1. Tae-e da a dī ǁkhā î da Jehovaba ǂkhîǂkhî?

 ǂÂI RE ǀnam du a khoe-e du îsa tsî sîsenū ǁkhā î a ǀkhaeba ra māsa. ǁGaise du ge nî tsâ khoe-i ga ǁnā ǀkhaeba kas ǃnâ ǂgā tsî sîsenū tama ga ra io. Xawe du ge nî ǂkhî ǁnā khoe-i ga gangan du tsî ǁnā ǀkhaeba sîsenū o. Nē aiǁgausa mati Jehovab ǀkhaeb, xoremarib dib ǀkha ra ǃgûǀhao? Jehovab ge ǁîb ǀgôaba ge mā îb ǁōba da. Jehovab ge kaise ra ǂkhî ǁîb ǀō-aisa ǀkhaeb tsî ǀnammi tsîna da ra ǃgôaǃgâsa da ga ǁgau o. ǁÎb ǀnammi ge ge ǃaroma îb xoremariba mā da.—Jhn. 3:16; Rom. 5:​7, 8.

2. Tae-e da nē ǁkhāǁkhāǃâs ǃnâ nî ǃhoaǃgao?

² ǁAeb ra ī khami da ge xoremariba da ūba hâ ǃgôaǃgâsiba a ǂoaǃnâ ǁkhā. Elob mā da hâ ǀkhaeba da ǃkhai-i ai sâube tsî ǁî-i xa ǂâi tama khami î ge nî tsâ. ǁNās nî īsa da ga ǂgao tama io, o da ge ǁaeb hoaba Elob tsî Xristub dība da hâ xūna nî ǂâiǃgâ. Nē ǁkhāǁkhāǃâs ge nî hui da ǁnāsa dīsa. Xoremariba xu da nēsi tsî hānîǁaeba xu nî ǀama ǀgausa da ge nî ǃhoaǃgao tsî da ge nî mû tae-e da a dī ǁkhāsa î da Jehovab ǀnamma ǃgôaǃgâ, ǃgōsase Jesub ǁōb ǂâiǂâisens ǁaeb ǃnâ.

MATI DA NĒSI ǃGÂIBA RA ǀAMA ǀGAUB

3. Mâ ǀgaub ǃnâ da xoremariba xu nēsi ra ǀama?

³ ǀNai da ge Xristub xoremarib ǁguibasa xu ra ǀama. Aiǁgause, xoremarib māhe hâ amagab ge Jehovaba sida ǁorena ra ǀûba. ǁGarihe tamab ge hâ sida ǀûbasa, xaweb ge ra ǀûba da ǂgao. Psalmdi xoa-aob ge Jehovab  ǀûbaǀnamxasibab ra ǃgôaǃgâ ti ge mî. ǁÎb ge ge mî: “Sats ǃKhūts ge ǃgâi tsî a ǀûbaǀnam.”—Psa. 86:5; 103:​3, 10-13.

4. Jehovaba ham-i ǃaroma xoremariba ge mā? (Lukab 5:32; 1 Timoteub 1:15)

⁴ ǀNî khoen ge Jehovab xa ǀûbahesan anu tama khami ra tsâ. Hoa da ge ǀûbahesa anu tama hâ. Apostel Paulub ge ge mûǂan ǁîb “apostelse ǂgaihesa anu” tama hâsa. Xaweb ge ǀaro tsî ge mî, “Elob di ǀkhomma xus ge nē ta ī khami ta isa.” (1Kor. 15:​9, 10) Sida ǁorena xu da ga ǃhobasen, ob ge Jehovaba nî ǀûba da. Tae-i ǃaroma? Anu da hâ amagas ose xawe ǀnamdab a amaga. Jehovab ǀûbaba du anu tama hâ ti du ra ǂâi amaga du ga ǁgaise tsâ o, ǂâis ǃnâ ūhâ, Jehovab ge xoremariba ǁore-e dī tama khoen ǃaroma mā tama. Xaweb ge xoremariba ǀoasa kurusa ūhâ taman, ǁîn ǁorena xu ǃhōbasen tsî ra dawa ǂgaon ǃaroma ge mā.—Khomai re Lukab 5:32; 1 Timoteub 1:15 sa.

