1. Mâ ǀkhaega da ra hōǃâ Jehovab di ǀapeǂhumis di ǃâ da a amaga?

 AMASE da ge ǀkhaehe hâ ǃgomǁaegu ǃnâ Jehovab ǀapeǂhumis di ǃâ da asa. Ûib ge nē ǃhūbaib ǃnâ kaise a ǃgom. Xaweb ge Jehovaba sada ǃgâsana māda hâ în hui da. (Psa. 133:1) ǁÎb ge ra hui da î da ǀgaisa omarise hâ. (Efe. 5:​33-6:1) Tsîb ge ǂhâ da hâ gā-aisiba ra mā da, î da ǂâiǂhânsena tani ǁkhā tsî ǂkhîba ūhâ.

2. Tae-e da nî dī tsî tae-i ǃaroma?

² ǃGarise da ge nî sîsen tsî Jehovaba ǂgomǂgomsase nî ǃoaba ǀgara. Tae-i ǃaroma? ǀNî ǁaegu ai da ge naun ǃnūbusigu xa a tsâǀkhāhe ǁkhā. Sada ǃnūbusigu xas tsîna da ge a ǃgombahe ǁkhā, ǃgōsase ǃnās hoasa da ga dīsā o. Jehovab ǃoabas ǃnâ mâǀgaisa da ge ǂhâhâ (1) ǃgâsa-i ga tsûtsû da o, (2) ǃgamme du hâ khoe-i ga ǂkhabuǂâi kai da o tsî (3) aitsama da ga sada dīsan xa ǂkhabuǂâi o. Nē ǁkhāǁkhāǃâs ǃnâ da ge nē ǃnona mâsiga nî ǃhoaǃgao. Tsî da ge nî ǁkhāǁkhāsen tae-e da ǂgomǂgomsa khoe-i Elobmîs ǃnâ hâ-e xu a ǁkhāǁkhāsen ǁkhāsa.

ǂGOMǂGOMSASE HÂ ǃGÂSA-I GA TSÛTSÛ DA XAWE

3. Mâ ǃgomsinan Jehovab khoena ra hōǃâ?

³ ǃGomsigu. ǀNî ǃgâsan ge ǀgauga ūhâ sida ǃgâiba tama na tamas ka io ra ǂhani da na. ǀNîn ge ǃgôaǁnâxa ǀgaub tamas  ka io ǁgai ǀgaub ǃnâ a hâ-ū da ǁkhā. ǀHaohâb ǃui-aogu ge a dīsa ǁkhā. ǃGomsina i ge a ǃaroma ǁkhā tsîn ge ǀnîna îganǀē ǁkhā, nēs a Elob di ǀapeǂhumisa. Aiǃgû tsî Eloba “ǀguiǃnâxase ǃoaba” ǀgaras xan ge ǀnî ǃgâsana ǁîna ge tsûtsûn ǀkha ge hâ ǀû. Tamas ka io ǀhaode ǃoas tsîna ge ī ǀû. (Sef. 3:9) ǁNāpa gā-ai ǀgau? ǃGaoǃgâ re tae-e da a ǁkhāǁkhāsen ǁkhāsa, Elobmîs ǃnâ hâ khoen hîna ge ǁkhā ǃgomsina ǃkharuǃnâna xu.

4. Pauluba mâ ǃgomsiga gere hōǃâ?

⁴ Elobmîs aiǁgaus. Apostel Paulub ge ge ǂan i ǁîb di Xristeǁî ǃgâsan ǀoasa kurusa ūhâ tamasa. Aiǁgause ǁîb ge ǂhanu tamase ge ǀgoraǃgâhe ǀhoahâb di khoen ǀkhab ge hâǀhao amaga. (ǃNǃkh. 9:26) Egan ge ǀnîna ǁîba ǃgâb ai gere ǀhoe tsî ǁîb ǀonsa ge ǁgaiǁgai. (2Kor. 10:10) Paulub ge ǀhaohâb ǃûi-aoba ge mû nauna a ǃnôa kai ǁkhā ǁgai mîǁguiba ge dība. (Gal. 2:​11, 12) Paulub di ǀgūǀhōsagu di ǀguib Markub ti ge ǀon hâ îb ge kaise ge ǂkhabuǂâi kaibi. (ǃNǃkh. 15:​37, 38) Paulub ge ǃkharuǃnâb ge mâsigu xa ǃaromahe hâse, tsûtsûbi ge khoen ǀkha ge hâ ǀû tama hâ i. Xawe ǁîb ǃgâsan di ǃgâi ǀgaugu xa ǂâi tsî Jehovaba ǂgomǂgomsase ge ǃoaba ǀgara. Tae-e Pauluba ge hui îb mâǃkharu?

