1. Psalmdi 18:46 ǃoagub Davida Jehovaba tae-i ǀkha ra ǀgopeǀnō?

 ǃÂUBASEN tama da hâ ǃgomsin sida ûiga a dawa ǁkhā ǃhūbaib ǃnâ da ge ûi hâ. Kaise da ge ra gangan, Jehova Elob ai da huib ǃaroma nî ǂgomaiǂnûi amaga. ǃKharu go ǁkhāǁkhāǃâs ǃnâ da ge go hōhōǃnâhe, Jehovab a ûitsâma Elosa tsîb hoaǁae hâsa sida huis ǃaroma. ǁÎb ǂkhâǃnâsa da ga hōǃâ, o i ge ǁnāsa ra hōhōǃâ da Jehovab amase a “ûitsâma” ǃkhaisa. (Khomai re Psalmdi 18:46 sa.) ǁNāsab mîtoa hâs khaoǃgâb ge Davida Eloba ǃoa ‘ti ǃgareǀuib’ ti ge ǂgai. Tae-i ǃaromab ge ûitsâma Elob, Jehovaba ǃgareǀuib ǀkha ǀgopeǀnō? Tsî ǁnāsa tae-e ra ǂâibasen?

2. Tae-i ǃaroma da Davidi ge Jehovaba ti ‘ǃGareǀuib’ ti a ǂgai ǃkhais ǃnâ ǃgâiǃgâibasensa nî ūhâ?

² Nē ǁkhāǁkhāǃâs ǃnâ da ge tae-i ǃaromab Jehovaba ǃgareǀuib ase ra ǁnaeǁgauhesa nî ǃhoaǃgao. Tsî tae-es ǁnāsa ǁîb xa ra ǁkhāǁkhādasa. ǁKhāǁkhāsens tsîna da ge nî di mati da ǁîb ai a ǂgomaiǂnûi ǁkhāsa sada ǃgareǀuib ase. ǀAms ai da ge nî ǃhoaǃgao mati da Jehovab ǀgauga ǁgae ǁkhā ǀgausa.

JEHOVABA MATI ǃGAREǀUIB KHAMI Ī?

3. Elobmîsa ǃnāsa ǁaega “ǃgareǀui” ti hâ mîsa mati ra sîsenū? ( ai hâ ai-īsiba kō re.)

³ Elobmîs ge Jehovaba “ǃgareǀuib” ǀkha ra ǀgopeǀnō tsî ǁnās ǀkha ra hui da î da ǀnî ǀgaugu ǁîb ūhâga ǁnâuǃā. ǃNāsa ǁaegu ai i ge Jehovab ǃoaba-aona Eloban ga ǁîb buruxa ǀgaugu ǃaroma Elobmîs ǃnâ koa, o ǁîba ǀuib ase ra ǁguiǃā. Deuteronomium 32:4 ge ǂguroǃnās ase Jehovaba “ǃgareǀuib”  ase ra ǁguiǃā. ǀGores ǃnâs ge Hanasa ge mî, “Khoe-i xare-i ge . . . ǃgareǀuise ī tama, sida Elob khami.” (1Sam. 2:2) Habakuki ge Jehovaba ti “ǃgareǀuitse” ti ge ǂgai. (Hab. 1:12) Psalmdi 73 xoa-aob ge Eloba “ti ǂgaob di ǃgareǀui” ti ge ǂgai. (Psa. 73:26) Jehovab tsîn ge aitsâma ǃgareǀuib ase ra ǁguiǃāsen. (Jes. 44:8) Hā re î da Jehovaba ǃgareǀuib ase ra ǁguiǃā ǀgauga ǃhoaǃgao tsî ǁkhāǁkhāsen mati da ǁîba “sada ǃGareǀuib” ase dī ǁkhāsa.—Deu. 32:31.