5. ǂHâbasa-e Jehovab ǀkhomxaǂgaosiba nî ǁgau dasa? ǁGuiǃā re.

⁵ Tā da ge ǂgui kuriga da Jehovaba ǃoaba hâ amaga, ǁîb xa ǀûbahesa da anu hâ khami nî tsâ. Ama as ge Jehovab ra ǃgôaǃgâsa ǁîba da ge dība xūna. (Heb. 6:10) ǁÎb ge ǁîb ôaba xū-e ǂgan-oa tamase ge mā da. Sida ra dība bi ǃgâi xūnab nî matare-oa da amagas ose. ǁNā-amaga î ge ǂhanu tama hâ, Jehovaba da ǂgui xūna dība hâ amaga da ǁîb xa ǀûbahesa anu hâ ti ǂâisa. Ti da ga ǂâi, o i ge ra ǂâibasen xoremariba da ǂhâ tama hâ ti.—ǀGopeǀnō re Galateǁîn 2:21.

6. Tae-i ǃaromab ge Pauluba Jehovaba ǃgarise gere sîsenba?

⁶ Paulub ge ge ǂan i, Elob xa ǀûbahesab anu tama hâsa. O tae-i ǃaromab ge Jehovaba ǃgarise gere sîsenba? Nēsa dīs ǃnâb ge ge ǁgau, Jehovab ǃgâisib tsî ǀkhomxasibab ra gangansa. (Efe. 3:7) Paulub khami da ge Jehovaba ôasase ra ǃoaba, ǁîb ǀkhoma da anu hâsa ǁgaus ose xawe ǃgôaǃgâ da rasa ǁgaus ǃaroma.

7. Mâ ǀgaub ǃnâ da xoremariba xu nēsi ra ǀama? (Romeǁîn 5:1; Jakobub 2:23)

⁷ ǀNî hâ ǀgaub hîna da xoremariba xu nēsi ra ǀamab ge, ǀgū ǀhōsagusisa Jehovab ǀkha ūhâsa. a ǃKharu go ǁkhāǁkhāǃâs ǃnâ da go ǁkhāǁkhāsen khami da ge ǃnae da ge, o Jehovab ǀkha ǀhōsagusisa ge ūhâ tama hâ i. Xawe xoremarib ge māhe amaga da ge “ǂkhîba” Elob ǀkha a ūhâ ǁkhā tsî ǁnās ǃnâ-ū ǁîb ǃoa a ǀgū ǁkhā.—Khomai re Romeǁîn 5:1; Jakobub 2:23 sa.

8. Tae-i ǃaroma da ǀgores aiǂhanuba nî ǃgôaǃgâ?

⁸ Jehovaba ǃoa ǀgores ge kaise a ǀō-aisa, ǁnās ge ǁîb ǀkha da ūhâ ǀgū ǀhōsagusis xa ra ǃaromahe. Jehovab ge ǀhaodi tawa i ga ǀgorehe o ǀgui ǃgâ tama xawe ǁîb ǃoaba-aon ǀguri ra dī ǀgoredi tsîna ra ǃgâ. ǀGore da ga, o da ge ǀorose ra ǂâiǂhansen xawe ǁnā-i ǀgui-e da ge ǀgoresa xu ǀama tama. ǀGores ge Elob ǀkha da ūhâ ǀhōsagusisa ra ǀgaiǀgai. (Psa. 65:2; Jak. 4:8; 1Jhn. 5:14) Jesub ge ǃhūbaib ai hâ i, ob ge ǁîba hoaǁae gere ǀgore, Jehovab ǀgoresa ra ǃgâ ǃkhaisab ge ǂan i amaga. ǀGores ge ǁîb Îb ǀkhab ge ūhâ i ǀhōsagusisa gere ǀgaiǀgai. (Luk. 5:16) Kaise da ge ra gangan,  Jesub ǁguibas ǃaroma da Jehovab ǀhōsa kai tsî ǁîba ǃoas tsîna a ǀgore ǁkhā ǃkhaisa.

