1. ǁGûna tae-e ǁîn ǀgôana ra ǁkhoreba?

 ǁGÛDO ǂan da ge a amabes ǃnâ du ra ǁkhoresa, î du ǀgôana hui Jehovaba ǂan tsî ǀnamsa. Xawe Elob ge a mûhē ǁoasa. Mati du sadu ǀgôana a hui ǁkha, în ǁîba ama khoeb ase mû tsî ǁîba ǃoa ǀgū?—Jak. 4:8.

2. ǁGûna mati ǁîn ǀgôana Jehovab ǀgaugu xa a ǁkhāǁkhā ǁkhā?

² ǂHâǂhâsa ǀgaub hîna da ǀgôana Jehovaba ǃoa ǀgūs ǀkha nî huib ge, ǁîn ǀkha ǀguiba Elobmîs ǁkhāǁkhāsa dīsa. (2Tim. 3:14-17) Xawe Elobmîs ge ǀnî hâ ǀgaub hînan ǂkhamkhoena Jehovab xa a ǁkhāǁkhāsen ǁkhāsa ra ǁgau. ǂKhoamîdi ǂkhanis ǃnâb ge ǁgûba ǁîb di ǀgôaba ra ǂâiǂâiǃnâ, îb tā Jehovab ǀgaugu hîna kurus ǃnâ ra ǁgauhega tātsē ǀuru. (ǂKh 3:19-21) ǀNî ǀgaugu hîna kurus xa hâga da ge nî ǃhoaǃgao, ǁgûn a sîsen-ū ǁkhāga în ǁîn ǀgôana Jehovab ǀgaugu xa ǁkhāǁkhā.

3. Mâ huiban ǁgûna ǀgôana a mā ǁkhā?

³ Elobmîs ge ra mî, ‘ǃhūbaib di kuruhesa xub ge Elob di mûheǁoasa ǂūsiba a ǂhaisa, tsîn ge ǁîb ge kuru xūn ǃnâ ǃgāsase a mûhesa.’ (Rom. 1:20) ǁGûdo, sadu ge ǀnîsi a ǃgâibahe oms ǃauga sadu ǀgôan ǀkha hâsa. ǁNā ǁaeba sîsen-ū tsî sadu ǀgôana hui re în “kuruhe hâ xūn” tsî Jehovab buruxa ǀgaugu ǁaegu hâ ǃgaeǁaresa mû. Hā re î da kō, tae-en ǁgûna Jesub di aiǁgausa xu a ǁkhāǁkhāsen ǁkhāsa.

4. Jesuba mati kurusa sîsen-ū tsî ǁîb di ǁkhāǁkhāsabega ge ǁkhāǁkhā? (Lukab 12:24, 27-30)

⁴ ǃGaoǃgâ re, matib ge Jesuba kurusa sîsenū tsî gere ǁkhāǁkhā ǀgauba. ǀGui ǁaeb ge Jesuba ǁîb di ǁkhāǁkhāsabega  ge ǂan, î gu gora anigu tsî ǃkhāron (blomna) ǃoa kō. (Khomai re Lukab 12:24, 27-30 sa.) Jesub ge mâ xamani-i tamas ka io hai-i xa ga ǃhoa hâ. Xaweb ge ǁîb ǁkhāǁkhāsabegu ǃamkuse a ǂan anin tsî blomdi tsîna ge sîsen-ū. ǁKhāǁkhāsabegu ge ǀnîsi gora aniga ǀgapisegu ra ǁkhana hîna ge mû. Tsî blomna ǃgārob ǃnân ra kai hîna ge mû. Mûnanai re Jesub mati nē xūna ǃoa kō tsî ra ǁnae ǀgausa. Tsî tae-eb ge dī nē aiǁgaudi xab ge ǃhoa toas khaoǃgâ? Jesub ge ǂhâǂhâsa xū-e ǁîb ǁkhāǁkhāsabega ge ǁkhāǁkhā. ǁÎgu di ǀhomsi ǁGûb māxa tsî a khoexaǃnâsa: Jehovab ge ǁîb di ǂgomǂgomsa ǃoaba-aona ǂûmā tsî nî ana. ǃGārob ǃnâ hâ gora anigu tsî blomnab ra dība khami.

