. 3:16.
ǁKHĀǁKHĀSEN DA NÎ XŪN
Mû da ge nî matib Jehovaba ra hui dasa î da ǁoreba ǃkhamǃoa tsî ǁîba ǃoaba ǀgara. Matib ra hui dasa î da ǀamose ûi ǁkhā tsî ǁoreba xu ǃnora.
1-2. (a) ǁOreba a tae tsî da mati ǁîb ǃoagu hâ ǃkhamsa a dan ǁkhā? (“ǁGuiǃāhe ra mîs” ti hâ ǃâba mû re.) (b) Tae-e da nē ǁkhāǁkhāǃâs tsî saora ǁkhāǁkhāǃâdi ǃnâ nî ǃhoaǃgao? (“Khomai-ao” ti hâ ǃâba 32ǁî ǂhaweb ai khomai re.)
JEHOVAB matikōse a ǀnam da sats ra ǂan ǂgao? ǃEreamsa da ge a hō ǁkhā: ǁÎb ge satsa ǁoreb tsî ǁōba xu sâus ǃaroma a dī xu-e ǁkhāǁkhāsens ǃnâ-ū. ǁOreb a ge kai khākhoeb khami ī aitsama da ǃkhamǃoa hō tideba. Hoa da ge mâ tsēs hoasa ra ǁore tsî ǁore-aoda a amaga ra ǁō. (Rom. 5:12) Xawe i ge ǃgâiǂhôa-e hâ. Jehovab huib ǀkha da ge ǁoreba a dan ǁkhā. Tsî da ge a ǂan ǁnāsa da nî dī hōsa.
2 Jehovab ge 6 000 kurigu xa a ǃnāsa ǁaeba khoesiba ra hui, în ǁoreba ǃkhamǃoa ǀnam dab a amaga. Tae-i ǃaroma? Jehovab ge tsoatsoasa xu khoena kaise a ǀnam. Tsîb kaise a ǀnam nî amagab ge ǂgui xūna ra dī îb ǁîna hui ǁoren ga o. Elob ge a ǂan ǁoreb ǁōba ra ǃaromasa tsîb ge ǁō da nî sa ǂgao tama, ǀamose da nî ûisab ge ra ǂhâba. (Rom. 6:23) ǁNāsab ge ra ǁkhoreba tsi. Nē ǁkhāǁkhāǃâs ǃnâ da ge ǃnona xūna nî ǃhoaǃgao: (1) Jehovaba mati ǁore-aona ǃâubasensa ge mâ? (2) Elobmîs ǁaeb ǃnâ gere ûi khoen ǀoasa kurusa ge ūhâ tama hâ îna tae-e ge dī, în Jehovaba ǂkhîǂkhî? (3) Jesuba tae-e ge dī îb khoena ǁoreb tsî ǁōba xu sâu?
MÂ ǃÂUBASENSAB JEHOVABA ǁORE-AONA MĀ HÂ?
3. Sida ǂguro ǁgûra mati ge ǁore-ao kai? (Ai-īsiba mû re.)
3 Jehovab ge ǂguro khoe-aogu rab ge kuru o gere ǂhâba î ra ǂkhîb ǃnâ ûi. ǁÎb ge ǁîra îsa oms, ǃgammeb ǀkhaeb tsî ǂoaǂamsa ǁgaumâis tsîna ge mā. ǁÎra ge ǃhūbaiba ǁîra ǀgôan ǀkha ǀoaǀoa tsî hoaraga ǃhūbaiba ga paradais kai hâ Edenni ǃhanab khami. ǁÎb ge ǁîra ǀgui ǃkhâikhoms ǀguisa ge mā. Tsîb ge ǁîra ge mîba ǁnâuǀnamoǃnâ ra ga, o ra ǁore tsî nî ǁōsa. Tae-i ge īsa da ge a ǂan. ǁGai ǀhomǃgāb hîna ge Elob tsî ǁîra tsîna ǀnam tama hâ îb ge Adammi tsî Evas tsîra ge ǃâitsâ îra Eloba ǁnâuǀnamoǃnâ. ǁÎra ge ǁGâuab gere ǂhâba xū-e ge dī. ǁÎra di ǀnamxaǃnâ ǁGûb ǃnâ ǂgomǃgâsiba ūhâ tama ī tsî ra ge ge ǁore. ǂAn da ase i ge Jehovab mîde ge ama kai. ǁNā tsēsa xu ra ge ǁoreb ge ǃaroma xūna ge hōǃâ tsoatsoa: Kaira tsî ra ge ge ǁō.—Gen. 1:28, 29; 2:8, 9, 16-18; 3:1-6, 17-19, 24; 5:5.
