1. Jehovab di ǀamo ûib di mîmâis xa ǂâiǃgâsa mati ra tsâǀkhā da?

 JEHOVAB ge ra mîmâi, ǁnān hîna ǁîba ra ǁnâuǀnaman ge ‘ǀamo ûiba’ nî hō. (Rom. 6:23) Jehovab ra māda ǂgao xu-i xa da ga ǂâiǃgâ o. O i ge ǁîba da ūba hâ ǀnamma ra kai. ǂÂis ǀguisa hî re: Jehovab ge ǁnātikōse a ǀnamda, ǁnā-amagab ge mā-am tide î da ǁîba xu ǀgora-e.

2. ǀAmo ûib xa hâ mîmâisa mati ra hui da?

² Jehovab ǀamo ûib xa ra mî mîmâis ge ra hui da. Î da sida di ǃgomsin ǃnâ mâǀgai. Sida khākhoen ga ǃgam da ǂgao xawes tsîna da ge Jehovaba ǃoaba ǀû tide. Tae-i ǃaroma? ǀGui ǃaromas ge Jehovab ǃoagu da ga ǂgomǂgomsase ga ra ǁō o. Ob ge ǁîba khâisa nî māda. Tsî da ge ǃâubasensa nî ūhâ ǁkhawa da ǁō tidesa. (Jhn. 5:28, 29; 1Kor. 15:55-58; Heb. 2:15) Tae-i ǃaroma da a ǂgom ǁkhā ī ǁkhā i asa ǀamosib kōse ûisa? Sao ra ǃaromade mû re.

3. Tae-i ǃaroma da a ǂgom ǁkhā Jehovab ǀamosib kōse a ûi kai da ǁkhāsa? (Psalmdi 102:12, 24, 27)

³ ǂAn da ge a Jehovab ǀamosib kōse a ûi kai da ǁkhāsa. Ûib ǁîba xu ra hā amaga. Tsîb ǁîba ǀamosib kōse ra ûi amaga. (Psa. 36:9) Sao ra xoade mû re hîna ra ǁgaude, Jehovab ge ǀnai hâ isa. Tsî ǀamosib kōse nî hâsa. Psalmdi 90:2 ge ra mî Jehovab “ǀamosiba xu ǀamosib kōse” ra ûisa. Psalmdi 102 ge ǁkhā xu-e ra mî. (Khomai re Psalmdi 102:12, 24, 27 sa.) Tsî kēbo-aob Habakuki ge nēti sida ǀhomsi ǁgûb xa ge xoa: “ǃKHŪTSE  sats ge ǀnai tsoatsoasa xu hâ, ti Elo ti ǃAnutse. Sats ge ǁō tama hâ.”—Hab. 1:12.

4. ǂÂiǂhansen î da nî ǃgom i a amaga ǁnâuǃāsa, Jehovab ǀamosiba xu hâsa? ǁGuiǃā re.

⁴ ǃGombahe î du a, ǁnâuǃāsa Jehovab ‘ǀamosiba’ xu hâsa? (Jes. 40:28) ǂGui khoen tsîn ge ǁnāti ra tsâ. Elihub ge Elob xa nēti ge mî: ‘Kurigu âb tsîna da a ǃgôa ǁoa.’ (Job. 36:26) Xū-e da ǁnâuǃā tama amaga i ge ǂâibasen tama hâ ǁî-i ama tama hâ di. Aiǁgause, ǃnâb ra sîsen ǀgauba da ge ǃgâise ǁnâuǃā tama hâ. Xawe ǁnāsa ra ǂâibasen ǁî-i a ǀhai di? Hî-i, ǁkhā ǀgaub ai da ge khoeda ase hoaragase ǁnâuǃā tide. Jehovab mati ǀamosiba xu ǀamosib kōse ra ûi tsî nî ûi ǀgarasa. Xawe nēs ge ǂâibasen tama hâ, Elob ǀamose ûi tama hâsa. Kuru-aob ge sida ra ǁnâuǃā tamas ka io ǁnâuǃā tama hâ xūn ai ǃgaoǃgaosa tama hâ. (Rom. 11:33-36) ǁÎb ge ǀnai xūn hoan aisi hâ, sores tsî ǀamirodi khami. ǂGomǃgâ da ge ra Jehovab ge “ǁîb ǀgaib ǀkha ǃhūbaiba ge ǂnubi.” Îo, ‘ǀhommi ge ǃāǂui-es’ aisib ge ǀnai ge hâ i. (Jer. 51:15; ǃNǃkh. 17:24) Mâ ǀkhara ǃaromasa hâ, sida ra ǂgom kaisa ǀamosib kōse da a ûi ǁkhāsa?