5. ǁGûna mâ aiǁgaude kurusa xu a sîsenū ǁkhā, în ǀgôana Jehovab xa ǁkhāǁkhā?

⁵ ǁGûdo Jesub ǁkhāǁkhā ǀgaub di aiǁgausa du nî sao? ǀNîsi du ge sadu di ǀgôa-e, kurus xa du a ǃgâibahe xū-i xa a mîba ǁkhā. Aiǁgause, xamani-i tamas ka io hai-i xa. Nēs xa du sadu ǀgôana ra mîba hîna, ǁguiǃāba nî re tae-en nē xūna Jehovab xa ra ǁkhāǁkhāsa. ǁNāpaxu du ge ǀnîsi nî dî, mâ xamani-i tamas ka io hai-i xa i ǁî-e ǃnāsase a ǃgâibahesa. ǁÎ-i ǃgâiǃgâibasensa ūǃnâ hâ xū-i xa du ga ǃhoa, o î ge sadu ǀgôa-e ǂōrisase nî ǃgâ du. ǁÎ-e du ga Jehovab xa a ǁkhāǁkhā o.

6. Tae-e da Christopheri mamasasa xu a ǁkhāǁkhāsen ǁkhā?

⁶ ǂHâbasa-e ǁgûn kai ǁaeba sîsen-ū tsî ôaǃnâsa nî dīsa, xamani-i tamas ka io hai-i tae-e Jehovab xa ra ǁkhāǁkhāsan nî ǃhoaǃgaos aiǃâ? ǁNās ge ǂhâbasa tama hâ. Jesub ge gaxu ǁguiǃāsa ge mā tama hâ i. Mati gu gora aniga ra ǂû ǀgaus tamas ka ion blomna ra kai ǀgausa. Sadu ǀgôa-i ga ǀnî ǁaega ǃgâibahe o ǃgamse Jehovab ge kuru xūn xa ǁkhāǁkhāsensa. Xawe î ge ǀnî ǁaega supu ǁguiǃās tamas ka io dîsa ǂâu hâ sadu ǀgôa-e huisa î-i ǁnâuǃā. Kō re, tae-eb ǃgâsab Christophera ra ǂâi hōsa ǁîb ǂkham tsēde xu: ‘Sida mamas ge supu ǀgaub ǃnâ gere hui da, î da sida ǂnamipe hâ kurusa ǃgôaǃgâ. Aiǁgause, ǃhomgu xōǀkhā da gere sī os ge gere mî, kō re matikōse gu nē ǃhomga a kai tsî a îsasa. Jehovab ge kaise a buruburuxa.’ Tamas ka ios ge hurib xōǀkhā da gere sī o gere mî, ‘kō re matikōse gu ǁnā hurib ǃgabiga a ǀgaisa ǀgausa. Elob ge kaise ǀgaisa amae?’” Christopheri ge ra mî: “ǁNāti ǃgupu tsî supu dîdi ge, kai sîsenǂuiba sîda ai ge ūhâ i.”

7. Mati du sadu ǀgôana a ǁkhāǁkhā ǁkhā în kurus xa ǂâiǃgâ?

⁷ Sadu ǀgôan ra kai khami du ge a ǁkhāǁkhā nî ǁkhā. În kurus xa ǂâi tsoatsoa tsî Jehovab ǀgagu xa ǁkhāǁkhāsen. ǀGui xu-i Jehovab ge kuru i xa du ge a ǃhoa ǁkhā. Tsî du ge sadu ǀgôana a dî ǁkhā, “nē xū-e tae-e Jehovab xa ra ǁkhāǁkhā du?” ǀNîsi du ge nî buru tsî nî ǃgâiaǂgao kai-e, ǁnâu du ga o tae-en sadu ǀgôana ra ǂâisa.—Mat. 21:16.

