1. ǂGui khoena nētsē tae-i ai ǂâisa ra ǂnûi?

 ǀNÎSI du ge nētsē ǂgui khoena ra ǃgaoǃgâ, ǁîn xa ǀgui ǂâi tsî naun ǀkha ǁgae tama hâna. Aiǁgausen ge ǀnîna ǁîn ûigu tamas ka io dīn ge xūna internets ǂhawegu ai ra ǁgauǂui. ǀOro khoen ge nētsē Jehovaba anub hâ ǂkhaisiba ra mā. Nē ǁkhāǁkhāǃâs ǃnâ da ge nî ǃhoaǃgao, Jehovaba ǂkhaisiba mās tae-e ra ǂâibasens tsî tae-i ǃaroma da ǁnāsa nî dīsa. ǁKhāǁkhāsens tsîna da ge nî dī mati da Eloba anub hâ ǂkhaisiba nî mā tsî mati i ǁîb ǀonsa hānîǁaeb ǃnâ ǃgôasiba nî ǁgauhe ǀgausa.

JEHOVABA ǂKHAISIBA MĀSA TAE-E RA ǂÂIBASEN?

2. Jehovaba mati ǁîb ǂkhaisiba Sinaiǃhommi tawa ge ǁgau? (ai-īsiba mû re.)

² ǂKhaisiba a tae? “ǂKhaisib” ti hâ mîs ge Elobmîs ǃnâ xū-e mâǂoa kaisa ǃoa ra ǁnaeǁgau. Jehovab ge ǁîb ǂkhaisiba Israelǁaesab ge Egipteb ǃgāsisa xu ǃnora kai ǁaeb ai ge ǁgau. Sao ra xū-e mûnan-ai re: ǂGui Israelǁîn ge Sinaiǃhommi tawa ǀhao hâ, în Elob tae-e nî mîba nîsa ǁnâu. ǃHommi ge ǀgaisa ǂnū ǃâus xa ge ǃgū-aihe hâ i tsî i ge ǃâubasen taman hâ ǀgaisa ǃhūǂgubiba ge tsoatsoa. ǁÎn ge mâ-ai hâ i ǃhūb ge ge ǀgabisen tsoatsoa tsîb ge ǃgurub tsîna ge hâ i, ǃgari xaiǁnâ ǀōb ǀkha. (Eks. 19:​16-18; 24:17; Psa. 68:8) Jehovab ge nē xūna a dī os ge Israelǁaesa ǁîb di ǀgaib xa kaise ge buru.

3. Jehovaba ǂkhaisiba māsa tae-e ra ǂâibasen?

³ O sada khoeda ase? Jehovaba da amase ǂkhaisiba a mā ǁkhā? Îo, ǁnāsa da ge a dī ǁkhā. ǀGui ǀgaub Jehovaba da ǂkhaisiba ra māb ge ǁîb ǀgaib tsî mâǂoa ra ǀgaugu xa nau khoena mîbasa. Eloba da ge ǂkhaisib tsîna ra mā ǁîb  ǀgaib ǃnâ-ū da ge dī hō xūn hoan ǃaroma. (Jes. 26:12) Aiǁgaus ase, Gao-aob Davidi tsîn ge Jehovaba anub hâ ǂkhaisiba ge mā. Israelǁaes ǀhaohâb aiǃâb ge mî ǀgores ǃnâb ge Davida Eloba ǃoa sao rase ge mî: “Sats ge kai tsî ǀgaisa, koahesa anu, ǂkhaisa tsî a ǀgapi. Hoaraga xūn ǀhommi ǃnâ tsî ǃhūbaib ai hân ge a sa, sats ge a gao-ao; hoan ǂama hâ ǀgapi ǂgaeǂgui-aotsa.” Davidi ge ǁîb ǀgoresa a toa “os ge hoaraga ǁaesa . . . Eloba ge koa.”—1Kro. 29:​11, 20.

