1-2. Khoe-e tae-e nî dī ǁāǁnâhe î nîs aiǃâ?

 ǃKHARU ge koro kurin ǃnâ î ge miliuns xa ǃnāsa khoena Jehovab di ǃoaba-aose ge ǁāǁnâhe. ǂGuin ge ǂgurokam ǁaeb ǁkhāǁkhāsabeb Timoteub khami “ǀgôasisa xu” amaba ge ǁkhāǁkhāhe. (2Tim. 3:​14, 15) ǀNîn ge ǁîn di kaisis ǃnâ Jehovab xa ra ǁkhāǁkhāsen. ǀNî kai khoes hîna ge Elobmîsa Jehovab ǃoaba-aon ǀkha ǁkhāǁkhāsens ge 97 kurixas a hîna ge ǁāǁnâhe.

² Elobmîsa du ra ǁkhāǁkhāsen tamas ka io du Jehovaba ra ǃoaba ǁgûn xa ra kaikaihe tsî du ǁāǁnâs xa ra ǂâi? ǁNāb ge kaise ǃgâi mîǁguiba. ǁĀǁnâ kaisen du nîs aiǃâ du ge Jehovaba ǃoa nî māǁnâsen. Nē ǁkhāǁkhāǃâs ge nî ǁguiǃā, māǁnâsens taena ǃkhōǂgā hâsa. Huihe du ge nî î du ǂhanu ǁaeb ga hā o mû, tae-i ǃaroma du māǁnâsen tsî ǁāǁnâ kaisensa ǃao tidesa.

MĀǁNÂSENSA A TAE?

3. Elobmîs ǃnâ ge Jehovab ǃoa māǁnâsen hâ i khoen aiǁgaude mā re.

³ Elobmîs ǃnâ î ge Jehovab ǃoa gere māǁnâsen khoena gere ǁhûihe, ǀō-aisa xū-e dīs ǃaroma. Israelǁaes ge Jehovaba ǃoa māǁnâsen hâ ǁaesa. Xawe ǀnîn ge ǀō-aisa ǀgaub ǃnâ Jehovaba ǃoa ge māǁnâsen hâ i. Aiǁgause Aronni ge  “ǃanu saos” māǁnâsens dis, ti xoa-aisa ǃkhaiǀgapasa ǁîb ǃūs ai gere ǂnûi. ǁNā ǀapas ge gere ǁgau ǁîb ge ǀō-aisa ǃoabas ǃaroma ǁhûiǂûisa isa, Israeli ǀgapi pristerse. (Lev. 8:9) Nasirǁîn tsîn ge ǀō-aisa ǀgaub ǃnâ Jehovab ǃoa ge māǁnâsen hâ i. “Nasirǁî” ti hâ mîs ge Hebreǁî mîs “Nasir” ti hâs hîna “ǀgorasa” tamas ka io “māǁnâsen hâ i” ti ra ǂâibasensa xu ra hā. Nasirǁîn ge ǀō-aisa mîmādi Moseb ǂhanub ǃnâ ge xoasa î di ǃoagu gere ûi.—Num. 6:​2-8.

4. (a) Mâ ǀgaub ǃnâ i Jehovab ǃoa māǁnâsen hâna ǀō-aisa ǃaromasa ūhâ? (b) ǁÎ-aitsama ‘ǀurusensa’ tae-e ra ǂâibasen? (Ai-īsib tsîna mû re.)

⁴ Jehovab ǃoa du ga māǁnâsen, o du ge Jesub Xristub di ǁkhāǁkhāsabe kaisa ra ǁhûi. Tsî du ge Elob di ǂâisa dīsa ǂhâǂhâsa xū-i ase sadu di ûib ǃnâ ra mâi. Nēsa tae-e ǃkhōǂgā hâ? Jesub ge ge mî: ‘Tita ga sao ǂgaob hoab ge ǁî-aitsama nî ǀurusen.’ (Mat. 16:24) Xrikeǁî mîs “ǀurusen” ti hâs ge “aitsama hî-i” ti mîsen tis tsîna a ǂâibasen ǁkhā. Jehovab ǃoa du ga māǁnâsen o du ge ǁîb ǂâis ǀkha ǃgûǀhao tama xūn hoana nî ǂkhā. (2Kor. 5:​14, 15) ǁNās ge ra ǂâibasen “sorosi turagu,” ǀaiba ǃkhōǂgā hâ ga xu du nî ǂgōsensa. (Gal. 5:​19-21; 1Kor. 6:18) Nē mîmāde ǁnâuǀnamsa sadu ûiba ra ǃgom kai? Hî-î, Jehovaba du ga ǀnam tsî ǁîb ǂhanub sadu ǃgâib ǃoa hâ ti ǂgom, o du ge ti tsâ tide. (Psa. 119:97; Jes. 48:​17, 18) Nikolasi ge sao rase ra mî: “Jehovab di daoǁgaude da ge tronkes dī ǂgao da ra xūna xu ra ǁkhaes, tamas ka io xammi ǃharas tsū xūna xu ra ǁkhaubadas khami a mû ǁkhā.”

