1-2. ǁGûna mati nî tsâ ǁîn ǀgôan ga dîna Elob tsî Elobmîs xa dî o?

 ǂGUI khoen ge nî ǃkhō-am ǀgôana kaikais kai sîsen-e ǃkhōǂgā hâsa. Sadu ga ǁgû o, o du ge ǃgarise ra sîsen î du nē ǀgôan di ǂgomsa ǀgaiǀgai. Tsîb ge Jehovaba sadu ǀkha a ǂkhî. (Deu. 6:​6, 7) Sadu ǀgôa-i ra kai khami i ge ǁî-e dîna a dî tsoatsoa ǁkhā sadu ǂgom ǀgaub xa. Aiǁgause, Jehovaba tae-i ǃaroma ǂhâpa tama hâ î da ǀnî xūna dī.

² Tsoatsoas ai du ge ǀnîsi a ǂâiǂhansen ǁkhā sadu ǀgôa-i dîn ǃaroma. ǀNîsi du ge a ǂâi tsoatsoa ǁkhā sadu ǀgôa-i ge nē dîna ra dî, ǁî-i ǂgoms Jehovab tsî Elobmîs ǃnâ ǂkhabusa amaga. Xawe ama as ge ǀgôan ra kai khamin ge dîna nî dî în ǁîn ǂgomsa ǀgaiǀgai. (1Kor. 13:11) ǃAo du nî ǃaroma i ge a ǀkhai. Nē dînan ga dî o du ge nē ǁaeba sîsenū tsî a ǁkhāǁkhā nî ǁkhā în ǃgamse ǂâi tsî ǁnās ǃnâ-ū ǁîn ǂgomsa Elob tsî Elobmîs ǃnâ ǀgaiǀgai.

3. Tae-e da nē ǁkhāǁkhāǃâs ǃnâ nî ǃhoaǃgao?

³ Nē ǁkhāǁkhāǃâs ǃnâ da ge nî ǃhoaǃgao ǁgûn mati ǁîn ǀgôa-e a hui ǁkhā ǀgauba, (1) în ǀgaisa ǂgomsa Elob tsî Elobmîs ǃnâ omkhâi, (2) în ǁnâuǃā matin Elobmîs ǁgaragu, tae-i a ǂhanu tsî ǂhanu tama hâsa ǁnâuǃāsa xu ǃgâiba ǀama, tsî (3) matin ǁîn ǂgom ǀgauga nauna nî ǁguiǃāba ǀgausa. Tsî da ge nî ǃhoaǃgao tae-i ǃaroma i a ǃgâisa ǀgôan ǃaroma în dîna dî. Kō da ge nî tae-en ǁgûna dī ǁkhāsa în ǁîn ǀgôan ǀkha ǁîn ǂgoms xa ǃhoa.

HUI RE ǀGÔANA ÎN ǀGAISA ǂGOMSA OMKHÂI

4. Mâ dîden ǀgôana ūhâ ǁkhā tsî tae-i ǃaroma?

⁴ Xristeǁî ǁgûn ge ra mûǂan ǀgôan ǂgoms ǀkha ǃnae tama hâsa. Sadu tsîn ge Jehovab ǃnâ ǂgomsa ūhâse ge ǃnae  tama hâ i. ǁNā i ge sadu ǀgôa-i ǃaromas tsîna a ama. ǁAeb ra ī khami i ge sadu ǀgôa-e saora dîna dî ǁkhā: ‘Mati ta a ǂan Elo-i hâsa? Amabes ǃnâ ta Elobmîs ra mî-e a ǂgom ǁkhā?’ Elobmîs ge ra mî î da “gā-ai” ǂâiǀgauba sîsenū tsî “xūn hoana ǃâitsâ.” (Rom. 12:1; 1Tes. 5:21) Mati du sadu ǀgôana a hui ǁkhā în ǁîn ǂgomsa ǀgaiǀgai?

