1. Gagasise da ga kai ǂgao, o da tae-e nî dī?

 KAISE i ge a buruburuxa ǀgôa-i ra kaikhoe kai ǀgauba mûsa. Nē kaisis ge aitsamaba xu hâ. Xawe Jesub aiǁgausa ra sao Xristeǁî kai ǂgao da ga, o da ge ǁguiǂgāsen tsî xū-e nī dī. b (1Kor. 13:​11, Heb. 6:⁠1.) ǁNā mîǁguiba sīǃnâs ǃaroma da ge Jehovab ǀkha ǀgū ǀhōsagusisa nî ūhâ. ǁÎb ǃanu gagab tsîna da ge ǂhâhâ îb huida î da ǁîba nî ǂkhîǂkhî ǀgauga omkhâi. Tsî aiǂhumisen hānîǁaeb ǃnâ da nî ūhâ ǃereamdi ǃaroma.​​—⁠ǂKhm. 1:⁠5.

2. Tae-e da Genesis 1:​27 sa xu ra ǁkhāǁkhāsen? Tsî tae-e da nē ǁkhāǁkhāǃâs ǃnâ nî ǃhoaǃgao?

² Jehovab ge khoena aore tamas ka io tarese ge kuru. (Khomai re Genesis 1:​27 sa.) Supu i ge a mûǃāsa aorekhoegu tsî tarekhoedi tsîn ǃkharagaguse kurusa ǃkhaisa. Xawen ge ǀkhara ǀgaugu ǃnâs tsîna ǃkharagagusiba ūhâ. Aiǁgause, Jehovab ge aob tsî taras tsîna ge kuru i-ī mâ-i hoa-e ǁî-i ǃâba dīǀoaǀoa. ǁNā-amagan ge ǀgaugu tsî ǂans tsîna ǂhâhâ hîna nî hui nîna ǁîn ǃâga dīsa. (Gen. 2:​18) Nē ǁkhāǁkhāǃâs ǃnâ da ge nî ǃhoaǃgao tae-es ǂkham ǃgâsasa nî dīsa is gagasise ǀgaisa Xristeǁî tarekhoe kai. Tsî saora ǁkhāǁkhāǃâs ǃnâ da ge tae-e gu aore ǂkham ǃgâsaga nî dīsa nî ǃhoaǃgao.

3-4. ǂKham ǃgâsade mâpa ǁgae di nî aiǁgaude a hōǁkhā? (Ai-īsiba mû re.)

³ Elobmîs ge ǂgui taradi hîna Eloba ǃoaba tsî a ǀnam di  xa ra ǃhoa. Dana xoas ra mî khami di ge ǁîde ǀgausa ûiba ūhâ tsî a ǂgomǂgomsa dī di ra xūn hoan ǃnâ. ǁNās ǂam-ai di ge ǃgâsade ǁîdi ǀhaohâb ǃnâ hâ, Xristeǁî taradi hîna Jehovaba a ǀnamte xu ǂgui xūna a ǁkhāǁkhāsen ǁkhā.

⁴ ǂKham ǃgâsaso ǂâi re mâ ǃgâsadi ǃgâi aiǁgaute so a ǁgae ǁkhāsa. ǁÎdi ǀgauga ǃgaoǃgâ tsî ǁnāpaxu ǂâiǃgâ re, mati so ǁnā ǀgauga a ǁgau ǁkhāsa. Sao ra xoaǀgoradi ǃnâ da ge ǃnona ǂhâǂhâsa ǀgaugu ǃgâsadi nî omkhâi ga nî ǃhoaǃgao.

5. ǃGamǃgamsenxasiba tae-i ǃaroma gagasise a ǀgaisa Xristeǁî tarade a ǂhâǂhâsaba?

