1. Abrahammi ǂgomsa da ga ôaǃnâ, o da mâ dîde dîsen ǁkhā?

 ǂGUI khoen ge Abrahammi xa ge ǁnâu xawen ge ǁîb xa hâ amab hoaba ǂan tama. Xawe sadu ge ǂguina Abrahammi xa a ǂan. Aiǁgause du ge a ǂan, ‘Abrahammi hoan Elob ǃnâ ra ǂgoman’ di ǁgû ǃkhaisa. (Rom. 4:​11) Sadu tsîn ge Abrahammi khami Jehovab ǃnâ ǀgaisa ǂgomsa omkhâi ǁkhā, nēs ge amase a īǁkhā.

2. Abrahammi aiǁgaus xa ǁkhāǁkhāsensa tae-i ǃaroma ǂhâǂhâsa? (Jakobub 2:​22, 23)

² Abrahammi ge ūhâ-i ǂgomsa da a omkhâi ǁkhā ǀgaub ge, ǁîb di aiǁgaus xa ǁkhāǁkhāsensa. Abrahammi ge hoaǁae Elob gere mîmābi khami gere dī, ǁîb ge ǃnū ǃāsa ǃoa ge doe tsî tendi ǃnâ ǂgui kuriga gere hâ. Tsîb ge ge māsaenxa-i ǁîb ǀgôab Isaki tsîna ǁguibas ase māsa. Nē ǀgaugu Abrahammi digu ge ǀgaisa ǂgomsa ra ǁgau. ǁÎb di ǂgoms tsî ǃgâi dīgu ǃnâ-ūb ge Abrahamma, Jehovaba kaise gere ǂkhî kai tsî ǁnās ǀkha Jehovab di ǀhōsab ase ge ǂgaihe. (Khomai re Jakobub 2:​22, 23 sa.) Jehovab ge ǂhâba hâ î da hoada, sats tsîna ǃkhōǂgā hâse, ǁîb di mā-amsa hō tsî ǁîb ǀkha ǀgū ǀhōsagusisa ūhâ. ǁNās ǀkhab ge Jehovaba Paulub tsî Jakobub tsîkha ge mîmā îkha Abrahammi aiǁgaus xa xoa. Romeǁîn 4ǁî danaǃâs tsî Jakobub 2ǁî danaǃâs ǃnâ hâ xūna da ge nî ǃhoaǃgao. Paulub tsî Jakobub tsîkha ge kaise ǂhâǂhâsa xū-e Abrahammi xa ra mî.

3. Paulub tsî Jakobub tsîkha mâ Elobmîs xoasa ge sîsenū?

³ Paulub tsî Jakobub tsîkha ge Genesis 15:⁠6 ǃnâ hâ mîde  ge ǃkhō-am, mîra te: “Abrammi ge ǃKhūb ǃnâ ǁîb ǂgomǃgâsa ge mâi tsîb ge ǃKhūba ǁnās ǃaroma ǁîb xa ǃgâiǂâi tsî ǁîba ge ūǃoa.” ǃGâiǂâi tamas ka io ǂhanu-ai ti hâ mîs ge, khoen hîna Elob xa ra ūǃoahena ǃoa ra ǁnaeǁgau. Kaise î ge a buruburuxa matib Eloba ǀoasa kurusa ūhâ tama khoe-e, ǁore-oǃnâse ra ūǃoasa. ǁNās ǀkha du ge sadu tsîna ǀnîsi Elob xa ǂhanu-ai khoe-i ase ra ūǃoahe ǂgao. Nēsi da ge nî ǁkhāǁkhāsen Jehovab ge tae-i ǃaroma Abrahamma ǂhanu-ai khoe-i ase a mûsa. Tsî da sida tsîna tae-e a dī ǁkhāsa, î da ǂhanu-ai khoe-i ase Elob xa ūǃoahe ǁkhā.

4. Tae-e khoena ǂhanu-aisiba xu ra ǁkhae?

⁴ Romeǁîna ǃoab ge xoa sîǂkhanis ǃnâb ge Pauluba ge mî, hoa khoen a ǁore-ao ti. (Rom. 3:​23) ǁNās ǀkhab Eloba mati sida ǂhanu-ai khoen ase mû ǁkhā? ǁNā dîsa ǃereams ǃaromab ge Pauluba, Abrahamma ǃoa ge ǁnaeǁgau.

