1. Elobmîs ǁaeb ǃnâ ge ûihâ i khoen ǃaroma i ge pere-e matikōse ǂhâǂhâsa i?

 ELOBMÎS ǁaeb ǃnâ ge ûihâ i khoen ge pere-i xa kaise ge ǂhâǂhâsabahe i. (Gen. 14:18; Luk. 4:4) Pere-i ge ǃnāsa ǁaeba gere ǂûhe tsîs ge Elobmîsa ǃkharagagu ǂûn xas ra ǃhoa ǃkhain ais tsîna ‘pere-i’ xa ǀgui ra ǃhoa. (Mat. 6:11; ǃNǃkh. 20:7) Jesub ge ǁîb ge dī ǀgam ǂanǂansa buruxa dīkha ǃnâ pere-e ge sîsenū. (Mat. 16:​9, 10) Johaneb 6ǁî danaǃâs ǃnâ da ge nē dīkha di ǀguib xa khomai ǁkhā. Nē ǃâba da ra ǃhoaǃgao khami da ge nî mû taena da a ǁkhāǁkhāsen ǁkhāsa.

2. Mâ ǁaen ge ǂgui khoena ǂû-e ǂhâhâ i?

² Jesub Apostelgu ge aoǁnâ sîsenni khaoǃgâ kaise ge tsâu hâ i tsî sâ ǁaeba ge ǂhâhâ i. Tsî gu ge ǂgaus ǃnâ ǂgâ tsî Jesub ǀkha Galileab huriba ge ǃgâu î gu sī sâ ǁkhā. (Mrk. 6:​7, 30-32; Luk. 9:10) Betsaidas ǃnâ gu ge ǃnōsa ǃkhai-i ai ge sī. Xawen ge khoena ge ǁnâu Jesub ǁnāpa hâsa tsîn ge ǂgui khoena ǁnāpa ge sī în ǁîba mû. Jesub ge ǁîna ǁaeba ge ūba hâ i. ǁÎb ge ǁaeba ū tsî ǁîna Gaosib xa ge ǁkhāǁkhā tsî ǀaesen hâna ge ǂgauǂgau. ǃKhae-i gere ama gu ge Jesub di apostelga gere ǂhâ, nē khoen mâpa ǂûn nî xū-e nî hōsa. ǀNî khoen ge ǂûn nî xū-e ge ūhâ i xawen ǃnāsa khoena ǃāsa ǃoa nî ī ge is ge în ǂû-e sī ǁnama. (Mat. 14:15; Jhn. 6:​4, 5) Jesuba tae-e ga dī hâ?

 JESUB GE PERE-I ǀKHA A DĪ BURUXA DĪB

3. Jesuba tae-e ǁîb di ǁkhāǁkhāsabega ge mîba î gu khoena dība? (Tsoatsoas ai hâ ai-īsiba mû re.)

³ Jesub ge ǁîb di apostelga ge mîba: ǁÎn nî ǂû-e ôa “ǃkhais ge ǂhâbasa tama hâ sago ǁîna ǂûn nî xū-e” nî mā amaga. (Mat. 14:16) 5 000 Khoen ge hâ i amaga i ge īǁkhā tide khami gere mûsen. Nēs ge ǀgôan tsî tarekhoedi tsîna ge ǃkhōǂgā hâ i, ǀnîsi î ge ǁaubexa 15 000 khoena ge hâ i ǂû-e ge ǂhâhâ īna. (Mat. 14:21) Andreab ge ge mî: “Nēpab ge axarob koro ǃhoroperegu tsî ǀgam ǁaurokha tsîna ūhâba hâ, xawe tarena ǁîna nētikō kai ǂnubis khoen ǃaroma?” (Jhn. 6:9) ǃHoro-i ǀkha kurusa pere-i ge ǃnāsa ǁaeba gere ǂûhe. Tsî ǂkhari ǁaun ge ǂō-i ǀkha tsoro-aihe tsî gere ǂnâǂnâhe. Xawe axab ge ūhâ i pere-i ge ǂgui khoena ǂûmasa ge ǂâu tama hâ i.