4. Jehovaba mati a sida sâuǃkhai? (Psalmdi 94:22)

⁴ Jehovab ge sida sâuǃkhai. Kai ǀuis khoe-e ǀgaisa ǂoaba xu ra ǁkhauba khamib ge Jehovab tsîna ra sâu da ǃgomǁaega da ga hōǃâ o. (Khomai re Psalmdi 94:22 sa.) ǁÎb ǀkha da ūhâ ǀhōsagusisa ǁkhaubas ǀkhab ge ra hui da tsî ra hōhōǃâ da, xū-i xare-i nēsi da ra hōǃâ i ǀamosib kōse tsûtsû da tidesa. ǁNās xa ǃnāsa-i tsînab ge ra mîmâi: Hānîǁaeb ǃnâb xū-i xare-i ǂâiǂhansen tamas ka io ǃgoma ra tsâ kai da i hoa-e nî ūbesa.—Ese. 34:​25, 26.

5. Matib Jehovaba sida sâuǃkhâi kai ǁkhā?

⁵ ǀGui ǀgaub Jehovab ǁkhaubasa xu da ǃgâiba a ǀama ǁkhāb ge, ǁîb ǃoa ǀgoresa. ǀGore da ga ob ge Jehovaba “ǂkhîb Elob dib” sida ǂgaogu tsî ǂâidi tsîna ra ǁkhauba ba ra mā da. (Fil. 4:​6, 7) Artem ti ǀon hâ ǃgâsab, ǁîb ǂgoms ǃaroma ge ǃkhōsis ǃnâ hâ îb aiǁgausa ǃgaoǃgâ re. ǃKhōsis ǃnâb ge hâ i ǁaeb aib ge ǂguiǃnāde ôaǃnâ-aob xa dîǃnâ-e, ǁgaise hâ-ūhe tsî gere ǃaoǃaohe. ǁÎb ge ge mî: “Kaise ta ge dîǃnâhe ta gere ǁaeb ai gere ǂâiǂhansen. Hoaǁae ta ge Jehovaba ǃoa gere ǀgore. ǁÎba ta ge gere ǂgan îb huite ǃnomsase hâ tsî gā-aisib tsîna ūhâsa. Mâǃoahe ta gere xawe ta ge ǃnomsase ge hâ ǀgara. . . Jehovab huib ǀkha i ge mīri ǃgâb ai ta mâ khami gere mûsen.”

6. Tae-i ǃaroma da hoaǁae Jehovab ai nî ǂgomǃgâ? (Jesajab 26:​3, 4)

⁶ Jehovab ge ǂgomǃgâhe ǁkhā. ǃHommi hoaǁae ǀgui ǃkhais ai ǀgui ra mâ khami da ge a ǂan Jehovab huidab nîse hoaǁae hâsa. Jehovaba da ge a ǂgomǃgâ ǁkhā, ǁîb a sida “ǀamo ǃgareǀui” amaga. (Khomai re Jesajab 26:​3, 4 sa.) ǁÎb ge hoaǁae ǁîb mîmâide dīǀoaǀoa, sida ǀgorede ǁnâu tsî ǂhâ da hâ ǂkhâǃnâsa nî mā da. Jehovab ais tsîna da ge ǂgomǃgâ ǁkhā, hoaǁaeb ǁîb ǃoaba-aon ǃoagu ǂgomǂgomsa amaga. (2Sam. 22:26) ǁÎb ge tātsē dī da ra xūna ǀuru tide tsîb ge hoaǁae nî mādawa-am da.—Heb. 6:10; 11:6.

