1. Xristeǁî-aoba tae-e nî dī îb ǃgâiǃgâ?

 GAO-AOB Davib ge Salomoba ge mîba: ‘ǀGaisa îts aose ī.’ (1Gao. 2:​1-⁠3) Hoa Xristeǁî aogu ge nētsē ǁnā ǀapemāsa nî sîsenū. ǁNāsa dīs ǃaroma gu ge Elob di ǂhanuba ǁkhāǁkhāsen tsî Elobmîs di daoǁgaude nî sîsenū, ǁîgu di ûib hoab ǃnâ. (Luk. 2:​52) Tae-i ǃaroma i a ǂhâǂhâsa îgu ǂkham ǃgâsaga Jehovaba a ǀnam aore-khoekai?

2-3. Tae-i ǃaroma i a ǂhâǂhâsa îb ǂkham ǃgâsaba gagasise kai?

² Xristeǁî aorekhoeb ge ǂgui ǂhâǂhâsa ǃereamde omaris tsî ǀhaohâb ǃnâ ra dani. ǃGâsago ǂgomǃgâsiba da ge ūhâ, hanîǁaeb ǃnâ go nî ūhâ ǃereamdi xa go ra ǂâiǃgâsa. ǀNîsi go ge a mîǁgui ǁkhā Jehovaba ǀoasase ǃoaba tamas ka io ǀhaohâb hui-ao kai. Tsî ēga ǀhaohâb ǃûi-ao kai. Tsî ǀnîsi ǃgamme tsî ǀgôana ūhâ. (Efe. 6:⁠4; 1 Tim. 3:⁠1) Nē mîǁguiga sīǃnâs ǃaroma go ge Jehovaba ǀnam Xristeǁî kai. b

³ Tae-e nî huitsi îts Jehovaba a ǀnam Xristeǁî kai ǁkhā? Tamas ka io kai gagasise kai ǀoa hâ Xristeǁî kai? ǂHâǂhâsa ǂansats ge nî ǁkhāǁkhāsen tsî ǁnā xū-e kaise nî dī. Tae-ets a dī ǁkhā îts hānîǁaeb ǃnâts nî ūhâ ǃereamdi ǃaroma aiǂhumisen tsî ǁnā ǁgaumâide ǃgâise dī?

4. Mâpats ǁgae ǁkhāts a ǃgâi aiǁgaude hō ǁkhā? (Ai-īsiba mû re.)

⁴ ǃGâi aiǁgaude ǁhûi tsî ǁgae re. Elobmîs ge ǂkhamkhoegu a ǁgae ǁkhā ǃgâi aiǁgaude ūhâ. Nē khoegu Elobmîs ǃnâ hâ gu ge Eloba ge ǀnam i tsî ǃkharagagu ǃereamde ge ūhâ i Elob di khoena kōǃgâs ǃnâ. Sadu omaris  tsî ǀhaohâb ǃnâs tsîna du ge ǃgâi aiǁgaude ūhâ, Xristeǁî aogu hîna Jehovaba a ǀnam ga. (Heb. 13:⁠7) Tsî go ge ǀoasa kurusa ūhâ khoeb Jesu Xristub aiǁgausa xu a ǁkhāǁkhāsen ǁkhā. (1 Pet. 2:​21) Nē aiǁgaude gu ǃgâise ra ǁkhāǁkhāsen ǀgaub ai mâǂoa ra ǀgauga ǃgaoǃgâ re. (Heb. 12:​1, 2) Tsî mîǁgui re mati gu nē aoga nî ǁgae ǀgausa.

