1. Elobmîsa mati ama ǀnamma ra ǁguiǃā?

 ǀNAMMI ‘ǀaes ǁhabub khami ra ǁhabu, khau ra ǀaeb Jehovab dis khami. ǂGui ǁgamgu ge ǀnamma a ǀari ǁoa tsî ǃāgu ge a dâuǂam bi ǁoa.’ b (ǀG.ǁna. 8:6, 7) Nēb ge kaise ǀō-aisa ǀgaub ǀnammi ra ǁguiǃāheba. Nē mîdi ge ǃgamme hâ khoen ǃaroma ǁkhaeǂgaos ase ī. Ama ǀnamma ro ge a ūhâba gu ǁkhā.

2. ǃGamme hâ khoera tae-e a dī ǁkhā, î-i ǁîra ǀnamma tā ǃkhai?

² ǁGuiǂgāsensa î ge ǂhâhâ, ǃgamme hâ khoera ga ûitsama ra as kōse a ǀnamgu ǂgao o. Nēsa ǁguiǃās ǃaroma da ge ǀaes xa a ǂâi ǁkhā. ǀAes ge gāxuse a khau ǁkhā, khoe-i ga ǀaena a ǁgui-aisi o. Xawe i ga khoe-e ǁnāsa dī tama io, os ge ǀaesa a ǁō ǁkhā. ǁNās ǁkhās khami ra ge, ǀnî ǁaega ǃgamme hâ khoera tsîna a tsâ ǁkhā ǁîra ǁaegu hâ ǀnammi ra ǃkhai di. Nēs ge mari ǃgomsigu, ǀaeb mâsigu tamas ka io ǀgôana kaikais danatsûb xa a ǃaromahe ǁkhā. ǁNās ǀkha ǃgamme du ga īo, mati du ‘ǀaes Jehovab’ disa sadu ǃgammeb ǃnâ ûitsamase a ūhâ ǁkhā? Nē ǁkhāǁkhāǃâs ǃnâ da ge ǃnona ǀgauga nî ǃhoaǃgao. Mati du sadu ǀhōsagusisa ǀgaisase a ūhâ tsî mati du ǁkhoaxa ǃgammeb tsîna a ūhâ ǁkhā ǀgauba. c

3. Jehovab ǀkha ra ūhâ ǀgaisa ǀhōsagusisa mati ǃgamme hâ khoera a hui ǁkhā? (Aoǁnâ-aob 4:12) (Ai-īsiba mû re.)

³ ‘ǀAes Jehovab disa’ ra ga ûitsâmase a ūhâ ǂgao. O ra ge aob tsî taras tsîna ǃgarise nî sîsen î ra Jehovab ǀkha ra ūhâ ǀhōsagusisa ǀgaiǀgai. Nē ǀhōsagusis hîna ra Jehovab ǀkha ūhâsa mati ǁîra ǃgammeba ra ǀgaiǀgai? ǃGamme hâ khoe-aogu ra ga, ǁîra ǀhommsi ǁGûb ǀkha ra ūhâ ǀhōsagusisa a ǃgôaǃgâ. O ra ge ǁîra māsenxase ǁîb ǀapemāde a ǃgâ ǁkhā. Î ra ǃgomsin hîna ǁîra ūbagu hâ ǀnamma a ǃkhai kai ǁkhāba xu ǂgōsen tsî sîsenǂam ǁkhā. (Khomai re Aoǁnâ-aob 4:12 sa.) Gagasi khoen tsîn ge ra dītsâ Jehovaba ǁgaesa. Tsîn ge ǁîb ūhâ ǀgaugu tsîna ra ǁgau. Aiǁgause, khoexaǃnâsib, ǃnūǃnâxasib tsî ǀûbaǀnamxasib tsîna. (Efe. 4:32–5:1) ǃGamme hâ khoera ga nē ǀgauga ǁgau, ob ge ǀnamma ǁîra ǁaegu supuse nî kai. ǀNî ǃgâsas Lena ti ǀon hâs, 25 kurigu xa ǃnāsase ǃgamme hâs ge ra mî: “Kaise î ge a supu gagasi khoe-e ǀnam tsî ǃgôasiba ǁgausa.”

