1. Tae-i ǃaromab ge Abrahamma aore ǀgôaba hōsa ǃâubasen ǀgara?

 JEHOVAB ge ǁîb ǀhōsab Abrahamma ge mîmâiba, hoaraga ǁaedi ǃhūbaib ai hâ di ǁîb ǃnâ-ū nî ǀkhaehesa. (Gen. 15:⁠5; 22:​18) Abrahammi ge ǀgaisa ǂgomsa Elob ǃnâ ūhâ i, amagab ge gere ǂgom Elob mîmâidi nî ama kaisa. Xaweb ge Abrahamma ge 100 kurixa i tsî ǁîb tarasa 90. Nē ǂgomǂgomsa khoe-aogu ra ge ǀgôa-e ge ūhâ tama hâ i. (Gen. 21:​1-⁠7) Elobmîs ge ra mî: “Abrahammi ge ǃâubasens tsî ǂgoms ǃnâ ǁîb ǃâubasensa mâtib ga mâsiba ǃâubasen-e ūhâ tama khami ī, xawe ge ǁgui. ǁNā-amagab ge ǂgui ǁaede ǁgûse ge ība.” (Rom. 4:​18) ǂAn du ase î ge Abrahammi ǃâubasensa ge dīǀoaǀoahe. ǁÎb ge ge Isaki dadasa kai. Tae-i ǃaromab ge Abrahamma ǂgomǃgâsiba ūhâ i Jehovab ǁîb mîmâisa nî dīǀoaǀoasa?

2. Abrahamma tae-i ǃaroma gere ǂgomǃgâ, Jehovab mîmâis nî ama īsa?

² Jehovab ǀkhab ge ūhâ-i ǀgū ǀhōsagusis xab ge Abrahamma ǀoasase ge ǂan i, “Elob mîmâib gena dīsa a ǁkhā ǃkhaisa.” (Rom. 4:​21) Jehovab ge Abrahammi ǀkha ge ǂkhî-i tsî ǁîb ǂgoms ǃaroma ǂhanu-aib a ti ge mî. (Jak. 2:​23) Romeǁîn 4:​18 go ǁgau khamib ge Abrahamma ǂgoms tsî ǃâubasens tsîna ge ūhâ i. Hā re î da nēsi ǃhoaǃgao, tae-eb ge apostel Pauluba ǃâubasens xa a mîsa Romeǁîn di 5ǁî danaǃâs ǃnâ i a xoasa khami.

3. Pauluba tae-e ǃâubasens xa ra ǁguiǃā?

³ Apostel Paulub ge ra ǁguiǃā, tae-i ǃaroma da a ǂgom  ǁkhāsa ‘nē ǃâubasens taotao tama hâsa.’ (Rom. 5:⁠5) ǁÎb ge huidas tsîna ra dī, î da ǁnâuǃā sada Xristeǁî ǃâubasens mati a ǀgai ǁkhāsa. Romeǁîn 5:​1-⁠5 kōse da ra ǃhoaǃgao khami ǂâi re, matis ge sadu ǃâubasensa hānîǁaeb ǃnâ ǁaeb ra ī khami a ǀgaiǀgaisasa. ǃHoaǃgao da nî xūn tsîn ge nî ǁgau, mati du sadu ǃâubasensa a ǀgaiǀgai ǁkhāsa nēsis xa. Hā re î da ǂgurose ǃhoaǃgao, îxa ǃâubasens Paulub ge taotao da tide ti a mîs xa.

4. Romeǁîn 5:​1, 2 ǃnâ i tae-e ra ǃhoaǃgao-⁠e?

⁴ Khomai re Romeǁîn 5:​1, 2 sa. Paulub ge nē mîde Romeǁîn di ǀhaohâba ǃoa ge xoa. ǁNāpa ge hâ i ǃgâsan ge Jehovab tsî Jesub tsîn xa ge ǁkhāǁkhāsen. ǁÎn ge ǁkhāǁkhāsenan ge xūn ǃnâ ǂgom tsî ge Xristeǁî kai. ǁNās ǀkhab ge Eloba ǁîna ‘ǂgoms ǃnâ-ū ǂhanu-ai kai,’ tsî ǁîn ai ǃanu gagaba ge ǁhōǂui. Jehovab ge ǁîna ǃanu gagab ǀkha ge ǂkhau. ǁÎn ge ǃgâi mādawa-amsa ǃoa ge mûǂui ǁkhā i tsî ǂgomǃgâsiba ge ūhâ i.