5. Matits sa ǂâis ǁkhāsiba omkhâi ǁkhā tsî tae-i ǃaromas ǁnāsa a ǂhâǂhâsa? (Psalmdi 119:⁠9)

⁵ Omkhâi tsî ‘ǂuru gā-aisiba . . . ǃkhōǀgaipe.’ (ǂKhm. 3:​21) ǂUru gā-aisiba ūhâ aorekhoeb ge ǃkhaese xū-e dī tama hâ xawe ǃgâise ra ǂâiǃgâ dīb nîs aiǃâ. ǁNā-amaga ǃgarise sîsen re i ǁnā ǁkhāsiba hō tsî ǃkhōǀgara. Tae-i ǃaroma? ǃNāsa ǂkham khoegu nē ǃhūbaib ǃnâ hâ gu ge, ǁîgu mîǁguina ǂâiǀgaugu tamas ka io tsâ gu ra ǀgaus ai ra dī. (ǂKhm. 7:⁠7; 29:​11) Muvin tsî internets tsîn ge sa ǂâiǀgauba a tsâǀkha ǁkhā. Xawe matits ǂâis ǁkhāsiba a omkhâi ǁkhā? ǂGurose, Elobmîsa xu Jehovab mati tsâ tsî ra ǂâisa ǁkhāǁkhāsen re. Tsî ǁnāpaxū ǂâi re tae-i ǃaroma i ǁîb ta mî xūna sats ǃaroma a ǃgâisa. ǁNās khaoǃgâ ǁkhāǁkhāsents go xūna sîsenū tsî Jehovaba ra ǂkhîǂkhî ǃgâi mîǁguiga dī re. (Khomai re Psalmdi 119:⁠9 sa.) Nē ǀgaub ǃnâ ǂâisats ga ǁkhāǁkhāsen, o i ge kaise nî supu gagasise ǀgaisa Xristeǁî ao kaisa. (ǂKhm.  2:​11, 12; Heb. 5:​14) ǃGaoǃgâ re mati-i sa ǂâiǀgauba ǃgâise sîsenūsa saora mâsigu ǃnâ a huitsi ǁkhā ǀgauba: (1) ǃgâsadets ra hâ-ū ǀgaub tsî (2) ana tsîts ra tanîsen ǀgaub ǃnâ ǃgâi mîǁguiga dīsa.

6. Mati-i ǂâis ǁkhāsiba ǂkham ǃgâsaga a hui ǁkhā î gu ǃgâsade ǃgôasiba ǁgau?

⁶ Sa ǂâiǀgauba ǃgâise sîsenūs ge nî huitsi îts ǃgôasiba tare khoete ǁgau. Aiǁgause ǂkham ǃgâsab ge ǀnîsi ra ǁgau nē ǃgâsas xab a ǃgâibahesa tsîb ǁîsa ǃgâise ra ǂan ǂgaosa, ǃgammeba ǂâis ǃnâ ūhâse. Xawe ǂkham khoeb hîna ǁîb ǂâis ǁkhāsiba ra sîsenūb ge, sore ǂgaob tamab hâ ǃgâsas, tamas ka io ǃgammebab ǁkhoreba tama hâ ǃgâsasa ǂhanu tama ǀgaub ǃnâ, ǁîb mîn tsî dī xūn ǃnâ hâ-ū tide. (1 Tim. 5:​1, 2) ǃGâsas ǀkhab  ga ǂangu ǁaeb aib ge ǁîs ǃgâi ǀonsa nî ǁkhauba tsî ǁîs ǀkha ǀguri hâ tide khoen mû tama hâ hîna.​​—⁠1 Kor. 6:⁠18.

7. ǂÂis ǁkhāsiba mati ǂkham ǃgâsaba a hui ǁkhā ana ǀgaub tawa i ga hā o?

⁷ Jehovab ǂâiǀgauba go ǁkhāǁkhāsen ǂkham khoeb ge, ǁîb ra ana xūn ǃnâ-ū a ǁgau ǁkhā ǂhanu mîǁguigab ra dīsa. Khoen hîna nētse sarana ǂom tsî ra ǁgauǂuin ge, Jehovaba ǃgôasiba ūhâba tama hâ. Tsîn ge ǁîna ǁgauoǃnâ ûiga ra ûi. ǁÎn di ǁgauoǃnâ ûib ge ǂaera saran hînan ta anan, tamas ka io aore khoegu tare khoedi khami ra mûsen anaǀgaub ǃnâ-ū ra mû-e. Jesuba ra ǁgae ǂkham ǃgâsab ge amase nî ǂâi Jehovab tae-e ra ǂgaoǀkhā bisa. Tsî nî dītsâ ǁîba ǁgaesa. ǁÎb ge a dîsen ǁkhā: ‘Ti mîǁguiga ra ǁgau ǁnâuǃāxasiba ta ra sîsenūsa tsî ta nauna ǃgôasiba ra ǁgausa? Ti ana ǀgauba nauna ra ǁgau amase ta Eloba ra ǃoabasa?’ (1 Kor. 10:​31-​33; Tit. 2:⁠6) ǁÎb ǂâiǀgauba ǃgâise ra sîsenū ǃgâsab ge, ǃgâsan xa ǀgui ǃgôahe tide xawe ǁîb di ǀhomsi ǁGûb xas tsîna ǃgôasiba nî ǁgauhe.

