1. Tae-i ǃgâiba da ra ǀama Xristub di ǁōba kurib hoaba tsēdīsa xu?

 JEHOVAB ge kaise ǀō-aisa ǀkhaeba ge mā da ǁîb Ôabab ge sî o, îb khoen ǃaroma ǁō. (2Kor. 9:15) Jesub ge ǁōba da amaga da ge Jehovab ǀkha ǀgū ǀhōsagusisa a ūhâ ǁkhā. ǀAmo ûiba ǃoas tsîna du ge a mûǂui ǁkhā. ǂGui ǃaromade da ge ūhâ Jehovaba gangansa xoremarib ǃaroma, ǀnam dab a amaga. (Rom. 5:8) Ganganxase mâǀgara tsî da Jehovab tsî Jesub ge dība da xūna tā nî ǀuru amagab ge Jesuba ge mîmā, î da ǁîb ǁōb ǂâiǂâisensa kurib hoaba tsēdī.—Luk. 22:​19, 20.

2. Tae-e nē ǁkhāǁkhāǃâs ǃnâ nî ǃhoaǃgaohe?

² Jesub ǁōb ǂâiǂâisensa da ge nē kuri Satertaxtsē, Aprili 12, 2025 nî tsēdī. Amase da ge hoa da ra aiǂhumisen ǁnā tsēsa hâǃnâsa. Kaise i ge nî ǃgâi mâ khoe-i hoa-i ga Jesub ǁōb ǂâiǂâisens ǁaeb ǃnâ Jehovab tsî Jesub ge dība da xūn xa ǂâiǃgâ o. Nē ǁkhāǁkhāǃâs ǃnâ da ge nî ǃhoaǃgao, xoremarib tae-e Jehovab tsî ǁîb Ôab xa ra ǁkhāǁkhādasa. Sao ra ǁkhāǁkhāǃâs ge nî hui da, î da ǁnâuǃā mati da ǃgâiba xoremariba xu nî ǀamasa tsî mati da sida ǃgôaǃgâsiba a ǁgau ǁkhāsa.

XOREMARIBA TAE-E RA ǁKHĀǁKHĀ DA JEHOVAB XA?

3. Mati-i ǀgui khoeb ǁōba ǂgui khoena a ore ǁkhā? (Ai-īsiba mû re.)

³ Xoremarib ge Jehovab di ǂhanu-aisib xa ra ǁkhāǁkhā da. (Deu. 32:4) Adammi ge Eloba ǁnâuǀnamoǃnâ, ob ge  ǁore-ao kai tsî ge ǁō, ǁnā-amaga da ge sida tsîna ǁore tsî ra ǁō. (Rom. 5:12) ǁOreb tsî ǁōba xu ǃnora kai das ǃaromab ge Jehovaba, Jesuba xoremarib ase ge mā da. Xawe mati i ǀgui ǀoasa khoeb ǁōba ǂgui khoena ǁoreb tsî ǁōba xu ra ore? Apostel Paulub ge ge ǁguiǃā: “ǀGui khoeb di ǁnâuǀnamoǃnâsib ǃaroman ge hoana ǁore-ao kai khamin ge ǀgui khoeb di ǁnâuǀnamxasiba xu hoa khoena Elob ǀkha ge ǂhanu-ai kaihe.” (Rom. 5:19; 1Tim. 2:6) ǀNî mîdi ǃnâb ge Pauluba gere mî, hoa khoen ǁore-ao tsî nî ǁōsa, ǀgui ǀoasa khoeb ge Eloba ǁnâuǀnam tama hâ i amaga. ǁNā-amaga i ge ǀgui ǁnâuǀnamxa ǀoasa kurusa ūhâ khoeba ge ǂhâbasa i, îb ǃnoraǃnora da.

4. Tae-i ǃaromab ge Jehovaba mā-am tama hâ i, î-i Adammi ôan ǁîba ge ǁnâuǀnamna ǀamosib kōse ûi?

⁴ Jesub nî ǁōsa ge ǂhâbasa i sida sâus ǃaroma? Tae-i ǃaromab ge Jehovaba mā-am tama hâ i, în Adammi ôan hîna ge ǁnâuǀnamna ǀamosib kōse ûi? ǀOasa kurusa ūhâ tama khoen ǃaromas ge nēsa ga ǃgâi ǀgau hâ xūna ǃgâiǃgâisa. Xawe Jehovab ǀoasa ǂhanu-aisib ǃoagus ge nēsa ga ǂhanu tama hâ. Adammi ge tātsē tsū ǁōre-e dī tama i tsî i ge ǁîb ǀgôana ǀoasa kurusa ūhâ tama i khami i ga mûsen hâ amaga.

