1. Tae-i ǃaroman ǂgui khoena ra ǂâi īǁkhā ī tidesa ǀamosib kōse ûisa?

 ǂGUI khoen ge ra dītsâ ǁîn soros ǃgao a ǃgâi ǂûna ǂûsa tsî ǀnî hâ xūn tsîna dīsa în gaxuse ûi ǁkhā. ǁÎn ge a ǂan nē xūn hoanan ga dī xawen ǀguitsē kaira tsî nî ǁōsa. Xawen ge ǀnîsi a tsâ ǁkhā ǁîn ǀamosib kōse ûihō tidesa. Jesub ge ge mî īǁkhā ī asa khoen “ǀamo ûiba” nî hōsa, Johaneb 3:16 tsî 5:24 ǃnâ ī ra ǂoaxa khami.

2. Johaneb 6ǁî danaǃâsa tae-e ǀamo ûib xa ra mî? (Johaneb 6:​39, 40)

² Jesub ge pere-i tsî ǁau-i tsîna buruburuxa ǀgaub ǃnâ ǂgui khoena ge ǂûmā. a Xawe Jesub ge saora tsēs ai Kapernaums ǃnâ gere sao-aibi khoena a mîba xū-i ge ge ǂoaǂamsa i. ǁÎb ge ǁîna ge mîba ǁō hânab khâisa nî māsa tsîn ǀamosib kōse nî ûisa. (Khomai re Johaneb 6:​39, 40 sa.) Nēsa ǂâis ǃnâ ūhâse, ǁō ge sa ǀhōsan tsî ǀaokhoen xas tsîna ǂâi re. Jesub mîdi ge ra ǁgau ǁnān ǁō ge nab khâisa nî māsa. Tsî du hoado ǀamosib kōse nî ûisa. Jesub ge saorase Johaneb 6ǁî danaǃâs di ǁaraǃādi ǃnâ a mî mîden ge ǂguina ǁnā tsēs ai ge ǁnâuǃā tama hâ i. Tsîn ge nētsēs tsîna ǂguina ǁnā mîde ǁnâuǃā tama hâ. Jesuba tae-e ge mî?

3. Jesuba tae-e Johaneb 6:51 ǃnâ ǁîb xa ge mî?

 ³ Jesub ge buruxa ǀgaub ǃnâ a ǂûmān toas khaoǃgân ge Jehovab ge Israelǁaesa ǃgaroǃhūb ǃnâ a mā mana i xa ge ǂâi. Jesub gere ǃhoa-ū khoen ge ge ǂan i Elobmîs mana-e ‘ǀhomma xu ra hā pere-i’ ase a ǂansa. (Psa. 105:40; Jhn. 6:31) ǁÎna ǂhâǂhâsa xū-e ǁkhāǁkhās ǃaromab ge Jesuba saorase mana i di aiǁgausa ge sîsenū. Mana i ge buruburuxa ǀgaub ǃnâ Elob xa a māhe xawen ge ǁnān hîna ge ǁî-e xu ǂûna ega ge ǁō. (Jhn. 6:49) Jesub ge ǁîb a ‘ǀhommi di pere,’ “pereb Elob dib” tsî ‘ûib di pereb’ ti ge ǂgaisen. (Jhn. 6:​32, 33, 35) Jesub ge ǁîb tsî mana-i ǁaegu ra mâǂoa xū-i xa ge ǃhoa. ǁÎb ge ge mî: “Tita ge ûitsama pereta, ǀhomma xu ge ǁgôaxa ta. Nē pereba ga ǂû-i ge ǀamose nî ûi.” (Khomai re Johaneb 6:51 sa.) ǁNā Jodeǁîn ge ge ǁaixa. ǁÎn ge ge ǁnâuǃā tama hâ i tae-i ǃaromab ge Jesuba ǀhomma xu ra hā “pereb” ase gere ǁnaeǁgausensa. Tsî i ge ǁnā ‘pere-e’ tae-i ǃaroma Elob ge mā mana-i xa ǀgapi isa. Tsîb ge Jesuba ǁîna ge mîba: “Nē pereb ge a ti ǁgan.” ǁÎba tae-e ǀnîsi gere ǂâibasen? Kaise i ge a ǂhâǂhâsa ǁîb ge tae-e gere ǂâibasensa ǁnâuǃāsa. Nēs hoa da ǃaroma ǀamose ûis di ǃēsa ra īǁkhā kai amaga. Hā re î da kō Jesub ge tae-e gere ǂâibasensa.

