Desemberi 22, 1929 ta ge Noville ti ǀon hâ ǂkhari ǃgaroǃās ǃnâ ge ǃnae hîna 9 ǃgaroǃāde Bastogne, Belgian Ardennes ǀgūse ūhâsa. Kaise ta ge ǃgâi ǁaeba ti ǁgûra ǀkha ǁnā ǃgaroǃās ai ge ūhâ i. Ti ǂkham ǃgâsab Raymondi tsî tita tsîn ge gomate ǀao tsî ǃhanab ǃnâs tsîna tsēs hoasa gere hui. Sida gere hâ ǃgaroǃās ai i ge mâ khoe-i hoa-e gere hui gu.

Ti ǁgûra Emiles tsî Alici tsîn ge ge ǂgomǂgomsa katolik i. Mâ Sontaxtsēs hoasa ra ge gere kerkhe ǃgû. Xawe i ge 1939 aimâba-aogu Engelanda xu hâ ga sida ǃgaroǃās tawa sī tsî ti dadaba ǁkhâb hoaba Awake! ǂkhiniba gere mā. Ti dadab ge ǃkhaese ge mûǂan khomaib gere xūn ge ama isa, nēs ge ge ǂkhâǃnâ bi îb Elobmîsa khomai tsoatsoa. Kerkhe ǃgû ǀgûb ge o i ge sida ǁanǁare-aon kaise ge khoexaǃnâ îna ǀgaisase gere māǃoabi. Ti dadaban ge gere ǁgâiǀā îb katolikse hâ ǀgara. Tsîn ge nēs ǃaroma ǀgaisa ǁgamǀhaode ge ūhâ i.

Kaise i ge gere tsâuaǂgao kaite ti dadaba nēti i ǁgâib ǃnâ mûsa. ǁNās ge ge ǁgarite î da tsoatsoas ǃnâ da goro mî khami Elob huiba ôa. Kaise da ge gere ǃgâiaǂgoa sida ǁanǁare-aon ge ti dadaba ǁaeb ǀkha ǁgâiǀā ǀū o. Nēs ge ge ǁgaute Jehovab a ‘ǀgoredi ǁnâu-am-aosa.’

Nazi Germanib ge Belgiumma Meib 10, 1940 ge ǁnāǂam. ǁNās xa ǃaromahe hâse î ge ǂgui khoena ǃhūba xu ge doe. Sida omaris ge Franci suides ǀkhāba ǃoa ge ǃkhū. Daob ai da ge ǀnî ǁaega ǃaoǃaosa ǃkhain duitseran tsî Franci toroǂnubidi ra ǃkhaman tawa gere sī.

 Ega da ge hâ ai da gere ǃgāroǃāsa ǃoa ge oa ǁkhā i. Xawe da ge sī da ge o ge mû sida xūn ǃnāsan ge ǃnarihe hâ isa. Sida arib Bobbib ǀguib ge ge ǁkhoreǁhare da. Nēti i xūna ǃkharuǃnâs ge gere ǂâi kaite ‘tae-i ǃaroma i torogu tsî ǃgomsin tsîna hâsa?’

ǁNā ǁaeb ǃnâ da ge ǂgomǂgomsa kaira ǃgâsab Emile Schrantzi a saris xa ge ǂkhâǃnâhe. ǁÎb ge Elobmîsa xu ǃgāsase ge ǁguiǃā tae-i ǃaroma da ǃgoma ra tsâsa. Tsîb ge ǀnî dîdi ûib xa hâdi tsîna ge ǃeream. ǀGū ǀhōsagusisa ta ge Jehovab ǀkha ge omkhâi tsî ge ǂanǃgâ ǁîb a ǀnammi ti Elo ǃkhaisa.