4. Johaneb 6:​11-13 sa xu da tae-e ra ǁkhāǁkhāsen? (Ai-īsiga mû re.)

⁴ Jesub ge khoena ǃhaokhoeǃkhōǃoaxasiba gere ǁgau ǂgao tsîb ge ǁîna ge mîba în ǀgarib ai ǃâdi ǃnâ ge ǂnû. (Mrk. 6:​39, 40; khomai re Johaneb 6:​11-13 sa.) ǁNāpaxub ge Jesuba papasaba gangansa pere-i tsî ǁau-i ǃaroma ge mā. Nēsa dīs ǃnâ-ūb ge ǁîba ge ǁgau, Elob ge nē ǂûna a māsa tsîb ǂû-i ǃaroma ra gangansa. Kaise i ge a ǂhâǂhâsa î da Jesub aiǁgausa sao tsî ǀgore ǂû da nîs aiǃâ, ǀguri da ga hâ tamas ka io da ga khoen ǀkha hâ xawes tsîna. Jesub ge ǁîb di ǁkhāǁkhāsabega ge mîba, î gu ǂû-e ǀgoraǂûi tsîn ge khoena ǂû tsî ge ǁâ. ǂÛ-i ge ge ǃgau tsîb ge Jesuba nē ǂû-i  nî āxuhesa ge ǂgao tama hâ i. Jesub ge ǁîb di ǁkhāǁkhāsabega ge mîba î gu ǃgau ge ǂûna ǀhaoǀhao î-i ega ǂûhe. Jesub ge ūb ge hâ-i xūna ǃgâise gere sîsenu, ǁnās ge ǃgâi aiǁgausa sida ǃaroma. ǁGûdu ga a o, nē ǃâba sîsenū re î sadu ǀgôana ǁgau tae-i ǃaroma î a ǂhâǂhâsasa ǂûn nîs aiǃân nî ǀgoresa. Tsî ǃhaokhoeǃkhōǃoaxasis tsî xūna naun ǀkha ǀgoragus tae-i ǃaroma ǃgâisa ǁgau re, Jesub ge dī khami.

5. Khoena tae-e gere dī ǂgao Jesub ge dī buruxa dīgan ge mû o tsî ǁîba tae-e ge dī?

⁵ Khoen ge Jesub ǁkhāǁkhā ǀgaub xa gere buru tsî ǁîb gere dī buruxa dīgu xas tsîna. ǁÎn ge ge ǂan i Moseb ge mîsa Elob kai kēbo-aoba nî sîsa tsîn ge gere ǂâi Jesub ge ǁnā kēbo-ao isa. (Deu. 18:​15-18) ǁÎn ge ǀnîsi gere ǂâi Jesub nî ǃgâi ǂgaeǂgui-ao kai tsî ǂûna hoa Israelǁaesa nî mā ǃkhaisa tsîn ge khoena Jesuba ‘ǀgaib ǃnâ gere gao-aodī’ ǂgao. (Jhn. 6:​14, 15) Jesub ga nēsa mā-am hâ, ob ge Jodeǁîn hîna ge Romeǁîn ǂgaeǂguis ǃnaga hâ în ǂgīǂgōsi xūn ǃnâ ga ǃâ hâ. Mā-am i ge? Hî-î. Tae-eb ge dī? Elobmîs ge ra mî Jesub ge ǀguri ǃhomma ǃoa ge ī ti. Nau khoen xab gere ǁgarihe xaweb ge Jesuba ǂgīǂgōsi xūn ǃnâ ge ǃâ tama hâ i. ǁNās ge kaise ǂhâǂhâsa xū-e ra ǁkhāǁkhā da.