4. Jesuba mati Jehovaba ǂkhaisiba ge mā?

⁴ Jesub ge ǃhūbaib aib ge hâ io, ǁîb ǁGûba ǂkhaisiba gere mā khoena mîbas ǃnâ-ū Jehovab ǀgaiba ra mābisa îb ǁnā buruxa dīna dī. (Mrk. 5:​18-20) Jesub ge Jehovaba ǂkhaisiba ge mā ǁîb xab gere ǃhoa xūn ǃnâ-ū tsî nau khoenab gere hâ-ū ǀgaub ǃnâs tsîna. ǀGui ǃnās aib ge Jesuba sinagogegu ǃnâ gere ǁkhāǁkhā. ǁNāpa i ge tarekhoes 18 kuriga ge demonga ūhâ isa ge hâ i. Demongu ge ge ǃaroma îb ǁîs ǁâba gama tsîs ge ǂgōse ge ǃgû ǁoa i. Nēs ge kaise ge tsûtsûsa i tsîb ge Jesuba gere ǁnâuǃā. ǁÎsab ge gere hui ǂgao. ǁÎs ǀgūse sī tsîb ge khoexaǃnâ ǀgaub ǃnâ ǁîs ǀkhā ge ǃhoa. Mîb ge ge: “Tarase sa ǀaesenna xus ge go ǃnora!” ǁÎb ǃomkha ǁgui-aisi tsîs ge ǁnātimîs ai ǂgōse ge khâimâ tsî “Eloba ge koatsoatsoa.” ǁÎs ge ge ǂgau. (Luk. 13:​10-13) ǁNā tarekhoes ge ǃgâi ǃaromasa ge ūhâ-i Jehovaba ǂkhaisiba māsa. ǁKhā xū-e da ge sada xa a mî ǁkhā.

TAE-I ǃAROMA DA JEHOVABA ǂKHAISIBA RA MĀ?

5. Mâ ǃaromadi ǃgao da Jehovaba ǃgôasiba ra ǁgau?

⁵ Jehovaba da ge ǂkhaisiba ra mā ǃgam ǃgôasiba da ūbabi hâ amaga. ǂGui ǃaroma di ǃgao da ge ǁîba ǃgôasiba ra ǁgau. Jehovab ge ǀgaiba ūhâ ǂhâbab ra xū-i hoa-e dīs tiba. Tsîb ge ǁîba tātsē tsau tama hâ. (Psa. 96:​4-7) ǁÎb gā-aisiba da ge kurub ge xūn ǃnâ-ū ra mû. ǁÎb ge ûiba ge māda tsî ûitsamase hâs ǀkha nî hui da xūn tsîna. (J.ǂHa. 4:11) Kaiseb ge a ǂgomǂgomsa. (J.ǂHa. 15:4) Jehovab ra dī xūn hoan ge ra ǃgâiǃgâ tsîb ge hoaǁae ǁîb mîmâide ra dīǀoaǀoa. (Jos. 23:14) ǁNā-amagab ge kēbo-aob Jeremiaba Jehovab xa saorase ge xoa: “Sats ge ǃgôahesa a anu. Hoaraga gā-ain ǁaes din ǃnâ, tsî ǁîn di gaosigu hoagu ǃnâ i ge ǀgui-i xare-e a ǀkhai, sats khami ī-e.” (Jer. 10:​6, 7) ǂGui ǃaromadi ge hâ ǁgau ra de tae-i ǃaroma da sida ǀhomsi ǁGûba ǃgôasiba nî ǁgausa. Jehovaba da ge ǃgôasib ǀguiba ǁgau tama hâ, xawe da ge ǁîba kaise a ǀnam.

6. Tae-i ǃaroma da Jehovaba a ǀnam?

⁶ Jehovaba da ge ǂkhaisiba ra ǁgau ǁîba da a ǀnam amaga. Jehovaba da ge ǁîb ūhâ îsa ǀgaugu ǃaroma a ǀnam. ǁÎb ge kaise a ǀkhomxaǃnâ. (Psa. 103:13; Jes. 49:15) Jehovab ge tsû da ga, o ra hōǃâ. (Sax. 2:8) ǁÎb ge ra hui da î da ǃgâise ǂan bi tsî ǁîb di ǀhōsa kai. (Psa. 25:14; ǃNǃkh. 17:27) ǁÎb ge a ǃgamǃgamsenxa ǁnās ǀkhab ge ‘ǃgamǃgâ . . tsî ǀhommi ǃnâ tsî ǃhūbaib ai kō . . tsî ǀgâsana tsaraba xu . . ra ūkhâi.’ (Psa. 113:​6, 7) Nē xūn hoan ǃaroma da ge kai aiǂhanuba ūhâ sida Eloba ǂkhaisiba māsa.—Psa. 86:12.

