1-2. Tae-i ǃaroma da kurib hoaba, Jesub di ǁōb ǂâiǂâisensa ra hâǃnâ?

 ǁAUBEXA 2000 kuriga ǃkharu hâseb ge Jesuba ǁîb di ûiba sida ǃaroma ge mā. Î da ǀamo ûiba hō ǁkhā. ǁŌb nî ǃuis aiǃâb ge Jesuba ǁîb di saosabena ge mîba. În ǁîb ge dī xū-i xa ǂâi, ǁnāsan ge ǂkhari ǃoabasa ūhâs ǃnâ-ū ra dī. Pere-i tsî xûi-i tsîna ǃkhōǂgāhâse.—1Kor. 11:23-26.

² Jesub di mîmāsa da ge ra ǁnâuǀnam, ǁîba da a ǀnam amaga. (Jhn. 14:15) Kurib hoaba da ge Jesub di ǁōb ǂâiǂâisens ǃnâ ǃgôaǃgâsiba ra ǁgau. ǁAeba ǁamaǂui tsî ǁîb ǁōb di ǂâibasens xa ǀgore hâse ǂâiǂâisens ǃnâ-ū. Xawe da ge ǃgâiaǂgao hâse ǃnāsa-e ra dī. Aoǁnâ sîsenni ǃnâ da ge nauna ra ǂkhâǃnâ, în ǁîn tsîna nē ǀō-aisa tsēsa hâǃnâ. Tsî ǂan da ase da ge xū-i xare-e mā-am tide. Î-i tā sida Jesub di ǁōb ǂâiǂâisensa hâǃnâsa xu ǁkhae.

3. Tae-e da nē ǁkhāǁkhāǃâs ǃnâ nî ǃhoaǃgao?

³ Nē ǁkhāǁkhāǃâs ǃnâ da ge ǃnona ǀgauga nî ǃhoaǃgao. Hînan ge Jehovab di khoena dītsâ ga Jesub di ǁōba tsēdīsa: (1) Jesub di ǁōb ǂâiǂâisensa ǁîb ge mîban ǀgaub ǃnâ dīs, (2) nauna Jesub di ǁōb ǂâiǂâisensa ǃoa ǁkhaus ǃnâ-ū tsî (3) Jesub di ǁōb ǂâiǂâisensa tsēdīsa ǃgomsigu hâ xawe.

4. Mâ dîde kurib hoaba Jesub di ǁōb ǂâiǂâisens tawa ra ǃereamhe? Tsî tae-i ǃaroma i nē ǃereamde sida nî ǂhâǂhâsaba? (Lukab 22:19, 20)

⁴ Jesub di ǁōb ǂâiǂâisens tawa da ge kurib hoaba, Elobmîs ai ǃgaoǃgaosa ǃhoasa ra ǃgâ. Hîna ū da hâ dîdi ai ǃgāsa ǃereamde ra māsa. ǁKhāǁkhāsen da ge nî, tae-i  ǃaroma i khoesiba xoremariba ǂhâ hâsa. Tsî matib ǀgui khoeba ǂgui khoen di ǁorena a matare ǁkhāsa. ǂÂiǂâiǃnâhes tsîna da ge nî dī, xûi-i tsî pere-i tae-e ra ǂâibasensa. Tsî ham-i ǁî-e xu ǂû tsî ā ǁkhāsa. (Khomai re Lukab 22:19, 20 sa.) ǁNān hîna ǃhūbaib ai nî ûin di ǃâubasens xas tsîna da ge nî ǂâiǂâisen. (Jes. 35:5, 6; 65:17, 21-23) ǁNā-amaga da ge nē amaba ǂhâǂhâsa xū-i ase nî mû. Biliundi khoen ge ǁnāsa ǁnâuǃā tama tsî Jesuba ǃgôaǃgâsiba ǁgau tama hâ. Tsîn ge Jesub di ǁōb ǂâiǂâisensa ǁîb ge ǁîb di saosabena a ǁkhāǁkhā ǀgaub ǃnâs tsîna dī tama hâ. Tae-i ǃaroma?