8. Israelǁaes ǁgûna mâ ǃēsa ge ūhâ i, daob ain gere ǃgû o?

⁸ Israelǁaes ǁgûn ge ge mîbahe, în ǁîn di ǀgôana Jehovab di mîmāde “daob” ain ga ǃgû o ǁkhāǁkhā. (Deu. 11:19) Israeli ǃgāro ǃhūb ǃnâ gu ge daoga ge ǁgoe ī. ǃKharagaǃnâgu xamanin, anin tsî hain tsîn ge ge mûhe ǁkhā i. Israelǁaes omaris ge ǃēsa ge ūhâ i, daob ain gere ǃgû-o Jehovab ge kuru xūn xa ǁîn ǀgôan  ǀkha ǃhoasa. ǁGû du tsîn ge ǀnîsi ǁkhā ǃēde ūhâ kurusa sîsenū tsî sadu ǀgôana ǁkhāǁkhāsa. Kō re, matin ge ǀnî ǁgûna nēsa a dī ǀgauba.

9. Tae-e du Punithas tsî Katya ha ra xu a ǁkhāǁkhāsen ǁkhā?

⁹ Punitha di ǀonhâ ǁgûs, hîna Indiab ǃnâ kai ǃās ǃnâ ǁan hâs ge ra mî: “Sida ǀaokhoena da ga ǃgāro ǃhūb ǃnâ sī gara sari, om ge ǁnā ǃēsa sîsenū tsî sîm ǀgôana Jehovab di buruxa kurus xa ra ǁkhāǁkhā. Tita ge ra tsâ, tî ǀgôan kurus xa ǃamkuse ra ǁnâuǃāsa. Kai ǃās di ǀkhomab tsî ǂhubiba xūn ga ǃnūse hâ o.” ǁGûdo sadu ǀgôan ge tātsēs tsîna ǀguru tide, ǁîn ǀkha du ge ǀguiba îxa ǃkhaib ai hâ i ǁaeba. ǃGâsas Katyas Moldovab dis ge ra mî: “Ti ǂkham tsēdi xa ta ge ǃgāsase ra ǂâi-ao, ǁaeb ti ǁgûra ǀkha ta ge ǃgāro ǃhūb ǃnâ gere hâba. Kaise ta ge ra ǃgôaǃgâ ti ǁgûra ge ǂkhamsisa xu a ǁkhāǁkhātesa, î ta ǁaeba ǁamaǂui tsî Jehovab ge a kuru xūna kō. Tsî ǁîb kurus ǃnâ-ū ǁîba mûsa.”

10. ǁGûna tae-e a dī ǁkhā kai ǃāsa xu ǃnaris xan ga ǃgombahe o? (Boksisa mû re, “ Huib ǁgûn ǃaroma”)

¹⁰ ǃGāro ǃhūba ǃoa du ga ī ǁoa io, o du tae-e a dī ǁkhā? Amoni hîna Indiab ǃnâ ra hâb ge ra mî: “Tita ra hâban ge ǁgûna, gaxu īrga ra sîsen. Tsî î ge kai marisa a ǂan ǁkhā, ǃgāro ǃāsa ǃoa ǃnarisa. Xawe da ge îsa ǂkhari ǃhanab tamas ka io oms ǂamǃnâb ǃnâ-ū Jehovab di kurusa a kō tsî ǁîb ǀgaugu xa a ǃhoa ǁkhā.” Sadu oms ǀgūse du ga ǃamkuse kō o, o du ge ǂgui xūn kurus dina nî mû. ǀGôana du a ǁgau ǁkhāna. (Psa. 104:24) ǀNîsi du ge anin, xoxoron, hain tsî ǃnāsana a hō ǁkhā. Karinas hîna Germanib ǃnâ ra hâs ge ra mî: “Ti mas ge blomna a ǀnam. ǂKhariro ta a hînam ge mâǁaeb hoaba gere ǃgûǂoa o, os  ge îxa blomna gere ǁgaute.” ǁGûdo, sadu tsîn sida ǀapeǂhomis xa a ǁgâisa ǂgui vidiogu tsî ǂkhanin hîna kurus xa hâna sîsenū tsî ǀgôana a ǁkhāǁkhā ǁkhā. Mâpa ǀgui du ga hâ xawe du ge ǀgôana a hui ǁkhā, în Jehovab ge a kuru xūna ǃoa kō. Hā re î da ǀnî ǀgaugu Jehovab di ga ǃhoaǃgao, ǀgôana du a ǁgau ǁkhāga.