JESUBA TAE-E GE ǂÂIBASEN TI ǁGANS TIB GE MÎ O?

4. ǀNî khoena Jesub ge mî xū-i xa tae-i ǃaroma ge buru?

⁴ ǀNîn ge Jesub ge sao rase a mî mîden ge ǁnâu o kaise ge buru. “Nē pereb ge a ti ǁgan ǃhūbaib di ûib ǃaroma ta nî māba.” Khoen ge ǀnîsi gere ǂâi Jesub gere ǂâibasensa în ǁîb di sorosa ǂû. (Jhn. 6:52) Jesub ge ǁîna ge buru kai xū-i tsîna ǀaro tsî ge mî: “Khoen ôab di sorosa du ga ǂû tama i tsî ǁîb di ǀaoba ā tama i, o du ge ǀamo ûiba ūhâ tama hâ.”—Jhn. 6:53.

5. Tae-i ǃaroma da a ǂgomǃgâ ǁkhā Jesub ge mî tama hâ isa în khoena ǁîb ǀaoba ā?

⁵ Noaxi tsēdi ǃnâb ge Eloba khoena ge mîba în tā ǀaoba ǂû. (Gen. 9: 3, 4) Jehovab ge Israelǁaes tsîna ge mîba în tā ǀaoba ǂû. Khoe-i hîna ǀaoba ra ǂû-i ge nî “ǃgamhe.” (Lev. 7: 27, NW) Jesub ge Jodeǁîna ge mîba în Elob mā hâ ǁgaragu hoaga ǁnâuǀnam. (Mat. 5:​17-19) ǁNā-amaga i ge a mîhe ǁoa ǁîb gere ǂhâbasa în Jodeǁîna ǁîb sorosa ǂû tamas ka io ǁîb ǀaoba ā. Xawe nē mîdi ǃnâ-ūb ge Jesuba khoena gere ǁkhāǁkhā matin “ǀamo ûiba” nî hōsa.—Jhn. 6:54.

6. Mati da Jesub mîdi ǁîb sorosa ǂû tsî ǀaoba ās disa ra ǁnâuǃā?

⁶ Jesuba tae-e gere ǂâibasen? Jesub ge aiǁgauna gere sîsenū khoen ǀkhab gere ǃhoa o. ǁKhā xū-eb ge Samaritanǁî tarekhoes ǀkhab ge ǃhoa o ge dī. Sao raseb ge ge mî: “Xawe ǁnā-i, tita xa i ra māhe ǁgam-e ga ā-i ge tātsē ǁgâ tide, tsî ǁnā ǁgam-i tita ra ǁî-e mā-i ge ǁî-i ǃnâ nî dâu ra ǀau kai, ǀamo ûib kōse.” (Jhn. 4:​7, 14) b Jesub ge ge mî tama hâ i Samaritanǁî tarekhoes ǁnā ǀausa xu ǀguis ga ǁgamme ā, o ǀamo ûiba nî hōsa. ǁNās ǁkhās khami i ge Kapernaums ǃnâb ge Jesuba gere ǃhoa-ū khoena ǁîb di sorosa ǂû tsîn ga ǁîb ǀaoba ā, on ǀamo ûiba nî hō ti ge ǂâibasen tama hâ i.

 JESUB GE ǁKHĀ MÎDE A SÎSENŪ ǃNAEǃKHAIS

7. ǀNîna tae-e Jesub ge Johaneb 6:53 ǃnâ a mî xū-i xa ra mî?

⁷ ǀNî khoen ge ra mî Johaneb 6:53 ǃnâb ge Jesuba gere ǁguiǃāsa tae-i nî īsa ǃKhūb ǃui ǂûs tawa, ǁîb ge ǁkhā mîde sîsenū amaga. (Mat. 26:​26-28) ǁÎn ge gere mî, ǁnān ǃKhūb ǃui ǂûsa ra hâǃnân pere-e ǂû tsî xûi-e nî āsa. ǁNāsa a ǂhanu? ǁNās a amasa ôaǃnâs ge kaise a ǂhâǂhâsa, ǃhūbaib ǂhawase da nē ǁaxasiba mâ kurib hoaba ra tsēdī amaga. Mû da ge nî Jesub ge Johaneb 6:53 ǃnâ a mî mîs mati ra ǀkharasa, ǁîb ge ǃKhūb ǃui ǂûs xa a mî-e xu.

