1-2. ǂHomisa tama du ga īo ǁāǁnâhes ǃaroma, tae-i ǃaroma du ǂkhabuǂâi tide? (Tsoatsoas ai hâ ai-īsiba kō re.)

 ǁĀǁNÂ kaisen ǂgao du ga, o du ge ǃgâi mîǁguiba ra dī. ǂHomisa î du a ǁnāsa nēsi dīsa? ǂHomisa du a ǃkhaisa du ga ǂgom tsî gu ga ǀhaohâb ǃûi-aoga mā-am o ǁāǁnâhesa, o du ge tā saora ǃēsa nî ǃkharu kai. Nēsa du ga dī, o du ge mādawasa ûiba nî ūhâ Jehovab ǃoabas ǃnâ.

² ǀNî khoe-i xa mîbahe î du ge hâ i, ǀkharalkharana dīsa du ǂhâ hâsa ǁāǁnâhe du nîs aiǃâ? Tamas ka io du ge aitsama ǁnās xa gere ǂâi. Ti-i nî īs ga o, tā ǂkhabuǂâi. Aiǃgû tsî du ge ǀkharaǀkharana a dī ǁkhā. Nē ǂhâǂhâsa mîǁguib ǃaroma. Nēsi du ga ǂkham tamas ka io kaira xawe.

3. Etopiab di ǂhanuǁîba tae-e Filipuba ge dî? Tsî mâ dîsa ge mâǂoa? (ǃNaeǃkhaidi 8:36, 38)

³ Khomai re ǃNaeǃkhaidi 8:36, 38 sa. Etopiab di ǂhanuǁîb ge aoǁnâ-aob Filipuba ge dî: ‘Tare-e ra ǁkhaete ǁāǁnâ kaisensa?’ Nē Etopiaǁîb ge ǁāǁnâhesa gere ǁkhore. Xawe ǁîba ǂhomisa î ge ī ǁāǁnâhes ǃaroma?

4. Etopiaǁîba mati gere ǁgau, ǃnāsaseb ra ǁkhāǁkhāsen ǂgaosa?

⁴ Etopiaǁî-aob ge “ǀgoreǀîb nîse Jerusalems ǁga ge ǃgû hâ i.” (ǃNǃkh. 8:27) ǁÎb ge ǀnîsi ge Jodeǁî tama hâ i xawe ge Jodeǁîn ǂgomsa a ūǃoaba. ǁNā-amagab ge Jehovab xa Hebre Xoade xu gere ǁkhāǁkhāsen. Noxobab ge māsenxase ǃnāsase gere ǁkhāǁkhāsen ǂgao. Nē ǂhanuǁîba tae-e daob ǃnâ gere dī Filipub ge ǀhao-u bi o? Kēbo-aob Jesajab di xoade xub ge gere khomai. (ǃNǃkh. 8:28) ǁNāb  ge ge ǃgam Elobmîs ama ī. Nē ǂhanuǁîb ge Elobmîs di amab ǀguiba ge ǁkhāǁkhāsen ǂgao tama hâ i. Xaweb ge ǃnāsase gere ǁkhāǁkhāsen ǂgao.

5. Tae-eb ge nē Etopiaǁîba ǁkhāǁkhāsen nî gere xū-i xa dī?

⁵ Nē aob ge ge ǂanǂansa ī, Etopiab di Gao-aos Kandakes ǃnāga. ‘ǁÎb ge ge ǁîs marimûǂamao i.’ (ǃNǃkh. 8:27) Nē Etopiaǁîb ge ǂgui ǃereamde ge ūhâ i. Xaweb ge ǁaeba gere ǁamaǂui Jehovaba ǃoabas ǃaroma. ǁKhāǁkhāsen nî gere amab ǀkhab ge ge ǂâu tama hâ i, ǁîb ge ǁkhāǁkhāsen nî gere xūna gere sîsenǂui. ǁNā-amagab ge ǁîba Etopiaba xu Jerusalemsa ǃoa gere ī, îb Jehovaba sī ǃoaba tempeli ǃnâ. Nē ǃnaris ge kai ǁaeb tsî mari-i tsîna ge ǃkhōǂgā hâ i. Xaweb ge nē aoba Jehovaba gere ǃoaba ǂgao, tae-i ǀgui i ga ī xawe.

