1. Jehovab ǃoa ǀgores di aiǂhanuba da mati nî mû?

 ǀHOMMI tsî ǃhūbaib di kuru-aob ge ǀō-aisa ǀkhaeba mā da hâ. Mā-am dab ge ra î da ǁîba ǃoa ǀgore. ǂÂis ǀguisa hî re: Sida di ǂgaoga xu da ge harase mâ ǁae-i hoa-e. Jehovab ǀkha a ǃhoa ǁkhā, ǂgui gowagu ǃnâ, ǂgansen tamase. ǀAekharob tamas ka io da ge tronkesa xu a ǀgore ǁkhā. ǂGomǃgâsiba ūhâse, sida di ǁGûb nî ǃgâ da sa. Nē aiǂhanuba da ge ǁause ū tama hâ.

2. Gao-aob Daviba mati gere ǁgau, ǀgores aiǂhanubab ra ǃgôaǃgâ ǃkhaisa?

² Gao-aob Davib ge ǀgores aiǂhanuba gere ǃgôaǃgâ. ǁÎb ge Jehovab ǃoa ge ǁnae: ‘As ti ǀgoresa sa aiǃâ ǃgâihamǁguibas ase ī.’ (Psa. 141:1, 2) Davib ǁaeb ǃnâ i ge ǃgâihamxūn hîna ge ama ǃoabas ǃnâ priestergu xa. Tempeli tawa gere sîsen-ūhe na, ǃgâise gere aiǂhumihe. (Eks. 30:34, 35) Davib ge tae-eb Jehovaba ǀgores ǃnâ nî mîbas xa gere ǂâi ǂgao, ǃgâihamxūn ǃgâise ra aiǂhumihe khami. Tsî ǁnāb ge sida di turab tsîna. ǂHâba da ge ra î-i sada di ǀgorede, Jehovaba ǂkhî kai.

3. Mati ī ǀgaub ǃnâ da Jehovaba ǃoa nî ǀgore, tsî tae-i ǃaroma?

³ Jehovaba ǃoa da ga ǀgore, o da ge nēsa kai ǃgôaǃgâsib ǀkha nî dī. Jesajab, Esegieli, tsî Johaneb ge hō buruxa ǁhapodi xa ǂâi re. Nē ǁhapodi ge ǃkharagagu xawe ǀgui ǂâibsensa ūhâ. Hoadi ge Jehovab buruxa ǃkhaisa ra  ǁguiǃā. Jesajab ge Jehovaba “ǀgapiseb trons ai ǂnôase ge mû.” (Jes. 6:1-3) Esegieli ge Jehovaba trons aib ǂnôase ge mû, tsî ǁîb ǂnamipe i ge ‘ǂkhai ra ǃnâba ge hâ ī . . . ǀapiǃhanab (rainbow) khami ī ba.’ (Ese. 1:26-28) Danieli ge ‘ǀamosib kōse ûi hâba ge mû.’ ǁÎb di saran ge ge ǃuri ī tsî ǀaes ge ǁîb di tronsa xu gere khau. (Dan. 7:9, 10) Johaneb ge Jehovaba trons aib ǂnôase ge mû. ǁÎb ǂnamipe i ge îxa emrald ǃam rainbow ba ge hâ ī. (J.ǂHa. 4:2-4) Jehovab di ǀgopeǀnōhe ǁoa ǂhaisib xa da ga ǂâi, o da ge ra hōhōǃnâhe. Matikōse da kai aiǂhanuba ūhâsa ǁîba ǀgores ǃnâ-ū ǀgūsa. Kaise da ge Jehovaba ra ǃgôaǃgâ ǀgores aiǂhanubab mā da hâs ǃaroma. Xawe mati da nî ǀgore?