5. Apostelgu ǁōb khaoǃgâ khoena mati Jesub ǁōba gere ǂâiǂâisen?

⁵ Jesub di apostelgu ge ǁō toas khaoǃgâ, î ge ama tama hâ Xristeǁîna ǀhaohâb ǃnâ ge ǂgâ. (Mat. 13:24-27, 37-39) ǁÎn ge ‘ǂhumi-aon hîna saoǃgonaona’ ǁîn ǃoa ra ǂgaena. (ǃNǃkh. 20:29, 30) ǀGui ǀgaub hînan ǁnā ǂhumi Xristeǁîna ‘ama tama’ xūna ra ǁkhāǁkhā tsoatsoas ge. Jesub ge ǁîb di sorosa ‘ǀgui ǃnās ǀguisa ge ǁguibasa, ǂguin di ǁorenab nî ūbēse.’ Elobmîs ra mî khami. Xawen ge ǁîna gere ǁkhāǁkha, ǁîb ǁguibas ǂgui ǃnāde nî dīhesa. (Heb. 9:27, 28) Nētsēn ge ǂgui khoena, ǁnā ama tama hâ ǁkhāǁkhāsa ra ǂgom. ǁÎn ge hoaǁae kerkhegu tawa ra ǀhao tsî ǀnî ǁaegu ai tsēs hoasa. În Jesub di ǁguibas xa ǂâiǂâisen hîna Katoliks kerkheb ǃnâ “the Sacrifice of the Mass” di ra ǂgaihesa. b Tsî nau kerkhegu ge ǁnāsa ǀoro ǁaeb ǀguiba ra dī. Tsî ǁnā kerkhegu ǃnâ hâ khoen ge ǁnâuǃās tsîna di tama hâ Jesub ǁguibas tae-e ra ǂâibasensa. ǀNîn ge ra ǂâi, ‘Jesub ǁōba amase ra ǂâibasen ti ǁoren nēsi a ǀûbahe ǁkhāsa?’ ǁÎna tae-i ǃaroma ǁnā dîsa ra dî? ǀNî ǁaegu ain ge ǁîna nau khoen xa ge mîbahe Jesub ǁōb ǃaroma tama hâsa, în sida ǁorena ǀûbahe. Jesub di ama saosabena tae-e nēs xa ge dī?

6. 1872ǁÎ kurib ǃnân ge Elobmîs ǁkhāǁkhāsen-aona mâ ǀamǂoas ai ge hā?

⁶ 19ǁÎ kurigu ǃnâ i ge Elobmîs ǁkhāǁkhāsen-aon di groeps. Hîna ge Charles Taze Russelli xa gere daoǁgauhena Elobmîsa ǃgamse ge ôaǃnâ tsoatsoa. ǁÎn ge Jesub ǁguibas di ǂhâǂhâsasib xa gere ǂan ǂgao. Tsî ǁîb ǁōb mati nî ǂâiǂâisenhe ǀgaub tsîna. Tsî 1872ǁî kurib ǃnân ge Elobmîs ai ǃgaoǃgaosa ǀamǂoas ai ge hā, Jesub ge ǁîb ǁguibasa khoen ǃaroma ǀgui ǃnās ǀguisa a māsa. ǁÎn ge hō amaban ge ǀguri ge ūbasen tama hâ i. Xawen ge mîsa ge ǀgoragu ǂkhanin tsî ǂhôa ǂkhanigu ǃnâs tsîna. Tsî ǀorokam ǁaeb di Xristeǁîna ǁgaes ǃaroman ge ǁîn tsîna ǀgui ǃnās ǀguisa gere ǀhao. În Jesub di ǁōb xa ǂâiǂâisen.

7. Elobmîs ǁkhāǁkhāsen-aon ôaǃnâsa xu da mati ǃgâiba ra hō?

⁷ Nētsē da ge ǁnā ama Xristeǁî khoegu ge ǂgui kuriga ǃkharuhâse a ôaǃnâ xūna xū ǃgâiba ra hō. Mâ ǀgaub ǃnâ? Jehovab ge ra hui da, î da ǁnâuǃā Jesub di ǁguibas tae-e ra ǂâibasensa. Tsî i tae-e khoesib hoaba nî dībasa. (1Jhn. 2:1, 2) Tsî da ge ge ǁkhāǁkhāsen, Elobmîs ǀgam ǃâubasende khoen hîna Eloba ra ǂkhîǂkhîna ra māsa. ǀNîn ge ǀhommi ǃnâ ǁkhawa ǁō tidese nî ûi. Tsî nauna  ǃhūbaib ai ǀamosib kōse ûisa. Jehovab kōse da ge ra ǀgū, ǁîb matikōse a ǀnam dasa da ga ǂâiǃgâ o. Tsî matikō ǃgâiba da ra hōsa, Jesub di ǁguibasa xu. (1Pet. 3:18; 1Jhn. 4:9) Sida ǃgâsagu ge ǃkharu ge ǁae gere dī khami da ge sida tsîna. Nau khoena ra ǁkhau în Jesub di ǁōb ǂâiǂâisensa hâǃnâ. Tsî ǁîb ge ǁgau da khami dī.