6-7. Etopiaǁîb Jehovaba ūba hâ ǀnamma mati ge kai?

⁶ Etopiaǁîb ge ǂhâǂhâsa amaba Filipuba xu ge ǁkhāǁkhāsen, Jesub a Mesia ǃkhaisa ǃkhōǂgā hâse. (ǃNǃkh. 8:34, 35) Nē ǂhanuǁîb ge Jesub ge dība bi xūn xab ge ǁkhāǁkhāsen, o ge ǃgâiaǂgao. Tae-eb ge dī nē xūnab ge ǁkhāǁkhāsen o? Hâb ge ī mâsib ǃnâb ge ga hâ ǀgara hâ, ǃgôahesa Jodeǁî-i ase. Xaweb ge Jehovab tsî ǁîb ǀgôab tsînab ūba hâ ǀnammi ǃnâ ge ǀgai. ǁÎb ge ge ǂkhâǃnâhe îb ǂhâǂhâsa mîǁguiba dī. Tsî ǁāǁnâhe Jesub Xristub di saosabeb ase. Filipub ge mû o, nē aob a ǂhanusa ǁāǁnâhes ǃaroma ob sī ge ǁāǁnâ bi.

⁷ Etopiaǁîb di aiǁgausa saos ge nî hui, î du aiǂhomisa ǁāǁnâhes ǃaroma. O du ge sadu tsîna ǂgomǃgâsib ǀkha a dîsen ǁkhā: ‘Tae-e ra ǁkhaete ǁāǁnâ kaisensa?’ Hā re î da ǃhoaǃgao, mati da Etopiaǁîb di aiǁgausa a ǁgae ǁkhā ǀgauba. Saora xūna dīs ǃnâ-ū: ǁÎb ge ge ǁkhāǁkhāsen ǀgara tsî ǁkhāǁkhāsen nî ge xūna gere sîsenǂui. Tsîb ge Elobab ūba hâ ǀnammi ǃnâ ge kai.

8. Johaneb 17:3 ǃoagu da tae-e nî dī?

⁸ Khomai re Johaneb 17:3 sa. Jesub mîde mati a hui du ǁkhā Elobmîsa ǁkhāǁkhāsen tsoatsoas ǀkha? ǁNās ge ǂgui da ǃaroma a ama. Xawe ǁnā mîde ra mîba da î da ǁkhāǁkhāsen ǀgara? Îo. Tātsē da ge ǀû tide, “ama Eloba ǂansa.” (Aoǁn. 3:11) ǀAmosib kōse da ge nî ǁkhāǁkhāsen ǀgara. ǃNāsase da Jehovab xa ra ǁkhāǁkhāsen khami da ge ǁîb ǃoa ra ǀgū.—Psa. 73:28.

9. Tae-e da nî dī, Elobmîs tsoatsoas ǁkhāǁkhāde da ga ǁkhāǁkhāsen toa o?

⁹ ǁNâuǃāxase, Jehovab xa ǁkhāǁkhāsens ge ǂkhariro xūn ǀkha ra tsoatsoa.  Hebreǁîna ǃoab ge xoa sîǂkhanis ǃnâb ge Apostel Paulub ge ǂkhari xurona ǁkhāǁkhāsensa, ‘Elobmîs ǃgaoǃgaoba’ ǃoa ra ǁnaeǁgau. ǁÎb ge ‘ǂguro ǁkhāǁkhāde’ ge mîǁgaiǁgai tama hâ i xawe dai-i hîna ǀgôa-e ra khoakhoa ī ǀkha ge ǀgopeǀnō. (Heb. 5:12; 6:1) Xaweb ge hoa Xristeǁîna gere ǂkhâǃnâ, în tā ǂkhari ǁkhāǁkhādi tawa mâǀgara. Xawe Elobmîs di ǃgam amaba ǁkhāǁkhāsen. Turaba da ūhâ Elobmîs di amab xa ǁkhāǁkhāsensa? Māsenxa î du a gagasise kai ǀgarasa? Tsî Jehovab tsî ǁîb ǂâibasens xa ǁkhāǁkhāsen ǀgarasa?