7. Jehovab ai da ga ǂgomaiǂnûi, o da tae-e nî hōǃâ? (Ai-īsiba mû re.)

⁷ Jehovab ge sida ǃgareǀui ǁkhā, ǀoasase da ga ǁîb ai ǂgomaiǂnûi o. ǂGomǃgâ da ge ra ǁîba da ga ǃgom ǁaegu ǃnâ ǁnâuǀnam, o da ǃgâiba nî ǀamasa. (Jes. 48:​17, 18) ǁÎb ǂkhâǃnâsa da ra hōǃâ khami i ge ǁîb ǃnâ da ūha ǂgomǃgâsiba nî kai. ǂGomǃgâsiba da ge nî ūhâ Jehovab ǃgomsina da ga hōǃâ, o nî hui dasa î da mâǀgai. Huiba da nî ôa ai khoe-i ga ǃnāsa ǁaeba ǀkhai, o da ge ra mûǂan Jehovab ai da hoaǁae a ǂgomaiǂnûi ǁkhāsa. Vladimir ti ǀon hâ ǃgâsab ge ra  mî: “ǃKhōsis ǃnâ ta ge hâ i ǁaeb ai ta ge Jehovab ǀgūse gere tsâ. ǁKhāǁkhāsen ta ge ge î ta ǃnāsa ǂgomǃgâsiba Jehovab ǃnâ ūhâ, ǀguri ta ge hâ i tsî ta ge ti mâsib xa xū-e dīǁoa i amaga.”

8. (a) Tae-i ǃaroma da mî ǁkhā Jehovab dawa tamasa? (b) Mati da ǃgâiba ra ǀama Jehovaba sida ǃgareǀuise ūhâs ǃnâ-ū? (Psalmdi 62:​6, 7)

⁸ Jehovab ge dawa tama. Jehovab ge kai ǀuis tamas ka io ǃhommi ǀgui ǃkhais ai ra mâ ǀgara khami ra mâ ǀgara. Jehovab tanisen ǀgaub tsî ǂâibasens tsîn ge dawa tama. (Mal. 3:6) Adammi tsî Eva hâra ge Jehovab ǃoagu a khâikhâisen, ob ge Jehovaba khoesibab ūba hâ ǂâibasensa ge dawa tama hâ i. Apostel Paulub ge xoa khamib ge Jehovaba “ǁî-aitsama a ǀūxūsen ǁoa.” (2Tim. 2:13) Tae-i ǀgui-i ga ī tamas ka io naun ra dī xūn xa ǃaromahe hâseb ge Jehovaba tātsē ǁîb ǂâibasensa dawa tide. Jehovab tātsē dawa tama amaga da ge a ǂan, ǁîb ǃgomǁaegu ǃnâ nî hui dasa tsî ǁîb mîmâisa nî ǃkhōǀgara ǃkhaisa.—Khomai re Psalmdi 62:​6, 7 sa.

9. Tae-e du Tatianas aiǁgausa xu ra ǁkhāǁkhāsen?

⁹ Jehovab ǀgaugu tsî ǁîb ǂâibasens ǃhūbaib tsî khoesib ǀkhab ūhâs xa ǂâiǃgâs ge nî hui da î da ǁîba ǂgomǃgâ tsî sida ǀguib ase dībi. Nēsa dīs ge nî hui da, î da ǃnomsase ǃgomǁaegu ǃnâ hâ ǀgara. (Psa. 16:8) Tatiana ti ǀon hâ ǃgâsas ge nē amaba ge hōǃâ, oms di ǃkhōsis ǃnâs ge ǁîs ǂgoms ǃgao ūhâ-e hâ-i ǁaeb ǃnâ. ǁÎs ge ra mî: “ǀGuri ta ge ti aib ai ge hâ-i. Tsoatsoas ǃnâ i ge kaise ge ǃgom i tsî ta ge ǃnāsa ǁaeba gere ǂkhabuǂâi.” Xawes ge mûǂan o ǁîs ǃgomsin Jehovab tsî ǁîb ǂâibasens ǀkha ra ǃgûǀhaosa, os ge ǁnāsa ge huisi îs ǃnomsase tsâ tsî ǂgomǂgomsase hâ. ǁÎs ge ra mî: “Tae-i ǃaroma-i nēsa ra īsa ǁnâuǃās ge ge huite, î ta ǂâihō Jehovab ǃaroma da nē xūna ra ǃkharuǃnâ ǃkhaisa. Nēs ge ge huite it tita xa ǂâiǀgû.”

