Tita ge 1927 ǂkhari ǃāros Illinois ti ǀon hâs Amerikab ǃnâ ge ǃnae. Ti dab tsî ti mas tsîn ge koro ǀgôana ge ūhâ i—Jethas, Doni, tita, Karli tsî Joys. Sida hoa da ge ge mîǁgui hâ i, î da Jehovaba ǂgaob hoab ǀkha ǃoaba. Jethas ge ǀgamǁî klas Giliadi disa 1943 ge hâǃnâ. Doni ge Brooklyn Betels tawa 1944 ge ǃoaba. Karli ge Betels tawa 1947 ge ǃoaba tsî Joys ge 1951 beteli tawa gere ǃoaba. ǁÎn di ǃgâi aiǁgaus tsî ti ǁgûra ǃgâi aiǁgaus ge ge ǂkhâǃnâte, î ta ǃnāsa-e Jehovab ǃoabas ǃnâ dī.

Ti dadab tsî ti mas tsîn ge Elobmîsa khomaisa ge ǀnam i. Tsîn ge sida ǀgôada tsîna ge ǁkhāǁkhā î da Eloba ǀnam. Ti dab ge kherkhekha ǃgôasiba ge ǁgau ǀû soldab aseb ge Europi ǃnâ ǂgurose ge hâ i torob ǃnâ a sîsen o. Ti mas ge kaise ge gangan ǁîb ge ǁnā toroba xu ûitsamase oaǀkhī ǃkhaisa. ǁNā-amagas ge ǁîba ge mîba: “Karl, hā re îm kherkheba ǃoa ī, ǀorosem gere dīse.” Ti dab ge ge mî: “ǁNāpas kōse ta ge sadu ǀkha nî ǃgû, xawe ta ge tita tātsē ǂgâ tide.” ǁÎs ge ge dî bi: “Tae-i ǃaroma?” ǁÎb ge ǃeream tsî ge mî: “Torob ǃnâ i ge ǂgomdi ǂgaeǂgui-aona ǁkhā kerkheba xu nau soldaga gere ǀkhae, ǀgui kerkheb ǃnân hâ hînan ge gere ǃkhamgu. Eloba hoa ǀgam ǀkhākha gere ǂkhâǃnâ?”

Ti mas kherkheb tawa hâ hîna kha ge ǀgam ǃgâsaga, Jehovab ǃoaba-aon dikha sida oms ai ge hā. ǁÎkha ge ti daba ǀgam ǂkhanikha ge mā Light ti ǀon hâb hîna ge ǂHaiǂhais di ǂkhanisa ǁguiǃāba. Ti dab ge ǃgâiǃgâibasensa ge ūhâ i tsî nē ǂkhanina ge ūǃoa. Ti mas ge nē ǂkhaninas ge mû, o ge khomai tsoatsoa. ǀGuitsēs ge ǂhôan ǂkhanib ǃnâ ǂanǂansa ge mû ǃgâiǃgâibasensa ūhâ khoena ra ǁkhauǂuisa, în Elobmîsa ǁkhāǁkhāsen Light ti ǀon hâ ǂkhanis ǀkha. ǁÎs ge ge mîǁgui īs nîsa. ǁNāpas ge sī os ge ǁkhara tarekhoesa dao-amsa ge ǁkhowa-amba si. ǂKhanina ǃoman ǃnâ ūhâses ge ti masa ge dî, “Nē ǂkhanina du nepa ra ǁkhāǁkhāsen?” Nē kaikhoes ge ǃeream tsî ge mî: “Îo xūro, ǂgâxa re.” Saora wekheb ais ge ti masa sida ǀgôada ge ūsao. Tsî da ge ǁnās khaoǃgâ mâ wekheb hoaba gere sī.

