1. Jehovaba ǁîb ǃoaba-aona ra ǁkhau în tae-e dī? (Ai-īsiba mû re.)

 HAM-E ǃoa da nî ī ǁkhaeǂgaos tsî daoǁgaus tsîna da ga ǂhâba o? ǁNā dîs di ǃereamsa da ge a ǂan. Jehova Eloba ǃoa da ge a ǀgore ǁkhā. Jehovab ge ra ǁkhau da, î da ǁnāsa dī. ǁÎb ge ra ǂhâba î da ǀgore, ǁnās ge ‘ǀûs ose ǀgoresa.’ (1Tes. 5:17) ǁÎba ǃoa da ge ǀgore tsî da ge daoǁgausa sida ûib ǃaroma a ǂgan ǁkhā. (ǂKhm. 3:5, 6) ǁÎb a māxa Elo amagab ge Jehovaba ra mî, î da ǂhâba da hâs kōse ǁîba ǃoa ǀgore.

2. Tae-e da nē ǁkhāǁkhāǃâs ǃnâ nî ǃhoaǃgao?

² Kaise da ge ra ǃgôaǃgâ, Jehovab ra mā-am dasa î da ǁîb ǃoa ǀgore. Xawe dī da ra xūn hoan ǀkha î ge a ǃgomba da ǁkhā, ǁaeba ūhâsa ǀgores ǃaroma. Tsî da ge a tsâ ǁkhā sida ǀgorede ǃgâiǃgâisa. Gangan da ge ra ǂkhâǃnâdi tsî daoǁgaudi tsîna da xoadi ǃnâ ra hōsa. Nē ǁkhāǁkhāǃâs ǃnâ da ge nî ǃhoaǃgao, mati da ǀgores ǃaroma ǁaeba nî mâiǂuisa Jesub di aiǁgausa ra ôaǃnâse. Tsî da ge nî ǃhoaǃgao, mati da sida ǀgorede a ǃgâiǃgâi ǁkhā ǀgauba. Nēs ge 5 ǂhâǂhâsa xūna ǃkhōǂgā hâ.

3. Jesuba tae-e ǀgores xa ge ǁnâuǃā?

³ Jesub ge ge ǁnâuǃā, ǀgores Jehovab ǃaroma a ǂhâǂhâsa ǃkhaisa. ǃHūbaiba ǃoab nî hās aiǃâb ge ge mû, ǁîb ǁGûb mati ǂgomǂgomsa aogu tsî taradi ǀgorede ra ǃeream ǀgausa. Aiǁgauseb ge Jesuba ǁîb ǁGûb ǀkha ge hâ i, Hannas, Davib, Eliab tsî ǀnî ǂgomǂgomsa khoen di ǀgoredi gere ǃereamhe o. (1Sam. 1:10, 11, 20; 1Gao. 19:4-6; Psa. 32:5) ǁNā-amagab ge Jesuba ǁîb ǁkhāǁkhāsabega  ge ǁkhāǁkhā, î gu ǁkhoaǂgaose ǀgore.—Mat. 7:7-11.

4. Tae-e da Jesub di ǀgorede xu ra ǁkhāǁkhāsen?

⁴ Jehovaba ǃoa ǀgores ǃnâ-ūb ge Jesuba ǁîb di ǁkhāǁkhāsabega aiǁgau-e ge mā ǁgaegu nîse. ǁÎb di aoǁnâ sîsenni ǃnâb ge Jesuba, hoaǁae gere ǀgore. ǁAebab ge ǀgores ǃaroma ga mâiǂui hâ, ǃnāsa ǁaebab ge khoen ǀkha hâ i amaga. (Mrk. 6:31, 45, 46) ǁGoagab ge anib gere ā, o gere ǂhai. Îb ǁaeba ǀguri ūhâ ǁkhā ǀgores ǃaroma. (Mrk. 1:35) ǀGui ǃnās aib ge hoa ǃuisa gere ǀgore, ǂhâǂhâsa mîǁguibab nî dīs aiǃâ. (Luk. 6:12, 13) Tsîb ge Jesuba ǀgore hâse gere hâhâ, ǁōb nî ǃuis aiǃâ. ǁÎb ǂâisab ge ǁîb di ǃgom ǁgaumâis ai a mâi amaga.—Mat. 26:39, 42, 44.

