1. Tae-i ǃaroman ǂgui khoena Elobmîsa ǂgomǃgâ tama hâ?

 ǂGUI khoen ge xūn ǃnâ ǀoro ǂgomǃgâsiba ūhâ. ǁÎn ge a ǀū ham-en nî ǂgomǃgâsa. ǁÎn ge ra ǂâi, polotiks ǂgaeǂgui-aogu, ǂansa ūhâ khoen tsî ǁamaxū-aon ǁîn ǃgâib kōse nî kōsa. ǁNās ǀkhan ge kerkhegu ǂgaeǂgui-aogu tsîna ǃgôa tama hâ. ǁNā-amagan ge ǁnā ǂgaeǂgui-aogu ra mî, ǁîgu ra sao ǂkhanisa ǂgomǃgâ tama hâ—Elobmîsa.

2. Psalmdi 119:160 ǃoagu da tae-e nî ǂgomǃgâ?

² Jehovab di ǃoaba-aon ase da ge ra ǂgomǃgâ. ‘Jehovab a amab’ di Elosa. Tsîb sida ǃaroma ǃgâib ǀguiba ra ǂhâbasa. (Psa. 31:5; Jes. 48:17) ǂAn da ge a, Elobmîs ǃnâ da ra khomai xūna da a ǂgomǃgâ ǁkhā ǃkhaisa. Sida ge ra ǂgom “amab ge a sa mîs di dana ǃkhai.” (Khomai re Psalmdi 119:160 sa.) Elobmîs ôaǃnâ-aob ge sao ra-e ge mî: “Elob ra mî, xū-i xare-i ge ǂhumi tama hâ. Tsî ǁÎb ra mî xūn hoan ge, ra ama kai. Elob khoen ge ǁîb ra mî xūna ra ǂgom, ǁîban ra ǂgomǃgâ amaga.”

3. Tae-e da nē ǁkhāǁkhāǃâs ǃnâ nî ǃhoaǃgao?

³ Mati da khoena a hui ǁkhā, în ǂgomǃgâsiba Elobmîs ǃnâ ūhâ? Hā re, î da ǃnona ǃaromadi xa ǂâiǃgâ, tae-i ǃaroma da Elobmîsa a ǂgomǃgâ ǁkhāsa. Mû da ge nî Elobmîs dawahe tama hâsa tsî Elobmîs kēbodi ra dīǀoaǀoahesa. Tsî Elobmîs mati khoen di ûiga ra ǀkharaǀkharasa.

4. ǀNî khoena tae-i ǃaroma ra ǂâi Elobmîs ge dawahesa?

⁴ Jehovab ge 40 ǂgomǂgomsa khoega ge sîsenū, îgu Elobmîs di ǂkhanide xoa. Xawe Elobmîs ge xoa-aihe, ǂkhanigu ge sida tsēs kōse hâ ǃkharu tama hâ. Sida ge ǁgâiǁnāsa ǂkhanigu ǀguiga ūhâ. Tsî ǁnās ge ra ǃaroma, în ǀnî khoena dîsen. Nētsē da ra khomai xūn a ǀguisa, ǁnā khoegu gere xoan ǀkha. ǁNāsa da a ǂgomǃgâ ǁkhās xa ǂâi î du hâ?

5. Hebreǁî Xoade mati ge ǁgâiǁnâhe? (Tsoatsoas ai hâ ai-īsiba kō re.)

⁵ ǁÎb di haisi-amsa sâus, ǃaromab ge Jehovaba ge mî, î-i ǁîb mîsa ǁgâiǁnâhe. ǁÎb ge Israeli di gao-aoga ge mîba, îgu ǂhanuba ǁgâiǁnâ. Tsî Leviǁîga ǁgaumâi îgu khoena ǁnā ǂhanuba ǁkhāǁkhā. (Deu. 17:18; 31:24-26; Neh. 8:7) Jodeǁîn ge Babilonsa ǃoa a sîhes khaoǃgâ î ge ǁgâiǁnâ-aoga, Hebreǁî Xoade ǂguiǃnâguse gere ǁgâiǁnâ. (Esr. 7:6) ǁÎgu ge nēsa ǃamkuse gere dī. Tsî ǁgâi gere khoegu ge mîdi ǀguide ge ǃgôa tama hâ i. Xawe gu ge ǁîga sîǂkhanidi tsîna gere ǃgôa. Îgu ǂan, hoa xūn ge ǃgâise gere ǁgâiǁnâhesa. Xawe nē khoegu ge ǀoasa kurusa ūhâ tama hâ i. Amaga i ge ǂkhari dīsāde Elobmîs ǃnâ ge hâ i. Xawe ǀgui xoas ge ǂgui ǃnāde gere ǁgâihe. ǁNā-amaga di ge ǁnā dīsāde ge mûhe ǁkhā i. Mati?