5. (a) Mati du Jehovab ǃoa ra māǁnâsen? (b) Tae-i ǃkharagagusiba māǁnâsens tsî ǁāǁnâs ǁaegu hâ? (Ai-īsib tsîna mû re.)

⁵ Mati du Jehovaba ǃoa ra māǁnâsen? ǀGores ǃnâ du ge ra mîmâi ǁîb ǀguiba du  ǃoaba tsî ǁîb ǂâisa ǂgurose sadu ûib ǃnâ nî mâisa. ǁNāpaxu du ge aiǃgû tsî ra mîmâi Jehovaba du nî ǀnamsa “sa ǂgaob hoab ǀkha, sa ǀoms hoas ǀkha, sa ǂâis hoas ǀkha tsî sa ǁkhāsib hoab ǀkha.” (Mrk. 12:30) Māǁnâsensa du ge ǀguri sadu tsî Jehovab ǁaegu ra dī xawe ǁāǁnâs ge naun aiǃâ ra dīhe. Nēs ǀkha du ge ra ǁgau māǁnâsen du go sa. Māǁnâsens ge ǀō-aisa mîmâisa, Jehovab ge ra ǃâubasen dī du go mîǁguiba du ǃkhōǀgara tsî ǁîb ǃoagu nî ûi ǃkhaisa.—Aoǁn. 5:​4, 5.

TAE-I ǃAROMA DU JEHOVABA ǃOA RA MĀǁNÂSEN?

6. Tae-i ǃaroma i khoe-e Jehovab ǃoa māǁnâsensa ra mîǁgui?

⁶ ǃUru ǂâibasens Jehovaba ǃoa du ra māǁnâsens ge ǀnambi du a amaga. Sadu ǀnammi ge tsâsib ai ǀgui ǃgaoǃgaosa tama. Xawe nēs ge “hoa gā-aisib tsî gagasi ǁnâuǃāb” ai a ǃgaoǃgaosa. Jehovab xa du ge ǁkhāǁkhāsen xūn ge ge ǃaroma î-i ǁîba du ūba hâ ǀnamma kai. (Kol. 1:9) ǁKhāǁkhāsen du ge xoadi ge ǂgomǃgâsiba ge mā du (1) Jehovab a amasa, (2) Elobmîs Elob gagab xa ǃgomǂgāǃnâhe hâsa, tsîb (3) ǁîb ǀapeǂhumisa ra sîsenusa îb ǁîb ǂâisa dīǀoaǀoa.

7. Tae-e da nî dī Jehovab ǃoa da nî māǁnâsens aiǃâ?

⁷ ǁNān hîna ge Jehovab ǃoa a māǁnâsenan ge Elobmîs ǃnâ hâ ǁkhāǁkhāde nî ǂan tsî Elob ǂhanuga nî ǁnâuǀnam. ǁÎn ǂgomsan ge naun ǀkha ra ǀgoragu, ǁîn ǁkhāsib ra mā-ams kōse. (Mat. 28:​19, 20) ǁÎn Jehovaba ūba hâ ǀnammi ge ge kai tsî ǁîn ǂgaob turab ge ǁîb ǀguiba ǃoabasa.  ǁNāsa sado ra ǁguiǃā? Jehovaba du ga ǂgaob hoab ǀkha ǀnam, o du ge Elobmîsa ra ǁkhāǁkhā du khoe-i, sadu ǁgûn tamas ka io ǀhōsana ǂkhîǂkhîs ǃaroma māǁnâsen tsî ǁāǁnâ kaisen tide.