4. Jehovaba tae-i ǃaroma ǁoreba ǃhui hâ tsî ra hui da î da ǁîb ǀgūse hâ? (Romeǁîn 8:20, 21)
4 Jehovab ge nē xūna Elobmîs ǃnâ ge xoamâi î da ǂhâǂhâsa xū-e ǁnâuǃā. ǁNās ge ra hui da î da ǁnâuǃā tae-i ǃaromab ǁîba ǁoreba ǃhui hâsa. ǁOreb ge sida ǁGûb ǀkha da ūhâ ǀhōsagusisa ra ǁgaiǁgai tsî ǁōba ra ǃaroma. (Jes. 59:2) ǁNā-amagab ge ǁGâuaba, Jehovab tsî khoen tsîna ǃhui hâ. ǁNā-amagab ge Adammi tsî Evas tsîra ge ǃâitsâ î ra ǁore tsîb ge nēsis kōse khoena ra ǃâitsâ. ǁÎb ge ge ǂâi Edenni ǃnâb ge dansa. Xaweb ge Jehovab a ǀnamxaǃnâ ǀgauba ge ǁnâuǃā tama hâ ī. Elob ge Adammi tsî Eva hâra ǀgôan ǃaromab ge ūhâ i ǂâibasensa ge dawa tama hâ i. Elob ge khoena a ǀnam tsî ǁkhā ǁaeb ai ǃâubasensa ǁîna ge mā. (Khomai re Romeǁîn 8:20, 21 sa.) Jehovab ge ge ǂan ī ǀnîn ǁîra suriba xu ra hān nî ǁhûisa ǁîba ǀnamsa tsî ǁîba nî ǁnâuǀnam ǂgaosa. ǁÎn di ǁGûb tsî Kuru-aob aseb ge ǁîba daoba ge ǁkhowa-am în ǁîna ǁîba ǃoa ǀgū tsî ǁōb tsî ǁoreba xu sâuhe. Jehovaba tae-e ga dī hâ îb nēsa īǁkhā kai?
5. Mâ ǁaeb ge Jehovaba khoena ǂguro ǃnās ase ǃâubasensa mâ? ǁGuiǃā re. (Genesis 3:15)
5 Khomai re Genesis 3:15 sa. ǁNā ǁaeb aib ge Jehovaba ǁGâuabab nî dīkākā ti ge mî tsî ǁnās ǀkha hoa khoena ǃâubasensa ge mā. Elob ge ge mîmâi “surib” nî hâsa hîna khoena nî sâuba. Nē surib ge ǁGâuaba nî dīkākā. Tsî Edenni ǃhanab ǃnâb ge dī ǃgomsin hoana nî ǃgâiǃgâi. (1Jhn. 3:8) Xaweb ge ǁnā suriba ǃgomma nî hōǃâ. ǁGâuab ge ǁnā suriba tsûtsû tsî nî ǃgam. ǁNā i ge Jehovaba kaise ge tsûtsû xaweb ge ge mā-am îb ǁîb tsî surib tsîna ǃgomma tsâ. ǁNās ge khoena ǁoreb tsî ǁōba xu ge ǃnora kai.
ELOBMÎS ǁAEB ǁORE-AONA TAE-E GE DĪ ÎN JEHOVABA ǂKHÎǂKHÎ?
6. ǂGomsa ge ūhâ ī khoen Noaxi, Abeli tsî naun tsîna tae-e ge dī în Jehovab tawa ǀgū?
