Amase du ge nē ǂgui ǀkhaegu Jehovab ra mā du gu ǃnâ ra ǃgâiǃgâisen. Tsî du ge ra ǃgôaǃgâ mā-am dub ra sa î du, aitsama ǁhûibasens ǁkhāsiba nē ǀkhaegu ǃnâ sîsen-ū. Elobmîs ǃoagu, xûi-i i ge Eloba xu hâ ǀkhaeba: “ǃGâi ǂû-i ge khoe-e ra ǃgâiaǂgao kai, tsî ǂauxûi-i ge khoe-e ra ǃgâiǃgâisen kai.” (Aoǁn. 10:​19; Psa. 104:​15) ǀNîsi du ge ǀnî khoena mû hâ xûi-i ǀkha ǃgomsiba ūhâna. ǃHubaib ǂhawasen ge khoena ǃkharagagu ǂâi ǀgauga xûi-i xa ūhâ. Xawe tae-e Xristeǁîna hui ǁkhā în gā-ai mîǁguiga xûi-i xa dī.

Mîǁguiga da ga dī o da ge ra mā-am, îb Elob ǂâi ǀgauba sida di ǂâi ǀgauba daoǁgau. Tsî da ge sida ǂnamipe hâ khoen ǂâi ǀgauga mā-am tama hâ i gu sida daoǁgau. Nēti i ǀgauga ūhâs ge nî hui da î da ǂkhîsa ûiba ūhâ.

ǀNîsi du ge ǃgaoǃgâ hâ ǂgui khoen ǃhubaib ǂhawase xûi-e kaise ra āsa. ǀNîn ge ǀnîsi xûi-e ra ā ǃnomsase i ra tsâ kai nî amaga. Naun ge ra ā în ǁîn ǃgomsin xa ǂâiǂhânsen ǀû. Tsî ǀnî khoen ge ra ǂâi, kaise ra ā khoen gā-ai tsî a ǀgaisa ti.

Xristeǁîn ge gā-ai daoǁgausa ǁîn di ǀnamxaǃnâ Kuru-aoba xu ra hō. Aiǁgauseb ge, kaise ās xa ǃaromahe ǁkha ǁgai xūna ra mîba da. ǀNîsi du ge ǂKhoamîdi 23:​29-35 ǃnâ i ǃgâu hâ khoe-e ra dī xuna khom­âi hâ tsî ǃgomsin hîna ǁnās xas tsîna ǃaromahe hâna. a Europab ǃnâ hâ ǀhaohâb ǃûi-aob ge Xristeǁî kaib nîs aiǃâ ge ǁîb ûib ǃnâ ī xū-i xa ra ǂâi-oa: “Kaise ta ge gere ā tsîs ge ǁnāsa ge ǃaroma i ta ǁgai mîǁguiga dī. Tsî ta ge ǁgai xūna ge hōǃâ hîna ra ǂkhîoǃnâ kaitena ǁîn xa ta ga ǂâi o.”

Mati-i Xristeǁî-e aitsama ǁhûibasens ǁkhāsiba ǃgâise sîsenū tsî kaise xûi-e ās xa ǃaromahe hâ ǃgomsina xu a ǂgōsen ǁkhā? Elob di ǂâi ǀgauba da ge nî mā-am îb sida mîǁguiga daoǁgau.

Hā re i da kō tae-es Elobmîsa xûi-i xa ra mîsa tsî tae-i ǃaroman ǀnîna xûi-e ra āsa.

Elobmîs ge xûi-e āsa ǂkhā tama, ǁîs ge ra ǂanǃgâ xûi-e ās ra ǃgâiaǂgao kaisa. Elobmîs ge ra mî: “Sa ǂû-e ǂû î sa ǂauxûi-e ā re, ǃgâiaǂgaoxa ǂgaob ǀkha.” (Aoǁn. 9:⁠7) Jesub ge ǀnî ǁâudīb ai xûi-e ge ā tsîn ge ǀnî ǂgomǂgomsa ǃoaba-aon Jehovab din tsîna ǁkhā xū-e ge dī.​​—⁠Mat. 26:​27-29; Luk. 7:​34; 1Tim. 5:⁠23.