4. Jehovaba tae-i ǃaroma Josefi tsî Marias tsîna Mesiab di ǁgûra ase ge ǁhûi?

⁴ Saora Elobmîs aiǁgaus xa ǂâi re. Jehovab ge Mesiab di ǁgûrab ge ǁhûi. O Josefi tsî Marias tsîna Davib di surib khoen hoana xu ge ǁhûi. Tae-i ǃaroma? ǁÎra hoara ge Jehovab ǀkha ǀhōsagusisa ge ūhâ i. Tsî Jehovab ge ge ǂan-i, ǁîra ǁîba ǂgurose ǃgammeb ǃnâ nî ūhâsa. ǃGamme hâ khoena tae-e Josefi tsî Marias aiǁgausa xu a ǁkhāǁkhāsen ǁkhā?

5. Aoga tae-e Josefi aiǁgausa xu a ǁkhāǁkhāsen ǁkhā?

⁵ Josefi ge māsenxase Jehovab di daoǁgausa ge sao. Tsîb ge ǁîba ǁnās xa ge ǃgâi ao-i. ǁÎb ge ǃnona ǃnādi kōse ǁîb omaris ǃaroma daoǁgaude, Eloba xu ge hō. ǃNās hoasab ge ǁîba ǃkhaese gere ǁnâuǀnam nēs ge ǁîba ǃgomba i xawe. (Mat. 1:20, 24; 2:13-15, 19-21) Elob daoǁgaude saos ǃnâ-ūb ge Josefa, Mariasa mâxōǀkhā tsî ǁîs ǂhâsiga ge kōǃgâ. ǂÂis ǀguisa di re matikōses ge Mariasa, Josefa ǀnam tsî ǃgôasiba gere ǁgausa ǁîb gere dībasi xūn ǃaroma. Aogu tsîn ge Josefa ǁgae tsî Elobmîs ai ǃgaoǃgaosa ǀapemāde nî ôa, ǁîgu omaride kōǃgâs tawa ī ga hā o. d ǀKharaǀkharana dīs ga ǂhâbasa xawe go ga nē ǀapemāsa sîsenū tsî sago tarasa ǀnamma a ǁgau o. O î ge saro ǃgammeba nî ǀgai. ǃGâsas Vanuatub ǃnâ ra hâs hîna 20 kurigu xa ǃnāsase ǃgamme hâs ge ra mî: “Ti aob ga Jehovab daoǁgausa ôa tsî ga sîsenū o, o î ge ǁîba da ūba hâ ǃgôasiba ra kai. Nēs ge kaise ǁkhaubahe ta hâ khami ra tsâkaite.  Tsî ta ge ǁîb mîǁguigu ǃnâ ǂgomǃgâsiba ūhâ.”

6. Tarade tae-e Marias aiǁgausa xu a ǁkhāǁkhāsen ǁkhā?

⁶ Marias ge ǀhōsagūsisa Jehovab ǀkha ge ūhâ i. ǁNās ǀkha î ge ǁîs ǂgomsa Josefi gere dīn ai ge ǃgaoǃgaosa tama hâ i. ǁÎs ge xoade kaise ǃamkuse ge ǂan i. (Luk. 1:46) Tsîs ge ǁkhāǁkhāsens go xūna ǂâiǃgâs ǃaroma ǁaeba gere ǁamaǂui. (Luk. 2:19, 51) ǁNās ǀkha da ge a mî ǁkhā, Marias di ǀhōsagusis hînas ge Jehovab ǀkha ūhâ is ge ǁîsa ge hui is ǃgâi tara kai. Nētsēs tsîna di ge ǂgui tarade Marias aiǁgausa ra ǁgae. Aiǁgause, Emiko ti ǀon hâ ǃgâsas ge ra mî: “ǃGamme tama ta ge hâ io, o ta ge Elobmîsa ôaǃnâs di ǀapeǁguiba ge ūhâ i. Xawe ǃgammeb khaoǃgâb ge ti aoba hoaǁae gere ǀgore. Tsî omaris ǃoabas gere ǂgaeǂgui. Tsîs ge ti ǂgomsa ǁîb gere dībate xūn ai ge ǃgaoǃgaohe tsoatsoa. Mûǂan ta ge ge Jehovab ǀkha ta ūhâ ǀhōsagusisa ta aitsâma ǀgaisase nî ūhâsa. ǁNās ǀkha ta ge nēsi ǁaeba Elob ǀkha ra ǁamaǂui ǁnās ge ǀgores, Xoade khomais tsî Elobmîs xa ǂâiǃgâsa.” (Gal. 6:5) Taradi, aiǃgû tsîso ǀhōsagusisa Jehovab ǀkha ra ǀgaiǀgai khami gu ge aoga ǃgâi ǃaromade nî ūhâ, koa tsî ǀnamsosa.—ǂKhm. 31:30.

