1. Mâ ǃgom xū-e da tsēs hoasa ra hōǃâ?

 TSĒS hoasa da ge mîǁguiga ra dī. ǀNî mîǁguigu ge a supu dīsa, aiǁgause tae-e du ǁgoaga nî ǂûs tamas ka io mâǁae du nî ǁoms khami. Xawe ǀnî mîǁguigu ge kaise a ǃgom. Dī da ra mîǁguigu ge sida ǂurusib, omaris ase da ǂkhîba nî ūhâ ǀgaub tamas ka io Jehovaba da nî ǃoaba ǀgaub tsîna ra tsâǀkhā. Sida mîǁguigu sida tsî omaris tsîna nî huisa da ge ra ǂhâba, î da ǃgâiba ǀama. Xawe ǂhâǂhâsa as ge sida mîǁguigu Jehovaba nî ǃgâiaǂgao kaisa.—Rom. 12:​1, 2.

2. Mâ ǃnona xūna a hui du ǁkhā î da ǃgâi mîǁguiga dī?

² ǃGâi mîǁguiga du ge a dī ǁkhā sao ra xūna du ga ǂâis ǃnâ ūhâ o, (1) hoa amaba ǂans, (2) Jehovab nēs xa mati ra tsâsa ǃgaoǃgâs tsî (3) hoa ǀkhāgu xa ǃgâise ǂâisa. Nē ǁkhāǁkhāǃâs ǃnâ da ge ǁnā ǃnona xūn xa nî ǃhoa. ǁNās ge nî hui du, î du tae-i a tsūs tsî tae-i a ǂhanus ǁaegu ǀgorasa ūhâ.—ǂKhm. 2:11.

HOA AMABA ǂANS

3. ǁGuiǃā re, tae-i ǃaroma du hoa amaba nî ǂansa mîǁgui-e du nî dīs aiǃâ.

³ Mîǁguiga du nî dīs aiǃâ du nî dī xū-i ge hoa amaba ǂansa. Nēsa tae-i ǃaroma a ǂhâǂhâsa? Sao ra aiǁgaus xa ǂâi re, ǀaesen hâ khoe-i ge ǁkhōǁkhōsa ǀaeb ǃgao ǀaeǃkhō-aoba ǃoa ra ī. ǀAeǃkhō-aoba ǁî-e dî tamas ka io ôaǃnâ tamase mîǁguiba a dī ǁkhā mati î ǁî-e nî ǀaeǃkhōsa? Hî-î, ǁnāsab ge dī tide. Sadu tsîn ge mîǁgui-e du nî dīs aiǃâ, ǂgurose hoa amaba nē mâsib xa nî ǂan. ǁNāsa du mati a dī ǁkhā?

4. ǂKhoamîdi 18:13 ǃoaguts mâ dîna a dîsen ǁkhā îts hoa amaba ǂan? (Ai-īsiba mû re.)

 ⁴ Dîna dîs ǃnâ-ūts ge hoa amaba a ǂan ǁkhā. Aiǁgause, ǀnîsits ge ǁkhoaxa ǁaeba ūhâsa ǃgao go ǁkhauhe. Nē ǁaxasiba ǃoa du nî ī? ǁKhautsi go khoe-ets ga ǃgâise ǂan tama ī tamas ka iots tae-i ǁnāpa nî īsa a ǀū, ots ge ǁî-e sao ra dîde a dî ǁkhā: “Mâpa tsî mâǁae-i nē ǁaxasiba nî hâ? Matikō khoena ǁnāpa nî sī? Ham-e tae-i ǁaxasib tawa nî īsa ra kōǃgâ? Hamna ǁkhauhe hâ? ǁKhauhe hâ khoena taena sī nî dī? Xûi-e nî hâ?” Nē dîdi ǃereams ge nî huitsi, îts ǂhanu mîǁguiba dī.—Khomai re ǂKhoamîdi 18:13 sa.

5. Hoa amaba du ga ǂans khaoǃgâ du tae-e nî dī?

⁵ Sao rase, hoa amaba du ga ǂan toa, o aibe hoa mâsib xa ǃamkuse ǂâiǃgâ re. Aiǁgause du ge ǀnîsi go ǁnâu, ǁkhauhe hâ khoen Elobmîs ǁgaragu ǃoagu ûi tamasa tsî î xûi-e mûǂamhe tamase nî āhesa. Mûǂan î du ra nē ǁaxasib a ǁgaoǂoa ǁkhā ǃkhaisa? (1Pet. 4:3) Tae-e du a dī ǁkhā mûǂan du ga o nē ǁaxasib a ǃaroma ǁkhāsa î du tā ǀhaohâb ǀhaosa ǃoa ī tamas ka io aoǁnâ sîsen-e dī? ǂAnǂûi du go amab mati nē mâsiba ra tsâǀkhā ǀgauba du ga mû, o i ge nî supu ǃgâi mîǁguiba dīsa. Xawe ǀnî hâ xū-i tsîn ge hâ dī ǁkhā du a e. Sadu nē mâsib xa mati ra tsâsa du  ge a ǂan xawe dîsen re Jehovaba mati nēs xa ra tsâ?—ǂKhm. 2:6.