10. Tae-i ǃaromas ǁkhāǁkhāsensa ǀnî khoena a ǃgomba?

¹⁰ ǂGui da ǃaromas ge ǁkhāǁkhāsensa a ǃgom ǁkhā. Mati du ra tsâ ǁkhāǁkhāsens xa? Skoli tawa du ge khomai tsî ǃgâise ǁkhāǁkhāsen? ǃGâibahe î du ge ī ǁkhāǁkhāsens xa tsî ǂgui xūna du ge ǁkhāǁkhāsen khami du ra tsâ? Tamas ka io du ra ǂansen, ǃgâi tama du hâsa ǂkhanina xu ǁkhāǁkhāsensa? ǁNāti du ga ǂâi o, o du ge ǀguri hâ tama hâ. Xawe Jehovab ge a hui du ǁkhā. ǁÎb ge a ǀoasa tsî a ǃgâi ǁGauǃnâ-ao hîna du a ūhâ ǁkhāba.

11. Jehovaba mati ra ǁgau ǁîb sida di ‘ǁGauǃnâ-aosa’?

¹¹ Jehovab ge sadu di “ǁGauǃnâ-aob” di ra ǂâisen. (Jes. 30:20, 21) ǁÎb ge a ǃnūǃnâxa, ǃgâi tsî ǁnâuǃāxa ǁkhāǁkhā-ao. ǁÎb ge ǁîb studentan ǃnâ ǃgâib ǀguiba ra ôa. (Psa. 130:3) Tsîb ge sida a dī ǁkhā xū-i xa ǃnāsa-e ǂgaoǀkhā tama hâ. ǂÂis ǃnâ ūhâ re, ǁîb ge sadu ǂkhûsa ge kuru ǁnāb ge a ǀō-aisa ǀkhae. (Psa. 139:14) ǁKhāǁkhāsens di turaba da ge ūhâ. Sida Kuru-aob ge ra ǂhâba î da ǀamosib kōse ǁkhāǁkhāsen. Tsî ǁî-i ǃnâ ǃgâiba hō. ǁNās ǀkha î ge kaise a gā-ai ‘turaba’ Elobmîs amab ǃaroma ūhâsa. (1Pet. 2:2) Mîǁguiba dī re, î du Elobmîsa khomai tsî hoaǁae ǁkhāǁkhāsen re. (Jos. 1:8) Jehovab di ǀkhaeb ǀkha du ge ǃgâiba nî hō, ǃnāsase khomais tsî ǁkhāǁkhāsens ǃnâ.

12. Tae-i ǃaroma da Jesub ai sida di ǂâisa ǂnûi, Elobmîsa da ga ǁkhāǁkhāsen o?

¹² ǁAeba ǁamaǂui re, Jesub tsî ǁîb aoǁnâ sîsenni xa ǂâiǂâisensa. Kaise î ge a ǂhâǂhâsa Jesuba ǁgaesa Jehovaba da ga ǃoaba ǂgao o, ǃgōsase nē ǃgom ǁaegu ǃnâ. (1Pet. 2:21) Jesub ge ǁîb di saosabena ge mîba, ǁîn ǃgomsina nî hōǃâsa. (Luk. 14:27, 28) Xaweb ge ge ǂgom, ǁîb di ama saosaben Elob ǃoagu ǂgomǂgomsase nî hâsa ǁîb khami. (Jhn. 16:33) Jesub ûib xa ǁkhāǁkhāsen tsî mîǁguiga dī re, ǁîba tsēkorebē ûib ǃnâ ǁgaesa.