5. ǁGûna tae-e a dī ǁkhā în ǁîn ǀgôana hui ǂgomsa Elobmîs ǃnâ omkhâis ǀkha? (Romeǁîn 12:2)

⁵ Sadu ǀgôana ǂkhâǃnâ în ǁgauǁgauna ôa Elobmîs ra mî-i a amasa. (Khomai re Romeǁîn 12:2 sa.) Sadu ǀgôan ga dîna dî, o nē ǃēsa ū tsî ǁgau nî re matin ǃereamde nî hōsa. Ôaǃnâs ǀkha ra hui xūna ra sîsenūse. Aiǁgause Ôaǃnâs ǀkha ra hui ǂkhanib Jehovab ǃoaba-aon dib khami. ǁNā ǂkhanib ǃnâts ge “Elobmîs” ti xoa tsî a ôa ǁkhā “Elob xa ǃgomǂgāǃnâhe hâ” ǃâba. Îts ǁgauǁgauna hō Elobmîs ǃgâi ǂkhanis ǀguisa i tamasa khoegu xa xoahe hâsa. “Xawe ama mîs Elob dis” asa. (1Tes. 2:13) Aiǁgause, i ge ǀgôana sida ǂkhanin ǃnâ ôaǃnâsa dī tsî ǃnāsase Asiria ǃās Nineves dis xa a ôaǃnâ ǁkhā. ǃKharu ge ǁaeb ǃnân ge Elobmîsa ra ôaǃnâ khoena gere mî, ǁnā ǃās Nineves dis ge tātsē ama ǃā tama hâ īsa. Xawe 1850ǁî kurigu ǃnâ i ge ôaǃnâna ra dī khoega Nineves di ǃāsa ge hō ǃhūb ǃnaga. Nēs ge ge ǁgau Elobmîs a ǂhanu tsî ama ǃkhaisa. (Sef. 2:​13-15) ǃNāsa ǃgāsasib Nineve ǃās di hîkākās mati Elobmîs kēbode ra dīǀoaǀoa ǀgaus ǃaroma “ǂAn i du go ī?” ti hâ khomaiǃâsa Novemberi 2021 kurib ǃKhē xu ǂgō-ommi dib ǃnâ mû re. Sadu ǀgôa-e ǂkhâǃnâ re î-i ǀgopeǀnō sida ǂkhanin ra mî xūna ǀnî hâ ǂgomǃgâhe ǁkhā ǂkhanidi ǀkha. Nē i ge sadu ǀgôa-e nî hui î-i ǁî-i ǂgomsa ǀgaiǀgai tsî Elobmîs ra mî xū-i a amasa mû ǁkhā.

6. ǁGûna ǁîn ǀgôana mati a hui ǁkhā în ǁgauǁgauna mû Elobmîs a ama ǃkhaisa? Aiǁgau-e mā re. (Ai-īsiba mû re.)

