1. Tae-en khoena ra mûǃā, ǂguro ǃnās asen sida ǀhaode ra hâǃnâ o? (Ai-īsiba mû re.)

 ǂÂI re ǃgamme hâ khoera hîna, ǂguro ǃnāsa Jehovab di ǃoaba-aon di ǀhaosa ra hâǃnâ ra. ǁÎra ge ra tsâǀkhāhe ǁkhoreǁharehe ra ge ǀgaus xa. Tsî khoen ǁaegu hâ ǀnammi xa. Omsa ǃoa ra, ra oa hînas ge tarasa ǁîs aoba ra mîba, ‘xū-i ge hâ Jehovab ǃoaba-aona ra ǀkhara kaihe nau khoena xu.’

2. Tae-i xan ge ǀnîna ǃnôa kaihe?

² ǀNammi hîna Jehovab khoen ǁaegu hâb ge kaise a ǀō-aisa. Ama as ge Jehovab di ǃoaba-aon ge ǀoasa kurusa ūhâ tama hâ. (1Jhn. 1:8) ǃNāsase ǁnān hîna ǀhaohâb ǃnâ hâna da ra ǂan, khama da ge ǁîn di dīsāte nî mûǃā. (Rom. 3:23) Tsûtsûsasen ge ǀnîna ge mā-am în naun ǀoasaoǃnâsiba ǁîna ǃnôa kai.

3. Tae-e ra ǁgau, mân a Jesub di ama saosabe ǃkhaisa? (Johaneb 13:34, 35)

³ ǁKhāwa kō re nē ǁkhāǁkhāǃâs di dana xoasa. (Khomai re Johaneb 13:34, 35 sa.) Matin khoena ama Xristeǁîna a mûǃā ǁkhā? ǀNammi ǃnâ-ū. Jesub ge ge mî tama hâ- i, ‘nēs ǃnâ-ū du ge nî ǂan, ti ǁkhāǁkhāsabe du a ǃkhaisa.’ ǁÎb ge ge mî: ‘Nēs ǃnâ-ūb ge ǃhūbaiba nî mûǂan, ti ǁkhāǁkhāsabedu a ǃkhaisa.’ Jesub ge ǁnās ǃnâ-ū ge ǁgau,  ǁîb ǁkhāǁkhāsaben ǀguin ose. Xawe ǀhaohâb ǃauga hâ khoen tsîn nî mûǂan ǃkhaisa, ǁîb ama saosaben ūba gu hâ ǀnamma.

4. Tae-en ǀnîna ama Xristeǁîn xa ra ǂan ǂgao?

⁴ Jehovab di ǃoaba-ao tama khoen ge ǀnîsi a dî ǁkhā: ‘Matib ǀnamma a huida ǁkhā, Jesub di ama saosabena mûǂansa? Matib ge Jesuba ǁîb apostelgu ǃoagu ǀnamma ǁgau? Tsî īǁkhā-e Jesub aiǁgausa nētsē ǁgaesa?’ Sida ǁāǁnâsa ǃoaba-ao da tsîn ge ǁnā dîdi ǃereamde nî ǂâiǃgâ. ǁNāsa dīs ge nî huida, î da ǀoasase ǀnamma ǁgau sada ǁaegu hâ ǃnubisiga da ga sîsenǂam o.—Efe. 5:2.

5. ǁGuiǃā re, Jesub mîdi hîna Johaneb 15:12, 13 ǃnâ ra hō-e te.

⁵ Jesub ge ge ǃgāsa kai, ǁîb saosaben ǀō-aisa ǀgaub ǃnâ nî ǀnamgusa. (Khomai re Johaneb 15:12, 13 sa.) Jesub ge ge mîmā gu: “ǀNamgu re, tita ge sago ǀnam hâ i khami.” ǁNāsa tae-e ra ǂâibasen? Jesub ge ra ǁguiǃā, nauna ǃnāsase ǀnamsa aitsama ǀnamsens xa. Tamas ka io ǀnammi hîna Xristeǁî-e ǂkhâǃnâs tsîna a di ǁkhā-e, ǂhâbasa i ga o ǁî-i ǃgâsa-i ǃaroma ǁōsa. b

