1-2. Mâ ǀkhaega du ǁāǁnâs khaoǃgâ a hō ǁkhā?

 KAISE kai ǃgâiaǂgaob ge ǁāǁnâhe tsî Jehovab omaris di ǁani kaisa. Nē aiǂhanuba ūhân ge Psalmdi xoa-aob Davidi mîde ra ǃkhō-am nēti ra mîde: “ǀKhaehe i ge hâ ǁnā-i ǁî-ets ra ǁhûi tsî ǀgūǀgū-e.”—Psa. 65:4.

² Jehovab ge mā-am tama hâ î-i mā khoe-i hoa-e ǁîb omaris di ǁani kai. ǃKharugo ǁkhāǁkhāǃâs ǃnâ i go ǃhoaǃgaohe khamib ge Jehovaba ǁîb ǀgū ǀhōsase ra hâ ǂgaon ǀguina ǁîba ǃoa ra ǂgae. (Jak. 4:8) Jehovab ai māǁnâsen tsî du ga ǁāǁnâhe o du ge ǀō-aisa ǀgaub ǃnâ Jehovab ǀgūse ra hâ. ǁĀǁnâs khaoǃgâ du ge a mû ǁkhā Jehovab “ǀhommi di mûǂuidaode ǁkhowa-am tsî ǃnāǂamsa ǀkhaeba” ǁhōǂuibatsi ǁkhā ǃkhaisa.—Mal. 3:10; Jer. 17:​7, 8.

3. Māǁnâsen tsî ǁāǁnâsa Xristeǁîna mâ ǀō-aisa ǃereamsa ūhâ? (Aoǁnâ-aob 5:​4, 5)

³ ǁĀǁnâs ge a tsoatsoa Jehovaba ǃoabasa. ǁĀǁnâhe toa du ga o du ge ǁkhā du a-i hoa-e nî dī ǂgao, î du māǁnâsens mîǁguiba dīǀoaǀoa. ǂGomǂgomsase du ge nî hâhâ ǃâitsâhe du ga xawe. (Khomai re Aoǁnâ-aob 5:​4, 5 sa.) Jesub ǁkhāǁkhāsabe-i ase du ge ǁîb aiǁgaudi tsî mîmâidi tsîna ǂōrisase nî sao. (Mat. 28:​19, 20; 1 Pet. 2:21) Nē ǁkhāǁkhāǃâs ge nî hui du nēsa dīǀoaǀoa.

 JESUBA “SAO” ǀGARA ǃÂITSÂGU TSÎ ǁGÂIĀGU ǃNÂ

4. Mâ ǀgaub ǃnân Jesub saosabena “ǃgâuhaiba” ra tani? (Lukab 9:23)

⁴ Tā du ge nî ǂâi ǁāǁnâhe du gos khaoǃgâb sadu ûiba nî supu ti. Jesub ge ǁguiǃā tsî ge mî ǁîb saosaben “ǃgâuhaiba” nî tanisa tsîn “tsēkorobe” ǁnâsa nî dīsa. (Khomai re Lukab 9:23 sa.) Jesuba ge mî ǁîb saosaben hoaǁae ǃgomma nî tsâsa? Hâ a, ti ǂâibasen tama. ǁÎb ge gere ǁgaraǃgao ǀkhaegu hōǃâ da ra gu ǂamai da ǃgomsina nî hōǃâ ǃkhaisa. ǀNî ǃgomsin ge kaise nî ǃgomǃgâxa.—2Tim. 3:12.

5. ǁGuibana ra dīnab Jesuba mâ ǀkhaega mîmâiba hâ?

⁵ ǀNîsi du ge ǀaokhoen xa ǀnai ra mâǃoahe. Tamas ka io du ge ǃnāsa mari-e kuru tsî xūna ǁamasa xu ra ǂgōsen. Elob Gaosiba ǂgurose sadu ûib ǃnâ mâis ǃaroma. (Mat. 6:33) ǁNāti i ga ī o du ge a ǂgomǃgâ ǁkhā, Jehovab ǁîba du ra dīban hoana a ǂansa. (Heb. 6:10) ǀNîsi di ge sao ra mîdi Jesub tide sadu ûib ǃnâ ge ama kai: “ǁÎ-i di oms, ǃgâsan, ǁgûra, ôasan tamas ka io ūn hâ xūna ga tita tsî ǃgâiǂhôas ǃaroma ǁnāxū-i hoa-i, ge ǂanǂansase nî mādawa-amhe. ǁÎn ge kaidisi ǃnādi kōse omdi, ǃgâsan, ǁgûdi tsî ūn ge hâ i xūna nē hâ ǁaeb ǃnâ nî ǃkhōǃoa, xawe nēn hoana ǃgôaǃgondi ǀkha. Tsî ǃgoaxaǁaeb ǃnâ nēn hoan tawa ǀamo ûiba nî ǀarobahe.” (Mrk. 10:​29, 30) Sadu hō hâ ǀkhaegu ge amabes ǃnâ kaise a ǂgui sadu ǁguibadi ǂam-ai.—Psa. 37:4.