⁶ Sadu ǀgôa-e hui re î-i ǁgauǁgauna mû Elobmîs a ǂhanu ǃkhaisa. ǁGûn ge ǂgui ǃkharagagu ǃēna ūhâ ǁîn ǀgôan ǀkhan Elobmîs tsî Elob ǃnâ ǂgoms xa ǃhoa ǁkhāna. Sadu ǀgôana du ge nē xūn xa a ǁkhāǁkhā ǁkhā saora ǃkhaide du ga sari o. Musiums, ǃhanab tamas ka io ǀhuru aihe ra ǃkhaib tsî ǁnâub beros Jehovab ǃoaba-aon disa du ga sari o. Aiǁgause du ga musiums sari o du ge sadu ǀgôa-e a ǁgau ǁkhā ǁnāpa hâ xū-i tamas ka io ǃkharu ge ǁaeb ǃnâ ge ī xū-i mati Elobmîs ǃnâ hâ xū-i ǀkha ra ǃgûǀhao ǀgausa. Nēs ge sadu ǀgôa-e nî hui în mû Elobmîs ra mî i ama ǃkhaisa.  ǀNîsi du ge sadu ǀgôa-e Moabit ǀuib xa a ǁkhāǁkhā ǁkhā. Nē ǀuib ge 3 000 kuriga hâ tsî Jehovab ǀonsa xoa-aihe hâ. Nē ǀuib ge Frans ǃhūb musiums ǃnâ hâ. Tamas ka io du ge sadu ǀgôa-i ǀkha ǀoro ai-īsina a kō ǁkhā. Aiǁgause Moabit ǀuib khami internets ǂhaweb ai, tamas ka io sida di ǂkhanin ǃnâ. Moabit ǀuiba ǁgae tsî ge kuruhe ǀuib ge “The Bible and the Divine Name” ti ǀon hâ ǃâb dana beros Jehovab ǃoaba-aon dis Amerikab ǃnâ ǁgauǂuihesa. Moabit ǀuib ge ra mî gao-aob Mesab Moab dib ge Israelǁîn ǃoagu khâikhâisen ti. Tsî nēs ge Elobmîs ǃnâs tsîna hâ. (2Gao. 3:​4, 5) Sadu ǀgôa-i ga ǁgauǁgauna mû Elobmîs ra mî-i a amasa, o i ge ǁî-i ǂgomsa nî ǀgai.—ǀGopeǀnō 2 Kroniks 9:6 sa.

7-8. (a) Tae-e da a ǁkhāǁkhāsen ǁkhā kurus ǃnâ hâ patronde xu? Aiǁgau-e mā re. (Ai-īsiba mû re.) (b) Mâ dîde sadu ǀgôa-e a hui ǁkhā î-i ǁî-i ǂgomsa Kuru-aob ǃnâ ǀgaiǀgai?

⁷ Sadu ǀgôa-e ǂkhâǃnâ re î-i Jehovab ge kuru buruburuxa xūn xa ǂâiǃgâ. ǃGārob ǃnâ du ga ǃgû tamas ka io du ga ǃhanab ǃnâ sîsen, o sadu ǀgôa-e hui re î-i Jehovab ge kuru ǃgâi xūna ǃgaoǃgâ tsî mati i ǃnākorobe ra sîsenūhesa. Sadu ǀgôa-e hui re î-i ǁnâuǃā kaise gā-ai khoe-i ge nē xūna kuru ǃkhaisa. Kurus ǂansa ūhâ khoen ge nē saogu ra xūna ǂgui kuriga ge ǁkhāǁkhāsen. Kurus ǂansa ūhâ khoes Nicola Fameli ti ǀon hâs ge sao rase ra ǁguiǃā, kurus ǃnâ hâ xūn di ǃgôabats ga ǃgôa khâi ots ge ǁkhā ǀgauba ūhâ ǃgôaba ra hō. Nē ǀgaub ge Fibonacci ti a ǂansa. Nē aiǁgaude da ge ǂgui xūn ǃnâ a mû ǁkhā, aiǁgause ǀgamirodi, haiǂnapogu tsî soneblomdi ǃnâs tsîna. a

⁸ Sadu ǀgôa-i skoli ai kurus ǂans xa ra ǁkhāǁkhāsen khami i ge ǀkhara xūn xas tsîna noxopa nî ǁkhāǁkhāsen. Aiǁgause ǃnāsa hain ge saogu ra patronde ūhâ. Hais ge ra ǀgorasen tsî ǁnâugu tsî ǂnapogu tsîna ra kuru. Nēti ī ǀgaub ge fractal ti ra ǂgaihe. Nēti ī aiǁgaudi ge ǀkhara xūn kurus din ǃnâs tsîna ra hō-e. Ham-e nē īxa patronde ge kuru? Sadu ôa-i ga ǃgamse Jehovab ge kuru īxa xūn xa ǂâi, os ge nēsa nî hui nî în ǀgaisa ǂgomsa omkhâi. (Heb. 3:4) Sadu ôa-i ra kai khami du ge nî hui i, î-i ǁnâuǃā tae-i ǃaroma i a ǂhâǂhâsasa Elob di mîmāde ǁnâuǀnamsa. Nēsa dis ǃaroma du ge saora dîsa a dî i ǁkhā, “Elob ga kuru da o, ǂâi its ra ǁîb a ǂansa mati da nî tanisensa î da ǂkhîba ūhâ?” ǁNāpaxu du ge a ǁguiǃā ǁkhā Elob ge Elobmîsa a mādasa îb ǁgau da mati da a ǂkhî ǁkhāsa.