5. Tae-e Pauluba ge hui îb ǁîb ǃgâsan ǀgūse hâ? (Koloseǁîn 3:​13, 14) (Ai-īsib tsîna mû re.)

⁵ Paulub ge ǁîb Xristeǁî ǃgâsana ge ǀnam i. ǁÎnab ge ūba hâ i ǀnammi ge ge huibi îb tā ǁîn di ǂkhabusasigu ai ǂâisa ǂnûi xawe ǁîn di ǃgâi ǀgaugu ai. Paulub ge ūb ge hâ-i ǀnammi xas tsîna ge hui-e, îb Koloseǁîn 3:​13, 14 ǃnâb ge aitsama xoamâi xūna dī. (Khomâi re.) ǃGaoǃgâ re matib ge Pauluba Markuba a ǀûba ǀgausa. Markub ge Pauluba ǁîb di ǂguro sîsabe sîsenni ǃnâ a ǁnāxuǃnâ xaweb ge Pauluba ǁgaixa hâse ge hâ ǀgara tama hâ i. Egab ge Pauluba ǀnamxaǃnâ sîǂkhinisa Kolose ǀHaohâba ǃoa ge xoa tsîb ge Markuba ǀō-aisa sîsen ǁare-aob tsî ‘kai ǁkhaeǂgao-aob’ ase ge koa. (Kol. 4:​10, 11) Romes ǃkhōsis ǃnâb ǂnôa hînab ge Pauluba, Markuba ge ǂgan îb sī huibi. (2Tim. 4:11) ǃGāsa-i ge a Paulub ge ǁîb ǃgâsana ǀûba tsî ǁîn ǀgūse hâ isa. Tae-e da a ǁkhāǁkhāsen ǁkhā Pauluba xu?

6-7. Mati ta mâǀgai tsî sada ǃgâsana ǀnamma a ǁgau ǁkhā ǀoasa kurusan ūhâ tama xawe? (1 Johaneb 4:7)

⁶ ǁKhāǁǁkhāsen da ra xūn. Jehovab ge  ra ǂhâba î da ǃnūǃnâxa sada ǃgâsana da ga ǀnama ǁgau o. (Khomai re 1 Johaneb 4:7 sa.) Xristeǁî ǃgâsa i ga sada ǀkha ǃgâi tama ǀgaub ǃnâ tanisen xawe da ge ǂâis ǃnâ nî ūhâ. ǁÎ-i sada tsûtsûsa ǂâibasen tama xawe i Elobmîs ǃoagu ǂhanu xū-e ra dītsâsa. (ǂKhm. 12:18) Elob ge ǁîb di ǂgomǂgomsa ǃoaba-aona a ǀnam, ǂkhabusasinan ga ūhâ xawe. ǁÎb ge dīsā da ga xawe aiǃgû tsî sida di ǀhōsab ase ra hâ ǀgara tsî ǁgaixa hâse hâ tama. (Psa. 103:9) Kaise i ge a ǂhâǂhâsa sada di ǀûba ǀnamxa ǁGûba ǁgaesa.—Efe. 4:32–5:1.