ǀGui ǀhaos aib ge ǃgâsab nē ǂkhaniba ra ǃhoaǃgaoba, Psalmdi 144:15 sa gere khomai, mî gere sa ǁnān hîna Jehovaba ra ǃoaban ge ra ǃgâiaǂgao. Nē xoas ge kaise ge ǃgâibate  i tsî nau ǀgam xoara tsîna—1 Timoteub 1:11 mî ra sa ‘Jehovab ge ǂkhîb di Elo’ tsî Efeseǁîn 5:1 hîna ra ǂkhâǃnâ dasa î da ‘Jehovaba ǁgae.’ Mûǂan ta ge ge ǃgâiaǂgao ta ge nî ti Kuru-aoba ǃoabasa tsî ta ge nî gangan bi nē aiǂhanub ǃaroma. Nē ǀgam xūna ta ge hoaǁae gere dītsâ.

Sida tawa ge ǀgū i ǀhaohâb ge 32 kilometerga ge ǃnū i, Chicago ti ǀon hâ ǃās ǃnâ. Mâ wekheb hoaba da ge gere hâǃnâ tsîs ge Elobmîs ǃnâ ta ge ūhâ ǂansa gere kai. ǂÂihō ta ge ra ǀgui ǃnās ais ge Jethasa ǀhaos tawa ge ǃeream, ǁîsa ta ǂnû tsî ra ǃgâ hîna ta ge gere ǂâi: ‘ǁNāsa ta ge a ǂan’ ti. ‘Tita tsîn ge ti ǃoma ga khui hâ i ta ǃeream.’ Ti ǃereamde ta ge ge aiǂhumi tsoatsoa. ǂHâǂhâsa ge is ge, ti ǀgam ǃgâsakha tsî ti ǀgam ǃgâsa ra khami ta ge tita tsîna Jehovaba gere ǀgū. Tita ge 1941 ge ǁāǁnâhe.

ǃGōsase ta ge kai ǀhaos Cleveland, Ohios ǃnâ 1942 ge hâ is xa ra ǂâi. Amerikab ǃnâ hâ 50 ǀnî ǃādi ge telefoni ǃnâ-ū kai ǀhaosa gere ǃgâ. Sida omaris ge “tent-omdi” ǃnâ gere hâ ǀnî omaridi ǀkha kai ǀhaos ǀgūse. ǀGamǁî ǃhūbaib torob ge ge hâ-i tsîn ge Jehovab ǃoaba-aona ǃnāsase gere ǃgôaǃgonhe. ǃUi-a gu ge ǃgâsaga ǁîgu audodi ǃnâde gere ǃam. ǁÎgu ge ge mîǁgui mâ ǃuis hoasa gu ǁom ra ǃgâsana nî ǃûisa. Tsî xū-i ga ī o ǁîgu huderde ga ǁgâi hâ tsîn ge nauna hā tsî ga hui hâ. ǂÂi ta ge gere ‘Jehovab khoen ge mâ xū-i hoa-i ǃaroma aiǂhomisa.’ ǁGai xū-i ge ge ī tama hâ i, ǃnorasase ta ge ge ǁom.

Kuriga ǃkharu tsî ta ge ǁnā ǀkharib kai ǀhaos xa gere ǂâi. Mûǂan ta ge ge ti mamas ge ǂâiǂhansen tamas ka io ǃao tama hâ isa. ǁÎs ge ǀoaǀoasase Jehovab tsî ǁîb ǀapeǂhomis tsîna gere ǂgomǃgâ. ǁÎs ǃgâi aiǁgausa da ge tātsē ǀuru tide.

