1. ǁNâuǃāxa ǂâisa ūhâ ǀgarasa tae-e ra ǂâibasen? (2 Timoteub 4:5)

 ǃGOMSINA da ga hōǃâ, o i ge sada ǂgomǂgomsasib hîna da Jehovab. Tsî ǁîb ǀapeǂhumis ǃoagu ūhâba a ǃâitsâhe ǁkhā. Mati da nē ǃgomsiga a dan ǁkhā? ǂHâbasa i ge a ǁnâuǃāxa ǂâisa ūhâ ǀgara, ǂkhaikari hâ. Tsî ǂgoms ǃnâ ǁaposase mâsa. (Khomai re 2 Timoteub 4:5 sa.) ǁNâuǃāxa ǂâisa da ge ra ūhâ ǀgara ǃgāsase ǂâi. Tsî da ga dītsâ o, xūna Jehovab ra mû ǀgaub ǃnâ mûsa. ǁNāsa da ga dī, o i ge sada ǂâide sada tsâsigu xa tsâǀkhāhe tide.

2. Tae-e da nē ǁkhāǁkhāǃâs ǃnâ nî ǃhoaǃgao?

² ǃKharu go ǁkhāǁkhāǃâs ǃnâ da ge ǃnona ǃgomsigu. Hîna da ǀhaohâb ǃauga ra hōǃâga go ǃhoaǃgao. Nē ǁkhāǁkhāǃâs ǃnâ da ge ǃnona ǃgomsigu ǀhaohâb ǃnâ da nî hōǃâga nî ǃhoaǃgao. Hîna sada ǂgomǂgomsasib Jehovab ǃoagu da ūhâba a ǃâitsâ ǁkhāga. ǁÎgu ge (1) sada Xristeǁî ǃgâsa-i xa da go tsūdīhe di da ga tsâ, (2) ǁnamasa da ga hō ǁaeb, (3) tsî ǃgomsiba da ga ūhâ o, ǀapeǂhumis ra dī ǀkharaǀkharana ūǃoas ǀkha. Nē ǃgomsina da ga hōǃâ o, mati da sida ǁnâuǃāxa ǂâisa a ūhâ ǀgara ǁkhā. Tsî ǂgomǂgomsase Jehovab tsî ǁîb ǀapeǂhumis ǃoagu a hâ ǁkhā?

3. Mati da a tanisen ǁkhā ǃgâsa-i go tsūdī da ti ga tsâ o?

³ Tsūdīhe tsâ i du hâ ǃgâsa-i xa? ǀNîsi ǀhaohâb ǃnâ ǃereamsa tani hâ i xa, aiǁgause ǀhaohâb ǃûi-aob khami? ǃGâsab ge ǀnîsi ge ǂâibasen tama hâ i sado tsûtsûsa. (Rom. 3:23; Jak. 3:2) Xawe du ge noxoba ǁîb ge dī xū-i xa ge ǁaixa. Nē xū-i xa ǂâis xa du ge ǀnîsi ǃgâise ǁom tama hâ. ǀNîsi du ge a ǂâi  ǁkhā, ‘ǃgâsab ga nē ǀgaub ǃnâ tanisen o, nēsa amabes ǃnâ Elob ǀapeǂhumisa?’ Satani ge ǁnā ǀgaub ai da nî ǂâisa ǂhâba hâ. (2Kor. 2:11) Nē ǀgaub ai da ga ǂâi, o da ge Jehovaba a ǃoaba ǀû ǁkhā. Tsî ǁîb di ǀapeǂhumisa xu a ǂoa ǁkhā. ǃGâsa-i xa da go tsūdīhe ti da ga a tsâ o. Mati da sada ǁnâuǃāxa ǂâisa a ūhâ ǀgara ǁkhā? Tsî mati da nî ǂgōsen, î da tā ǁGâuab ra ǂhâba ǀgaub ai ǂâi?