⁷ ǂÂis ǃnâ ūhâ re ǂhâǂhâsa i ge a, ǀams ra ǀgū khami da sada ǃgâsan ǀgūse nî hâsa. ǀGaisa ǁgâiǀāba da ge a ǃâubasen ǁkhā. Sida ǂgoms ǃaromas tsîna da ge ǃkhōsis ǃnâ ǂgāhe ǁkhā. Tsî ǁnās ka ī, o da ge nēsis xa ǃnāsase sada di ǃgâsana nî ǂhâ. (ǂKhm. 17:17) ǃGaoǃgâ re tae-i ge Josef, a ti ǀēn hâ ǀhaohâb ǃûi-aob Spanni ǃnâ ra hâb ǀkha īsa. ǁÎb tsî ǀnî ǃgâsagu tsîn ge ǀkhā-e gu ǁhûi tama ǃkhais ǃaroma ǃkhōsis ǃnâ ge ūhe. ǁÎb ge ra mî: “ǀNî ǁaegu ai gu ge ǃgâsaga a ǀhū kaitsi ǁkhā, ǀguri hâs di soa-ets ūhâ tama amaga. Xawe ge ǀûbagu tsî ǀguiba nî hâ ǀhao ge īs ge. ǁNās ge ge hui ge î ge ǀguiǃnâxase hâ tsî ǁkhauba gu. ǃKhōsis ǃnâ ge ge Jehovaba ǃoaba tama khoegu ǂnamipe ge hâ i. ǀGuiǃnāsa ta ge ǁôab ai ge tsûtsûsen tsî ǁôaba ge ǃgaesa ī, aitsama ta ge xūna ge dībasen ǁoa i. Ti ǃgâsagu ti ǀguib ge sarana ǁābate, kōǃgâte tsî ǀnîhâ xūn ǃnâs tsîna gere huite. ǁNā ǁaeb ai ta ge ǃnāsase ǂhâhâ i ǃgam ǀnamma ta ge ge hōǃâ.” ǃGâi ǃaromasa da ge ūhâ nēsi sida ǃgâsan ǀkha da ūhâ ǃgomsina sîsenǂamsa.

ǃGAMMEB ǃNÂ DU GA ǂKHABUǂÂI XAWE MÂǀGAI

8. ǃGamme hâ khoena mâ ǃgomsina ra hōǃâ?

⁸ ǃGomsin. Hoa ǃgamme gu ge ǃgomsina ra hōǃâ. Elobmîs ge ra ǂanǃgâ, ǃgamme hâ khoen “ǁgans ǃnâ nî ǁgâiǀā-e” ǃkhaisa. (1Kor. 7:28) Tae-i ǃaroma? ǃGammeb ge ǀoasa kurusa ūhâ tama khoera ra ǀhaoǀhao, ǃkharagagu ǀgauga ūhâ ra, hoa ra ge ǀgui xūn xa ǃgâibahe tama. ǁÎra ge ǃkharagagu khaoǃhūgu tsî ǁnaetiga ūhâ. ǀGui i ge ǀnîsi ǃgameb aiǃâ ge mûsen tama hâ i ǀgauga a ǁgau ǁkhā. ǁNā ǀgaugu di ǀgui-i ge ǁkhamasa mâsiba a ǃaroma ǁkhā. ǁÎra ge a ǀhapiǂgā-amgu ǁkhā hoa ra ǃgomsina ūhâ xawe, ǀguiba sîsen tsî ra ǁnā ǃgomsina nî sîsenǂams xa. Hâǀgora tamas ka io ǃgamme khôas tsîna ra ge a ǂâiǃgâ tsoatsoa ǁkhā. Xawe hâǀgoras tamas ka io ǃgamme khôasa ǃgomsina nî ūbe? b Hā re î da Elobmîs ǃnâ hâ khoes aiǁgausa xu ǁkhāǁkhāsen, ǁîs ǃgammeb ǃnâ ge ǃgomsina mâǃkharusa.

9. Abigailsa mâ ǃgomsina gere hōǃâ?

⁹ Elobmîs aiǁgaus. Abigails ge Nabala ge ǃgamme hâ i Elobmîs ǃnâ ǁgaiǂub tsî ǃgâi tama tanisen ǀgauba ūhâse gere ǁguiǃāheba. (1Sam. 25:3) Abigails ge ǀnîsi ge ǃgombahe i ǁnāti ī aob ǀkha hâ ǀhaosa. Xawe Abigailsa supu ǀgauba gere ôa ǁîs ǃgammeba ǀam kaisa? ǁÎs ge ǃēsa ge ūhâ i hānîǁaeb di Gao-aob Davidi ge ǁîs aoba gere ǃgam ǂgao o, ǁîb tsî ǁîb khoegu ge mîǁgaiǁgaihe ǃkhais ǃaroma. (1Sam. 25:​9-13) Abigails ge ǁhûi tsî ga mā-am hâ îb  Davida ǁîs aob Nabala ǃgam. Xawes ge ǁnāsa ge dī tama hâ i tsî Davidi ǀkha ge ǃhoa î-i ǁîs aoba tā ǃgam-e. (1Sam. 25:​23-27) Tae-e ǁîsa ge ǂkhâǃnâ?

