1. ǃHobasensa tae-e ǃkhōǂgā hâ?

 TSŪ xū-e da ga dī, o i ge ǂhâǂhâsa ǃhobasen da nîsa. Elobmîs ge ra mî khoe-i ge ra ǃhobasen, ǁgai xūna ī ga ǃhui-o. Dī i go ǁgai xū-e i ge ra ǀû tsî ǁnāsa ǁkhawa tātsē dī ǂgao tama hâ.—Mat. 3:8; ǃNǃkh. 3:19; 2Pet. 3:9.

2. Tae-i ǃaroma da hoada ǃhobasens xa nî ǁkhāǁkhāsen? (Nehemiab 8:​9-11)

² Ûitsama khoe-i hoa i ge ǃhobasens xa nî ǁkhāǁkhāsen. Tae-i ǃaroma? Tsēkorobe da ra ǁore xui-ao. Adammi tsî Eva hâra di surib ase da ge sida hoada ǁoreb tsî ǁōba ǀûmi hâ. (Rom. 3:23; 5:12) Nēs ge mâ khoe-i hoa-e ǃkhōǂgā hâ. ǀGaisa ǂgomsa ge ūhâ i khoen, aiǁgause apostel Paulub tsîn ge ǁoreb ǀkha ǃgomsiba ge ūhâ i. (Rom. 7:​21-24) Nēsa ra ǂâibasen ǂkhabuǂâi da nîsa sida ǁoren ǃaroma? Hî-î, Jehovab ge ǀkhomxaǂgaoxa tsîb ge ra ǂhâba î da ǃgâiaǂgao. ǃGaoǃgâ re tae-i ge Nehemiab tsēdi ǃnâ ge ûihâ i Jodeǁîn ǀkha a īsa. (Khomai re Nehemiab 8:​9-11 sa.) Jehovab ge ge ǂhâba tama hâ ī în ǃkharu ge ǁaeb ǃnân ge dī ǁoren xa ǂâi. Xaweb ge gere ǂhâba în ǃgâiaǂgaob ǀkha ǃoaba bi. Jehovab ge ǂan ǃhobasens ǂkhîba ra mādasa tsîb ge ǁnās xa ra ǁkhāǁkhā da. Sada ǁorena xu da ga ǃhobasen o da ge a ǂgomǃgâ ǁkhā, sada ǀkhomxaǂgaoxa ǁGûb nî ǀûba dasa.

3. Tae-e da nē ǁkhāǁkhāǃâs ǃnâ nî ǃhoaǃgao?

³ Nē ǁkhāǁkhāǃâs ǃnâ da ge ǃhobasens xa nî ǁkhāǁkhāsen. ǃNona xūna da ge nî ǃhoaǃgao. ǂGurose da ge nî ǁkhāǁkhāsen Jehovab ge Israelǁaesa tae-e a ǁkhāǁkhāsa ǃhobasens xa. Tsî da ge nî ǃgaoǃgâ Jehovab mati khoena ra huisa în ǃhobasen. ǀAms ai da ge nî mû Jesub ge ǁîb ǁkhāǁkhāsabega tae-e ǁkhāǁkhāsa.