6. Tae-i ǃaroma du nî aiǃgû ‘sorosi turaga’ ǃkhamǃoasa ǁāǁnâs khaoǃgâ?

⁶ ǁĀǁnâhe toa du gas khaoǃgâ du ge noxoba “sorosa xu hâ” turaga nî ǃkhamǃoa. (1Jhn. 2:16) Hâ as ge Adamma xu du ǀumî hâ ǁoreb ǃnâ du ge noxoba ûihâ. ǀNî ǁaegu ai du ge Apostel Paulub ge sao rase gere tsâ khami nî tsâ: “Ti ǃnākhoesib hoaba xu ta Elob di ǂhanub ǃnâ ra ǃgâiaǂgao, xawe ta ge ti soros ǃnâ ǀkhara ǂhanu-i, ti ǂâis di ǂhanub ǀkha ra ǃkham-e ra mû. ǁOreb di ǂhanub ge tita ǃnâ sîsen tsî tita ǃkhōsis ǃnâ ūhâ.” (Rom. 7:​22, 23) ǂKhabuǂâi ǁkhā du ge a tsū turaga du ra ǃkhamǃoa xūi-ao. Xawe du ga mîmâis Jehovab ǃoa-ai du ge māǁnâsens xa a ǂâiǃgâ, o du ge nî ǀgaiǀgaihe î du sadu turaga ǃkhamǃoa ǁkhā. ǃÂitsâga du ga hōǃâ os ge māǁnâsens mîmâisa nî hui du. Mâ ǀgaub ǃnâ?

7. Jehovab ǃoagu māǁnâsensa mati nî hui du, î du ǁÎb ǃoagu ǂgomǂgomsase hâ?

⁷ Jehovab ǃoa-ai du ga māǁnâsen, o du ge ra ǀuxusen. Nēs ge ra ǂâibasen sadu turagu, ǁgūbasen du ra xūn Jehovaba ra ǂkhîoǃnâ kaina ǁnāxusa. (Mat. 16:24) ǃÂitsâga hō tsî du ga ǃgom mâsiga hōǃâ, o du ge tā nî ǂâiǂhansen tae-e du nî dī ǃkhaisa. ǀGui xū-i xa ǀgui du ge nî ǂâi, nēs ge ǂgomǂgomsase Jehovab ǃoa-ai mâǀgarasa. ǁAposase mâǀgara tsî du ge Jehovaba nî ǂkhîǂkhî. ǁNāsa du ga dī, o du ge Jobi khami nî ī. Kaise ǃgom ǃâitsâgab ge ǃkharu ǃnâ xaweb ge ǂgomǃgâsib ǀkha ge mî: “ǁŌ ta nî tsēs kōse ta ǀhapio ta asa nî mî.”—Job. 27:5.

8. Sadu māǁnâsens ǀgores xa ǂâiǃgâsa mati nî hui î du ǃâitsâga mâǃoa?

⁸ Sadu māǁnâsens ǀgores Jehovab ǃoagu du ge dīs xa du ga ǂâiǃgâ, o du ge ǀgaiba nî hō mâ ǃâitsâ i hoa-e mâǃoasa. Aiǁgause, ǀnî hâ khoe-i aob tamas ka io tarasa du nî dî-am? Amase ī tide. ǀNai du ge Jehovab ǃoagu ge mîmâi ǁnāti ī xū-e du tātsēs tsîna dī tidesa. ǃGâi tama mâsiga du ga nēsi mâǃoa, o du ge ǃgombahe tide ega sī ǁnā  ǃgomsiga mâǃoasa. Tsî du ge ‘eloxoresan di daoga’ xu nî ǂgō.—ǂKhm. 4:​14, 15.