11. ǁGûna mati ǁîn ǀgôana a hui ǁkhā, în Jehovab ǀnama mûǂan?

¹¹ Sadu ǀgôana du ga Jehovab ǀnammi xa ga ra ǁkhāǁkhā. O du ge xamanin ǁîn ǀnamǀnamsana ra kōǃgâ ǀgauba nî ǁgau nî. (Mat. 23:37) Kurus ǃnâ hâ buruxa ǃkhargaǃnâgu xūn hîna, ra khoakhoadan tsîna du ge a ǁgau ǁkhā. Karina’s hîna go aiǃgâ goro ǃhoaǃgaohes ge ra mî: “ǃGûǂoa ta gere, os ge ti masa gere ǂkhâǃnâte. Î ta mâ tsî kō matis mâ bloms hoasa a ǀō-aisasa. Tsî i ǁî-i îxasiba mati Jehovab ǀnamma ra ǁgausa. Kurina ǃkharu tsî da ge noxoba ǂōrisase, blomna ǃoa ra kō. ǁÎn di ǃkharagaǃnâgusib, kurus tsî kleuran tsîna. ǁÎn ge ra ǂâiǂâiǃnâte ǀgara, matikōseb Jehovaba sida a ǀnamsa.”

12. ǁGûna mati ǀgôana a hui ǁkhā, în Elob gā-aisib mûǂan? (Psalmdi 139:14) (Ai-īsiba mû re.)

¹² Sadu ǀgôana hui re în, Elob gā-aisiba mûǂan. Jehovab ge ǃnāsase sada xa a gā-ai. (Rom. 11:33) Aiǁgause, du ge sadu di ǀgôa-e a mîba ǁkhā. Mati i ǁgamme ǀhomma ǃoa khâi tsî ǁgamme kuru tsî i ǁnā ǁgamme nau ǃkhaisa xu nau ǃkhais ǀkha supuse ra ǃhoesa. (Job. 38:36, 37) ǁÎn tsîna du ge a mîba ǁkhā, khoe-i soros kuruhe hâ ǀgaub a buruxasa. (Khomai re Psalmdi 139:14 sa.) Kō re matib ge ǁgûb Vladimir di ǀonhâba, ǁnāsa a dī ǀgausa. ǁÎb ge ra mî: “ǀGui tsēb ge sîm ǀgôaba, ǀurihāba xu ǁnā tsî ge tsû. ǀNî tsēdi khaoǃgâ i ge ǁîb ǀhapisa ge ǂau. Tita tsî ti taras tsîn ge ǁîba ge mîǃāba, Jehovab ge sida sorode aitsama ǂaus di ǁkhāsib ǀkha ge kuru. ǁÎbam ge ge mîba, ǁnāti ī xū-i xare-e da ge khoen ge kuru xūn ǃnâ mû tama hâ. Aiǁgause, audos ge tsūkēǃgâb khaoǃgâ aitsama a kuru-ūnusen ǁoa. Nēb ge ǃkharuǃnâ xū-i ge sîm ǀgôaba ge hui, îb Jehovab di gā-aisiba ǁnâuǃā.”