⁵ Jesub aiǁgausa ǁgaes ǃaroma da ge ǃgamǃgamsenxasiba ǂhâhâ. Tarekhoes ge ǃgamǃgamsenxas ga o ǃgâi ǀhōsagusisa Jehovab tsî naun ǀkha ūhâ ǁkhā. (Jak. 4:⁠6) Aiǁgause, tarekhoes hîna Jehovaba ǀnams ge ǃgamǃgamsenxase 1Korinteǁîn 11:⁠3 ǃnâ xoasa daoǁgausa ra sao. ǁNāpab ge Jehovaba ra ǁguiǃā ham-eb ǀhaohâba tsî omarisa kōǃgâs ǃereamsa mā hâsa. c

6. Tae-e di ǂkham ǃgâsade ǃgamǃgamsenxasib xa Rebekasa xu a ǁkhāǁkhāsen ǁkhā?

⁶ Rebekas aiǁgausa ǃgaoǃgâ re. ǁÎs ge gā-ai tarekhoes hîna ge ǁîs ûib hoab ǃnâ ǁkhoaǂgaoxase mîǁguiga dī tsî ǂan isa matis tsî mâǁaes nî tanisen ǃkhaisa. (Gen. 24:​58; 27:​5-17) Xawes ge khoe ǃgôaxa tsî daoǁgaude gere sao. (Gen. 24:​17, 18, 65) Jehovab di ǂnûiǂgāde du ga Rebekas khami ǃgamǃgamsenxase ǂkhâǃnâ, o du ge sadu omaris tsî ǀhaohâb ǃnâ ǃgai aiǁgause nî ī. ǀNî hâ ǀgaub hînan hoa Xristeǁîna ǂhâhâb ge ǀnōsa mûǂuiba sats xa ūhâsa. Elobmîs ge ra mî ǃgamǃgamsenxasib ge gā-aisiba ra ǃaroma.

7. Mati di ǂkham ǃgâsade Estersa a ǁgae ǁkhā ǃgamǃgamsenxasiba ǁgaus ǃnâ?

⁷ ǃGamǃgamsenxasib ge hoa Xristeǁîn ǂhâhâ ǀgauba. Elobmîs ge ra mî “ǃgamǃgamsens ge gā-aisiba ra ǃaroma.” (ǂKhm. 11:2) Esters ge ǃgamǃgamsenxase tsî Eloba  ǂgomǂgomsase gere ǃoaba. ǃGamǃgamsenxas ge ī amagas ge ge ǀgapiǂâixa tama hâ i gao-ao kais ge o. ǁÎs omeb ǀgôab Mordikaib xas ge māhe ǀapemāsa ǃgâ tsî ge ge sao. (Est. 2:​10, 20, 22) ǁKhā ǀgauba du ge nau khoen dawa ǃgâi ǀapemāsa dî tsî sîsenǂuis ǃnâ-ū a dī ǁkhā.​​—⁠Tit. 2:​3-⁠5.

8. 1Timoteub 2:​9, 10 tsîna mati tarekhoede ra hui, i di gā-ai mîǁguiba sara anab tsî îxa-îxasens ǃnâ dī?

⁸ Esters ge ǃgamǃgamsenxasiba ǀkhara ǀgaugu ǃnâs tsîna ge ǁgau. ǁÎs ge îsa ǂkhamkhoes îsa sorosa ge ūhâ isa. Xawes ge khoen hoan nî mûsi ǀgaub ǃnâ ge tanisen tama hâ i. (Est. 2:​7, 15) Matis Xristeǁî ǃgâsasa Esters aiǁgausa xu ǃgâiba hō ǁkhā? ǀGui ǀgaub ge 1 Timoteub 2:​9,10 ǃnâ hâ. (Khomai re.) Apostel Paulub ge nēba Xristeǁî ǃgâsade ra mîba î di Eloba ǃgôasiba ra ǁgau ǀgaub ǃnâ ana. Xrikeǁî mîs nēba ra sîsenūhes ge ra ǁgau tarekhoes ǃamku ǀgaub ǃnâ nî anasa. Tsîs hoaǁae ǃgôasiba nî ǁgausa nau khoen ǁîs ra ana xūn xa mati ra ǂâi tsî ra tsâsa. Kaise da ge a ǂnīsa ǃgâsadi hîna nē ǀapemāsa sao tsî ǃamkuse ra ana di xa.