5. Tae-i ǃaroma da ǂgomǃgâsiba ūhâ Jehovab hoaǁae ǂhanu xū-e nî dīsa?

⁵ Jehovab ga xoremariba mā tama i tsî Adammi ôana mā-am hâ în ǀamosib kōse ûi ǀoasa kurusan ūhâ tama hîna, ob ge Jehovaba ǁîb di daoǁgaudi ǂhanu xūn tsî ǂhanu tama xūn dide ga sao tama hâ. ǁNās xa ǃaromahe hâsen ge khoena hānîǁaeb ǃnâ ga ǁae tama hâ, ham-i ǁîb daoǁgaude ǁnâuǀnam tsî ǁîb ra mî xūna ra saosa. Aiǁgause, khoen ge ǀnîsi ga înganǀgē hâ ǀnî mîmâinab nî dīǀoaǀoasa. ǁNāti ī xū-i nî īsa da ge ǂâiǂhansen tama. Tae-i ǃaroma? Jehovab ge ǂhanu xū-e ge dī ǁîb Ôabab ge a ǁguiba xawe. ǁNā-amaga da ge ǂgomǃgâsiba hoaǁae ūhâ ǂhanu xū-eb nî dīsa.

6. Mâpa a ǀgui ǀgau Xoremarib Jehovab ǀnamma ra ǁgauba? (1 Johaneb 4:​9, 10)

⁶ ǀKhara ǀgaub ge hâ Jehovaba ge ǂkhâǃnâba îb ǁîb Ôaba sî, îb sida ǃaroma ǁō. ǁNāb ge sidab ūba hâ ǀnamma. (Jhn. 3:16; khomai re 1 Johaneb 4:​9, 10 sa.) Jehovab ge ǁîb Ôaba ge sî ǀamosib kōse da nî ûi ǃkhais ǃaroma ǀguis ose, xaweb ge ra ǂhâba î da ǁîb omaris ǃâ kai. Adammi ge ǁōre, ob ge ge Jehovab di omaris ǃâ kai ǀû. ǁNās xa ǃaromahe hâse da ge hoa da Elob omaris ǃauga ge ǃnae. Xaweb ge Jehovaba sida ǁorena ra ǀûba xoremarib  ǃnâ-ū. Tsîb ge ǁîb omaris ǃnâ hoa khoena nî ūǂgā, ǁîb ǃnâ ǂgom tsî ǁîba ra ǁnâuǀnamna. Nēsis tsîna da ge ǃgâi ǀhōsagusisa Jehovab tsî sida ǃgâsan ǀkha a ūhâ ǁkhā. Amaseb ge Jehovaba a ǀnam da.—Rom. 5:​10, 11.

7. Jesub ge ǃgomma gere tsâ ǀgauba mati ra hui da, î da ǁnâuǃā Jehovab matikōse ǀnam dasa?

⁷ Jehovab matikōse a ǀnam da ǃkhaisa da ge a ǁnâuǃā ǁkhā, ǁîb Ôab ge ǃgoma gere tsâ ǀgausa mûs ge ǀnîsi matikōse gere tsûtsûbis xa da ga ǂâiǃgâ o. ǁGâuab ge ra mî Elob ǃoaba-ao-i ǁîb ǃoagu ǂgomǂgomsase hâ tidesa ǃgom ǁaegu ǃnâ. ǁGâuab a ǂhumi-aosa ǁgaus ǃaromab ge Jehovaba ge mā-am îb Jesuba ǃgomma tsâ, ǁōb nîs aiǃâ. (Job. 2:​1-5; 1Pet. 2:21) Jehovab ge ge mû ǂgomdi khoen ge Jesuba ǃhō, ǂnau tsî haib ai a ǃgâu mâisa. ǁNāpaxub ge Jehovaba ǁîb ǀnamǀnamsa Ôab ǃgomma tsâ tsî ra ǁō ǀgauba ge mû. (Mat. 27:​28-31, 39) Jehovab ge ǀgaiba ge ūhâ i, îb ǁkhae în tā nē xūn hoana ī. Aiǁgause khoen ge mî o: “Ab Eloba ore bi, ǂgaob ga o,” ob ge ǁnāsa ga dī hâ. (Mat. 27:​42, 43) Xaweb ga Eloba ǁnāsa dī hâ, o i ge xoremariba ga matare-e tama hâ tsî da ge ǃâubasen-e ga ūhâ tama hâ. ǁNā-amagab ge Jehovaba ge mā-am îb ǁîb Ôaba ǃgomma tsâ tsî ǁō.