ǁNā ǀkharib kai ǀhaos aiǃâs ge ti mamasa ge ǁnaetisa aimâba-ao kai. ǁÎs ge ǃgaoǃgâxase ǀoasase Jehovaba ǃoabas xa ge hâ i ǃhoade gere ǃgâ. Oa da ra hînas ge ǁîsa ge mî: “Aiǃgu tsî ta ge aimâba-aose ra ǃoaba ǂgao, xawe ta ge ǁnāsa dī tsî ǁkhā ǁaeb ai oms tsîna ǃgâise kōǃgâ ǁkhā hō tide.” ǁNāpaxūs ge ge dî, ǁîsa da a hui ǁkhā ǃkhaisa. Îo, ti da ge ge mî tsîs ge mâ ǀgôa-i hoa-e ǀgam kamera ge mā ǃanuhe nîse ǁgoaga da ǀguiba nî ǂûǀhaos aiǃâ. Skola ǃoa da gere īs khaoǃgâs ge gere kō hoa oms a ǃanusa tsîs ge ǁnās khaoǃgâ aoǁnâ sîsen-e sī gere dī. Ti mamas ge kaise ge ǀhape ī xawes ge ǁîs ǀgôana ge ǁnāxūǃgâ tama hâ i. Skola xu da gere oaǀkhī midag ǂûs ǃaroma, os ge hoaǁae sida ǃaroma oms tawa ge hâ i. ǀNî tsēde da ge skoli khaoǃgâ ǁîs ǀkha aoǁnâ sîsen-e gere dī. Nēs ge ge hui da î da ǁnâuǃā aimâba-aose ǃoabas taena ǃkhōǂgā hâsa.

Tita ge 16 kurixa ta ge o, aimâba-aose ge ǃoaba tsoatsoa. Ti dadab ge noxoba Jehovab ǃoaba-ao tama hâ i xaweb ge mati ta aoǁnâ sîsenni ǃnâ ra aiǃgû ǀgaub xa ǁnâus xa ge ǃgâibahe i. ǀGui ǃuia ta ge ge mîba bi ǃgarise ta ra dītsâ xawe ta Elobmîsa ta nî ǁkhāǁkhā khoe-e hō tama hâsa. ǁNās khaoǃgâ ta  ge ǃnō tsî ǁnāpaxu ge dî “tita xa du Elobmîsa ǁkhāǁkhāhe ǂgao tama?” ǁAeroba nēs xa ǂâi tsîb ge ǁnāpaxu Elobmîs ǁkhāǁkhāsa ge ūǃoa. Ti dadaba ta ge ǂgurose Elobmîsa ge ǁkhāǁkhā tsoatsoa. Nēs ge kaise ge ǀō-aisa ī.

“The Truth Shall Make You Free” ti ǀon hâ ǂkhanisa kham ge gere sîsenū. ǁAerob khaoǃgâ ta ge ge hōǃâ ti dadab gere hui tesa î ta ǃgâi Elobmîs ôaǃnâ-ao tsî ǁgauǃnâ-ao kai. Aiǁgause ǀguitsēkham Elobmîs ǁkhāǁkhāsa ra dī hînab ge ti dadaba xoaǀgorasa khomai toa tsî ge mî: “Nēsi ta ge ra mû ǂkhanis tae-e ra ǁkhāǁkhāsa. Xawe matits a ǂan nē ǂkhanis a ǂhanusa?” ǁÎb dîsa ǃereams ǃgao ta ge ge aiǂhomisa tama hâ i. Tsî ta ge ge mîba bi, “nēsi ta ge ǃereamsa ūhâ tama xawe ta ge saora ǃnās ai nî ǃeream,” tsî ta ge ti ge dī. ǃHoaǃgao kham gere ǂâisa ge ǃeream ǁaraǃāde ta ge ge hō. ǁNās khaoǃgâ ta ge ge ǁkhāǁkhāsen, i ta hoaǁae ǃgam ôaǃnâsa dī, ǁnās nî huite xui-ao i ta ǃgâise Elobmîs ǁkhāǁkhās ǃgao aiǂhomisen. Nēs ge ge hui îkham aiǃgû tsî gagasise ǀgai. ǁÎb ge ǁkhāǁkhāse nîb gere xūna sîsenǂui tsî 1952 ge ǁāǁnâhe.