6. Elobmîsa mati ǀnammi di ǂhâǂhâsasiba ra ǁgau?

⁶ Elobmîs ge ra ǁkhāǁkhā da, ǀnammi kaise a ǂhâǂhâsasa. Aiǁgause, ǂgui khoen ge saora xoadi xa a ǃgâibahe: “Elob a ǀnam.” (1Jhn. 4:8) “Sa ǀgūkhoe-ets ge sats ǁkhāts khami nî ǀnam.” (Mat. 22:39) “ǀNammi ra ǂgui ǁorena ǃgū-ai.” (1Pet. 4:8) “ǀNammi ge tātsē ǀuni tideba.” (1Kor. 13:8) Nē xoadi tsî ǀkharan tsîn ge ra ǁgau da, kaise i a ǂhâǂhâsasa nē îxa ǀgauba ǁgauǂuisa.

7. Satana tae-i ǃaroma khoena a ǁkhāǁkhā ǁoa, în ǀguiǃnâxa tsî ǀnamgu?

 ⁷ ǂGui khoen ge ra dî: ‘Mati i a īǁkhā ama ǂgomsa mûǃāsa? Hoa ǂgomdi ge ra mî ǁîn amaba ra ǁkhāǁkhāsa. Xawes ge mâ ǂgoms hoasa Elob xa ǀkhara xū-e ra ǁkhāǁkhā.’ Satanni ge ǂgui ama tama ǂgomde ge kuru. Tsî ǁnā î ge khoena ra ǃgom kaiba, ǂansa mâs a ama ǂgomsa. Xaweb ge tātse ǃhūbaib ǂhawase hâ Xristeǁî ǃgâsan hîna a ǀnamguna a ǀhaoǀhao ǁoa. Jehovab ǀguib ge ǁnāsa a dī ǁkhā. ǁNās ge a ǁnâuǃāxa, ama ǀnammi Jehovaba xu ra hā amaga. ǁNān hîna Jehovab di gagab tsî ǀkhaeba ūhân ǀguin ge ama ǀnamma ǁîn ǁaegu ūhâ ǁkhā. (1Jhn. 4:7) ǁNā-amagab ge Jesuba ge mî, khoen nî ǁîb di ama saosabena ǂanǂuisa ǁîn ūba gu hâ ǀnammi ǃnâ-ū.

8-9. Matin ge ǀnîna tsâǀkhāhe, ǀnammi hînan ge Jehovab ǃoaba-aon ǁaegu a mûb xa?

⁸ Jesub ge mî khami î ge ǂguina, ǁîb di saosaben ūba gu hâ ǀnammi ǃnâ-ū ra mûǃāhe. Aiǁgause, Ian di ǀon hâ ǃgâsab ge ǁîb ge ǂgurose a hâǃnâ ǀkharib kai ǀhaos xa ra ǂâi oa. Hîna ge ǂgās tawa a dīhesa, ǁîb oms di ǁanǁhuib ǃnâ. Ian nî ge ǂgui ǁkhâga ǃkharu tsî ǁnā ǂgās tawa sī ge hâ i. ǁÎb ge ra mî: “ǀKharib kai ǀhaos tawa ge hâ i khoen ge ǀkhara ti gere tanisen, ǀhurub tawa ge hâ i khoen xa. Jehovab di ǃoaba-aon ge ge khoexaǃnâ ī. Tsî ǃamku ǀgaub ǃnâ ge ana hâ i. ǁÎn ǀgôan tsîn ge ǃgâi ǀgaub ǃnâ gere tanisen.” ǁÎb ge ǀaro tsî ra mî: “Hoan ǂam-ain ge nē khoena ūn hâ xūn ǀkha ge ǂâu hâ i tsî ǂkhîse gere mûsen. ǁNā-e ta ge ti ûib ǃnâ gere ǂhâba. ǁNā tsēs ai gere māhe ǃhoate ta ge ǂâihō tama hâ. Xawe ta ge Jehovab di ǃoaba-aon gere tanisen ǀgauba noxoba ra ǂâihō.” c ǁNā tanisen ǀgaub ge ūba gu da hâ ama ǀnammi xa ra ǃaromahe. Sida ǃgâsana da a ǀnam amaga da ge ǁîna khoexaǃnâsib tsî ǃgôasib ǀkha ra hâ-ū.