5. ǂGurose ge kuruhe khoera mâ ǃâubasensa ge ūhâ i?

⁵ Jehovab ge kuru ûitsâma xūn hoan ge ge kuruhe în ǁō ǁkhā, xawe khoen ose. ǁÎb ge ǁîna ǀō-aisa ǁkhāsiba ge mā în tā ǁō. Xaweb ge Jehovaba Adamma ge ǃkhâikhom: “ǁNā hais ǃgâin tsî ǂkhaban ǁaegu ǀgorasǂansa ra mās ǀguis ose, ǁîsa xuts ga ǂû, ots ge ǁkhā tsēs ai nî ǁō.” (Gen. 2:17) Adammi tsî Eva hâra ga Jehovaba ǁnâuǀnam hâ o. O ra ge ga ǁō tama hâ. ǂGom ǁkhā da ge a Jehovab ǀguitsēs ai sī ǁîra ga mā-am hâsa, îra ‘ûib di haisa’ xu ǂû. Nēs ge ga ǂâibasen hâ ǁîba ra a ǂgomǃgâ ǁkhā ǃkhaisa ‘ǀamosib kōse ûis’ ǃaroma. b—Gen. 3:22.

6-7. (a) Mâ ǀkhara xū-e ra ǁgau, khoen ǁōn nî ga kuruhe tama hâsa? (b) Mâ xū-i ǃnâ du ǃgâiǃgâibasensa ūhâ hîna du ra dī ǂgao-e? (Ai-īsiga mû re.)

⁶ Kurusa ra ôaǃnâ khoegu ge ra mî. Sida ǂkhûs ge ǁkhāǁkhāsen da ra xūn xa ǃnāsa xūna a ūǂgā ǁkhā. 2010 Nî ǃnâ i ge Scientific American Mind di hâ khomai ǃâs ǃnâ, ǃâba ge hâ ī hîna gere mîba. ǁAubexa i ge sida di ǂkhûsa 3 miliun  īrgu tamas ka io (300 kurigu) di tvs ǀapeǁguiga a ūǂgā ǁkhā. Xawe īǁkhā i ge a, sida di ǂkhûs ǁnās xa ǃnāsa xūna a ūǂgā ǁkhāsa. Xawe ǁnās ge ra ǁgau Jehovab ge sada di ǂkhûsa ǁnā ǀgaub ǃnâ a kurusa. Î-i 70 tsî 80 kurigu xa a ǃnāsa xūna ūǂgā ǁkhā.—Psa. 90:10

⁷ Jehovab ge ǀamosib kose ûi ǂgaos turab ǀkha ge a kuruda. Elobmîs ge ra mî: ‘Khoesi ǂgaob ǃnâb ǀamosiba ra mâi-aiǃâ’ sa. (Aoǁn. 3:11) ǁNās ge ǀgui ǃaromas ǁōba da khākhoeb ase ra mûba. (1Kor. 15:26) ǀAesen da ga o, o da ǀaeba ūǃoas ǀguisa ra dī tsî xu-e dī tama hâ? Hî-i, ǂgui ǁkhaegu ai da ge doktera ra mû. Tsî soǀôana ra ū î-i ǀaeb ǀkha hui da. Tsî da ge hoa-e ra dītsâ î da tā ǁō ǁkhā. Sada di ǀgūkhoe i ga ǁō o, ǂkham tamas ka io kaira-e. O da ǃgam tsûba gaxuse hōǃâ tama hâ? (Jhn. 11:32, 33) Amase da ge ǀamosib kōse ra ǁkhāǁkhāsen. Tsî ǀamosib kōse ûis di turaba ūhâ. Sida di Kuru-aob ge ǁnāti a kuru da amaga. ǁÎb ge amase nî ǃaroma î da ǀamosib kōse ûi ǁkhā. Xawe da ge nēsi ǀnî hâ ǃaromadi tsîna ūhâ ǂgomsa, ǀamosib kōse da a ûi ǁkhāsa. Nēsi da ge nî ǃhoaǃgao Jehovab ǃkharu ge ǁaeb tsî nēsis tsîna ra dī xūna. Hîna ra ǁgauna ǁîb di ǂâibasens ge dawa tama hâ.