5. Mati da Jesuba a ǁgae ǁkhā ǀgore da ga o?

⁵ Jesub aiǁgaus ge ra ǁkhāǁkhāda, matikōse da ga ǀhawe xawe da ge ǁaeba nî mâiǂui ǀgores ǃaroma. Jesub khami da ge sida tsîna ǁaeba nî ǁamaǂui ǀgores ǃaroma. Anib ās ai khâimas tamas ka io ǃûia. ǁNāti da ga dī, o da ge Jehovaba ra ǁgau nē ǀō-aisa ǀkhaeba da ra ǃgôaǃgâsa. ǃGâsas hîna Lynne di ǀon hâs ge ra ǂâihō, matis gere ǃgôaǃgâsa nē ǀgores di aiǂhanub xas ge ǁkhāǁkhāsen o. ǁÎs ge ra mî: “ǁKhāǁkhāsen ta ge o, Jehovab ǀkha da mâǁaeb hoab ai a ǃhoa ǁkhāsa. O î ge ge huite î ta ǁîba ti ǀgū ǀhōsab ase mû. Tsî ti ǀgorede ǃgâiǃgâi.” ǂGom da ras ge hoada ti ra tsâsa. Hā re î da 5 ǂhâǂhâsa xūna ǃhoaǃgao, ǀgoreba ǁkhā da ana.

6. ǂHaiǂhais 4:10, 11 ǃoagub Jehovaba tae-e anu hâ?

⁶ Jehovaba koas. Buruxa kēbos ǃnâb ge apostel Johanneba, 24 ǀhaohâb ǃûi-aoga ge mû ǃgōsase Jehovaba ra koa ga. ǁÎgu ge Eloba ge koa mî rase, ǁÎb a anu ǃkhaisa ‘ǂkhaisib, ǃgôasib tsî ǀgaib tsîna ǃkhōǃoasa.’ (Khomai re ǂHaiǂhais 4:10, 11 sa.) ǂGomǂgomsa ǀhomǃgāgu tsîn ge ǂgui ǃaromade ūhâ Jehovaba koas diga. ǁÎgu ge ǁîb ǀkha ǀhommi ǃnâ hâ tsî ǃgâise a ǂganbi. ǁÎb di ǀgauga gu ge ra mû, dīb da xūn ǃnâ-ū. Jehovab xūna ra  dī ǀgausa gu ga mû o, os ge ǁnāsa ǁîga ra ǂkhâǃnâ î gu ǁîba koasa mā.—Job. 38:4-7.

7. Tae-i ǃaroma da Jehovaba a koa ǁkhā?

⁷ Sada tsîn ge ǀgoredi ǃnâ Jehovaba nî koa. Tsî da ge ra mîba bî ǂgao, taena da a ǀnams tsî taena da ra ǃgôaǃgâsa ǁîb xa. Elobmîsa du khomai tsî ra ǁkhāǁkhāsen ǁaeb ai, ôa re mâ ǀgaugu Jehovab diga du sado ra ǃgôaǃgâsa. (Job. 37:23; Rom. 11:33) Tsî ǁnāpaxū Jehovaba mîba re, mati du ǁnā ǀgaugu xa ra tsâsa. Tsî da ge Jehovab tsîna a koa ǁkhā, sida tsî ǃhūbaib ǂhawase hâ ǃgâsan tsînab ra hui ǃkhais ǃaroma. ǁÎb ge hoaǁae kōǃgâ tsî ra ǁkhauba da.—1Sam. 1:27; 2:1, 2.

