1. ‘ǂKhîb Elob diba’ a tae? Tsî nēsa xu da mati ǃgâiba ra hō? (Filipeǁîn 4:6, 7)

 ǂKHÎB ge hâ, nē ǃhūbaib ǃnâ hâ khoen a ǀūba. Nēb ge ‘ǂkhîb Elob diba.’ Tsî nēb ge sida ǀhomsi ǁgûb ǀkha da ūhâ ǀō-aisa ǀhōsagusisa xu ra hā ǃnomsasiba. Elob ǂkhîba ūhâs ge ǁkhaubahe hâse ra tsâ kai. (Khomai re Filipeǁîn 4:6, 7 sa.) ǁÎba a ǀnaman ǀkhas tsîna da ge ǃgâi ǀhōsaguside ra ūhâ. Tsî da ge ǀgū ǀhōsagusis tsîna ‘ǂkhîb di Elob’ ǀkha ra ūhâ. (1Tes. 5:23) Sida ǁGûba da ga ǂan, ǂgomǃgâsiba ǁgau tsî ǁîba gara ǁnâuǀnam o. O i ge ǁîb di ǂkhîba sida di ǂgaob hîna ǃgomǁaegu ǃnâ ra ǂâiǂhansena sâsa tsî ǃnomsase nî tsâ kai.

2. Tae-i ǃaroma da a ǂgomǃgâ ǁkhā Elob ǂkhîba da nî hōsa?

² ǃGomsina da ga hōǃâ ǁaeb ai, aiǁgause ǀaeb khoraǂuisens, tsūkēǃgâgu, torogu tamas ka io da ga ǃgôaǃgonhe o. O Elob di ǂkhîba ūhâsa īǁkhā-e? Nē ǃgomsigu ge a ǃao kai da ǁkhā. Xaweb ge Jesuba ǁîb saosabena ge mîba: “Ab ǂgaob âgo tā ǃhuri, îb tā ǃao.” (Jhn. 14:27) ǃGâiaǂgaoxasen ge ǃgâsana Jesub di ǀapemāsa ge sao. Tsî Jehovab huib ǀkhan ge ǂkhîba ge hōǃâ, nē ǃgomsin ǃnân da mâǀgai hîna.

3. Tae-e Coronas ǁaeb ǃnâ ge ī?

³ ǁKhōǁkhōsa ǀaeb khoraǂuisens ga hā o, o i ge mâ xu-i hoa-e ra dawa. Coronas ge mati khoena a tsâǀkhā ǀgaub xa ǂâi re. ǀGui ôaǃnâs ge ra ǁgau Coronas ǁaeb ǃnân ge ǂgui khoena, ǁoms ǀkha ǃgomsiba ūhâ isa. Tsî ǁnā ǁaeb ai i ge ǂâiǂhansendi, dipresib, xûi-i tsî druksna sîsenūs,  ǂkhābadīb. Tsî ǃgamsen ǂgaos tsâsib tsîna kaise ge ǀgapi. Sadu ǁan hâba i ga ǀaeb khoraǂuisensa a hâ o. Mati du sadu ǂâiǂhansende ǀnōsa ǀgaub ǃnâ a ūhâ ǁkhā? Tsî Eloba xu ra hā ǂkhîba xu ǃgâiba a hō ǁkhā?

4. Jesub ge ǀuniga tsēdi xa a mî kēbosa ǂansa, tae-i ǃaroma ǂkhîba ra māda?

⁴ Jesub ge ge mî, ǀûniga tsēdi ǃnâ i ge ǃkharagagu tsûtsû âin. Tamas ka io i ge ǀaegu khoraǂuisens tsîna “ǂgui ǃkhaidi ai nî hā.” (Luk. 21:11) Nēsa ǂansa mati ǂkhîba ra māda? ǀAegu khoraǂuisendi ga hâ o, o da ge buru tama hâ. Mûǂan da ra amaga nē xūn ge Jesub ge mî khami ra ī. ǁNās ǀkha da ge Jesub ge ǀuniga tsēdi ǃnâ, nî ûina ǃoa a mā ǀapemāsa ra sao: “Xawe tā ǂkhabuǂâi.”—Mat. 24:6.