 JEHOVAB GE ISRAELǁÎNA ǃHOBASENS XA ǁKHĀǁKHĀ XŪ-I

4. Jehovaba Israelǁaesa tae-e ǃhobasens xa ge ǁkhāǁkhā?

⁴ Jehovab ge Israelǁaesa ǂhanuga mā, on ge ge mîmâi ǁnā ǂhanugan nî ǁnâuǀnamsa. Jehovab tsîn ge ge mîmâi ǁnā ǂhanugan ga ǁnâuǀnam ob nî ǁkhauba tsî ǀkhae nîsa. Sao ra xu-eb ge ǁîb ǂhanugu xa ge mî: ‘Amase, nē mîmās hîa ta nētsē ra mîmā dus ge sadu ǃaroma !gom tamas ka io sado xu ǃnū tama hâ.’ (Deu. 30:​11, 16) Xawen ga ǁîb di ǂhanuga ǁnâuǀnamoǃnâ tamas ka ion ga ǁhûibasen nau eloga ǃoabasa, ob ge ǁîna ǁkhauba tide. Xawe nēs ge ge ǂâibasen tama hâ i Jehovab ge ǁnāxuǃgâ nî ti. ǁÎn Elob Jehovaba ǃoan ge ga “oahā” hâ tsîn ge ǁîb domma ga ǃgâ hâ. (Deu. 30:​1-3, 17-20) ǀNî mîdi ǃnân ge ga ǃhobasen hâ. ǁNātin ga dī hâ ob ge Jehovaba ǁîn ǀgūse hâ tsî ǁkhawa ga ǀkhae nî hâ.

5. Jehovaba mati ge ǁgau ǁîb ǁaes aib ǀûsen tamasa? (2 Gao-aogu 17:​13, 14)

⁵ Jehovab di ǁhûiǂûisa ǁaes ge ǃnākorobe ǁîba gere mâǃoa. ǁÎn ge ama tama elona ǃoaba tsî ǀnî hâ ǁgai xūn tsîna gere dī. ǁNās xa ǃaroma-e hâsen ge ǃgomma gere tsâ. Jehovab ge gere hui ni în ǁkhawa ǁîba ǃoaba. Jehovab ge ǃnākorobe ǁîb kēbo-aoga gere sî î gu khoena hui în ǃhobasen tsî ǁkhawa ǁîba ǁîn ǂgaob hoab ǀkha ǃoaba.—Khomai re 2 Gao-aogu 17:​13, 14 sa.

6. Jehovaba mati ǁîb kēbo-aoga gere sîsenū î gu ǁîb khoena ǁkhāǁkhā tae-i ǃaroman nî ǃhobasensa? (Ai-īsiba mû re.)

⁶ Jehovab ǁaes gere ǁnâuǀnamoǃnâ bi, ob ge ǁîb kēbo-aoga gere sî. Î gu khoena ǃkhâikhom tsî mîba tae-i nî īsa dī-unusen taman ga io tsî ǁîn tsîna gere mî-unuba. Jehovab ge Jeremiaba sao ra-e ge mîba îb Israelǁîna mîba: “ǂGomoǃnâ Israelse tita ǃoa oa re . . tita ge ǀkhomxaǂgao tsî ta ge ǀamose sadu ǀkha ǁaixa tide . . ǀhapixa du a tsî du ge ǃKhūb, sadu Elob ǃoagu khâikhâisen ǃkhaisa ǂanǃgâ re.” (Jer. 3:​12, 13) Jehovab ge Joela sao ra xū-e khoena ge mîba kai: “Xawe nēsi sa ǂgaob hoab ǀkha tita ǃoa ǃhobasen.” (Joe. 2:​12, 13) Sao  ra xu-eb ge Jesajaba ge mî kai: “ǁĀsen! ǃAnuǃanusen! Ti mûǁaeba xu sadu ǁorena ūbē; ǂkhabadība ǀû!” (Jes. 1:​16-19) Esekieli ǃnâ-ūb ge Jehovaba ǁîb khoena ge dî: “Tita kha ǂkhaba khoe-i di ǁōb ǃnâ ǃgâiǃgâibasen-e ūhâ, xawe ta ra ǂgaos ge ǁî-i ga ǁî-i tsū daoga xu dabasen tsî ûi ǃkhaisa. . . Tita ge khoe-i di ǁōb ǃnâ ǃgâiǃgâibasen-i xare-e ūhâ tama hâ. . . ǁNā-amaga, ǃhobasen, î du ûi.” (Ese. 18:​23, 32) Jehovab ge amabes ǃnâ ra ǃgâiaǂgao khoen ga ǁîn ǁorena xu ǃhobasen o. ǁÎb ǂhâba hâ amaga în khoena ǀamosib kōse ûi. Xawe Jehovab ge khoe-e ǃâus ǀguisa dī tama, î-i dī-ūnusen îb ǁnās khaoǃgâ ǀgui ǁî-e hui. Hā re î da ǀnî hâ aiǁgaude mû.