6. Dīsāde mati Elobmîs ǃnâ ge hō-e ǁkhā i?

⁶ Nētsē Elobmîsa ra ôaǃnâ khoegu ge a ǂan mati gu ǁnān. Hîna ge Elobmîsa gere ǁgâiǁnân di dīsāde nî mû ǁkhā ǀgausa. ǁNāsa ǁguiǃās ǃaroma: ǂÂis ǀguisa di re, 100 khoegu ga mîbahe o. Îgu ǀgui xoasa xoaǁnâ. ǀGui khoeb ge ra dīsā ǁîb di xoaǁnâs ǃnâ. ǀGui ǀgaub ǁnā dīsāsa da a mû ǁkhāb ge, ǁîb ge xoa xū-e nau gu ge xoa xū-i ǀkha ǀgopeǀnōsa. ǁNā ǀgaub ǃnâ i ge Elobmîs ge xoa-aihe ǂkhaniga ra ǀgopeǀnōhe. Tsî gu ge Elobmîsa ra ôaǃnâ khoega, dīsāde a ǂanǂui ǁkhā. Tsî ūǂuisa xū-e a mû ǁkhā.

7. Elobmîsa gere ǁgâiǁnâ khoena mati ǁnāsa gere dī?

⁷ ǁNān hîna Elobmîsa gere ǁgâiǁnân ge ǃgoma gere hōǃâ, în ǁnāsa ǃamkuse dī ǁkhā. Nēsa ra ǃkhō-am aiǁgausa kō re. Hebreǁî xoadi ge 1008ǁî kuri tamas ka io 1009ǁî kuri Jesub ǃnaes khaoǃgâ ge ǁgâi toahe. Tsî Leningrad Codex [ǂkhanis] di gere ǂgaihe. Xawe nē ǁaeb ǃnâ i ge ǂgui ǂkhanin Elobmîs gere xoa-aihena ge hōhe. Hîna Leningrad Codex ǂkhanis xa 1000 kuriga kai isa. Xawe ǀnîn ge ra ǂâi, Elobmîs ǂkhanigu 1000 kuriga gere ǁgâiǁnâhe di. Amaga i ge Leningrad Codex sa, ǁnā ǂkhanigu ǀkha ǀgui tama hâsa. Xawe ǁnā i ge ama tama hâ. Ôaǃnâsa ra dī khoen ge Elobmîs di ǀoro ǂkhaniga, ǀasa ǂkhanigu ǀkha ǀgopeǀnō o. On ge ge mû, ǂkhari ǃkharagagusib mîdi ǃnâ hâsa. Xawes ge ǂâibasensa ge dawa tama hâ i.

8. Tae ǃkharagagusiba Grikegowab Xoadi tsî ǀorokamǁaeb xoadi ǁaegu hâ?

⁸ ǂGurokamǁaeb Xristeǁîn tsîn ge Elobmîsa gere ǁgâiǁnâ. ǁÎn ge 27 Grikegowab Xoade ǃamukuse ge ǁgâiǁnâ. Hînan ge ǁîn ǀhaodi tsî aoǁnâ sîsenni ǃnâ gere sîsenūna. ǀGui ôaǃnâ-aob  hîna ge ûiǃkharu ge Grikegowab xoas sîsenga gere ǀgopeǀnōb ge ra mî: “ǃNāsa Grikegowab xoadi ge hâ . . . Tsî di ge ǁîde, naun xa a ǀoasa.” Anatomy of the New Testament di hâ ǂkhanis ge ra mî: “Khoen ge a ǂgom ǁkhā, ǁîn nētsē Elobmîs ǃnâ ra khomai xūn a ǀguisa xoa-aogu ge xoan ǀkha.”

9. Jesajab 40:8 ǃoagu tae-e Elobmîs di haisi-ams xa a ama?

⁹ ǂGui kuriga gu ge Elobmîsa gere ǁgâiǁnâ khoega, ǃgarise tsî ǂōrisase gere sîsen. Î da nētsē amaba ra mî Elobmîsa khomai tsî ôaǃnâ. b ǂAn da ge a Jehovab ge ge ǃaroma, î da nētsē Elobmîsa ūhâ ǁkhā. (Khomai re Jesajab 40:8 sa.) ǀNîn ge ra mî, Elobmîs haisi-ams ge sâuhe ǃkhais ge ǂâibasen tama hâ, Eloba xus ra hāsa. Hā re î da ǀnî ǁgauǁgaude kō, hîna ra ǁgaude Elobmîs Eloba xu ra hāsa.