8. Mâ ǂgui ǃaromade da ūhâ Jehovaba gangansa? (1 Tesalonikaǁîn 5:18)

⁸ Jehovaba gangan. ǂGui ǃaromade da ge ūhâ, Jehovaba ǀgores ǃnâ-ū gangansa. (Khomai re 1 Tesalonikaǁîn 5:18 sa.) Ū da hâ ǃgâi xūn hoan ǃaroma da ge a ganganbi ǁkhā. Hoa ǃgâi mādi ǁîba xu ra hā amaga. (Jak. 1:17) Aiǁgause, da ge Eloba gangan ǁkhā sida îxa ǃhūbaib tsî kurub ge xūn hoan ǃaroma. Tamas ka io da ge ǁÎba a gangan ǁkhā sida ûib, omaris, ǀhōsan tsî hānîǁaeb ǃâubasens ǃaromas tsîna. Tsî da ge Jehovaba ra gangan ǂgao, mā-am dab ra ǃkhais ǃaroma î da ǁîb ǀkha ǀō-aisa ǀhōsagusisa ūhâ.

9. Tae-i ǃaroma da ǃgôaǃgâsiba Jehovaba nî ǁgau?

⁹ ǀNîsi da ge nî ǁgūtsâ, î da ǃaromadi xa ǂâi Jehovab ǃoagu da nî ganganxa di xa. Ganganoǃnâ ǃhūbaib ǃnâ da ge ûi hâ. Khoen ge ǁîn ra ǂhâban ai ǂâisa ra ǂnûi xawe ūnhâna ǃgôaǃgâ tama. Nēti ī ǀgauba da ga ǁgae, o î ge sida ǀgorede hoaǁae ǂgans xa ǀgui nî hâ. Nēs sada ǀkha nî īsa da ga ǂhâba tama io, o da ge aiǃgû tsî Jehovab sida ra dība xūn ǃaroma ǃgôaǃgâsiba nî ǁgau.—Luk. 6:45.

10. ǃGôaǃgâsiba ǁgausa mati ǀgui ǃgâsasa ge hui îs mâǀgai? (Ai-īsiba mû re.)

¹⁰ Ganganxasib ge nî hui da, î da ǃgomsigu ǃnâ mâǀgai. Kyung-sooks di aiǁgaus hîna Januarib 15, 2015 ni ǃKhē xu ǂgō-ommi ǃnâ hâsa mû re. ǁÎs ge sōb kankersa ge hōǃâ-e. ǁÎs ge ra mî: “Nē ǀaeb ge kaise gere ǂhabuǂâi kaite. Hoana ta ge ǂoaǃnâ khami ta ge gere tsâ. Tsî ta ge gere ǃao.” Tae-e ge huisi is mâǀgai? ǁÎs ge ra mî ǁoms ni aiǃâs ge ǃuis hoasa, oms ǀgapigaba ǃoa ī. Tsî koro xūn hînas ǁnā tsēs ǃaroma ra ǃgôaǃgâna gere ǀgoreba. Nēs ge ǁnātikōse ge ǂkhabuǂâi kaisi tama hâ i. Xawe ge ǂkhâǃnâsi îs ǁîs ǀnamma Jehovaba ǁgau. ǁÎs ge ge mû matib Jehovaba, ǁîb ǂgomǂgomsa ǃoab-aona ǃgomsigu ǃnâ ra hui ǀgauba. Mûs tsînas ge ge di, ǂgui ǀkhaega da sida ûib ǃnâ ra hōǃâsa ǃgomsigu xa. Tsî Kyung-sooks khami da ge ǂgui ǃaromade  ūhâ, Jehovaba gangansa. ǃGomsina da ga hōǃâ xawe. Sida ǃgôaǃgâsiba ǁîba ǀgores ǃnâ-ū mîbas ge nî hui da, î da mâǀgai tsî ǃnomsase hâ.