5. ǂKhauhesana mâ ǃâubasensa ūhâ?

⁵ Paulub ge ega ǂkhauhesa Xristeǁîn Efeses ǃnâ ge hâ-ina ǃoa, Elob xan ge māhe ǃâubasens xa ge xoaba. Nē ǃâubasens ge “ǀumis . . ǃanun” disa ge ǃkhōǂgā hâ i. (Efe. 1:​18) Paulub ge Koloseǁîn tsîna ge mîba, mâpan ǁîn di ǃâubasensa nî hōsa. ǁÎb ge “ǁnā ǃâubasens hîa du ǀhommi ǃnâ ūbahe hâs” ti ge mî. (Kol. 1:​4, 5) ǂKhauhesa Xristeǁîn di ǃâubasens ge, ǀhommi ǃnâ ǀamosib kōse Xristub di ǂgaeǂguis ǃnâ ǀguiba sī ǂgaeǂguisa.​​—⁠1Tes. 4:​13-17; J.ǂHa. 20:⁠6.

6. ǂKhauhesa ǃgâsaba tae-e ǁîb ǃâubasensa xa ge mî?

⁶ ǂKhauhesa Xristeǁîn ge nē ǃâubasensa kaise a ǀnam. ǃGâsab Frederick Franzi ǂkhauhesa ǃgâsab ge nēti ǁîb ǂgaoba xu ra mî: “Nē ǃâubasens ge nî ama ī tsî 144 000 ǀuniga ǁani-i ǁî-i di ­ǃâubasensa  nî hōs kōse nî dīǀoaǀoahe. Sida mādawa-ams ge kaise hoa xūn xa a ǃgâi.” Kurigab Eloba ǂgomǂgomsase ǃoaba toa hâs khaoǃgâb ge, ǃgâsab Franza 1991 kurib ǃnâ ǂanǃgâ tsî ra mî: “Noxoba da ge sida ǃâubasensa ǀû tama tsî nēsa kaise ra ǃgôaǃgâ . . . Nē madawa-ams ge ǃâusa anu hâ, miliun kuriga da ga ǃâu xawe. ǂGuros xa da ge nēsi sida ǃâubasens xa kaise ǃgâibahe.”

7-8. ǃNāsa khoena mâ ǃâubasensa ûhâ? (Romeǁîn 8:​20, 21)

⁷ ǂGuin hîna nētsē Jehovaba ra ǃoaban ge ǃkharagagu ǃâubasende ūhâ. Abrahammi ge ǁnā ǃâubasensa ge ūhâ i, ǀamose ûisa Elob gaosib ǂgaeǂguis ǃnāga. (Heb. 11:​8-10, 13) Paulub ge ǂkhaisib di ǀamǂoas hînan ǁnān nē ǃâubasensa ūhâna ǃâuhâs xa ge xoa. (Khomai re Romeǁîn 8:​20, 21 sa.) ǂGuro du ge Elobmîs di mîmais hānîǁaeb dis xa a ǁkhāǁkhāsen o, tae-e ǁnās ǃnâ ǃnāsase ge māǂoaba du? ǀGuitsē du ǀoasa kurusa nî ūhâ tsî ǁkhaba ǁore tide ǃkhaisa ge i? Tamas ka io ǁkhāǁkhāsen du ge o sadu ǀnamsaben hîna ge ǁōn ǁkhaba nî ûisa paradais ǃhūbaib ai? Nē “ǃâubasens” Elob ge mâ dus ge ǃgâi ǂgui xuna ra mûǂûi kai du.

⁸ Nēsi da ga ǀamo ûiba ǀhommi tamas ka io ǃhūbaib ai hō xawe da ge, ǂkhaisib di ǃâubasensa ūhâ hîna ǃaromasa ra mādasa î da ǃgâiaǂgao. Tsîb ge sada ǂgomǃgâsiba noxoba a ǀgai ǁkhā sada ǃâubasens ǃnâ. Saoraseb Pauluba ra xoas ge nî ǁguiǃā matis ǁnāsa nî īsa. Hā re î da kō tae-eb ra xoasa sida ǃâubasens xa. ǁÎb mîdi ge ra huida î da ǂgomǃgâsiba ūhâ ûib ǃâubasens hîna da ūhâs nî ama kaisa.

9-10. Paulub aiǁgaus ra ǁgau khami Xristeǁîna tae-e ǃâubasen ǁkhā? (Romeǁîn 5:⁠3) (Ai-īsiga mû re.)

