1. Mâ tsâsigan Jehovab ǃoaba-aona ra hōǃâ?

 JEHOVAB ǁîb khoena ǁaes ase ra ūǃoasa ǂans ge kaise ra ǁkhaeǂgao da. Elobmîs ge ra mî: “ǃKhūb ge ǁaes âb ǃnâ ǃgâiǃgâibasensa ūhâ.” (Psa. 149:4) ǀNî ǁaegu ai da ge ǂkhabuǂâi tsî a dîsen ǁkhā, ‘Jehovaba tita ra ūǃoa?’ Elobmîs ǁaeb ǂgomǂgomsa ǃoaba-aon Jehovab din tsîn ge ǀnî ǁaegu ai ǂkhabuǂâis tsâsiga ge ūhâ i tsî gere tsâ Jehovab ǁîna ūǃoa tamasa.—1Sam. 1:​6-10; Job. 29:​2, 4; Psa. 51:11.

2. Jehovaba hamna ra ūǃoa?

² Elobmîs ge ǃgāsase ra ǁgau, ǀoasa kurusa ūhâ tama khoen tsîn Jehovab xa nî ūǃoahesa. Tae-e da nî dī? Jesub Xristub ǃnâ ǂgomsa ǁgau tsî da ge nî ǁāǁnâhe. (Jhn. 3:16) Nē ǀgaub ǃnâ da ge nauna ra ǁgau, sida ǁoren ǃgao da go ǃhausensa tsî da Eloba ǃoa ra mîmâisa ǁîb ǂâisa dīsa. (ǃNǃkh. 2:38; 3:19) Jehovab ge kaise ra ǂkhî nēn hoana dī tsî da ga ǁîb ǀkha ǀgūǀhōsagusisa omkhâi o. ǁÎba ǃoabas mîmâisa da ga dīǀoaǀoa, ob ge Jehovaba aiǃgû tsî ǁîb ǀgūǀhōsan ase nî ūǃoa da.—Psa. 25:14.

3. Tae-e da nēsi nî ǃhoaǃgao?

³ Tae-i ǃaroman ǀnîna ra tsâ Elob xan ūǃoahe tama ti? Jehovaba mati ra ǁgau sidab ūǃoa hâsa? Xristeǁî-e  mati ǂgomǃgâsiba ǁgau ǁkhā Elob ǁî-e ra ūǃoasa?

TAE-I ǃAROMAN ǀNÎNA JEHOVAB XAN ŪǃOAHE TAMA KHAMI RA TSÂ?

4-5. Mâ ǂgomǃgâsiba da a ūhâ ǁkhā xū tamase da ga tsâ xawe?

⁴ ǀGôaro da asa xu da ge ǃnāsa khoeda xū tamase ra tsâ. (Psa. 88:15) Adrian ti ǀon hâ ǃgâsab ge ra mî: “Tita ge hoaǁae xu tamase ra tsâ. ǂKham axab ase ta ge hoaǁae gere ǀgore, î da omaris ase ǀguiba paradais ǃnâ sī hâ. Nēsa ta anu tama khami ta gere tsâ xawe.” Tonib ge Jehovaba ǃoaba tama omaris ǃnâ ge kaib ge ra mî: “Ti ǁgûra ge tātsē ge mîbate tama hâ i ǀnamte ra as tamas ka io ra dī ta ra xūn ai ǂnīsasa. Nēs ge gere tsâ kaite xū-i xare-i dī ta ra ī ǁîra ǂkhî kai tidesa.”

⁵ ǀNî ǁaegu ai da ga xū tama ī khami ga ra tsâ, o da ge hoaǁae ǂâis ǃnâ ni ūhâ Jehovab ge aitsama ǁîba ǃoa a ǂgae dasa. (Jhn. 6:44) ǁÎb ge sida ǃnâ mûǁoa da a ǃgâiba ra mû tsî ham da as tsîna ǂgaob ǃnâ a ǂan. (1Sam. 16:7; 2Kro. 6:30) ǁNās ǀkha da ge Jehovaba a ǂgomǃgâ ǁkhā, ǁîb ga kaise da a ǀō-aisa ti mî o.—1Jhn. 3:​19, 20.

