23ǁÎ ǁKHĀǁKHĀǃÂS
28ǁÎ ǁNAETSANAS Jehovab ǀhōsa kai re
Jehovab ge ǁîb ǃhaokhoen ase ra ǁkhau da
“Tsî ti tabernakeli ge ǁîn ǀkha nîra hâ.”—ESE. 37:27.
ǁKHĀǁKHĀSEN DA NÎ XŪN
Nēs ge nî hui da î da ǁnâuǃā Jehovab tentommi ǃnâ ǃhaokhoese hâs tae-e ra ǂâibasensa. Tsîb ǁîba sida ǀkha ǁae hâsa ǃhaokhoe ǃkhōǃoa-aob ase.
1-2. Jehovaba mâ ǁkhauǂûisa ǁîb ǂgomǂgomsa ǃoaba-aona ra mā?
JEHOVABA mâ ǃâ-e sadu ûib ǃnâ ra ǀhuru? ǀNîsi du ge nî ǃeream, ‘Jehovab ge ti ǁGû, ti Elo tsî ti ǀhōsa.’ ǀNî ǀgaugu ǃnâs tsîna du ge ǀnîsi Jehovab a hamsa ra ǁguiǃā. Xawe mî ǁkhā i du a ‘Jehovab ge ti ǃhaokhoe ǃkhōǃoa-aoba’?
2 Gao-aob Davidi ge Jehovab tsî ǁîb ǃoaba-aon ǁaegu hâ ǀhōsagusisa, ǃhaokhoeǃkhōǃoa-ao-i tsî ǃhaokhoe-i ǁaegu hâ ǀhōsagusis ǀkha gere ǀgopeǀnō. ǁÎb ge ge dî: “ǃKhūtse, tari-e sa Tempeli ǃnâ a ǂgâ ǁkhā? Tari-e sa ǃanu ǃhommi, Sionni ai a ǃoaba ǁkhā?” (Psa. 15:1) ǁNā mîde xu da ge ra ǁkhāǁkhāsen Jehovab ǃhaokhoe ǁkhā da asa, ǀnî mîdi ǃnâ ǁîb ǀhōsa kai ǁkhā da asa. Nēb ge amase buruburuxa aiǂhanuba.
JEHOVAB GE RA ǂHÂBA Î DA ǁÎB ǃHAOKHOE KAI
3. Ham-e Jehovab tentommi ǃnâ ge ǂguro ǃhaokhoe-i? Jehovab tsî ǁîb ǃhaokhoe-i tsîna mati gere tsâ?
3 Jehovab ge hoa xūnab nî kuru tsoatsaos aiǃâ ǀguri ge hâ i. Xaweb ge ǁaeb khaoǃgâ ǁîb ǀGôaba ge kuru. Jehovab ge ǃhaokhoe ǃkhōǃoa-aob ase gere tanisen hîna ge ǂguro ǃhaokhoe-e ǁîb tentommi ǃnâ a ǁkhauba. Jehovab ge nēsab ge dī, o kaise ge “ǃgâiaǂgao.” Tsîb ge ǁîb ǀGôab tsîna “hoaǁae ǁîb aiǃâ ra dâse” ge hâ.—ǂKhm. 8:30.
4. Jehovaba ham-e ǃhaokhoen ase ǁîb tentomma ǃoa ge ǁkhau?
4 Jehovab ge ǀhomǃgāga kuru tsî ǁîga ǃhaokhoese ǁîb tentommi ǃnâ ge ǁkhau. Nē ǀhomǃgāgu ge “Elob ǀgôagu” ti ra ǂgaihe tsî Elob aiǃâ ra ǃgâiaǂgaose Elobmîs ǃnâ ra ǁguiǃāhe. (Job. 38:7; Dan. 7:10) ǂGui kurigab ge Jehovaba ǁîb ǀhomsi kurusaben ǀkha ǀgui ǀhommi ǃnâ gere hâ. Xaweb ge ega khoena ge kuru tsîn ge ǁîn tsîna ǃhaokhoese gere hâ. ǁÎb ǃhaokhoen ge Enoxi, Noaxi tsî Jobi tsîna ge ǃkhōǂgā hâ i. Nē ǃhaokhoen ge Elob ǀhōsan ase ra ǁguiǃāhe tamas ka io “eloǃaoǃgâxase gere tanisen” khoen ase.—Gen. 5:24; 6:9; Job. 29:4; Jes. 41:8.