13. Matin ǁgûna ǁîn ǀgôana a hui ǁkhā, în Elob ǀgaiba mûǂan ǁkhā? (Jesajab 40:26)

 ¹³ Jehovab ge ra ǁkhauda, î da ǀhomma ǃoa kō. Tsî ǂâi matib ǁîb di buruxa ǀgaiba, hoa ǀgamirode hâ di nî ǃkhais ǃnâ ra ūhâ ǀgarasa. (Khomai re Jesajab 40:26 sa.) Sadu ǀgôana du ge a ǂkhâǃnâ ǁkhā, în ǀhomma ǃoa kō tsî mûn ta xūn xa ǂâiǃgâ. Kō re tae-es Tingting di ǀonhâ ǃgâsas Taiwan nî ǃnâ ra hâsa, ǁîs ǂkhamsis tsēdi xa ra mî ǀgauba: ‘ǀGui tsēm ge ti mâ hâma sī ge kamp. Tsîm ge ǂgui ǀgamirode ǀhom-aib ai ge mû ǁkhā i. Kai ǃās hîna ǂgui ǃnâdi xa ǀoahe hâs ǃnâm ge hâ tama hâ i amaga. ǁNā ǁaeb ǃnâ ta ge gere ǂâiǂhansen ǂgomǂgomsase da hâ ǁkhā tide di. Ti klas ǃnâ ge hâ i, axan gere ǃgomǃgombate amaga Jehovab ǃoagu ǁnâuǀnamxase hâsa. Ti mas ge ge ǂkhâǃnâte î ta Jehovab di ǀgaib xa ǂâi hînab ge hoa ǀgamirode a kuru-ūba. Tsî ǂâis ǃnâ nî ūhâsa ǁîb ǁkhā ǀgaib tsîna a sîsenū ǁkhāsa, tita huisa î ta mâ ǃkhâitsâ i hoa-i ǃnâ mâǀgai ǁkhā. ǁNā ǁaeb ǃnâ ta ge kurus xa a mû xūn ge ge ǂkhâǃnâte, î ta Jehovaba ǃgâisa ǂan. Tsî ti mîǁguiba ge ge ǀgaiǀgai î ta ǁîba ǃoaba ǀgara.

14. ǁGûna mati kurusa a sîsenū ǁkhā, ǀgôana ǁkhāǁkhāsa Jehovab a ǂkhîxa Elosa?

¹⁴ Jehovab ge kuru xūn ge ra ǁgau, ǁîb a ǃgâiaǂgaoxa Elosa. Tsîb ge ǂhâba hâ î da sida tsîna ǃgâiaǂgao. Ôaǃnâsa ra dī khoegu ge ge mû, ǃnāsa xamanin ra ǀhurusa. Aiǁgause, ǀhôan tsî ariron khami. (Job 40:20) Xamanin ra ǀhuru ǀgauban ra kō hînan sadu ǀgôana ra âi? ǀNîsin ge ge mû, ǀhôaros bolsa ra sauru hîna. Tamas ka io ariron hîna ǀguiba ra ǀhuruna. Saora ǃnāsi i ga sadu ǀgôana, nēti ī xūn ǃaroma ga ra âi o. Tae-i ǃaroma du ǁîna ǂâiǂâiǃnâ tama hâ, ǃgâiaǂgaoxa Eloba da ra ǃoabasa?—1 Tim. 1:11.

