1-2. ǁĀǁnâs khaoǃgâ da tae-e nî dī ǀgara? ǁGuiǃā re.

 MATIKŌ ǃnāde du sadu di omsa ra ǃanu? ǀNîsi du ge doe ǂgâ du nîs aiǃâ kaise ge ǃanu. O tae-e nî ī ǁkhawa du ga ǃanu tama io? ǂAn du ase i ge ǃkhaese ǁkhawa a ǀurixa ǁkhā. Sadu omsa du ga ǃanuse a ūhâ ǂgao o, o du ge hoaǁae nî ǃanusi.

² ǁKhā sîsenni ge a ǂhâbasa sada ǂâi ǀgaugu tsî ǂūb tawa i ga hā o. ǂAn da as ge ǁāǁnâhe da nîs aiǃâ da ge ǃgarise gere sîsen, î da ǂhâbasa ǀkharaǀkharana dī. Î da ‘Soros tsî gagas tsîra nî ǀuriǀuri ǁkhā xū-i hoa-e xu ǃanuǃanusen.’ (2Kor. 7:1) Xawe da ge nēsi apostel Paulub di ǀapemāsa nî sao, î da aiǃgû ‘hoaragase ǀasaǀasahe’ sa. (Efe. 4:23) Tae-i ǃaroma da nî aiǃgû ǁnāsa dīsa? Nē ǃhūbaib di ǀurib sida ǃnâ ǃhaese a ǂgâ ǁkhā amaga. Xawe da ga Jehovaba a ǂkhîǂkhî ǂgao o. O da ge ǁaeba xu ǁaeb ǀkha sida di ǂâidi, ǂūb tsî turagu tsîna nî ôaǃnâ.

3. Sadu ‘ǂâisa ǀasa kaisa’ tae-e ra ǂâibasen? (Romeǁîn 12:2)

³ Tae-e da nî dī, î da sida ǂâisa ǀasa kai tsî ǂâi ǀgauba  ǀkharaǀkhara? (Khomai re Romeǁîn 12:2 sa.) “ǂÂisa ǀasa kai” di hâ Grikegowab mîs tsîn ge a ǂâibasen ǁkhā. “ǂÂisa hoaǁae ǀkharaǀkharasa.” ǁNās ge ǂâibasen tama hâ, ǀnî xūn ǀguina da nî ǀkharaǀkharasa. ǁNā-amaga da ge nî kō mati da ǂganaga īsa. Tsî ǁnās ǃnâ-ū ǀkharaǀkharana nî dī, î da Jehovab di ǁgaraga ǁnâuǀnam. Nēsa da ge ǀgui ǃnâs ǀguisa dī tide xawe hoaǁae.

4. Tae-e da nî dī, î da tā mā-am îb nē ǃhūbaiba sada di ǂâide ǂgaeǂgui?

⁴ ǀOasa kurusa da ga hō o. O da ge hoaǁae dī da ra xūn ǃnâ Jehovaba nî ǂkhîǂkhî. Xawe da ge nēsi aiǃgû tsî ǃgarise nî sîsen, î da Jehovaba ǂkhîǂkhî. Kō re, Paulub ge sida di ǂâisa ǀasa kais tsî Jehovab ǂâisa ôasa mati gere ǀgopeǀnōsa. Romeǁîn 12:2 ǃnâ i ra mîhe khami. Nē ǃhūbaiba sida ǂâide ǂgaeǂguisa mā-ams xa da ge nî ôaǃnâ. Matikōse da ra mā-amsa îb Jehovab di ǂâisa sida di mîǁguigu tsî sīǃnâ ǂgao da ra xūna ǂgaeǂgui.

5. Mati da sida di ǂâiǀgauba nî ôaǃnâ Jehovab tsēs go ǀgū amaga? (Ai-īsiba mû re.)

⁵ Nē aiǁgausa kō re. Jehovab ge ra ǂhâba î da, ‘Elob di tsēsa sida di ǂâidi ǃnâ ûhā.’ (2Pet. 3:12) Dîsen re: ‘Tî ûiba ra ǁgau ǁnâuǃā ta rasa, nē ǃhūbaib di ǀams go ǀgū toasa? ǀGapi ǁkhāǁkhāsens tsî sîsenni xa ta ra dī mîǁguiga ra ǁgau, Jehovaba ǃoabas ǂgurose ti ûib ǃnâ ra hāsa? ǂGomsa ta ūhâ Jehovab tita tsî ti omaris tsîna nî kōǃgâsa? Tamas ka io ta hoaǁae sorosi ǂhâsib xa ra ǂâiǂhansen?’ Jehovab ge kaise a ǂkhî mûb ga o, ǁîb di ǂâis ǃoagu da ra ûisa.—Mat. 6:25-27, 33; Fil. 4:12, 13.