10. Matib Jehovaba nēsi a sada ǃgareǀui ǁkhā?

¹⁰ ǀGūǁae da ge kaise ǃgom ǁaega nî hōǃâ. Nēs ge nî ǂgaoǀkhā î da ǃnāsase Jehovab ai ǂgomaiǂnûi ǀnais xa. Nēsi da ge ǀnai Jehovab ǃnâ da ūhâ ǂgomǃgâsiba nî ǀgaiǀgai. Tsî nî ǂgomǃgâ ǁîb nî hui dasa ǂgomǂgomsase da ga hâ ǀgara o. Mati da ǁnāsa a dī ǁkhā? Elobmîs ǃnaeǃkhaidi tsî Jehovab ǃoaba-aon nētsē ǃkharuǃnâ hâ xūna khomai re. ǃGaoǃgâ re matib ge Jehovaba ǁîb ǃoaba-aona ǂkhâǃnâ ǀgausa. Nē khomaiǃâdi xa ǃgamse ǂâiǃgâ re. ǁNāna dīs ge nî hui du Jehovaba sadu ǃgareǀuise dīsa.

JEHOVAB ǀGAUGA ǁGAE

11. Tae-i ǃaroma da Jehovab ǀgauga ra ǁgae ǂgao? (“ ǂKham ǃgâsagu nî sīǃnâ xūn” ti hâ boksisa mû re.)

¹¹ Jehovab ǀgaugu ǁîba ǃgareǀuib ase ra ǁgaugu xa da ge go ǃhoaǃgao. Nēsi ǃgaoǃgâ re mati da ǁnā ǀgauga ǁgae ǁkhā ǀgausa. ǁKhā da a-i hoa-e dī tsî da ga Jehovab ǀgauga ǁgae, o da ge sida ǃgâsan hoana ǀgaiǀgai ǁkhā. Aiǁgaus ase Jesub ge Simona, Kefab ti ge ǂgai, nēs ge “ǃhaob” di  ǃkhareb ti ra ǂâibasen. (Jhn. 1:42) Jesub ge gere mî, Petrub ǀhaohâb ǃnâ ǁkhaeǂgao tsî ǂgomsa nî ǀgaiǀgaisa. ǀHaohâb ǃûi-aogu ge “kai ǃgareǀuib sommi” ase īgu khami ra ǁguiǃāhe. Nēs ge ra ǂâibasen ǁîgu ǀhaohâb ǃnâ hân hoana ra ǁkhaubasa. (Jes. 32:2) Ama as ge ǀhaohâb ǃnâ hâ ǃgâsan hoan, Jehovab ǀgaugan ga ǁgae o ǃgâiba ra ǀamasa.—Efe. 5:1.

12. Mati da nauna ǃgom ǁaegu ǃnâ hui ǁkhā?

¹² Sâuǃkhaib ase ī. ǀNî ǁaegu ai da ge ǃgâsan ga tsūkēǃgâb, ǃhaoǃnâbe torogu tsî torogu tsîn xa ǃaromahe hâse ǁîn omde xu a ǃkhoe, o ǁîna a ūǂgā ǁkhā. “ǀUni tsēdi” ra ǁgaiǂoa khami da ge ǃnāsa ǃēde nî ūhâ ǂhâsib ǃnâ hâ ǃgâsana huisa. (2Tim. 3:1) Sida ǃgâsana da ge ǁkhaeǂgao tsî ǀnammi tsîna a ǁgau ǁkhā. ǀGui ǀgaub ǁnāsa da a dī ǁkhāb ge ǁkhoreǁharesase nauna sali tawa tsâ kai tsî ǁkhaeǂgaosa. ǂHâba ta ge ra îb ǀhaohâba ǀnamxaǃnâ tsî ǂkhâǃnâxa ǃkhais ase hoada îba. ǃGom, ǃkhai tsî ǂâiǂhansenan xa ǀoa hâ ǃhūbaib ǃnâ da ge nētsē ûi hâ. ǁNā-amaga da ge sada ǃgâsan ga ǀhaode hâǃnâ, o ǁîna ǀnam-e, khoakhoahe tsî ǁkhaubahen ra khami ra tsâ kai ǂgao.