5. (a) Filipeǁîn 4:8, 9 ǃoagu da tae-e nî ǀgoreba ǀaeb khoraǂuisens ga hâ o? (b) Elobmîs ǃkhōǁnâsa audioba ǃgâsa xu du, mati ǃgâiba a hō ǁkhā?

⁵ ǀAeb khoraǂuisens ge ǂâiǂhâsende mā da tsî a ǃhurikai da ǁkhā. Nēs tsîn ge Desi ti ǀon hâ ǃgâsas ǀkha ge ī. b ǁÎs omeb, omeb ǀgôab tsî dokteri tsîn ge Coronas xa ge ǁō. Tsîs ge ǁîsa nēs xa gere ǃao kaihe. ǀNîsis ǁîs kaira mamasa a māǃkharu ǁkhā xui-ao. ǁÎs sîsenni xas tsînas ge gere ǂâiǂhansen. Matis ǂûna ǁama tsî hâ ǃkhais ǃaroma nî mataresa. Nē xūn xas gere ǂâiǂhansen amagas ge ǁîsa ǃui-a ge ǁom hō tama hâ i. Xawe Desis ge ǁîs ǂkhîba ge hō oa. Mati? ǁÎs ge Jehovaba ǃoa, ǃnōsase nēs xa ge ǀgore. Tsîs ge nēsa sâsasiba māsi tsî ǃgâi ǂâide ūhâs tsîn ǀkha ge hui. (Khomai re Filipeǁîn 4:8, 9 sa.) Jehovab ǁîs ǀkha Elobmîs ǃkhōǁnâsa audiob ǃnâ-ū ra “ǃhoa” khamis ge gere ǃgâ. ǁÎs ge ra mî “nē khomai-aogu di domgu ge ti ǂâiǂhansende sâsasiba gere mā. Tsî Jehovab di ǀkhomxaǂgaosib xa gere ǂâi kai te.”—Psa. 94:19.

6. Elobmîsa aitsama ôaǃnâ tsî ǀhaode hâǃnâsa mati nî hui du?

⁶ ǀAeb khoraǂuisens ga hâ o, o da ge hoaǁae dīhō da goro xūna dīhō tide. Xawe tā da ge nî mā-am îs nēsa aitsama, Elobmîsa ôaǃnâ tsî ǀhaode hâǃnâsa xu ǂgae oa da. Sida ǂkhanin tsî vidiogu ǃnâ da ge ra mû, matin ǃgâsana ǃgomsigan ra hōǃâ xawe ǂgomǂgomsase Jehovaba ra ǃoabasa. (1Pet. 5:9) ǀHaode hâǃnâs ge nî hui du khoakhoa ra ǂâide Elobmîsa xu hōsa. Nēs tsîn ge ǃēde nî mā du nauna ǂkhâǃnâ tsî ǁîn xa ǂkhâǃnâhesa. (Rom. 1:11, 12) Jehovab mati ǀaesen hâ, ǃaoran tsî ǀguritsâsen rana ra hui ǀgaub xa ǂâis ge sadu ǂgomsa nî ǀgaiǀgai. Tsî  ǂgomǃgâsiba sadu ǃnâ nî omkhâi Jehovab nî hui dusa.

7. Tae-e du apostel Johaneba xu a ǁkhāǁkhāsen ǁkhā?

⁷ Dītsâ re sadu ǃgâsan ǀkha ǃhoasa. ǀAeb khoraǂuisens ge a ǃaroma ǁkhā î da tā ǀgūguse sida ǃgâsan ǀkha hâ. ǁNāti i ga ī ǁaeb ai da ge, apostel Johaneb gere tsâ khami ǀnîsi a tsâ ǁkhā. ǁÎb ge ǀhōsab Gajuba gere mû ǂgao. (3Jhn. 13, 14) Xaweb ge Johaneba ge mûǂan, Gajubab ǁaerob ǀgaiba mû tide ǃkhaisa. Johaneb ge dī ǁkhāb a-e ge dī. ǁÎb ge Gajuba sîǂkhanisa ge xoaba. Īǁkhā tama i ga io sadu ǃgâsana sarisa. O ǁîn ǀkha selfoni ǃnâ-ū ǃhoa re. Aiǁgause, vidiob ǃnâ-ū bels tamas ka io sms na sîs ǃnâ-ū. Nau Xristeǁîn ǀkha du ga ǁkhā du as kōse a ǃhoa o. O du ge ǃnorasase tsâ tsî ǂkhîb tsîna nî ūhâ. ǃGōsase du ga ǂâiǂhânsens tsâsiba ga ra ūhâ o. O ǀhaohâb ǃûi-aogu ǀkha ǃhoa tsî ǁîgu di ǀnamxaǃnâ ǂkhâǃnâsa ūǃoa re.—Jes. 32:1, 2.