6. Tae-e da nî dī ǀgara?

 ⁶ Sada di ǂâiǀgauba da ge hoaǁae nî ôaǃnâ tsî ǂhâbasa ǀkharaǀkharana nî dī. Paulub ge Korinteǁîna ge mîba: ‘Aitsama ǃâitsâsen tamas ka io ôaǃnâsen, ise du ǂgoms ǃnâ ûi hâ ǃkhaisa.’ (2Kor. 13:5) ‘ǂGoms ǃnâ hâs’ ge ǀhaode hâǃnâs tsî aoǁnâ sîsenni ǃnâ ǁhaos xa ǃnāsa-e ǃkhōǂgā hâ. Nēs ge sida di ǂâidi tsî xūna da ra dība ǃaromas tsîna ǃkhōǂgā hâ. Sida di ǂâisa da ge nî ǀasa kai Elobmîsa khomais ǃnâ-ū. Tsî nî ǁkhāǁkhāsen ǁîb ra ǂâi khami ǂâisa. Tsî ǁnā ǀgaub ǃnâ xū-i hoa-e nî dī, î da Jehovab ǂâis ǃoagu ûi.—1Kor. 2:14-16.

7. Efeseǁîn 4:31, 32 ǃoagu da, tae-i tsîna da nî dī? Tsî ǁnāsa tae-i ǃaroma a ǃgom ǁkhā?

⁷ Khomai re Efeseǁîn 4:31, 32 sa. Sada di ǂâide ǀasa kais xōǀkhā, da ge ‘ǀasa ǀgauba nî ana.’ (Efe. 4:24) ǁNās ge sîsen-e ǃkhōǂgā hâ. Nēn hoan xōǀkhā da ge ǃgarise nî sîsen. Î da ǁaib, ǃaugub tsî ǃkhāǃkhāgub khami ī ǀgauga xu ǂgōsen. ǁNāsa tae-i ǃaroma a ǃgom ǁkhā? ǀNî ǁgai ǀgauga xu ǂgōsens a ǃgom ǁkhā amaga. Aiǁgauses ge Elobmîsa ra mî, khoen ge ǃnāsase “ǁaiǁaisen xa” tsî “ǂkhabaxa.” (ǂKhm. 29:22) Nēti ī ǀgauba ǁnāxūs ge sîsen-e ǃkhōǂgā hâ ǁāǁnâs khaoǃgâs tsîna. Saora aiǁgaudi ra ǁgau khami.

8-9. Steveni aiǁgausa mati ra ǁgau, ǀoro ǀgauba ūbēs di ǂhâǂhâsasiba?

⁸ Steven di ǀon hâ ǃgâsab ge, ǃgomsiba ge ūhâ i ǁîb ǁaiba ǃkhō-oas ǀkha. ǁÎb ge ra mî: “ǁĀǁnâhe ta ges khaoǃgâs tsîna ta ge ti ǁaib ai gere sîsen. Aiǁgause, omsa xu oms ǀkha ta aoǁnâ sîsen-e ra dī ǁaeb ai. Ta ge khoeb hîna ge ti audos radiosa a ǃnariba mû tsî ge sauru. ǁÎb ǀgūse ta ge sī o, o radiosa ge āxū. Nauna ta ge ǁgamba o, mati ta ge ti radiosa a hō-oasa. Ob ge ǀhaohâb ǃûi-aoba ge dî te: ‘Steven tae-ets ga dī hâ, ǁîbats ga ǃkhō hō hâ o?’ ǁNā dîs ge ge ǂâi kai te tsî ge ǂkhâǃnâ te, î ta ǃnāsase ǂkhîb ǃnâ hâ.” b