6. Mati da Jesub di aiǁgausa a ǁgae ǁkhā? (Ai-īsiba mû re.)

⁶ Ama as ge khoen ge ǂgan da tide î  da ǁîna buruburu xa ǀgaub ǃnâ ǂû-e mā, ǀaeba xu ǂgauǂgau tamas ka io ǁîn gao-ao kai. Xawen ge ǀnîsi a mîba da ǁkhā, î da ǂgīǂgōsi xūn ǃnâ ǃâ tamas ka io khoe-i hîna ǃgâise nî ǂgaeǂgui ti ra mî-e ǁhûiba. Jesub ge amase ǃgâi aiǁgausa ge ǁnāxupa da. Jesub ge ǂgīǂgōsi xūn ǃnâ ge ǃâ tama hâ i, ǁnās ǀkhab ge ega ge mî: “Ti Gaosib ge nē ǃhūbaib di tama.” (Jhn. 17:14; 18:36) Xristeǁîn ase da ge Jesub gere ǂâi khami ǂâi tsî ǁîb aiǁgausa nî ǁgae. ǁÎb khami da ge Elob Gaosiba ǂgomǂgomsase ǂkhâǃnâ, nauna ǁnā Gaosib xa mîba tsî ra ǀgore îb ǁnā Gaosiba hā. (Mat. 6:10) ǂGui xūna da ge Jesub ge ǂgui khoena buruburuxase pere-i ǀkha ǂûma ǀgauba xu a ǁkhāǁkhāsen ǁkhā.

“ǂGUI PERE-i ǂÂIBASENS”

7. Jesuba tsî apostelgu tsîna tae-e ge dī? (Johaneb 6:​16-20)

⁷ Jesub ge khoena ǂûmā toa ob ge ǁîb apostelga Kapernaumsa ǃoa ge oa kai ǂgaus ǀkha. Tsîb ge ǁnāpaxu ǃhomga ǃoa ge ī, khoen ge gao-aob ase gere mâibi ǂgao amaga. (Khomai re Johaneb 6:​16-20 sa.) Apostelgu ǂgaus ǀkha ra ǃnari hînab ge ǀgaisa ǂoab tsî hurib ǃgabigu tsîna ge tsoatsoa. Tsîb ge Jesuba ǁgammi ai ra ǃgûse ǁîgu ǃoa ge sī. Tsîb ge apostel Petruba ge ǁkhau îb tsîna ǁgammi ai ǃgû. (Mat. 14:​22-31) Jesub ge ǂgaub ai a ǂoa khamib ge ǂoaba ge ǃgom. ǁKhāǁkhāsabegu ge burugâ hâse ge mî “amase, Elob Ôats ge satsa.” a (Mat. 14:33) Xawe gu ge ǁîga noxopa nē buruburuxa dī-i tsî noxopa nî ī-i tsîn ra ǃgûǀhao ǀgauba ge mûǂan tama hâ i. Markub ge ra ǀaro: “O gu ge kaise ǃhuri tsî ge buru. Peren tawa gu ge ǁnâuǃākaisen tama i tsî ǁîgu ǂgaogu ge gorose karokarosen hâ i amaga.” (Mrk. 6:​50-52) ǁKhāǁkhāsabegu ge ge ǁnâuǃā tama hâ i, Jehovab ge Jesuba ǁnā ǀgaiba a māsa îb buruburuxa dīga dī. ǁNās khaoǃgâb ge Jesuba ǁkhapa buruxa dīb pere-i dib xa ge ǃhoa tsî ǀnî hâ xū-e ge ǁkhāǁkhā da.

8-9. Khoena tae-i ǃaroma Jesuba gere ôa? (Johaneb 6:​26, 27)

⁸ Jesub ge ǂûmā ǃgubis di khoen ge ǁîn di sorosi ǂhâsigu tsî turagu ai ǀgui ǂâisa ge ǂnûi hâ i. Mâ ǀgaub ǃnâ? ǁÎn ge sao ra tsēs ai ge mû Jesub tsî ǁîb apostelgu tsîn ge īsa. Khoen ge Tiberiahuriroba xū ra hā ǂgaudi ai ge ǂoa tsî Kapernaumsa ǃoa ge ī în Jesuba sī ôa. (Jhn. 6:​22-24) Elob Gaosib xan gere ǁnâu ǂgao amagan ge ǁnāsa dī? Hî-î. ǁÎn ge Jesub xa noxopa pere-e gere māhe ǂgao. ǁNāsa da māti a ǂan?