 ELOBMÎS ǀGAUGA ǃGÔAǃGÂSIBA OMKHÂIBA RE

9. Tae-i ǃaroma i sadu ǀgôa-e Elobmîs ǁgaragu xa dîna a dî ǁkhā?

⁹ ǀNî ǁaegu ai i ge sadu ǀgôana Elobmîs tsū a ti ra mî xūn xa dîna ūhâ ǁkhā. ǂAnǂui re tae-i ǃaroma i ti ra dîsa. ǀNîsi i ǂgom tama hâ Elobmîs ra mî xū-i ǃnâ? Tamas ka io i a ǀū mati i ǁî-i ǂgomsa nau khoen ǀkha nî ǀgoragu ǀgausa? Sadu ǀgôana du ge a hui ǁkhā î-i ǁnâuǃā tae-i ǃaroma i a ǃgâisa î da Jehovab mîmāde ǁnâuǀnam. Nēsa dīs ǃaroma du ge ǁî-i ǀkha ǀAmosib kōse ǃgâiaǂgao re ǂkhanisa a ǁkhāǁkhāsen ǁkhā. b

10. Mati du sadu ǀgôa-e a hui ǁkhā î-i Jehovab ǀkha i ūhâ ǁkhā ǀgū ǀhōsagusis xa ǂâi?

¹⁰ Sadu ǀgôa-e hui re î-i ǀgū ǀhōsagusisa Jehovab ǀkha ūhâ. Sadu ǀgôana du ga Elobmîsa ǁkhāǁkhā o ǀAmosib kōse ǃgâiaǂgao re ti ǀon hâ ǂkhanis ǃnâ hâ dîdi tsî aiǁgaudi tsîna sîsenū re, i ǁnâuǃā mati i ǃkharagagu xūn xa ra tsâ ǀgausa. (ǂKhm. 20:5) Aiǁgause i ge 8ǁî ǁkhāǁkhāǃâsa Jehovaba ǃgâi ǀhōsa i ǀkha ra ǀgopeǀnō hōhōǃnâda, ǁkhauba da tsî ǃgâiba ra ǀama kai da-e. 1 Johaneb 5:3 sa ǃhoaǃgao toa tsî du ge a dî ǁkhā, “Jehovab a ǃgâi ǀhōsasa da a ǂan, o da mati ǁîb ra dī kai da xūn xa nî tsâ?” ǁNās ge supu dî-i khami a mûsen ǁkhā, xawe nēti i dîde dîs ge sadu ǀgôa-e a hui ǁkhā, î-i ǁnâuǃā Jehovab ǀnam dab a amaga mîmāna ra mā da ǃkhaisa.—Jes. 48:​17, 18.