6. Apostel Pauluba mati ǃkharuge ǁaeb ǁoren xa gere tsâ?

⁶ Amaba da nî ǁkhāǁkhāsens aiǃâ da ge ǀnîsi nēsi ra ǀhapitsâsen kai da xūna ge dī. (1Pet. 4:3) Jehovaba ǂgomǂgomsase ra ǃoaba ǃgâsan tsîn ge khoesi ǂkhabusasigu ǃoagu noxoba ra ǃkham. Sadu tsîna ti ra tsâ? ǀNî ǁaegu ai da Jehovab tātsē a ǀûba da ǁoa khami ra tsâ? Aiǁgause apostel Paulub tsîn ge ǀhapitsâsen hâse gere tsâ ǀoasa kurusab ūhâ tama amaga. (Rom. 7:24) Paulub ge ǃhobasen tsî ge ǁāǁnâhe. Xaweb ge noxoba “tita ge apostelgu hoagu xa a ǂkhari” tsî “hoan xa a kai ǁore-ao” ti ge ǂgaisen.—1Kor. 15:9; 1Tim. 1:15.

7. Tae-e da ǂâis ǃnâ nî ūhâ ǃkharuge ǁaeb ǁoren xa?

⁷ ǃHobasen da ga ob ge sida ǀhomsi ǁGûba ra mîmâi ǀûba dab nîsa. (Psa. 86:5) Amase da ga dī da go ǁoren ǃgao ǃhobasen, o da ge ǂgomǃgâsiba ūhâ ǁkhā Jehovab go hoase ǀûba dasa.—Kol. 2:13.

8-9. Jehovaba da tātsē ǂkhîǂkhî hō tides tsâsiga da mati a sîsenǂam ǁkhā?

⁸ Hoa da ge ǁkhā da a-e ra dītsâ î da Jehovaba ǃoaba. Xawen ge ǀnîna ra tsâ tātsē i dīn ra xūna ǂâu tidesa în Jehovab xa ūǃoahe. Amanda ti ǀon hâ ǃgâsas ge ra mî: “Tita ge ra ǂâi Jehovaba ta ǁkhā ta a-e ra dības ra ǂâibasensa, i ta ǁnās xa ǃnāsa-e dī. ǃNāsa ǁaeba ta ge ti ǁkhāsib xa ǃnāsase ra dī ǂgao. Tsî ta ga ǁnāsa sīǃnâ tama īo, o ta ge Jehovab ūǃoate tama khami ra tsâ.”

⁹ Jehovaba da tātsē ǂkhîǂkhî hō tides tsâsiga da mati a sîsenǂam ǁkhā? ǂÂis ǃnâ ūhâ re Jehovab ge kaise ǁnâuǃāxa. ǁÎb ge tātsē sida ǁkhāsib ǂam-ai hâ xū-e ǂgan da tama. ǁKhā da a-e da ra dīsab ge kaise ra ǃgôaǃgâ. Elobmîs aiǁgaude kō re matin khoena ǁîba ǂgomǂgomsase gere ǃoabasa. Aiǁgause Paulub xa ǂâi re. ǁÎb ge ǃgarise aoǁnâ sîsenni ǃnâ gere sîsen tsî ǂgui ǀasa ǀhaohâgu tsîna ge tsoatsoa. Xūn ge ǁîb ûib ǃnâ a dawa tsîb ge ǁkhāb a-e aoǁnâ sîsenni ǃnâ dī tama i, o i gere ǂâibasen Jehovab ge ǁîba ūǃoa tama isa? Hî-î, tātsēs tsîna. ǁÎb ge aiǃgû tsî ǁkhāb a-e ge dī tsîb ge Jehovaba ǁîba ge ǀkhae. (ǃNǃkh. 28:​30, 31) ǁNās ǁkhās khami i ge Jehovaba da ra dība xūna ǁaeb ra ī khami ǀkhara ǁkhā. Xawe Jehovaba a ǂhâǂhâsabas ge ǁkhā da-e dīsa. Hā re î da ǀnî  ǀgauga ǃhoaǃgao matib Jehovaba ra ūǃoa dasa.

JEHOVABA MATI RA ǁGAU SIDA ǀKHAB A ǂKHÎSA?