10. Tae-e ǀnîsi Abigailsa ge ǂkhâǃnâ is ǁîs ti ǃgom ǃgammeb ǃnâ mâǀgai?

¹⁰ Abigails ge Jehovaba ge ǀnam i tsî ǁîb di ǂhanugu tsîna ǃgammeb ǃoagu. ǁÎs ge ge ǂan i Elob ge tae-e a mîsa ǂguro ǃgammebab ge ǃgae o Adammi tsî Evas ǁaegu. (Gen. 2:24) ǁÎs ge ge ǂan-i Jehovab ge ǃgammeba ǃanu xū-i ase gere mû ǃkhaisa. Abigails ge Eloba gere ǂkhîǂkhî ǂgao tsî ǁnās ge ǂkhâǃnâ tsî ge huisi is ǁîs omarisa sâu, aob tsîna ǃkhōǂgāhâse. ǃKhaeses ge ge sîsen is Davida ǁkhae îb tā Nabala ǃgam. Māsenxases ge ǃereamsa ū tsî dī tamas hâ xū-i ǃaroma ǀûbaba ge ǂgan. ǃGāsa i ge a Jehovab ge nē ǁkhoaǂgao tsî māsenxa tarekhoesa ǀnam isa. Tae-e ra aob tsî taras tsîna Abigails aiǁgausa xū nî ǁkhāǁkhāsen?

11. (a) Tae-eb Jehovaba ǃgamme hâ khoena xu ra ǃâubasen? (Efeseǁîn 5:33) (b) Tae-e da a ǁkhāǁkhāsen ǁkhā Kamens ge ǃgarise sîsen tsî ǁîs di ǃgammeba a sâu ǀgauba xu? (Ai-īsib tsîna mû re.)

¹¹ ǁKhāǁkhāsen da go xūn. Jehovab ge ǃgamme hâ khoena ra daoǁgau în ǃgammeba ǃgôa, ǁî-i ǃgamme hâ khoe-i ǀkha ǀguiba ûiǀhaos ga ǃgom xawe. Elob ge nî ǂkhî ǃgamme hâ khoen ga ǀguiba hâ tsî ǁîn ǃgomsina ǀguiba sîsenǂam. Tsî māsenxa ǀnammi tsî ǃgôasib tsîna a ǁgau gu o. (Khomai re Efeseǁîn 5:33 sa.) ǃGaoǃgâ re Kamens di aiǁgausa, ǃnani kuriga ra ǃgamme hâs khaoǃgâs ge Jehovab ǃoaba-aon ǀkha Elobmîsa ge ǁkhāǁkhāsen tsoatsoa tsî ega ge ǁāǁnâhe. Kamens ge ra mî: “Ti kaikhoeb ge ǁnās xa ge ǃgâibahe tama hâ i, ǁîb ge Jehovaba gere suri. Tsî mîǁgaiǁgaite tsî gere ǃaoǃaote ǀgora xuteb nîsa.” Xawes ge Kamensa ǁîs ǃgammeb ǃnâ ge mâǃkharu. ǁÎs ge 50 kuriga ǃgarise ge sîsen ǀnammi tsî ǃgôasib ai ǃgaoǃgaosa ǃgammeba ūhâsa. ǁÎs ge ra mî: “Kurin ta ǃkharu khami ta ge ge ǁkhāǁkhāsen mati ta ǁîb ǀkha gā-aisib tsî ǁnâuǃāxasib ǀkha nî ǃhoa ǀgausa. ǃGammeb Jehovab mûǁae ǃanu ǃkhaisa ǂans ge ge huite, î ta ǁkhā ta a-i hoa-e dī tsî ǁnās ǃoagu ûi. Tātsē ta ge ti aoba xu ge ǀgora tsâ tama hâ i Jehovaba ta a ǀnam amaga.” c ǃGomsin ga sadu ǃgammeb ǃnâ hâ ǁaeb ai du ge a ǂgomǃgâ ǁkhā, Jehovab nî ǂkhâǃnâ du tsî nî hui dusa î du mâǀgai.