Torob nî ǀams aiǃâ i ge sida omarisa nau ǃgâsan ǀkha ge ǃhoa ǁkhā i. Augustub 1943 i ge José-Nicolas Mineteba sida ǃgāroǃāsa ge sari îb ǃhoasa mā. ǁÎb ge ge dî “tari-e ra ǁāǁnâhe ǂgao?” Ti dadab ge ǃomma ge khûi tsî ta ge tita tsîna ge khûi. Tsî kham ge ǂkhari ǃārob ǃnâ hâ ai da gere ǃās xōǀkhā ge ǁāǁnâhe.

Desemberi 1944 i ge Duitserna ǀuniga ǁnāǂams ǀgamǁî torob disa Europap ǃnâ ge tsoatsoa, nēs ge “battle of the bulge” ti ǂansa. ǁNā ǃkhams ge hâ i ǃkhais ǀgūse da ge gere hâ tsî da ge ǁkhâb ǀgaiba ǃhūb ǃnaga hâ omros ǃnâ gere hâ. ǀGuitsē ta ǃauga xamanina ra ǂûmā hîna i ge bomsa daks ǀgapiga ge ǃhui tsî daksa ge ǁgaiǁgai. Amerikab soldab ge xamarina ta gere ǂûmā ǃkhais ǃnâ ge hâ i, ǁîb ge “ǁoe reǃ” ti ge ǃau. ǃKhoe tsî ta ge ǁîb xōǀkhā sī ge ǁgoe tsîb ge ǁîb danasa ra ǁkhauba toroǀgapasa tis ai ge ǂnûi tita ǁkhaubas ǃaroma.

Torob ge ǀams khaoǃgâ da ge Liège ǀhaohâb ǃnâ hâ ǃgâsan ǀkha gere ǃhoaǀhao, ǁîn ge sida ǃgāroǃāsa xu 90 km ge ǃnū i. ǁAeb ra ī khami da ge ǂkhari groep rosa Bastognes ǃnâ ge tsoatsoa. Mari ǃkhōǃoas tawa ta ge ge sîsen tsoatsoa tsî ta ge aiǂhanuba ge ūhâ i ǂhanub xa ǁkhāǁkhāsensa. Ega ta ge ǂhanub ǂansabeb tawa gere sîsenū. ǂKharis kai ǀharosa da ge 1951 Bastognes ǃnâ ge ūhâ  i. ǁAubexa 100 khoen ge nē ǀhaosa ge hâǃnâ hâ i, nēs ge ôasa aimâba-ao ǃgâsas Elly Reuters tsîna ge ǃkhōǂgā hâ i. ǁÎs ge ǀurihāb ǀkha 50 km ge ǃgapi îs nē ǀhaosa hâǃnâ. ǀNamgu tsî ra ge ǃgammeba ge mîmâiba gu. Ellies ge Gilead skoli Amerikab ǃnâ hâba ǃoa ge ǁkhauǂûihe. Dana berosa ǃoa xoa tsîs ge ge ǁguiǃā tae-i ǃaromas ǁnā ǁkhauǂuisa ūǃoa tamasa. ǃGâsab Knorri ǁnā ǁaeb ai ge Jehovab khoen ǁaegu gere ǂgaeǂguib ge ǃgâi ǀgaub ǃnâ xoa-oa tsî ge mî ǀnîsis ǀguitsē ǁîs aob ǀkha Gilead skola nî hâǃnâsa. Februarib 1953 i ǃnâm ge ge ǃgamme.

ǁKhā kurib ǃnâm ge New World Societis kai ǀhaosa ge hâǃnâ, Yankee ǂgās tawa New Yorki ǃnâ. ǁNāpam hâ hîna ta ge sîsen-e gere māte ǂgao ǃgâsaba ge ǀhao-ū, ǁîb ge ge ǁkhaute î da Amerikaba ǃoa doe. Nēs xam ge ǀgore toas khaoǃgâm ge Elli hâma ge mîǁgui îm Belgiumma ǃoa oa tsî 10 ǃgâsana ūhâ ǀhaohâba Bastognes ǃnâ sī ǂkhâǃnâ. Saora kurib aim ge kaise ge ǂkhî i Ellis ge Serge ti ǀon hâ aore ǀgôaroba a ǁora o. Tsûaǂgaoxaseb ge nē ǀgôaroba ǀaesen tsî ge ǁō. Jehovabam ge ǀgores ǃnâ ge mîba matikōsem ra tsûaǂgaosa tsîm ge khâis ǃâubasens xa ge ǂkhâǃnâhe.