⁹ ǃGaoǃgâ re tae-i ge īsa Jesuban ge Kapernaums ǁanǁkhuib ǃnâ ǀhao-ū o. Jesub ge ǁîna ǃoaǃū ge mîba, ǂû-en da ǂhâba amaga ǀguin ǁîba ra ôasa. ǁÎb ge ge ǂanǃgâ pere-e ǂû tsîn ge ǁâsa. Jesub ge ge mî ǁîn “ǂûn hîa ra toan ǃaroma” ǀgui ra saobi di. ǁÎnab ge ge mîba în “ǀamo ûiba ra mā ǂûn” ǃaroma sîsen. (Khomai re Johaneb 6:​26, 27 sa.) ǁÎnab ge ge mîba ǁîb ǁGûb ǁnāti ī ǂûna nî mā nîsa. ǀAmo ûiba nî mā nî ǂû ī xan ge ǁnâu, on ge khoena kaise ge buru. Mâ ǂû-e ǁnāsa a dī ǁkhā? Tsî matin ǁnāsa a hō ǁkhā?

10. Khoena tae-e nî dī ge īsa în “ǀamo ûiba” hō ǁkhā?

¹⁰ ǁNā Jodeǁîn ge gere ǂan ǂgao tae-en nî dīsa în ǁnā ǂû-e hō. ǁÎn ge ǀnîsi Moseb ǂhanugu xa gere ǃhoaǃgaohe “sîsengu” xa  gere ǂâi hînan a dī ǁkhā ga. Xaweb ge Jesuba ǁîna ge mîba: “Nēs ge Elob ǁîsa du nî dī ǃkhaisa ǂhâba hâsa: ǁÎb xa sîhe hâb ǃnâ ǂgom re.” (Jhn. 6:​28, 29) Jehovab ge sîb ǃnâ da ge ǂgomsa nî ūhâ, “ǀamo ûiba” da ga hō ǂgao o. Jesub ge nēs xa ǀnai ǁîn ǀkha ge ǃhoa hâ i. (Jhn. 3:​16-18, 36) Jesub ge ega ǃnāsases tsîna gere ǃhoa, tae-i ge ǂhâbasa īsa ǀamo ûiba hōs ǃaroma.—Jhn. 17:3.

11. Jodeǁîna mati ge ǁgau ǂû-i xan ge ǂhâǂhâsabahe isa? (Psalmdi 78:​24, 25)

¹¹ Jodeǁîn ge Jesub ǃnâ ǂgomsa ǁgaus di ǁkhāǁkhāde ge ūǃoa tama hâ i. Jodeǁîn ge ǁîba ge dî: “Mâ sao-ets kha ra dī, mû tsî da nî satsa ǂgomse?” (Jhn. 6:30) Tsîn ge aiǃgû tsî ge mî Moseb ǁaeb ǃnân ge khoena buruburuxa ǀgaub ǃnâ mana-e a hōsa în ǂû, ǁnā i ge ge ǁîn di tsēkorebe ǂû i. (Neh. 9:15; khomai re Psalmdi 78:​24, 25 sa.) Nēs ge ra ǁgau ǁîn ge ama pere-e hōs ai ǀgui ǂâisa ǂnûi hâ isa. Saoraseb ge Jesuba ‘ǀhommi di pere-i’ xa ge ǃhoa ǀamo ûiba a mā nî ǁkhā-e, xawen ge ge dî bi tama hâ i tae-eb ra ǂâibasensa. (Jhn. 6:32) ǁÎn ge sorosi ǂû-i ai ǂâisa ge ǂnûi hâ i tsî ǁnās ǀkha Jesub gere ǁkhāǁkhā amab ai ǂâisa ge ǂnûi tama hâ i. Tae-e da nē ǃnaeǃkhaisa xu a ǁkhāǁkhāsen ǁkhā?