Elobmîs ǃnâ da ge ǃgāsa ǃkharagagusiba ra hō, xûi-e ās tsî ǀhoros ǁaegu. ǁNāpa î ge ǃgāsase ra mîhe: “Tā ǂauxûib sadu hoaraga ûiba nî hîkākāb xa ǀhoro.” (Efe. 5:​18) Mîs tsîna i ge ra di, “ǀhoroseman . . . ge Elob Gaosiba ǀumi tide.” (1Kor. 6:​10) Jehovab ge kaise ās tsî ǀhoros tsîna ǂkhā hâ. Tā da ge khoen xûi-i xa ǃhaoǃnâbe ǁnaetib ase ra dī mîǁguiga nî sao. Xawe da ge Jehovab ǂâi ǀgauba nēs xa nî ǃgôaǃgâ.

ǀNîn ge ra ǂâi kaisen xûi-e a ā ǁkhāsa ǀhoro tamase. Xawe ǁnās ge kaise a ǁkhōǁkhōsa. Elobmîs ge ǃgāsase ra mî kaise xûi-e ās ra “ǂauxûi-i di khobo” kai ǃkhaisa tsî i khoe-e dīsā tsî Jehovab ǀkha i ūhâ ǀhōsagusisa a ǁgaiǁgai ǁkhā ǃkhaisa. (Tit. 2:⁠3; ǂKhm. 20:⁠1) Jesub ge ge mî “kaise ās” khoe-e Elob ǀasa ǃhūbaiba ǀūmisa xu a  ǁkhae ǁkhāsa. (Luk. 21:​34-36) Tae-e Xristeǁî-e a hui ǁkhā i-î kaise xûi-e ās xa ra ǃaromahe ǃgomsina xu ǂgōsen?

Xûi-e ās mîǁguiba da ga dī, o i ge kaise a ǃaorosa, sida ǃhaodi ǃnân khoena xûi-e ra mû ǀgaub ai sida mîǁguiga dīsa. Xristeǁîn ge Jehovaba ra ǂkhî kai xūna ra dī ǂû-i tsî ās tawa i ga hā o. Elobmîs ge ra hōhōǃnâ da: “ǁNā-amaga dī du ran hoana, ǂû du kas, ā du kas hoasa Elob di ǂkhaisib ǃoa dī re.” (1Kor. 10:​31) Saora dîdi tsî Elobmîs daoǁgaude ǃgaoǃgâ re:

Xûi-e ta nauna ǂkhîǂkhîs ǃaroma ra ā? Eksodus 23:⁠2 ge ra mî: ‘Tā . . . ǃnāsa khoen, ǂhanu-aisiba ra mâǃoana sao-ai.’ Jehovab ge nē xoas ǃnâ Israelǁaesa gere ǃkhâikhom în tā ǁîba ǂkhîǂkhî tama khoena sao-ai. Nē ǃkhâikhoms ge ǃgâi ǀapemā nētsē hâ Xristeǁîn ǃaroma. Nau khoena da ga mā-am, în sida di ǂâi ǀgaugu tsî mîǁguigu tsîna dība da, o da ge ǁaeb ra ī khami Jehovab di daoǁgaudi ǃoagu ûisa nî ǀû. Tsî ǁîb ǀkha da ūhâ ǀhōsagusisa ǂoaǃnâ ǁkhā.​​—⁠Rom. 12:⁠2.