8. Mâ ǃkharagagusiga hâ nē ǃnaeǃkhaira ǁaegu? (Ai-īsiba mû re.)

⁸ Hā re î da ǀgam ǃkharagagusiga kō nē ǃnaeǃkhai ra ǁaegu. ǂGurose, Jesuba Johaneb 6:​53-56 ǃnâ hâ mîde mâpa tsî mâǁae ge ǃhoa? Nē mîdeb ge kai ǂnubis Jodeǁîn aiǃâ 32ǁî kuri, Galileab ǃnâ ge mî. Nēs ge ǀgui kuriba ǃKhūb ǃui ǂûs Jerusalems ǃnâ nî hâs aiǃâ ge ī. ǀGamǁîse, ham-e ǃoab ge ǃhoa? Jesub ge Galileab ǃnâ gere ǃhoa-ū khoen ge ǁîba xu ǂû-e hōs ai ǀgui ǂâisa gere ǂnûi xawe ǁîn di gagasi ûiba kōǃgâs ǀkha ge ǁae tama hâ i. (Jhn. 6:26) Jesub ge ǁîn ǁnâuǃā tama hâ xū-e a mî, on ge ǃkhaese ǁîb ge mîn ǃnâ ge ǂgom ǀû. ǀNî ǁkhāǁkhāsabegu ǁîb digu tsîn ge ge  sao bi ǀû. (Jhn. 6:​14, 36, 42, 60, 64, 66) Nē khoen ge Jesub 11 ǂgomǂgomsa apostelga xu gere ǀkhara, hîna ge Jesub ǀkha kuriba ǃkharu tsî ǃKhūb ǃui ǂûs tawa hâ î ga. ǁNā ǃui ǂûs tawa gu ge ǁîb ǂgomǂgomsa apostelga ǁîb ǀkha ge hâ ǀgara, ǁîb gere ǁkhāǁkhā xūna gu ge hoase ǁnâuǃā tama hâ i xawe. ǁÎb ǂgomǂgomsa apostelgu ge Galileab ǃnâ ge hâ i khoen khami ge ī tama hâ i. ǁÎgu ge gere ǂgom Jesub a Elob Ôa tsîb ǀhomma xu ra hāsa. (Mat. 16:16) ǁÎgab ge ge koa: “Sago ge tita ǀkha ge hâ i ti tsâgu ǃnâ.” (Luk. 22:28) Johaneb 6:53 ǃnâ hâ ǃkharagagusib ge ra ǁgau, Jesub ge ǁguiǃā tama hâ isa nēs ǃKhūb ǃui ǂûs tawa nî īsa. Xawe ǂgui ǃkharagagusigu ge noxopa hâ nē ǀgam ǃnaeǃkhai ra ǁaegu.

SADU TSÎN GE NĒS ǃNÂ A ǃÂ

9. ǃKhūb ǃui ǂûs tawab ge Jesuba a mî mîde, mâ khoena ǃoa ra ǁnaeǁgau?

⁹ ǃKhūb ǃui ǂûs tawab ge Jesuba ǁîb apostelga pere-e ge mā tsî ge mîba gu ǁnās ǁîb sorosa ra ǂnûǁkhaebasa. Tsîb ge xûi-e mā gu tsî ge mî nē xûi-i ǀasa ǃgaeǀhaos ‘ǀaob’ disa ra ǂnûǁkhaeba ti. (Mrk. 14:​22-25; Luk. 22:20; 1Kor. 11:24) ǁÎb ge ǃgaeǀhaos xa a mî i ge kaise a ǂhâǂhâsa. Nē ǀasa ǃgaeǀhaos ge gagasi “Israel ommi” tsî Jehovab ǁaegu hâ. ǁNān ge Jesub ǀkha ǀguiba ‘ǀhommi ǃnâ nî ǂgaeǂguina’ hoa khoen ose. (Heb. 8:​6, 10; 9:15) Apostelgu ge ǁnāsa ǁnā ǁaeb ai ge ǁnâuǃā tama hâ i. Xawe gu ge ǁîga ǀgūǁae ǃanu gagagab ǀkha ǂhauhe tsî Jesub ǀkha ǀasa ǃgaeǀhaos ǃnâ ǀguiba ǀhommi ǃnâ nî hâ ge īs ge.—Jhn. 14:​2, 3.