7. ǃGamme hâ khoera tae-e Josefi tsî Marias tsîna xu a ǁkhāǁkhāsen ǁkhā, ǀguiba ǃoabas xa?

⁷ Josefi tsî Marias tsîn ge ǀguiba gere sîsen, î ra Jehovab ǀkha ra ūhâ ǀhōsagusisa ǀgaisase ūhâ ǀgara. ǁÎra ge ǀguiba Jehovaba omaris ase ǃoabas di ǂhâǂhâsasiba ge mû. (Luk. 2:22-24, 41; 4:16) Omaris gere kai khamis ge nēsa ǀnîsi ge ǃgom i xawe ra ge noxoba ǁnāsa ge dīhō. Nēs ge kaise ǃgâi aiǁgausa ǃgamme hâ khoen ǃaroma. ǀGôana du ga Josefi tsî Marias khami ga ūhâ, o î ge ǀnîsi a ǃgom ǁkhā ǀhaode hâǃnâs tamas ka io ǁaeba omaris ǃoabas ǃgao ǁamaǂuisa. ǀNî ǁaega î ge ǀnîsi a ǃgom ǁkhā, ǃgamme hâ khoero ase ǀguiba ǁkhāǁkhāsen tamas ka io ǀgoresa. Xawe ǂâis ǃnâs tsîna ūhâ re, ǀguiba ro ga Jehovaba a ǃoaba. O ro ge ǁîba ǃoa ǀgū tsî saro ǁaegus tsîna ra ǀgū. ǁNās ǀkha Jehovab ǃoabasa saro ûib ǃnâ ǂgurose ūhâ re.

8. ǃGammeb ǃnâ ro ga ǃgomsiga a ûhâ o, tae-e a hui ro ǁkhā omaris ǃoabasa xu ǃgaiba hōsa?

⁸ Tae-e du a dī ǁkhā, ǃgamme ommi ǃnâ du ga ǃgomsiga a ūhâ o? Omaris ǃoabasa ǀguiba dis ge ǀnîsi ǃgâi tamase a mûsen ǁkhā. Ti i ga īo, o hoa ro a ǁkhoaxaba xūna dī re. Nēs ge nî hui, îro saro ǀhōsagusisa ǀgaiǀgai tsî ǀguiba Jehovaba ǃoaba ǂgao.

9. Aob tsî taras tsîna tae-i ǃaroma ǁaeba nî ǁamaǂuiba gu?

⁹ ǃGamme hâ khoero ase ro ge, saro ǀnamma a ǀgaiǀgai ǁkhā ǁaeba ǁamaǂuis ǃnâ-ū. Nēsa ro ga dī, o ro ge nau-i ra tsâ tsî ǂâiǀgauba a ǂan ǁkhā. (Gen. 2:24) ǃGaoǃgâ re tae-e ra ge Lilias tsî Ruslani tsîna mûǂansa, 15 kurigu khaoǃgâ. ǁÎs ge ra mî: “Mûǂanam ge ge ǂâim hâ khamim ǃnāsa ǁaeba ǀguiba ūhâ tidesa. Sîsenni, oms ai hâ sîsenan tsî ǀgôana kōǃgâs ǀkham ge kaise ge ǀhawe ī. Mûǂanam ge ge ǃgamme hâ khoe-i asem ga ǁaeba ǁamaǂui tama io, om ǃnūguse nî hâsa.”

10. ǃGamme hâ khoera Efeseǁîn 5:15, 16 ǃnâ hâ ǀapemāsa mati a sîsenū ǁkhā?

¹⁰ ǃGamme hâ khoena tae-e a dī ǁkhā, în ǁaeba ǁamaǂuiba gu? ǀNîsi ro ge ǂûǀhao tsî mati ro ǁaeba nî sîsenū ǀgauba a ǀape ǁkhā. (Khomai re Efeseǁîn 5:15, 16 sa.)  Nigeriab ǃnâ ra hâ ǃgâsab Uzondu ti ǀon hâb ge ra mî: “Dī ta nî xūna ta ga ǀapeǁgui, o ta ge ti taras tsîna ra ǃgôaǂgā. Tsî ta ge ǁnāsa kaise ǂhâǂhâsa ǁaeb ase ra mû.” (Fil. 1:10) Anastasia ti ǀon hâ ǃnarimâra mûǂam-aob taras, Moldovab ǃnâ ra hâs ǁîs ǁaeba ra sîsenū ǀgauba ǃgaoǃgâ re. ǁÎs ge ra mî: “Tita ra dī ǂgao xūna ta ge ti aob ǁîb ǁgaumâis ǀkha a ǀhawe ǁaeb ai gere dī. ǁNā ǀgaub ǃnâm ge tsēs ǀams ai ǁaeba ge ǁamaǂui ǁkhā ī sîm ǃaroma.” Xawe tae-e ro nî dī, saro ǀapeǁguib ga ǃgom o ǁaeba ǁamaǂuisa?