8. Matib ǃgôaǃgâsiba ra hui du, māǁnâsens mîǁguiba dīs ǀkha? (Psalmdi 116:​12-14)

⁸ Jehovab ge dība du xūn hoan xa du ga ǂâi, o du ge ganganxase tsâ tsî ǁîb ǃoa ra māǁnâsen ǂgao. (Khomai re Psalmdi 116:​12-14 sa.) Elobmîs ge Jehovaba “mâ ǃgâi tsî dīǀoaǀoasa mās hoas” ti mā-aob ase ra ǂgai. (Jak. 1:17) Hoanxa kai ǀkhaeb hînab ge Jehovaba mādab ge ǁîb ǀgôab ǁguibasa. ǂÂis ǀguisa hî re. Xoremarib ge ge īǁkhā kai î du Jehovab ǀkha ǀgū ǀhōsagusisa ūhâ. ǀAmose ûis di aiǂhanub tsînab ge ge mā du. (1Jhn. 4:​9, 10, 19) Māǁnâsens ge ǀgui ǃgâi ǀgaub hîna du Jehovaba ǃgôaǃgâsiba ra ǁgauba. ǁÎb kai ǀnammi tsî nau ǀkhaegu hînab ge mā du gu ǃaroma. (Deu. 16:17; 2Kor. 5:15) ǁNāti i ǃgôaǃgâsib ge 46ǁî ǁkhāǁkhāǃâs, 4ǁî ǃhoaǃâs ǀAmosib kōse ǃgâiaǂgao re ti ǀon hâ ǂkhinis ǃnâ hâ. Nēs ge ǃnona haigu vidiob Presenting Your Gifts to God ti ǀon hâba ǃkhōǂgā hâ.

AIǂHUMISA Î DU A MĀǁNÂSENS TSÎ ǁĀǁNÂS ǃAROMA?

9. Tae-i ǃaroma i khoe-e tā Jehovab ǃoa māǁnâsensa î ra ǁgarihe khami nî tsâ?

⁹ ǀNîsi du ge māǁnâsen tsî ǁāǁnâ kaisens ǃaroma du aiǂhumisa tama ti a tsâ ǁkhā. ǀKharaǀkharana du ge ǀnîsi sadu ûib ǃnâ ra dī ǂgao î du Jehovab ǂhanugu ǃoagu ûi. Tamas ka io du ge ǀnîsi ǂâusa ǁaeba ǂhâ hâ î du sadu ǂgomsa ǀgaiǀgai. (Kol. 2:​6, 7) Elobmîsa ra ǁkhāǁkhāsen khoen hoan ge ǀgui ǁaeb ai Jehovaba ǀnam tsoatsoa tama. Hoa ǂkhamkhoen ge ǀgui kurin ǀkha māǁnâsen tsî ǁāǁnâ kaisen tama. ǁNâuǃā re mâ ǀkharaǀkharana du nî dīsa tsî tae-e du a dī ǁkhāsa, nau khoen ǀkha ǀgopeǀnōsen tamase.—Gal. 6:​4, 5.

10. Tae-e du a dī ǁkhā māǁnâsen tsî ǁāǁnâ kaisens ǃaroma du ǂhanu tamasa du ga mûǂan o? (Boksis tsîna mû re “ Amab ǃnâ kaikaihe hân.”)

¹⁰ Jehovab ǃoa māǁnâsens ǃaroma du ǂhanu tamasa du ga mûǂan, xawe ǁnā mîǁguib hîna du ūhâba ǃkhōǀgara re. Jehovab ǀkhaeba sadu ǁguiǂgāsens ǃaroma ǂgan, î ǂhâ du hâ ǀkharaǀkharana dī. (Fil. 2:13; 3:16) ǂGomǃgâsiba du ge a ūhâ ǁkhā, sadu ǀgorede ǁnâu-am tsîb nî ǃereamsa.—1Jhn. 5:14.