5. Jehovaba tae-i ǃaroma Abrahamma ǂhanu-ai ti ge ǂgai? (Romeǁîn 4:​2-⁠4)

⁵ Jehovab ge Abrahamma Kanani ǃhūb ǃnâb ra hâ hîna ǂhanu-ai khoeb ase ǀnai ge mû. Jehovab ge Abrahamma ǂhanu-ai ti ge ǂgai tama hâ i, Moseb ǂhanubab gere ǁnâuǀnam ǃkhais ǃaroma. ǁNāsa da mati a ǂan? (Rom. 4:​13) Jehovab ge Abrahamma ǂhanu-ai khoeb ase a ǂgai ǁaeb aib ge Moseb ǂhanuba noxoba ge hâ tama hâ i. Nē ǂhanub ge 400 kurigu khaoǃgâ ǀgui ge hā. ǁNās ǀkha tae-i ai ǁgauǁgau hâseb ge Jehovaba Abrahamma ǂhanu-ai ti ǂgai? Jehovab ge ǀkhomxaǂgaosib di Elob ase, Abrahamma ǁîb ǂgoms ai kō hâse ǁîba ǂhanu-ai khoeb ase ge mû.​​—⁠Khomai re Romeǁîn 4:​2-⁠4 sa.

6. Jehovaba tae-i ǃaroma ǁore-ao-e ǂhanu-ai ti ra ǂgai?

⁶ Paulub ge ge mî, khoe-i ga Elob ǃnâ ǂgom, o i “ǁî-i di ǂgoms ǃaroma ra ǂhanu-ai” kaihesa. (Rom. 4:⁠5) Paulub ge ge ǀaro: “ǁNā-amagab ge Davida ǁnā khoe-i ǁî-i di sîsenga xus ose, xawe Elob xa ǂhanu-aise ra ǀkhaehe-i di ǃgâiaǂgaob xa nēti ra mî: ‘ǀKhaehen ge hâ ǁnān ǃûǂamde ǀûbahe tsî ǁoren âna ǃgū-aibahe hâna; ǀKhaeheb ge hâ ǁnā khoeb, Elob xa ǁîb di ǁore-i xare-e ǃgôabahe tamaba.’ ” (Rom. 4:​6-⁠8; Psa. 32:​1, 2) Elob ge ǁnān ǁîb ǃnâ ra ǂgoman di ǁorena ǀûba tamas ka io ra ǃgū-ai. ǁÎb ge ǁnā khoena ǁîn ǂgoms ǃgao, ǁore-o tamas ka io ǂhanu-aise ra mû.

7. Tae-i ǃaroma da a mî ǁkhā, ǃkharuge ǃoaba-aon Elob din a ǂhanu-aisa?

⁷ Abrahammi, Davidi tsî nau ǂgomǂgomsa ǃoaba-aon ge Elob xa ǂhanu-aise gere mûhe xawen ge noxoba ge ǁore-ao-i. Elob ge ǁîna ǁîn ǂgoms ǃgao, ǁore-o khoen ase gere mû, ǃgōsase ǁîba ǃoaba tama khoen ǀkhab gere ǀgopeǀnō o. (Efe. 2:​12) Romeǁîna ǃoab ge xoa sîǂkhanis ǃnâb ge Pauluba ge ǁguiǃā, Elob ǀhōsa kai ǂgao da ga o da ǂgomsa nî ūhâsa. Tsî Davidi tsîn ge ge Elob ǀhōsa-i ǁîb ge ǂgomsa ūhâ-i amaga. Sida tsîn ge a Elob ǀhōsa kai ǁkhā, ǂgomsa da ga ūhâ o.

8-9. Kherkheb ǂgae-ǂgui-aona tae-e Paulub tsî Jakobub tsîkha di xoadi xa ge mî? Tsî tae-i ǃaroma?