4. Tae-e da ǀgores xa ra ǁkhāǁkhāsen Jesub ge Mateub 6:9, 10 ǃnâ a mî, mîde xu?

⁴ Khomai re Mateub 6:9, 10 sa. ǃHommi di aoǁnâs aib ge Jesuba ǁîb di ǁkhāǁkhāsabega ge ǁkhāǁkhā. Matigu Eloba ra ǂkhîǂkhî ǀgaub ai a ǀgore ǁkhāsa. “Nēti ǁnâi ǀgore du re” dib ge mî toas kaoǃgâb ge Jesuba, kaise ǂhâǂhâsa xūn xa ge ǀgore. ǁÎb ge ge ǀgore îs Jehovab ǀonsa ǃanuǃanuhe. Tsî ǁîb Gaosiba hā, hîna ǁîb mâǃoa-aona nî hîkākāba. Tsî ǃgâi xūn hînab ǃhūbaib tsî khoen tsîna hānîǁaeb ǃnâ nî dībana. Nē xūna sida di ǀgoredi ǃnâ ǃkhōǂgās ǀkha da ge ra ǁgau. Elob di ǂâis sada a ǂhâǂhâsaba ǃkhaisa.

5. Jehovaba ǃgâ i ra, sida di ǂhâsigu xa da ga ǀgore o?

⁵ Saora ǃâb ǀgores dib ǃnâb ge Jesuba ge ǁgau, ǃgâi i asa sida ǂhâsigu xa ǀgoresa. Jehovaba da ge a ǂgan ǁkhā îb tsēs hoas ǂû-e mā da. Sida ǁorena ǀûba, ǃâitsâba xu ǁkhauba da tsî ǂhababa xu ore da. (Mat. 6:11-13) Nē xūna da ga Jehovaba ǂgan, o da ge ra ǂanǃgâ, ǁîb huiba da ǂhâhasa. Tsî da ǁîba ra ǂkhîǂkhî ǂgao ǃkhaisa.

6. Jesub gere ǁkhāǁkhā ǀgores ǃnâ hâ, xūn xa ǀgui da nî ǀgore? ǁGuiǃā re.

⁶ Jesub ge ge ǃâubasen tama hâ i,  îb ǁîb saosabena nē ǀgoresa ǁnae ǁnâ. Nau ǀgoredi ǃnâb ge Jesuba ǃkharagagu xūn xa gere ǀgore. Hîna ge ǁnā ǁaeb ai ǁîba ǂhâǂhâsaba īna. (Mat. 26:39, 42; Jhn. 17:1-26) ǁNās khami da ge sida tsîna, ǂâiǂhansen kai da ra xūn xa a ǀgore ǁkhā. Mîǁguiba da ga dī, o da ge gā-aisib tsî ǁnâuǃāb tsîna a ǀgoreba ǁkhā. (Psa. 119:33, 34) ǃGom ǁgaumâisa da nî tsoatsoas aiǃâ da ge ǀgore. Tsî huiba nî ǂgan î da ǁnauǃā mati da nē xū-e nî dīsa. (ǂKhm. 2:6) ǁGûn ge ǀgôana a ǀgoreba ǁkhā. Tsî ǀgôan ge ǁgûna a ǀgoreba ǁkhā. Hoada ge Elobmîsa da ra ǁkhāǁkhā khoen. Tsî aoǁnâba da ra khoen tsîna a ǀgoreba ǁkhā. Xawe da ge tā ǂhâsib ǃaroma ǀgui nî ǀgore.

7. Tae-i ǃaroma da Jehovaba sida ǀgoredi ǃnâ koasa nî mā?

⁷ Jehovaba da ge sida ǀgoredi ǃnâ nî koa. Khoe-i xare i ge Elob xōǀkhā koasa anu tama hâ. ǁÎb ge “ǃgâi tsî a ǀûbaǀnam.” Tsîb ge ‘ǀkhomxaǂgao tsî a ǀkhomxa, ǃnūǃnâxa tsîb ge hâhâ ra ǀnammi tsî ǂgomǂgomsasiba ra ǁgauǂui.’ (Psa. 86:5, 15) ǃGâi ǃaromasa da ge ūhâ Jehovaba koasa mā sa. ǁÎb ī ǀgaub tsî dīb da xūn ǃaroma.