8. ǂKham ǃgâsaba mati ǂgomǃgâhe ǁkhāb asa ǁgau ǁkhā?

⁸ ǂGomǃgâhe ǁkhāts asa ǁgau re. ǂGomǃgâhe ǁkhāb asa ra ǁgau ǃgâsab ge, māheb hâ ǃereamde ra dīǀoaǀoa. (Luk. 16:​10) Jesub di aiǁgausa ǃgaoǃgâ. ǁÎb ge ǂgomǃgâhe ǁkhāb asa hoaǁae gere ǁgau. Jesub ge Jehovab ge mîmābi xūn hoana ge dī, nēs ge ǀnî ǁaega ǃgom ī xawes tsîna. Jesub ge khoena kaise ge ǀnam-i, ǃgōsase ǁîb di ǁkhāǁkhāsabega. Tsîb ge ǁîba ǁnās ǀkha māsenxase ǁîb ûiba ǁîn ǃaroma ge mā. (Jhn. 13:⁠1) ǁNās ǀkha Jesuba ǁgaes ǃnâ-ū māhets ta ǁgaumâidi hoade dī re. Nēsats mati nî dīsats ga ǀū, o nau ǃgâsagu ai huiba ǂgan re. Nēs ǃnâ-ūts ge ǃgamǃgamsenxasiba ra ǁgau. Tā māhets hâ ǁgaumâidi ǃnâ ǂkhari ǃârogu ǀguiga dī. (Rom. 12:​11) ǁNās ǀkha sa ǁgaumâis ǃnâ “khoe-i ǃaromas ose xawe ǃKhūba ra sîsenba khami sîsen re” tsî ǁîsa dītoa. (Kol. 3:​23) Tsî ǂâis ǃnâ ūhâ re ǀoasasets kuruhe tama hâ amagats ge a dīsa ǁkhā. ǁNās ǀkha māsenxase sa dīsāde mûǂan re.​—⁠ǂKhm. 11:⁠2.

9. ǂKham ǃgâsaba mati ǃomnan ǀkha sîsensa a ǁkhāǁkhāsen ǁkhā?

⁹ Gagasise ǀgaisa Xristeǁî kai ǂgaots ga, ots ge tsēkorobets ûib ǃnâ sîsenū ǁkhā xūna nî ǁkhāǁkhāsen. Nēs ge nî huitsi îts ǀhaohâb ǃnâts ta hō ǁgaumâide dī, sîsen-i tamas ka io omaris ǃnâ ǃgâi ǀhosagusisa naun ǀkha ūhâ. Saora xūnats ge a ǁkhāǁkhāsen ǁkhā.

10-11. ǂKham ǃgâsab ga ǃgâise khomai tsî xoa ob mati ǁîb tsî ǀhaohâb tsîna ǁnāsa xu ǃgâiba nî ho? (Psalmdi 1:​1-⁠3) (Ai-īsiba mû re.)

¹⁰ Khomais tsî xoas tsîna ǁkhāǁkhāsen re. Elobmîs ge ra ǁgau ǃgâiaǂgao tsî  ǃgâiǃgâxa khoeb ge tsēs hoasa Elobmîsa khomai tsî ǃgamse ra ǂâiǃgâ. (Khom­ai re Psalmdi 1:​1-⁠3 sa.) Elobmîsats ga tsēs hoasa khomai, ots ge Jehovab di ǂâiǀgauba nî ǁkhāǁkhāsen. Tsî ǁnās ge nî huitsi îts ǃgāsa tsî ǁnâuǃāxa ǂâiǀgaub ǃnâ ǂâi. (ǂKhm. 1:​3, 4) ǁNāti i ǀgauga ūhâ khoegu ge ǀhaohâb ǃnâ ǂhâhe hâ. Tae-i ǃaroma?