11. Jesub ǁkhāǁkhāsabega tae-i ǃaroma ǁkhoaǂgaosiba ge ǂhâhâ i, ǁîb ge ǀhomma ǃoa a oas khaoǃgâ?

¹¹ Jehovaba aoǁnâ sîsenni ǃgao ǁkhoaǂgaosiba ǂgan. ǀHommi ǃoab nî oas aiǃâb ge Jesuba ǁîb ǁkhāǁkhāsabega ǁîgu ǁgaumâis xa ge ǂâiǂâiǃnâ. Îgu ǁîb xa “hoaraga khoen Jerusalems, Judeab, Samariab tsî hoaraga ǃhūbaib ǃnâ hâna . . ǀhûǀguiba.” (ǃNǃkh. 1:8; Luk. 24:46-48) ǁAeroba ǃkharu tsî î ge Jodeǁî ǂgaeǂgui-aoga, apostel Petrub tsî Johaneb tsîkha ǂganamǂgā tsî ǀapemāǃnans aiǃâ ge sī-ū. Nē ǀapemāǃnans ge ǁîga ge mîba, î gu aoǁnâ ǀû. Tsî ǁîga ǃaoǃaos tsîna ge di. (ǃNǃkh. 4:18, 21) Petrub tsî Johaneb tsîkha mati ge tanisen?

12. ǃNaeǃkhaidi 4:29, 31 ǃoagun ge ǁkhāǁkhāsabena tae-e dī?

¹² Pertub tsî Johaneb tsîkha ge Jodeǁîn ǂgomdi ǂgaeǂgui-aoga nēti ge ǃeream: “Eloba i kha a ǃgâiba sikhom nî Elob ǃgâ-ai sago ǁnâuǀnam ǃkhaisa? Sago aitsama ǀgoraǃgâ. Tātsē khom ge sikhoma sikhom ge mû tsî ǁnâu ǃgâina khoena ǃhoabaǀû ǁoa.” (ǃNǃkh. 4:19, 20) Petrub tsî Johaneb tsîkha ge ǃkhōsisa xu a ǂoa o, on ge ǁkhāǁkhāsabena Jehovaba ǃoa ge ǀgore în ǁîb di ǂâisa dīǀoaǀoa. ǁÎn ge nē ǀgaub ǃnâ ge ǀgore: “Îts sida sa ǃgāda ǁkhoaǂgaose sa mîsa ǂhôas di ǀgaiba mā.” Jehovab ge ǁnā ǀgores hîna ge ǂgaob ǃgamsiba xu a dīhesa ge ǃeream.—Khomai re ǃNaeǃkhaidi 4:29, 31 sa.

13. Jin-hyuki aiǁgausa xu da tae-e a ǁkhāǁkhāsen ǁkhā?

¹³ Jesub ǁkhāǁkhāsabega da ge a ǁgae ǁkhā, ǂhanub ga ǂkhā da xawe aiǃgû tsî aoǁnâs ǀkha. Jin-hyuk di ǀon hâ ǃgâsab di aiǁgausa kō re, hîna ge ǀkhā-eb ǁhûi tama hâ amaga ǃkhōsis ǃnâ hâ îba. ǃKhōsis ǃnâb ge ge ǁgaumâihe, îb bantiga kōǃâ. Xaweb ge ge mā-amhe tama hâ i, îb ǁîb ǁgaumâis xa a ǀkhara xū-i xa ǃhoa, Elobmîsa ǃkhōǂgā hâse. ǀGoreb ge ge îb mâǃēs hînab ra hōs hoasa, gā-aisib tsî ǁkhoaǂgaosiba sîsenū îb aoǁnâ ǁkhā. (ǃNǃkh. 5:29) ǁÎb ge ra mî: “Jehovab ge ti ǀgorede ra ǁnâu-am, ǁkhoaǂgaosib tsî gā-aisib tsîna mātes ǃnâ-ū. Î ta Elobmîs ǁkhāǁkhāte ǃkhōsis ǃnâ tsoatsoa ǁkhā, hîna ta 5 haigu ǀguiga gere dīga. Tsî ǃui-a ta ge sîǂkhanide gere xoa, î ta saora tsēs ai ǁîga mā ǁkhā.” Jin-hyuki khami da ge ǁkhoaǂgaosib tsî gā-aisib tsîna a ǀgoreba ǁkhā, ǂgomǃgâ rase Jehovab nî hui dasa î da aoǁnâ sîsen-e dīǀoaǀoa.