JEHOVAB MATI NĒS XA RA ǂÂISA ǃGAOǃGÂS

6. Jakobub 1:5 ǃoagu da tae-i ǃaroma Jehovab ai huiba nî ǂgan?

⁶ Jehovaba ǂgan re îb hui du, î du ǁîb ǂâiǀgauba ǁnâuǃā. Jehovab ge ra mîmâi ǁîb gā-aisiba nî mādasa î da ǂhanu daoba ǁhûi. ǁÎb ge “māǂgaoxase tsî ǀkhomxaǃnâse hoana” gā-aisiba ra mā.—Khomai re Jakobub 1:5 sa.

7. Mati du Jehovab ǂâiǀgauba a ǂanǂui ǁkhā? ǁGuiǃā re.

⁷ Jehovab daoǁgausa du ga ǀgores ǃnâ ǂgans khaoǃgâ, ǁîb mati ra ǃeream du ǀgausa ǃgaoǃgâ re. Aiǁgause, ǀnî hâ ǃā-e ǃoa du ga ī tsî du ga kā, o du ge khoe-i hîna ǁnā ǃāsa ǃamkuse a ǂan i ai huiba a ǂgan ǁkhā. ǁÎ-i ǃeream du tama hîna du garu nî ǃgû? Hî-i, tātsē. ǁÎ-i ra mā du daoǁgaude du ge amase ǂōrisase mâ tsî nî ǃgâ. ǁKhā ǀgaub ai du ga Jehovab ai gā-aisiba ǂgan, o matib ra ǃeream du ǀgauba ǃgaoǃgâ re, Elobmîs ǁgaragu tsî daoǁgaude ǁnā mâsib ǃnâ sîsenūs ǃnâ-ū. Aiǁgause du ga ǁkhoaxa ǁaeba ūhâs ǃaroma ǁkhauhe, o du ge ǀnîsi Elobmîs tae-e ǁâudīgu, ǃgâi tama ǀhōsan tsî Elob Gaosiba sadu ûib ǃnâ ǂgurose mâis xa ra mî xūna ôaǃnâ ǁkhā.—Mat. 6:33; Rom. 13:13; 1Kor. 15:33.

8. Tae-e du a dī ǁkhā ôaǃnâsa du ga dī ǂgao o? (Ai-īsiba mû re.)

 ⁸ ǀNî ǁaegu ai du ge ôa du ra ǃgāsasiba hōs ǀkha huiba nî ǂhâ. ǀNîsi du ge ǀapemāde nē mâsib ǃnâ ǃgâi ǂansa ūhâ ǃgâsana xu a hō ǁkhā. Xawe sadu tsîn ge aitsama ôaǃnâsa dīsa xu ǃgâiba ǀama ǁkhā. ǂGui ǁkhāǁkhāsen-ū xūna da ge ūhâ, aiǁgause Ôaǃnâs ǀkha ra hui ǂkhanib tsî “Bybeltekste vir ons Christelike lewenswyse” ti ǀon hâ ǂkhanikha tsîna. ǀAmǂoasa ǂâis ǃnâ ūhâ re, ǁnās ge Jehovaba ra ǂkhîǂkhî mîǁguiga dīsa.

9. Mati da ǂan ǁkhā dī da ra mîǁguigu Jehovaba ra ǂkhîǂkhîsa? (Efeseǁîn 5:17)

⁹ Mati da a ǂan ǁkhā sida mîǁguigu Jehovaba ra ǂkhîǂkhî ǃkhaisa? ǂGurose da ge ǁîba ǃgâise nî ǂan. Elobmîs ge ra mî, “ǃAnub di ǂans ge ǁnâuǃāba hōsa.” (ǂKhm. 9:10) ǁNâuǃāxasib ge Jehovab ǀgaub, ǁîb ǂâibasens, taenab ǀnam tamas ka io ǃhui hâs di ǂansa xu hâ. Dîsen re, ‘Jehovaba ǂans ǃnâ-ū ta mâ mîǁguiga a dī ǁkhā, ǁîba a ǂkhîǂkhî ǁkhāga?’—Khomai re Efeseǁîn 5:17 sa.