8. Jehovab khoena tae-e ge dī, în nauna Jesub di ǁōb ǂâiǂâisensa ǃoa ǁkhau? (Ai-īsiba mû re.)

⁸ Jehovab khoen ge nauna Jesub di ǁōb ǂâiǂâisensa ǃoa kuriga ra ǁkhau. Tsî 1881ǁî kuriba xun ge ǃgâsan hîna Amerikab ǃnâ hâna ge ǁkhauhe. În ǁnā ǀō-aisa ǁaeb ǃgao ǀguiba oms ai ǀhao, Allegheny, Pennsylvanias ǃnâ. ǁNāpaxu î ge mâ ǀhaohâb hoaba Jesub di ǁōb ǂâiǂâisensa ǁîn ǀhaohâgu tawa ge ūhâ i. Maarti 1940ǁî kurib ǃnân ge ǃgâsana ge mîbahe, în ǃgâiǃgâibasensa ra ǁgau khoena ǁkhau. Tsî 1960ǁî kurib ǃnâs ge Betelsa ǂguro ǃnās ase ǀhaohâga ǁgâisa ǁkhauǂuide ge mā. ǁNā ǁaeba xu i ge Jesub di ǁōb ǂâiǂâisens ǁkhauǂuide māǂuihe hâ. Tae-i ǃaroma da ǃgarise ra sîsen nauna ǁkhaus ǃaroma?

9-10. Ham-e ǃgâiba ra hō ǁgūtsâ tsî da ga nauna a ǁkhau o? (Johaneb 3:16)

⁹ ǀGui ǃaromas hîna da nauna Jesub di ǁōb ǂâiǂâisensa ǃoa ra ǁkhauǂuis ge ǂhâba da ra amaga. În ǁnān hîna ǂguro ǃnās ase ra hâǃnâna Jehovab tsî Jesub ge dība da xūna ǁkhāǁkhāsen. (Khomai re Johaneb 3:16 sa.) ǃÂubasen da ge ra Jesub di ǁōb ǂâiǂâisens tawan ǁnâu tsî ra mû xūn nî ǂkhâǃnâ nîsa, în  Jehovab di ǃoaba-aon di ǀgui kai. Xawe naun tsîn ge ǃgâiba ra hō.

¹⁰ ǁNān hîna ge Jehovaba a ǃoaba ǀûn tsîna da ge ra ǁkhau. ǁNāsa dīs ǃnâ-ū da ge ǁîna ra ǂâiǂâiǃnâ, Elob ǁîna a ǀnam ǃkhaisa. ǂGuin ge sida ǁkhauǂuisa ra ǃkhōǃoa tsî da ge kaise ra ǂkhî ǁîna da ga mû o. Jesub di ǁōb ǂâiǂâisensa hâǃnâs ge ǁîna ra ǂâiǂâiǃnâ. Mātikōsen ge ǃgâiba gere hōsa Jehovaba ǃkharuge ǁaeb ǃnâ ǃoabasa xu. Monikas di aiǁgaus xa ǂâi re. c Coronas ǁaeb ǃnâs ge ǁîsa ǁkhawa ge aoǁnâ tsoatsoa. Jesub di ǁōb ǂâiǂâisensas ge 2021ǁî kurib ǃnâ a hâǃnâs khaoǃgâs ge ǁîsa ra mî: “Nēs ge kaise tita ǃaroma ge ǀō-aisa ī. ǂGuro ǃnāsa ta ge 20 kurigu ǃnâ, khoena ge aoǁnâba ǁkhā ī. Tsî ǁîna Jesub di ǁōb ǂâiǂâisensa ǃoa ge ǁkhau. Ti ǂgaob hoab ǀkha ǁguiǂgāsen tsî ta ge Jehovab tsî Jesub tsîn ge tita a dīban ǃaroma ǃgôaǃgâsiba ge ǁgau.” (Psa. 103:1-4) Khoen ga sida ǁkhauǂuisa ǃkhōǃoa tamas ka ion ga ǂkhā. Xawes tsîna da ge ǃgarise nî sîsen î da khoena ǁkhauǂui. Jehovab sida sîsen-e ra ǃgôaǃgâ amaga.