11. Akwilab tsî Priskilas tsîna mâ xūna ǀguiba gere dī?

¹¹ ǃGamme hâ khoen ge Akwilab tsî Priskilas di aiǁgausa xu a ǁkhāǁkhāsen ǁkhā. ǁÎra ge ǂgurokham ǁaeb Xristeǁîn xa kaise ge ǀnamhe ī. (Rom. 16:3, 4) Elobmîs ge ǂguina ǁîra ǃgammeb xa mî tama hâ. Xawe î ge ra ǁgau ǁîra ge ǀguiba sîsen, aoǁnâ tsî nauna ǀguiba gere huisa. (ǃNǃkh. 18:2, 3, 24-26) Akwilab tsî Priskilas tsîn ge Elobmîs ǃnâ ǀguiba xūna ra dī ǃgamme hâ khoera ase a ǂansa.

12. ǁAeba ǁamaǂui tsîra ǃgamme hâ khoera tae-e a dī ǁkhā? (Ai-īsiba mû re.)

¹² ǃGamme hâ khoena mati Akwilab tsî Priskilas tsîna a ǁgae ǁkhā? ǃGamme hâ khoero ase ro ǀguiba a dī ǁkhā ǂgui xūn xa ǂâi re. ǀNî xūna ro ǀnîsi ǀguiba a dī ǁkhā, mâ-i hoa-i ǀguri nî dīs xa? Aiǁgause, Akwilab tsî Priskilas tsîn ge ǀguiba gere aoǁnâ. Saro tsîna ǁnāsa a dīǁkhā? Akwilab tsî Priskilas tsîn ge ǀguiba gere sîsen. ǃGamme hâ khoero ase ro ge ǀnîsi ǀgui sîsen-e dī tama hâ. Xawe tae-i ǃaroma ro omsi hâ sîsenna ǀguiba a dīǁoa? (Aoǁn. 4:9) ǀGuiba ro ga xūna dī, o ro ge sîsenǁare-ao-i khami ra tsâ. Tsîs ge nēs tsîna ǃēsa ra mā îro ǃhoaǂgao ro ra xūn xa ǃhoa. Roberti tsî Lindas tsîn ge 50 xa a ǃnāsa kuriga ǃgamme hâ. ǁÎb ge ra mî: “Amaba ǃhoas ai, ǁkhoaxa ǁaeba ūhâs ǃaromam ge ǁaeba ūhâ tama hâ. Xawe xabana ta ga ǁā, os ge ti taras ra ǀom. Tamas ka io ta ga ǃhanab ǃnâ ga ra sîsen o, om ge ǀguiba ra sîsen. Kaise ta ge ra ǃgâiaǂgao nēs xa. Xūna ǀguib dīs ge sîma ra ǀhaoǀhao. Tsî î ge sîm di ǀnamma ra ǀgai.”

13. Aob tsî taras tsîna tae-e nî dī, îra amabes ǃnâ ǀguiǃnâxa?

¹³ ǂÂis ǃnâ ūhâ re ǀguiba hâ ǀhaos ge, ǂâibasen tama hâ ǁî-i ǀguiǃnâxasiba ǃoa nî ǀarosa. Brasili ǃnâ ra hâ ǃgamme taras ge ra mî: “Nēsi î ge ǂgui xūn hîna a ǂhani tsi ǁkhāna hâ. Tsits ge a ǂâi tsoatsoa ǁkhā, ǀgui oms ǃnâm ra hâ ǃkhais ǃaromam ge ǀnai ǁaeba ra ǁamaǂui. ǁKhāǁkhāsen ta ge ge ǀguiba hâ ǀhaos xam ge ǃnāsa-e nî dī. Tsî ǁkhām as kōse nau-i ǃaroma ǁaeba nî ǁamaǂuisa.” ǃGaoǃgâ re Brunob tsî Tays tsîn mati ǁaeba ra ǁamaǂuisa. ǁÎb  ge ra mî: “Xū-em ga dī tama io, om ge sîm di selfonga ǁhuibē tsî ǀguiba ra hâ ǀhao.”