9. Māǁnâsens ǀgores xa ǂâiǃgâsa mati ra hui da, î da gagasi xūna ǂgurose sada ûib ǃnâ mâi?

⁹ Tae-e du nî dī ǀhaode hoaǁae hâǃnâsa mā-am du tama sîsen-e du ga hō o? ǁNās ga io du ge ǀnai a ǂan tae-e du nî dīsa. ǁNāti ī sîsen-e du nî hōs aiǃâ du ge ǀnai ge mîmâi, ǀhaode hoaǁae hâǃnâ kai du tide sîsen-e du ūǃoa tidesa. ǁNā sîsen-e ūǃoa tsî du ge a ǂâiǁoa nē sîsen-i hoaǁae ǀhaode nî hâǃnâ kai dusa. Jesub aiǁgaus xa ǂâi re, ǁîb ge ge mîǁgui hoaǁae Jehovaba ǂkhîǂkhîsa. Jesub khami du ge nî mîǁgui hoaǁae Jehovaba ǂkhîǂkhî tama xūna ǃkhaese tsî ǁaposase mâǃoasa.—Mat. 4:10; Jhn. 8:29.

10. Jehovaba mati nî hui î du ǁāǁnâs khaoǃgâ Jesuba “sao” ǀgara?

¹⁰ ǃGomsina hōǃâ tsî du ga ǃâitsâhe ǁaeb ai du ra dī xūn ge ra ǁgau, Jesuba du hoaǁae ra “sao” ǀgara ǂgao ǃkhaisa. Nēsa du ga dī, ob ge Jehovaba a hui du ǁkhā î du Jesuba sao ǀgara. Elobmîs ge ra mî: “ǀNî ǃâitsâ-i ge sado hāǂam tama hâ, khoesi ǃâitsâ-i ǀgui-i ose, xawe Elob ge a ǂgomǂgomsa tsî sadu nî ǁkhā du as ǂamai ǃâitsâhe ǃkhaisa mā-am tide. Nē ǃâitsâs ǀkhab ge ǁkhāti mâǃkharus di ǀgaiba nî mā du tsî ǁnāti huiba nî mā.”—1Kor. 10:13.

TAE-E DU NÎ DĪ I DU JESUBA SAO ǀGARA?

11. Mâpa a ǀō-aisa ǀgau Jesuba da a sao ǀgara ǁkhāba? (Ai-īsib tsîna mû re.)

¹¹ Jesub ge ǂgaob hoab ǀkha Jehovaba gere ǃoaba tsî ǀgores ǃnâ-ū hoaǁae ǁÎb ǀgūse gere hâ. (Luk. 6:12) ǀGui ǃgâi ǀgaub Jesuba ǁāǁnâs khaoǃgâ sao ǀgaras dib ge, Jehovab ǀgūse nî ǂgae du xūna  dīsa. Elobmîs ge ra mî: “A da ǀnai ta ge ǃkhōǃoan ǃoagu ǀgui ûi re.” (Fil. 3:16) ǁAeba xu ǁaeb ǀkha du ge nî ǁnâu ǃgâsan ge mati Jehovab ǃoabas ǃnâ ǁîn di sîsen-e a khoraǂui ǀgausa. ǀNîsin ge Gaosib aoǁnâ-aon skola ǃoa ge ǁkhauǂuihe tamas ka io kai ǂhâsib hâ ǃkhai-e ǃoa ge doe. Sadu mâsigu ga mā-am du, os ge nēsa a ǃgâi mîǁgui. Jehovab ǃoaba-aon ge turaxa tsî ǀgauna ra ôa în ǁîn ǃoabasa khoraǂui ǁkhā. (ǃNǃkh. 16:9) Tae-e du nî dī sadu mâsigu ga nēsi ǁnāsa mā-am tama io? Tā ǂkhari ǂâi tsî ǁnān ǁkhā an ǀkha ǀgopeǀnōsen. ǂHâǂhâsa i ge a, i du hoaǁae mâǀgai. (Mat. 10:22) Tā du ge nî ǀuru Jehovaba du ra ǂkhîǂkhîsa, sadu ǁkhāsib ǃnâ hân hoana du ra dī o ǁîba ǃoabas ǃnâ. ǁNāb ge ǀō-aisa ǀgaub hîna du Jesuba a sao ǀgara ǁkhāba, ǁāǁnâs khaoǃgâ.—Psa. 26:1.

12-13. Tae-e du nî dī ǂguro du ge Jehovab ǃoabas ǃnâ ūhâ i turaxasib ga ǂkhabu tsoatsoa o? (1 Korinteǁîn 9:​16, 17) (“ ǃKhoeǀhûgus ǃnâ hâ ǀgara” ti hâ bokisisa mû re.)