7. Mâ ǃēsa da ūhâ?

⁷ Jehovaba da ge ǂkhaisiba ra mā, nau khoen ǁîba nî ǂansa da ra ǂhâba amaga. ǂGui khoen ge amaba Jehovab xa a ǀū. Tae-i ǃaroma? ǁGâuab ge ǂhomi ǂhôana ǁÎb xa a mî amaga. Tsîn ge khoena ǁnā ǂhôana ra ǂgom. (2Kor. 4:4) ǁGâuab ge  khoena ge ǂgom kai Elob a ǁaixasā, sida ǀkha ǁae tama tsî sida ǃgomsin hoana ra ǃaromasa. Xawe da ge sada amaba Elob xa a ǂan. ǁNā ǃēsa da ge ūhâ khoena Elob xa hâ amaba mîbasa tsî ǁîna huisa în ǃoababi. (Jes. 43:10) Psalmdi 96 ge Jehovaba ǂkhaisiba mās xa hâ. Psalmdi ǃnâ hâ mîde da ra ǃhoaǃgao khami ǀgaugu Jehovaba du anub hâ ǂkhaisiba a mā ǁkhā gu xa ǂâi.

MATI DA JEHOVABA ANUB HÂ ǂKHAISIBA NÎ MĀ?

8. Mâpa a ǀgui ǀgau Jehovaba da ǂkhaisiba a mā ǁkhāba? (Psa. 96:​1-3)

⁸ Khomai re Psalmdi 96:​1-3 sa. Jehovaba da ge ǂkhaisiba ra mā ǁîb xa da ra ǃhoa xūn ǃnâ-ū. Nē ǁaraǃādi ǃnâ i ge Jehovab khoena ra ǁkhauhe, ǃKhūba “ǁnaeba re,” “ǀons âba kare re.” “ǁÎb ores di ǂhôasa tsēsa xu tsēs ǁga tani re.” Nē ǀgaugu ǃnâ da ge sida ǀhomsi ǁGûba ǂkhaisiba a mā ǁkhā. ǃKharu ge ǁaeb ǃoaba-aon Jehovab din ge ge ǃkhō-oasen tama hâ i, Jehovab a hamsa nauna mîbasa. Tsî ǁîb ge dība nî ǃgâi xūn hoan xas tsîna. (Dan. 3:​16-18; ǃNǃkh. 4:29) Sida tsîna mati ǁnāsa a dī ǁkhā?

9-10. Angelenas aiǁgausa xu du tae-e ra ǁkhāǁkhāsen? (Ai-īsiba mû re.)

⁹ Amerikab ǃnâ ra hâ ǃgâsas Angelena a ti ǀon hâs aiǁgausa ǃgaoǃgâ re. ǁÎs ge ǁkhoaǂgaose Jehovab ǀonsa sîsen-i tawa ge ǁkhauba. Angelenas ge ǁnāpa ǀasase ge sîsen tsoatsoa tsîn ge ge ǁkhauhe în naun ǀkha ǁîn ûib xa ǀgoragu. Angelenas ge ai-īsiga ge ǀhaoǀhao is nauna ǁgau ǁîs ǃgâiaǂgaob ǀkha Jehovaba ra ǃoabasa. Xawe i ge ǁîs nî ǃhoas aiǃâ ǀnî sîsenǁare-aoba mâi-aiǃgâsen tsî ǁîb ge Jehovab ǃoaba-aon di ǀgui-i ase kaikaihes xa ge ǃhoa tsoatsoa. ǁÎb ge ǁgai xūna Jehovab ǃoaba-aon tsî ǁîn ra ǂgom ǀgaub xa ge ǃhoa tsoatsoa. Angelenas ge ra mî: “Ti ǂgaob ge ǃhaese ge ǂnau tsoatsoa. Xawe ta ge ge ǂâi, khoe-e ta nî mā-am î-i ǂhumiba Jehovab xa ǃhoa? Tamas ka io ta amaba nî ǃhoa?”