10. Tae-i ǃaroma i Elobmîs daoǁgaude ǃhaoǃnâbe ǁnaedīgu xa a ǂhâǂhâsa?

¹⁰ Jehovaba da ga ǂkhîǂkhî ǂgao, o da ge ǀnî ǁaegu ai ǂan da a khoena a tsûtsû ǁkhā. Aiǁgause, ǀnî ǁgûn ge ǁîn ǀgôasa a mîba ǁkhā îs mari-e ūhâ ǃgâsaba ǃgamme, ǁîb ga gagasise ǂkhabusa xawe. Ama as ge ǁgûn asen ǂhâba hâsa îs ǁîn ǀgôasa ǃgâi ûiba ūhâ. Xawes ge ǁîsa a dîsen ǁkhā: “Nē khoeba nî huite î ta ǀgaisa ǀhōsagusisa Jehovab ǀkha ūhâ ǀgara?” Jehovaba nēs xa mati ra tsâ? ǃEreamsa da ge Mateub 6:33 ǃnâ ra hō. Jesub ge Xristeǁîna ge mîba în ‘ǂgurose Elob Gaosiba ôa.’ Ama as ge sida ǁgûn tsî ǀhaohâsib ǃnâ hâ khoen tsîna da ǃgôasiba ra ǁgausa xawe a ǂhâǂhâsas ge Jehovab ǂgaoba ǃgâiaǂgao kaisa.

HOA ǀKHĀGU XA ǃGÂISE ǂÂIS

11. Filipeǁîn 1:​9, 10 tsîna mâ ǀgauba ra ǃhoaǃgao tae-e da nî ǁhûis tawa î ga hā o?

¹¹ Mîǁguiga dīs ǃnâ du go sîsenū ǁgaraga du ǃgaoǃgâ hâs khaoǃgâ, ǂōrisase ǂâi re tae-e du sao rase a dī ǁkhāsa. (Khomai re Filipeǁîn 1:​9, 10 sa.) Xūn ǁaegu ǀgoras ǁkhāsiba ūhâs ge nî hui du î du mâ mâsib hoab di ǀamǂoasa ôaǃnâ. ǀNî ǁaegu ai i ge a supu mîǁguiba dīsa xawe ǀnî ǁaegu ais ge nēsa a ǃgom. Xūn ǁaegu ǀgoras ge nî hui du, î du ǃgâi mîǁguiga dī mâsib ga ǃgâi tamase mûsen xawe.

12-13. Matib xūn ǁaegu ǀgoras ǁkhāsiba nî hui du gā-ai mîǁguiba dīsa, sîsen-i tawa i ga hā o?

¹² Sao ra mâsib xa ǂâi re. Sîsen-ets ge ra ôa îts sa omarisa kōǃgâ. ǀGam sîsen kha ǁaeguts ge a ǁhûi ǁkhā. Hoa xūna ôaǃnâ re: “Mâǃnôa sîsen-e? Matikō gaxusets sîsenni ǃnâ nî hâ? Matikō gaxusets nî ǃnari îts sîsenni tawa sī? Hoa mâsikha ǃnâ i ge Xristeǁî-e nē sîsen-e a dī ǁkhā. ǀNîsits ge ǂguro sîsenni xa a ǃgâibahe satsa a ǁkhoaxaba sîsen-ets nî dī amaga tamas ka iots ǀgapise nî matare-e amaga. ǀNî xūn tsîn ge hâ ǂâiǃgâts nîna nē mîǁguibats nî dīs aiǃâ.

¹³ Aiǁgause, nē sîsen-e Xristeǁî ǀhaode xu a hâ bē kai du ǁkhā? Nē sîsen-e nî ǃaroma î du sadu omaris gagasi ǂhâsiga kōǃgâ ǀû? Nē dîde dîsens ge nî hui du “ǂhâǂhâsa xūna” ǂgurose mâisa, ǁnās ge Jehovaba ǃoabas tsî sadu omaris gagasi ǂhâsiga ǂgurose kōǃgâsa. ǁNāpaxuts ge ǀams ai Jehovab nî ǀkhae mîǁguiba a dī ǁkhā.