6 ǁAeb ra ī khamib ge Jehovaba ge ǃgāsa kai ǁore-aon ǁîba mati a ǀgū ǁkhāsa. Adammi tsî Eva hâra di ǀgamǁî ǀgôab ge ge ǂguro khoe-i Jehovab ǃnâ ge ǂgomsa a ǁgauba, Edenni ǃnâ ge ī xū-i khaoǃgâ. Abeli ge Jehovaba ge ǀnam ī tsî ǁîb ǃoa gere ǀgū ǂgao ǁnā-amagab ge ǁguibasa ge dī. Abeli ge gūna gere ǃûi ǁnā-amagab ge ǁkhaoroga ǂā tsî Jehovaba gere ǁguiba. Jehovaba nēsa mati ge ǃkhōǃoa? Jehovab ge “Abeli tsî ǁîb ǁguibasa ǃgâise ge ǃkhōǃoa.” (Gen. 4:4) Jehovab ge nau khoen di ǁguibadi tsîna gere ǃkhōǃoa. ǁÎn ge ǁîba ǀnam tsî ǂgomǃgâ hâ i amaga, Noaxi khami. (Gen. 8:20, 21) ǁNā ǁguibadeb ge ūǃoa, ob ge Jehovaba ge ǁgau ǁîb ra ǁore-aona ǃkhōǃoa tsîn ǁîb ǀkha ǀgū ǀhōsagusisa ūhâ ǁkhāsa. b
7. Tae-e da Abrahammi ge ǁîb di ǀgôaba māsenxase gere ǁguiba ǂgao ǃkhaisa xu ra ǁkhāǁkhāsen? (Ai-īsiba mû re.)
7 Jehovab ge Abrahammi ǀgaisa ǂgomsa ge ūhâ îba ge ǂgan îb ǃgom xū-e dī, ǁnās ge ǁîb di ǀgôab Isaka ǁguibasa. Nē i ge Abrahamma kaise ge ǃgomba ī xaweb ge Jehovaba ge ǁnâuǀnam. Abrahammi ǁîb ǀgôaba ra ǃgam ǂgao ǁaeb ǃnâb ge Jehovaba ǁîba ge ǂkhā. Jehovab ge ge ǂan ī Abrahammi kaise nî tsûaǂgaosa ǁîb di ǀgôabab ga ǃgam o. Nēs ge ra ǁgau da Jehovab tae-e hānîǁaeb ǃnâ nî dīsa. Jehovab ge ǁîb di ǀnamǀnamsa ǀGôaba ǁguibas ase ga mā hâ. Jehovab ge khoena ǁnātikōse a ǀnam.—Gen. 22:1-18.
8. ǂHanub ǃnâ ge hâ i ǁguibade tae-e ǃoa gere ǁnaeǁgau? (Levitikus 4:27-29; 17:11)
8 Jehovab ge Israelǁaesa ǂhanuba a mā, ob ge ǁîna ge mîba ǁguibanan a dī ǁkhāsa în ǁîn ǁorena ǀûbahe. (Khomai re Levitikus 4:27-29; 17:11 sa.) ǁNā ǁguibadi ge kai ǁguibasa ǃoa gere ǁnaeǁgau. ǁNās hîna khoena ǀoasase ǁoreba xu nî ǃnora kaisa. Elob di kēbo-aogu ge ge ǁguiǃā, ǁnā mîmâihe hâ ǁguibas Elob ǀGôaba ǃoa ra ǁnaeǁgausa tsîb ǁîba ǃgomma hōǃâ tsî nî ǁōsa. ǁÎb ge gū-i khami ga ǁguibahe hâ. (Jes. 53:1-12) Jehovab ge ge mîmâi îb ǀnammi a ǀGôaba mā, ǁguibas ase în khoena ǁoreb tsî ǁōba xu ǃnora. Nē i ge kaise ǀō-aisa xū-e tsîb ge Jehovaba nēsa sats ǃaromas tsîna ge dī.
JESUBA TAE-E GE DĪ ÎB KHOENA SÂU?
9. ǁĀǁnâ-aob Johaneba tae-e Jesub xa ge mî? (Hebreǁîn 9:22; 10:1-4, 12)
9 ǁĀǁnâ-aob Johaneb ge 29ǁî kurib ǃnâb ge Jesub Nasirǁîba a mû o ge mî: “Mû! Nēb ge a Elob di ǁKhao, ǃhūbaib di ǁorena ra ūbēba.” (Jhn. 1:29) Nē mîdi ge ge ǁgau Jesub a ǁnā surisa, Elob ge mîmâiba. Jesub ge ǁîb di ûiba ga ǁguiba hâ. Nēsib ge Elob suriba ge hā, îb hoase khoena sâu ǁkhā.—Khomai re Hebreǁîn 9:22; 10:1-4, 12 sa.