⁹ Steveni aiǁgaus ra ǁgau khami. Î ge ǁai ǀgauba ǃâubasens tama da hâse a ǂoaxa ǁkhā. ǁNās ga sadu ǀkha gara ī o. O tā ǂhabuǂâi tsî tsâ re Xristeǁî-i ase du ǁgaise ra dīsa. Apostel Paulub tsîn ge ge mî: “ǃGâiba ta ra dī ǂgao, xaweb ge ǂkhababa tātsēs tsîna ǁnāxū te tama hâ.” (Rom. 7:21-23) Hoa Xristeǁîn ge ǀoasa kurusa ūhâ tama hâ. Tsî ǁnās ǀkha ǃgâi tama ǀgauga ūhâ, hîna ǀurib khami a hā oa ǁkhāna. Sîsen ǀgara da ge nî î da ǃanuse hâ ǀgara. Mati da ǁnāsa a dī ǁkhā?

10. Mati da ǃgâi tama ǀgauga a ǃkhamǃoa ǁkhā? (1Jhn. 5:14, 15)

¹⁰ ǃGomsib hîna du ūhâb xa, Jehovaba ǃoa ǀgore tsî ǂgomǃgâ re ǁîb nî hui dusa. (Khomai re 1 Johaneb 5:14, 15 sa.) Jehovab ge ǁnā ǁgai ǀgauba buruburuxa ǀgaub ǃnâ ūbē tide. Xaweb ge nî ǀgaiǀgai du, î du tā ǁnās ǃnâ māǁnâsen. (1Pet. 5:10) ǁNās ǀkha ǀguiǃnâxase sadu ǀgoredi ǀkha sîsen re. Îgu ǀoro ǀgauga tā ǁkhawa oaǀkhī. Aiǁgause, ǂanbasen re muvin tamas ka io ǂkhanina khomaisa hîna ǁnā ǀoro ǀgauba ǃgâise ra mûsen  kaina. Tsî tā ǃgâi tama turagu xa ǂâi re.—Fil. 4:8; Kol. 3:2.

11. Mâ xūna da a dī ǁkhā ǀasa ǀgauba anas ǃaroma?

¹¹ ǀOro ǀgauga du ūbē hâ xawe i ge a ǂhâǂhâsa ǀasa ǀgaugu tsîna omkhâisa. ǁNāsa du mati a dī ǁkhā? Jehovab di ǀgauga du ra ǁkhāǁkhāsen khami mîǁgui re ǁîba ǁgaesa. (Efe. 5:1, 2) Aiǁgause, Elobmîs ǃnaeǃkhais xa du ga khomai o Jehovab di ǀûbab xa hâsa. O dîsen re, ‘Tita nauna ra ǀûba?’ Jehovab di khoexaǃnâsib xa du ga khomai o, matib ǀgâsana ra kōǃgâs xa. Dîsen re, ‘tita tsîna sorosi ǂhâsiba ūhâ ǃgâsan xa di ra tsâ tsî ta ǁnāsa dī ta ra xūn ǃnâ-ū ra ǁgau?’ ǀAsa ǀgauba du ra ana khami, sadu di ǂâi ǀgauba ǀasa kai. Tsî nēsa ǃnūǃnâxasib ǀkha dī re.

12. Stevena mati Elobmîs khoena ra ǀkharaǀkhara ǀgaub ǀgaiba ge mû?

¹² Steveni hîna go ǃkharugo xoaǀgoras ǃnâ hâ îb ge, ǁaeb ǀkha ǀasa ǀgauba ge ana. ǁÎb ge ra mî: “Ti ǁāǁnâs khaoǃgâ ta ge, ti ǁaiba gere ǃâitsâ mâsigu ǃnâ gere hōsen. ǁKhāǁkhāsen ta ge ge, î ta khoen hîna ra ǁaixa kai te na xu ǃgûbe. Tamas ka io mâsib nî ǁgaiǂoas aiǃâ ǀamǀam. ǂGui khoen ge nē mâsigu ǃnâ ta ǃnomsase ra hâ ǀgaub xa ge koa te. Ti tarasa ǃkhōǂgā hâse. Ti tanisen ǀgaub ge kaise ra buru kai te. Nē ǀkharaǀkharasens ǃaroma ta ge koasen tama hâ. Xawen ge ra ǁgau Elobmîs ǀgaiba ūhâsa khoena dawasa.”