SIDA A ǂHÂǂHÂSABA XŪ-I

12. Jesuba mati ge ǁgau tae-i a ǂhâǂhâsasa?

¹² ǂHâǂhâsa xū-e da ge Johaneb 6ǁî danaǃâsa xu a ǁkhāǁkhāsen ǁkhā. Eloba ǁnauǀnam tsî ǁîb ǀkha ǀgū ǀhōsagusisa ūhâs ge sada nî ǂhâǂhâsaba. ǁGâuab xab ge ǃâitsâhe ob ge Jesuba ge ǁgau Jehovaba ǁnauǀnams kaise a ǂhâǂhâsasa, sorosi ǂû-i xa. (Mat. 4:​3, 4) ǃHommi di aoǁnâs tawas tsînab ge Jesuba ge ǁkhāǁkhā, matikōse i a ǂhâǂhâsasa î da ǃgâi ǀhōsagusisa Jehovab ǀkha ūhâ. (Mat. 5:3) ǁNā-amaga da ge nî dîsen, ‘ûi ta ra ǀgauba ra ǁgau Jehovab ǀkha da ūhâ ǀhōsagusis a ǂhâǂhâsasa, sorosi turagu ǂam-ai?’

13. (a) ǂÛ-e ǂûsa tae-i ǃaroma tsū tama hâ? (b) Pauluba Xristeǁîna mâ ǃkhâikhomsa ra mā? (1 Korinteǁîn 10:​6, 7, 11)

¹³ Tsū tama i ge hâ ǂhâba da ra xūna ǀgores ǃnâ-ū ǂgansa tsî ǁîna xu ǃgâiba hōsa. (Luk. 11:3) Elobmîs ge ra mî “khoeba kha ǃgâiba bi tama i hâ, ǂû tsîb nî ā ǃkhaisa . . . nēs on ra Eloba xu ra hā amaga.” (Aoǁn. 2:24; 8:15; Jak. 1:17) Xawes tsîna da ge noxopa aiǃgû tsî nî dītsâ î gu sorosi ǂhâsiga sada ûib ǃnâ tā ǂguro ǃkhaisa ūhâ. Apostel Paulub ge Xristeǁîna mîba xūna xu da ge nēsa a ǁkhāǁkhāsen ǁkhā. ǁÎb ge Israelǁaes ge ǃgaroǃhūb ǃnâ dī ǁgai xū-e ǃoa ge ǁnaeǁgau, Sinaiǃhommi ǀgūse ge ī xū-i tsîna ǃlkhōǂgā hâse. ǁÎb ge Xristeǁîna ge ǃkhaikhom în tā “ǂkhababa tura . . . ǁîn gere tura khami.” (Khomai re 1 Korinteǁîn 10:​6, 7, 11 sa.) Jehovab ge ǁnā Israelǁîna buruburuxa ǀgaub ǃnâ gere ǂûma xawen ge ge xūǃgunuxa ī. Tsîs ge ǁnāsa ǃgâi tama ǀamǂoasa ge ūhâ i. (Num. 11:​4-6, 31-34) ǃHuniǀurib ǀkha kuru-e hâ tsâuban gere ǃoaba ǁaeb ain ge Israelǁîna ge ǁgau ǂûs, ās tsî ǁkhoaxa ǁaeba ūhâs xan kaise a ǂhâǂhâsabahesa. (Eks. 32:​4-6) Paulub ge Jerusalems tsî Tempeli nî hîkākāhes aiǃâ ge ûi hâ i Israelǁîn aiǁgausa ǃkhâikhoms ase ge mā. Sada tsîn ge nē ǃhūbaib nî hîkākāhe ǁaeb aiǃâ ûi hâ tsî i ge kaise a ǂhâǂhâsa î da Paulub di ǃkhâikhomsa ǃgaoǃgâ tsî tā Israelǁaesa ǁgae.