¹¹ ǃGâsan ge Elobmîsa xu ǁkhāǁkhā tsî ra daoǁgau ǃgâsaga ǃoa ra kō. (Tit. 1:⁠9) ǃGâise khomai tsîts ga xoa, ots ge ǂgomsa ra ǀgaiǀgai ǃhoade mā tsî omkhâi ra ǃereamdi tsîna ǁîn ǀkha a ǀgoragu ǁkhā. ǁKhāǁkhāsents ta khamits ge ǀhaodi, ǂkharis kai ǀhaodi tsî ǀkharib kai ǀhaodi dawas tsîna huitsi ǁkhā xūna xoamâi ǁkhā. Nēts ra xoamâi xūn ge sa ǂgomsa nî ǀgaiǀgai tsîts ge naun tsîna a ǂkhâǃnâ ǁkhā.

12. Tae-e ǂkham khoeba a hui ǁkhā îb khoen ǀkhab ta ǃhoa ǀgauba ǃgâiǃgâi?

¹² Khoena ǃgâ tsîts ǁîn ǀkha nî ǃhoa ǀgauba ǁkhāǁkhāsen. Xristeǁî aob ge khoena ǃgâ tsî ǁîn ǀkha ǁkhāǁkhāsensa nî ǂan. Khoen ǀkha ra ǃhoahe ǀgauba a ǂan khoeb ge naun ta ǃhoa ǁaeb ai ǂorisase ǃgâ tsî ǁîn di tsâsigu tsîna ra ǁnâuǃā. (ǂKhm. 20:⁠5) ǁÎb ge khoen dommi ra ǀō ǀgaub, ais di ǁgâiǂuisens tsî ǁî-i ra tanisen ǀgaub tsîna a kō ǁkhā. Xawets ge nēsa khoen ǀkha hâǀhaos ǃnâ ǀgui a ǂan ǁkhā. ǃNās hoasats ga selfoni ǃnâ-ū khoen ǀkha ga ra ǃhoa. Os ge ǁnāsa nî ǃgombatsi. ǁNās ǀkha hoaǁae ǃēde ūhâ re, khoen ǀkha ǀguiba hâǀhaosa.​​—⁠2 Jhn.12.

13. ǂKham khoeba tae-i tsîna nî ǁkhāǁkhāsen? (1 Timoteub 5:⁠8) (Ai-īsiba mû re.)

¹³ Marisise kōǃgâsensa ǁkhāǁkhāsen. Gagasise ǀgaisa Xristeǁî khoeb ge marisise aitsama kōǃgâsen tsî ǁîb omaris tsîna nî kōǃgâ ǁkhā. (Khomai re 1 Timoteub 5:⁠8 sa.) ǀNî ǃhūgu ǃnâ gu ge ǂkham khoega ǁgûb, tamas ka io ǀnî hâ khoe-e xu ǃom sîsenga ra ǁkhāǁkhāsen. Tsî ǀnî ǃhūgu ǃnâ gu ge ǂkham khoega ǃgâi ǂansa ra omkhâi ǂguiǃnâgu ǀgaugu ǃnâ, tamas ka io skoli ǃnâ gu hâ hîna xūna ra ǁkhāǁkhāsen. Mati i ga ī xawe i ge kaise a ǃgâi xū-e ǁkhāǁkhāsensa, îts marisise kōǃgâsen ǁkhā. (ǃNǃkh. 18:​2, 3; 20:​34; Efe. 4:​28) ǃGarise sîsen tsî tsoatsoats go xū-e dītoa re, khoen ge nēsa mû tsî nî ǀgapiǀgôatsi. Nēs ge nî huitsi sîsen-e hō tsî gāxūse sîsen ǀgarasa. Nē da go ǃhoaǃgao ǀgaugu tsî ǂans hînats go omkhâigu ge a ǂhâǂhâsa gagasise ǀgaisa Xristeǁî  kai ǂgaots ga o. Nēs ge hānîǁaeb ǃnâ nî hâ ǁgaumâide dīs ǀkha nî huitsi. Hā re î da saorase hānîǁaeb ǃnâts nî hō ǁgaumâide ǃhoaǃgao.