8. Jesajab 55:11 sa tae-e ra ǁkhāǁkhā da Jehovab ūba da hâ ǂâibasens xa?

⁸ Adammi tsî Eva hara ge ǁōre tsî ǁîra di ǀgôana ǁōba ge mā. Xawes tsînab ge Jehovaba ǁîb di ǂâibasensa dawa tama hâ. (Khomai re Jesajab 55:11 sa.)  ǁÎb di ǂâibasens ge noxoba ǂgomǂgomsa khoen ǀamose nî ûisa. ǁNāsa da ge a ǂgom ǁkhā. Jehovab ge ǁîb ǂâibasensa dīǀoaǀoas ǃaroma ge mî tsî a dī xūn xa da ga kō o.

9. Eloba tae-e ge mîmâi? (Danieli 12:2, 13)

⁹ Jehovab ge ge mîmâi, ǁō hânab nî khâisa māsa. Tsîb ǁîna ǀamose ûis ǃēsa nî māsa. (ǃNǃkh. 24:15; Tit. 1:1, 2) ǂGomǂgomsa khoeb Jobi ge gere ǂgom, Jehovab ra ǁkhoresa ǁnān hîna ǁō hâna khâisa māsa. (Job. 14:14, 15) Kēbo-aob Danieli ge ge ǂan i khoen ǃâubasensa ūhâsa, în ǁōba xu khâi ǀamose ûis di aiǂhanub ǀkha. (Psa. 37:29; khomai re Danieli 12:2, 13 sa.) Jodeǁîn hîna ge Jesub tsēdi ǃnâ hâ în tsîn ge ge ǂan i. Jehovab ǁîb ǂgomǂgomsa ǃoaba-aona ‘ǀamo ûiba’ a mā ǁkhāsa. (Luk. 10:25; 18:18) Jesub ge nē mîmâis xa ǂgui ǃnâde gere ǃhoa. Tsî ǁîb tsîn ge khâisa ge māhe ǁîb îb xa.—Mat. 19:29; 22:31, 32; Luk. 18:30; Jhn. 11:25.

10. ǃKharu ge ǁaeb ǃnâ ge hâ i khâide tae-e ra ǁgau? (Ai-īsiba mû re.)

¹⁰ Jehovab ge ûib di mā-ao. Tsî khoena ǁkhawa ûiba ǃoa hau oas di ǀgaiba ūhâ. ǁÎb ge kēbo-aob Eliaba ǀgaiba ge mā, îb ǃoa taras Sarefats ǀgôaba ǁōba xu ǂhaiǂhai. (1Gao. 17:21-23) Ēgab ge Elisaba Elob huib ǀkha Sunemǁî taras ǀgôaba ǁōba xu khâisa ge mā. (2Gao. 4:18-20, 34-37) Nēs tsî nau khâidi tsîn ge ra ǁgau, Jehovab ǀgaiba ūhâsa khoena ûiba ǃoa oaǀkhī ūs diba. Jesub ge ǃhūbaib ai hâ io, ob ge ge ǁgau ǁîb îb ge ǁnā ǀgaiba a mā bisa. (Jhn. 11:23-25, 43, 44) Nēsib ge Jesuba ǀhommi ǃnâ hâ. Tsîb ge “hoa ǁkhāsiba ǀhommi ǃnâ tsî ǃhūbaib ai māhe hâ”. ǁNā-amagab ge ǁîba ǁnā mîmâisa a dīǀoaǀoa ǁkhā. ǁNān ‘ǀhobadi ǃnâ hân hoan’ nî khâisa māhe tsî ǀamo ûib di ǃâubasensa nî hōse.—Mat. 28:18; Jhn. 5:25-29.