10. Aiǁgau-e mā re, dīǀoaǀoasa kēbos 2 Petrub 1:21 ǃnâ ra hōhesa? (Ai-īsiga kō re.)

¹⁰ Elobmîs ge ǂgui kēbode ūhâ, hîna ge dīǀoaǀoahede. ǀNîn ge ge ama kai, 100 kurigu aiǃân ge xoahe hâ i xawe. ǃKharu ge ǁaeb ǃnâ ge ī xūn ge ra ǁgau, nē kēbodi ge ama īsa. Nēs ge buru kai da tama hâ, ǂan da a amaga nē kēbode ge xoaǁnâ kai khoeb a Jehova sa. (Khomai re 2 Petrub 1:21 sa.) Aiǁgause, Babilons di ǁnās di kēbodi xa ǂâi re. 778 tsî 732ǁî kurigu Jesub ǃnaes aiǃâ, îb ge Jesjaba ge kēbo ǁnā ǁaeb di Babilons nî dīkākāhesa. ǁÎb tsîn ge ǁîsa nî ǁnāǂam khoeb di ǀonsa ge mā. Kores dib ge gere ǂgaihe. Tsîb ge kēbos tsîna ge dī, Koresi mati ǁnāsa nî dīsa. (Jes. 44:27–45:2) Jesajab ge kēbos tsîna ge dī, Babilons hoase nî dīkākāhesa. Tsî i khoe-e, ǁkhawa ǁnāpa hâ tidesa. (Jes. 13:19, 20) Kēbohe î ge khami ǀgui i ge ge ī. Babilons  ge Medeǁîn tsî Perseǁîn xa 539ǁî kuri, Jesub ǃnaes aiǃâ ge dīkākāhe. Tsî ǁnā ǃās hîna ge ǀgui ǃnās ai, kaise kai is ge hâǃnâhe tama hâ.—Elobmîs ge Babilons dīkākāsa ra kēbo. Di hâ vidioba 3ǁî ǁkhāǁkhāǃâs, 5ǁî xoaǀgoras ǃnâ, ǀAmosib kōse ǃgâiaǂgao re di ǀon hâ ǂkhanis ǃnâ internets ai kō re.

11. Danieli 2:41-43 sa mati nētsē ra dīǀoaǀoahe?

¹¹ Elobmîs kēbodi ge ǃkharu ge ǁae, ǀgui ge dīǀoaǀoahe tama hâ i. Nētsēs tsîna da ge ra mû, Elobmîs kēbodi mati ra dīǀoaǀoahesa. Aiǁgause, Danieli kēbos di dīǀoaǀoahes xa ǂâi re. Anglo-Amerikab ǃhūbaib ǀgaib xa hâba. (Khomai re Danieli 2:41-43 sa.) ǁNā kēbos ge ra mî Anglo-Amerikab nî “ǃkharese ǀgaisa” isa, ǀurib khami. Tsî “ǃkharese nî ǂkhabusasa” ǂgoab khami. Tsî ǁnāsa, da ge a mû ǁkhā Brittanjeb tsî Amerikab ge ǀurib khami ī ǀgaiba ǁgau hâ. Hoa ǀgam ǃhūbaib, torokha gu ge a dan o. Tsîkha ge nēsis tsîna kaise ǀgaisa toroǂnubisa ūhâ. Xawe ǁîkha di ǀgaib tsîn ge khoen xa ra ǂkhabu kaihe. Nē khoen ge ǂhanub tsî ǁamaxūǃkhaigu tsîna ra mâǃoa. ǀGui khoeb hîna polotiks ǃnâ ǂansa ūhâb ge ra mî: “Nētsē i ge Amerikab khami ī ǃhūba a ǀkhai. Hîna ǃnāsase polotiks ǃnâ ǀgorasa ūhâba.” Tsî Brittanjeb ge ǂgui kuriga ǀgorasa ūhâ, khoen ǁnâugu tama hâ amaga. Mâ ǃgaeǁaresan, ǀnî Europa ǃhūgu ǀkha nî ūhâsa. Nē ǀgoras ge ra ǃaroma, îb Anglo-Amerikaba tā ǃgâi mîǁguiga dī.