11. Jehovaba mati sida di ǁgūtsâde ge ǀkhae, khoena ǁkhausa? (Hagaib 2:7)

¹¹ Jehovab ge ǂgui ǀgaugu ǃnâ sada di ǁgūtsâdi. Khoena Jesub di ǁōb ǂâiǂâisensa ǃoa ǁkhaus dide ge ǀkhae. Tsî 2021ǁî kurib ǃnâ, Coronas xa ǃaromahe hâsen ge ǀnî xūna ge mā-amhe tama hâ i. Xawe i ge ǂgui ǃgôab khoen 21 367 603 ge hâǃnâ. ǁNās ge ǀgam tsî ǃhares xa a ǃnāsa Jehovab di ǃoaba-aon xa ǃhūbaib ǂhawase. Ama as ge Jehovab ǃgôab ǀkha ǁae tama hâsa. Xawe ǁîb ge khoen ǀkha ǁae hâ. (Luk. 15:7; 1Tim. 2:3, 4) ǂAn da ge a Jehovab sida ǁkhauǂuisa ra sîsenūsa îb ǃgâi ǂgaoba ūhâ khoena hō. Khomai re Hagaib 2:7 sa.

12. Mâ mâsiga a ǃgom kai ǁkhā Jesub di ǁōb ǂâiǂâisensa tsēdīsa? (Ai-īsiba mû re.)

¹² Jesub ge ge kēbo, ǀuniga tsēdi ǃnâ da ǂgui ǃkharagagu ǃgomsina nî hōǃâsa. Omaris xa mâǃoahe, ǃgôaǃgonhes, torogu, ǀaegu tsî ǀnî hâ xūn tsîna ǃkhōǂgā hâse. (Mat. 10:36; Mrk. 13:9; Luk. 21:10, 11) ǀNî ǁaegu ai i ge, nē mâsiga Jesub di ǁōb ǂâiǂâisensa tsēdīsa a ǃgom kai ǁkhā. Sida ǃgâsana tae-e dī hâ, în nē ǃgomsigu ǃnâ mâǀgâi? Tsî Jehovaba mati ǁîna ge hui?

13. Jehovaba mati Artemi di ǁkhoaǂgaosiba ge ǀkhae?

¹³ ǃKhōsis ǃnâ ǂgāhes. Sida ǃgâsan hîna ǁîn ǂgoms ǃao, ǃkhōsis ǃnâ hân ge hoana ra dītsâ în Jesub ǁōb xa ǂâiǂâisen. Artemi di aiǁgaus xa ǂâi re. ǁÎb ge 2020ǁî kurib Jesub di ǁōb ǂâiǂâisens ǁaeb ǃnâ, 17-square-meterga a ǂkhariro sels ǃnâ ge ǂgāhe. Hîna ge 5 khoega ǀgui ǁaeb ai gere ǂâusa. ǃKhōsis ǃnâb ge hâ i xaweb ge ǁîba ǂâiǂâisen ǃaroma xūna gere ôa hînab a sîsenū ǁkhāna. Tsîb ge ǁîb ǃgâib ǃaroma ge aiǂhumisen îb ǃhoasa mā. Xawe ǁîb ǀkha ge hâ i khoegu ge, ǂgae tsî gere ǀgoe. ǁÎba tae-e ge dī? ǁÎb ge ǁîga ge dî, î gu ǀgui īra tā ǂgae tsî ǀgoe. Tsî ǁnā khoegu ge ge mîǁgui, ǁîgu Jesub di ǁōb ǂâiǂâisens ǁaeb ai ǂgae tsî ǀgoe tidesa. Artemi ge ra mî: “ǁÎga da ge ge dî, î da Jesub di ǁōb ǂâiǂâisens xa mîbagu.” ǁÎgu ge xū-e gu ǁnâu ǂgao tama hâ di a mî. Xawe gu ge Artemi  mati ra tsēdī ǀgauba a mû o. O gu ge ǁîba nēs xa ǂgui dîde ge dî.