13. Tae-e du Jehovaba nî ǂgan ǀgara? Tsî tae-i ǃaroma?

¹³ ǂAns ǀguis ge ǂâu tama hâ. ǁÎ-i di ǂhâǂhâsasib ge mati i ra hui du sa,î du ǃnāsase Jehovab xa ǁkhāǁkhāsen. Tsî ǀnammi tsî ǂgoms ǀgauga ǁîb ǃnâ omkhâi. (1Kor. 8:1-3) ǁKhāǁkhāsen du ra khami, Jehovaba ǂgan re îb hui du î du ǃnāsase ǂgomsa omkhâi. (Luk. 17:5) ǁÎb ge māsenxase ǁnāti ī ǀgorede ra ǃeream. Ama ǂgoms hîna Eloba ǂans ai ǃgaoǃgaosas ge nî hui du, î du ǃnāsa-e dī.—Jak. 2:26.

14. Apostel Petruba mati ǁkhāǁkhāsen da ra xūn ai sîsens ǂhâǂhâsasiba ge ǁgau? (Ai-īsiba mû re.)

¹⁴ Apostel Petrub ge ge ǁgau, matikōse ī a ǂhâǂhâsasa, î-i Xristub di saosabena ǁkhāǁkhāsenan ra xūn ai sîsen ǀgara. ǁÎb ge Elobmîs ǃnâ hâ ǃnaeǃkhaisa ǃoa ge ǁnaeǁgau, Noaxi xa hâsa. Jehovab ge  Noaxa ge mîba ǁîb ǁgammi dâus ǃnâ-ū ǁnā ǁaeb ǃnâ ge ûi hâ i ǁgai khoena nî hîkākāsa. ǁGammi dâus ra hāsa ǂans ǀguis ge ge ǂâu tama hâ i Noaxi tsî ǁîb omarisa sâusa. Petrub ge ǁaeb ǁgammi dâus nî hās aiǃâs xa gere ǃhoa, “arki gere omhe ǃnubai.” (1Pet. 3:20) Noaxi tsî ǁîb di omaris ge Eloba xūn ge ǁkhāǁkhāsen xū-e ge dī, Arka oms ǃnâ-ū nēb ge kai ǂgauba. (Heb. 11:7) Petrub ge ǁnāpaxu Noaxi ge dī xū-e ǁāǁnâs ǀkha ge ǀgopeǀnō. Xoa rase: “Nē ǁgammi dâus ge ǁāǁnâs sado ra sâus khami ī.” (1Pet. 3:21) ǀGaub ǃnâ da ge a ǀgopeǀnō ǁkhā, nēsi du ǁāǁnâhes ǃaroma ra dī sîsen-e. Noaxi tsî ǁîb omaris ge ǂgui kuriga Arka oms ǀkha a dī sîsenni ǀkha. Mâ sîsen-e du nî dī, î du ǁāǁnâs ǃaroma aiǂhomisen?

15. Ama ǃhobasensa tae-e ǃkhōǂgā hâ?

¹⁵ ǀGui xū-i hîna da ǂgurose nî dī î ge, sida ǁoren ǃaroma ǃhobasensa. (ǃNǃkh. 2:37, 38) Amase da ga ǃhausen, o da ge ǀkharaǀkharana nî dī. Jehovaba ra ǂkhîoǃnâ kai ǁnaetiga du ūbe hâ? Aiǁgause, ǀaib ǃnâ ûis, tabaka-e sîsenūs tamas ka io ǁgai gowaba sîsenūsa. (1Kor. 6:9, 10; 2Kor. 7:1; Efe. 4:29) Nēna du ga dī tama io, sado Elobmîsa ra ǁkhāǁkhā khoe-i tamas ka io ǀhaohâb ǃûi-aogu daoǁgausa ǂgan re. Sadu ǁgûn oms ǃnâ du ga noxoba gara hâ o. ǁÎna ǂgan re în hui du î du ǁgai ǁnaetiga ǀgû, hîna mā-am du tama hâna î du ǁāǁnâhe ǁkhā.