12. Mâ ǂgomǃgâsiba da Elobmîs kēbodi ǃnâ ūhâ?

¹² ǂGui Elobmîs kēbodi, hîna ǀnai dīǀoaǀoahe hâ di ge. Sida ǂgomǃgâsiba Elob mîmâidi hānîǁaeb xa hâde ra ǀgaiǀgai. Sida ge Psalmdi xoa-aob, hîna ge Jehovab ǃoa a ǀgoreb khami ra tsâ: “Ti ǀoms ge sa oresa ǁgâ hâ, sa mîs ai ta ge ra ǃâubasen.” (Psa. 119:81) Elobmîs ǃnâ-ūb ge Jehovaba, ‘ǃgoaxaǁaeb ǃaroma ǃâubasensa’ mā da hâ. (Jer. 29:11) Hānîǁaeb ǃaroma da ūhâ ǃâubasens ge, khoen ra dī xūn ai ǃgaoǃgaosa tama hâ. Xawe Jehovab di mîmâis ai. A da aiǃgû tsî sida ǂgomǃgâsiba Elobmîs ǃnâ omkhâi re. Tsî Elobmîs di kēbode ǃgâise ôaǃnâs ǃnâ-ū.

13. Psalmdi 119:66, 138 ǃoagu, mâ ǃaromasa noxoba hâ Elobmîsa da nî ǂgomǃgâbasa?

¹³ ǀKhara ǃaromas Elobmîsa da a ǂgomǃgâ ǁkhās ge, ǁîs di ǀapemādi khoena ra hui amaga. (Khomai re Psalmdi 119:66, 138 sa.) Aiǁgause, ǃgamme hâ khoera hîna gere ǀgora ǂgao ra ge nēsi ǂkhîxase a ǀguiǃnâxa. Tsî ǁîra ǀgôan ge Xristeǁî ǁgûra xa ra kaikaihe, hîna ǁîna a ǀnam tsî ǁîn ǀkha ǁae hâra.—Efe. 5:22-29.

14. Aiǁgau-e mā re, Elobmîs mati khoen ûiga ra dawa ǀgausa?

¹⁴ Elobmîs di ǀapemāde saos ǃnâ-ūn ge ǂgui khoen, ǁgai xūna gere dīna ge ǀkharaǀkharasen. Khomai re, matis ge Elobmîs ǀapemāsa Jack di ǀon hâ, ǃkhōsabeba a hui ǀgausa. c ǁÎb ge kaise ge ǁkhōǁkhōsa khoe-i. Tsîb ge ǁōb ǁkharaba ge māhe hâ i khoegu hoagu xa, kaise ge ǁgai i. Xaweb ge ǀgui tsēs ai Elobmîs ǁkhāǁkhāsa ge hâǃnâ.  ǃGâsagu hîna Elobmîs ǁkhāǁkhāsa gere dīgu, di khoexaǃnâsib ge ǁîba kaise ge tsâǀkhā. Tsîb ge ǁîb tsîna Elobmîsa ge ǁkhāǁkhāsen tsoatsoa. Elobmîs ǀapemādeb ge ǁîb ûib ǃnâ a sîsenū amagab ge, ge ǃgâi khoe kai. ǁAeb ǀkhab ge Jacka ge ǁāǁnâsa tama aoǁnâ-ao kai. Tsîb ge ega sī ge ǁāǁnâhe. ǁÎb ge ǁkhoaǂgaose ǁîb ǀkha ge tronkhes ǃnâ hâ i, khoega Elob Gaosib xa gere aoǁnâba. Tsîb ge haka khoega ge hui, îgu ǁîgu tsîna amab xa ǁkhāǁkhāsen. Jacki di ǁaeb ge hā o, îb ǃgamhe ob ge ǁîba ǀnai ge ǀkharaǀkharasen hâ i. ǁNâuǃgâ ǃkhaib ǃnâ ge ǁîba gere ǁkhauba khoeb ge ra mî: “Jacki ge 20 kuriga ǃkharu hâse ǃgâi tama ǀgauba ge ūhâ i. Xawe Jehovab di ǃoaba-aon, huib ǀkhab ge ge ǀkharaǀkharasen.” Jacki ge ēga ǃgamhe xawes ge ǁîb aiǁgausa ra ǁgau da. Sida tsîn Elobmîsa a ǂgomǃgâ ǁkhāsa. Tsîs ǀgaiba ūhâsa khoen ûiga dawas diba, în ǃgâi khoe kai.—Jes. 11:6-9.