 SADU DĪSAN XA DU GA ǂKHABUǂÂI XAWE MÂǀGAI

12. Mâ ǃgomsina da a hōǃâ ǁkhā kai ǁore-e da ga dī o?

¹² ǃGomsin. ǀÛsens tsâsiba da ge a hōǃâ ǁkhā kai ǁore-e da ga dī o. Elobmîs ge ra ǂanǃgâ, sada ǁoren ‘khôa tsî ǂkhūhe’ hâse a tsâ kai da ǁkhā ǃkhaisa. (Psa. 51:17) ǀGui ǃgâsab Robert ti ǀon hâb ge kurina ǃgarise ge sîsen îb ǀhaohâb hui-aob ase ǃoabasa sīǃnâ. ǁÎb ge ǀgaisa ǁore-e ge dī hîna ge ǂâihō kaibi-e Jehovabab ge gāxaǃnâsa. ǁÎb ge ra mî: “Dī ta ge xū-e ǂâiho tsî ta ge kaise gere ǀhapitsâsen tsî ǁgaise gere tsâ. ǁGamrogu ǃnâ ta ge Jehovab kōse ge ǀgore. ǂÂi-oa ta ge ra Jehovab tātsē ti ǀgorete ǃgâ tide ti ta gere tsâsa. Mati iob ǁnāsa nî dī? ǁÎba ta ge ge ǁnāxuǃgâ.” Kai ǁore-e da ga dī, o da ge ǀûsens tsâsiba ūhâ ǁkhā, sada ǂgaob ra tsâ kai da amaga Jehovab go sada ǃnâ a ǀûsensa. (Psa. 38:4) Nēsa du ga hōǃâ tsâ o ǃgaoǃgâ re, Elobmîs ǃnâ hâ ǂgomǂgomsa khoe-i kai ǁore-e i ge dī xawe mati a mâǀgaisa.

13. Mâ kai ǁorenab ge apostel Petruba dī tsî mâ ǀnîhâ xū-eb ge dī ǁnās aiǃâ?

¹³ Elobmîs aiǁgaus. Jesub nî ǃgamhe ǃuis aiǃâb ge Petruba ǂguiǃnâde ge dīsā tsî ǁnās xa ǃaromahe hâse kai ǁoreba ge dī. ǂGuroseb ge Petruba kaise ǂgomǃgâsen tsî gere koasen, nau apostelgu ga Jesuba ǁnāxuǃgâ xaweb ǂgomǂgomsase nî hâ ǀgarasa. (Mrk. 14:​27-29) ǀGamǁîse, Getsemane ǃhanab ǃnâb ge Petruba ǃnās hoasa Jesub ge ǂkhaikari hâ i ǀgore ti gere mî xawe gere ǁom. (Mrk. 14:​32, 37-41) Kai ǂnūbis khoen ge gôagu tsî ǃhôadi ǀkha ge hā, în Jesuba ǃkhō, ob ge Petruba ge ǃkhoe. (Mrk. 14:50) ǀAms aib ge Petruba Jesuba ǃnona ǃnāde ge ǀūxu tsî ge mîǁgui ǁîbab a ǀūsa. (Mrk. 14:​66-71) Petruba tae-e ge dī kai ǁorebab dī hâ ǃkhaisab ge ǂâihō o? ǀHapitsâsen tsîb ge kaise tsûsase ge ā. (Mrk. 14:72) Mûnan-ai re Petrub ge ǁae-i khaoǃgâ gere tsâ ǀgausa, ǁîb ǀhōsab Jesubab ge ǀūxu o. ǁÎb ge xū tamase gere tsâsen.