13. Matib ǀhaohâb ǃûi-aoba sâuǃkhais ase nauna a ība ǁkhā? (Ai-īsiba mû re.)

¹³ ǀHaohâb ǃûi-aogu ge ǃgâsan ǃgomǁae gan ga hōǃâ o ra ǁkhaeǂgao. Tsūkēǃgân tamas ka io ǀaeb khoraǂuisens ga hâ, o gu ǀhaohâb ǃûi-aoga ǃkhaese huiba ra ǀapeǁgui în ǃgâsana hui-e. ǀHaohâb ǃûi-aogu tsîn ge ǃgâsana gagasi huiba ra mā. ǃGâsan ge ǃnorasase nî tsâ ǀhaohâb ǃui-aob ai huiba ǂansa, ǁîb ga khoexaǃnâse ǃhoa, ǃgâ tsî ǁîna ga ǁnâuǃā tsâ o. ǁNāti ī ǀgauga ūhâs ge nauna ǀnammen hâ khami ra tsâ kai. Nēs ge ǁîn tsîna ra tsâ kai în Elobmîs ai ǃgaoǃgaohe hâ daoǁgaus ǀhaohâb ǃui-aoba xu ra hāsa ūǃoa.—1Tes. 2:​7, 8, 11.

14. Mati da a ǁgau ǁkhā ǂgomǃgâhe ǁkhā da asa?

 ¹⁴ ǂGomǂgomsa. ǂHâba da ge ra în nauna ǂan sada ǃoan hoaǁae huib ǃaroma a ǀkhī ǁkhā ǃkhaisa, ǃgōsase ǃgom ǁaegu ǃnâ. (ǂKhm. 17:17) Tae-e da a dī ǁkhā, î da naun xa ǂgomǃgâhe ǁkhā? ǁKhā da a-i hoa-e da ge ra dītsâ î da Jehovaba tsēs hoasa ǁgae. Aiǁgaus ase, dī da ra mîmâide da ge ra ǃkhōǀgara tsî ǁaeb ai ra hâ ǂgao. (Mat. 5:37) Khoe-i ga ǂhâsib ǃnâ hâ, o da ge ǁîna ra hui ǂgao. ǁNās xōǀkhā da ge ra dītsâ ǀhaohâb ǃnâ da ra māhe ǁgaumâide dīǀoaǀoasa daoǁgaude saos ǃnâ-ū.

15. ǀHaohâba mati ǃgâiba ra ǀama ǀhaohâb ǃûi-aogu ga ǂgomǃgâhe ǁkhā o?

¹⁵ ǀHaohâba mati ǃgâiba ra ǀama ǀhaohâb ǃûi-aogan ga ǂgomǃgâ o? ǃGâsan ga ǂan o ǀhaohâb ǃûi-aogan ga ǂhâsiban ūhâ ǁaeb ai bel (ǁhami) ǁkhāsa, os ge ǁnāsa nî hui în ǀorose ǂâiǂhansen. ǃGâsan tsîn ge ǀnammhe hâse ra tsâ ǀhaohâb ǃûi-aogu māsenxase ra hui nî ǂgao tin ga ǂan o. ǀHaohâb ǃûi-aogu ga ǁîgu ǁnamasa Elobmîs ai ǃgaoǃgaosa ǂkhinin, ǂgomǂgomsa tsî gā-ai ǃāba xu ra hâna sîsenū tsî ǁîgu ǂâiǀgauba xu aitsâma ǃhoa tama io, on ge ǃgâsana ǁîga nî ǂgomǃgâ.  ǃGâsan ga ǀhaohâb ǃûi-aoba xū-e ǂganǃgâsib ǃnâ mîba tsîb ga ǁnā-e naun ǀkha ǀgoragu tama i, ob ge ǂgomǃgâhe ǁkhāb asa ra ǁgau.