5. Esegieli 37:26, 27 ǃnâ hâ kēbosa xu da tae-e ra ǁkhāǁkhāsen?
5 Jehovab ge aiǃgû tsî ǁîb ǀhōsana ǃhaokhoen ase ra ǁkhau. (Khomai re Esegieli 37:26, 27 sa.) Aiǁgaus ase Esegieli kēbosa xu da ge ra ǁkhāǁkhāsen Elob amase ǂhâba hâsa în ǁîb ǃoaba-aona ǁîb ǀkha ǀgū ǀhōsagusisa ūhâ. ǁÎb ge ra mîmâi ǁîn ǀkhab “ǂkhîb di ǃgaeǀhaosa” nî dīsa. ǁNā kēbos ge ǁnān ǀhomsi ǃâubasensa ūhân tsî ǃhūbaib ǃâubasensa ūhân mati ǀguiba tentommi ǃnâ nî “ǀgui gū” kais di kēbosa ǃoa ra ǁnaeǁgau. (Jhn. 10:16) ǁNā kēbos ge nēsi ra dīǀoaǀoahe.
ELOB GE SIDA ǀKHA ǁAE HÂ
6. Mati i khoe-e Jehovab tentommi ǃnâ ǃhaokhoe kai ǁkhā? Tsî Jehovab tentomma mapa a hōhe ǁkhā?
6 Elobmîs ǁaeb ǃnân ge khoena tentommsa sâǃnâ tsî ǁkhauba nî ǃkhais ase gere mû. ǁNā tentommi ǃnâ gere sari ǃhaokhoe-i ge gere ǃâubasen ǃgâise i nî kōǃgâhesa. Jehovab ǃoa-ai da ga māǁnâsen, o da ge ǁîb tentommi ǃnâ ra ǃhaokhoe kai. (Psa. 61:4) Jehovab ǀkha da ūhâ ǀhōsagusisa ǀgaisase ūhâ ǀgaras ǀkha ra hui da gagasi ǂûna da ge ra ǃkhōǃoa. Tsî da ge ǂgui ǃgâi ǀhōsan tsîna ǁîb tentommi ǃnâ ra ǀhao-ū. Jehovab ra ǁkhau da tentommi ge ǀgui ǃhaos ǀguisa ǃoa hâ tama ǁkhauǂûisa. ǃHūbaib ǂhawase hâ khoen hoan ge Jehovab tentommi ǃnâ ǃhaokhoese a ǁhao ǁkhā. ǀNîsi du ge ǃaugab ǃhūb ǃnâ ǀō-aisa ǂkharis kai ǀhaosa sī a hâǃnâ ǁkhā tsî du ge īǁkhā i ga o ǂgui Xristeǁîn ǀkha ge ǀhao ǁîn hîna a ǃhaokhoena Jehovab tentommi ǃnâ. Jehovab tenti ge ǁîb ǂgomǂgomsa ǃoaba-ao-i hoa-i hâ ǃkhais hoas tawa hâ. ǁÎb tentommi ǃnâ da ge ǃhaokhoese a hâ ǁkhā mapa ǀgui ta ga hâ xawe.—J.ǂHa. 21:3.
7. Mati da a ǂan ǂgomǂgomsa ǃoaba-aon ǁō gen noxopa Jehovab tentommi ǃnâ a ǃhaokhoesa? (Ai-īsiba mû re.)
7 Jehovab di ǂgomǂgomsa ǃoaba-aon ǁō gen ǀkha i tae-e nî ī? Mî ǁkhā î da a ǁîn tsîn Jehovab tentommi ǃnâ noxopa a ǃhaokhoesa? Îo! Tae-i ǃaroma da ti a mî ǁkhā? Jehovab ge nē ǂgomǂgomsa ǃoaba-aona tāstē ǀuru tama hâ. ǁÎn ge noxopa ǁîb aiǃâ a ûitsama. Jesub ge ge ǁguiǃā: “ǁŌ hân ge ûib ǃoa a khâi ǃkhaisab ge Moseba ge ǂhaiǂhai. ǂHubi ra ǁkhūhais di ǃnaeǃkhais ǃnâb ge ǃKhūba Abrahammi, Isaki tsî Jakob tsîgu di Elob ti ǂgaio. Elob ge ǁō hân di Elo tamaba tsîb ge a ûitsaman di, hoan ra ǁîba ûiba xui-ao.”—Luk. 20:37, 38.