8. Tsūkēǃgâba mati sadu ǂkhîba a ūbē ǁkhā?

⁸ ǁGammi dâus, ǃhūǂgubib tamas ka io du ǀae ǂhubib mâsiga a hōǃâ o. O du ge ǀnîsi gere ǂâiǂhansen. Tsî du ge ǀnîsi sadu ǀnamsabe-e ge ǂoaǃnâ ǁōb ǃnâ. Tamas ka io sadu di xūn hoan ge ǀnîsi ge dīkākāhe. Tsî du ge nēs xa ǃoatsâsib, ǃâubasen-e ūhâ tamase a tsâ ǁkhā. Tamas ka io ǁaib tsâsiba a ūhâ ǁkhā. Nēs ge ǂâibasen tama hâ, ǃkhūsiba du a ǀnam tamas ka io du ǂgomsa ūhâ tama hâ di. ǃGomsiga du ra hōǃâ ǃkhais ǃaroman ge ǀnîna a ǃâubasen ǁkhā, î du ǃgâi tama ǀgaub ǃnâ tanisen. (Job. 1:11) Xawe nē ǃgom mâsiga du ga ūhâ ǁaeb ais tsîna du ge ǂkhîba a ūhâ ǁkhā. Mati?

9. Jesuba mati tsūkēǃgâb ǃaroma ge aiǂhumi da?

⁹ ǂÂi oa re Jesub ge tae-e a kēbosa. ǀNî khoen ge ra ǂâi ǁîn tātsē tsūkēǃgâ-e hōǃâ tide di. Xawe da ge a ǂan sida ǁaeb ǃnâ i ge ǂgui tsūkēǃgâna nî hâ. Tsî gu ge nē tsūkēǃgâga sida tsîna a tsâǀkhā ǁkhā. Jesub ge ǁîb saosabega ge mîba, “ǃhuriǃhurisa ǃhūǂgubigu” tsî ǀnî hâ tsūkēǃgâgu tsîn nî hâsa ǀams nî hās aiǃâ. (Luk. 21:11) Tsîb ge ǁîb tsîna ge kēbo, “ǁgauoǃnâsib di ǀarosens” nî hâsa. Nēsa da ge nētsē sada ǂnamipe ra ī ǂkhābadīb. Tsî teroresmeb ǁnāǂamdi ǃnâ-ū ra mû. (Mat. 24:12) Jesub ge ge mî nē ǃgomsigu ge, Jehovaba ǃoaba tama hân ǀguina hāǂam tide di. Xawe hâs ge Jehovaba ǂgomǂgomsase ra ǃoaban tsîn ge tsūkēǃgâb xa ge tsâǀkhāhe. (Jes. 57:1; 2Kor. 11:25) Jehovab ge buruburuxa ǀgaub ǃnâ nē tsūkēǃgâga xū ǁkhauba da hō tide. Xaweb ge ǁîba ǂhâ da hân hoana nî māda, î da ǃnomsase hâ tsî ǂkhîba ūhâ.