16. Mati da sada tsî naun ǃaroma ǃgâiba nî ǀama ǂhanu xūna da ga dī o?

¹⁶ Hoaǁae Jehovab ǂhanu a ti ra mî xūna dī. Jehovab ra mî xūn hoana da ga ǁnâuǀnam tsî Elobmîs ai ǃgaoǃgaosa mîǁguiga dī, o da ge ǃgâi aiǁgause nauna nî ība. Elobmîsa ǁkhāǁkhāsen tsî da ga sida ǂgomsa Jehovab ǃnâ ǀgaiǀgai, o da ge ǁîb tsî ǁîb ǂhanugu ǃoagu nî ǂgomǂgomsa. ǂHumi ǁkhāǁkhādi tsî Jehovab ǂâiǀgaub ǀkha ǀgui tama hâ xūn tsîn da ge nî mûǃā. Tsî da ge naun xas tsîna supuse ǂgaeǂhapuhe tide. (Efe. 4:14; Jak. 1:​6-8) Jehovab tsî ǁîb mîmâidi ǃnâ da ūhâ ǂgoms ge nî hui da, î da ǃnomsase tsâ ǁgai ǂhôana da ga ǁnâu o. (Psa. 112:​7, 8) ǁNān hîna ǃgomsiga ra hōǃân tsîna da ge a hui ǁkhā.—1Tes. 3:​2, 3.

17. Tae-e ǀhaohâb ǃûi-aoga ra hui î gu ǃgâi aiǁgause ī?

¹⁷ ǀHaohâb ǃûi-aogu ge ǀnōsa ǀgauga nî ūhâ, ǁnâuǃāxa tsî nî ǃamku. Nē aogu ge nauna ra hui în ǃnomsa tsî ǀgaisa ǂgomsa Jehovab ǃnâ ūhâ. ǁÎgu ge ǃgâsana ra hui în “ǀgaisase tsî ǁaposase” Elobmîsa ǃkhōǀgara. (Tit. 1:9; 1Tim. 3:​1-3) ǁÎgu aiǁgaus tsî ǃûigu ra ǀgaus ge ǃgâsana ra hui în ǀhaodi ǃnâ ǁhao, aoǁnâ sîsen-e dī tsî aitsâma Elobmîsa ôaǃnâ. ǃGâsan ga ǂâiǂhansen kai nî ra ǃgomsina hōǃâ, o gu ge ǁkhā gu ana dī tsî ǁîna ra ǂkhâǃnâ în Jehovab tsî ǁîb ǂâibasens ais tsîna ǂâisa ǂnûi.

18. Tae-i ǃaroma da Jehovaba ra koa tsî ǁîba ra ǀgū ǂgao? (“ Jehovaba da a ǀgū ǁkhā ǀgaub” ti hâ boksisa mû re.)

¹⁸ Jehovab ǂoaǂamsa ǀgauga da go ǃhoaǃgaos khaoǃgâ da ge Davidi ge mî khami a mî ǁkhā: Jehovab “ti ǃgareǀuiba ab koahe re.” (Psa. 144:1) Hoaǁae da ge Jehovab ai a ǂgomaiǂnûi ǁkhā. Sada ûib hoab tsî kairasis ǃnâs tsîna da ge ǃaromade ūhâ: “ǁÎb ge a ti ǃgareǀui” ti mîsa. ǂGomǃgâsiba ūhâse ǁîb hoaǁae sida ǀgūse nî hâsa.—Psa. 92:​14, 15.