14. Taena ge dīhe, î-i Jesub di ǁōb ǂâiǂâisensa tsēdīhe coronas ge hâ i xawe?

¹⁴ Coronas ǁaeb. Coronas ge tsoatsoa o, on ge Jehovab khoena Jesub di ǁōb ǂâiǂâisensa salgu tawa ge hâǃnâ ǁoa i. Xawe ǁnās ge ǁîna ge ǁkhae tama hâ i Jesub di ǁōb ǂâiǂâisensa tsēdīsa. d Internetsa ūhâ ǀhaohâgu ge, zooms ǃnâ-ū ǁîsa ge tsēdī. O miliundi khoen hîna internetsa ūhâ tama hâna tae-e ge dī? ǀNî ǃhūgu ǃnâ i ge ǀapeǁguiga ge dīhe, îs ǃhoasa tvs ai ǁgauhe. Tamas ka io radios ǃnâ-ū ǃgâ-e. ǁNās xōǀkha, i ge ǁnâub bērode ǃhoasa 500 gowagu ǃnâ ge ǃkhōǁnâ. În ǁnān hîna ǂkhari ǃārodi ǃnâ ra hâna Jesub di ǁōb ǂâiǂâisensa tsēdī ǁkhā. Tsî gu ge ǂgomǂgomsa ǃgâsaga, ge ǀapeǁgui î-i ǁnā ǃkhōǁnâde ǃgâsana sī māhe.

15. Tae-e du Sues aiǁgausa xu ra ǁkhāǁkhāsen?

¹⁵ Omaris xa mâǃoahes. ǀNîn ra hōǃâ kai ǃgomsib Jesub di ǁōb ǂâiǂâisensa  tsēdīs dib ge, omaris xa mâǃoahesa. Sue ti ǀon hâ khoes hîna Elobmîsa ra ǁkhāǁkhāsens di aiǁgaus xa ǂâi re. 2021ǁÎ kurib ǃnâ, ǀgui tsēsa Jesub di ǁōb ǂâiǂâisens aiǃâs ge Suesa. ǁÎsa Elobmîsa gere ǁkhāǁkhā khoesa ge mîba. Oms ais ra mâǃoahe amagas Jesub di ǁōb ǂâiǂâisensa a hâǃnâ ǁoasa. ǁÎsa Elobmîsa ra ǁkhāǁkhā khoes ge Lukab 22:44 sa khomaiba si. Tsî ǁîsa ge ǁguiǃāba, ǃgomsiga da ga hōǃâ ǁaeb ai da ge, Jesub di aiǁgausa nî sao. Jehovaba ǃoa ǀgore tsî ǁîb ǃnâ ǂgomǃgâsa. Saora tsēs ais ge Suesa pere-i tsî xûi-i tsîna aiǂhumi tsî ǀō-aisa ǁGoas ǃoabas ǀapeǁguiba ge kō. Tsî ǁnā tsēs ais ge ǁîsa selfoni ǃnâ-ū Jesub di ǁōb ǂâiǂâisensa ge hâǃnâ. ǁNāpaxūs ge Suesa ǁîsa Elobmîsa gere ǁkhāǁkhā khoesa ge xoaba: “Kaise du ge ǁari go ǂkhâǃnâte. Hoana ta ge go dītsâ, Jesub di ǁōb ǂâiǂâisensa hâǃnâsa. Tsîb ge Jehovaba nauna go dī. ǁGau ǁoa ta ge a matikōse ta a ǂkhîs tsî ra ǃgôaǃgâsa.” ǂÂi î du ra Jehovab a hui du ǁkhāsa, ǁkhā ǃgomsiba du ga hōǃâ o?

16. Tae-i ǃaroma da ǂgomǃgâsiba ūhâ, Jehovab sida ǁgūtsâde nî ǀkhaesa? (Romeǁîn 8:31, 32)

¹⁶ Jehovab ge Jesub di ǁōb ǂâiǂâisensa tsēdīs ǃaroma da ra dī xūna kaise ra ǃgôaǃgâ. ǂGomǃgâ ǁkhā da ge a, ǁîb nî ǀkhae dasa ǃgôaǃgâsiba da ga ǁîb ge dība da xū-i ǃaroma ga ra ǁgau o. (Khomai re Romeǁîn 8:31, 32 sa.) ǁNās ǀkha hā re î da mîǁgui tsî nē kuri Jesub di ǁōb ǂâiǂâisensa hâǃnâ. Tsî hoana dītsâsa, ǃnāsase gāgāsi ǁaxasigu ǃnâ ǁhaosa.