⁸ ǂGui kurigan ge kherkhen ǂgaeǂgui-aona ǂgoms tsî sîsengu a taes xa gere ǃhoa. ǂGomdi ǂgaeǂgui-aogu ge ra ǁkhāǁkhā, sâuhe ǂgao da ga, o da Jesub Xristub ǃâ ǀgui nî ǂgomsa. ǀNîsi du ge ǁîn, “Jesuba ūǃoa i sâuhe” ti hâ mîde ra mî  hîna ge ǁnâu. Kherkhen ǂgaeǂgui-aon ge ǀnîsi Paulub ge mî mîdi tsîna ra sîsenū: ‘ǁÎ-i di sîsenga xus ose, xawe Elob xa ǂhanu-aise ra ǀkhaehe.’ (Rom. 4:⁠6) Xawen ge nauna ra mî, kherkhega sari tsî ǃgâi xūna nau khoena dības ǃnâ-ūts ge a “sâuhe” ǁkhā ti. ǁÎn ge īǁkhā î ga o Jakobub 2:​24 sa ra sîsenū, mî rasa: ‘Khoe-i ǂgomsa xu ǀgui tama, xawe ǁî-i di sîsenga xu Elob xa ra ǂhanu-ai kaihe.’

⁹ Nē ǃkharagagu ǂgom ǀgaugu xa î ge kherkhen ǂgaeǂgui-aona gere ǂâi, Paulub tsî Jakobub tsîkha ǂgoms tsî sîsengu xa hâ ǂâiǀgaub xa ra ǁnâusāgusa. Kherkhen ǂgaeǂgui-aon ge ra mî, Paulub gere ǂgomsa khoe-i ǁî-i ǂgoms xa ra ǂhanu-ai kaihe ǃkhaisa, sîsengu xas ose. Xaweb Jakobuba ra mîsa, sîsengu a ǂhâǂhâsasa Elob xats ga ūǃoahe ǂgao o. ǀGui ôaǃnâ-aob ge ra mî: “Jakobub ge ge ǁnâuǃā tama hâ i Paulub ge tae-i ǃaroma gere mîsa, khoe-i ǁî-i ǂgoms ǃnâ-ū ǀgui a ǂhanu-aisa tsîb ge Jakobuba, Paulub ǁguiǃā ǀgauba ūǃoa tama hâ isa.” Xaweb ge Jehovaba Paulub tsî Jakobub tsîkha ge mîmā îkha nē mîde Elobmîs ǃnâ xoa. (2Tim. 3:​16) ǁNās ǀkha da ge Paulub tsî Jakobub tsîkha ge xoa xūna ǁnâuǃā ǁkhā. ǁÎkha ge tae-i tsîna sîǂkhanidi ǃnâ a xoasa da ge ǂōrisase ôaǃnâ tsî a ǁnâuǃā ǁkhā.

10. Pauluba mâ ‘sîsenga’ gere ǃhoaǃgao? (Romeǁîn 3:​21, 28) (Ai-īsiba mû re.)

¹⁰ Romeǁîn 3 tsî 4ǁî danaǃâra ǃnâb ge Pauluba gere mî “sîsenga” tae-e ǃoa ra ǁnaeǁgau? ǁÎb ge Sinaiǃhommi ai gere māhe Moseb ǂhanub di “sîsengu” xa gere ǃhoa. (Khomai re Romeǁîn 3:​21, 28 sa.) ǁGauhe ras ǃoagu i ge Jode Xristeǁîna  gere ǂgom, Moseb ǂhanuban noxoba nî sao ǃkhaisa. ǁNās ǀkhab ge Pauluba Abrahammi aiǁgausa gere sîsenū, ǁgau rase khoe-i ‘ǂhanuba’ î ga sao, o ǀgui ǂhanu-aise Elob xa mûhe tama hâ ǃkhaisa. Paulub gere ǁguiǃās ge, ǂgomsa da ge nî ūhâ. Nēs ge kaise ǂkhâǃnâxa, ǁkhāǁkhā da î ra amaga Elob tsî Xristub ǃnâ ǂgomsa ūhâs ǃnâ ǀgui da nî ūǃoahesa.