9. Tae-e da Abigails aiǁgausa xu a ǁkhāǁkhāsen ǁkhā?

⁹ ǂAnsa ūhâs ge ǀkhara ǀgaub hîna di ǃgâsade a ǁgau ǁkhāba. ǂAnsa ūhâsa tae-a ra ǂâibasen? ǂAnsa ūhâs ge ra ǂâibasen mâ-i a ǂhanu tsî mâ-i ǂhanu tamasa ǂans tsî ǂhanu xū-e dīsa ǂansa. Abigails aiǁgausa ǃgaoǃgâ re, ǁîs aob ge ǁgai mîǁguiba ge dī, hîna ge hoa omarisa gere tsâǀkhāba. Abigails ge ǁkhā ǁaeb ai xū-e ge dī. ǂHanu xū-e dīsās ge ge ǁnâuǃā tsî ûiga ge sâu. (1Sam. 25:​14- 23, 32-35) ǂAnsa ūhâs tsîn ge ra huida, i da ǂan mâǁae da nî ǃhoa tsî mâǁae da nî ǃnōsa. Nēs ge ra huida i da ǀnōsa ǀgauba ūhâ, naun ǃnâ da ga ǃgâiǃgâibasensa ǁgau o.​​—⁠1Tess. 4:⁠11.

10-11. ǃGâise khomais tsî xoasa xu-i mati sas tsî nau khoen tsîna ǃgâiba a hō ǁkhā? (Ai-īsiba mû re.)

¹⁰ Xristeǁî ǃgâsas ge ǀnî xuna nî ǁkhāǁkhāsen. ǀNî xun hînas tare ǀgôasa ǁîs ǀgôasis ǃnâ ra ǁkhāǁkhāsenan ge ǁîs ûib ǃnâ nî huisi. Sao ra aiǁgaude ǃgaoǃgâ re.

¹¹ Khomai tsî xoasa ǁkhāǁkhāsen re. ǀNî ǃhaodi ǃnâ i ge khomai tsî xoasa ǂhâǂhâsa tama hâ tarekhoedi ǃaroma. Xawe i ge a ǃgâi tsî ǂhâǂhâsa în hoa Xristeǁîna khomâi tsî xoasa ǁkhāǁkhāsen. d (1Tim. 4:​13) ǁNā-amaga ǃgom i ga xawe aiǃgû re i ǁkhāǁkhāsen ǀgara. Tae-i ǃaroma? ǁNās ge a huisi ǁkhā is sîsen-e hō. Tsî i ge nî supuba si Elobmîsa ǁkhāǁkhāsen tsî  nauna ǁkhāǁkhāsa. ǁNās ǂam-ais tsînas ge Jehovaba nî ǀgū, Elobmîsa khomâi tsîs ra ǂâiǃgâ ǁaeb ai.​​—⁠Jos. 1: 8, 1Tim. 4:⁠15.

12. Tae-es ǂKhoamîdi 31:​26 sa xu ra ǁkhāǁkhāsen?

¹² ǃGâise ǃhoa tsî ǂōrisase ǁkhāǁkhāsen re. Kaise i ge a ǂhâǂhâsa Xristeǁî-i ǁnāsa dīsa nî ǁkhāǁkhāsensa. ǁKhāǁkhāsabeb Jakobub ge ǃgâi ǀapemāsa ge māda, mî rasa: “ǃGâs ǃnâ ǃhae xawe ǃhoas ǃnâ ǂau.” (Jak. 1:​19) ǃGâise du ga ǃgâ naun ra ǃhoa hîna, o du ge ‘ǀkhomxaǃnâsiba’ ra ǁgau. (1Pet. 3:⁠8) Khoe-i ra mî xu-e du ga ǃgâise ǁnâuǃā tama i, o ǂhâbasa dîna dî re. ǁNāpaxu ǁaeba ū re ǃhoa du nîs aiǃgâ. (ǂKhm. 15:​28) Dîsen re, ‘nēsi ta nî mî xū-e ama tsî ǂkhâǃnâxa-e? Nē xū-e ǃgôasiba ra ǁgau?’ ǃGâsadi hîna ǃgâise ǃhoa tsî ra ǃgâde xu ǁkhāǁkhāsen. (Khomai re ǂKhoamîdi 31:​26 sa.) ǁÎdi ra ǃhoa ǀgauba ǃgaoǃgâ. Nē ǀgaugas ra ǁkhāǁkhāsen khami i ge naun ǀkhas ūhâ ǀhōsagusisa nî ǃgâi.

