Apostel Paulub ge ǁîb ǀkha ǀguiba ra ǃoaba ǀhaohâb ǃûi-aob, Timoteuba ǃoa sao rase ge xoa: “Elob tsî Xristub Jesub tsî ǁhûisa ǀhomǃgāgu tsîn di ǂans ǃnâ ta ge ǁkhoase ra mîmā tsi, ǀkhāǁhûi tamase tamas ka io ǀō-aisa khoe-e ǃkhōǂuibasen tamasets nî nē ǁgui-aidi hoade ǁnâuǀnam ǃkhaisa.”—1Tim. 5:21.

Mâ ǀhomǃgāgu xa da ra ǃhoasa ǂans ǃaroma da ge aibe nî ǃhoaǃgao, mâ ǀhomǃgān nē ǃgupis ǃnâ ǃkhōǂgāhe tamasa. ǃGāsa î ge a nēn ge 144 000 ǂhauhesa tama hâ i ǃkhaisa. Paulub ge Timoteuba ǃoa xoa ǁaeb ǃnâ î ge ǂkhauhesana noxopa ǀhommi khâisa ge hō tama hâ i. Apostelgu tsî nau ǂkhauhesan tsîn ge noxopa ge gagasi kurusabe tama hâ i. ǁNā-amaga î ge ‘ǁhûisa ǀhomǃgāga’ ǁîna ǃoa ǁnaeǁgau tama.—1Kor. 15:​50-54; 1Tes. 4:​13-17; 1Jhn. 3:2.

ǁNāsa hâ tsî î ge “ǁhûisa ǀhomǃgāga” kai ǁgammi dâus ǃnâ ge ǁnâuǀnam ǀhomǃgāga ǃoa ǁnaeǁgau tama. ǁNā ǀhomǃgāgu ge ǁGâuaba sao tsî ge demon kai tsî gu ge ge Jesub khākhoe kai. (Gen. 6:2; Luk. 8:​30, 31; 2Pet. 2:4) Hānîǁaeb ǃnâ gu ge 1 000 kuriga kai āb ǃnâ nî ǃgaeǂnûihe tsî ǁnāpaxu ǁGâuab ǀkha ǀguiba nî hîkākāhe.—Jud. 6; J.ǂHa. 20:​1-3, 10.

“ǁHûisa ǀhomǃgāgu” Paulub gere mî gu ge, ǀnîsi ǀhommi ǃnâ ge hâ i ǀhomǃgāgu hîna ge “Elob tsî Xristub Jesub” tsîna gere ǂkhâǃnâga.

ǂGomǂgomsa ǂnubis ǀhomǃgāgu ge hâ. (Heb. 12:​22, 23) Jehovab ge hoa ǀhomǃgāna ǀgui sîsen-e, ǀgui ǁaeb ai mā tama. (J.ǂHa. 14:​17, 18) Aiǁgause, Jehovab ge ǀgui ǀhomǃgāb ǀguiba ge ǂgan îb 185 000 Asiriaǁî soldaga ǃgam. (2Gao. 19:35) “Khoen Ôab ge ǁîb ǀhomǃgāga nî sîǂui tsî gu ge ǁîb Gaosiba xu hoa khoen, ǁorena ra ǃaroman tsî ǁgauoǃnân tsîna nî ǀhaoǀhao.” Xawe î ge ǀnîsi ǂgui ǀhomǃgāna ge ǁgaumâisa î. (Mat. 13:​39-41) ǀNîn ge ǀnîsi nî ǁgaumâihe “ǁîb di ǃkhōǂuisabena” gu nî ǀhaoǀhaose. (Mat. 24:31) Tsî î ge nauga ǁgâumâisa sida gu nî ‘ǃûise.’—Psa. 91:11; Mat. 18:10; ǀgopeǀnō re Mateub 4:11; Lukab 22:43 sa.

“ǁHûisa ǀhomǃgāgu” 1 Timoteub 5:21 ǃnâ ra mîhe gu ge ǀnîsi ǀō-aisa ǁgaumâide ge ūhâ i, nēs ge ǀnîsi ǀhaohâga kōǃgâs ǀkha huisa ge ǃkhōǂgā hâ i. Nē xoas ǃnâb ge Pauluba ǀhaohâb ǃûi-aoga ǀapemāde gere mā, mati gu ǁîgu ǁgaumâide nî sîsenǂamsa tsî ǁnān hîna ǀhaohâb ǃnâ hân mati ǀhaohâb ǃûi-aoga nî ǁnâuǀnamsa. Paulub ge ge mî ǀhaohâb ǃûi-aogu “ǀkhāǁhûi tamase” ǁîgu ǁgaumâide nî dīǀoaǀoasa tsî gu mîǁguiga ǃamkuse ǂâiǃgâ tamase dī tidesa. ǁNāpaxub ge Pauluba ǂhâǂhâsa ǃaromas ǁnā ǁnamasa sao-ais disa ge mā. ǁÎb ge ge mî ǀhaohâb ǃûi-aogu ǁîgu ǃgâsana “Elob tsî Xristub Jesub tsî ǁhûisa ǀhomǃgāgu” aiǃâ ra ǃoabasa. Nēs ge ra ǂâibasen Jehovab, Jesub tsî “ǁhûisa ǀhomǃgāgu” tsîn ge ra kō mati gu ǀhaohâb ǃûi-aoga ǀhaohâba ra kōǃgâ ǀgausa. ǃGāsa î ge a ǀnî ǀhomgagu ǀhaohâga kōǃgâs ǃaroma ǁgaumâihe hâ ǃkhaisa. Aiǁgause ǁkhauba, mûǂam, aoǁnâ sîsen-e kōǃgâ tsî gu ge Jehovaba mû gu ra xūna ra mîba.—Mat. 18:10; J.ǂHa. 14:6.