10. Mâ ǃkharagagusiba hâ Jesub ge ǃui ǂûs tawa a mî-i tsî Galileab ǃnâb ge mî-i tsîn ǁaegu? (Ai-īsiba mû re.)

¹⁰ Jesub ge ǃKhūb ǃui ǂûs tawa ‘ǂkhari gūron’ ai ǂâisa ge ǂnûi hâ i. ǁÎb ǂgomǂgomsa apostelgu ǁnā ǃui ge ǁnāpa hâ i gu ge a ǁnā ǂkhari ǃgôarob di tsoatsoa. (Luk. 12:32) Jesub ge ǁîga ǁnā ǃui ge ǂgan î gu pere-e ǂû tsî xûi-e ā. ǁNān hîna ge ega nē khoen di ǃâ kain ge pere-e ǂû tsî xûi-e nî ā ǃKhūb ǃui ǂûsan ga tsēdī o. ǁÎgu ge Jesub ǀkha ǀhommi ǃnâ ǀguiba nî ǂgaeǂgui. Nēs ge ǀnî hâ ǃkharagagusib ǃKhūb ǃui ǂûs tsî Galileab tawa ge ī ǃnaeǃkhais ǁaegu hâba. Jesub ge ǃui ǂûs tawa a mî i ge ǂkhari ǃgôab khoen ǀguina ǃkhōǂgā hâ. Xawe Galileab ǃnâb ge mî mîdi ge ǂgui khoena ǃkhōǂgā hâ.

11. Jesub ge Galileab ǃnâ a mî-e mati ra ǁgau ǁîb ge ǂkhari ǃgôab khoena ǃoa ǀgui ǁnaeǁgau tama hâ isa?

¹¹ Jesub ge Galileab ǃnâ gere ǃhoa-ū khoen ge ǂû-i ǀgui-e ge ǂhâba hâ i. Jesub ge ǁîna gere hui în ǁnâuǃā ǃnāsa xūn hâsa ǂû-i xa, ǀamo ûiba a mā nî ǁkhā-e. Jesub tsîn ge ge mî ǁnān ǀuniga tsēs ai ra ǁōn khâisa hō tsîn ǀamosib kōse a ûi ǁkhāsa. ǁÎb ge ǃKhūb ǃui ǂûs tawa ǂkhari ǃgôarob khoen xa ǀgui gere ǃhoa. Xaweb ge Johaneb 6ǁî danaǃâs ǃnâ kai ǃgôab khoen xa gere ǃhoa. ǁÎb ge Galileab ǃnâ hoa khoen nî hō ǀkhaeb xa gere ǃhoa. Mîb ge ge: Mâ khoe-i hoa-i “nē pereba ga ǂû-i ge ǀamose nî ûi, nē pereb ge a ti ǁgan, ǃhūbaib di ûib ǃaroma ta nî māba.”—Jhn. 6:51. c

12. Tae-e da nî dī î da Jesub ge mî ǀamo ûiba hō?

¹² Jesuba gere ǂâibasen mâ khoe-i  hoa-i ǃhūbaib ai ûi hâ i ǀamo ûiba nî hō ti? ǁNān ‘pere-e ra ǂûn’ ǀguin ge nēsa xu ǃgâiba nî ǀama, ǁnās ge Jesub ǃnâ ǂgomsa ǁgausa. ǂGui khoen ge nētsē ra mî “Jesub ǃnân ra ǂgomsa” tsîn ge ǁîba hui-aob ti ra ǂgai. (Jhn. 6:29) ǁNās xa i ge ǃnāsan Galileab ǃnâ ge hâ îna ǂgurose Jesub ǃnâ gere ǂgom. Xawen ge ega ǁîb ǃnâ ge ǂgom ǀû. Tae-i ǃaroma?