10. Nēsi tsūkēǃgâb ǃaroma aiǂhumisensa mati sida ǂgomsa ra ǁgau? (ǂKhoamîdi 22:3)

¹⁰ ǁAeb aiǃâ da ga tsūkēǃgâb ǃaroma a aiǂhumisen o. Os ge ǁnāsa nî supu kai tsūkēǃgâb ga hā ǁaeb ai sâsase hâsa. Xawe tsūkēǃgâb ǃaroma aiǂhumisensa ra ǁgau Jehovab ǃnâ da ǂgomsa ūhâ tama hâsa? Hî-i. Tsūkēǃgâb ǃaroma aiǂhumisens ge ra ǁgau, ǁîb sida nî huis ǃnâ da ra ǂgomsa. Mâ ǀgaub ǃnâ? Elobmîs ge ra ǀapemāda, î da hānî tsūkēǃgâgu ǃaroma ǀnai aiǂhumisen. (Khomai re ǂKhoamîdi 22:3 sa.) Sida ǂkhanin, ǀhaodi, ǂanǂandi tsî Elob ǀapeǂhumis tsîn ge ǁaeba xu ǁaeb ǀkha ra mîba da. Î da tsūkēǃgâb nî hās aiǃâ ǀnai aiǂhumisen. c Jehovab ǃnâ  ǂgom i da ra? Di i ga ī o, o da ge ǁîb ra māda ǀapemāde nēsi nî sao, tsūkēǃgâb nî hās aiǃâ.

11. Margarets aiǁgausa xu du tae-e ra ǁkhāǁkhāsen?

¹¹ ǃGâsas Margarets aiǁgausa mû re. ǁÎs ge ǁan ǃnâ hâ i ǃās ǃnâ i ge ǀae ǂhubiba a tsoatsoa o. O i ge ǂhanub khoena ǁîsa ge mîba is ǁnāpaxū ī. ǂGui khoen ge ǁnā ǁaeb ǃnâ ǁnā ǃāsa xu gere ī amaga i ge. Daoga kaise ge ǀoahâ i audo di xa. ǂNū ǀans ge hoaba ge hâ i tsîs ge Margaretsa ǁnās xa ǃaromahe hâse, ǁaeroba ǁîs audos ǃnâ ge hâ. Xawe ǁîs ge ge ûiǃkharu, ǃgâises ge aiǂhumisen hâ i amaga. Tsî ǁîs ǁgarus ǃnâs ge ǃhūbǂhaweroba ge ūhâ i. Hîna gere ǁgauba ǀnî hâ daob tsînas a sîsenū ǁkhasa, ǁnā ǃāsa xu ǂoas ǃaroma. Tsî ǁîs ge tsūkēǃgâb nî hās aiǃâ ǀnai ǁnā daob ai ge ǃnari tsâ hâ i. Îs ǃgâise ǂan matis nî ǃnari ǀgauba tsūkēǃgâb ga hā o. ǁÎs ge ǃgâise aiǂhumisen hâ i amagas ge Margaretsa ge ûi ǃkharu.

12. Tae-i ǃaroma da ǃnōrasasib xa hâ daoǁgaude ra sao?

¹² Sida ǃnorasase nî hâ ǃkhais ǃaromab ge ǂhanuba ǁgaraga da nî ǁnâuǀnam ǃkhaisa ra ǂhâba. Aiǁgause, mîhe hâ ǁaeb ai oms ai hâs tsî tsūkēǃgâb xa ǃaromahe hâse ǀnî hâ ǃkhaiba ǃoa īs. Tamas ka io ǀnîhâ daoǁgaude saos ǃnâ-ū. ǀNî khoen ge nē ǁgaraga ǁîn ǁaeb tamas ka io ǂause ra sao. ǁÎn ūhâ xūnan ǁnāxu ǂgao tama hâ amaga. Xawe Xristeǁîna mati ra tanisen? Elobmîs ge ra mîba da: “Khoesi ǂnûiǂgā-i hoa-e ǃnaka hâba ǃKhūb ǃaroma, gao-aob kao, hoan xa kai ǀgaiba ūhâb ase.” (1Pet. 2:13, 14) Elob ǀapeǂhumis tsîn ge daoǁgaude ra māda, î da ǃnorasase hâ ǁkhā. ǃNās hoasa da ge ra ǂâiǂâiǃnâhe, î da ǀhaohâb ǃûi-aoga sada di selfon ǃgôade mā. Î gu tsūkēǃgâb ga hâ ǁaeb ai ǃkhaese bel da ǁkhā. Nēsa dī î du hâ? ǀNîsi da ge daoǁgaude nî hō tsūkēǃgâb ǁaeb ǃnâ da nî hâ ǃkhais, mati da ǃāsa xu nî ǂoa ǀgaub. Tsî mati da ǂhâ da hâ xūna nî hō ǀgaub tsîna. Tamas ka io mati da nauna nî hui ǀgaub tsîna. Nē daoǁgaude da ga sao tama io. O da ge sida tsî ǀhaohâb ǃûi-aogu di ûib tsîna, ǁkhōǁkhōsa mâsib ǃnâ a mâi ǁkhā. ǂÂis ǃnâ ūhâ re, nē ǂgomǂgomsa-aogu ge sada ra kōǃgâ. (Heb. 13:17) Margarets ge ra mî: “Tita ge ra ǂgom ǀhaohâb ǃûi-aogu  tsî ǀapeǂhumisa xu ra hā daoǁgaude saos ge ti ûiba ge sâu.”