10. Mati da ra “ǁnâu” Jehovab ra ūǃoa dasa? (Johaneb 16:27)

¹⁰ Elobmîs ǃnâ-ū. Jehovab ge ǀgauga ra ôa îb ǁîb khoena ǁgau ǁînab a ǀnamsa tsîb ǁîna ra ūǃoasa. Xoadi ge ra ǁgau matib ge ǀgam ǃnāra kōse ǁgausa Jesubab a ǀnam tsî ra ūǃoasa. (Mat. 3:17; 17:5) Jehovab sado ra ūǃoasa du ra ǁnâu ǂgao? ǁÎb ge ǀhomma xu sada ǀkha a ǃhoa ǁoa xaweb ge Elobmîs ǃnâ-ū ǁnāsa ra dī. Jehovab Jesub ǃnâ ǃgâiǃgâibasensa ūhâs xa da ga khomai, o da ge ǁîb sida ra ūǃoasa ra ǁnâu. (Khomai re Johaneb 16:27 sa.) Jesub ge ǁîb ǁGûb ǀgauga ǀoasase gere ǁgae. Jesub ge mati ǁîb ǂgomǂgomsa saosabenab ra ūǃoasa gere ǁgau ǀgausa da ga khomai, o da ge a mûnan-ai ǁkhā Jehovab ǁnā mîde sada ǃoa ra mîsa.—Jhn. 15:​9, 15.

11. Tae-i ǃaroma da a mî ǁkhā ǃgomsiga da ga hōǃâ, o i ǂâibasen tamasa Jehovab xa da ūǃoahe tama ti? (Jakobub 1:12)

¹¹ ǁÎb ge ǂhâ da hâna ra mā da. Jehovab ge māsenxase ra hui da, ǁnāsab ge ǂhâ da hâ sorosi ǂhâsigu ǃnâ-ūs tsîna ra dī. ǀNî ǁaeb aib ge ǀnîsi mā-am ǁkhā î da ǃgomsiga hōǃâ, Jobi di aiǁgaus khami. (Job. 1:​8-11) ǃGomsina da ga hōǃâ, o i ge ǂâibasen tama Elob di ūǃoasa da go ǂoaǃnâ ti. Xawes ge nēsa ǃēsa ra mā da î da ǁgau, matikōse da Eloba a ǀnam tsî ǁîb ai ra ǂgomaiǂnûisa. (Khomai re Jakobub 1:12 sa.) ǃGomsiga da ga hōǃâ ǁaeb ai da ge nî mû, matikōseb ǀnam da tsî sida ǀkha ǁae hâsa.

12. Dmitrib aiǁgausa xu da tae-e ra ǁkhāǁkhāsen?

¹² Asiab ǃnâ ra hâ ǃgâsab Dmitiri ti ǀon hâb aiǁgausa ǃgaoǃgâ re. ǁÎb ge sîsen-e ge ǂoaǃnâ tsî ǁnās ǀkha ge mîmâi ǃnāsase aoǁnâ sîsen-e dīsa. Nēs ǃnâ-ūb ge ge ǁgau Jehovab aib ra ǂgomaiǂnûisa. ǂGui ǁkhâga ǃkharu tsîb ge noxoba sîsen-e ge hō tama hâ i tsî ǁnās ǂam-aib ge ega ǀaesen tsî kharob ǃnâ ǀgui gere ǁgoe. ǁÎb ge ge ǂâi tsoatsoa ǃgâi ǁgû tamas ka io ao tamab hâsa tsîb Jehovaba ǁîb ǀkha ǁae tama hâsa. ǀGuiǃuis ge ǁîb ǀgôarosa Jesajab 30:15 ǃnâ hâ mîde ge mābi, mî ra te: “Sadu ǃnōs tsî ǂgomǃgâs tsîn ge nî sadu  ǀgai.” Nē ǂkhinibas ge ǁîb tawa sī-ū tsî ge mî, “ti pa ǁgaise du ga tsâ ǃnās hoasa nē xoasa ǂâis ǃnâ ūhâ re.” Dmitrib ge ge mûǂan Jehovab huib ǀkha i ge ǁîb omarisa ǂû-i, saran tsî oms tsîna ūhâ isa. ǁÎb ge ra mî: “Tita nî dī xū-i ge ge ī, î ta aiǃgû ǃnomsase hâ tsî Jehovab ai ǂgomaiǂnûi ǀgarasa.” ǁKhā ǃgomsiba da ga hoǃâ, o da ge a ǂgomǃgâ ǁkhā Jehovab sada ǀkha ǁgae hâsa tsîb nî hui dasa nē mâsib ǃnâ mâǀgaisa.