¹⁰ ǁÎs sîsenǁare-aob ge ǃhoa toa, os ge Angelenasa ǃhaese ge ǀgore. ǁÎs ge khoexaǃnâ ǀgaub ǃnâ ǁîba ge mîba: “Tita tsîn ge sadu khami Jehovab ǃoaba-aon di ǀgui-i ase ge kaikaihe. Xawe ta ge nētsēs kōse noxopa Jehovaba ra ǃoaba ǀgara.”  Nē mâsib gere ǂâiǂhansen kaisi xawes ge Angelenasa ǃnomsase ge hâ ǀgara. ǁÎs sîsenǁare-aonas ge ge ǁgau mati i ǁîs tsî ǁîs ǀhōsan tsîna ǃgâiaǂgaob ǀkha Jehovaba ra ǃoaba ǀgauba. ǃGôasib ǀkhas ge ǁîs ǂgoms xa ǁîna ge mîǃāba. (1Pet. 3:15) ǀAmǂoasa ge tae ī? Angelenas ge ǃhoa toa ǁaeb aib ge khoeba ǀnai ge ǃnomsa i. ǁÎb ge ǁkhoaxa ǁaeb hînab ge Jehovab ǃoaba-aonaseb gere kaikhâi ǁaeb ai ūhâ în xas tsîna ge ǀgoragu. Angelenas ge ra mî: “Jehovab ge sida xa ǁkhaubahesa anu hâ. Kai aiǂhanub ge ǁîb ǀonsa ǁkhaubasa.” Sada tsîn ge Jehovaba a koa ǁkhā naun xab ga ǃgôasiba ǁgauhe tama i xawe. Nēb ge amase kai aiǂhanuba.

11. Xristeǁîna mati Psalmdi 96:8 ǃnâ hâ daoǁgaude ra sao?

¹¹ Khomai re Psalmdi 96:8 sa. Ū da hâ xūn ǀkhā da ge Jehovaba ǂkhaisiba a ǁgau ǁkhā. Ama ǃoaba-aon Jehovab din ge ǁîba ǁnā ǀgaub ǃnâ ra koa. (ǂKhm. 3:9) Aiǁgause Israelǁaes ge mari-i tsî ūn hâ xūn tsîna ge mā, îb tempela om-ūnuhe tsî kōǃgâhe ǁkhā. (2Gao. 12:​4, 5; 1Kro. 29:​3-9) ǁKhāǁkhāsaben tsîn ge Jesub tsî apostelgu tsîna “ūn hâ xūn ǀkha gere” hui. (Luk. 8:​1-3) Elobmîs tsîn ge ra mî ǀnî Xristeǁîn ge ǃâtsūǀkhāba gere hōǃâ, on ge nau ǃādi ǃnâ gere hâ ǃgâsana ǁîna mari-e ge sîba. (ǃNǃkh. 11:​27-29) Sida tsîn ge nētsē Jehovaba ǂkhaisiba ra mā sida māsenxa mādi ǃnâ-ū.