13. Tae-e nî hui da ǃgâi turaga omkhâis ǀkha? (Galateǁîn 5:16)

¹³ Khomai re Galateǁîn 5:16 sa. Jehovab ge ǁîb di ǃanu gāgāba ra māda, î da ǂhanu xū-e dī. Elobmîsa da ga ra ǁkhāǁkhāsen o, o da ge Elob di gagaba ra mā-am îb ǂgaeǂguida. Tsî ǀhaode da ga ra hâǃnâ o, o da ge ǃanu gāgāb tsîna ra hō. ǁNā ǀhaodi tawas tsîna da ge ǃgâsan hîna sida khami ǃgâi xūna ra dītsân ǀkha ra hâ ǀhao. Tsî ǁnās ge kaise a ǂkhâǃnâxa. (Heb. 10:24, 25; 13:7) Jehovaba ǃoa da ga ǀgore tsî ga ra ǀkhoma o, îb hui da sida ǂkhabusasigu ǀkha. Ob ge sida ǀgaiǀgais ǃaroma ǁîb ǃanu gāgāba nî māda, î da ǃkhams ǀkha aiǃgû. Nē xūn hoana dīs ge ǃgâi tama turaga ūbē tide. Xawe nî hui da, î da tā ǁîna sîsenǂui. Galateǁîn 5:16 ra mî khami, ǁnān hîna gagab ǀkha ra ǃgûn ge “sorosi turaga ra ǂkhîǂkhî xūna dī tide.”

14. Tae-i ǃaroma i ǃgâi turaga omkhâi ǀgarasa a ǂhâǂhâsa?

¹⁴ Jehovab ǀkha ǃgâi ǀhōsagusisa ūhâs ǀkha ra hui da, xūna da ga dī tsoatsoa o. O i ge a ǂhâǂhâsa ǁnā gāgāsi xūna da nî dī ǀgarasa. Nēs ǃgâi turaga omkhâis ǀkha ra hui amaga. Tae-i ǃaroma? Sida khākhoeb ǁom tama hâ amaga. ǁNā khākhoeb ge ǁgai xū-e dīs di ǃâitsâba. ǁĀǁnâs khaoǃgâs tsîna da ge a ǁkhoaxabahe ǁkhā ǃgâi tama xūna dīsa. Aiǁgause dobols, xûi-e ǃgai tama ǀgaub ǃnâ sîsenūs tsî ǀōǀkhā khoen xūna kōs tsîna ǃkhōǂgā hâse. (Efe. 5:3, 4) ǀGui ǂkham Xristeǁî ǃgâsab ge ra mî: “ǀGui xu-i hîna a ǃgombate i ge, aorekhoegu xa ǃgâibahesa. Nē tsâsigu nî bē tita ge gere ǂâi. Xawe ta ge noxoba ǁîga ūhâ.” Tae-e a hui du ǁkhā ǃgâi tama turagu ga ǀgaisa o?

15. Tae-i ǃaroma i ǂkhâǃnâxa ǂansa ǃgâi tama turagu “ǃhūbaib ai hân hoan” xa ra hōǃâ-esa? (Ai-īsiba mû re.)

 ¹⁵ Kaise a ǀgaisa ǃgâi tama turaba du ga ǃkham ǃoa o. O ǂâis ǃnâ ūhâ re ǀguri du hâ tamasa. Elobmîs ge ra mî: “ǀNî ǃâitsâ-i ge sado hāǂam tama hâ, khoesi ǃâitsâ-i ǀgui-e.” (1Kor. 10:13a) ǀNî hâ ǂnûiǃkhunis ge nēti ra mî: “ǀNî hâ ǃâitsâ i hoa-i ge sado hāǂam tama hâ. Xawe khoesib a tani ǁkhā ǃâitsâ i ǀgui-e.” ǁNā mîdi ge Korintes ǃnâ ge hâ i, Xristeǁîn ǃoa ge xoahe. ǀNîn ge ge ǀai-ao i, aorekhoegu ge aorekhoegu ǀkha gere ǁgoe. Tsî ǀnîn ge ǀhoro hâse gere hâ mâ. (1Kor. 6:9-11) ǂÂi i du ra ǁîn ge ǁāǁnâs khaoǃgâ ǃgâi tama turaga a hōǃâ ǀûsa? ǁNā i ge a īǁoa. Ama as ge ǁîn ge ge ǂkhauhesa Xristeǁî, ī xawen ge khoes ǀguisa i. ǁNā amagan ge ǁîna ǁaeba xu ǁaeb ǀkha ǃgâi tama turaga ge ūhâ i. ǁNās ge sida ǃaroma kaise a ǂkhâǃnâxa. Tae-i ǃaroma? ǁNās ra ǁgau amaga, sadu ra ǃkhamǃoa turagan ge ǀnai mâǃoa ǁkhā īsa. Amase du ge ǂgoms ǃnâ ǁaposase a hâ ǁkhā, “ǂan du a xui-ao nau ǂgomsaben ǃhūbaib ai hân hoan tsîn ra ǁnāti ī tsâgu ǃnâ ǃkharu ǃkhaisa.”—1Pet. 5:9.