13. Tae-e Xristeǁîna ǂkhîb tsî ǃgâiaǂgaob tsîna ge mā?

¹³ ǂGui ǃgâsan ge tsūkēǃgâb, torob tamas ka io ǃhaoǃnâbe torob xa ǃaromahe hâse ǁîn omde xu ra ǃkhoe. Tsîn ge ǁkhān an hoana ra dītsâ în ǀasa mâsiba ūǃoa tsî Jehovaba ǃoaba ǀgara. ǂGurokham ǁaeb Xristeǁîn hîna ge ǃgôaǃgonhen ge o, “ǃgâiǂhôasa” gere aoǁnân khami. (ǃNǃkh. 8:4) Aoǁnâ sîsenni ge ǁîna ra hui în ǃgomsib ai ta ǂâisa ǂnûi. Xawe Gaosib ǃgâiǂhôasa aoǁnâ. Tsî nēs xa ǃaromahe hâsen ge, ǁîn ǃgâiaǂgaob tsî ǂkhîb tsîna ǃkhōǀgara hâ.

14. ǃGôaǃgonhesa mati sida ǂkhîba a ūbē ǁkhā?

¹⁴ ǃGôaǃgonhe da ga, o da ge ǂkhîba ra māda xūn hoana a ǂoaǃnâ ǁkhā. ǃNorasase da ga ǀhaode ūhâ, aoǁnâ sîsen-e dī tsî ǃao tamase tsēs hoasa ga ra ûi o. O da ge nî ǃgâiaǂgao. Nē xūna da ga dīhō tama io, o da ge ra ǂâiǂhansen. Tae-i sao rase nî īsa da a ǀū amaga. Nē ǀgaub ǃnâ tsâs ge tsū tama hâ. Xawes tsîna da ge noxoba nî ǂanbasen. Jesub ge ge mî, ǃgôaǃgonhes ge ǁîb di saosabena nî ǃnôa kai. (Jhn. 16:1, 2) ǁNās ǃaroma mati da ǂkhîba a ūhâ ǀgara ǁkhā, ǃgôaǃgonhe da ga xawe?

15. Tae-i ǃaromada ǃgôaǃgonhesa ǃao tide? (Johaneb 15:20; 16:33)

¹⁵ Elobmîs ge ra mîba da: “Xristub Jesub ǃnâ ra ûi ǂgao khoe-i hoa-i ge ǃgomma nî tsâ.” (2Tim. 3:12) Andrei di ǀon hâ ǃgâsab ge ge ǃgombahe i ǂgomsa. Jehovab ǃoaba-aon nî ǃgôaǃgonhesa. ǁÎb ge ra mî: ‘ǂGui Jehovab di ǃoaba-aon ge nēba hâ. Hînab ǂhanuba mati hoada ǃkhōsis ǃnâ nî ǂgā hō?’ Andreib ge nēs xa kaise gere ǂâiǂhansen kaihe. Tsîb ge ǂkhîba ge ūhâ tama hâ i. Nau ǃgâsan ge mâsiba Jehovab ǃomǁae ge xū. Tsî ge ǂâi tama hâ i ǁîn ǃkhōhe tide ti. ǁÎn ge ge mûǂan ǃkhōhen nîsa. Xawen ge ǁnātikōse ge ǂâiǂhansen tama hâ i Andreib khami. ǁÎn di ǂâiǀgauba ūǃoa tsîb ge Jehovab ai ge ǂgomaiǂnûi. Tsî ǁîb ge ǂkhîba ge hōǃâ tsoatsoa tsî ǃgom mâsigu ǃnâs tsîna ra ǃgâiaǂgao. ǁNās tsîn ge sada  ǀkha a īǁkhā. Jesub ge ǃgôaǃgonhe da nîsa ǃâubasen ti a mî. Xaweb ge ǂgomǃgâsiba ge māda ǂgomǂgomsases tsîna da a hâ ǁkhāsa.—Khomai re Johaneb 15:20; 16:33 sa.