16. Tae-e da nî dī, Jehovaba da ga hoaǁae ǃoaba ǂgao o?

¹⁶ ǂHâǂhâsas tsîna î ge ī, ǃgâise gagasise hoaǁae kōǃgâsensa. ǁNās ge Xristeǁî ǀhaode hâǃnâs tsî ǁîn ǃnâ ǃâ-e ūhâs tsîna ǃkhōǂgā hâ. (Heb. 10:24, 25) ǁNā ûiba ra sâu sîsenni ǃnâ du ga ǃâ-e ūhâ, o du ge ǃnāsase ǁî-i ǃnâ ǃgâiba nî hō. (2Tim. 4:5) ǂKham tsî du ga sadu ǁgûn oms ai ga hâ o, dîsen re: ‘ǂHâbasa-e ti ǁgûn nî ǂâiǂâiǃnâtesa ǀhaode hâǃnâsa? Tamas ka io aoǁnâ sîsenni ǃnâ ǁhaosa? Tamas ka io ta ǁnāsa aitsâma ra dī?’ Aitsamaba xu du ga ǁnāti-i mîǁguiba dī, o du ge sadu ǂgomsa ra ǁgau. Tsî Jehova Eloba ǀnammi tsî ǃgôaǃgâsib tsîna ra ǁgau. Nēn ge “eloǃaoǃgâxasib” ǀgauga, Jehovaba du ra mā  ǀkhaega. (2Pet. 3:11; Heb. 13:15) Māsenxase ra māhe ǀkhaegu ge, Jehovaba ra ǂkhîǂkhî. (ǀGopeǀnō re 2 Korinteǁîn 9:7 sa.) ǁNāti ī xūna da ge ra dī, ǃgâiaǂgao da ra amaga. Jehovaba dī ǁkhā da a ǃgâi xū-e māsa.

17-18. Mâ ǂhâǂhâsa ǀgauba nî hui du, î du ǁāǁnâhes kōse sī ǁkhā? (ǂKhoamîdi 3:3-6)

¹⁷ ǁĀǁnâsa ǃoa du ra aiǃgû khami du ge ǃgomsiga nî hōǃâ. ǀNî khoen ge sadu ǀasa ǂgoms ǃaroma nî mîǁgaiǁgai du. Tamas ka ion ge ǀnîsi mâǃoa dus tsîna nî di. (2Tim. 3:12) ǀNî ǁgai ǁnaetiga ǀûsa du ǃgarise ra sîsen ai hîna du ge ǀnîsi ǁkhawa ǀnî ǁaega ǁî-e sī nî dī. Tamas ka io du ǁaixa tsî nî tsâ sadu di mîǁguiba sīǃnâs kaise a ǃnūsa. Tae-e nî hui du, î du mâǀgai? ǂHâǂhâsa ǀgaub hîna da nî ūhâb ge Jehovaba ǀnamsa.

¹⁸ Jehovaba du ūba hâ ǀnammi ge kaise a îsa ǀgau, hoa ǀgaugu hîna du ūhâ gu ǃnâ. (Khomai re ǂKhoamîdi 3:3-6 sa.) ǁNā-i ge tsâsī tama hâ, hîna ra bē-e ǃgomsiga du gara hōǃâ o. Elobmîs ge ǂgui ǁaegu ai, Jehovab ǁîb ǃoaba-aona ūba hâ ǂgomǂgomsa ǀnammi xa ra ǃhoa. Nēb ge ǃgam tsâsib hîna mā-am tama hâba, î da ǁîba ǁnāxu. (Psa. 100:5) Elob di ai-īsib ǃnâ du ge kuruhe hâ. (Gen. 1:26) Mati du ǁnāti ī ǀnamma a ǁgau ǁkhā?