⁹ Khomai re Romeǁîn 5:⁠3 sa. Paulub ge ge mî ǃgomsina da ga hōǃâ, o da ge ǂgomǃgâsiba a ūhâ ǁkhā sada ǃâubasens ǃnâ. ǁNās ge ǀnîsi nî buru kai da. Mati  ǀgui i ga ī xawen ge Xristub di saosabena ǁgâiǀāba nî ǃâubasen. Paulub aiǁgaus xa ǂâi re. ǁÎb ge ǁnān hîna Tessalonikas ǃnâ hâna ǃoa ge mî: “Sige gere ganupe ge noxopa sadu ǀkha hâ hîa sado ǃgôaǃgonhe ge nî ǃkhaisa mîba xui-ao; tsîs ge nēsa ǁnāti ge ī.” (1Tes. 3:⁠4) Tsî Korinteǁîna ǃoab ge ge xoa: “ǃGâsago, ǂgao ge ra ǃkhais ge sige ǀkha ī ǃgomsigu xa go nî ǂansa, .  sige ûib xa ge ge îganǀgēs kōse.”​​—⁠2Kor. 1:⁠8; 11:​23-⁠27.

¹⁰ Nētses di Xristeǁîn tsîn ge ǁgâiǀāba a ǃâubasen ǁkhā. (2Tim. 3:​12) O sadu? Jesub ǃnâ ǂgom tsî du ge ǁîba sao tsoatsoa, o ǃgôaǃgonhe tsâ i du ge hâ i? Sadu ǀhōsan tsî ǀaokhoen tsîn ge ǀnîsi gere ǃkhāǃkhā du. ǁÎn ge ǀnîsi ǁgaise gere ûi ūdu. Sadu ǂgomǂgomsasib hoa xun ǃnâ du ūhâba sadu sîsenni dawa ǃgomsina ge re ǃaroma? (Heb. 13:​18) ǂHanub xa mâǃoahesa du ge hōǃâ tsâ hâ i, sadu ǃâubasensa du naun ǀkhā ra ǀgoragu ǃkhais ǃaroma? Paulub ge ra mî, mâ ǀgaub ǀguib hoab ǃnâ da ga ǁgâiǀāba hōǃâ xawe da ge nî ǃgâiaǂgao. Tae-i ǃaroma?

11. Tae-i ǃaroma da ǃgomsigu ǃnâ mâǀgaisa nî mîǁgui?

¹¹ ǃGomsina da ga hōǃâ xawe da ge a ǃgâiaǂgao ǁkhā, nēs ǃgâi ǀgauga sida ǃnâ nî omkhâi ǃkhaisa da a ǂan amaga. Romeǁîn 5:⁠3 ra mî khami, “ǃgomsigu ra mâǃkharusa hā-ū.” Hoa Xristeǁîn ge ǃgomsina ra hōǃâ, ǁnā-amagan ge hoa Xristeǁîna mâǃkharus ǁkhāsiba nî ūhâ. Mâ ǃgomsigu ǀguiga da ga hōǃâ xawe da ge hoa da ǂhâhâ mîǁguisa î da mâǀgai. ǁNās ǃnâ-ū ǀgui da ge sada ǃâubasens nî dīǀoaǀoahe ǀgausa nî mû. ǁNān hîna ge Jesub di aiǁgaus ǃnâ gere mîhen khami da ge, ǃkhoms hîna ǃhub ai ra ǁnās khami ī ǂgao tama hâ. ǃGâiaǂgaob ǀkhan ge ǂgurose mîsa ra ūǃoa xawe “ûib ga a ǃgom tsî ǃgôaǃgonde a hā” on ge ra ǂkhabu. (Mat. 13:​5, 6, 20, 21) Amase i ge supu tama mâǃoahe tamas ka io ǃgomsina hōǃâsa. Xawe i ge sada ǃgâib kōse i ǁîna da ga mâǀgai tsî Jehovaba ǃoaba ǀgara o. Mâ ǀgaub ǃnâ?

12. ǃGomsin ǃnâ da ga mâǀgai, o da mâ ǃgâiba nî hō?