14. ǂKham ǃgâsaba mati a aiǂhumisen ǁkhā îb ǀoasase ǃoaba?

¹⁴ ǀOasase Jehovaba ǃoabas. ǂGui ǂkham khoegu ge Jehovaba ǀoasase ǂkhamsis ǃnâ ge ǃoaba tsoatsoa. Aimâba-aose sîsens ge ǂkham khoeba a hui ǁkhā, îb ǁkhāǁkhāsen matib ǃkharagaǃnâgu khoen ǀkha nî sîsenǀhao ǀgausa. Tsîb ge ra ǁkhāǁkhāsen matib mari-e nî sîsenū ǀgausa. (Fil. 4:​11-​13) ǀOasase ǃoabas di mîǁguibats ga ūhâ, ots ge ǂgurose huiǃnâ ra aimâba-aose a sîsen ǁkhā. ǂGuin ge huiǃnâ ra aimâba-aose ǁaeroba ra sîsen. Nēs ǁîna aimâba-aose sîsens ǃaroma ra aiǂhomi xui-ao. Aimâba-aosets ga ǃoaba tsoatsoa, ots ge ǂgui ǃēde ūhâ ǀnî hâ ǀgaugu ǃnâs tsîna Jehovaba ǃoabasa. Aiǁgause oms sîsengu, ǂnûiǃkhuni bēros, tamas ka io Betels tawa.

15-16. Tae-e ǂkham ǃgâsaba a hui ǁkhā îb ǀhaohâb hui-aob tamas ka io ǀhaohâb ǃûi-aob ase ǃoaba?

¹⁵ ǀHaohâb hui-aob tamas ka io ǀhaohâb ǃûi-aob ase ǃoabas. Hoa Xristeǁî ǃgâsagu ge nî dītsâ ǀhaohâb hui-aob, tamas ka io ǀhaohâb ǃûi-aob ǂgao­ǀkhā­de sīǃnâsa. Elobmîs ge ra mî khoegu hîna ǃereamde ra ǂhâba gu ge, nē “ǃereamsa ra tura.” (1 Tim. 3:⁠1) ǀHaohâb ǃûi-aob aseb nî ǃoabas aiǃâb ge ǃgâsaba ǂgurose, ǀhaohâb hui-aob ase nî ǁgaumâihe. ǀHaohâb hui-aogu ge ǃûi-aoga ǂgui ǀgaugu ǃnâ ra hui. ǀHaohâb ǃûi-aogu tsî hui-aogu tsîn ge ǃgamǃgamsenxasib ǀkha, ǃgâsana ra hui tsî ǁkhoaǂgaoxases tsîna aoǁnâ sîsenni ǃnâ ra ǁhao. ǂKham ǃgâsagu ge ǀhaohâb hui-aose a ǃoaba ǁkhā 20 kurigu ǃnâ gu hâ hîna. Tsîb ga ǃgâise dī, ob ge ǃkhae ǁaeb ǃnâ ǀhaohâb ǃûi-aob ase a ǁgaumâihe ǁkhā.

¹⁶ Matits nē ǁgaumâide sīǃnâ ǁkhā? Elobmîs ge omkhâi ǁkhāts a ǀgauga ra ǁgau. Xawe ǂâis ǃnâ ūhâ re, nē ǀgaugu ge Elobmîs, Jehovab omaris tsî ǀhaohâb tsînats ūba hâ ǀnammi ai ǃgaoǃgaosa. (1Tim. 3:​1-13; Tit. 1:​6-⁠9; 1Pet. 5:​2, 3) ǁGūtsâ tsî mâ ǂgaoǀkhās hoasa ǂōrisase ǁnâuǃā. Tsî Jehovab huiba ǂgan re ǁnā ǂgaoǀkhāde sīǃnâsa. c

17. ǂKham ǃgâsaba mati ǃgame-aob tamas ka io omaris danab ase aiǂhumisen ǁkhā? (Ai-īsiba mû re.)