ǀNÎN RA ǃKHŌ-OASEN ǃAROMAS

11. Jehovaba mati nî hui da, î da ǂgomǂgomsase hâ ǀgara?

¹¹ ǀNîn hîna māǁnâsen tsî ǁāǁnâ kaisens ǃaroma ǂhanun ge ra îganǀgē. ǁÎn ge ǀnîsi ra ǃao ǁāǁnâs khaoǃgân tsū ǁōreba dī tsî nî ǂnûiǂuihesa. ǁNāsa du ga ǃao, o ǂgomǃgâsiba ūhâ re Jehovab ge ǂhâ du hâ xūn hoana nî mā du “î du ǃKhūba anu hâse ûi, ǁîba ǃgâiba ǀgaus hoas ai.” (Kol. 1:10) ǁÎb ge ǀgaiba nî mā du, î du ǂhanu xū-e dī, ǂguinab ge ǀnai ge hui în ǂhanu xū-e dī. (1Kor. 10:13) ǁNās ge ǀgui ǃaromas kaise ǀoro khoen ǀhaohâba xu ra ǂnûiǂuihesa. Jehovab ge ǁîb khoena ra hui în ǂgomǂgomsase hâ ǀgara.

12. Mati da tsū ǁoreba dīsa xu ǂgōsen ǁkhā?

¹² ǀOasa kurusa ūhâ tama khoen hoan ge tsū xū-e dīs ǀkha ra ǃâitsâhe. (Jak. 1:14) Xawe du ge ra ǁhûi tae-e du nî dīsa ǃâitsâhe du ga o. Mati du nî ûisa du ge sadu ǀguido a mîǁgui ǁkhā. ǀNî khoen ge ra mî tsâ du ra ǀgaub tsî dī du ra xūn tsîna du aitsama ǃkhō-oa ǁoasa. Xawe ǁnās  ge ama tama, ǁkhāǁkhāsen ǁkhā du ge a ǃgâi tama turaga ǃkhō-oasa. Tsî du ge ǃâitsâhe du ga, o ǁhûi ǁkhā ǁgai xū-e du dī tidesa. ǀGui xū-i tsîn ge hâ ǁōresa xu a hui du ǁkhā-e. Aiǁgause Jehovaba ǃoa tsēs hoasa ǀgoresa. ǃGâi ǁnaetib Elobmîsa ǁkhāǁkhāsens tiba ǃkhōǀgara, Xristeǁî ǀhaode hâǃnâ tsî sadu ǂgomsa naun ǀkha ǀgoragu. Nē xūna ǁnaetib ase dīs ge ǀgaiba nî mā du, î du ǂgomǂgomsase Jehovab ǃoagu hâ ǀgara. Tātsē tā ǀuru Jehovab ǁnāsa dīs ǀkhā nî hui dusa.—Gal. 5:16.

13. Mâ ǃgâi aiǁgausab ge Josefa ǁgau?

¹³ Supuse du ge māǁnâsens mîǁguiba a dīǀoaǀoa ǁkhā, ǀnai du ga ais-ai mîǁgui tae-e du nî dīsa ǃâitsâhe du ga o. Elobmîs ge ǂgui khoen xa ra mîba da hîna ge ǁnāsa a dīna ǀoasa kurusan ge ūhâ tama ī xawe. Aiǁgause Potifari taras ge Josefi ǀkha ǃnās hoasa gere ǁoe ǂgao. Xaweb ge ǀnai ge ǂan i tae-eb nî dīsa. Elobmîs ge ra mîba da, ǁîb ge “ǂkhā” tsî ǁîsa ge ǃeream: “O mâti ta tita ǁnāti ǂkhaba xū-e dī tsî Elob ǃoagu nî ǁore?” (Gen. 39:​8-10) Josefi ge ǃgāsase ge ǂan i matib nî tanisensa ǃâitsâheb nîs aiǃâ. ǁNās ge ge supu kai ǂhanu xū-e dīsa ǃâitsâheb ge o.

14. Mati da ǃâitsâga xu ǂgōsensa a ǁkhāǁkhāsen ǁkhā?

¹⁴ Mati du Josefa ǁgae tsî Elob ǃoa ǂgomǂgomsase nî hâ tsî ǂhanu xū-e nî dī ǃâitsâhe du ga o? Nēsi du ge ǀnai a mîǁgui ǁkhā tae-e du nî dīsa ǃâitsâga du ga hōǃâ o. ǁKhāǁkhāsen ǁnâ ǁaeb ai Jehovab ǃhûi hâ xūna ǂkhā tsî ǁîna xu ǂgōsensa. (Psa. 97:10; 119:165) ǁNā ǀgaub ǃnâ du ge ǃâitsâhe du ga o ǁore tide. Mati du nî ǃereamsa du ge ǀnai a ǂan.