15. Matis Elobmîsa ûiǂuisa Jehovab di ǃoaba-aona nau khoena xu ra ǀgora? (Ai-īsiba kō re.)

¹⁵ Elobmîs di amaban ra ūǃoa ǃkhais ǃgaon ge, Jehovab di ǃoaba-aona a ǀguiǃnâxa. (Jhn. 13:35; 1Kor. 1:10) Sida ǂkhîb tsî ǀguiǃnâxasib tsîn ge ǃgāsase ra mûhe, nē ǃhūbaib di polotiks. Tsî khoen ǁaegu hâ ǀgoradi ǀkha da ga ǀgopeǀnō o. Jehovab di ǃoaba-aon di ǀguiǃnâxasibab ge Jean di ǀon hâ ǂkhamkhoeba mû tsî ge tsâǀkhāhe. ǁÎb ge ǀnî Afrika ǃhūb ǃnâ ge kai. ǃHaodi ǁaegu hâ torob ge tsoatsoa o. Ob ge ǁîba toroǂnubis ǃnâ ge sîsen tsoatsoa. Xaweb ge ēga ǀkhara ǃhūba ǃoa ge ǃkhoe. ǁNāpab ge Jehovab di ǃoaba-aon ǀkha ge ǀhao. Jeani ge ra mî: “ǁKhāǁkhāsen ta ge ge, Jehovab di ǃoaba-aon polotiks ǃnâ ǃâ tamasa. Tsî  ǀgora-e ǁîn ǁaegu ūhâ tama hâsa. Xawen ge a ǀnamgu.” ǁÎb ge aiǃgû tsî ra mî: “Ti ûiba ta ge ge māǁnâ, î ta ti ǃhūba ǃkhamba. Xawe ta ge Elobmîs ǃnâ hâ, amaba a ǁkhāǁkhāsen o. O ta ge ti ûiba Jehovab ai ge māǁnâ.” Jeani ge kaise ge ǀkharaǀkharasen. ǁÎb ge ǀnî hâ, khaoǃhūba ūhâ khoen ǃoagu ǃkham tama hâ. Xawe ǀhao-ūb ra khoe-i hoa-e Elobmîs amaba ra mîba. Elobmîs ge ǃkharagaǃnâgu khaoǃhūga ūhâ, khoena ra hui. Tsî ǁnās ge ra ǁgau, Elobmîsa da a ǂgomǃgâ ǁkhāsa.

16. Tae-i ǃaroma i a ǂhâǂhâsa sida ǂgomǃgâsiba Elobmîs ǃnâ ǀgaiǀgaisa?

¹⁶ Nē ǃhūbaib ra ǁgaiǂoa khamib ge sida di ǂgomǃgâsib, Elobmîs ǃnâ da ūhâba nî ǃâitsâhe. Khoen ge a dī ǁkhā, î da tā Elobmîs ǃnâ ǂgom. Tsî Jehovab gā-ai tsî ǂgomǂgomsa ǃgāba nētsē ra sîsenūsa, tā ǂgomǃgâ. Xawe da ga ra ǂgom o, Jehovab mîs a amasa. O da ge ǁnāti i ǃâitsâga a mâǃoa ǁkhā. ǁNā-amaga da ge sao ra-e ra ǃkhō-am “ti ǂgaoba ta ge sa ǁguiǂamde dīǀoaǀoas ai ra ǃammâi ǀamosiba xu, ǀunis kōse.” (Psa. 119:112) “Tao” da ge tide khoena amaba mîbasa. Tsî ǁîna nî ǂkhâǃnâ, în amab ǀkha ǀguiǃnâxase ûi. (Psa. 119:46) Tsî da ge ‘taniǀnamxasib ǀkha nî mâǃkharu tsî ǃgâiaǂgaob ǀkha’ ǃgom mâsigu ǃnâ.—Kol. 1:11; Psa. 119:143, 157.

17. Kurib xoasa tae-i xa ra ǂâiǂâi da?

¹⁷ Kaise da ge ra gangan, Jehovab amaba ǁkhāǁkhā da hâsa. ǁNā amab ge ra ǀgaiǀgai da. Î da nē ǁgai ǃhūbaib ǃnâ ǃâubasens tsî ǃgāsa daoǁgaus tsîna ūhâ. Tsî hānîǁaeb ǃaroma Elob Gaosib ǂgaeǂguis ǃnāka. As 2023ǁî kurib dana xoasa hui da re. Î da Elobmîs ǃnâ ǂgomǃgâsiba ūhâ, ǁîs a ama xui-ao.—Psa. 119:160.