11. Jakobuba “sîsengu” tib ge mî, o tae-e ǃoa gere ǁnaeǁgau?

¹¹ Jakobub 2ǁî danaǃâs ǃnâ ra ǃhoahe “sîsengu” ge Paulub gere mî sîsenga ǃoa ǁnaeǁgau tama. Jakobub gere mî sîsengu ge Xristeǁîn tsēkorobe ra dī xūna ǃoa gere ǁnaeǁgau. Nē dīgu ge ra ǁgau, Xristeǁîn ama ǂgomsa Elob ǃnâ ūhâsa tamas ka io ūhâ tamasa. Jakobub ra sîsenū ǀgam aiǁgau ra xa ǂâi re.

12. Jakobuba matis ǂgoms tsî sîsengu tsîna ra ǃgûǀhao ǀgauba gere ǁguiǃā? (Ai-īsiba mû re.)

¹² ǂGuro aiǁgaus ǃnâb ge Xristeǁîna gere mîba, în tā khoen ǁaegu ǀgorasa ūhâ. ǁÎb ge nēsa aob hîna ǃkhū hâ khoe-e khoexaǃnâse ra hâ-ūb tsî ǀâsa khoe-e khoexaǃnâ tamase ra hâ-ūb di aiǁgaus xa ra ǃhoa. Jakobub gere ǁgaus ge nē khoeb ge ǂgomsab ūhâ ti a mî ǁkhā xawe ǁîb di sîsenga tae-e ra ǁgau? (Jak. 2:​1-5, 9) ǀGamǁîseb ge Jakobuba ‘sara-i tsî ǂû-i tsîna ūhâ tama ǃgâsa-e,’ hui tama ǃgâsa-i xa ra ǃhoa. ǁÎ-i ga ǂgomsa i ūhâ ti mî xawe ǃgâsa-e hui tama io, o î ge ǁî-e ra ǁgau ǂgomsa i ūhâ tamasa. Jakobub ge ge xoa, ‘ǂgoms ge sîsengu ose ǁō hâ.’​​—⁠Jak. 2:​14-⁠17.

13. Jakobuba mâ aiǁgaute gere sîsenū, ǂgoms sîsengu ǃnâ-ū ra ǁgauhes xa? (Jakobub 2:​25, 26)

¹³ Jakobub ge ge xoa Raxabs a ǃgâi  ­aiǁgausa ǂgomsa sîsengu ǃnâ-ū ǁgaus disa. (Khomai re Jakobub 2:​25, 26 sa.) ǁÎs ge Jehovab xa ge ǁnâu tsî ge mûǂan ǁîb Israelǁaesa ra huisa. (Jos. 2:​9-11) ǁÎs sîsengu ǃnâ-ū ǂgomsa ǁgau tsîs ge 2 Israelǁaes ǃkhē-aokha ǁkhōǁkhōsa mâsib ǃnâ ge hui. Nē sîsengu ǃnâ-ūs ge Israelǁaes di tama khoesa, ǂgomsa Abrahammi khami ge ǁgau. Raxabs aiǁgausa xu da ge ra ǁkhāǁkhāsen kaise i a ǂhâǂhâsasa, î-i sida ǂgomsa sîsengu ǃnâ-ū mûhe ǁkhā.

14. Paulub tsî Jakobub tsîkha di mîde mati ge ǀguiǃnâxa i?

¹⁴ Elobmîs xoa-aokha Paulub tsî Jakobub tsîkha ge ge ǁgau, ǂgoms tsî sîsengu ǁaegu i ǃkharagagusiba hâsa. Paulub ge Jode Xristeǁîna gere mîba Jehovab xan Moseb ǂhanuban ra ǁnâuǀnam amaga ǀgui ūǃoahe tidesa. Tsîb ge Jakobuba gere ǁgau Xristeǁîn ǂgoms, nauna ǃgâi dības ǃnâ-ū nî mûhesa.