Oktoberi 1961 ta ge ǃnubu ǁaeroba ra sîsenhe sîsen-e ge hō, ǁnās ge gere īǁkhā kai i ta aimâba-aose ǃoaba. ǁNātsēs ai ta ge Belgiummi ǁnaub berosa xu ge belhe tsî ge dîhe, ǃnarimâra mûǂam-aob ase ta ǃoaba ǂgoa tamasa. “Aibem aimâba-aose ǃoaba tite?” tita ge ge dî. Ti ǂgans ge ge ǁnâu-amhe. Tsîm ge ǁkhaisa ǁkhâgam aimâba-ao sîsenne dīhâs khaoǃgâ ǃnarimâra mûǂam-aob ǁgaumâisa September 1962 ge tsoatsoa.

ǀGam kurinam ǃnarimâra sîsenni ǃnâ hâs khaoǃgâm ge ge ǁkhauhe îm Brussels ǃnâ hâ Betels tawa sī ǃoaba. ǁNāpam ge Oktoberi 1964 ge tsoatsoa. Nē ǀasa ǁgaumâis ge ǂgui ǀkhaega ge mā mî. ǃGâsab Knorri ǃnupu ǁaero-e sari toa hâs khaoǃgâ ta ge 1965 ǁnaub komites ǁanib ase ge ǁgaumâihe. Egam ge Elli hâma ge ǁkhauhe îm 41ǁî ǃgupis Gileadi disa hâǃnâ. ǃGâsab knorri ge 13 kurina ǃkharu hâse a mî mîdi ge ge ama kai. Gileadi skolam ge toas khaoǃgâm ge Belgiummi Betelsa ǃoa ge oa.

ǃKharuge kurigu ǃnâ ta ge aiǂhanuba ge ūhâ i ǂhanub xa ta ūhâ ǂansa sîsenūsa, Jehovab di khoena huisa în ǃnorasase ǃoaba Europap tsî ǀkhara ǃkhain ais tsîna. (Fil. 1:7) Nē sîsenni xa ǃaromahe hâse ta ge ǂgui ǂhanub khoegu ǀkha ge ǀhao, 55 ǃhūgu ǃnâ sida sîsenni ǂkhāsaba. ǂHanub ǂansa ta ūhâ ti mâi-aiǃâsens xa ta ge ǃnāsa ǁaeba “ǃKhūb ǃgāse” gere mâi-aiǃâsen. Jehovab di daoǁgausa ta ge ǀgores ǃnâ hoaǁae gere ôa tsî gere ǂanǃgâ “Gao-aob di ǂgaob ǂâidi ge ǃKhūb ǃomǁae hâ, ǁgamǃāgab ra ǂgaeǂguis  ǁkhās xase; ǁîb ge ǁîga ǂgaob ra ǀgaub hoab ai ra ǂgaeǂgui.”—ǂKhm. 21:1.