8. Jehovaba gere tsûtsûhe ǁîb Ôab ǃgomma ra tsâsab ge mû o? ǁGuiǃā re. (Ai-īsiba mû re.)

⁸ Tā da ge nî ǂâi Elob a Hoaǀgaixa amagab tsâsina ūhâ tamasa. Khoenab ge tsâsin ǀkha ge kuru. Elobmîs ge ra mî ǁîb īsib ǃnâ da kuruhe hâsa. ǁNās ge ra ǂâibasen Jehovab tsîn tsâsina ūhâ ǃkhaisa. Elobmîs ge ra ǁguiǃā ǁîb tsîn ra ‘tsûtsûhesa.’ (Psa. 78:​40, 41) Abrahammi tsî Isaki di aiǁgaus xa ǂâi re. Jehovab ge Abrahamma ge mîba îb ǁîb di ǀguise ǃnaehâ ôaba ǁguiba. (Gen. 22:​9-12; Heb. 11:17-19) ǂÂi re matib Abrahamma gere ǂâiǂhansensa, ǁîb di ôaba ǃgamsab gere aiǂhumisen ǁaeb ǃnâ. ǂÂis ǀguisa hî re matikō ǃnādeb ge Jehovaba tsûtsûhesa, ǁîb Ôab ǃkhāǃkhāhe tsî eloxoresa khoen xa ra ǃgamme ǀgausab ge mû o. Volg hulle geloof na—Abraham, Deel 2 ti ǀon hâ vidioba jw.orgs ai kō re.

9. Romeǁîn 8:​32, 38, 39 sa mati ra hui du, î du Jehovab di ǃgam ǀnamma ǁnâuǃā sadu tsî ǃgâsan ǃoagu?

⁹ Xoremarib ge ra ǁkhāǁkhā da Jehovab kaise a ǀnam da ǃkhaisa, sida di ǀaokhoen tamas ka io ǃgâi ǀhōsa-i ǃgâ-ai. (Khomai re Romeǁîn 8:​32, 38, 39 sa.) ǂGomǃgâsiba da ge ūhâ sida a ǀnamsens ǃgâ-aib Jehovaba a ǀnam da ǃkhaisa. ǀAmosib kōse du ra ûi ǂgao? Jehovab ge ǁnāsa sadu xa ǃnāsase ǂhâba hâ. Sadu ǁoren nî ǀûbahe sadu ra ǂhâba? Jehovab ge  ǁnāsa sadu xa ǃnāsase ra ǂhâba. ǁÎb ra ǂgaoǀkhās ge ǁîb ǀō-aisa ǀkhaeba ūǃoa, ǂgomsa ǁgau tsî ǁnâuǀnamsa. Jehovab ge xoremariba ǀō-aisa ǀkhaeb ase ge māda tsî da ge nēs ǃnâ-ū ǁîb ūba da hâ ǀnamma ra mû. Tsî da ge ǀasa ǃhūbaib ǃnâ ǃnāsase Jehovab di ǀnammi xa nî ǁkhāǁkhāsen.—Aoǁn. 3:11.

XOREMARIBA JESUB XA TAE-E RA ǁKHĀǁKHĀ DA?

10. (a) Jesuba tae-i ǃaroma ǁîb ǁōb xa gere ǂâiǂhansen? (b) Mâ ǀgaugu ǃnâb ge Jesuba ǁîb ǁGûb ǀonsa ǃanuǃanu? (Boksisa mû re “ Jesub ǂhauǃnâsib ge Jehovab ǀonsa ge ǃanuǃanu” ti hâsa.)

¹⁰ Jesub ge khoen ǁîb Dadasab xa ra tsâ ǀgaub xa ǁae hâ. (Jhn. 14:31) Jesub ge gere ǂâiǂhansen khoen ǁgaise ǁîb Dadasab xa nî ǂâisa tsîb ǁîba Eloba ǃgôasi-e ūhâ ba tama ǁore-ao-i ase nî ǁōsa. ǁNā-amagab ge ǀgore tsî ge mî: “Ti Îtse, īǁkhā i kao, as nē ǀgabis tsâb disa ǃgû-īǀkha te re.” (Mat. 26:39) ǁÎb ǂhauǃnâsiba Jehovab ǃoa-ai ǁōb kōse ǃkhōǀgara tsîb ge Jesuba ǁîb ǁGûb ǀonsa ge ǃanuǃanu.