7. Kēbo-aob Hoseab tsî ǁîb taras aiǁgausa ra sîsenūseb Jehovaba tae-e ǁîb khoena ge ǁkhāǁkhā?

⁷ ǃGaoǃgâ re Jehovab ge mati ǁîb khoena ǁkhāǁkhā ǀgausa, kēbo-aob Hoseab tsî ǁîb taras Gomers aiǁgausa ra sîsenūse. ǀAi toas ges khaoǃgâs ge Hoseaba ǀnî hâ aob ǃaroma ge ǀgora xu. Ī ǁoa ī ge i ǁîs nî ǀkharaǀkharasensa? Jehovab khoen ǂgaogu ǃnâ ra mûb ge Hoseaba ge mîba: “ǃGû, î ǁkhawa sī sa tarasa ǀnam, ǀnî khoeba ǀnam tsîs ra ǃgamekhôa xawe. Sadu ge ǃKhūb Israeli khoena ǀnams ǁkhās khami, ǀnî elon ǁga dabasen tsî draiben di narude a ǀnam.” (Hos. 3:1; ǂKhm. 16:2) ǃGaoǃgâ re Hoseab taras ge noxoba ǀgaisa ǁore-e gere dī. Xaweb ge Jehovaba Hoseaba ge mîba îb ǁîsa ǀûba tsî ǁîb taras ase ū-oa. a ǁÎb di aiǁgausa ra sîsenūseb ge Jehovaba ǁîb di khoena gere ǁkhāǁkhā ǂgao matib ǁîb xa ra tsâsa. Kaise ǁgai xūnan gere dī xawes tsîn hoan ǃnâb ge noxoba ge ǀnam ni ī. ǁÎb ge ǁîb kēbo-aoga ǃnākorobe gere sî în hui-e în ǀkharaǀkharana ǁîn ûigu ǃnâ dī. Nē aiǁgaus ge ra ǁkhāǁkhā da Jehovab ‘hoa’ xūna khoe-i xa a ǂansa. Tsîb ǁîba ǀgaisa ǁore-e ra dī khoe-e nî huisa î-i ǃhobasen. (ǂKhm. 17:3) Hā re î da mû Jehovab ge mati nēsa a dīsa.

JEHOVAB KHOENA RA HUI TSÂ ǀGAUB ÎN ǃHOBASEN

8. Jehovaba tae-e ge dī îb Kainna hui ǃhobasens ǀkha? (Genesis 4:​3-7) (Ai-īsiba mû re.)

⁸ Kainni ge Adammi tsî Evas di ǂguro ǀgôa ge ība. ǁÎra xu ge ǃnae ǀgôan hoan khamib ge ǁoreba ǁîra xu ge ǀûmi. Kainni ge ǁnā ǁoreba xu ge ǃkhō-oasen tama hâ i. Elobmîs ge ra mî: “ǁÎb di sîsengu ge ge ǂkhaba ī.” (1Jhn. 3:12) ǁNā-amagab ge ǀnîsi Jehovaba “Kainni tsî ǁîb di ǁguibasa ge ǂhara” ǁguibasab ge dī o. ǁÎb di ǂuba ǀkharaǀkharas xab ge “kaise ge ǁaixa tsîb ge ai-īsib âba ge ǀkhara.” Jehovaba sao rase tae-e ge dī? ǁÎb ge Kainni ǀkha ge ǃhoa. (Khomai re Genesis 4:​3-7 sa.) ǃGaoǃgâ re Jehovab ge ǃgâi ǀgaub ǃnâ Kainni ǀkha ge ǃhoa. Tsî ge mîba bi ǀkhaeheb nîsa ǃgâi xūnab ga dī o. Jehovab ge Kainni tsîna ge ǃkhâikhom, ǁîb ǁaib nî ǃaromasa îb ǁgai xu-e dī. Tsûtsûsaseb ge Kainna ge ǃgâ ǂgao tama hâ i. ǁÎb ge ge mā-am tama hâ i îb Jehovaba huibi îb ǃhobasen. ǁNā ǃereams khaoǃgâb ge Jehovaba ǀû nau ǁore-aona huis ǀkha în ǃhobasen? Tātsēs tsîna o.