 ¹⁷ ǃGamme-aob tsî omaris danab ase. Jesub ge ǁguiǃā khami i ge ǀnî ǂkham khoega ǃgamme tamase hâ. (Mat. 19:​12) Xawets ga ǃgammesa mîǁgui, ots ge ao tsî ra omaris dana kai. (1 Kor. 11:⁠3) Jehovab ge ra ǃâubasen îb aoba ǁîb tarasa ǀnam tsî ǁîsa sorosise, ǁîs tsâsigu tsî gagasises tsîna kōǃgâ. (Efe. 5:​28, 29) ǃHoaǃgaohe go ǀgaugu, ǂans, ǂâiǀgauba omkhais, ǃgôasiba tarekhoede ǁgaus tsî ǂgomǃgâhe ǁkhāts a ǃkhaisats ga ǁgau o i ge a huitsi ǁkhā sa ǃgammeb ǃnâ. Nēn ge nî huitsi ǃgâi ǃgamme-ao tsî omaris dana kaisa.

18. ǂKham ǃgâsaba mati a aiǂhumisen ǁkhā dadasa kaib nîs aiǃâ?

¹⁸ Dadasab. ǃGammeb khaoǃgâts ge ǀnîsi a dadasa kai ǁkhā. Tae-ets Jehovaba xu a ǁkhāǁkhāsen ǁkhā îts ǃgâi dadasa kai? ǂGui xūnats ge a ǁkhāǁkhāsen ǁkhā. (Efe. 6:⁠4) Jehovab ge ǃkhō-oa tamase, ǁîb ǀgôab Jesuba ge mîba ǁîbab a ǀnam tsî ra ūǃoa ǃkhaisa. (Mat. 3:​17) Dadasa kaits ga o dītsâ tsî hoaǁae sa ǀgôana mîba re, ǁînats a ǀnamsa. ǁÎn ga ǃgâi xū-e a dī, o tā ǃkhō-oasen ǁîna koasa. Jehovab aiǁgausa ra ǁgae dadasa gu ge ǀgôana ra hui, în ǀgaisa Xristeǁî-ao tsî tara kai. ǀNai nēsi aiǂhomisen re ǁnān hîna sa omaris tsî ǀhaohâb ǃnâ hâna ǀnamma ǁgausa. ǁÎnats a ǀnam tsî ra ǃgôaǃgâsa mîdi ǃnâ-ū nēsi ǁgau re. (Jhn.15:⁠9) Nēs ge amase nî huitsi îts hanîǁaeb ǃnâ ǃgâi-ao tsî dadasa kai. Sats ge kaise Jehovab omaris tsî ǀhaohâba ǃoabas ǃnâ nî ǀō-aisa ǀkhae.

19-20. Tae-e ǂkham ǃgâsaga a hui ǁkhā i gu gagasise ǀgaisa Xristeǁî kai? (Tsoatsoas ai hâ ai-īsiba kō re.)

¹⁹ ǂKham ǃgâsago ǁaeba go ge nî ū, Jesuba ǁgaesa. ǁGae ǁkhāts a ǃgâi aiǁgaude ôa, ǃgâi ǂâiǀgauba omkhâi, ǂgomǃgâhe ǁkhā, xūna ǁkhāǁkhāsen tsî hanîǁaeb ǃaroma aiǂhomisen re.

²⁰ Sîsen aits nî xūn hoan xats ga ǂâi, ots ge ǀnîsi a tsâ ǁkhā nēna sīǃnâs a ǃgom ti. Xawe dīhō ǁkhāts ge a. ǂÂis ǃnâ ūhâ re, Jehovab ge māsenxase ra huitsi ǂgao. (Jes. 41:​10, 13) Tsî ǀhaohâb ǃnâ hâ ǃgâsan tsîn ge a huitsi ǁkhā. Jehovab ǂhâba hâ Xristeǁî-ao kaits ga, ob ge sa ûiba kaise nî ǁkhoaxa. ǂKham ǃgâsago kaise da ge a ǀnam go. Ab Jehovaba sago ra dī sîsen-e ǃnāǂamsase ǀkhae, gagasise ǀgaisa Xristeǁî-ao kai go ra khami.​—⁠ǂKhm.  22:⁠4.