11. Mati du sadu ǀgôa-e a hui ǁkhā î-i ǁnâuǃā Elobmîs daoǁgaude ǁnâuǀnams a ǃgâi ǃkhaisa? (ǂKhoamîdi 2:​10, 11)

¹¹ ǃHoaǃgao re mati da ǃgâiba ra ǀamasa Elobmîs daoǁgaude da ga ǁnâuǀnam o. Elobmîs tamas ka io du ga tsēs mîsa ǀguiba khomai o, ǃhoaǃgao re mati i ge Elobmîs daoǁgaude sadu omarisa hui hâ i ǀgausa. Aiǁgause du ge nēti ī ǃhoaǀhaode a sîsenū ǁkhā tsî sadu ǀgôana a hui ǁkhā î-i ǁnâuǃā ǃgâi i asa ǃgarise sîsen tsî da ga hoaǁae amaba ǃhoa o. (Heb. 13:18) ǁÎna du ge a ǁguiǃāba ǁkhā, mati i Elobmîs daoǁgaude sao-aisa ra hui dasa î da ǃgâi ǂurusiba ūhâ tsî ǃgâiaǂgao. (ǂKhm. 14:​29, 30) Sadu ǀgôa-i ga ǁnâuǃā ǃgâi i asa Elobmîs daoǁgaude ǁnâuǀnamsa, o i ge ǁî-i ûib hoab ǃnâ nî ǁnâuǀnam ǂgao.—Khomai re ǂKhoamîdi 2:​10, 11 sa.

12. Matib ge ǀgui ǁgûba ǁîb ǀgôaba hui îb Elobmîs daoǁgaude ǃgôaǃgâ?

¹² Steve tsî ǁîb taras tsîn ge Ethan ti ǀon hâ ǀgôaba ūhâ. Steve ge ra ǁguiǃā mati ra ge Ethana a huisa îb ǁnâuǃā, matib Jehovaba ǁîb ǂhanuga ra dīsa ǀnam dab a amaga. Steve i ge ra mî: “Sîm ge ǁîba ra dî, ‘tae-i ǃaromab Jehovaba ra ǂhâba î da ǁîb mîmāde ǁnâuǀnam? Matis nēsa ra ǁgau ǁîb sida a ǀnamsa? Tae-e a īǁkhā nē daoǁgausats ga ǁnâuǀnam tama io?’” Nēti ī ǁgamǀhaodi ge Ethana ge hui îb ǀgaisa ǂgomsa omkhâi Jehovab ǂhanu ti ra mî xūn ǃoagu. Steve i ge ra ǀaro: “Sîm ra sīǃnâ ǂgao xū-i ge Ethana huisa îb mû Elobmîs khoen xa ǃnāsa gā-aisiba ūhâsa.”

13. Matin ǁgûna ǁîn ǀgôana a ǁkhāǁkhā ǁkhā în Elobmîs daoǁgaude sao-ai? Aiǁgau-e mā re.

¹³ Sadu ǀgôa-e ǁkhāǁkhā re î-i Elobmîs daoǁgaude sîsenū. ǀGui ǃēs nēsa du a dī ǁkhās ge sadu di ǀgôa-i ga skoli ai ǂkhani-e khomai kaihe o. ǁNā ǂkhanis ǃnâ hâ khoen ge ǀnîsi Jehovab tsū a ti ra mî xūna ra dī. Aiǁgause i ge mofin tsî ǃkham-aon tsîna hâ. ǁNā ǂkhanis ge ǀnîsi nē xūn a ǃgâi ǀgaub ǃnâ a xoasa, î-i khomai-ao-e ǁnā ǂkhanis ǃnâ hâ khoen xa ǃgâibahe. Sadu ǀgôa-e du ge a ǂkhâǃnâ ǁkhā î-i nē ǂkhanis ǃnâ hâ  khoen tanisen ǀgaugu mati Jehovaba ra tsâ kais xa ǂâi. (ǂKhm. 22:​24, 25; 1Kor. 15:33; Fil. 4:8) Nēs ge sadu ǀgôa-e a hui ǁkhā î-i mû tae-i ǃaroma i a ǃgâisa Jehovaba ǁnâuǀnamsa. Tsî i ge ǁgauǃnâ-ao-i tamas ka io ǀkhara ǀgôa-i ga ǂkhanis xa xū-e dî i, o ǁî-i ǂgoms xa a ǃhoa ǁkhā.