14. ǃGamme hâ khoera ga ǀguiba hâ ǀhaos xa ǃgâibahe tama io, o ra tae-e dī ǁkhā?

¹⁴ Xawe ǃgamme hâ khoera ga ǃgâibahe tama io ǀguiba hâ ǀhaos xa? ǀNîsi ro ge ǃkharagagu xūn xa a ǃgâibahe. Tamas ka io ro ge ra ǀhū kai gu. ǁNāti î ga io, tae-e du a dī ǁkhā? ǀNai go ǃhoaǃgaohe ǀaes di aiǁgaus xa ǂâi re. ǀAes ge ǃkhaesa kau tsoatsoa tama hâ. Kai ǀaen ge ǂause nî ǂgāhe. ǁKhā ǀgaub ǃnâ, tae-i ǃaroma ro tsēs ǃnâ ǀgui ǃnâsa hâ ǀhaos ǀkha tsoatsoa tama hâ? Saro a ǃgâiba xū-e ǀguiba dī ǀhao re, xū-i hîna ǀgui-e nî ǁaiǁai i ose. (Jak. 3:18) ǂKharirose tsoatsoas ǃnâ-ū ro ge ǀnammi mati ǁkhawa ra kai ǀgauba nî mû.

15. Tae-i ǃaroma i ǃgôasiba a ǂhâǂhâsa, ǃgamme hâ khoera ǀnamma ûitsâmase ūhâs ǃgao?

¹⁵ ǃGôasib ge ǃgammeb ǃnâ kaise a ǂhâǂhâsa. ǁÎ-i ge ǂoab hîna ǀaesa ǀgaisase ra khau kai-i khami ī. ǂOab oses ge ǀaesa ǃkhaese ra ǁō. ǁKhā ǀgaub ai ǃgôasib ga ǀkhai o, o ra ge ǃgamme hâ khoera nî mû ǁîra ǀnammi ǃkhais ǀguis ra disa. Aob tsî taras ǃgôasiba ǁgaugusa ra dītsâ ra ge, ǁîra di ǀnamma ûitsamase ra ūhâ. Nēsa ǂâis ǃnâ ūhâ re, sadu ǃgôasiba ra ǁgau di ǂâis ge ǂhâǂhâsa tama hâ. Xawe î ge sadu ǃgamme hâ khoe-e nî tsâ ǃgôasiba î ra ǁgauhesa. Pennib tsî Arets tsîn ge 25 kurigu xa a ǃnāsase ǃgamme hâ. ǁÎs ge ra mî: “Sîm ǃgôasiba ra ǁgaugu amaga, î ge sîm di omsa ǀnammi xa ǀoa hâ. Hāra sem ge ra tsâ mâ xū-i hoa-e mîsa, ǂan-am amaga nau khoe-i ra mî xū-i ra ǃgôahesa.” Tae-e du a dī ǁkhā, î du ǃgamme du hâ khoe-e ǁgau ǁî-e du ǃgôasiba ūba hâsa? Abrammi tsî Saras aiǁgaus xa ǂâi re.