ǁŌ ge ǂgomǂgomsa ǃoaba-aon Jehovab din tsîn ge ǁîb ǃhaokhoese tentommi ǃnâ hâ ǁkhā (7ǁÎ xoaǀgorasa mû re)
HŌ DA RA ǃGÂIB TSÎ ǂGAOǀKHĀDI
8. Jehovab tentommi ǃnâ hâsa xu da tae-i ǃgâiba ra ǀama?
8 Jehovab di tentommi ge ǁîb ǃhaokhoena ǁîb ǀkhan ūhâ ǀhōsagusisa a ǁgaiǁgai ǁkhā xūna xu ra ǁkhauba. Tsîb ge ǁîna ra hui în ama ǃâubasensa ūhâ hānîǁaeb ǃaroma. Jehovab ǀgūse da ga hâ ǀgara, ob ge ǁgâuaba ǃē-e hō tide sida tsûtsûsa. (Psa. 31:23; 1Jhn. 3:8) ǀAsa ǃhūbaib ǃnâb ge Jehovaba aiǃgû tsî ǁîb ǂgomǂgomsa ǀhōsana gagasi tsûba xu ǀgui ǁkhauba tide xawe ǁōba xus tsîna ǁîna nî ǁkhauba.—J.ǂHa. 21:4.
9. Jehovaba tae-e ǁîb ǃhaokhoena ra ǂgaoǀkhā?
9 Kaise kai aiǂhanub ge Jehovab tentommi ǃnâ ǃhaokhoese hâ tsî ǁîb ǀkha hâhâ ra ǀhōsagusisa ūhâsa. Tae-e da nî dī î da Jehovab tentommi ǃnâ ǃhaokhoese hâ ǀgara? Khoe-i xa du ga ǁkhauhe, o du ge nî dītsâ î du ǃhaokhoese tanisen. Aiǁgause i ge ǁî-e ǀnîsi ra ǂhâba î du sadu ǁharode ǁhû oms ǃnâ du nî ǂgâs aiǃâ. Tsî du ge ǁnāsa māsenxase nî dī. ǁNās ǁkhās khami da ge ra ǂanǂûi ǂgao, Jehovab tae-e ǁnān ǁîb tentommi ǃnâ aiǃgû tsî ra hâhâ ǂgaona ra ǂgaoǀkhāsa. Jehovaba da ūba hâ ǀnammi ge ra ǂkhâǃnâ da î da ǁkhā da a-i hoa-e dī ‘ǁîba ǂkhîǂkhîsa.’ (Kol. 1:10) Jehovaba da sida ǀhōsab ase ra mû xawes tsîna da ge ǂâis ǃnâ nî ūhâ ǁîb a sida ǁGû tsî Elo tsîb ǃgôasiba ǁgauhesa anu hâ ǃkhaisa. (Psa. 25:14) ǁNāsa ǂâis ǃnâ ūhâse da ge tāstē nî ǀuru ǁîb ǃgôahesa anu hâsa. ǃGam ǃgôasiba Jehovaba ūhâbas ge nî hui da, î da ǁîba nî tsûtsû xūna dīsa xu ǂgōsen. Hoaǁae da ge dītsâ tsî “ǂhanuse” sida Elob ǀkha ra ǃgû ǀgara ǂgao.—Mix. 6:8.
JEHOVAB GE ISRAELǁAESA HÂ-Ū ǀGAUB
10-11. Jehovaba Israelǁaesa mati Sinaiǃgaroǃhūb ǃnâ gere hâ-ū tsî nēsa mati ra ǁgau ǁîb ǀgora-e ūhâ tamasa?
10 Jehovab ge ǁîb ǃhaokhoen ǁaegu ǀgora-e ūhâ tama. (Rom. 2:11) Nēsa da ge Israelǁaesab ge Sinaiǃgaroǃhūb ǃnâ hâ-ū ǀgausa xu ra ǁkhāǁkhāsen.
