Khomai-aon dîdi
Psalmdi 12:7 ǃnâ hâ mîdi sats ge nî “sâu da” ti hâte “ǁgâiǀāhe ran” ǃoa ra ǁnaeǁgau (5ǁî ǁaraǃās) Tamas ka io di “ǃKhūb di mîdi” ǃoa ra ǁnaeǁgau (6ǁî ǁaraǃās)?
Nē xoas ge ra ǁgau khoena ǃoa i ra ǁnaeǁgausa.
Psalmdi 12:1-4 ǃnâ da ge ra khomai “ǃaruǀî-i ǂhanu-ai khoe-e ǀkhai” ǃkhaisa. Tsîb ge Psalmdi 12:5-7 ǃnâ saorase ra mî:
“Ob ge ǃKhūba ra mî:
“nēsi ta ge nî khâimâ
ǀgâsan, ǁgâiǀāhe ran tsî
ǃgôaǃgonhe tsî tsûb xa ra ǃgaen ǃaroma.”
ǃKhūb di mîdi ge ǃanu
ǃKhūtse ǃnorasase ūhâ, î sâu da re ǂkhaba khoen,
mâ ǃkhai-i hoa-i ai hâ ǀhaiǀurib,
hû ǃnāde ǀaes ǃnâ tsunitsunihe hâb khami, ǂkhaba xūna ra koana xu.”
5ǁÎ ǁaraǃās ge Elob “ǁgâiǀāhe” rana nî ore ǀgaub xa ra ǃhoa. ǁÎb ge ǁîna nî sâu da.
6ǁÎ ǁaraǃās ge ra ǀaro, “ǃKhūb di mîdi ge. . . a ǃanu” “ǀhaiǀurib . . khami.” Nē mîdi ge ra ǁgau mati da Jehovab mîs xa ra tsâsa.—Psa. 18:30; 119:140.
Psalmdi 12:7 ge ra mî: “Sats ǃKhūts ge nîra sâu da; sats ge nîra ǃûi da nē ǃhoas ǃoa-ai ǀamos kōse.” “Da” ti hâ mîsa tae-e ǃoa ra ǁnaeǁgau?
6ǁÎ ǁaraǃās ge ra mî, “ǃKhūb di mîdi . . . a ǃanu” ti. ǁNās ǀkhan ge ǀnîna “da” ti hâ mîs ǃKhūb mîde ǃoa ra ǁnaeǁgausa. Tsî da ge a ǂan Jehovab ǁîb mîde ra ǁkhaubasa ǂgui khoen ge mâǃoa tsî gere hîkākā ǂgao xawe.—Jes. 40:8; 1Pet. 1:25.
5ǁÎ ǁaraǃās ǃnâ i ra mîhe khamib ge Jehovaba ǁîb khoena ra ǁkhauba. Jehovab ge aiǁgû tsî “ǁgâiǀāhe” ran tsî “ǃgôaǃgonhe” ran tsîna nî hui.—Job. 36:15; Psa. 6:4; 31:1, 2; 54:7; 145:20.
7ǁÎ ǁāraǃās ǃnâ “da” ti hâ mîsa tae-e ǃoa ra ǁnaeǁgau?
Nē Psalmdi ǃnâ i ge “da” ti hâ mîsa ǃgāsase khoena ǃoa ra ǁnaeǁgau.
Psalmdi 12 tsoatsoas ǃnâb ge Davida ǂgomǂgomsa ǃoaba-aon Jehovab din eloxoresa khoen xa ge ǂhumibahen xa ra ǃhoa. Tsî da ge ǁnās khaoǃgâ ra khomai Jehovab ǁgai xūna ra ǃhoa khoen ǃoagu nî khâisa. Psalms ge ǂgomǃgâsiba ra mā da Jehovab ǁîb khoena nî huisa, ǁîb mîdi a ǃanu amaga.
7ǁÎ ǁāraǃās ǃnâb ge Jehovaba ra mî, ǁîb ‘khoedab’ nî sâu tsî ǁkhaubasa. ǁNān ge ǃgôaǃgonhe ra na eloxoresan xa.
“Da” ti hâ mîs ge Hebreǁî xoadi ǃnâ ra sîsenūhe. “Da” ti hâ mîs ge ǀgam ǃnāra ǂgurose Hebreǁî xoade xu Grike gowab ǃnâ ge xoahe. ǁNā-amaga i ge ǂgomǂgomsan hîna ǃgôaǃgonhe tsî ra ǁgâiǀāhena ǃoa ra ǁnaeǁgau. ǀAms ais ge 7ǁî ǁaraǃāsa ra mî, ‘mâ khoe-i hoa-i’ ǂgomǂgomsa-i ge nî sâuhe, “ǂkhaba” xūna ra dī khoena xu. (Psa. 12:7, 8) Hebreǁî xoadi Aramaik gowab ǃnâ hâ ti ge 7ǁî ǁāraǃās ǃnâ sao rase ra khomai: “Sats ǃKhūts ge nîra sâu da; sats ge nîra ǃûi da nē ǃhaos ǃoa-ai ǀamos kōse.” Nēs ge ra ǁgau Psalmdi 12:7 Elob mîde ǃoa ǁnaeǁgau tamasa.
ǁNā-amagas ge nē xoasa ‘ǂgomǂgomsa khoena’ ǃâubasensa ra mā, Elob ǁîb khoena nî huisa.