ǀGaisa ta a sa ǁgaus ǃaroma ta xûi-e ra ā? ǀNî ǃhaodi ǃnâ i ge ǃnās hoasa kaise xûi-e āsa ra ūǃoahe. (1Pet. 4:⁠3) Xawe ǃgaoǃgâ re 1 Korinteǁîn 16:​13 ge ra ǂkhâǃnâ da: “ǂKhaikari hâ, ǂgoms ǃnâ ǁaposase mâ, ǁkhoaǂgaoxa, î ǀgai.” Xûi-e khoe-e a hui ǁkhā î-i ǀgai? Hâ-a, xûi-i ge khoe-i di ǂâi ǀgaub tsî ǃgâi mîǁguiga dīs tsîna a ǂkhabuǂkhabu ǁkhā. ǁNā-amaga i ge kaise xûi-e āsa khoe-i a ǀgaisasa ǁgau tama, xawe i ge gâre i asa ra ǁgau. Jesajab 28:⁠7 ge ra ǁguiǃā, khoe-i ǂhanu daob ǃnâ ǃgû tama i tsî ra ǂgaremasa tsî ǁnās xa ǃaromahe hâse ǂhanu mîǁguiga dī tamasa.

Ama ǀgaib ge Jehovaba xu ra hā tsî ‘ǂkhaikari hâ tsî ǂgoms ǃnâ ǁaposase mâǀgaisa’ ǃkhōǂgā hâ. (Psa. 18:​32) Nēsa da ge ra dī ǁkhōǁkhōsa mâsiga xu ǂgōsen tsî ǃgâi mîǁguigu hîna sida ǀhōsagusis Jehovab ǀkha da ūhâsa ǁgaiǁgai tide ga ǁhûis ǃnâ-ū. Jesub ge ǀgaisa !hōsagusisa Jehovab ǀkha  ge ūhâ i. ǂGuin ge ǁîba ǁnās ǃaroma gere ǃgôa, ǁîb ge ǁkhoaǂgaoxa tsî ǂhanu xūna gere dī amaga.

Xûi-e ta ra ā i ta ti ǃgomsin xa tā kaise ǂâi ǂhansen? Psalms xoa-aob ge saorase ge xoa: “Ti ǂhani ra ǂâidi di ǃnāǂamsasib ǃnâ di ge sa [Jehovab] ǁkhaeǂgaode ǃnākhoesib âtaba ge khoakhoa.” (Psa. 94:​19) Xū-i ga ǂâiǂhansen kai du o, Jehovab ai ǂgomaiǂnûi re xûi-i ais ose. ǀGui ǀgaub hîna da nēsa a dī ǁkhāb ge ǃnāsa ǁaeba Jehovaba ǃoa ǀgoresa. ǂGuin ge gagasise ǀgaisa ǀhōsan ǀhaohâb ǃnâ hâna xu, ǀapemāde ôas xa ge huihe. ǃGomsina tanihō ǁkhās ǃaroma i ga khoe-e xûi-e ā, o i ge ǂhanu xū-e dīsa a ǂkhabuǂkhabu ǁkhā. (Hos. 4:​11) Danieli ais ai da go ǃhoaǃgao hâ ib ge ra mî: “ǀNî ǁaeb ai ta ge ǂâiǂhansen tsî ra ǀhapitsâsen. ǃGomsina sîsenǂams ǃaroma ta ge gere ā xawe i ge ǃnāsa ǃgomsina gere ǃaroma.” Tae-e Daniela ge hui? “Mûǂan ta ge ge Jehovaba ti ûib ǃnâ ǂhâhâsa, xûi-i ose. Jehovab huib ǀkha ta ge ti ǃgomsina ge tanihō ǁkhā i,” tib ge ra ǂanǃgâ. Jehovab ge hoaǁae hâ hui da nîse, sida ǃgomsin toa tide khami ga ra mûsen xawe.​​—⁠Fil. 4:​6, 7; 1Pet. 5:⁠7.

ǀNî ǁaegu ai du ga xûi-e ā, o du tae-i ǃaroma saora dîde dîsen tama: ‘Ti omaris ǁani-i tamas ka io ǀgū ǀhōsa-e xûi-e ta ra ā ǀgaub xa ǃhoa-ūte tsâ hâ?’ Ti i nî īs ga, o i ge ra ǁgau ǂanǃgâ tama ta ǃgomsiba ta ūhâsa. ǀNai ta gere ās xa ta ǃnāsase ra ā? ǁNās ge khoe-i hîna xûi-i ose hâ ǁoa i khami nî i. ‘Gaxuse xûi-i ose hâs xa ta a ǃgombahe?’ Ti i nî īs ga, o da ge xûi-i ǀkha ǃgomsiba ūhâ. Tsî du ge ǀnîsi ǁkhāǁkhāsen hâ khoena xu huiba ǂhâhâ i du ǁnā ǃgomsiba dan.