ǀGui xū-i hîna gere mâǂoabate i ge ǁgamǀhaos Europab parlaments ǁanib ǀkha ta ge ūhâ isa. ǂGuiǃnāde ta ge ge ǂgan hâ i ǁîb ǀkha ǃhoasa tsîb ge ega ge mā-amsen tita ǀkha ǀhaosa. ǁÎb ge ge mî “goro minut ga ta ge nî mā tsi ǁnās xa ǃnāsases ose.” Ti danasa ǃgam tsî ta ge ge ǀgore tsoatsoa. Parlaments ǁanib ge saurase ge dîte tae-e ta ra dīsa. Ti danasa khûi tsî ta ge ge mî “Eloba ta ge goro gangan ǁîb di ǁgaumâisa du a amaga.” ǁÎb ge “tae-ets ra ǂâibasen” ti ge dî. Romeǁîn 13:4 sa ta ge ge ǁgaubi. ǁÎb ge Elobmîs ǂans tsî ǃgôasib tsîna Elobmîsa ge ūba hâ i. (Protestanti ge ge i) Tae-e saorase ge ī? Halfe īra kham ge ge ǁgam tsî kham ge kaise ǃgâi ǀhaosa ge ūhâ i. Jehovab ǃoaba-aon sîsen-eb ǃgôasiba ūba hâs tsînab ge ge mî.

ǃKharuge kurigu ǃnâ i ge Jehovab di khoena ǂgui ǃkhamde Europap ǃnâ ge ūhâ i. Aiǁgause Xristeǁîn ase ǀkhā-e ǁhûi tama īs, ǀgôana ǁkhaubas, mari ǃkhōǃoadi tsî ǃnāsa xūn. Kai aiǂhanub ge mûsa matib Jehovaba nē ǁkhōgu ǃnâ ra dan kai da ǀgausa. Jehovab di ǃoaba-aon ge 140 xa ǃnāsa ǁkhōga dan hâ, Europap ǀgapi ǁnâuǃgâ ǃkhaib khoesi ǂhanugu dib tawa.

ǃGâsab Philip Brumlib, dana beros ai ra sîsenni tsî Valter Farnetib Italib ǃnâ ra hâb ǀkha ta 1990 gu ǃnâ ǀguipa gere sîsen, î ge sida ǃgâsan Kubab ǃnâ hâna hui în Jehovaba ǃnorasase ǃoaba, sida sîsenni ge ǂkhāsa iba. Kubab ǃhūba Belgiummi ǃnâ ra ǂnûǁkhaeba khoena ǃoa da ge ge xoa tsî ta ge sida ǁhōba ra sîsenǂam khoeb ǀkha ge ǀhao. ǂGuro ǀhaos ǃnâ kham ge ǁnâusagudi hîna ge hâ i te ge ǃgāǃgā ǁoa i.

Jehovab daoǁgausa da ǀgores ǃnâ ǂgan hâs khaoǃgâ da ge ǃereamsa ge hō, 5 000 Elobmîde Kubaba ǃoa ǂgaus ǀkha sîsa. Elobmîdi ge ǃnorasase ge sī tsîn ge ǃgâsana ge ǀgorahe. Nēs ge ǂgomǃgâsiba gere mā da Jehovab ge sida ǁgūtsâde gere ǀkhaesa. ǁNāpaxu da ge ǂganamsensa ge dī î da 27 500 Elobmîde sî. ǂHanub ge nēs tsîna ge mā-am. Sida ǃgâsan Kubab ǃnâ hâna Elobmîde hōs ǀkha huis ge kai ǃgâiaǂgaoba gere māte.

Kubaba da ge ǂgui ǃnādi ai gere sari tsî ge hui în ǂhanub mâsib sida sîsenni ǃoagu hâba  ǃgâiǃgâi. ǁNās ǃnâs tsîna ta ge ǀhōsagusisa ǀnî ǂhanub ǂansaben ǀkha ge kuru.

Rwandab ǃnâ ge 1994 hâ i ǂkhabadīb, Tutsi !haos !oagub !nâ i ge 1 000 000 xa a !nāsa khoena ge !gamhe. ǃNubuse ǁnās khaoǃgâ i ge ǃgâsaga ge ǂganhe î gu ǃgâsana ǂhân hâ xūn tsî huib tsîna mā.