SADU ǀGÔA-E AIǂHOMI RE Î-I ǁÎ-I ǂGOMSA ǁKHAUBA

14. ǂKhamkhoena tae-e ǃhoaǃgaosa a tao ǁkhā tsî tae-i ǃaroma?

¹⁴ ǂKham Xristeǁîn ge ǀnî ǁaega ǂgomǃgâsiba ūhâ tama ǁîn ǂgomsa ǁkhaubasa. ǀNî ǁaegu ain ge a tao ǁkhā xūn ge ǃhūbaib ai hā ǀgausan ga ǁguiǃā kaihe o. Tae-i ǃaroma? ǁGauǃnâ-aon ge evolusiba amab ase a ǁguiǃā ǁkhā. ǁGûn ase du mati sadu ǀgôana a hui ǁkhā în ǂgomǃgâsiba ūhâ ǁîn ra ǂgom xūn a ama ǃkhaisa?

15. Tae-e ǂkham Xristeǁî-e a hui ǁkhā î-i ǂgomǃgâsiba ūhâ ǁî-i ra ǂgom ǃnâ xū-i a ama ǃkhaisa?

¹⁵ Sadu ǀgôa-e hui re î-i ǂgom i ra xūn ǃnâ ǂgomǃgâsiba ūhâ. Sadu ǀgôa-i Elob ǃnâ i ra ǂgomsa nî taos ge ǂhawasa tama hâ. (2Tim. 1:8) ǂGuin kurus ǂansa ūhân ge ra ǂgom xūn ge ǁnāti ǀgui hā tama isa. Nēti ī ǂansa ūhâ khoen ge ra mûǂan ǁgauǁgaun hâsa gā-ai khoe-i ge nē buruburuxa xūna kuru ǃkhaisa. Nēs xa ǃaromahe hâsen ge evolusib di ǁkhāǁkhāsa ūǃoa tama hâ ǂgui skolan ǃhūbaib ǂhawase hân ai ra ǁkhāǁkhāhesa. ǀGui xū-i sadu ǀgôa-e nî hui-e î-i ǁî-i ǂgoms tsî ǁkhoaǂgaosib tsîna ǀgaiǀgais ge ǁgauǁgauna ôasa, tae-i ǃaroma i ûib ge kuruhes ǃnâ ra ǂgomsa. c

16. ǁGûna ǀgôa-e mati a hui ǁkhā î-i ǁguiǃā Kuru-aob ǃnâ i ra ǂgomsa? (1 Petrub 3:15) (Ai-īsiba mû re.)

¹⁶ Sadu ǀgôa-e hui re î-i nauna ǁguiǃāba tae-i ǃaroma i Kuru-aob ǃnâ ra ǂgomsa. (Khomai re 1 Petrub 3:15 sa.) Sadu ǀgôa-e huis ǃaroma i ge Jongmense vra—Skepping of evolusie? ti hâ khomaiǃâde jw.orgs ai a hō ǁkhā. O i ge sadu ǀgôa-e a ǁhûi ǁkhā mâ ǁguiǃā ǀgauba i ra ǁnâuǃāsa, tsî i mati nauna a hui ǁkhāsa în ǁnâuǃā Kuru-aob hâsa. ǂÂiǂâiǃnâ nî re ǂhâbasa tama i hâsa în ǁîn skol ǀhōsan ǀkha ǂkhaba. ǂKhâǃnâ nî re în ǀguiǃgubu tsî ǁnâuǃāxa ǀgaub ǃnâ ǁîn ǂgomsa ǁguiǃā. Tsî  i ga khoe-e hâ o nē xū-i xa ra ǃhoa ǂgao-e, a i ǁî-i ǀkha ǁgamǀhaosa ūhâ. Aiǁgause i ga ǁî-i skol ǀhōsa-e mî o: “Tita ge mû ta ra xūn ǃnâ ǀgui ra ǂgom, tātsē ta ge Eloba mû tama hâ.” O i ge ǂkham Xristeǁî-e aiǁgause a mî ǁkhā: “Mûnan-ai re ǃgarob ǃnâts ge ra ǃgû dorp-e xu ǃnūse. Tsîts ge tsauba ra hō îxase ǀguidi ǀkha omhe hâba. Matits nî ǂâi? ǁNā tsaub ge khoe-i xa ge omhe. ǁNā i ge a ama sida ǃhubaib tsî hoa ûitsama xūn xa, khoe-i ge nēn hoana ge kuru.”