HĀNÎǁAEB ǃNÂ DA NÎ ǀAMA ǀGAUB

9. ǂGomǂgomsa ǃoaba-aona mati xoremariba xu ǃgâiba nî ǀama, hānîǁaeb ǃnâ?

⁹ Jehovab ǂgomǂgomsa ǃoaba-aona mati xoremariba xu hānîǁaeb ǃnâ nî ǀama? Jehovab ge ǁîna ǀamo ûiba nî mā. ǂGui khoen ge ra ǂâi ǀamose ûis a īǁoasa, khoen ra ǁō amaga. Xawe Jehovab ǂâibasen ge īs ge în khoena ǀamose ûi. Adammi ga ǁore tama hâ, o i ge ǀamose ûis a īǁoa ti ra ǂâi khoe-e ga ǀkhai hâ, hoa khoen ge ǀamose ga ûi hâ. ǀAmosib kose da a ûi ǁkhāsa ǁnâuǃās ga ǃgom, xawe da ge ra ǂgom ī-i nîsa. Jehovab ge ǀgapi marisa matare ǃkhais ǃaroma, ǁîb ôab di ûib ǀkha.—Rom. 8:32.

10. ǂKhauhesan tsî nau gūn tsîna mâ ǃâubasensa ǃoa ra mûǂui?

¹⁰ ǀAmo ûiba xu da ga hānîǁaeb ǃnâ ǃgâiba ǀama xaweb ge Jehovaba ra ǂhâba, î da nēsi ǁî-i xa ǂâi. ǂKhauhesan ge Jesub ǀkha ǀhomma xu ǂgaeǂguisa ra mûǂui. (J.ǂHa. 20:6) Nau gūn ge ra mûǂui paradais ǃhūbaib ai ûisa, tsûb, ǃgomsin tsî tsûaǂgaob tsîn ǁkhapa hâ tidesa. (J.ǂHa. 21:​3, 4) Sadu tsîna a nau gūn di ǃâ ǀamosib kōse ûis di ǃēsa ūhâ do? ǀHomma ǃoa īs ǃâubasens ge ǃhūbaib ai ǀamose ûis xa ǀō-aisa tama hâ. Nē ǀkhaekha ge ǀguitikōse a ǀō-aisa. Jehovab ge ge kuru da î da ǀamose ǃhūbaib ai ǁan, ǁnās ǀkha î ge ǃhūbaib ai ǀamose ûisa kaise ra ǃgâiaǂgao kai da.

11-12. Mâ xūna ǃoa da ra mûǂui Paradais ǃnâ? (Ai-īsiba mû re.)

¹¹ Mûnan-ai re sa ûib mati nî īsa, paradais ǃhūbaib ai. Sats ge ǀaesen tsî ǁōs xa ǁkhapa ǂâiǂhansen tide. (Jes. 25:8; 33:24) Jehovab ge ǂhâ du hâ xūn hoana nî mā du. Tae-i xa du ǃnāsase ra ǁkhāǁkhāsen ǂgao? Xamanin, mûsik-e  ǀhurus tamas ka io teken sats ra ǁkhāǁkhāsen ǂgao? Paradais ǃnâ da ge omde om tsî tekensa a ǂan khoen ǂhâsiba nî ūhâ. ǂÛna nî aiǂhumi, kuru-ūhe ra xūna ra kuru khoen tsî nî ǃhana ǂgā khoen ǂhâsib tsîn ge nî hâ. (Jes. 35:1; 65:21) ǀAmosib kōsets ga ûi, ots ge hoaǁae ǁaeba nî ūhâ nē xūna dīsa.