¹² Tae-e du nî dī ǂgaoba xu du ra ǀgore ǃkhaisa du ga hōǃâ tama io? Tamas ka io du ga ǃgâiǃgâibasensa aoǁnâ sîsenni ǃnâ hōǃâ tama io ǂguro du gere hōǃâs xa? Tae-e du nî dī ǂguro du ge Elobmîsa gere khomai o du gere hō ǃgâiǃgâibasensa du ga nēsi hōǃâ tama io? Nē mâsiga du ga ǁāǁnâs khaoǃgâ hōǃâ, o tā ǂâi re Jehovab gagaba du go ǂoaǃnâ ti. ǀOasa kurusa du ūhâ tama amaga i ge sadu tsâsiga ǁaeba xu ǁaeb ǀkha a ǀkhara ǁkhā. Sadu turaxasib ga ǂkhabu tsoatsoa, o Apostel Paulub aiǁgaus xa ǂâi re. Jesub aiǁgausab gere sao ǂgao xaweb ge Pauluba ge ǂan i, ǁaen aib ǂhâb hâ ǀgaisa turaba ūhâ tidesa îb ǁnāsa dī. (Khomai re 1 Korinteǁîn 9:​16, 17 sa.) ǁÎb ge ge mî: “Māsenxa tama  ta ka i, ǃereams hîa ta ǂgomǃgâbahe hâs ǃnâ.” ǀNî mîdi ǃnâb ge Pauluba ǁaposase ge mîǁgui hâ i, îb aoǁnâ sîsen-e dīǀoaǀoa. Mati ǀguib ga ǁnā ǁaeb ai tsâ xawes tsîna.

¹³ ǁNās ǁkhās khami du ge tā mîǁguiga nî dī tsâ du ra ǀgaugu ai ǀgui a ǃgaoǃgaosa ga. Mîǁgui re ǂhanu xū-e du nî dīsa mati ǀgui du ga tsâ xawes tsîna. ǂHanu xūna du ra dī ǀgara khami i ge ǁaeb ra ǃkharu khami sadu ra tsâ ǀgaub tsîna a dawa ǁkhā. ǁNās nî īs kōse i ge aitsama Elobmîsa ôaǃnâs, ǀgores, ǀhaode hâǃnâs tsî aoǁnâ sîsenni tsîna nî hui du, Jesuba sao ǀgarasa ǁāǁnâs khaoǃgâ. Sadu ǃgâsan ga hoaǁae Jehovab di ǃoabas ǃnâ du ra mâǀgai ǀgausa mû, on ge ǁîn tsîna nî ǂkhâǃnâhe.—1Tes. 5:11.

“ǃÂITSÂSEN . . . TSÎ ÔAǃNÂSEN”

14. Tae-e du hoaǁae nî ôaǃnâ tsî tae-i ǃaroma? (2 Korinteǁîn 13:5)

¹⁴ ǁĀǁnâhe toa du gas khaoǃgâ i ge a ǂhâǂhâsa i du hoaǁae ôaǃnâsen. (Khomai re 2 Korinteǁîn 13:5 sa.) ǁAeba xu ǁaeb ǀkha ǂōrisase sadu ûiba ôaǃnâ re. Aiǁgause, tsēkorobe du ǀgore, khomai tsî Elobmîsa ǁkhāǁkhāsen, ǀhaode hâǃnâ tsî aoǁnâ sîsenni ǃnâ ra ǁhaosa. ǀGauna ôaǃnâ mati du nē ǁaxasiga ǁkhoaxa kaibasen tsî ǃgâiba ǁîna xu nî ǀamasa. Aiǁgause sao ra dîde dîsen re, ‘Elobmîs ǁkhāǁkhāde ta nau khoena a ǁguiǃāba ǁkhā? ǀGauna hâ ti aoǁnâ sîsen-e ta ǁkhoaxa kai ǁkhāna? Ti ǀgorede mati a ǃgāsa tsî ǁgau-i ra hoaǁae ta Jehovab ai ra ǂgomǃgâsa? Hoaǁae ta Xristeǁî ǀhaode ra hâǃnâ? Mati ta ǀhaodi ǃnâ da ra ǃgaoǃgâ tsî ǁhao ǀgaub tsîna nî dī-ūnu?’

15-16. Tae-e du go ǁkhāǁkhāsen ǀgui ǃgâsab ǃâitsâba ge mâǃoaba xu?