13. Ham-i ǃnâ-ūb Jehovaba ǁgau ǁkhā sidab ra ūǃoasa tsî mâǀgaub ǃnâ?

¹³ ǃGâsan ǃnâ-ūb ge ra hui da. Jehovab ge ǃgâsana sîsenū tsî ǁîn ǃnâ-ū ra mîba da sadab ra ūǃoasa. Aiǁgauseb ge ǁîna sî ǁkhā în ǂhanu ǁaeb ai ǂkhâǃnâ da. Nēs ge Asiab ǃnâ hâ ǃgâsas ǀkha ǂâiǂhansens gere ǁaeb ǃnâ ge ī. ǁÎs ge sîsen-e ǂoaǃnâ tsî kaise ge ǀaesen. Tsîb ge ǁîs aob tsîna tsū ǁoreba dī tsî ǀhaohâb ǃûi-aosisa xu ge ūǁnâhe. ǁÎs ge ra mî: “Tita ge ge ǀū-i tae-i ǃaroman ge nēn hoana gere īsa. Jehovab ūǃoate tama tsî ta ge tsū xū-e a dī khami ta ge gere tsâ.” Nē ǃgâsas ge Jehovaba ge ǀkhoma, îb ǁîsa ǁgau ūǃoasib rasa. Nēsab ge mati ǁgau? ǁÎs ge ra mî: “ǀHaohâb ǃûi-aogu ge ge huite i ta mûǂan, Jehovab kaise tita a ǀnamsa.” Xawes ge ǁaeroba ǃkharu tsî ǁkhawa Jehovaba ge ǂgan îb ǂgomǃgâsiba māsi. ǁÎs ge ra mî: “ǁNātsēs ai ta ge ǃgâsana xu sîǂkhinisa ge hō. ǁNā mîde ta ge khomai, o ta ge ge mû Jehovab ge amase a ǃgâtesa.” Amase Jehovab ge khoexaǃnâ mîdi ǃnâ-ū ra ǁgau sidab ra ūǃoasa.—Psa. 10:17.

14. Mâ ǀgauga noxoba ra ǁgau Jehovab mā-amsa da ūhâsa?

¹⁴ Jehovab ge sida ǃnâb ǃgâiǃgâibasensa ūhâsa ra ǁgau, ǃgâsan ǃnâ-ūb ga ǁnamada  o. Aiǁgause, Jehovab ge apostel Pauluba ge hui îb 14 sîǂkhinide ǃgâsana ǃoa xoa. ǁNā sîǂkhinidi ǃnâb ge Pauluba ǀgaisa xawe ǀnamxaǃnâ ǁnamasa ge mā. Jehovaba tae-i ǃaroma nēsa ge mā-am? ǁÎb ge ǃgâi ǁGûb ase, ǁîb ǀgôan “ǂnīsa-aib” ana ra ǁnama. (ǂKhm. 3:​11, 12) ǁNā-amaga i ge khoe-i ga Elobmîsa xu ǁnama da, o ǂâibasen tama Jehovab sida ǀkha ǁgaixa hâsa. Xawe i ge ra ǁgau ǁîb noxoba sida a ǀnamsa. (Heb. 12:6) Mâ ǀgauga noxoba ra ǁgau Jehovab mā-amsa da ūhâsa?

JEHOVAB MĀ-AMSA DA ŪHÂSA RA ǁGAU ǀGAUGU

15. Jehovaba ham-e ǁîb ǃanu gagaba ra mā? Tsî tae-i ǃaromas nēsa ǂgomǃgâsiba ra mā da?

¹⁵ Jehovab ge ǁîb mā-amsa ūhâ khoena ǃanu gagaba ra mā. (Mat. 12:18) Dîsen ǁkhā da ge a, ‘ti ûib ǃnâ ta Elob ǃanu gagab xa ra ǃaromahe ǀgauga ra ǁgau?’ Jehovaba du ge ǂans aiǃâsa xu du nēsi ǃnāsase ǃnūǃnâxasiba ūhâsa du ra ǃgaoǃgâ? Elob gagab ǂûga ǁgausa du ra ǁkhāǁkhāsen khami i ge ra ǃgāsa Jehovab mā-amsa du ūhâsa.—“ Gagab di ǂûb ge . . . ” ti hâ boksisa mû re.