11 Jehovab ge ǁîb khoenab ge Egipteb ǃkhōsisa xu a ǃnora kai, o prister ga tabernakeli ai nî ǃoabase ge ǁgaumâi. Leviǁîgab ge ǀnî hâ ǁgaumâisa tabernakeli ǃnâ ge mā. Jehovaba tabernakeli ǃnâ gere ǃoaban tsî tabernakeli xōǀkhā gere hân ǀguina gere kōǃgâ? Hî-i, Jehovab ge ǀgora-e ūhâ tama.
12. Jehovab ge Israelǁaesa gere sîsenū ǀgauba mati ra ǁgau ǁîb ǀgora-e ūhâ tamasa? (Eksodus 40:38) (Ai-īsiba mû re.)
12 Mâ Israelǁî-i hoa-i ge ǀgū ǀhōsagusisa Jehovab ǀkha ge ūhâ ǁkhā i. Nēsi i ga tabernakeli ǃnâ ǃoaba tama i tsî ǁî-i tensa tabernakeli ǀgūse hâ xaweb ge Jehovaba ge dī îs hoa ǁaesa ǃâus tsî ǀaes tabernakeli ǂamǃnâ ge hâ isa mû ǁkhā. (Khomai re Eksodus 40:38 sa.) Hoan ge ge mû ǁkhā i ǃâus gere gon tsoatsoa o, ǃnūse hân tsîna ǃkhōǂgā hâse. Tsîn ge ǁîn xūna ǀhami, tente ǂnaukhâi tsî ǀguiba gere ǃgû. (Num. 9:15-23) Hoa khoen ge trompedi ǀōban gere ǁnâu, o gere ǃgû tsoatsoa. (Num. 10:2) Tabernakeli ǀgūse hâs ge ge ǁgau tama hâ i ǀgū ǀhōsagusisats Jehovab ǀkha ūhâsa. Mâ Israelǁî-i hoa-i ge ge Jehovab ǃhaokhoe ǁkhā i tsî ge ǂan i ǁîb xan daoǁgauhe tsî nî ǁkhaubahesa. ǁNās ǁkhās khami, mapa ǀgui da ga nētsē ǃhūbaib ai a hâ xawe da ge Jehovab ǀnammi, kōǃgâs tsî ǁkhaubas tsîna a hōǃâ ǁkhā.
Kamps ǁaegu ge hâ i tapernakeli ge gere ǁgau Jehovab ǀgorasa ūhâ tamasa (12ǁÎ xoaǀgorasa mû re)
JEHOVAB GE NĒTSĒ ǀGORASA ŪHÂ TAMA
13. Tae-i ǃaroma da a mî ǁkhā Jehovab nētsē ǀgora-e ūhâ tamasa?
13 Elob ǃoaba-aon ǀnîn ge nētsē dana beros tamas ka io ǁnâub beros Jehovab ǃoaba-aon dis xōǀkhā ra hâ. ǀNîn ge ǁnā ǃkhaidi tawa ra ǃoaba. Nēs xa ǃaromahe hâsen ge ǀnîna ǁnāpa ra dīhe gagasi ǁaxasigu ǃnâ ra ǁhao. ǀNîn ge ǀapeǂhumis ǃnâ ǃereamsa ūhâ gu ǀkhas tsîna ra hâǀhao. Xawen ge ǀnîna ǃnarimâra sîsen-e ra dī tsî ǀnîna ǀō-aisa ǀgaub ǃnâ ǀoasase ra ǃoaba tamas ka io ǀnî hâ ǀgaugu ǃnâs tsîna Jehovaba ra ǃoaba. ǂÂis ǃnâ ūhâ re nē ǀgaugu ǃnâ du ga Jehovaba ǃoaba tama i xaweb ge ǁîba ǃhaokhoeseb ra ǃkhōǃoan hoana kaise a ǀnam. ǁÎb ge sado a ǂan tsî ǂhâ du hân hoana nî mā du. (1Pet. 5:7) Jehovab ge ǁîb ǃoaba-aon hoana ǂhân hâ gagasi ǂûn hoana ra mā tsîb ge ǁîna daoǁgau tsî ra ǁkhauba.