11. Xoremariba mati ra īǁkha kai î da ǀamose ûi ǁkhā?

¹¹ Tae-i ǃaromab ge Jehovaba mā-am, îb ǁîb ǀnamǀnamsa ǀgôaba tsûtsûsa ǁōba ǁō? Jesub ge ǃereamsa ǁnā dîs ai ge mā mîb ge o: ‘ǁNātikōseb ge Eloba ǃhūbaiba ge ǀnam tsîb ge ǁîb di ǀguise ǃnae hâ ǀGôaba ge mā, ǁîb ǃnâ ra ǂgoman hoan kāǁō tide, xawen nî ǀamo ûiba ūhâse.’ (Jhn. 3:16) ǁÎb ǀGôabab ge xoremarib ase ge mā sida ǁorena ǃgū-ais ǃaroma. Elob ge ge īǁkhā kai î da ǀamo ûiba hō. (Mat. 20:28) Apostel Paulub ge ra ǁguiǃā nē ǂhâǂhâsa ǃâb Elob ǂâibasens diba: ‘ǁŌb ge khoe-i ǃnâ-u ge hā, amagas ge ǁkhāti ǁō hân khâisa khoeb ǃnâ-u ra hāsa. Adammi khami da a khoe, xui-ao da ge hoada ra ǁō, ǁnās ǁkhās khamin ge hoana Xristub ǃnâ nî ûi-ûihe.’—1Kor. 15:21, 22.

12. Gaosiba mati nî hui Jehovab ǂâibasensa sida ǃaroma dīǀoaǀoas ǃnâ?

¹² Jesub ge ǁîb di saosabena ge ǁkhāǁkhā în ǀgore. Îb Elob gaosiba hā tsî Elob ǂâisa ǃhūbaib ai ī. (Mat. 6:9, 10) ǀNî ǃâb Elob ǂâibasens dib ge khoen ǃhūbaib ai ǀamose nî ûisa. Nēsa dīǀoaǀoas ǃaromab ge Jehovaba ǁîb di ǀgôaba Mesiab Gaosib di gaose ge ǁgaumâi. Elob ge ǁnā ǁaeba xu, 144 000 khoena ǃhūbaiba xu ra ǀhaoǀhao. Jesub ǀkhan nî sîsenǀhaose în Elob ǂâisa dīǀoaǀoa.—J.ǂHa. 5:9, 10.

13. Tae-eb Jehovaba nēsi ra dī? Tsî sado tae-e nî dī?

 ¹³ Jehovab ge nēsi “kai ǂnubis” khoena ra ǀhaoǀhao. ǁÎb ge ra ǁkhāǁkhā nî în ǁîb gaosib ǂhanub ǃnāga ûi. (J.ǂHa. 7:9, 10; Jak. 2:8) ǂGui khoen ga nē ǃhūbaib ǃnâ ǃaob tsî torob tsîn xa ǀgorahe. Xawen ge kai ǂnubis khoena ǃgarise ra sîsen în ǁîn ǁaeguba xu, hoa ǀgaugu ǃhuigub diba ūbe. ǁÎn dīga xūn ge ra ǁgau ǁîn gôaga ǃhūǃgao-ūdadi ǃnâ kuruǃkhunisa. (Mix. 4:3) Torogu hîna kai ǁōga ra ǃaromagu ǃnâ ǁhaos xan ge ǂgui khoena ra hui în ‘ama ûiba’ hō. ǁÎna ama Elob tsî ǁîb ǂâibasens xa ǁkhāǁkhās ǃnâ-ū. (1Tim. 6:19) Omaris khoen ge a mâǃoa nî ǁkhā tamas ka ion ge mari-e a ǂoaǃnâ ǁkhā. Elob gaosiban ra ǂkhâǃnâ ǃkhais ǃaroma. Xaweb ge Jehovaba ǂhân hâ xūna ra mā nî. (Mat. 6:25, 30-33; Luk. 18:29, 30) ǁNā amab ge ra ǂgomǃgâ kai da Elob Gaosib a amasa. Tsî i nî aiǃgûsa Jehovab ǂâibasensa dīǀoaǀoas ǃnâ.