8. Mâ xūn ǃaromas tsîna da Jehovaba a gangan ǁkhā? (Psalmdi 104:12-15, 24)

⁸ Jehovaba koasa mās ǂamai da ge ǁîba nî gangan, buruxa xūn hînab mā da hân ǃaroma. Aiǁgause da ge nî ganganbi îsa kleuran hîna da blomdi ǃnâ ra mûn xa. Tsî ǁkhoaxa ǂû-i tsî ǃgâiǁaeb ǀgū ǀhōsan ǀkha da a ūhâ ǁkhāb ǃaromas tsîna. Sida di ǀnamxaǃnâ ǁGûb ge nēn tsî ǃnâsan tsîna ra mā da, î da ǂkhîba ūhâ. (Khomai re Psalmdi 104:12-15, 24 sa.) ǂHâǂhâsase da ge Jehovaba ra gangan. Daoǁgaudi hînab da mā dan ǃaroma, î da sida di ǂgomsa ǀgaiǀgai ǁkhā. Tsî buruxa ǃâubasens hîna da ūhâs ǃaroma.

9. Tae-e a hui da ǁkhā, î da Jehovaba gangansa mā? (1 Tesalonikaǁîn 5:17, 18)

⁹ Jehovab ge dība da xūn ǃaroma gangansa māsa, da ge a ǀuru ǁkhā. Tae-e a  hui du ǁkhā î du ǁnāsa ǂâihō? ǃKharagagu xūn hîna du ǀgores ǃnâ a ǂgan ǁkhā na, du ge a xoamâi ǁkhā. Tsî du ge ǁaeba xu ǁaeb ǀkha a kō ǁkhā, matib ge Jehovaba sadu ǀgorede a ǃereamsa. ǁNāpaxu ǀgore re, î ǁîba huib ǃaroma gangan. (Khomai re 1 Tesalonikaǁîn 5:17, 18 sa.) Nēs xa ǂâi re: Khoe-i ga ǁîna da ra dība xūn ǃaroma ǃgôaǃgâsiba ǁgau da, o da ge ǂkhî tsî ǀnamhe hâ khami ra tsâ. ǁNās ǁkhās khami da ga Jehovaba gangansa mā, o da ge ǁîba ra ǂkhîǂkhî. (Kol. 3:15) Xawe ǀkhara ǃaromas tsîn ge hâ, Jehovaba da nî gangansa.

10. 1 Petrub 2:21 ǃoagu da tae-i ǃaroma Jehovaba nî gangan?

¹⁰ Khomai re 1 Petrub 2:21 sa. Jehovaba da ge ra gangan ǁîb di ǀnamǀnamsa ǀgôabab ge sî ǃkhais ǃaroma, îb ǁkhāǁkhā da. Jesub ûib xa da ga khomai. O da ge ǂgui xūna Jehovab xa ra ǁkhāǁkhāsen. Tsî mati da nî ǂkhîǂkhî bi ǃkhaisa. Xristub di ǁguibas ǃnâ da ga ǂgomsa ūhâ, o da ge ǀgū ǀhōsagusis. Tsî ǂkhîb tsîna, Jehova Elob ǀkha nî ūhâ.—Rom. 5:1

11. Tae-i ǃaroma da Jesub ǀons ǃnâ nî ǀgore?

¹¹ Jehovaba da ge ra gangan. ǁÎb ǀgôab ǃnā-ū da, ǁîba ǃoa a ǀgore ǁkhā ǃkhais ǃaroma. Jehovab ge Jesub ǃnâ-ū, ǂgan da ra xūna ra mā da. Jehovab ge Jesub ǀons ǃnâ ra dīhe ǀgorede, ǃgâ tsî ra ǁnâu-am. Jesub ge ge ǁguiǃā: “Ti ǀons ǃnâ go ga ǂgan xū-i hoa-e ta ge nî dī, ǁGûb nî ǀGôab ǃnâ ǂkhaiǂkhaihese.”—Jhn. 14:13, 14.