16. ǃGôaǃgonhe da ga ǁaeb ai da mâ daoǁgaude nî sao?

¹⁶ Sida sîsenni ga ǂhanub xa ga ǂgāhe ǁaeb ai da ge. Daoǁgaude ǁnâub beros tsî ǀhaohâb ǃûi-aoga xus tîna nî hō. Nē daoǁgaudi ge sada ǃgâib ǃaroma hâ. Tsî ra hui î da gāgāsi ǂûna ǃkhōǃoa. Tsî ǁkhā da as kōse ra hui î da aoǁnâ sîsenni ǀkha aiǃgû. ǁKhā du as kōse dītsâ re, nē daoǁgaude saosa ǁnâuǃā tama du ga ī xawe. (Jak. 3:17) Tā da ge sada ǃgâsan xa hâ xūna nau khoen ǀkha nî ǀgoragu. Tamas ka io da ge tā ǀhaohâb xa hâ xūna, nēs xa a ǂan ǁoa khoen ǀkha nî ǀgoragu.—Aoǁn. 3:7.

17. ǂGurokham ǁaeb apostelgu khami da tae-e nî dī mîǁguisa?

¹⁷ ǁGâuab Elob khoen ǃoagu ra ǃkhambas ge. ǁÎn ge ‘Jesuba gere ǂhaiǂhai’ sîsenni xa ra aoǁnâ. (J.ǂHa. 12:17) Tā mā-am re ǁgâuab tsî ǁîb ǃhūbaib xa ǃaoǃaohesa. ǃGôaǃgonhe da ga xawe aoǁnâ tsî ǁkhāǁkhās ge ǃgâiaǂgaob tsî ǂkhîba ra māda. ǃKharuge ǁaeb Jodeǁîn ǂgaeǂgui-aogu ge apostelga ge mîmā î gu tā aoǁnâ. Xawe gu ge nē ǂgomǂgomsa aoga Eloba ǁnâuǀnamsa ge ǁhûi. ǁÎgu ge ge aoǁnâ ǀgara. Tsî i ge ǁnā sîsen-e ǁîga kaise ge ǃgâiǂgao kai. (ǃNǃkh. 5:27-29, 41, 42) Xawe hâ as ge aoǁnâ sîsen-e dīsa da ga ǂgāhe, ǁaeb ai da ge nēsa ǂanbasen hâse nî dī. (Mat. 10:16) ǁKhā da a-i hoa-e dītsâ tsî da ga aoǁnâ ǀgara o. O da ge sâsasiba nî hōǃâ hîna Jehovaba ǂkhîǂkhîsa xu ra hāba.

18. Ham-e xu da ama ǂkhîba a hōǁkhā?

¹⁸ ǂGomǃgâsiba ūhâ re ǃgomǁaegu ǃnâs tsîna da ǂkhîba a ūhâ ǁkhāsa. ǁNā ǁaeb ais tsîna da ge ǂâis ǃnâ nî ūhâ, ǂkhîb hîna da ǂhâ hâb ge Elob di ǂkhîba. Tsî Jehovab ǀguib ge ǁnā ǂkhîba a māda ǁkhā. ǁÎb ai ǂgomaiǂnûi re ǀaeb khoraǂuisens, tsūkēǃgâb ǃnâ tamas ka io du ga ǃgôaǃgonhe o. ǁÎb ǀapeǂhumis ǀkha ǀguiba sîsenǀhao re. Hānî buruburuxa ǁaeb ai ǂâisa ǂnûi re. Nēsa du ga dī o, o i ge “ǂkhîb di Eloba sadu ǀkha nî hâ.” (Fil. 4:9) Saora ǁkhāǁkhāǃâs ǃna da ge nî ǃhoaǃgao. Mati da sida Xristeǁîna nî huisa hîna ǃgomsina ra ǃkharuǃnâna, în Elob ǂkhîba ūhâ.