⁹ John di ǀon hâ ǃgâsab ge ǁkhā ǀgaub ǃnâ gere tsâ, ǂguro ǃnāsab ge ǀhaode hâǃnâ tsoatsoa o. “Tita ge ǁnāpa ge hâ i . . khoen di khoexaǃnâsib xa ge tsâǀkhāhe. ǁÎn ge kaise ge ǃgâi-i. Tita ge ge ǂâi ǀoasa kurusan ūhâ di. ǁÎn di ama ǀnammi ge ge ǂgom kai te, ama ǂgomsa ta ge hōsa.” d Nēn tsî nau xūn ge ra ǁgau, Jehovab di ǃoaba-aon a ama Xristeǁîsa.

10. Mâǁaeb ai da ǃēsa ūhâ, Xristeǁî ǀnamma ǁgausa? (ǀGamirosa khomai re.)

¹⁰ ǀNai go mîhe hâ i khami, î ge Jehovab di ǃoaba-aon hoana ǀoasa kurusa ūhâ tama hâ. ǀNî ǁaegu ain ge ǁîna, xūn hîna ra tsûtsûda na mî tsî a dī ǁkhā. e (Jak. 3:2) ǁNāti ī mâsib ǃnâ da ge ǃēsa ūhâ, sida Xristeǁî ǀnamma ǁgausa tanisen da ra ǀgaub ai. ǁNāti î ga īo, o da tae-e Jesub di aiǁgausa xu a ǁkhāǁkhāsen ǁkhā?—Jhn. 13:15.

11. Jakobub tsî Johaneb tsîkha mâ ǁgai ǀgauga ge ǁgau? (Ai-īsiba mû re.)

¹¹ Jesub ge ǁîb di saosabega xu ǀoasa kurusa ge ǃâubasen tama hâ i. Xaweb ge ǀnamxaǃnâse ge hui gu, î gu ǁîgu di ǂkhabusasin ai sîsen. Tsî ǀkharaǀkharana dī  Jehovaba nî ǂkhî kaina. ǀGui ǁaeb ai kha ge Jakobub tsî Johaneb tsîkha ǁîkha mamasasa ge ǂgan, îs Jesuba dî īkha ǀgapi ǃkhai-e Gaosib ǃnâ māhe ǁkhā. (Mat. 20:20, 21) Jakobub tsî Johaneb tsîkha ge dī xū-i ge ge ǁgau, ǁîkha a ǀgapiǂâixasa tsîkha nau gu xa ǂhâǂhâsa gere mûhe ǂgaosa.—ǂKhm. 16:18.

12. Jakobub tsî Johaneb tsikha ǀgui kha ǁgai ǀgauba ge ǁgau? ǁGuiǃā re.

¹² Jakobub tsî Johaneb tsikha ǀgui kha ge ǁgai ǀgauga ge ǁgau tama hâ i. Kō re nau apostelgu ge tanisen ǀgauba: “Tsî nau disigu ge nēsa a ǁnâu, o gu ge kaise Jakobub tsî Johaneb hâkha ai ge ǀara.” (Mat. 20:24) Mûnan-ais ǀguisa da ge a di ǁkhā, Jakobub tsî Johaneb tsîn mati nau apostelgu ǀkha ǀgaisase gere ǂnôagusa. ǀNîsi gu ge nau ga nēti-ī xū-e ge dî: ‘Ham go di go ǂâisen hâ, ǀgapi ǃkhaihe gu gaosib ǃnâ ra ǂanbasen o? Sakho ǀguigo ge Jesub ǀkha ǃnarise ge sîsen tama hâ i. Sige tsîn ge anu hâ sago khami ǀgapi ǃkhai-e hōsa.’ Mati gu ge mî tsî a ǂâi xawe gu ge ǁnā ǃnās ai ge ǀuru, ǀnammi tsî khoexaǃnâsiba ǁgaugusa.