16. Aoga tae-e Abrammi di aiǁgaus xu a ǁkhāǁkhāsen ǁkhā? (1 Petrub 3:7) (Ai-īsiba mû re.)

¹⁶ Abrammi ge Sarasa ǃgôasib ǃnâ gere hâ-ū. ǁÎb ge ǁîsa ǃgaoǃgâxase gere ǃgâ tsî ǁîs ra tsâ ǀgaub xas tsîna gere ǂâi. ǀGui ǃnās ais ge Sarasa matis ge ǁgaixa hâ is xa ge mîba bi tsîs ge ǁîb tsîna ge ǂkhari-am. Abramma ǁgaixa tsî ǁîsa ge ǃau-ai? Hî-i. ǁÎb ge ge ǂan-i Saras ge ǁîb ǃnāga gere ǂgāmâisensa. Tsî ǁîb gere dī mîǁguiga gere ǂkhâǃnâsa. Abrammi ge ǁîsa ge ǃgâ tsî mâsiba ge ǃgâiǃgâi. (Gen. 16:5, 6) Tae-e da ra ǁkhāǁkhāsen? Aogo sago ge ǀgaiba ūhâ, omaris ǃgao mîǁguiga dīsa. (1Kor. 11:3) Xawe ǀnamxaǃnâ xū-i hîna gu aoga a dī ǁkhā î ge ǁîgu di taradi di ǂâi ǀgaub tsîna dîsa. ǃGōsase mîǁguib ga ǁîs tsîna a tsâǀkhā o. (1Kor. 13:4, 5) ǀNî ǁaegu ais ge ǂkhabuǂâi hâse nî tsâ tsî ǁîs ra tsâ ǀgauba a mî ǁkhā. ǁÎs tsâsiga du  ǃgôasiba ra ǁgau, ǃgaoǃgâxase ǃgâs ǃnâ-ū? (Khomai re 1 Petrub 3:7 sa.) Angelsa tsî Dmitrib tsîn ge ǁaubexa 30 kuriga ǃgamme hâ. ǁÎs aob ǁîsa ǃgôasiba ra ǁgau ǀgaub xas ge ra mî: “Dmitrib ge hoaǁae a aiǂhomsa ǃgâtesa ǁgaixa ta ga o. Tamas ka io ǃhoa ǂgaos ǀguis ta ga di o. ǃGâi tamase ta ga tsâ, ob ge ǁîba tita ǀkha a ǀguiǃnâxa.”

17. Saras aiǁgausa xu di tarade tae-e ǁkhāǁkhāsen ǁkhā? (1 Petrub 3:5, 6)

¹⁷ Saras ge Abramma ǃgôasiba ge ǁgau, ǁîb di mîǁguiga ǂkhâǃnâs ǃnâ-ū. (Gen. 12:5) ǀGui ǃnâs aib ge Abramma ǃâubasen tamase ge hā ǃhaokhoena ge ǃkhōǃoa. ǁÎb ge Sarasa ge ǂgan îs ǁîs gere dī xūna ǁnāxū tsî kai ǃgôab di pere-e am.(Gen. 18:6) Saras ge ǃkhaese Abrammi ge ǂgan xū-e ge dī tsî ǁîb mîǁguiba ge ǂkhâǃnâ. Taradi tsîn ge Saras aiǁgausa a ǁgae ǁkhā, aogu ra dī mîǁguiga ǂkhâǃnâs ǃnâ-ū. ǁNāsa so ga dī, oso ge ǃgammeba ra ǀgaiǀgai. (Khomai re 1 Petrub 3:5, 6 sa.) Dmitrib hîna go ǀnai a ǃhoaǃgaoheb ge ra ǁguiǃā, ǁîb taras mati ǃgôasiba ra ǁgau ǀgausa. ǁÎb ge ra mî: “Kaise ta ge ra ǃgôaǃgâ Angelas ti mîǁguiga ra ǂkhâǃnâsa. ǁÎs ǀkhara ǂâi ǀgauba nēs xa ūhâ xawe. ǀAmǂoas ga ǀkhara ǀgaub ǃnâ ra ī xawes ge mîǁgaiǁgaite tama hâ.” Kaise î ge a supu ǃgôasiba ūba tsi hâ khoe-e ǀnamsa.

18. ǃGamme hâ khoera mati ǁîra ǀnamma ûitsamase ūhâs ǃnâ-ū ǃgâiba ra hō?

¹⁸ Nētsēb ge ǁGâuaba ra dītsâ, îb Xristeǁî ǃgamme gu ǃnâ hâ ǀnamma dīkākā. ǁÎb ge a ǂan, ǃgamme hâ khoera ǁaegu î ga ǀnamma ǃkhai o. O ra Jehovab tsîna nî ǁnāxūsa. Xawe ama ǀnammi ge a dīkākāhe ǁoa. ǁNā-amaga ab sadu ǃgammeb ǃnâ hâ ǀnamma, ǀGapiǁnaetsanas ǃnâ ra ǁguiǃāhe ǀnammi khami ī. Saro ûiba ǀguiba Jehovaba ǃoabas ǃnâ ǃgaoǃgao re. ǁAeba ǁamaǂuiba gu tsî nau-i ǂhâsigu tsî tsâsigu tsîna ǃgôasiba ūhâba. ǁNāsa du ga dī, ob ge sadu ǃgameba Jehovab hîna ǀnammi ǃgaoǃgaoba nî koa. Tsî ǀaes khami i ge sadu ǀnamma ǀamosib kōse nî khau ǀgara.