16. Tae-e xu da nî ǂgōsen? Tsî tae-i ǃaroma?

¹⁶ Nau khoen sadu ra hōǃâ ǃgomsina, ǁnâuǃā tide ti hâ ǂâiǀgauba xu ǂgōsen re. ǁNāti ī ǂâi ǀgaub ge nî ǃaroma î du ǂâi, ǀgaiba du ūhâ tama hâsa ǃgâi tama turaga ǃkhamǃoasa. Elobmîs ge ǀnî hâ xū-e ra mî: “Xawe Elob ge a ǂgomǂgomsa tsî sadu nî ǁkhā du as ǂamai ǃâitsâhe ǃkhaisa mā-am tide. Nē ǃâitsâs ǀkhab ge ǁkhāti mâǃkharus di ǀgaiba nî mā du tsî ǁnāti huiba nî mā.” (1Kor. 10:13b) ǁNās ǀkha i ga ǃgâi tama  turaga kaise a ǀgaisa o, o da ge ǁnās ǃnâ a mâǀgai ǁkhā. Jehovab ge nî hui da, î da nēs ǃnâ tā māǁnâsen.

17. ǃGâi tama turaga da hoase a ūbē ǁoa xawe da tae-e a dī ǁkhā?

¹⁷ ǂÂis ǃnâ ūhâ re: ǀOasa kurusa da ūhâ tama amaga, da ge ǃgâi tama turaga a ūhâ ǁkhā. Xawen ga khâi o, o da ge ǁîna ǃkhaese a mâǃoa ǁkhā. Josefi ge Potifari tarasa xu a ǃkhoebē khami. (Gen. 39:12) ǃGâi tama turagu ǃnâ māǁnâsens ge ǂhâbasa tama hâ.

18-19. Mâ dîde da a dîsen ǁkhā, sada ǂâisa da ra ǀasa kai hîna?

¹⁸ Sida ǂâisa ǀasa kais ge sîsen-e ǃkhōǂgā hâ. Î-i sida ǂâidi tsî dī da ra xūna Jehovaba ǂkhîǂkhî. ǁNās ǀkha hoaǁae ôaǃnâsen tsî dîsen re: ‘Ûi ta ra ǀgauba ra ǁgau, mûǂan ta rasa ǀuniga tsēdi ǃnâ ta ûi hâsa? ǃGâise ta ra dī ǀasa ǀgauba anas ǀkha? Jehovab di gagaba ta ra mā-am îb ti ûiba daoǁgau, î ta tā ǁgansi turagu ǃnâ mâǁnâsen?’

¹⁹ Ôaǃnâsen du ga o, tā ǀoasasiba ǃâubasen. Xawe ǂkhîǂâixa re dī du ra ǀkharaǀkharan ǀkha. ǀNî xūna ǀkharaǀkharasa du ga mûǂan o, tā ǂkhabuǂâi. Xawe Filipeǁîn 3:16 ǃnâ hâ ǀapemāsa sao re: “A da ǀnai ta ge ǃkhōǃoan ǃoa ǀgui ûi.” Aiǃgû ǀkharaǀkharana dīsa tsî ǂgomǃgâ re Jehovab sadu di ǁgūtsâde nî ǀkhaesa. Sadu di ǂâisa du ra ǀasa kai hîna.