13. Jesub ǃnâ ǂgomsa ǁgausa tae-e ra ǂâibasen?

¹³ ǂGui khoen ge Jesuba ǁîb gere mā ǂû-i ǃaroma ǀgui gere sao. ǁÎn ge gere ǂhâba îb ǂgauǂgau nî, ǂû-e mâ nî tsî ǁnâu ǂgaon gere xūn ǀguina mîba nî. Xaweb ge Jesuba ǃgāsase ge ǁgau ǁîb ge ǃhūbaiba ǃoa hā tama hâ isa îb ǁîna ǂhân hâ xūn ǀguina mā. ǁÎb ge ǃhūbaiba ǃoa ge hā îb ǁîna ǁkhāǁkhā tae-en nî dīsa în ǁîb ama saosabe kai. ǁÎb ǁkhauǂuis “tita ǃoa hā” ti hâsa ūǃoa tsîn ge ǁîb ra ǁkhāǁkhā xūn hoana nî ǁnâuǀnam.—Jhn. 5:40; 6:44.

14. Tae-e da nî dī î da Jesub ‘soros tsî ǀaob’ tsîna xu ǃgâiba ǀama?

¹⁴ Jesub ge ǁîna ge ǁkhāǁkhā ǁîb soros tsî ǀaob tsînab ge ǁguibas ǃnâ-ū a īǁkhā kaisa în ǀamosib kōse ûi. ǁÎn ǁnā amab ǃnâ ǂgomsa nî ǁgaus ge ge ǂhâbasa ī. ǁNāti i ǂgoms ge Jodeǁîna ge ǂhâǂhâsaba i tsîs ge ǁnāsa sida tsîna nētsē a ǂhâǂhâsaba. (Jhn. 6:40) Jesub ge Johaneb 6:53 ǃnâ a mî xū-i ge ra ǂâibasen î da ǂgomsa xoremarib ǁguibas ǃnâ ūhâ ǀamo ûiba da ga hō ǂgao o. Nē ǀkhaega xun ge ǂguina ǃgâiba a ǀama ǁkhā.—Efe. 1:7.

15-16. Mâ ǂhâǂhâsa xūna da go Johaneb 6ǁî danaǃâs ǃnâ da ge nē dīkha di ǀguib xa khomai ǁkhā. Nē ǃâba da ǃnâ ǁkhāǁkhāsen?

 ¹⁵ Johaneb 6ǁî danaǃâs ǃnâ da ge nē dīkha di ǀguib xa khomai ǁkhā. Nē ǃâba da ǃnâ da ge ǂhâǂhasa tsî sada ra ǂkhâǃnâ ǂgui xūna ra ǁkhāǁkhāsen. ǁKhāǁkhāsen da ge ra Jesub khoena ra tsâbasa. ǁÎb ge khoena ǂgauǂgau, Gaosib xa aoǁnâba tsî ǂhân hâ ǂûn tsîna ge mā. (Luk. 9:11; Jhn. 6:​2, 11, 12) Hoan xa ǂhâǂhâsaseb ge ge ǁkhāǁkhā, tita ge “ûib di pereta.”—Jhn. 6:​35, 48.

¹⁶ Jesub ge “ǀnî gūn” ase a ǁnaeǁgaun ge, tā ǃKhūb ǃui ǂûs tawa pere-e ǂû tsî xûi-e nî ā. (Jhn. 10:16) Xawen ge ǁîna Jesub ǀaob tsî soros ǁguibas ǃnâ-ū ǃgâiba ra ǀama. Jesub xoremarib ǁguibas ǃnân ge ǂgomsa ra ǁgau tsî ǁnāpaxu ra hā buruburuxa ǀkhaega xu ra ǀama. (Jhn. 6:53) ǃKhūb ǃui ǂûs tawa pere-e ǂû tsî xûi-e ra ān ge ra ǁgau, ǁîn ǀasa ǃgaeǀhaos di ǃâsa tsîn ǀhommi ǃnâ ǂgaeǂguis ǃâubasensa ūhâsa. Nēsi da ga ǂkhauhesan tamas ka io ǀnî gūn ǃâ xawe da ge hoa da kaise ǂhâǂhâsa xū-e Johaneb 6ǁî danaǃâs ǃnâ da ge nē dīkha di ǀguib xa khomai ǁkhā. Nē ǃâba da ǃnâ ra ǁkhāǁkhāsen. ǁNāpa da ge ra ǁkhāǁkhāhe, î da ǀgaisa ǂgomsa xoremari ǁguibas ǃnâ ūhâ ǀamosib kōse da ga ûi ǂgao o.