13. Jesuba mati ǁîb di apostelgu di ǃnūbusigu ǃoagu gere tanisen? (Mateub 20:25-28)

¹³ Jesuba nē mâsib ǃnâ tae-e ge dī? ǁÎb ge ge ǁaixa tama hâ i. ǁÎb ge ge mî tama hâ i, ǀkhara ǃgâi apostelgab sī ra ôa ti. Khoegu hîna ǃgamǃgamsenxasiba ūhâ gu  tsî ǀnammi ǃnâ nî hâ-ū gu ga. Xaweb ge Jesuba ǁîgu ǀkha ǃnūǃnâxasib ǀkha gere ǃhoa, ǂan-i ge ī amaga ǁîgu ǂhanu xū-e ra dī ǂgaosa. (Khomai re Mateub 20:25-28 sa.) Jesub ge apostelga hoaǁae khoexaǃnâse gere hâ-ū. ǂGui ǁaegu ai gu tarib ǁîgu ǁaegu, a ǂhâǂhâsa ǃkhais xa gere ǂnôagu xawe.—Mrk. 9:34; Luk. 22:24.

14. Jesub apostelga mâ mâsib ǃnâ ge kaikaihe?

¹⁴ Jesub ge apostelgu ge kaikaihe ǀgauba ǂâis ǃnâ ge ūhâ i. (Jhn. 2:24, 25) ǁNā ǁaeb di ǂgoms ǂgaeǂgui-aogu ge khoena gere ǁkhāǁkhā, ǂoaǂamsa ǃkhaisan ga ūhâ. O ǀguin a ǂhâǂhâsasa. (Mat. 23:6) Jodeǁîn ǂgomdi ǂgaeǂgui-aogu tsîn ge ǁîgu nau khoen xas tsîna a ǂhâǂhâsa di gere ǂâi. f (Luk. 18:9-12) Jesub ge ge ǁnâuǃā nē ǂâi ǀgaub apostelgu, ǁîgu xa tsî nau khoen xa gu ra ǂâi ǀgauba nî tsâǀkhāsa. (ǂKhm. 19:11) ǁÎb ge ǁîb apostelgu tātsē nî dīsasa ge ǃâubasen tama hâ i. Tsî ǁîgu ǀkha ge ǃnūǃnâxa ī dīsāgu gere o. ǁÎb ge ge ǂan-i ǁîgu ǂgaogu ǃnâ gu ge, ǃgâiba gere dī ǂgaosa. ǁNā-amagab ge ǃnūǃnâxasib ǀkha gere hui gu, ǁîgu ǀgapiǂâixasiba sîsenǂamsa tsî ǀnammi ǀkha ǃkhōǃkhunisa.

15. Tae-e da Jakobub, Johaneb tsî nau apostelgu ǀkha ge ī xū-e xu a ǁkhāǁkhāsen ǁkhā?

¹⁵ Jakobub tsî Johaneb tsîn ǀkha ge ī xū-e xu da ge ǃnāsase a ǁkhāǁkhāsen ǁkhā. ǂHanu tama î ge ge hâ i, Jakobub tsî Johaneb tsîkha Jesuba ǂhâǂhâsa ǃkhaihe Gaosib ǃnâ ǂanbasensa. Xawe nau apostelgu tsîn ge ǂhanuse ge dī tama hâ i, ǁnā mâsiba gu ge mā-am o î-i ǁîgu ǀguiǃnâxasiba tsâǀkhāhe. Xawe Jesub ge hoa 12 apostelgu ǃoagu khoexaǃnâ tsî ge ǀnamxaǃnâ i. Tae-e da ra ǁkhāǁkhāsen? ǂHâǂhâsa a ǃkhais ge nau khoen ra dīsā xūn ǀguin ose xawe mati da ǁîn ǃnūbusigu tsî dīsādi ǃoagu ra tanisen ǀgaub tsîna. Tae-e a huida ǁkhā? Sida ǃgâsa-i ǀkha da ga ǁaixa, o da ge a dîsen ǁkhā: ‘Tae-i ǃaroma i ǁî-i go dī xū-e ǁnātikōse ra ǁaixa kaite? ǁGai ǀgaub hîna ta nî sîsen aiba ī ra ǁgauǂui? Īǁkhā-e khoe-i hîna go ǁaixa kaite i ǃgomsiga ūhâsa? ǃGâi ǃaromas ǁaixas disa da ūhâ khami da ga ra tsâ xawe da ǀnamma ǁgau tsî ǁnā khoe-e ǀûba ǁkhā?’ ǀNamma da ga ǁgaugu o da ge ra ǁgau, Jesub di ama saosabe da asa.