14. Tae-e nî hui da ǃgomsiba da ga hōǃâ o? (Psalmdi 37:3, 5)

¹⁴ Jehovab ai huiba ǂgan re ǃgomsin ǃnâ mâǀgais ǃgao. Hoa da ge ǃgomsina ra hōǃâ, aiǁgause sorosi ǃnubusigu, ǂâiǂhansendi, ǀnamsabe-e ǁōb ǃnâ ǂoaǃnâs. Omaris ǃgomsigu, ǃgôaǃgonhes tamas ka io ǀnî hâ ǃgomsin tsîna ǃkhōǂgā hâse. Tsî ǀaegu khoraǂuisens tsî torogu tsîn ge noxoba mâǀgaisa ra ǃgom kai. Jehovaba ǃoa ǂgaob ǃgamsiba xu ǀgore re. Sadu tsâsigu xa du ǀgū ǀhōsa-e nî mîbas ǁkhās khami Jehovab tsîna tsâ du ra ǀgauba mîba re. ǂGomǃgâ ǁkhā du ge a Jehovab xu-e nî ‘dība’ dusa.—Khomai re Psalmdi 37:3, 5 sa.

15. ǀGoresa mati a hui da ǁkhā, î da “ǁgâiǀāb ǃnâ mâǀgai”? Aiǁgau-e mā re.

 ¹⁵ ǀGores ǃnâ da ga hâhâ, o da ge nî huihe î da “ǁgâiǀāb ǃnâ mâǀgai.” (Rom. 12:12) Jehovab ge a ǂan ǁîb ǃoaba-aon tae-e ra ǃkharuǃnâsa tsîb ge “ǁîn ǀkhomabasensa” ra ǁnâu. (Psa. 145:18, 19) Kristie ti ǀon hâ 29 kurixa aimâba-aos ge, ǁnā mîdi di amaba ge mû. ǁÎs ge ǃâubasen tamas hâ hîna ǁkhōǁkhōsa ǀaeb mâsiga gere hôǃâ. ǁNās xa ǃaromahe hâses ge ǁîsa, ǁgai depresiba ge hō. Tsîs ge ēga ge ǂanǂui, ǁîs ǁgûs go ǂgauheǁoa ǀaeba a hōǃâhesa. Kristies ge ra mî: “Tita ge ǀkhaexase Jehovaba ǃoa gere ǀgore. Îb ǀgaiba māte î ta mâ tsēs hoasa mâǃkharu ǁkhā. Dītsâ ta ge ge î ta ǃgâi gagasi mîǁguiba ūhâ, ǀhaode hâǃnâ tsî ta ge aitsama Elobmîs ôaǃnâte gere dī.” ǁÎs ge ra ǀaro: “ǀGores ge ge huite, î ta nē ǃgom ǁaeba mâǃkharu. ǂAn ta ge ge ī, Jehovab ge hoaǁae tita ǀkha hâ īsa. Tsî ǁnā ǂâis ge tita kaise gere ǁkhaeǂgao. Tî ǀaeb mâsib ge toa tama hâ i xaweb ge Jehovaba ti ǀgorede ge ǃeream. Tsîb ge ǂkhîb tsî ǃnomsasib tsîna ti ǂgaob ǃnâ ge māte.” Tā da ge nî ǀguru Jehovab ge a “ǂan, mâtib nî eloǃaoǃgâxana ǃâitsâba xu ore” ǃkhaisa.—2Pet. 2:9.