11. Jesuba mati khoenab ǃgam ǀnamma ūba hâsa ǁgau? (Johaneb 13:1)

¹¹ Xoremarib tsîn ge ra ǁkhāǁkhā da Jesub khoena kaise ra tsâbasa, ǃgōsase ǁnān hîna ǁîba ra saona. (ǂKhm. 8:31; khomai re Johaneb 13:1 sa.) Aiǁgause Jesub ge ge ǂan i ǀnî xūn ǃhūbaib aib ge dīn ge kaise ǃgom isa. ǃGōsaseb nî tsûtsûsa ǁōba ǁōsa. Xaweb ge Jesuba nē ǃgom xūn hoana ge dī. Jehovab xab ge ǁgaumâihe amaga ǀguis ose xawe ǃgōsase khoenab a ǀnam amaga. Jesub ge kai ǀnammab khoena ūba hâsa ge ǁgau, ǁîna aoǁnâba, ǁkhāǁkhā tsî huis ǃnâ-ū. ǁŌb nî tsēs ais tsînab ge Jesuba ǁîb ǁkhāǁkhāsabega ǁkhāǁkhā, ǂkhâǃnâ tsî gere ǁkhaeǂgao. (Jhn. 13:​12-15) Jesub ge kai tsûb  ǃnâb ǃgâuhaib ai mā xawe ǁîb xōǀkhā ge ǃgâumâihe hâ i eloxoresa khoeba ǃâubasensa ge mā. Tsî ǁîba ge mîba ǁîb ǀkhab paradais ǃnâ nî hâ ǃkhaisa. ǁÎb Mamas tsînab ra tsâbasab ge ge ǁgau tsî Johaneba ge ǂgan îb ǁîsa kōǃgâ. (Luk. 23:​42, 43; Jhn. 19:​26, 27) ǁNās ǀkha i ge Jesub di ǃgam ǀnamma ǁîb ǁōb ǃnâ-ū ǀgui ge ǁgauhe tama hâ i xawe ǁîb ûi ǁaeb hoaba ǃhūbaib ai.

12. Matib Jesuba nēsi sida ra hui?

¹² Xristub ge “ǀgui ǃnās” ǃaroma ge ǁō, xaweb ge noxopa ǁguibade sida ra dība. (Rom. 6:10) Tae-eb ra dība da? Aiǃgû tsîb ge ǂgui ǃgâi xūna ra mā da hîna nēsi ra īǁkhāna xoremarib xa ra ǃaromahe hâse. ǃGaoǃgâ re tae-eb nēsi ra dīsa. ǁÎb ge nēsi sida Gao-ao, ǀGapi Prister tsî ǀhaohâb di danase ra ǃoaba. (1Kor. 15:25; Efe. 5:23; Heb. 2:17) ǁÎb ge ǂkhauhesan tsî kai ǂnubis khoena ǀhaoǀhaos sîsen-e ra mûǂam. ǁNā sîsenni ge kai ǁgâiǀāb nî ǀams aiǃâ nî dītoahe. a (Mat. 25:32; Mrk. 13:27) ǂGomǂgomsa ǃgāb tsînab ge ra sîsenū î gu ǂhâ da hâ gagasi ǂûna ǂhanu ǁaeb ai mā da, î da Jehovaba ǂgomǂgomsase ǃoaba ǀuniga tsēdi ǃnâ. (Mat. 24:45) Tsîb ga sida ǂamai 1 000 kurigu ǁaeb ǃnâ ǂgaeǂgui, ob ge aiǃgû tsî sida xūna nî dība. Jehovab ge amabes ǃnâ ǁîb Ôaba sida ǃaroma ge mā.

ǀASA XŪNA ǁKHĀǁKHĀSEN ǀGARA

13. ǂÂiǃgâsa mati nî hui du î du aiǃgû tsî Jehovab tsî Xristub ūba da hâ ǀnammi xa ǁkhāǁkhāsen?

¹³ Aiǃgû tsî du ge Jehova Elob tsî Jesub Xristub ūba da hâ ǀnammi xa a ǁkhāǁkhāsen ǀgara ǁkhā. ǁÎb ge dība da xūna du ga ǃgamse ǂâiǃgâ o. ǀNîsi du ge nē kuri Jesub ǁōb ǂâiǂâisens ǁaeb ǃnâ ǀgui tamas ka io ǀgam ǃnaeǃkhaidi Jesub ûib xa hâde a khomai ǁkhā. Tā ǂgui danaǃâde ǀgui ǁaeb ai khomai re. Xawe ǂause khomai tsî ǀarosa ǃaromade ôa re, tae-i ǃaroma da Jehovab tsî Jesub tsîna nî ǀnamsa. Tsî nauna mîba re tae-e du go sadu khomais ǃnâ a hōsa.