¹⁵ Kaise i ge a ǂhâǂhâsa sadu ǂkhabusasiga ǂhauǃnâse ôaǃnâsa. Robert ti ǀon hâ ǃgâsab ge ǁîb ûib ǃnâ ge ī aiǁgausa ra mā, nē ǃkhaisa ǃgâise ra ǁgauǂuisa. ǁÎb ge ra mî: “20 Kurixa ta ge i, o ta ge ǀoasa tsēsa ǃkhoǂgā tama sîsen-e gere dī. Sîsenni khaoǃgâs ge ǀguitsē tita ǀkha gere sîsen khoesa ǁîs omsa ǃoa ge ǁkhaute. ǁÎs ge ge mî, ‘ǀgurîm ge nî hâ tsî ǃgâi ǁaeba nî ūhâ.’ Tsoatsoas ai ta ge ǀgaisase ge ǂkhā tama hâ i. Xawe ta ge ǀams ai hî-i ti mî tsî ge ǁguiǃā, tae-i ǃaroma ta ti ra mîsa.” Roberti ge nē ǃâitsâba ge mâǃoa tsî ǁnās ge koahesa anu hâ. ǁAeba ǃkharu tsîb ge nē ǃnaeǃkhais xa ǂâi tsî ge mûǂan. Nē ǃkhaisab ga ǀkhara ǀgaub ǃnâ dī hâsa. ǁÎb ge ǂanǃgâ tsî ra mî: “Tita ge ǁaposa tsî ǃhaese Josefi ge Potifari tarasa a mâǃoa khami  ge mâǃoa tama hâ i. (Gen. 39:​7-9) Amase ta ge kaise ge buru tae-i ǃaroma i ge ǃgom isa ǁnāsa mâǃoasa. Nē ǃnaeǃkhais ge ge huite i ta mû matikōse i a ǂhâǂhâsasa, i ta Jehovab ǀkha ta ūhâ ǀhōsagusisa ǀgaiǀgai.”

¹⁶ Sadu tsîn ge ǃgâiba a ǀama ǁkhā aitsama du ga ôaǃnâsen o, Roberti ge aitsama a ôaǃnâsen khami. ǃÂitsaba du ga dan ǁaeb ais tsîna dîsen re, ‘matikō ǁaeba ta go ū hî-î ti mîsa?’ Mû du ga xū-e du a dī-unu ǁkhā ǃkhaisa o tā ǂkhabuǂâi. ǃGâise tsâ re ǁnā ǂkhabusasiba du go mûǂan o. Sadu ǂkhabusasib xa Jehovaba ǃoa ǀgore re, i du sadu turaxasiba ra ǀgaiǀgai xūna dī tsî Jehovaba ǁnâuǀnam.—Psa. 139:​23, 24.

17. Jehovab ǀēnsa mati Roberti ge ǃkharu ǃnâ xū-i xa ga tsâǀkhāhe hâ?

¹⁷ ǀNî hâ xū-i tsîn ge hâ Roberti aiǁgausa xu da nî ǁkhāǁkhāsen-e. ǁÎb ge aiǃgû tsî ra mî: “Sîsenǀhao-ū ta ra khoesa ta ge mâǃoas khaoǃgâs ge ge mî, ‘ǃâitsâsabats ge go dan.’ Tae-es ta ǂâibasensa ta ge ge dîsi. ǁÎs ge ge ǁguiǃā, ǁîs ǀhōsab Jehovab ǃoaba-ao ge îb ge ge mîbasi, Jehovaba ra ǃoaba ǂkhamkhoen ge ǀgamǃnâgu ûiga ra ûi tsî ǁnā ǃēsan ga ho, o tsū xūna ra dī. ǁÎs ge ǁîs ǀhōsaba ge mîba, titas ge nî ǃâitsâ tsî nî mû ǁîn khami ta ī ǃkhaisa. ǁNā ǁaeb ai ta ge mûǂan tsî ge ǂkhî Jehovab ǀēnsa ta ge ǃgôa ǃkhaisa.”

18. Tae-e du mîmâi hâ dīsa ǁāǁnâs khaoǃgâ? (“ Saogura ǃâgu ǁkhoaxabahe du nî gu” ti hâ boksisa mû re.)

¹⁸ Jehovab ai māǁnâsen tsî du ga ǁāǁnâhe, o du ge ra ǁgau Jehovab ǀēnsa du hoaǁae ǃanuse ra ūhâ ǂgao ǃkhaisa. Tae-i ǀgui-i ga ī xawe. Tsî du ge a ǂgomǃgâ ǁkhā Jehovab sadu di ǃgomsina ǂan tsî ra mûsa ǃâitsâga du ra mâǃoa ǀgausa. ǁÎb ge sadu ra dī ǁgūtsâde ǂgomǂgomsase hâ ǀgaras ǃaroma nî ǀkhae. ǂGomǃgâ re ǁÎb ǃanu gagab nî ǀgaiǀgai dusa i du ǁnāsa dī. (Luk. 11:​11-13) Jehovab di huib ǀkha du ge Jesuba a sao ǀgara ǁkhā ǁāǁnâs khaoǃgâ.