14. Xūn ǁaegu ǀgoras tsî ǀnammi tsîna mati nî hui da î da tā nau khoena ǃnôa kai?

 ¹⁴ Xūn ǁaegu ǀgoras di ǁkhāsib ge ra hui da î da ǂâiǃgâ mati i sada mîǁguiba nau khoena a tsâǀkhā ǁkhā ǀgausa, î da tā “ǁîna ǃnôa” kai. (Fil. 1:​10, NW) Nēs ge kaise a ǂhâǂhâsa mati da nî anas tsî mati da nî mûsen ǀgaub xa hâ mîǁguiba da ga dī ǁaeb ai. ǀNîsi da ge ǀnî saran tsî ana da ra ǀgaub xa a ǃgâibahe. Xawe ǀhaohâb tamas ka io ǀhaohâb ǃauga hân ga nēs xa tsūbahe os? Xūn ǁaegu ǀgoras ǁkhāsiba ūhâs ge nî hui da ǁîn tsâsiga ǁnâuǃāsa. ǀNammi ge nî hui da, î da “nau-i” tsâsiga ǂgurose mâi tsî ǃgamǃgamsenxa. (1Kor. 10:​23, 24, 32; 1Tim. 2:​9, 10) ǁNās ge nî ǂkhâǃnâ da, î da nau khoena ǀnammi tsî ǃgôasib tsîna ra ǁgau mîǁguiga dī.

15. Tae-e du ǂâis ǃnâ nî ūhâ ǂhâǂhâsa mîǁguiba du nî sîsenǂuis aiǃâ?

¹⁵ Kaise a ǂhâǂhâsa mîǁguiba du ga dī, o kō re tae-e du nî dīsa î du nē mîǁguiba  sîsenǂui ǁkhā. Jesub ge ge ǁkhāǁkhā da, î da mari-i ǂganǀgauba ǃgôa tsî kō xū-e da nî dīs aiǃâ. (Luk. 14:28) ǃGaoǃgâ re ǁaeb, sîsen-ū du nî xūn tsî ǁguiǂgāsens hîna du ǂhâ hâsa î du mîǁguiba sîsenǂui ǁkhā. ǀNisi du ge sadu omaris ǁanîn ǀkha a ǃhoa ǁkhā î du kō ǁîn mati sadu mîǁguiba ra ǂkhâǃnâ ǀgausa. Tae-i ǃaroma i nē ǀgaub ǃnâ ǀapeǁguisa a ǂhâbasa? Nēs ge a hui du ǁkhā, î du mûǂan sadu mîǁguib ǀkharaǀkharana ǂhâhâsa. Tamas ka io i ǀnî hâ mîǁguiba dīsa a ǂhâbasa ǃkhaisa. Sadu omaris ǁanîn ra mî xūna du ga ǃgâ, on ge māsenxase sadu ǀkha ǀguiba a sîsenǀhao ǁkhā î du nē mîǁguiba sîsenǂui.—ǂKhm. 15:22.

ǃGÂI ǀAMǂOASA NÎ ŪHĀ MÎǁGUIGA DĪ

16. Mâ xūna nî hui du î du ǃgâi ǀamǂoasa ūhâ mîǁguiba dī? (Boksisa mû re “ Mati du ǃgâi mîǁguiga a dī ǁkhā ǀgaub” ti hâsa.)

¹⁶ Nē da go ǃhoaǃgao ǀapemāde du ga sao, o du ge a ǂhumisa ǂhanu mîǁguiba dīsa. Sadu ge hoa amaba ôaǃnâ tsî Elobmîs ǁgaragu tsîna go ǃgaoǃgâ, î du Jehovaba ra ǂkhîǂkhî mîǁguiba dī. ǁNās ǀkha du ge nēsi Jehovaba a ǂgan ǁkhā îb hui du, î du sadu mîǁguiga dīǀoaǀoa.

17. Tae-e hui du ǁkhā î du ǃgâi ǀamǂoasa ūhâ mîǁguiba dī?

¹⁷ ǃKharu ge ǁaeb ǃnâ du ge ǃgâi ǀamǂoasa ge ūhâ i mîǁguiga ge dī. Xawe ǂâis ǃnâ ūhâ re ǃgâi mîǁguiga dīs ǃnâ-ū du ge Jehovaba xu ra hā gā-aisib ai ra ǂgomaiǂnûi tsî sadu ǁnâuǃāb ais ose. Jehovab ǀguib ge ama ǂans, ǁnâuǃāb tsî xūn ǁaegu ǀgoras ǁkhāsiba a mā da ǁkhā. Nē xūn ge gā-aisib ǀkha ra hui. (ǂKhm. 2:​1-5) Jehovab ge nî hui du, î du ǁîba ra ǂkhîǂkhî mîǁguiga dī.—Psa. 23:​2, 3.