12. Sida māsenxa māde mati Jehovaba ǂkhaisiba ra ǁgau? (Ai-īsiba mû re.)

¹² ǀGui aiǁgausa ǃgaoǃgâ ǁgau rasa mati i sida māsenxa māde ǂkhaisiba Jehovaba ra māsa. ǃNurib ge ge ǁgau 2020 i ge Zimbabweb ǃnâ ǀkhuruba a tsoatsoasa. ǂGui khoen ge nēs xa ge tsâǀkhāhe, ǂâuna ǂû î ge ǀkhai i amaga. Sada ǃgâsas Priscas ti ǀon hâs tsîn ge nēs xa ge tsâǀkhāhe. ǀKhurub ge hâ i xawes ge Priscasa aiǃgû tsî mâ Wunstaxtsēs tsî Fraitaxtsēs tsîna aoǁnâ sîsenni ǃnâ gere ǂoa, khoen ge ǃhūba ǃhanaǂgās ǃaroma gere aiǂhumi xawes tsîna. ǁÎs ǁanǁare-aon ge ǃhanab ǃnâ sîsen tama i tsîs ge aoǁnâ sîsen-e gere dī ǃkhais ǃgao gere ǃhōsi tsî gere mî “ǃâs xas nî ǁō” ti. Priscas ge ǂgomǃgâsiba ge ūhâ i Jehovab nî kōǃgâsisa, ǁnā-amagas ge ǃeream tsî gere mî: “Jehovab ge tātsē ǁîb khoena ǁnāxuǃgâ tama.” ǁAeroba ǃkharu tsîs ge  huiba ǀapeǂhumisa xu ge hō. Priscas ge ǂûn tsî ǂhâs hâ xūn tsîna ǀapeǂhumisa xu ge hō, sida māsenxa mādi xa ge īǁkhā kaihena. Priscas ǁanǁare-aon ge nēs xa kaise ge buru tsîn ge ǁîsa ge mîba, “Elob ge sasa hoaǁae ra kōǃgâ tsî da ge ǁîb xa ǃnāsase ra ǁkhāǁkhāsen ǂgao.” Hû ǁanǁare-aon ge ǁîs Xristeǁî ǀhaode ge hâǃnâ tsoatsoa.

13. Sada tanisen ǀgauba mati ǂkhaisiba Jehovaba ra mā? (Psalmdi 96:9)

¹³ Khomai re Psalmdi 96:9 sa. Jehovaba da ge sida tanisen ǀgaub ǃnâ-ū ǂkhaisiba ra mā. Jehovab tempeli tawa gere ǃoaba pristergu ge gere ǂgaoǀkhāhe î gu sorosise ǃanu. (Eks. 40:​30-32) Xawe ǃnāsase sorosise ǃanuse hâs xa ǂhâǂhâsa î ge Jehovab ǃhûi hâ xūna xu ǂgōsensa. (Psa. 24:​3, 4; 1Pet. 1:​15, 16) ǃGarise da ge nî dītsâ î da ‘ǀoro khoesiba’ ǁhûǁnâ, ǁnāb ge ǃgâi tama tanisen ǀgaugu tsî ǁnaetigu tsîna. Tsî da ge “ǀasa khoesib” ǀkha nî anasen, ǁnās ge Jehovaba ǂkhaisiba ra ǁgau ǀgaub ǃnâ ǂâi tsî tanisens tsîna ǃkhōǂgā hâ. (Kol. 3:​9, 10) Jehovab huib ǀkhan ge ǁnān ǁgai xūna gere dīna ǀkharaǀkharasen tsî ǀasa khoesiba ge ana.

14. Tae-e du Jacki aiǁgausa xu ra ǁkhāǁkhāsen? (Ai-īsiba mû re.)

¹⁴ Aiǁgause Jack ti ǀon hâ khoeb aiǁgausa ǃgaoǃgâ re, ǁîb ge kaise ge eloxoresa i tsîb ge Demon ti gere ǀon ǂgaihe. Dīb ge ǁgai xūn ǃgaob ge Jacka, ǃgamhes ǁkharaba ge hō. Jacki ǃgamheb nîsa ǃâu hâ ǁaeb ǃnâb ge ǁnā ǃkhō-omsa ge sari ǃgâsaba, ǁîba Elobmîs ǁkhāǁkhāsa ge mâi-aiǃâ. Tsîb ge Jacka Elobmîsa ge ǁkhāǁkhāsen tsoatsoa. Jacki ge ǁgai xūna gere dī xaweb ge ge ǀkharaǀkharasen tsî Jehovab ǃoaba-aon di ǀgui-i ase ge ǁāǁnâhe. Jacki ge kaise ǂgui ǀkharaǀkharana ge dī tsî gu ge ǀapaǃnam ga ǁîb gere ǃgamhe tsēs ai gere ā. ǃKhō-oms tawa ra sîsen ǀapaǃnami ge ge mî: “Jacki ge kaise ge ǁkhōǁkhōsa-i, nēsib ge a ǃgâi khoe.” Wekheba Jacki ǃgamhe toa hâs khaoǃgâ gu ge ǃgâsaga wekheb ǁaegu ra hâ ǀhaosa ǃkhō-oms tawa sī gere dī. ǁNāpa gu ge ǂguro ǃnāsa ge ǀhaosa hâǃnâ ǃkhōsabeb ǀkha ge ǀhao. Tae-i ǃaromab ge ǀhaosa hâǃnâ? ǁÎb ge Jacki ge dī ǀkharaǀkharan xa kaise ge ǃgâibahe i tsî gere ǂan ǂgao tae-eb nî dīsa îb Jehovaba ǃoaba. Nēs ge ǃgāsase ra ǁgau sida tanisen  ǀgaub sida ǀhomsi ǁGûba ǂkhaisiba a mā ǁkhāsa.—1Pet. 2:12.