14. Ôaǃnâsa mati a hui da ǁkhā î da aiǃgû tsî xoremarib tsî nau ǁkhāǁkhādi xa ǁkhāǁkhāsen? (Psalmdi 119:97) (Ai-īsiba mû re.)

¹⁴ Amab ǃnâ du ga gaxuse hâ, o du ge ǀnîsi a ǂâi ǁkhā, ǀasa xūna hâ ǁkhāǁkhāsen ǁkhā du a na. Aiǁgause, Elob di ǂhanu-aisib, ǁîb ǀnammi tsî xoremarib xa. Ama as ge hoaǁae i ge ǀasa  xūna hâ ǁkhāǁkhāsen ǁkhā da a na. Tae-e du a dī ǁkhā? Elobmîs ai a ǃgaoǃgaosa ǂkhanina khomai tsî ǁkhāǁkhāsen re. ǁNâuǃā tama du hâ xū-e du ga Elobmîs khomais ǃnâ hō, o ôaǃnâsa dī re. Tsî tsēs ǃnâ ǁkhāǁkhāsen du go xūna ǂâiǃgâ re. Tae-e i Jehovab, ǁîb Ôab tsî ǁîkha sado ūba hâ ǀnammi xa ra mîba du ǃkhaisa.—Khomai re Psalmdi 119:97 sa.

15. Tae-i ǃaroma i a ǂhâǂhâsa î da ǀasa xūna Elobmîsa xu ǁkhāǁkhāsen ǀgara?

¹⁵ Tā ǂkhabuǂâi re, Elobmîsa du ra khomai tsî ra ôaǃnâ ǁaeb hoaba du ga ǀasa xū-i tamas ka io ǁkhoaxa xū-e hō tama io. Goud ǀuriba ra ôa khoe-i aiǁgaus xa ǂâi re. ǃNāsa ǁaeba i ge goud ǀuriba ra ôa khoe-e ǂgui tsēde ra sîsen î-i ǂkhari ǃârob goud ǀuriba hō. Xawe i ge ǀûsen tama tsî aiǃgû tsî ǃnūǃnâxase ǁnā xū-e ra ôa ǀgara, kaise i a ǀō-aisa amaga. ǁNās ǂam-ai i ge Elobmîsa xu da ra ǁkhāǁkhāsen xūna, goud ǀurib xa ǃnāǃnāsase a ǀō-aisa. (Psa. 119:127; ǂKhm. 8:10) ǁNā-amaga ǃnūǃnâxase Elobmîsa khomai ǀgara.—Psa. 1:2.

16. Mati da Jehovab tsî Jesub tsîna a ǁgae ǁkhā?

¹⁶ ǁKhāǁkhāsen du ga o, ǂâi re mati du nē xūna sadu ûib ǃnâ a sîsenū ǁkhā ǀgausa. Aiǁgause, Jehovab di ǂhanu-aisiba ǁgae re, nauna ǀgora-e ūhâ tamase hâ-ūs ǃnâ-ū. Jesub Dadasab tsî naun tsîna ūba hâ ǀnamma ǁgae tsî māsenxase Jehovab ǂhâba hâ xūna dī. Tsî nauna hui re sadu ûiba i ga ǀnî ǁaegu ai ǃgom kai xawe. Jesub tsîna ǁgae re nauna aoǁnâbas ǃnâ-ū, în ǁîn tsîna ǃēsa ūhâ tsî Jehovab di ǀō-aisa ǀkhaeba ūǃoa.

17. Sao ra ǁkhāǁkhāǃâs ǃnâ da tae-e nî ǃhoaǃgao?

¹⁷ Xoremariba da ra ǃgôaǃgâ khami da ge ǃnāsase Jehovab tsî ǁîb Ôab tsîna nî ǀnam. ǁÎkha da ǃnāsase ra ǀnam khami kha ge ǁîkha tsîna nî ǀnam da. (Jhn. 14:21; Jak. 4:8) ǁNās ǀkha hā re î da aiǃgû tsî Jehovab māda hâ ǃgâi xūn hoana sîsenū tsî xoremarib xa ǁkhāǁkhāsen. Sao ra ǁkhāǁkhāǃâs ǃnâ da ge ǃnāsa ǀkhaegu Jesub xoremariba xu da a hō ǁkhā ga nî ǁkhāǁkhāsen. Tsî mati da ganganxasiba Jehovab ǀnammi ǃaroma nî ǁgausa.