12. Mâ ǃaromas tsîna da ūhâ, Jehovaba ǁîb ǀgôab ǃaroma gangansa?

¹² Jehovab ge sida di ǁorena ra ǀûba, Jesub xoremarib ǃnâ-ū. Xoadi ge ra mî Jesub ge “ǀgapipristeri, Elob ǀhommi ǃnâ hâ Kaisib trons di amǀkhāb ai ǂnôaba.” (Heb. 8:1) Jesub ge sida “ǁGûb tawa ra ǂnoaba.” (1Jhn. 2:1) Jehovaba da ge ra gangan ǀgapipristeri ǃaroma, hîna sida ǂkhabusasiga ǁnâuǃā. Tsî “sada ra ǀgorebase ǂnôa” ba. (Rom. 8:34; Heb. 4:15) ǀOasa kurusa da ge ūhâ tama hâ. ǁNā-amaga i ge Jesub di ǁguibas ose ga īǁoa hâ. Sida Jehovaba ǀgores ǃnâ-ū ǀgūsa. ǁNā-amaga da ge hoada a ǃkhō-am ǁkhā. ǂÂu hâse da Jehovaba ǃgôaǃgâsiba a mā ǁoasa. ǁÎb di ǀō-aisa ǀnamǀnamsa ǀgôab ǃaroma.

13. Jesuba mati ge ǁgau ǁîb ǁkhāǁkhāsabenab a ǀnamsa?

¹³ ǁŌb nî ǃoes aiǃâb ge Jesuba. ǁÎb di ǁkhāǁkhāsabega kaxuse ge ǀgoreba. Tsî ǁîb ǁGûba gere ǂgan îb ǁîna “ǂkhababa xu sâu.” (Jhn. 17:15) ǁNās ge gere ǁgau Jesub ge ǁîna kaise ǀnam isa. ǀGūǁaeb ǃgoma nî tsâsab ge ǂan i, xaweb ge. ǁÎb di ǁkhāǁkhāsaben xa gere ǂâiǂhansen.

14. Mati da sida ǃgâsana da a ǀnamsa a ǁgau ǁkhā?

¹⁴ Jesuba da ge ra ǁgae, tsî da ge sida di ǂhâsin xa ǀgui ǂâi tama hâ. Xawe da ge hoaǁae sida ǃgâsana ra ǀgoreba. ǁNāsa da ga dī, o da ge Jesub di mîmās ǀnamgu da ge nî di hâsa ra ǁnâuǀnam. Tsî da ge Jehovaba ra ǁgau, matikōse da sida ǀkha ǀguiba ra ǃoaba ǃgâsana a ǀnamsa. (Jhn. 13:34) Sida di ǃgâsana da ga ǀgoreba, o da ge sida di ǁaeba  ǁore tama hâ. Elobmîs ge ra mî “ǀgores ǂhanu-ai khoe-i dis ge kai tsî ǀgaisa sîsenǂuiba ūhâ.”—Jak. 5:16.

15. Tae-i ǃaroma da sida ǃgâsana nî ǀgoreba?

¹⁵ Sada ǃgâsan ge sida di ǀgorede ǂhâ hâ, ǂgui ǃgomsin ǃnân ra ǃkharu amaga. Jehovaba da ge a ǂgan ǁkhā îb ǁîna hui în. ǀAen, tsūkēǃgân, toron, ǁgâiǀān tsî nau ǃgomsin tsîna mâ ǃkharu. Sida ǃgâsan hîna ǂhâsib ǃnâ hâ ǃgâsana ra huina, da ge nî ǀgoreba. ǀNîsi i ge ǃgâise du a ǂan ǃgâsa-e ǃgomsi-e ra hōǃâ. Tae-i ǃaroma du ǁîna, ǀondi ai ǂgai tsî ǀgoreba tama hâ? Jehovaba da ga ra ǂgan o, îb ǁîna hui în mâǃkharu. O da ge ǃgâsa ǀnamguba da ūhâsa ra ǁgau.