13. Matis omarisa kōǃgâsa a ǁkhāǁkhāsen ǁkhā? (Ai-īsiba mû re.)

¹³ Omsa kōǃgâsa ǁkhāǁkhāsen re. ǃNāsa ǁaeba di ge tarekhoede oms sîsenga ra kōǃgâ. Sa mamas tamas ka io ǀkhara ǃgâsas ge nē sîsen-es nî dī ǀgausa a ǁkhāǁkhāsi ǁkhā. Sendi ti ǀon hâ ǃgâsas ge ra mî: “ǃGôaǃgâ ta ra ǀkhaegu di ǀguib ti mamas ge mādeb ge, ǃgari sîsen-e xu ra hā ǃgâiaǂgaoba ǁkhāǁkhātesa. Sâis, ǃanus, ǂoms tsî xūna ǁamas ge ti ûiba ge supusupu tsî ge huite i ta ǃnāsana Jehovab ǃoabas ǃnâ dī ǁkhā. Mamas ge ǃhaokhoeǃkhōǃoaxasib tsîna ge ǁkhāǁkhāte. Tsî nē ǀgaub ǃnâ ta ge ǂgui ǀnamǀnamsa ǃgâsana ge ǀhao-ū. Hîna ǃgâi aiǁgaute ūhâna ǁgae ǁkhāta ana.” (ǂKhm. 31:​15, 21, 22) ǃGari sîsen-ao tsî ǃhaokhoeǃkhōǃoaxa tarekhoes ge ǀkhaeb ase ǁîs omaris tsî ǀhaohâb ǃnâ ī.​​—⁠ǂKhm. 31:​13, 17, 27; ǃNǃkh. 16:⁠15.

14. Tae-es Kristel ge ǃkharuǃnâ xū-e xu a ǁkhāǁkhāsen ǁkhā? Tsî tae-e du ǂâis ǃnâ nî ūhâ?

¹⁴ Aitsama xuna dīsa ǁkhāǁkhāsen. Kaise i ge a ǂhâǂhâsa în Xristeǁîna aitsama xūna dīsa ǁkhāǁkhāsen. (Fil. 4:​11) Krestal ti ǀon hâ ǃgâsas ge ra mî: “ǀGapi skola ǃoa ta ge ī, o ra ge ti ǁgûra ge ǂkhâǃnâte î ta ti ûib ǃnâ hānîǁaeb ǃnâ nî huite xūna ǁkhāǁkhāsen. Ti dadab ge ge ǀkhomate î ta, sîsen ǃkhaib ai i mari-e ra sîsenūhe ǀgauba ǁkhāǁkhāsen ǁnās ge kaise ge huite.” Sîsen-e hōs ǃaroma ǁkhāǁkhāsens ǂam-ais ge nî ǁkhāǁkhāsen, matis mari-e gā-aise nî sîsenūsa, îs tā ūs hâs xa ǃnāsase sîsenū. (ǂKhm. 31:​16, 18) Jehovab ǃoabas ǃnâs a sīǃnâ ǁkhā xūn ai ǂâisa ǂui tsî ǂanapega surudeba xu ǂgōsen. Tsî ūs hân ǀkha ǂâu î ǀgui ǃgupu ûiba ûi.​​—⁠1Tim. 6:⁠8.