9. Jehovaba mati Davida ge hui îb ǃhobasen?

⁹ Jehovab ge kaise Gao-aob Davida ge ǀnam ī. “Ti ǂgaob ǃoa hâ khoeb” tib ge ge ǂgaibi. (ǃNǃkh. 13:22) Xaweb ge Davida kaise ǁgai xūna ge dī, aiǁgause ǃgamme khôa tsîb ge khoe-e ge ǃgam. Moseb ǂhanub ǃoagub ge Davida ǁōb ǁkharaba ge anu hâ i. (Lev. 20:10; Num. 35:31) Xaweb  ge Jehovaba Davida gere hui ǂgao îb ǃhobasen. b ǁÎb kēbo-aob Natanab ge ge sî îb Gao-aoba sari, noxobab ge ǁîb ǁorena xu ǃhobasen tama hâ ī hîna. Natani ge aiǁgausa ge sîsenū îb Davida hui, îb ǁnâuǃā ǀgaisa ǁorenab ge dī ǃkhaisa. Davidi ge ge mûǂan kaiseb ge Jehovaba a tsûtsûsa tsîb ge ge ǃhobasen. (2Sam. 12:​1-14) Psalmsab ge ge xoa ǁgau rasa matikōseb ge ǃhausensa. (Psa. 51) ǂGui khoen ǁore gen ge nē Psalms xa ge ǁkhaeǂgaohe ǁîsan ra khomai hîna tsîn ge ge ǃhobasen. Kaise da ge ra ǃgôaǃgâ Jehovab ge ǀnamxaǃnâ ǀgaub ǃnâ Davida hui ǀgaus xa.

10. Mati du ra tsâ ǂansa Jehovab sida ǀkha ǃnūǃnâxa tsîb ra ǀûba da ǂgaosa?

¹⁰ Jehovab ge hoa ǁorena ǃhui hâ. (Psa. 5:​4, 5) Xaweb ge Jehovaba a ǀnam da tsî da ga ǁore ob ge ra hui da ǂgao î da ǁoreba ǃkhamǃoa. ǁÎb ge hoaǁae ra dītsâ îb tsū ǁorena dī hâ khoen tsîna hui tsî ǁîb ǃoa ǀgū. Kaise i ge ra ǁkhaeǂgaoda ǂansa Jehovab ra ǀûba da ǂgao ǃkhaisa. Jehovab ǃnūǃnâxasib tsî ǀûbaǀnamxasib xa da ga ǂâi, o da ge ra ǂkhâǃnâhe î da ǂgomǂgomsase ǁîb ǃoagu hâ tsî ǃhobasen ǁore da ga o. Nēsi da ge nî ǁkhāǁkhāsen Jesub ge tae-e ǁîb ǁkhāǁkhāsabega ǃhobasens xa ǁkhāǁkhāsa.

JESUB ǁKHĀǁKHĀSABEN GE ǃHOBASENS XA ǁKHĀǁKHĀSEN XŪ-I

11-12. Jesuba mati ǂkhōsa ge sîsenū îb ǁkhāǁkhā da Jehovab ǀûbaǀnamxa ǃkhaisa? ( ai hâ ai-īsiba kō re.)

¹¹ ǂGurokam Xristeǁîn ǁaeb ǃnâ i ge ge ǁaexa Mesiab nî hāsa. ǃKharu go ǁkhāǁkhāǃâs ǃnâ da go ǃhoaǃgao khamib ge Jehovaba Johaneb ǁāǁnâ-aob tsî Jesub Xristub tsîna ge sîsenū, îb khoena ǃhobasens ǂhâǂhâsasiba ǁkhāǁkhā.—Mat. 3:​1, 2; 4:17.