Kigalis danaǃās ǃnâ ge ge sī tsî ge mû ǂnûiǃkhuni beros tsî ǂgui ǂkhinin ra ǃnaoǁnâhe ǃkhais ge ǁhādi ǀkha ǂnoahe hâ i ǃkhaisa. ǂGui tsûaǂgaosa xūn ge gere mîhe ǃgâsan ge kai gôagu ǀkha ǃgamhe ǀgaub xa. Xawe da ge Xristeǁîn ra ǁgaugu ǀnammi xas tsîna ge ǁnâu. Aiǁgause da ge Tutsi ǃhaos ǃgâsaba ge ǀhao-ū ǁîb ge 28 tsēde ǃhūb ǃnaga ge sâusa i Hutu ǃgâsab xa. Kigals ǃnâ ge hâ i ǀhaos tawa da ge 900 xa ǃnāsa ǃgâsana ǂkhâǃnâ tsî ge ǁkhaeǂgao.

Saorase da ge Zaires xrensa ge ǃkharu (nēsi Kongob ase ǂansasa) î da Rwandab di ǃgâsan hîna ge Gommas di danaǃās ǀgūse ǂnôa ǃkhūsaben kampsa ǃoa a ǃkhūna ôa. ǁÎna da ge ge hō tama hâ i ǁnā-amaga da ge ge ǀgore îb Jehovaba ǁîna ǃoa daoǁgau da. Sida ǃoa ra ǃgû khoeba da ge mû tsî ge dîbi Jehovab ǃoaba-ao-eb ǂan tamasa. “Îo, tita ge Jehovaba ra ǃoaba” tib ge ge ǃeream. “Kaise ta ge nî ǂkhî, tsūkeǃgâb huiba ra mā komitesa ǃoa ī-ū gosa.” Tsūkeǃgâb huiba ra mā komites ǀkha ǂkhâǃnâ ra ǂnûsa ūhâs khaoǃgâ ge ge 1 600 ǃkhūsabe ǃgâsan ǀkha ge ǀhao tsî ǁîna ǂkhâǃnâs tsî ǁkhaeǂgaos tsîna ge mā. ǂGaeǂguira sorosa xu hâ sîǂkhinis tsîna ge ge ǁîn ǀkha ge ǀgoragu. ǃGâsan ge kaise ge tsâǀkhāhe: “hoaǁae du ge sida ǀgoredi ǃnâ hâ. Jehovab ge tātsē ǁnaxu du tide” ti hâ mîden ge ǁnâu o. Nē mîdi ǂgaeǂguira soros ǃgâsaga xu hâdi ge ge ama ī. Nētsē î ge 30 000 xa ǃnāsa ǃgâsana hâ, ǃgâiaǂgaob ǀkha Jehovaba Rwandab ǃnâ ra ǃoabana.

ǁAubexam 58 kuriga ǃgamme hâs khaoǃgâs ge ti ǀnamǀnamsa taras, Elliesa 2011 ge ǁō. Jehovaba ta ge ǀgores ǃnâ ge mîba matikōse ta tsûaǂgao hâsa tsîb ge ǁîba ge ǁkhaeǂgaote. Gaosib ǃgâiǂhôasa ti ǁanǁare-aon ǀkha ǀgoragus ǃnâ-ū ta ge ǁkhaeǂgaosa ge hō.

Mâ wekheb hoaba ta ge aoǁnâ sîsen-e noxopa ra dī 90 kurixa ta a xawe. ǂHanuba ra ǂnûǁkhaeba kantors tawa ta ge Belgiummi ǁnaub tawa ra hui tsîs ge nēsa kai ǃgâiaǂgaoba ra māte. Naun ǀkha ta ge hōǃâ ta ge xūna ra ǁgam tsî ǂkham ǃgâsana Betels omaris ǃnâ ra ǂkhâǃnâ.

Ti ǂguro ǀgoresa ta ge 84 kuriga ǃkharu hâse ge dī, ǁnās ge ge tsoatsoa i îsa ûiba ǃôa gere ǀgū kaitesa. Kaise ta ge ra ǃgôaǃgâ Jehovab ge ti ûib ǃnâ ti ǀgorete gere ǃgâ ǃkhaisa.—Psa. 66:19. b