15-16. Tae-i ǃaromadi ǃgamme tama ǃgâsade kaise a ǀō-aisa? (Markub 10:​29, 30)

¹⁵ Jehovaba ra ǂkhîǂkhî ǀgaugu tsî sa ûib ǃnâs nî sîsenū ǀgauga ǁkhāǁkhāsens, ge nî huisi ûib ǃnâs ega nî dī mîǁguigu ǀkha. Saora aiǁgaudi hîna a huisi ǁkhāte kō re.

¹⁶ ǃGamme tamase ǁaero-e hâsas ge mîǁgui ǁkhā. Jesub ge mî khami i ge ǀnî ǃgâsade a mîǁgui ǁkhā, ǃgamme tamase hâsa. ǀGuri hâs ga ǁîn ǃhaodi ǃnâ ǃgôaǁnâhe xawe. (Mat. 19:​10-12) Tsî ǀnî di ge ǀkhara xun xa ǃaroma-e hâse ǃgamme tama hâ. ǂÂis ǃnâ ūhâ re Jehovab tsî Jesub tsîn ge ǃgamme tama hâ Xristeǁîna ǃgôaǁnâ tama. ǃHūbaib ǂhābase i ge ǃgamme tama ǃgâsade kai ǀkhaeb ase i ǀhaohâgu ǃnâ. Nauna di ǀnam tsîra tsâba amaga di ge ǂguina ǃgâsadi tsî ǁgûdi ase ība.​​—⁠Khomai re Markub 10:​29, 30 sa. 1Tim. 5:⁠2.

17. Matis ǂkham ǃgâsasa ǀoasase ǃoabas ǃaroma nēsi a aiǂhumisen ǁkhā?

¹⁷ ǀOasase Jehovaba ǃoaba. Xristeǁî ǃgâsadi ge ǃhūbaib ǂhabase ǃnāsase aoǁnâ sîsen-e ra dī. (Psa. 68:​11) Nēsis ge a ǀapeǁgui ǁkhā ǀoasase aoǁnâ sîsen-e dī, ǁnaetisa aimâba-ao kai tsî om sîsengu ǀkha hui tamas ka io Betels tawa sī ǃoabasa. Sas go dī mîǁguib xa ǀgore re. ǃGâsan hîna ge ǁnāti ī mîǁguiba sīǃnân ǀkha ǃhoa re. Tsî ǂanǂui tae-es nî dīs a ǂhâbasasa ǀoasase ǃoabas ǃaroma. Tsî ǁnāpaxu sīǃnâ hōs nî ǀapeǁguiba dī re. ǀOasases ga ǃoaba tsoatsoa, os ge ǂgui aiǂhanuga Jehovab di ǀapeǂhumis ǃnâ a ūhâ ǁkhā.

18. Tae-i ǃaromas ǂkham ǃgâsasa ǃgammes nî aoba ǃgâise nî ǁhûi? (Ai-īsiba mû re.)

¹⁸ ǃGammes nîsas ge a ǁhûi ǁkhā. ǀGaugu tsî ǂans hîna da go ǃhoaǃgao gu ge nî huiso iso ǃgâi tarakai. ǃGamme ǂgaos ga, o gagasise ǀgaise khoe-e ǃgamme re, kaise ǂhâǂhâsa mîǁguigu di ǀguib hînas nî dīb ge. ǂÂis ǃnâ ūhâ re ǁhûis go aob di daoǁgautes ge nî sao. (Rom. 7:⁠2. Efe. 5:​23, 33) Dîsen re: ‘Nē ta ra ǃgamme ǂgao khoeba dītsâ ib ra Jesub khami ǂâi tsî tanisen? Jehovabab ǁîb ûib ǃnâ ǂgurose ra mâi? Gā-ai mîǁguigab ra dī? Dīsāb ga, ob dīb go xū-e ra ǂanǃgâ? Tarekhoedeb ǃgôasiba ūba hâ? Jehovab ǀkha ta ūhâ ǀhōsagusisa ǀgaiǀgais ǀkhab nî huite? Ti sorosi  ǂhâsigab nî kōǃgâ hō tsîb nî ti ǃgâi ǀhōsa kai? ǁÎb ǀhaohâb ǃnâb ūhâ ǃereamteb ǃgâise ra dī? Aiǀǁgause, mâ ǁgaumâideb ǀhaohâb ǃnâ ūhâ tsî matib ǁîte ra kōǃgâ?’ (Luk. 16:​10, 1Tim. 5:⁠8) Ama as ge ǃgâi-aobas ga ra ǂhâba, os ge sas tsîna nî ǃgâi tara i.