¹² ǁKhāǁkhāsabeb Jakobub ge ǃgomsinats ga mâǀgai ots ra hōǃâ ǀgaib xa ge mî: “ǁNā-amaga as sadu mâǁaposa dīǀoaǀoasa, î du dīǀoaǀoasase ī, xū-i xare-e tôasi tamase.” (Jak. 1:​2-⁠4) Jakobub ge mâǀgaisa sîsenni hînats ra dī i ase ge ǁguiǃā. Tsî mâǀgaub ǃnâs ǁnāsa nî dīǀoaǀoahe? Nēs ge hui du ǁkhā, i du ǃnāsase ǃnūǃnâxasib, ǂgoms tsî Elob ai ǂgomǃgâsa omkhâi. ǀNî ǂhâǂhâsa ǀgaub ǃnâs tsîna da ge ǃgâiba ra hō, ǃgomsina da ga hōǃâ o.

13-14. Mâǀgais ǃnâ-ū da mâ ǀgauga ra omkhâi? Tsî nēsa mati ǃâubasens ǀkha ra ǃgûǀhao? (Romeǁîn 5:⁠4)

¹³ Khomai re Romeǁîn 5:⁠4 sa. Paulub ge ra mî, mâǀgais “mā-amsa” ǀgaugu ǃnâ ra ǀamǂoasa. Sadu mâǀgais ge Jehovab mā-amsa ra hā-ū. Nēs ge ǂâibasen tama Jehovab sadu ǃgomsina ra hōǃâ ǃkhais xa ǃgâibahesa. Jehovab ge sado ra ūǃoa. Sadu mâǀgais ge mā-amsa mâsib ǃnâ ra ǀamǂoa. Nēb ge ama buruxa ǀkhaeba.​​—⁠Psa. 5:⁠12.

¹⁴ ǂÂihō î du ra, Abrahammi ge ǃgomsina hōǃâ tsî ǂgomǂgomsase gere mâǀgai, ob ge Jehovaba gere ǂkhî ǀgauba. Jehovab ge ǁîba ǂhanu-ai ǀhōsab ase gere mû. (Gen. 15:⁠6; Rom. 4:​13, 22) ǁNās ǁkhās khamib ge sida a ǀnam ǁkhā. Jehovab ge sada matikō sîsen-e ra dīs tamas ka io mâpa da ra ǃoaba bi ǃkhais ǃaroma ǀgui ǂkhî tama. Jehovab ge sida ǀkha a  ǂkhî, ǃgomsina da ga hōǃâ xawe da ga ǂgomǂgomsase hâ o. Hoa da ge a mâǀgai ǁkhā matikō kurixa, mâsigu tamas ka io ǁkhāsiga da ga ūhâ xawe. Nēsi du ra hōǃâ ǃgomsin ǃnâ du ǂgomǂgomsase ra mâǀgai? Ti-i nî īs ga o, ǂâis ǃnâ ūhâ Jehovaba du kaise ra ǂgâiaǂgao kaisa. Jehovab sada ǀkha ǂkhî ǃkhaisa da ga ǂan, os ge ǁnāsa sida ǃâubasensa a ǀgaiǀgai ǁkhā.

15. Pauluba tae-e Romeǁîn 5:​4, 5 ǃnâ ge mî? Tsî nēsa tae-e a ǂâi kai da ǁkhā?

¹⁵ Jehovab ge sida ǀkha a ǂkhî ǁîb ǃoagu da ga ǂgomǂgomsase hâ ǀgara tsî ǃgomsigu ǃnâ mâǀgai o. ǃGaoǃgâ re Paulub mati aiǃgû tsî ra mîsa: ‘Mā-ams ge ǃâubasensa ra hā-ū, tsî nē ǃâubasens ge taotao tama.’ (Rom. 5:​4, 5) Nēs ge ǀnîsi ǃgāsa tama. Tae-i ǃaroma? Aisib go Pauluba Romeǁîn 5:⁠2 ǃnâ mî khamin ge, ǁnā Xristeǁîn hîna ge Romes ǃnâ hâ îna ǃâubasensa ge ūhâ i. Nēs ge ‘Elob ǂkhaisib di ǃâubasensa.’ ǀNî khoen ge ǀnîsi a dî ǁkhā, ‘ǁnā Xristeǁîn ge ǀnai ǃâubasensa ūhâ io, mati iob Pauluba ǁkhawa ǃâubasensa ra ǃhoaǃgao?’

16. ǃÂubasensa mati khoe-i ǃnâ ra omkhâisen? (Ai-īsiga mû re.)