14-15. Mati i Jehovab di mîmâis ǁōba, ǀamose hîkākās diba nî dīǀoaǀoahe?

¹⁴ Jesub ge nēsi Elob Gaosib di gao-ao ǀhommi ǃnâ. Tsî hoaraga mîmâidi hînab ge Jehovaba a dī te nî dīǀoaǀoa. (2Kor. 1:20) 1914ǁÎ kuriba xūb ge Jesuba  ǁîb khākhoen ǂam-ai ra ǂgaeǂgui. (Psa. 110:1, 2) ǁÎb tsî ǁîb ǀkha ra ǂgaeǂguin tsîn ge ǀgū ǁaeb ǃnâ ǁîn dansa nî dīǀoaǀoa. Tsî ǂkhabadī-aona nî dīkākā.—J.ǂHa. 6:2.

¹⁵ Jesub duisend kurigu ǂgaeǂguis ǁaeb ǃnân ge ǁō hâna khâisa nî māhe. Tsî hoan hîna Jehovaba ra ǁnâuǀnaman ge ǀoasa kurusa nî hō. ǀUniga ǀgoraǃgâs khaoǃgân ge ǁnān hîna ge ǂhanuse a hōhena. ‘ǃHūbaiba ǀumi tsî ǀamose ǁîb ǃnâ nî ǁan’. (Psa. 37:10, 11, 29) ǃGâiaǂgaoxase “ǀuni khākhoeb, hîkākāhe nîb ge ǁōba.”—1Kor. 15:26.

16. Tae-e ǃnāsase ra ǂkhâǃnâ, î da Jehovaba ǃoaba?

¹⁶ Nē ǁkhāǁkhāǃâs ǃnâ da ge go mû, sida di ǃâubasens ǀamose ûis dis ǁaposase Elobmîs ai a ǃgaoǃgaosasa. ǁNā ǃâubasens ge a hui da ǁkhā î da ǂgomǂgomsase hâ ǀgara nē ǃgom tsēdi ǃnâ. ǀAmose ûis turab ǀguiba ūhâs ose da ge. ǂGui xūn xa nî ǂkhâǃnâhe Jehovaba ǂkhîǂkhîsa. ǁÎkha da ǃgam ǀnamma ūba hâ amaga da ge. Jehovab tsî Jesub tsîn ǃoagu ǂgomǂgomsase ra hâ. (2Kor. 5:14, 15) ǁNā ǀnammi ge ra ǂkhâǃnâ da î da ǁîkha ǁgae. Tsî sida ǃâubasensa naun ǀkha ǀgoragu. (Rom. 10:13-15) ǁKhāǁkhāsen da go khami da ge tā nî xūǃgunūxa. Xawe da ge nî māxa î da ǀamose Jehovab di ǀhōsa kai.—Heb. 13:16.

17. Tae-i ǃereamsa i mâ ǀguiǀguibe khoe-i hoa-e ūhâ? (Mateub 7:13, 14)

¹⁷ ǁNān ǀamo ûiba nî hōn ǁaegu hâ î da nî? Jehovab ge ǁnā ǃēsa ge māda. Nēsisa î ge a sida ǃeream ǀamo ûib di daob ai hâ ǀgarasa. (Khomai re Mateub 7:13, 14 sa.) Matib ûiba nî ī ǀamose da ga ûi hâhâ o? ǁNā dîs di ǃereamsa da ge saora ǁkhāǁkhāǃâs ǃnâ nî ǃhoaǃgao.