14. Elobmîsa tae-e ǀasa ǃhūbaib ǃnâ nî hâ ǂûn xa ra mî?

¹⁴ Jesub ge “sida tsēkorebe” pere-i xa  a ǃhoa, ob ge Elob ǂâis “ǀhommi ǃnâs ra īs ǁkhās khami” hūbaib ai nî ī ǁaeba ǃoa gere ǁnaeǁgau. (Mat. 6:​9-11) ǃHūbaib mati nî īs xa du ra mûnan-ai? Elobmîs ge ra mî, Elob ǂâis ǃgâi ǂûn tsîna ǃkhōǂgā hâsa. Jesajab 25:​6-8 ge ra mîba da ǂgui ǁkhaoxa ǂûn ǃhūbaib ai nī hâsa hoa khoen ǃaroma. Psalmdi 72:16 ge ra mî: “Ab ǃhoroba ǃnāǂamsase ǃhūb ǃnâ hâ, ab ǃhomgu ai hâ.” Sado a ǃgâiba ǂû-e du nî sâi ǁaeba ǃoa du ra mûǂûi? Sadu draipe ǃhanaba ǂgā tsî sadu xûi-e aitsama kurusa ǃoas tsîna du ge a mûǂûi ǁkhā. (Jes. 65:​21, 22) Hoa khoen ge ǃhūbaib ǂhawase nēti ī xūna nî ǀama.

15. Khâisa nî māhe khoena tae-e nî ǁkhāǁkhāsen? (Johaneb 6:35)

¹⁵ Khomai re Johaneb 6:35 sa. Jesub ge pere-i tsî ǁau-i tsîna ǂûmā khoen xa ǁkhapa ǂâi-oa re. Hānî khâis ǃnâ du ge ǀnîsi ǀnîn ǀkha nî ǀhao. ǃKharu ge ǁaeb ǃnân ge ǂgomsa ǁgau tama hâ i xawen ge ǁîn tsîna ǀnîsi khâisa a hō ǁkhā. (Jhn. 5:​28, 29) ǁÎn ge noxopa sao ra mîdi Jesub ge mîde nî ǁkhāǁkhāsen: “Tita ge ûib di pereta. Tita ǃoa ra hā-i ge tātsē ǃâ tide.” ǁÎn ge Jesub xoremarib ǁguibas ǃnâ ǂgomsa nî omkhâi. ǁNā ǁaeb ǃnâ i ge khâisa ra māhen tsî ǀgôan ǀasa ǃhūbaib ǃnâ ra ǃnaen tsîn hoana amaba Jehovab tsî ǁîb ǂâis tsîn xa nî ǁkhāǁkhāhe. Khoena da ga hui o în ǀgū ǀhōsagusisa Jehovab ǀkha ūhâ, os ge nēsa kai ǂkhîba nî māda ǀasa ǃhūbaib ǃnâ da nî ǂû pere-i ǃgâ-ai.

16. Tae-e da sao ra ǁkhāǁkhāǃâs ǃnâ nî ǁkhāǁkhāsen?

¹⁶ Nēsi da ge Johaneb 6ǁî danaǃâs ǃnâ da ge nē dīkha di ǀguib xa khomai ǁkhā. Nē ǃâba da di ǃârob ǀguiba go ǃhoaǃgao. Xaweb ge Jesuba noxopa ǃnāsase “ǀamo ûib” xa ge ǁkhāǁkhā. Jesub gere ǃhoa-ū Jodeǁîn ge ǁîb gere ǁkhāǁkhā xūna ǂōrisase nî ǃgâ ge īs ge. Tsî sada tsîn ge ǁnāsa nî dī. Johaneb 6ǁî danaǃâs ǀkha da ge saora ǁkhāǁkhāǃâs ǃnâ nî aiǃgû.