15. Mâ ǀgaugu ǃnâ da ǂgomsa sîsengu ǃnâ-ū a ǁgau ǁkhā? (Ai-īsiba mû re.)

¹⁵ Jehovab ge mî tama hâ ǂhanu-aise da ga mûhe ǂgao, o da Abrahammi ge dīs ǁkhāsa nî dīsa. ǂGui ǀgaugu ǃnâ-ū da sida ǂgomsa ǁgau ǁkhā amaga. ǀHaohâb ǃnâ ǀasase ra hā khoena da ge ǁkhoreǁhare, ǂhâsiba ūhâna a hui. Tsî omaris ǃnâs tsîna khoexaǃnâsiba ǁgau ǁkhā. Elob ge nē ǀgauga ūǃoa tsî amabes ǃnâ nî ǀkhae. (Rom. 15:⁠7; 1Tim. 5:​4, 8; 1Jhn. 3:​18) ǂHâǂhâsa ǀgaub sida ǂgomsa da a ǁgau ǁkhāb ge, ǁkhoaǂgaoxase aoǁnâ sîsenni ǃnâ ǁhaosa. (1Tim. 4:​16) Jehovab ge mîmâin nî ama īsa da ge sida ǂgoms tsî sîsengu ǃnâ-ū nî ǁgau. Tsî î ǁîb ǀgauga a ǃgâisa. Nēna da ga dī, o da ge ǂgomǃgâsiba  ūhâ Elob ǂhanu-ai khoen ase nî mûda sa tsî da nî ǁîb ǀhōsa kaisa.

16. ǃÂubasensa mati Abrahammi ǂgoms ǀkha gere ǃgûǀhao?

¹⁶ Romeǁîn 4ǁî danaǃâs ge Abrahamma xu da ra ǁkhāǁkhāsen, ǀgui ǂhâǂhâsa xū-e ra ǁkhāǁkhāda. ǁNās ge ǃâubasensa ūhâsa. Jehovab ge ge mîmâi Abrahammi ǃnâ-ūb ‘hoaraga ǃhaode’ nî ǀkhaesa. Abrahammi ūhâ buruxa ǃâubasens xa mûnan-ai re. (Gen. 12:⁠3; 15:⁠5; 17:⁠4; Rom. 4:​17) Abrahammi ge 100 kurixa-i tsîs ge Sarasa 90 kurixa-i xawes tsîna ra ge noxoba mîmâihe ge ǀgôaba ge hō tama hâ i. Khoesi mûǂuiba xu î ge Abrahammi tsî Saras tsîn ǀgôaba nî hōs ī tide xū-i khami ge mûsen ǁkhā. Nēs ge Abrahamma kaise gere ǃâitsâ. Abrahammi ge ‘ǂgui ǁaedi di îseb’ nî hō mîmâis ai gere ǂgomǃgâ. (Rom. 4:​18, 19) Tsî î ge Abrahammi ge ūhâ-i ǃâubasensa ge dīǀoaǀoahe. ǁÎb ge ge Isaki di ǁgû kai, ǂgui kurigab ge ǃâubasen hâ-i ǀgôaba.​​—⁠Rom. 4:​20-⁠22.

17. Mati da a ǂan Elob ǀhōsa-i ase da ǂhanu-ai ǁkhāsa?

¹⁷ Sida tsîn ge Abrahammi khami Elob xa ūǃoahe tsî ǂhanu-ai khoen ase mûhe ǁkhā. Paulub ge nēs xa ge ǀomǀomǃgao saorase: “Tsî di ge mîdi “Elob ge Abrahamma ǂhanu-ai kai” ti ra mîde ǁîb ǃaroma ǀgui ge xoahe tama hâ i, xawe sada hîa nî ǂhanu-ai kaihe da ǃaromas tsîna. Sada hîa ǁnāb, Jesub sada ǃKhūba ǁō hâna xu ge ǂkhaiǂkhaib ǃnâ ra ǂgomda.” (Rom. 4:​23, 24) Abrahammi khami da ge Jehovab ǃnâ ǂgomsa nî ūhâ, ǃgâi sîsenga nî dī tsî ǂgomǃgâsiba nî ūhâ Jehovab ge mîmâi xūn nî ama īsa. Paulub ge aiǃgû tsî Romeǁîn 5ǁî danaǃâs ǃnâ sida ǃâubasens xa ra ǃhoa. Saora ǁkhāǁkhāǃâs ǃnâ da ge nēs xa ǃnāsase nî ǃhoaǃgao.