Jehovaba ǂkhîǂkhîs ǃaroma da ge ǂgomsa nî ūhâ. Elobmîs ge ra mî “hoa khoen ǂgomsabe tama” hâsa. (2Tes. 3:2) Nēsab ge mî, ob ge apostel Pauluba “tsū tsî ǂkhaba” khoen ǁîba gere ǁgâiǀāna ǃoa gere ǁnaeǁgau. Xawe ǂgoms xab ge mî xū-i tsîn ge nau khoen ǃaroma a ama. ǀNî khoen ge ǂgom ǂgao tama Elob hoa xūna ge kurub hâsa. (Rom. 1:20) ǀNîn ge ra mî ǁîn ǀnî xū-i tamas ka io ǀnî khoe-i ǃnāsa ǀgaiba ūhâ-i ǃnâ ra ǂgomsa. Xawe ǁnās ge ǂâu tama Jehovaba ǂkhîǂkhîs ǃaroma.

Jehovab ûitsama tsî ǀgaisa ǂgomsa ūhâna ra ‘mādawa-ams’ ǂgomǃgasiba da ge nî ūhâ. (Heb. 11:6) Nēti i ǂgomsa omkhâis ǃaroma da ge Elob ǃanu gagaba ǂhâ hâ. ǁNā ǃanu gagaba hōs ǃaroma da ge Jehovaba ǀgores ǃnâ nî ǂgan. (Luk. 11:​9, 10, 13) ǀNî ǂhâǂhâsa ǀgaub ǃanu gagaba da hō ǁkhāb ge Elobmîsa khomais ǃnâ-ū, ǁnā xoa-aogu ge Jehovab gagab ǀkha Elobmîsa ge xoa. ǁNāpaxu da ge khomai da go xūna ǂâiǃgâ tsî ǁkhāǁkhāsen da go xūna nî ûiǂûi. Nēsa dīs ǃnâ-ū da ge Jehovab ǃanu gagaba ra mā-am îb hui da, î da ûi da ra ǀgaub ǃnâ ǁgau ǁîba ra ǂkhîǂkhî ǂgomsa da ūhâsa.