15. Tae-e ǁgûna a hui ǁkhā, în ǁîn ǀgôan ra ǂâi xūn xa ǂan? (ǂKhoamîdi 20:5) (Ai-īsiba mû re.)

¹⁵ ǀNî ǁaegu ain ge ǁgûna ǃgoma ra hōǃâ, ǁîn ǀgôana ǁîn tsâsigu xa ǃhoa kaisa. ǁNāti ī mâsib ǃnâ du ga hâ o, o du ge nî dītsâ  ǂansa sadu ǀgôan ra ǂâi ǀgaub xa. (Khomai re ǂKhoamîdi 20:5 sa.) ǀNî ǁgûn ge ra mûǂân, ǁîn ǁnāsa supuse a mûǁkhāsa. Kurus ǃnân ǁîn ǀgôan ǀkha ǀguiba ǃgâiba ra hō hîna. Tae-i ǃaroma? ǀGui ǃaromas ge ǀoro xūn ge hâ, hîna ǁgûn tsî ǀgôan di ǂâisa a ǂgae ǁkhana. ǀGui ǁgûb Masahikob ti ǀon hâb hîna Taiwan nî ǃnâ ra hâb ge ǀkhara ǃaromasa ra mî: “Oms ǃauga da ga sida ǀgôan ǀkha ga hâ ǀhao o. Aiǁgause, ǃhomgu tamas ka io hurib xōǀkhā ǃgûsa. On ge ǁîna ǃnomsase ra tsâ. O î ge sîma ra supuba ǁîna dî tsî ǁîn ǂâis ǃnâ hâ xūn xa ǂansa.” Katyas hîna ais ai ra ǂaihes ge ra mî: “Skoli khaoǃgâs ge ti masa tita îsa parka ǃoa gere ī-ū. ǁNāti i ǃomsa ǃkhaigu tawa î ge ge supubate i, ǁîsa mîbasa tae-i ge skoli tawa gere īsa tsî tita ra ǂkhanisa.”

16. Omaride mati kurusa a sîsenū ǁkhā, ǃnomsase hâs tsî ǁkhoaxa ǁaeba ūhâs ǀkha?

¹⁶ Omaridi ge Jehovab di kurus ǃnâ ǃgâiba ra hō, ǀguiban ga nēsa a ôaǃnâ o. Tsî ǃomasase a hâ ǁkhā. Nēs ge nî hui în ǃnāsase ǀnamgu. Elobmîs ge ra mî, “ǁaeb âis dib tsî ǁaeb ǂnās dib” ge hâ. (Aoǁn. 3:1, 4) Jehovab ge îsa ǃkhaiga ge kuru, hîna da sida a ǀnam xūna dīs ǃnâ a sîsenū ǁkhāga. ǂGui omaridi ge ǀguiba ǃgāro ǃkhai-i ai sī hâs tamas ka io hurib aisi hâs xa a ǃgâibahe. ǀNî ǀgôan ge a ǀnam, parki ǃnâ ǀhurusa tsî xamanina kēsa. Tams ka io ǃāb ǃnâ sī tsâsa. ǂGui ǃēdi ge hâ, Jehovab ge kuru xūn ǃnâ ǃgâiba hōǁkhās diba.

17. ǁGûna tae-i ǃaroma ǁîn ǀgôana nî hui, în Elob kurus ǃnâ ǃgâiba hō?

¹⁷ Elob di ǀasa ǃhūbaib ǃnân ge ǀgôan tsî ǁgun tsîna nēsin ǃgâiba a hō ǁoa ǀgaub ǃnâ, Elob di kurusa xu ǃgâiba nî hō. Nētsēs khami da ge ǃaromasa ūhâ tide xamanina ǃaosa tsîn ge ǁîn tsîna sida ǃao tide. (Jes. 11:6-9) ǀAmosib kōse da ge Jehovab ge kuru xūn ǃnâ ǃgâiba a hō ǁkhā. (Psa. 22:26) Xawe ǁgûdo, tā ǁnā ǁaeb kōse ǃâu re, sadu di ǀgôana huisa în kurus ǃnâ ǃgâiba hō. Kurusa du ra sîsenū hîna sadu ǀgôana Jehovab xa ǁkhāǁkhāsa, on ge ǁîna Gao-aob Davib ge mî xū-e nî ǃkhō-am tsoatsoa: ‘Jehova, ǀgui-i di sîsengu tsîn ge sagu ǀkha a ǀgopeǀnōhe ǁoa.’—Psa. 86:8.