¹² Jesub ge ǃhūbaib aib ge hâ i o ge ǁkhāǁkhā, ǁîb îb ǀûbaǀnamxasa tsîb ra ǀûba da ǂgaosa ǁore da ga o. ǀGui ǀgaub Jesub ge nē-e dīs ge îxa ǂkhōsab ge ge sîsenū ǁgûb tsî ǀgôab dīsa. ǁNā ǀgôab ge ge ǁhûibasen îb omsa xu ī tsîb ge kaise ǁgai  xūna sī ge dī. Xaweb ge ǁaerob khaoǃgâ omsa ǃoa ge oasī. ǁÎb îba tae-e ge dī? Jesub ge ge mî: “Mûǃāhe ǁkhāb a ǃnūsib aib ǃgoaxa hîab ge ǁgûba mûǃgoaxa bi tsî kaise ǃoatsâsib xa ge khâiǃnâhe. ǁÎb ge ǃkhoeǃoa bi, ǁnam bi tsî ge ǁoa bi.” Nē ǀgôab ge ge ǃâubasen tama hâ i ǁîb îb nî ǀûbabisa. ǁNā-amagab ge ge ǂganamsen îb ǃgā-i ase oms ǃnâ sîsen. Xaweb ge ǁîb îba ge ǀûbabi. “Nē ǀgôab tib” tib ge ge ǂgaibi tsî ge ū-oabi. Dadasab ge ge mî: “Kāb ge go hâ i tsî ta ge ǁkhawa go hō-oa bi.” (Luk. 15:​11-32) Jesub ge ǀhommi ǃnâ ûi hâ-i ob ge ge mû matib ge ǁîb îba khoena ǀnam i tsî ǃhaese gere ǀûbasa ǁoren gere o. Jesub ǂkhōs ge ra ǁkhaeǂgao da tsî ra ǁgau Jehovab mati ǀkhomxaǂgao ǁGû ǃkhaisa.

13-14. Apostel Petruba tae-e ǃhobasens xa ge ǁkhāǁkhāsen? Tsî tae-eb ge nauna ǃhobasens xa ǁkhāǁkhā? (Ai-īsiba mû re.)

¹³ Apostel Petrub ge ǂhâǂhâsa xūna ge ǁkhāǁkhāsen Jesuba xu, Jehovab mati ǃhobasen hâ khoena ra ǀûbas xa. Petrub ge ǂgui dīsāde gere dī tsîb ge Jesuba ǁîba harase ge ǀûba. Aiǁgause, Petrub ge Jesuba ǃnona ǃnāde ǀūxūs khaoǃgâb ge kaise gere tsû dīb ge xū-i xa. (Mat. 26:​34, 35, 69-75) Jesub ge khâisab ge hōs khaoǃgâ Petruba ǀgurib hâ hîna ge ǀhao-ū, îb ǁîb ǀkha ǃhoa. (Luk. 24:​33, 34; 1Kor. 15:​3-5) Jesub ge ge ǂan i Petrub ǃhobasen hâsa tsî gere ǂanǂanbi ǂgao ǁîbab go ǀûbasa.—Mrk. 16:7.