19. Tae-i ǃaromas tarasa a ǂkhî ǁkhā, ǁîs aob “hui-aose” ǂgâihesa?

¹⁹ Elobmîs ge ra mî ǃgâi taras ge ǁîs aob “hui-ao” tsî ǁîb di “anusasi.” (Gen. 2:​18) Nēsa tarasa ra ǃgôaǁnâ? Hî-i, taras a hui-ao amagas ge ra ǃgôa-e. Elobmîs ge ǀnî ǁaegu ai Jehovaba ǃoa “hui-aob” ase ra ǁnaeǁgau. (Psa. 54:⁠4. Heb. 13:⁠6) Taras ge a ama hui-ao, ǁîs aobas ga ra ǂkhâǃnâ o. Aiǁgauseb ga omaris ǃaroma mîǁguiga dī, os ge ǁîb ǀkha ǀguiba ra sîsenǀhao i gu nē mîǁguiga omaris ǃgâib ase ī. Jehovabas a ǀnam amagas ge ǁkhās a-e ra dī. Tsî nau khoena ra hui în ǁîs aob di ǃgâi ǀgauga mû. (ǂKhm. 31:​11, 12. 1Tim. 3:​11) Nēsis ge ǃgâi tara kais ǃaroma a aiǂhumisen ǁkhā. Jehovabas ūba hâ ǀnamma ǀgaiǀgai, oms tsî ǀhaohâb ǃnâ nau khoena huis ǃnâ-ū.

20. ǁGûsa mati ǁîs omarisa a hui ǁkhā?

²⁰ Mamasa kai ǁkhās ge a. ǃGamme toa ro ga, o ro ge ǀnîsi ǀgôana a ūhâ ǁkhā. (Psa. 127:⁠3) ǁNā-amaga i ge a ǃgâi ǂâisa tae-i a ǂhâbasasa ǃgâi mamasa kais ǃaroma. Nē ǁkhāǁkhāǃâs ǃnâ da go ǃhoaǃgao ǀgaugu tsî ǂans tsîn ge nî huisi, is ǃgâi tara tsî mamasa kai. ǀNamxaǃnâ, ǃgâi tsîs ga ǃnūǃnâxa os ge as omarisa ra hui în ǂkhîba ūhâ. Tsî sa ǀgôana ra hui în ǃnorasa tsî ǀnam-e hâse tsâ.​​—⁠ǂKhm. 24:⁠3.

21. Mati da sida di ǃgâsadi xa ra tsâ tsî tae-i ǃaroma? (Tsoatsoas ai hâ ai-īsiba kō re.)

²¹ ǃGâsaso kaise da ge a ǀnam so, hoa xūn hîna so Jehovab tsî ǁîb khoena ra dīban ǃaroma. (Heb. 6:​10) ǃGarise sîsen tsî so ge ǀgaugu tsî ǂans tsîna ra omkhâi. Tsî so ge saso ǂnamipe hâ khoen ûigu ǃnâ ǃgâiaǂgaoba ra hau. Tsî hānîǁaeb ǃnâ so omaris ǃnâ nî dī xūn ǃaroma ǃgâise ra aiǂhomîsen. Jehovab ǀapeǂhumis ǃnâ so ge kaise a ǀō-aisa.