19. Mati du ǃnāsase Jehovab ge dība du xūn ǃaroma ǃgôaǃgâsiba a ǁgau ǁkhā? (Galateǁîn 2:20)

¹⁹ ǃGôaǃgâsib ǀkha tsoatsoa re. (1Tes. 5:18) Tsēs hoasa dîsen re: ‘Jehovaba mati ǀnamma ge ǁgau te?’ Tsî ǁnās ǃaroma sadu ǀgoredi ǃnâ, ǁîba gangan re. Xūn hînab ge dība du na ǂgai khâis ǃnâ-ū. ǁÎb ǀnamma sado ra mā khami mû re. Apostel Paulub ge ǁnāsa Jehovab xa a mû ǀgaub khami. (Khomai re Galateǁîn 2:20 sa.) Dîsen re: ‘ǁÎb tsîna ta ti ǀnamma ra ǁgau ǂgao?’ Jehovaba du ūba hâ ǀnammi ge nî hui du, î du ǃâitsâga ǂhābe tsî ǃgomsin ǃnâ mâǃkharu. ǁÎ-î ge nî hui du î du gagasi xūna dī ǀgara. Tsî ǁnā ǀgaub ǃnâ-ū sadu ǀhomsi ǁGûba tsēs hoasa ǀnamma ǁgausa.

20. Māǁnâsensa tae-e ǃkhōǂgā hâ? Tsî matikōse i ǁnā mîǁguiba a ǂhâǂhâsa?

²⁰ ǁAeb ǀkha i ge Jehovaba du ūba hâ ǀnamma nî ǂkhâǃnâ du, î du ǀō-aisa ǀgoresa mî ǁkhā. Eloba ǃoa du ge nî māǁnâsen.  ǂÂis ǃnâ ūhâ re, Jehovaba ǃoa du ga mâǁnâsen o du ge ǀō-aisa îsa ǃâubasensa ūhâ ǀamosib kōse Jehovab ǀkha hâsa. Jehovaba ǃoa du ga mâǁnâsen, o du ge ra mîǁgui ǁîba du ǃgâib tsî tsūb ga hâ xawe nî ǃoaba ǀgarasa. ǂHâbasa tama î ge hâ, ǁnā mîǁguiba ǁkhawa dīsa. Ama as ge mâǁnâsen da ga ra o, o da ge ǂhâǂhâsa mîǁguiba ra dī. Nēs xa ǂâi re: ǂGui mîǁguiga du sadu di ûib ǃnâ nî dī, ǀnîn tsîn ge nî ǃgâi i. Xawe du ge nēs xa a ǃgâi mîǁguiba tātsēs tsîna dī ǁoa tide, ǁnās ge Jehovab ai māǁnâsensa. (Psa. 50:14) Satanni ge nî dītsâ sadu ǁGûba du ūba hâ ǀnamma ǂhabuǂhabusa, ǃâubasen hâse ǁîba ǃoa du ǂgomǂgomsase hâ tidesa. Tā mā-am re îb Satanna dan ǁkhā. (Job. 27:5) Sadu ǁGûba du ūba hâ ǃgam ǀnammi ge nî hui du, î du sadu mîǁguiba ǃoa ûi ǁkhā. Tsî hui dus tsîna nî hî sadu ǀhomsi ǁGûba ǃoa ǀgūsa.

21. Tae-i ǃaroma da a mîǁkhā ǁāǁnâs ge ǀuniga tama hâ xawe tsoatsoas ǀguisa ī?

²¹ Jehovaba ǃoa du ga mâǁnâsen toa o, o sadu di ǀhaohâb ǃûi-aogu ǀkha ǃhoa re ǁnāpaxu hâ ǂhâǂhâsa mîǁguiba dīsa. Xawe hoaǁae ǂâis ǃnâ ūhâ re, ǁāǁnâs ge ǀuniga tama hâ xawe tsoatsoas ǀguisa ī. ǀAm tama hâ ûib Jehovaba ǃoabas dib ge ra tsoatsoa. ǁNā-amaga sadu ǁGûba du ūba hâ ǀnamma ǀgaiǀgai re. Mîǁguiba dī re î-i sadu ǀnamma tsēsa xu tsēs ǀkha kai. ǁNāti-i ǀgaub ge nî ǂkhâǃnâ du î du ǁāǁnâs kōse sī. ǁNās ge kaise nî îsa ī tsēsa. Xawe nēs ge tsoatsoas ǀguisa ī. Ab Jehovab tsî ǁîb ǀGôab tsîna du ūba hâ ǀnamma ǀamosib kōse kais ǀguisa di re.