17. ǁGûna mati ǁîn ǀgôana a hui ǁkhā în ǀgauga ôa, nauna Elobmîs xa mîbasa? ǁGuiǃā re.

¹⁷ Sadu ǀgôa-e hui re î-i ǀgauga ôa nauna Elobmîs xa mîbasa. (Rom. 10:10) Nau khoena Elobmîs xa ǁkhāǁkhāsats ge ǀō-e ra ǀhuru xū-i ǀkha ǀgopeǀnō ǁkhā. ǂGurose i ge ǁkhāǁkhāsen ra khoe-e supu ǁnae-amde nî ǁkhāǁkhāsen. ǁAeb ra ī khami i ge ra supu nē ǀō-e ǀhurusa. ǁKhā ǀgaub ai i ge ǂkhamkhoe-e supu tsî ǀguiǃgupu ǀgaub ai a aoǁnâ tsoatsoa ǁkhā. Aiǁgauseb ge skol ǀhōsa-e a dî ǁkhā: “ǂAn its go i, ǂansa ūhâ khoen ge ǃaub ǃnân ra mû ǀguruna xu kurun ra xūna ra ǁgae. ǀKhī ta îxa vidioroba ǁgau tsi.” Kuruhe i ge? ti hâ ǃâba xuts ga vidioba ǁgau toa, ots ge ǀnîsi a mî ǁkhā: “ǂAnsa ūhâ khoen ga koahe ǁgaen ra xūn ǃaroma o matits ra ǂâi, ham-e koasa nî hō ǂhunumâ xū-i ǃaroma?” Nēti ī ǀguiǃgupu ǀgaubab ga sîsenū, o i ge ǁî-i skol ǀhōsa-e ǀnîsi ǃnāsase Jehovab xa nî ǁkhāǁkhāsen ǂgao.

AIǃGÛ TSÎ ǀGÔAN ǂGOMSA ǀGAIǀGAI

18. Matin ǁgûna aiǃgû tsî ǁîn ǀgôan ǂgomsa Elob ǃnâ ǀgaiǀgai ǁkhā?

¹⁸ Jehovab ǃnâ ǂgomsa ūhâ tama khoen ǁaegu da ge ûi hâ. (2Pet. 3:3) ǁNā-amaga ǁgûdo sadu ǀgôana du Elobmîsa ra ǁkhāǁkhā ǁaeb ai, ǁîna ǂkhâǃnâ re în ǁkhāǁkhāǃâde ǁkhāǁkhāsen Jehovab tsî ǁîb mîs ǃnâ ǃgôaǃgâsiba nî omkhâina tsî ǁîb ǂhanu-ai ǀgaugu ǃoagus tsîna. Hui bi re îb ǃgamse ǂâi tsoatsoa tsî ǁîb ǂgomsa Jehovab ǃnâ ǀgaiǀgai. Jehovab di kurus xa ǁîb ǀkha ǃhoas ǃnâ-ū. Hui bi re îb ǁnâuǃā Elobmîs kēbodi ǀnai ge dīǀoaǀoahe di xa. ǂHâǂhâsa i ge sadu ǀgôa-i ǀkha ǀgore tsî ǁî-e ǀgorebasa. ǁNāsa du ga dī o du ge ǂgomǃgâsiba ūhâ ǁkhā Jehovab sadu ǁgūtsâde nî ǀkhae ǃkhaisa tsî sadu ǀgôa-i ǂgomsa nî ǀgaiǀgaisa.—2Kro. 15:7.