Xûi-i ǂgui ǃgomsina a ǃaroma ǁkhā amagan ge, ǀnî Xristeǁîna ge mîǀgui xûi-en ā tide ǃkhaisa. Tsî ǀnîn ge ra mîǁgui ān tidesa, xûi-i ǁkhoab xan ǃgâibahe tama amaga. Sadu ǀkha ra hâ khoe-i ga mîǁguiba dī, o  ǁî-e ǃgôasiba ǁgau re ǁî-i mîǁguiba ǃgôaǃgâs ǃnâ-ū, mîǁgaiǁgai tamase.

ǀNîsi du ge ge mûǂan gā-ai i nîsa matikō xûi-e du nî āsa mîǁguisa. Xristeǁî-i ge ǀnîsi nî mîǁgui, matikō ǃnāde i wekheb ǃnâ nî āsa. ǀGui ǃnāsa tamas ka io ǂûs ǁaebi ǀguisa? ǀNîn ge ge mîǁgui mâǃnôa xûi-i ǀgui-en nî āsa. Aiǁgause, ǂauxûi-i tamas ka io bier-e. Tsîn ge ǀnîna ge mîǁgui ǀgaisa xûi-en ā tidesa ǂhon xûi-i kas hoasa. Khoe-i ga ǃgāsase mati i ǀgaub ǃnâ i xûi-e nî āsa mîǁgui, o i ge nî supu ǁnāsa dīsa. Tsî ǂhâbasa tama i ge hâ gagasise ǀgaisa Xristeǁî-i nî ǂâiǂhânsensa, naun tae-e ǁî-i xa ra ǂâisa, nē mîǁguiba dī tsî i ga ǃkhōǀgara o.

Xûi-i xa hâ mîǁguiga da ga dī, o da ge naun mati ra tsâsa ǂâis ǃnâ nî ūhâ. Romeǁîn 14:​21 ge ra mî: “ǂHanu tama i ge hâ sa ǃgâsa-i di ǃnôas ǃaromats ǁgan-e ǂû tamas ka io ǂauxûi-e nî āsa.” Sadu xûi-e ra ā ǃkhais xan ga nauna ǁgaise tsâ kaihe, o i ge ǀnamma nî ǁgari du i du tā xûi-e ā. ǁNāsa ǂâis ǃnâ ūhâse du ge nau khoena ǃgôasiba ra ǁgau tsî ǁîn ǂhâsiga ǂgurose ra mâi sadu dib ōse.​​—⁠1Kor. 10:⁠24.

ǁNās ǂamais tsînab ge ǀnîsi ǂhanuba Xristeǁîna nî daoǁgau ǂhanuga ra mâi. Nē ǂhanub ge ǀnîsi a mî ǁkhā, matikō kurin ǀkhats xûi-e a ā ǁkhāsa tamas ka io ǃnari tsî ǀnî masin di ai sîsensa.​​—⁠Rom. 13:​1-⁠5.

Jehovab ge ǂgui îsa ǀkhaega mā da hâ. ǀGui ǀkhaeb ge mati da nē ǀkhaega nî sîsenūs ǃnōrasasiba. Nēs ge aitsama ǁhûibasens ǁkhāsib ǀkhaeba sîsenūsa ǃkhōǂgā hâ. Tae-e da nî ǂûs tsî tae-e da nî āsa da ga mîǁgui o. Agu sida mîǁguiga ǁgau, nē ǃnorasasiba da ra ǃgôaǃgâsa sida di ǀhomsi ǁGûba ǂkhîǂkhîs ǃnâu.