14. Mâ ǀkhara ǀgaub ǃnâb Jehovaba ra ǁgau ǀgora-eb ūhâ tamasa?
14 Jehovab ge mâ khoe-i hoa-e Elobmîsa khomais ǃēsa mās ǃnâ-ū ra ǁgau, ǁîb ǀgora-e ūhâ tamasa. Elobmîs ge ǂgurose ǃnona gowagu ǃnâ ge xoahe: ǁNāgu ge Hebre, Aramaiki tsî Grike gowab tsî ga. Elobmîs ge xoaǃnâhe gowaba khomai ǁkhān ǀguina ǀgū ǀhōsagusisa Jehovab ǀkha ūhâ ǁkhā, ǁnā gowaba khomai taman xa? Hî-i, tātsēs tsîna.—Mat. 11:25.
15. Mâ ǁgauǁgaude hâ Jehovab ǀgora-e ūhâ tamasa ra ǁgaude? (Ai-īsiba mû re.)
15 Jehovab ge ǁkhau da tama î da ǁîb ǀhōsa kai, ǀgapi ǁkhāǁkhāsensa da ūhâ tsî da ǂguro gere ǃhoahe gowagu Elobmîs di ga ǂan amaga. Jehovab ge ǂhâba hâ în ǃhūbaib ǂhawase hâ khoen hoana ǁîb di gā-aisiba xu ǃgâiba ǀama. Nēs ge ǀgapi ǁkhāǁkhāsensa ūhân ǀguina ǃkhōǂgā tama. Elobmîs ge ǂgui gowagu ǃnâ ǂnûiǃkhunihe hâ în ǂgui khoena ǃhūbaib ǂhawase ǁnāsa xu ǃgâiba ǀama. Tsî ǁkhāǁkhāsen matin ǁîb ǀkha ǀhōsagusisa a omkhâi ǁkhā ǀgausa.—2Tim. 3:16, 17.
Elobmîs ge ǂgui gowagu ǃnâ a ǂnûiǃkhunihesa ra ǁgau Jehovab ǀgorasa ūhâ tamasa? (15ǁÎ xoaǀgorasa mû re)
JEHOVAB ǃHAOKHOESE HÂHÂ
16. ǃNaeǃkhaidi 10:34, 35 ǃoagu da mati aiǃgû tsî Jehovab xa ūǃoahe ǁkhā?
16 Kai aiǂhanub ge Jehovab xa ǁîb ǃhaokhoen ase ǁîb tentommi ǃnâ ǃkhōǃoahesa. Jehovab ge khoexaǃnâ, ǀnamxaǃnâ tsî kaise a ǃhaokhoe ǃkhōǃoaxa. ǁÎb ge ǀgorasa ūhâ tama tsî mâ ǀguiǀguibe khoe-i hoa-e ra ǃkhōǃoa, mapa ǀgui i ga hâ, khaoǃhūb, ǁkhāǁkhāsens, gowab, kurin tsî aore tamas ka io tare-i gas tsîna. Jehovab ge ǁîb ǂgaoǀkhādi ǃoagu ra ûin ǀguina ǃhaokhoese ra ǃkhōǃoa.—Khomai re ǃNaeǃkhaidi 10:34, 35 sa.
17. Jehovab tentommi ǃnâ ǃkhōǃoahes ǃgao da mapa ǃnāsa ǃgāsasiba hō ǁkhā?
17 Psalmdi 15:1 ǃnâ i xoasa khamib ge Davida ge dî: “ǃKhūtse, tari-e sa Tempeli ǃnâ a ǂgâ ǁkhā? Tari-e sa ǃanu ǃhommi, Sionni ai a ǃoaba ǁkhā?” Jehovab ge Davida ge sîsenū Psalmdi 15 ǃnâ hâ dîsa ǃereams ǃaroma. Saora ǁkhāǁkhāǃâs ǃnâ da ge nî ǁkhāǁkhāsen taena da nî dīsa î da Jehovaba ǂkhîǂkhî tsî ǁîb di ǀhōsan ase ūǃoahe ǁkhā.
32ǁÎ ǁNAETSANAS ǂGomǂgomsase Jehovab ǃoa-ai hâ re!