¹⁶ ǃÂubasensa da ga xū-i hîna ra kai-i ase ǂâiǃgâ, o da ge nî ǁnâuǃā Paulub ge tae-e gere ǂâibasensa. Nēsa ǁguiǃās: ǂÂi-oa i du ra Elobmîs ǃnâ hâ ǃâubasens xa du ge ǂgurose ǁnâu o? ǀNîsi du ge ǁnā ǁaeb ai gere ǂâi, ǀamose paradais ǃhūbaib ai ûis ge kaise buruxa. Nēs nî ama īs xa du ge ǀnîsi gere îganǀgē. Xawe du ge ǃnāsase Elobmîs mîmâidi tsî Jehovab xas tsîna ǁkhāǁkhāsen, khami du ǃnāsa ǂgomǃgâsiba nē ǃâubasens ǃnâ ge omkhâi.

17. Sadu ǃâubasensa du mati māǁnâsens tsî ǁāǁnâs khaoǃgâ ra omkhâi ǀgara?

¹⁷ Māǁnâsen tsî da ge ǁāǁnâhes khaoǃgâ, da ge Jehovaba ǃgâise ǂan tsî ǃnāsase ge ǀnam tsoatsoa. ǁNāpaxu da ge ǃnāsa ǂgomǃgâsiba ge omkhâi, ǃâubasen da ra  xūn xa. (Heb. 5:​13–6:⁠1) ǀNîsi du ge Romeǁîn 5:​2-⁠4 ǃnâ ra mîhe xūna ge hōǃâ. ǃKharagagu ǃâitsâna du ge ra ǃkharuǃnâ xawe ra mâǀgai tsîb ge Jehovaba ra ǁgau sadu ǀkhab a ǂkhîsa. Jehovaba a ǀnam du tsî sadu ǀkha a ǂkhî ǃkhaisa du ǂan amaga du ge ǃgâi ǃaromasa ūhâ, ǁîb ge mîmâi xūna ǃâubasensa. Sadu ǂgoms ge nēsi ǀgaisa ǂguro du ge ūhâ is xa. Nēs ge a ama tsî ra tsâǀkhā du. ǃÂubasens ge sadu ûib ǃnâ sîsenǂuiba ūhâ, omaris ûib, dī du ra mîǁguigu tsî sadu ǁaeba du ra sîsenū ǀgaub ǃnâs tsîna.

18. Jehovaba mâ ǂgomǃgâsiba ra mā da?

¹⁸ Aposteli ge ǂhâǂhâsa ǃâb hîna da ūhâb xa ra ǀaro, Elob xa ûǃoahesa da ǃkhōǃoa hâs khaoǃgâ. ǁÎb ge sadu ǃâubasensab nî dīǀoaǀoas ǂgomǃgâsiba ra mā. Matis ǁnāsa amaba du ǁkhā? Paulub ge Xristeǁîna ǃoa ǁapoǁaposa mîde ra mî: “Nē ǃâubasens ge taotao tama hâ, Elob di ǀnammi ge ǃAnu Gagab hîab ge sada māb ǃnâ-u ǂgaogu âda ǃnâ ǁhōǂuihe xui-ao.” (Rom. 5:⁠5) ǃGâi ǃaromasa du ge ūhâ, nē ǃâubasensa ǂgomǃgâsa.

19. Mâ ǂgomǃgâsiba du sadu ǃâubasens xa ūhâ ǁkhā?

¹⁹ Jehovab ge Abrahamma ǃoa a dī mîmâis xa ǂâi-oa re. Tsîb ge Eloba mati ǁîba, ūǃoa tsî ǁîb ǀhōsab ase a mû ǀgauba. Abrahammi ǃâubasens ge ge ǁau tama hâ i. Elobmîs ge ra mî: “Tsîb ge Abrahamma ǁnāti ǃnūǃnâxase ǃâu tsî Elob ge ǁîba mîmâibana ge ǃkhōǃoa.” (Heb. 6:​15; 11:​9, 18; Rom. 4:​20-22) ǁÎb ge amase ge taotaohe tama hâ i. ǁKhā ǂgomǃgâsiba du ge ūhâ ǁkhā, ǂgomǂgomsase du ga hâ ǀgara o tsî î ge sadu ǃâubasensa madawa-amhe ǁkhā. ǂGui ǃaromade du ge ūhâ ǃgâiaǂgaosa, nēs nî ama kai tsî du taotaohe tide amaga. (Rom. 12:​12) Paulub ge ge xoa: “Ab Elob ǃâubasens diba ǁîb ǃnâ du ra ǂgom ǃkhais ǃaroma ǃgâiaǂgaob tsî ǂkhîb ǀkha ǀoaǀoa du, îs sadu ǃâubasensa ǃAnu Gagab di ǀgaiba xu ǃnāǂamsase i.”​​—⁠Rom. 15:⁠13.