¹² Kai ǃgâiaǂgaob ge nî ī, khâisa māhe hâna ǁkhoreǁharesa. (ǃNǃkh. 24:15) Mûnan-ai re matits Jehovab xa ǂgui xūna ǁîb kurusa xu nî ǁkhāǁkhāsen ǀgausa. (Psa. 104:24; Jes. 11:9) Jehovaba da ge tsûaǂgao kai tide tsî ǀûbaba ǂan tamase ǁîba nî ǃoaba. Hānî ǀkhaegats “ǁaerob di ǁkhoab” ǀkha nî ǃkhōǃhuni? (Heb. 11:25) Tātsēs tsîna. Hānîǁaeb ge kaise nî ǁkhoaxa, nē ǃhūbaib ǃnâ da ūhâ xūn xa. ǂÂis ǃnâ ūhâ Paradais xa da ge ǁhapos ǀguisa dī tama hâ xawe nēs ge nî ama ī. Nēs ge Jehovab ge ǁîb Ôaba ǁguibas ase māda o ge īǁkhā.

JEHOVAB ǀNAMMA DU RA ǃGÔAǃGÂSA ǁGAU

13. Jehovab ra ǁgau da ǀnamma da mati ǃgôaǃgâsiba a ǁgau ǁkhā? (2 Korinteǁîn 6:1)

¹³ Mati da Jehovab ge mā xoremarib ǁguibasa ǃgôaǃgâsiba ǁgau ǁkhā? ǁÎba ǃoabasa da ge ǂgurose sida ûib ǃnâ nî ūhâ. (Mat. 6:33) Jesub ge ge ǁō, “în ǁnān ûiba ūhâna tā ǁîn ǀguina ûiba, xawe ǁîb hîa ge ǁō tsî ǁîna ǁōba xu khâibab ǃaroma ûi.” (2Kor. 5:15) Jehovab ge ǀkhomxa tsî ge ǀûba da. Ū da hâ ǁkhāsib ǀkha ǁîba ǃoabas ǃnâ da ge ra ǁgau, ǁîb ge dība da xūna da ǃgôaǃgâ tsî ra ǁnâuǃāsa.—Khomai re 2 Korinteǁîn 6:1 sa.

14. Jehovab daoǁgaus ǃnâ da mati ǂgomsa a ǁgau ǁkhā?

¹⁴ Jehovab ra ǁgau da ǀnamma ǃgôaǃgâsiba ǁgaus ǃnâ-ū da ge ra ǁgau, ǁîb daoǁgaus ai da ra ǂgomaiǂnûisa. Mâ ǀgaub ǃnâ? ǀGapi ǁkhāǁkhāsens tsî mâ ǃnôa sîsen-e da nî dīs mîǁguigu tawa i ga hā, o da ge Jehovab mati nēs xa ra tsâ ǀgauba nî ǃgaoǃgâ. (1Kor. 10:31; 2Kor. 5:7) ǂGomsa da ga ǁgau, o i ge buruxa xū-e ra ī, sida ǂgoms tsî Jehovab ǀkha da ūhâ ǀhōsagusis tsîn ge ra ǀgai. ǀAmose ûis ǃâubasens ge ra amaba da.—Rom. 5:​3-5; Jak. 2:​21, 22.

15. ǂÂiǂâisens ǁaeb ǃnâ da mati ǃgôaǃgâsiba ǁgau ǁkhā?