16. Tae-i ǃaroma da Jehovab huiba ǂhâhâ, î da ǃâitsâna mâǃoa?

¹⁶ Jehovab ai huiba ǂan re î du ǃâitsâga mâǃoa. ǀOasa kurusa da ūhâ tama hâ xui-ao da ge hoaǁae, tsū xūna dis di ǃâitsâga ra ǃkharuǃnâ. ǁGâuab ge ǁkhāb a-i hoa-e ra dī îb ǁnā ǃkhamsa ǃgomǃgom. ǀGui ǀgaub hînab ǁnā-e ra dī î ge sida ǂâi ǀgauba ǀuriǀurisa, ǃgâi tama ǁkhoaxa ǁaeba ūhâs ǃnâ-ū. ǁNāti-i ǁkhoaxa ǁaeba ūhâs ge sida ǂâi ǀgauba, ǀurixa ǂâi ǀgaugu ǀkha a ǀoaǀoa ǁkhā.  ǂÂidi hîna sida ǂganagab di khoeba a ǀuriǀuri ǁkhāna tsî a ǁore kai da ǁkhana.—Mrk. 7:21-23; Jak. 1:14, 15.

17. Huiba da ga ǀgorebas khaoǃgâ, da tae-e nî dī? (Ai-īsiba mû re.)

¹⁷ Jehovab huiba da ge ǂhâhâ, tsū xūna dīs di ǃâitsâba da ga dan ǂgao o. Jesub ge saora-e ǁîb di ǁkhāǁkhāsabega ge ǁkhāǁkhā sida îtseb ǀgores ǃnâ: “Î tā ǃâitsâb ǃnâ ǂgaeǂgui da, î ǂkhababa xu ore da.” (Mat. 6:13) Jehovab ge ra huida ǂgao xawe da ge nî ǂgan îb huida. Tsî da ge sida ǀgoredi ǀkha nî sîsenǀhao. Tsî da ge ǃgarise a dīstâ ǁkhā, î da tā ǁGâuaba ǃhūbaib ǃnâ hâ ǂâiǀgaugu xa khomai tsî ǃâ. (Psa. 97:10) Sida ǂâide da ge ǃanu ǂâidi ǀkha a ǀoaǀoa ǁkhā. Elobmîsa khomais tsî ǁîsa ôaǃnâs ǃnâ-ū. ǀHoade hâǃnâs tsî aoǁnâ sîsenni ǁhaos tsîn ge sida ǂâiǀgauba a ǁkhauba ǁkhā. Jehovab ge ra mîmâiba da, ǁÎb ǁkhā da as ǂamai ǃâitsâhe mā-am tidesa.—1Kor. 10:12, 13.

18. Tae-e da sida hoada nî dī ǀgores dawa î ga hā o?

¹⁸ Sida hoada ge ǃnāsase nî ǀgore, î da nē ǃgom ǀuniga tsēdi ǃnâ ǂgomǂgomsase hâ Jehovab ǃoagu. Mâ tsēs hoasa ǁaeba ǁamaǂui tsî ǂgaob ǃgamsiba xu ǀgore re. Jehovab ge ra ǂhâba î da ‘ǁîb aiǃâ sida ǂgaoba ǁhōǂui.’ (Psa. 62:8) ǁÎba koa tsî dīb ra xūn hoan ǃaroma gangan re. ǁÎba ǂgan îb hui du ǁkhoaǂgaose aoǁnâsa. Mâ ǃgomsi-i tsî ǃâitsâ-i hoa-i ǃnâ mâǀgais di ǀgaiba ǂgan re. Khoe-i tamas ka io xū-i xare-e tā mā-am î-i Jehovaba ǃoa hoaǁae ǀgoresa ǁkhae du. Jehovaba mati ǀnâi sida ǀgorede ra ǃeream? ǁNā ǂhâǂhâsa dîsa da ge saora ǁkhāǁkhāǃâs ǃnâ nî ǃhoaǃgao.