15. Mati i khoe-e ra ǁgau Jehovaba i ra “ôasa”? (Hebreǁîn 11:6)

¹⁵ ǀNîsi du ge a ǂan amaba du ge hōsa. Jehovaba du ge sadu ǂgaob hoab ǀkha ra ǃoaba ǂgao xawe i ge xū-e ra ǃkhō-oa du māǁnâsen tsî ǁāǁnâ kaisensa. Gao-aob Davidi ge dī xū-e du ge a dī ǁkhā. Jehovaba du ge a ǀkhoma ǁkhā: “Ôaǃnâǃganu te re ǃKhūtse, î ti ǂgaoba ǂan re! ǃÂitsâ te re î ti sâoǃnâ ǂâide ǂan re, i mû ise i tsū dao-e tita tawa hâsa, î ǀamo daob ai ǂgaeǂgui te re.” (Psa. 139:​23, 24) Jehovab ge “ǁîba ra ôana ra mādawa-am.” Māǁnâsen tsî ǁāǁnâs mîǁguib ǃoagu du ra sîsens ge  ra ǁgau ǁnāsa du ra dīsa.—Khomai re Hebreǁîn 11:6 sa.

JEHOVABA ǀGŪ ǀGARA

16-17. Matin amab ǃnâ kaikaihe hâna Jehovab xa ra ǂgaehe? (Johaneb 6:44)

¹⁶ Jesub ge ge mî ǁîb ǁkhāǁkhāsaben Jehovab xa ra ǂgaehesa. (Khomai re Johaneb 6:44 sa.) ǂÂiǃgâ re matikōse i a buruxasa tsî nēs tae-e sadu ǃaroma ra ǂâibasensa. Jehovab ge ǃgâi xū-e mâ khoe-i hoa-i ǂgaeb ra i ǃnâ ra mû. Mâ ǀguiǀguibe khoe-i hoa-eb ge “ǀō-aisase” ra mû. (Deu. 7:6) Sadu tsînab ge ǁkhā ǀgaub ǃnâ ra mû.

¹⁷ ǀNîsi i ge sadu ǁgûna Jehovaba ra ǃoaba tsî du ge ǀnîsi ra tsâ, ǁîn Jehovaba ra ǃoaba amaga ǀgui du Jehovaba ra ǃoabasa tsîb ǂgae du tamasa. ǁNāti i ga ī xawes ge Elobmîsa ra mî: “Elob ǃoa du hā re, ob ge ǁîba sadu ǃoa nî hā.” (Jak. 4:8; 1Kro. 28:9) ǁÎb ǃoa du ga ǂgurose ǀgū, ob ge ǁîba sado nî ǀgū. Jehovab ge khoena ǁaes ase ǀgui mû tama. Mâ ǀguiǀguibe khoe-i hoa-eb ge ra ǂgae. ǁNān hîna amab ǃnâ kaikaihe hân tsîna ǃkhōǂgā hâse. ǁNāti ī khoe-i ga ǂgurose Jehovaba ǀgū, ob ge ǁî-e ra ūǃoa Jakobub 4:8 ǃoagu.—ǀGopeǀnō re 2 Tesalonikaǁîn 2:13 sa.

18. Tae-e da saora ǁkhāǁkhāǃâs ǃnâ nî ǃhoaǃgao? (Psalmdi 40:8)

¹⁸ Jehovab ǃoa du ga māǁnâsen tsî ǁāǁnâ kaisen, o du ge Jesub ǂâiǀgauba ra ǁgae. Māsenxaseb ge ǁîb ǁGûb ra ǂganbi xū-i hoa-e ge dī. (Khomai re Psalmdi 40:8 sa; Heb. 10:7.) Saora ǁkhāǁkhāǃâs ǃnâ da ge nî ǃhoaǃgao tae-i nî hui dusa, î du Jehovaba ǂgomǂgomsase ǃoaba ǀgara ǁāǁnâs khaoǃgâ.