16. Tae-i tsîna da Jesub di aiǁgaus xu a ǁkhāǁkhāsen ǁkhā?

¹⁶ Jesub di aiǁgaus tsîn ge ra ǁkhāǁkhā da, î da dītsâ tsî sida ǃgâsana ǁnâuǃā. (ǂKhm. 20:5) Jesub ge ǂgaoga ge khomai ǁkhā i, sida ose. Sida ǃgâsan ga ǁaiǁai da, o da ge ǁîn ǀkha nî ǃnūǃnâxa. (Efe. 4:1, 2; 1Pet. 3:8) ǁNāsa dīs ge nî supu, khoe-i di khaoǃhūb xa da ga ǂan o. Saora aiǁgausa kō re.

17. ǀGui ǃnarimâra mûǂam-aoba mati ǃgâiba ge hō, ǁîb di ǃgâsaba ǃgâise ǂans ǃnâ-ū?

¹⁷ ǃNarimâra mûǂam-aob ge oost Afrikab ǃnâ gere ǃoaba, ǀhaohâb ǃnâ ge hâ i ǃgâsab xa ra ǂâihō. ǂGurob ge gere ǂâi nē ǃgâsab ge khoexaǃnâ tama hâ isa. ǃNarimâra mûǂam-aoba mati ge tanisen? ǁÎb ge ra mî: “Nē ǃgâsaba xu ǂgōsens xa da  ge ge mîǁgui ǁîba ǃnāsase ǂansa.” ǃNarimâra mûǂam-aob ge nē ǃgâsab ǀkhab ra hâ ǀhao hîna ge ǁkhāǁkhāsen. Mati-i nē ǃgâsab ge kaikaihe ge ǀgauba, nau ǃgâsan ǀkhab ra hâ ǀgauba ra tsâǀkhāsa. ǁÎb ge ǀaro tsî ra mî: “ǂAnǂui ta ge o matikōse î ge ǁîba ǃgomba isa, ǂhâbasa ǀkharaǀkharana dīsa îb nau ǃgâsan ǀkha ǁnâugu. Tsî ǀnaib ge dī ǀkharaǀkharana, o da ge ǃnāsase ǁîba ge ǃgôaǃgâ. ǃGâi ǀhōsa kai kham ge ge.” Dītsâ tsî da ga sida ǃgâsana a ǁnâuǃā o, o î ge nî supuba da ǁîna ǀnamma ǁgausa.

18. Sida ǃgâsa-i xa da ga tsûtsûhe o, o da mâ dîde a dîsen ǁkhā? (ǂKhoamîdi 26:20)

¹⁸ ǀNî ǁaegu da ge nî tsâ, ǂhâbasa i asa tsûtsûda go ǃgâsa-i ǀkha sī ǃhoasa. Xawe ǂgurose, da ge saora dîde nî dîsen: ‘Hoa amaba ta ūhâ?’ (ǂKhm. 18:13) ‘Īǁkhā-e ǁî-i go tita ǂanabegase tsûtsû tama hâ isa?’ (Aoǁn. 7:20) ‘Tita tsîna ǁkhā dīsāte dī tama hâ?’ (Aoǁn. 7:21, 22) ‘Khoe-i ǀkha ta ga nē ǃgomsin xa sī gara ǃhoa o, o i ǃnāsa ǃgomsiba ǃaroma tide?’ (Khomai re ǂKhoamîdi 26:20 sa.) ǁAeba ū tsî da ga nē dîdi xa gara ǂâiǃgâ o, o da ge nî ǂanǃgâ ǀnammi ra ǂkhâǃnâ dasa î da ī go xū-i xa ǂâi ǀû.

19. Aiǃgû tsî du tae-e nî dī ǀgara?

¹⁹ Jehovab di ǃoaba-aon ge ra ǁgau ǁîn Jesub di ama ǁkhāǁkhāsabesa, ǀnamman ga ǁgaugu o. Mâ-i hoa-i ge ra ǁgau, ǁî-i a Jesub di ama saosabesa. ǀNamma da ga sida ǃgâsan ǃoagu ga ra ǁgau o, ǃnūbusigan ūhâ xawe. ǀNamma da ga ǁgaugu o, on ge naun tsîna ama ǂgomsa ra mûǂan. Tsî sida ǀkha Jehovaba nî ǃoaba, ǀnammi di Eloba. A da aiǃgû tsî ama Xristeǁîn ra ǁgauǂui ǀnamma ǁgau ǀgara re.