16. Tae-i ǃaroma da ǂgaeǂguira ǃgâsaga nî ǀgoreba?

¹⁶ ǀHaohâb ǃnâ ra ǂgaeǂgui ǃgâsagu ge, kaise ra ǃgôaǃgâ ǁîga da ga ǀgoreba o. Tsî ǁnā ǀgoredi ge ǁîga ra hui. Apostel Paulub ge ge ǂan i, nau khoen ǀgoredeb ǂhâ hâsa. ǁÎb ge ge xoa: “Tita tsîna ǀgoreba, îb Eloba ǂhanu mîde ti ams ǃnâ ǁgui, î ta ǂganǃgâsib ǃGâiǂhôas diba ǁkhoase ǂanǂan.”(Efe. 6:19) Nētsēs tsîna da ge ǂgaeǂgui ra ǃgâsagu, ǃgarise ra sîsen ga ūhâ. ǁÎga da ge ǀnamma ra ǁgau, Jehovaba da ga ǂgan o, îb ǁîgu sîsen-e ǀkhae.

17-18. Mâ ǁaegu ai da a ǂganhe ǁkhā, î da nauna ǀgoreba? Tae-e da ǂâis ǃnâ nî ūhâ?

¹⁷ ǀNî ǁaegu ai da ge ra ǁkhauhe, î da naun ǃaroma ǀgore. Aiǁgauses ge Elobmîs ǁkhāǁkhāsa ra mā ǃgâsasa, nau ǃgâsasa a ǂgan ǁkhā îs ǀgore. Xawes ge ǁkhauhe hâ ǃgâsasa ǀnîsi, Elobmîsa ra ǁkhāǁkhāhe khoe-e ǃgâise ǂan tama hâ. Tsî ra ǂhâba îs ǀgores ǀkha ǂganam. ǁNā ǀgaub ais ge, nē khoe-i di ǂhâsiba a ǀgoreba ǁkhā.

¹⁸ ǃGâsab ge a ǂganhe ǁkhā, îb aoǁnâ sîsenni ǀhaos. Tamas ka io ǀhaohâb ǀhaos dawa ǀgore. ǃGâsagu hîna ǁnā aiǂhanuba ūhâ gu ge ǂâis ǃnâ nî ūhâ. Tae-i ǃaromas nē ǀhaosa hâsa. ǁÎgu di ǀgoredi ǃnâ gu ge tā, ǀhaohâba ǁnama. Tamas ka io ǂanǂande nî dī. ǃNāsa ǀhaohâb  ǀhaodi ge ǀgores. Tsî ǁnaes ǃaroma 5 minit ga ra ū. ǁNā-amagab ge ǃgâsab hîna ra ǀgoreba, tā ‘ǂgui’ xūna nî ǀgore. ǃNāsase ǀhaos di tsoatsoas ai.—Mat. 6:7.

19. Tae-e nî hui da, î da ǂhomisase hâ?

¹⁹ ǀGores ge kaise sida ûib ǃnâ nî ǂhâǂhâsa, ǀgoraǃgâs di tsēs a ǀgū amaga. Nēs ǃaromab ge Jesuba ge mî: “Xawe ǂkhaikari hâ, î hūgaǀgui ǀgore î du ǀgaiba ǃkhōǃoa, nē ra īn hoan ǃnâ.” (Luk. 21:36) Hoaǁae da ga ǀgore, os ge sida di ǂgomsa nî ǀgai. Tsîs ge Elob di tsēsa ǀūǃgâse da hâ hîna hā tide.

20. Sida di ǀgorede mati ǃgâi hamxu-i ase nî ī?

²⁰ Taena da go ǃhoaǃgao? ǀGores di aiǂhanuba da ge kaise ra ǃgôaǃgâ. ǂHâǂhâsa xūn hîna da nî ǀgoreban ge, Jehovab ǂâis ǃoagu nî hâ. Elob ôab tsî ǁîb Gaosib ǃaroma da ge gangansa nî mā. Tsî da ge sida ǃgâsan tsîna nî ǀgoreba. Jehovab ge ra ǂhâba î da, tsēs hoasa da ūhâ ǂhâsigu. Tsî sida di ǂgomsa ǀgaiǀgaihes ǃaroma ǀgore. ǀGores ǃnâ da nî mî xūn xa da ga ǂâi, o da ge ra ǁgau, ǀgores aiǂhanuba da ra ǃgôaǃgâ ǃkhaisa. Nēsa da ga dī o, i ge sida di mîde “ǁîba ra ǃgâiaǂgao kai.”—ǂKhm. 15:8.