Tita ge 17 kurixa ta ge o, omsa xu ge doe ǂoa. ǁNā ǁaeb ais ge Jethasa sîsabese ge ǃoaba tsoatsoa tsîb ge Dona betelsa ǃoa ge ī. ǁÎra ge ǁnā ǁgaumâide kaise ge ǀnam-i, ǁnās ge kaise ge ǂkhâǃnâte. Tsî ta ge Betels tsî Giliad skoli ǃnâ ge xoaǂgāsen, Jehovab ai ta ge ge ǃâu, îb ǁîba mîǁgui mâpa ta nî ǃoabasa. ǀAmǂoasa ge tae-i? Tita ge 1946 Betelsa ǃoa ge ǁkhauhe.

ǃKharu ge kurigu ǃnâ ta ge Betels tawa ǂgui ǁgaumâide ge ūhâ i tsî ta ge ǁnās ǃnâ-ū ǂgui ǀasa xūna ge ǁkhāǁkhāsen. Tita ge 75 kuriga Betels tawa hâ tsî ta ge nē ǁaeb ǃnâ ǂgui xūna ge ǁkhāǁkhāsen aiǁgause, ǂkhanide kurus tsî mariǃgôas tsîna. Mati ta Betels tawa da ǂhâhâ xūna nî ǁama tsî nau ǃādi ǃoa xūna nî sî ǀgaub tsîna ta ge ge ǁkhāǁkhāsen. Haon ǂam-ai ta ge betels tawa ta ra ūhâ gagasi ǀapeǁguigu xa kaise a ǁkhoaxabahe. Aiǁgause da ge ǁgoas ǃoabas tsî Elobmîs ai ǃgaoǃgaosa ǃhoadi tsîna ra māhe.

Ti ǂkham ǃgâsab Karla xūs tsîna ta ge ge ǁkhāǁkhāsen, ǁîb ge Betels tawa 1947 ge hā. ǁÎb ge Elobmîsa ǃgâise ge ǂan i tsî ge ǃgâi ǁgauǃnâ-ao i. ǀNî ǃnās ai ta ge ge ǁgaumâihe î ta ǃhoasa mā tsî ta ge ǁîb ai huiba ge ǂgan. Karla ta ge ge mîba, ǃhoas ǀkha nî huite ôaǃnâs ǂkhanina ta ūhâsa xawe ta nēsa sîsenūs xa ǃgombahesa. ǁÎb ge ǀgui dîsa ge dîte, “Joel ǃhoasa tae-i xa hâ?” ǁÎb ge mî xū-e ta ge ǃkhaese ge ǁnâuǃā, ǃhoas ǀkha a huite ǁkhā  xūn ǀguina ta nî sîsenū ge īs ge. Nē ǀapemāsa ta ge tātsē ǀuru tide.

ǃGâiaǂgaob ǀkha da ga Betels tawa hâ ǂgao, o da ge nî dītsâ aoǁnâ sîsenni ǃnâ ǁhaosa. Nēs ge nî hui î da omkhâi ra ǁgamǀhaode ūhâ. Amerikab ǃnâ ge ǀguitsē a ī xū-e ta ge ra ǂâihō. Tita tsî ǀnî ǃgâsab tsîn ge ǁaeroba ǃkharu tsî ge ǃKhē xu ǂgō-ommi tsî Awake! ǂkhanib tsîna ūǃoa kaikhoesa ge sari. Mâi-aiǃâsen tsîkham ge ge mî, “nētsēkham ge khoena ra hui, în ǂkhâǃnâ ra xūna Elobmîsa xū ǁkhāǁkhāsen.” ǁÎs ge ge ǃeream, “Elobmîs xa i ga hâ, o ta ge ra ǁnâu ǂgao.” Sîkham ge ǁîsa Elob Gaosib tsî hā nî ǀasa ǃhūbaib xa hâ xoadi tsîna ge khomaiba. Nēs ge ǁîsa ge tsâǀkhā tsîs ge ǁîs omaris ǀnî khoen tsîna ge ǁkhau în saora ǃnās ai hā ǃgâbasen. ǁÎs tsî ǁîs aob tsîn ge ega Jehovaba ge ǃoaba tsoatsoa.