14. Tae-e Petruba ge hui îb mâǀgai Jehovab ǃoabas ǃnâ? (Tsoatsoas ai hâ ai-īsiba mû re.)

¹⁴ ǂGui ǃaromadi ǃgaob ge Petruba ge mâǀgai Jehovaba ǃoabas ǃnâ. ǁÎb ge ge ǀguriǀgurisen tama hâ i. Nau ǁkhāǁkhāsabe gu ǃoa ī tsîb ge ge ǁkhaeǂgaohe. (Luk. 24:33) Jesub ge khâib ges khaoǃgâ Petrub ǃoa ge ī, îb ǁîba ǁkhaeǂgao. (Luk. 24:34; 1Kor. 15:5) ǁÎb dīsān ǃaroma ǁnama bi tama i tsîb ge Jesuba Petruba  ge mîba kai ǁgaumâiteb nî hōsa. (Jhn. 21:​15-17) Petrub ge ge ǂan i kai ǁorebab ge dīsa xaweb ge ge ǀû tama hâ i ǃgâiba dīsa. Tae-i ǃaroma? ǁÎb ge ǂgomǃgâsiba ge ūhâ i Jesub noxoba a ǀnambisa. Nau ǁkhāǁkhāsabegu tsîn ge aiǃgû tsî ǁîba gere mâxoǀkhā. Tae-e da Petrub di aiǁgausa xu a ǁkhāǁkhāsen ǁkhā?

15. Jehovaba tae-i ǃnâ da ǂgomǃgâsiba nî ūhâsa ra ǂhâba? (Psalmdi 86:5; Romeǁîn 8:​38, 39) (Ai-īsib tsîna mû re.)

¹⁵ ǁKhāǁkhāsen da go xūn. Jehovab ge ǂhaba hâ i da ǁîb ǀnammi tsî ǀûbab ǃnâ ǂgomǃgâsiba ūhâ. (Khomai re Psalmdi 86:5; Romeǁîn 8:​38, 39 sa.) ǁOre da ga o da ge ra ǀhapitsâsen. ǁNāti tsâs ge tsū tama. ǁNā-amaga da ge ǀnamhe tamas ka io ǀûba-e ǁoa da a ti tā nî ǂâi. Kaise da ge ǃkhaese huiba nî ôa. Roberti aiǃâ goro mîheb ge ra mî: “ǁOre ta ge ge, aitsâma ǃâitsâna ǃkhamǃoas ǃnâ ta ge ǂgom hâ i amaga.” ǁÎb ge ge ǂâihō ǀhaohâb ǃûi-aogu ǀkhab nî ǃhoa ǃkhaisa. Tsîb ge ra mî: “ǁNāsa ta ge dī o ta ge Jehovab ǀnamma ǁîgu ǃnâ-ū ge hōǃâ. ǀHaohâb ǃûi-aogu ūbate hâ ǀnammi tsîna ta ge ge hōǃâ. ǁîgu ge ge huite î ta mûǂan Jehovab ǁnāxūǃgâte tama hâsa.” Sada tsîn ge a ǂgomǃgâ ǁkhā Jehovab ǃgam ǀnamma ūba da hâsa tsîb nî ǀûba dasa ǃhōbasen da ga o. ǂHâbasa huiba ôa tsî dītsâ re, î du tā ǁkhāba ǁnā xū-e dī. (1Jhn. 1:​8, 9) ǁNā ǀgoraǃgâs ge nî ǁkhae da, î da tā ǀûsen ǃnôa tamas ka io da ga ǁoreb ǃnâ ǁnā o.

16. Tae-i ǃaroma da Jehovab ǃoabas ǃnâ ra mâǀgai ǂgao?

¹⁶ Jehovab ge ǁkhā da a-e dītsâ tsî da ǁîba nē ǃgom ǁaegu ǃnâ ra ǃoaba ǃkhaisa ra ǃgôaǃgâ. Sada di dīsān xa da ga ǂkhabuǂâi xawe da ge Jehovab di huib ǀkha a mâǀgai ǁkhā. Sada ǃgâsana da ge ǀnam tsî nî ǀûba tsûtsû dan ga xawe. Eloba da ge ǀnamma a ǁgau ǁkhā ǁÎb ge ǂnûiǂgā ǃgammeba ǃgôas ǃnâ-ū. Tsî da ge ǁkhā da a-e nî dītsâ, î da ǃgomsin ǃgammeb ǃnâ da ra hōǃâna sîsenǂam. ǁOre da ga o da ge Jehovab huiba nî ôa tsî ǁîb ǀnammi tsî ǀûbab tsîna nî ūǃoa. Tsî da ge nî aiǃgû ǁîba ǃoabas ǃnâ, Jehovab ge ǃnāǂamsase nî ǀkhae da ‘ǃgâina dīsa’ da ga ǀûsen tama io.—Gal. 6:9.