¹⁴ Petrub ge gere ǁnâuǃā mati i ra tsâsa ǃhobasen tsî ǀûbahesa. ǁNā-amagab ge ǁkhāǁkhāsen nî ge xūna naun ǀkha ge ǀgoragu. Pasxab ǁâudīb tsēs khaoǃgâb ge Petruba kai ǂnubis Jodeǁîna ge ǁguiǃāba Jesub ge ǃgamhesa. ǀNamxaǃnâseb ge ge ǂkhâǃnâ ni: “ǁNā amaga ǃKhub ǃoa ǃhobasan ob ge ǁîba sa ǁorena nî ǀariǂûi tsîb ga ǁaeba ǀoa ob ge ǃKhuba sado ǀasa gagasi ǀgaiba nî mā.” (ǃNǃkh. 3:​14, 15, 17, 19) Petrub ge ge ǁkhāǁkhā ǁore-ao i ra ǃhobasensa  ūdawasen i ga o. Nēs ge ra ǂâibasen ǁî-i di tsū ǂâiǀgauba i ge ra dawa, tsū xūna dī ǀû tsî Jehovaba ra ǂkhîǂkhî xūna ra dī tsoatsoa. Nē aposteli ge ge ǁgau Jehovab ge hoase nî ǀûba da, ǁnās ge ra ǂâibasen nē ǁoren ge nî ǀariǂûihe tsîn ge hoase nî ǀkhai. Tsî ǂgui kurin khaoǃgâb ge Petruba Xristeǁîna ge mîba: ‘Jehovab ge ǃnuǃnâxaba du tsî khoe-i nî kāǁosa ǂgao tama hâ. Xawe hoan nî ǃhobasensa.’ (2Pet. 3:9) Matikōsen ga sida ǁorena ǀgaisa xawe da ga ǃhobasen, ob ge Jehovaba hoase nî ǀûba da nēs ge ra ǁkhaeǂgao da.

15-16. (a) Apostel Pauluba mati ǀûbab xa ge ǁkhāǁkhāsen? (1 Timoteub 1:​12-15) (b) Tae-e da sao ra ǁkhāǁkhāǃâs ǃnâ nî ǃhoaǃgao?

¹⁵ Paulub ge ǂgui ǁgai xūna gere dī. ǁÎb ge Xristeǁîna gere saoǃgon. ǃNāsa Xristeǁîn ge ǀnîsi gere ǂâi ǁîb tātsē dī-unusen tidesa. Xawe Jesub ge ge ǂan-i Paulub dī-unusen tsî nî ǃhobasen ǃkhaisa. ǁÎb tsî ǁîb Îb ge ǃgâi ǀgauga Paulub ǃnâ ge mû, Jesub ge ge mî: Nēb ge “tita ǀō-aisase ǁhûiǂuibasen” hâba. (ǃNǃkh. 9:15) Jesub ge buruxa dī-e ge sîsenū îb Pauluba ǃhobasen kai. (ǃNǃkh. 7:58–8:3; 9:​1-9, 17-20) Paulub ge ǃhobasen tsî ge Xristeǁî kai tsîb ge Jesub xa sîsen-e ge māhe aposteli ase. Paulub ge ǁaeba xu ǁaeb ǀkha ǃgôaǃgâb rasa gere mî, Jehovab tsî Jesub tsîn ge ǃgâisib tsî ǀkhomxaǂgaosiba ǁgaubi ǃkhais ǃaroma. (Khomai re 1 Timoteub 1:​12-15 sa.) Paulub ge ǁîb ǃgâsana ge ǁkhāǁkhā, “Elob di ǃgâisib ǃhobasens ǃoa satsa ra ǂgaeǂguisa.”—Rom. 2:4.

¹⁶ ǀGui ǃnās aib ge Pauluba ǁnâu o, Korintes ǀhaohâb ge ǀai-aoba ǁnāxūsa îb ǀhaohâb ǃnâ hâ ǀgara ob ge ǁîna tae-e mîba în dī? ǁÎb ge mî xū-e xu da ge ra ǁkhāǁkhāsen, Jehovab mati ǀnama ra ǁgausa ǁîb ǃoaba-aonab ga ǁnâma o tsîb mati ǀkhomxaǂgaosiba ra ǁgausa ǃhobasenan ga o. ǁKhāǁkhāsen da ge nî mati da Jehovaba nî ǁgae ǀgausa. Sao ra ǁkhāǁkhāǃâs ǃnâ da ge tae-i ge Korintes ǀhaohâb ǃnâ a îsa nî ǃhoaǃgao.