16. Jehovaba ham-e ra sîsenū ǃgâiaǂhôasa aoǁnâsa? Nēsa mati ra tsâ kai da? (1 Tesalonikaǁîn 2:4)

¹⁶ Jehovab ge ǃgâiǂhôasa aoǁnâsa ǁîb mā-amsa ūhâ khoen ǀguina ra mā-am. (Khomai re 1 Tesalonikaǁîn 2:4 sa.) ǃGaoǃgâ re Joslin ti ǀon hâ ǃgâsas ǃgâiǂhôasa naun ǀkha ǀgoragusa xu ra hō ǃgâiba. ǀGuitsēs ge Joslinsa ǂkhabuǂâi hâse ge khâimâ. ǁÎs ge ra mî: “Xū-e ta a māǁoa khami ta ge gere tsâ. Aimâba-aose ta ge gere ǃoaba tsî ta ge ǁnātsēs ai aoǁnâ sîsenni ǃnâ gere ǂoa.” ǁNā ǁgoagas ge Joslinsa, Maria ti ǀon hâ khoes Elobmîs ǁkhāǁkhāsa ge ūǃoas ǀkha ge ǀhao. ǁKhâga ǃkharu tsîs ge Mariasa ge ǁgam, Eloba ǃoas gere ǀgoresa îs huiba hō ǁnātsēs hînas ge Joslinsa ǁîs oms tawa a sīs ai. Joslins ge ī ge xū-i xas ge ǂâi, o ge mî: “ ‘Jehovab ūǃoa sī ta ge ra,’ ti ra mî khami ta ge gere tsâ.” Ama i ge hoa khoen hîna da ra aoǁnâban ge nē haisi-amsa ǃgâ tide. Xawe da ge ǂgomǃgâsiba ūhâ Jehovab a ǂkhîsa, ǁkhā da a-e da ga dītsâ tsî ǃgâiǂhôasa naun ǀkha ǀgoragu o.

17. Tae-e du xoremarib xa Vikisa xu ra ǁkhāǁkhāsen? (Psalmdi 5:12)

¹⁷ Jehovab ge ūǃoab ra khoena xoremariba  ra mā. (1Tim. 2:​5, 6) Xoremarib ǃnâ ǂgom tsî da ga ǁāǁnâhe xawe da noxoba Jehovab ūǃoa da tama khami ra tsâ? ǂÂis ǃnâ ūhâ re hoaǁae ta ge sida tsâsiga ǂgomǃgâ tama. Xawe da ge Jehovaba ǂgomǃgâ ǁkhā. Xoremarib ǃnâ ra ǂgomnab ge ǂhanu-aise ǁîb mûǁae ra mû tsîb ge ra mîmâi ǁînab nî ǀkhaesa. (Khomai re Psalmdi 5:12 sa; Rom. 3:26) Xoremarib xa ǂâiǃgâs ge Vikisa ge hui. ǀGuitsēs ǃgamse xoremarib xa ra ǂâiǃgâ, hînas ge ge mûǂan: “Jehovab ge gaxu ǁaeba ǀnamteb asa ǃnūǃnâxasib ǀkha ge ǁgaute. . . . Xawe i ge saorase ta Jehovaba ra mîba khami ge ī-i: ‘Sats tita khami ī khoe-e a ǀnam ǁoa tsî sa ǀGôab ǁguibas ge ti ǁorena a ǃgū-ai ǁoa.’” Xoremarib ǀkhaeb ai ǂâiǃgâs ǃnâ-ūs ge ge hōǃâ tsoatsoa, Jehovab xas a ǀnam-esa. Sada tsîn ge Jehovab xa da ǀnam-e tsî ǁîb mā-amsa da ūhâsa nî hōǃâ, xoremarib xa da ga ǂâiǃgâ o.

18. Mâ ǂgomǃgâsiba da ūhâ ǁkhā aiǃgû tsî da ga sida ǀhomsi ǁGûba ǀnam o?

¹⁸ Nē ǁkhāǁkhāǃâs ǃnâ da go ǁkhāǁkhāsen xūna da ra sîsenū ǂgao xawe da ge ǀnî ǁaegu ai ra ǂkhabuǂâi tsî ra ǂhâ Jehovab mā-amsa da ūhâsa. ǁNās ga ī o ǂâi-oa re, Elob “ǁîba ǀnam hân hoana” ra ūǃoa ǃkhaisa. (Jak. 1:12) ǁNā-amaga aiǃgû tsî Jehovab ǃoa ǀgū tsî ǀgauga ôa ǁîb sadob ra ūǃoasa ra ǁgausa. Hoaǁae ǂâis ǃnâ ūhâ, Jehovab “kaise ǃnūse hâ tama” hâsa.—ǃNǃkh. 17:27.