10. Jesuba mâǀgaub ǃnâ ge ǁgau ǁîb ge “ǁore-aon” ǃaroma hāsa?
10 Jesub ge ǁîb di ǂâisa ǁoreb xa ǁgaise gere tsâ khoen ai ǃgōsase gere mâi. ǁÎnab ge ge ǁkhau în ǁîb di saosabe kai. ǂAn îb ge ge ī khoen ǁîn ǁoren xa ǃaromahe hâse ǃgomma ra tsâsa. ǁNā-amagab ge aogu tsî taradi ǁore-aon ase ge ǂansa îna gere hui. ǂKhōsa ra sîsenūseb ge ge ǁguiǃā: “ǂUru khoen ge ǀaedī-ao-e ǂhâba tama, xawe ǀaesen hân ge ǂhâba bi hâ. . . xawe ǁore-aona ta nî ǂgaise ta ge ge hā.” (Mat. 9:12, 13) Nēsab ge Jesuba dī tsî kaikhoes ǁîs ǁgamron ǀkha ǁîb ǂaide gere ǁās ǁorena ge ǀûba. (Luk. 7:37-50) Jesub ge Samariaǁî khoesa ǂhâǂhâsa amab xa ge ǁkhāǁkhā, ǁîb ge ǂan i xawe ǃgamme tamas hâ aob ǀkhas ra hâ ǀhaosa. (Jhn. 4:7, 17-19, 25, 26) Elob tsîn ge Jesuba ǀgaiba ge mā, îb ǁoreb ra ǃaroma xū-e ǀam kai, ǁnāb ge ǁōba. Mati? Jesub ge khoena khâisa ge mā—aoren, taren, ǀgôan tsî kaikhoen tsîna ǃkhōǂgā hâse.—Mat. 11:5.
11. Tae-i ǃaroman ǁore-aona Jesub ǀgūse gere hâ ǂgao?
11 Nēs ge ra huida ǁnâuǃāsa tae-i ǃaroma i ge ǁgai xūna gere dī khoena, Jesub ǀgūse gere hâ ǂgaosa. ǁÎb ge ǁîn gere tsâ ǀgauba ǁnâuǃā tsî ǃgâise gere hâ-ū ni. ǁÎn ge ge ǃao tama hâ i ǁîb ǀkha ǃhoasa. (Luk. 15:1, 2) Jesub ge ǁnāti īna gere koa ǁîb ǃnân ge ǂgomsa ǁgau amaga. (Luk. 19:1-10) Jesub ge Jehovab di ǀkhomxaǂgaosiba gere ǁgau. (Jhn. 14:9) Jesub khoen ǀkha gere hâ tsî ǁîna ǃhoa-ū ǀgaub ge Jehovab ǀkhomxaǂgaosiba ge ǁgau tsîb ǀoasa kurusa ūhâ tama khoena ǀnam tsî ra hui ǂgaosa. Jesub ge ǁore-aona gere hui ǂgao în ǁîn ûiga dawa tsî saobi.—Luk. 5:27, 28.
12. Jesuba ǁîb ǁōb xa tae-e ge ǁkhāǁkhā?
12 Jesub ge ge ǂan i ǁîb ûibab nî ǁguibasa. ǀGuis xa ǃnāsa ǃnādeb ge ǁîb di saosabena ge mîba, gaxaǃnâhe tsîb ǃgâuhaib ai nî ǃgamhe ǃkhaisa. (Mat. 17:22; 20:18, 19) ǁÎb ge ge ǂan i ǁîb di ǁguibas ǃhūbaib di ǁoreba nî ūbēsa, Johaneb tsî nau kēbo-aogu ge mî khami. Jesub tsîn ge ge ǁkhāǁkhā ǁîb di ǁguibasab ga mā toa, ob ge ‘ǂguina’ ǁîba ǃoa nî ǂgae. (Jhn. 12:32) ǁOre-aon ge Jehovaba a ǂkhîǂkhî ǁkhā, Jesuban ga ǁîn ǃKhūb ase ūǃoa tsî ǁîba ǁgae o. ǁNātin ga dī on ge ‘ǁoreba xu nî ǃnoraǃnorahe.’ (Rom. 6:14, 18, 22; Jhn. 8:32) Jesub ge ge ǁkhoaǂgao i tsî māsenxase tsûtsûsa ǁōba ge ǁō îb sida sâu ǁkhā.—Jhn. 10:17, 18.