¹⁵ ǀGui ǀgaub tsîn ge hâ mati da Jehovaba ǃgôaǃgâsiba a ǁgau ǁkhāba. ǁKhāsiba sîsenū tsî da ge Jesub ǁōb ǂâiǂâisens ǁaeb ǃnâ Jehovaba nî ǁgau xoremariba da ra ǃgôaǃgâsa. Jesub ǁōb ǂâiǂâisensa hâǃnâs xōǀkhā da ge nau khoen tsîna nî ǁkhau. (1Tim. 2:4) ǂÂiǂâisensa ǃoa du nî ǁkhau khoena mîǃāba re tae-i ǁnāpa nî īsa. ǁÎna du ge vidiokha ǁgau  ǁkhā, Jesuba tae-i ǃaroma ge ǁō? tsî Jesub di ǁōb xa ǂâiǂâisen re ti hâkha. ǀHaohâb ǃûi-aogu ge gagasise ǃkhai hâ ǃgâsan tsîna nî ǁkhau. Kai ǃgâiaǂgaob ge ǀhommi tsî ǃhūbaib ais tsîna hâ, kā hâ gū-i ga oaǀkhī o. (Luk. 15:​4-7) ǂÂiǂâisens tawa da ge ǂan da a khoen ǀguina tawede tide, xawe ǁnān ǀasase ra ǀkhīn tsî gaixu ǁaeba ge hâǃnâ tama hâ în tsîna nî tawede. ǁÎna da ge ǁkhoreǁharesase ra tsâ kai ǂgao.—Rom. 12:13.

16. Tae-i ǃaroma da ǂâiǂâisens ǁaeb ǃnâ ǃnāsase aoǁnâ sîsenni ǃnâ nî ǁhao?

¹⁶ Gagasi ǁaxasigu ǃnâ du ǂâiǂâisens ǁaeb ǃnâ a ǁhao ǁkhā? Nē ǀgaub ǃnâ du ge ra ǁgau, Jehovab tsî Jesub tsîn ge dī xūn hoana du ra ǃgôaǃgâsa. Aoǁnâ sîsen-e du ǃnāsase ra dī khami du ge nî mûǂan Jehovab ra hui du sa. Tsî i ge ǁîb ǃnâ du ūhâ ǂgomǃgâsiba nî ǀgai. (1Kor. 3:9) ǂÂiǂâisens xa hâ Elobmîs khomaiǃâde, Tsēkorobe xoasa ôaǃnâs ǂkhanis, tamas ka io sîsenǂkhanib ǃnâ hâ boksisa ra sîsenūse khomai re. ǁNā Elobmîs xoade du ge Elobmîsa du ga ǃgamse ôaǃnâ, o a sîsenū ǁkhā.

17. Tae-e Jehovaba ra ǂkhîǂkhî? (Boksisa mû “ Mati da Jehovaba ǃgôaǃgâsiba a ǁgau ǁkhā?” ti hâsa.)

¹⁷ Sadu mâsigu xa ǃaromahe hâse du ge ǀnîsi, nē ǁkhāǁkhāǃâs ǃnâ māhe hâ ǀapemāde sîsenū hō tide. Xawe ǂâis ǃnâ ūhâ, Jehovab ge sadu ra dī xūna nau khoen ra dīn ǀkha ǀgopeǀnō tama hâ. ǁÎb ge a ǂan matikōse du ǁîba a ǀnamsa. ǁÎb ge ra ǂkhî mûb ga o, matikōse du xoremarib di ǀkhaeba ra ǃgôaǃgâsa.—1Sam. 16:7; Mrk. 12:​41-44.

18. Jehovab tsî Jesub tsîna da tae-i ǃaroma ra ǃgôaǃgâ?

¹⁸ Xoremarib ge māhe amaga ǀgui da ge sida ǁorena ǀûbahe, Jehovab ǀkha ǀgū ǀhosagusisa ūhâ tsî hānîǁaeb ǃnâ ǀamose ûis ǃâubasens tsîna ūhâ. Hoaǁae da ge Jehovab ūba da hâ ǀnamma ǃgôaǃgâsiba nî ǁgau, hîna ge nē kai ǀkhaega īǁkhā kai ga. (1Jhn. 4:19) Dītsâ tsî da ge Jesub tsîna nî ǃgôaǃgâ, ǀnam dab a amaga ge ǁōba daba.—Jhn. 15:13.