JEHOVABA HĀNÎǁAEB ǃNÂ MATI NÎ ǁGAU ǁÎB ǀONS ǂKHAISIBA ANU HÂSA?

15. Jehovaba hānîǁaeb ǃnâ mati nî ǁgau ǁîb ǀons ǂkhaisiba anu hâsa? (Psalmdi 96:​10-13)

¹⁵ Khomai re Psalmdi 96:​10-13 sa. Psalmdi 96ǁî danaǃâs ǀuniga ǁaraǃādi ge ra ǁgau Jehovab a ǂhanu-ai ǀGoraǃgâ-ao tsî Gao-aosa. Jehovaba hanîǁaeb ǃnâ mati nî ǁgau ǁîb ǀons ǃgôahesa anu hâsa? ǁÎb ge nēsa ǂhanu-aisiba hā-ūs ǃnâ-ū nî dī. ǀGūǁaeb ǃnâb ge Babilons kaisa nî dīkākā, ǁîn ǁgai xūna dī tsî ǂhûmi ǂhôana ǁîb xa ra ǁkhāǁkhā amaga. (J.ǂHa. 17:​5, 16; 19:​1, 2) Babilons kais ga dīkākāhe, on ge ǀnî khoena nî mîǁgui sida ǀkha ǀguiba Jehovaba ǃoabasa. Armagedons tawab ge Jehovaba ǁGâuab, ǁîb ǂgaeǂguis, ǁnān ǁîba ǃhuihân tsî ǁîb xa ama tama ǂhôana ra mîn tsîna nî dīkākā. Xaweb ge ǁnān ǁîba a ǀnam tsî ra ǁnâuǀnamna nî sâu hîna hoaǁae anub hâ ǂkhaisiba ra mābi na. (Mrk. 8:38; 2Tes. 1:​6-10) Xristub di duisend (1 000) kurigu ǂgaeǂguis khaoǃgâb ge Jehovaba nî ǁgau, ǁîb anu hâsa hoa khoen xa ǃoabahesa. (J.ǂHa. 20:​7-10) ǁNā ǁaeb ǃnâb ge hoa “ǃhūbaiba ǃKhūb ǂkhaisib ǂans xa nî ǀoa . . hurib ǁgammi xa ǀoa hâs ǁkhās khami.”—Hab. 2:14.

16. Tae-e dīsa du mîǁgui hâ? (Ai-īsiba mû re.)

¹⁶ Kaise da ge nî ǂkhî hoa khoen ga Jehovaba anub hâ ǂkhaisiba mā o. Nēsi da ge ǁkhā da a-i hoa-e dī tsî Jehovab xa nî ǃhoa tsî ǁîba ra koa ǀgaub ǃnâ nî tanisen. Nēsi da ǂhâǂhâsasiba ǀgomǀgomǃgaos ǃaromas ge ǂgaeǂguira sorosa Psalmdi 96:8 sa 2025ǁî kurib xoas ase ǁhûi hâ: “Mā re Jehovaba ǁîb ǀons di ǂkhaisiba.”