13. Jesuba mati ge ǁō tsî nēsa tae-e Jehovab xa ra ǁkhāǁkhā da? (Ai-īsiba mû re.)
13 Jesub ge ǁîb di ǀgū ǀhōsan xa ge ǀapexūhe. ǁÎb di khākhoen ge ǂganamǂgā bi, mîǁgaiǁgai bi tsî dī tamab hâ xūn xa ge ǂgari-am bi. ǁÎn ge Jesuba ǁōba ǃoa ǁkhara tsî ǁnāpaxu gere ǂnaubi. ǀAms ai gu ge soldaga Jesuba haib ai ge ǃgâu ǃgambi gu nîse. Nē tsûbab ge ǂgomǂgomsase tani ǃkharu xawe i ge khoe-e ge hâ-i hîna ge nēsa ǃnāsase gere hōǃâ-e. Jehovab ge ǀgaib tsî ǁkhāsib tsîna ge ūhâ i, ǁîb di ǀgôab gere hōǃâ tsûba ǀam kaisa xaweb ge ǁnāsa ge dī tama hâ i. Tae-i ǃaroma? Jehovab ge ǁîb di ǀGôaba kaise ge ǀnam i xawe tae-i ǃaromab ge mā-am îb ǁîba ǃgomma tsâ tsî ǁō? Jehovab kaise a ǀnam da amaga. Jesub ge ge mî: “ǁNātikōseb ge Eloba ǃhūbaiba ge ǀnam tsîb ge ǁîb di ǀguise ǃnae hâ ǀGôaba ge mā, ǁîb ǃnâ ra ǂgomn hoan kāǁō tide, xawen nî ǀamo ûiba ūhâse.”—Jhn. 3:16.
Jehovab ge Adammi tsî Eva hâra kuru, ob ge ǁîra nî ǂkhî ǃkhaisa gere ǂhâba (3ǁÎ xoaǀgorasa mû re)
14. Jesub di ǁguibasa tae-e ra ǁkhāǁkhā tsi?
14 Jesub di ǁguibas ge a ǁgauǁgau, Jehovab Adammi tsî Evas suriba kaise a ǀnamsa. ǁNās ge ra ǁgau Jehovab kaise ǀnam tsisa. ǁÎb ge ǁîb ǀnamǀnamsa ǀGôaba ge ǁguiba tsî kai tsûba ge ǃkharuǃnâ îb sado ǁōb tsî ǁoreba xu sâu ǁkhā. (1Jhn. 4:9, 10) ǁÎb ge ra ǂhâba î-i mâ ǀguiǀguibe khoe-i hoa-e ǁoreba ǃkham ǃoa tsî dan.
15. Tae-e da nî dī î da Elob di ǀkhaeb xoremarib diba xu ǃgâiba hō?
15 Jehovab ge ǀkhaeb ase ǁîb ǀGôaba xoremarib ase ge māda. Tsî ǁnās ge ra īǁkha kai în sada di ǁorena ǀûbahe. Xawe Elob xa da ga ǀûbahe ǂgao, o da ge xū-e nî dī. ǁNāsa a tae? Johaneb ǁāǁnâ-aob tsî Jesub tsîn ge aitsama ǃereamsa ra māda: “ǃHobasen du, Gaosib ǀhommi dib ǀgūse hâ xuige.” (Mat. 3:1, 2; 4:17) ǃHobasen tsî da ge Jehovaba nî ǀgū îb sida di ǁorena ǀûba. ǃHobasensa tae-e ra ǂâibasen? Tsî nēsa mati nî huida î da Jehovaba ra ǃgâiaǂgao kai xūna dī ǁore-ao da a xawe? Sao ra ǁkhāǁkhāǃâs ge ǁnāsa nî ǃeream.
18ǁÎ ǁNAETSANAS Aio re Xoremariba
a ǁGuiǃāhe ra mîs: Elobmîs ǃnâs ge “ǁore” ti hâ mîsa ǀnî ǁaegu ai ǂhanu tama xūna dīsa ǃoa ra ǁnaeǁgau. Tamas ka io Jehovab ǂhanu tama ti ra mî ǀgaub ǃnâ ûisa. “ǁOreb” ti hâ mîs tsîn ge khoen ge Adamma xu ǀumi ǀoasa tama kurusa ǃoa ra ǁnaeǁgau. ǀÛmi da ge ǁoreb ǃaroma da ge sada hoada ra ǁō.