Tita ge ǃgamme ta nî ǃgâsasa 10 kuriga ge ôa, ti kaikhoesa ta nî ǀhao-ūs aiǃâ. Tae-e ge huite i ta ǃgâi tarasa hō? Jehovaba ǃoa ta ge nēs xa ge ǀgore. Tsî ta ge ge ǂâi tsoatsoa, ‘tita tsî ti taras tsîna tae-e nî dī ǃgamme toam ga o?’

Yankee ǂgās tawa ta ge 1953, ǂkharis kai ǀhaos tawa Mari Aniol ti ǀon hâ ǃgâsas ǀkha ge ǀhao. Maris tsî Jethas tsîn ge ǀguiba Giliad klas ǃnâ ge hâ i tsî ra ge ǀguiba sîsabese gere ǃoaba. Maris ge ǁkhoaǂgaxase ǁîs sîsabe ǁgaumâis Karibeani ǃnâs ūhâs xa gere ǁgambate. Tsî matikō Elobmîs ǁkhāǁkhātes ge ǁnā kurib ǃnâ a dīs tsîna. ǂAn gum ra khamim ge ge mû, hoam ǀgui gagasi mîǁguiga ūhâsa. Sîm ge ge ǀnamgu tsîm ge Aprili ǃnâ 1955 ge ǃgamme. Maris ge ǂgui ǀgaugu ǃnâ ǀkhaeb ase ge ī-i Jehovaba xu tsî ge ǃgâi aiǁgau-i ǁgae ǁkhats asa. ǁÎs ge māhes gere ǁgaumâis hoas ǃnâ ge ǂkhî i. ǃGarise sîsen, hoaǁae nau khoen ǂhâsiga kōǃgâ tsîs ge Gaosiba ǂgurose gere mâi. (Mat. 6:33) Sîm ge ǃnona kuriga ǃnarimâra sîsen-e ge dī tsîm ge 1958 Betelsa ǃoa ge ǁkhauhe.

ǂGui xūna ta ge Marisa xu ge ǁkhāǁkhāsen. Aiǁgausem ge ge mîǁgui îm tsēs hoasa Elobmîsa ǀguiba khomai, 15 ǁaraǃādem ge tsēs hoasa gere khomai. Khomai toa tsîm ge mâǂoa ra ǁaraǃāde gere ǁguiǃā tsî ǀguiba gere ǃhoaǃgao matim ǁnāsa sîm ûigu ǃnâ nî sîsenūsa. Maris ge sîsabeses gere ǃoaba os gere ǁkhāǁkhāsen xūn xa gere mîbate. Nē ǁgamǀhaodi ge ge huite, î ta ǃhoade ǃgâi ǀgaub ǃnâ mā tsî ǃgâsade ǃgâise ǂkhâǃnâ.—ǂKhm. 25:11.

Maris ge 2013 ge ǁō. Mûǂui ta ge ra ǀasa ǃhūbaib ǃnâ ǁkhawa ǁîs ǀkha sī ǀhaosa. Nēsi ta ge ge mîǁgui ǁkhāǁkhāsen ǀgara tsî Jehovab ai ǂgomaiǂnûisa ti ǂgaob hoab ǀkha. (ǂKhm. 3:​5, 6) Jehovab khoen ǀasa ǃhūbaib ǃnâ nî dī xūn xa ta ga ǂâi, o ta ge ǁkhaeǂgaohe tsî kai ǃgâiaǂgaoba ra hōǃâ. Nēs ge sida ǁGauǃnâ-aob xa ǀasa xūna ǁkhāǁkhāsen tsî ǁîb xa ǃnāsase ǁkhāǁkhāhes tsîna ǃkhōǂgā hâ. Jehovaba ta ge ǁkhāǁkhādeb ge xūn hoan ǃaroma ra gangan tsî ǁîb ǀkhomxaǂgaosib ǃaromas tsîna.