4. Matib ge Josefa ǁnâuǃāxa ǂâisa ūhâ ǀgara tsūdīhēb ge o? Tsî tae-e da a ǁkhāǁkhāsen ǁkhā ǁîb aiǁgausa xu? (Genesis 50:19-21)

⁴ Tā ǁaixa hâse hâ ǀgara re. Josefi ge ǂkham i, o gu ge ǁîb di kai ǃgâsaga ǁgaise gere hâ-ū bi. ǁÎgu ge ge ǃhui bi hâ i. Tsî ǀnîgu ge ǃgam bi ǂgaos tsîna gere dī. (Gen. 37:4, 18-22) Ega gu ge ǃgāse ge ǁamaxubi. ǁNās xa ǃaromahe hâseb ge Josefa 13 kurigu ǀgaiba kaise ǁgai ǃgomsina ge hōǃâ. Josefi ge ge dîsen ǁkhā i, amabes ǃnâb Jehovab xa a ǀnamhesa. ǂHâsib ǃnâb ge hâ i ǁaeb ǃnâ. Xaweb ge Josefa ge ǁaixa tama hâ i. ǃNomsase hâs ǃnâ-ūb ge ǁîb ǁnâuǃāxa ǂâisa ge ūhâ ǀgara. ǁÎb ǃgâsaga dīǃoas ǃēsab ge ūhâ i. Xaweb ge ǁnāsa ge dī tama hâ i. Tsîb ge ǀnamma ǁgaugu tsî ge ǀûbagu. (Gen. 45:4, 5) Josefi ge nē ǀgaub ai ge tanisen ǃgāsaseb ge ǂâi ǁkhā i amaga. ǁÎb ge ǁîb ǃgomsin xa ge ǂâi tama hâ i. Xawe tae-eb ge Jehovaba gere ǂhâbas xa gere ǂâi ǀgara. (Khomai re Genesis 50:19-21 sa.) Tae-e da ra ǁkhāǁkhāsen? Tsūdīhe du ga o, tā Jehovab ǃoagu ǁaixa tamas ka io ǂâi ǁnāxu ǃgâhe du go di. Xawe ǂâiǃâ re matib ra huidu sa, î du nē ǃgomsin ǃnâ mâǀgai. ǁNās ǂamai nau khoen xa du ga tsūdīhe o, ǁîn ǃnubusiga ǀnammi ǀkha ǃgū-ai re.—1Pet. 4:8.

5. Matib ge Miqueasa ǁîb di ǁnâuǃāxa ǂâisa ūhâ ǀgara tsūdīheb ge dib ge tsâ o?

⁵ Suid Amerikab ǃnâ ra hâ ǀhaohâb ǃûi-aob. Miqueas di ǀon hâb di aiǁgausa kō re. b ǂÂi-oab ge ra ǁaeb hînab ge ǀnî ǃgâsagu ǃereamsa tani hâgu xa ǁgaise gere hâ ūhe o. ǁÎb ge ra mî: “ǁNāti i ǁgâibab ge tātsē hōǃâ tsâ tama hâ i di. ǃAo ta ge gere ǃuia ta ge ge ǁom ǁoa i. Tsî ta ge gere ā xū-e ta a dīǁoa ti ta gere tsâ amaga.” ǁNān hoan ǃnâb ge Miqueasa ǁîb ǁnâuǃāxa ǂâisa ge ūhâ ǀgara. Tsî ǃgarise gere sîsen ǁîb tsâsiga ǃkhōǀgarasa. Hoaǁaeb ge ǀgore tsî Jehovaba ǁîb ǃanu gagab tsî ǀgaib tsîna gere ǂgan îb mâǀgai. Huib ǃaromab ge Elobmîs ai ǃgaoǃgaosa ǂkhanin tsîna gere ôaǃnâ. Tae-e da ra ǁkhāǁkhāsen? ǃGâsa-i xa du ǁgai ǀgaub ǃnâ ra hâ ūhe di du ga tsâ. O ǃnomsase hâ tsî dītsâ re, ū du hâ ǁgai ǂâiǀgaugu hoaga xu ǃnorasa. ǀNîsi du ge a ǀū, mâ mâsigu go a ǃaromasa î-i khoe-e ǁnā ǀgaub ǃnâ ǃhoa tamas ka io tanisen. ǃGâsa-i xa du ǁgai ǀgaub ǃnâ ra hâ ūhe di du ga tsâ. O Jehovab ǀkha ǀgores ǃnâ ǃhoa, tsî ǂgan bi re îb hui du î du mâsiga ǁîb ra mû ǀgaub ǃnâ mû. ǁNāsa dīs ge nî huidu ǂâisa ǃgâsa-i go ǂâibasen tama hâ isa. Sado ǃoa ǀgui ǁgai xū-i tsîna dīsa tsî du ge ǁî-e a ǀûba ǁkhā. (ǂKhm. 19:11) ǂÂis ǃnâ ūhâ re Jehovab ge sadu mâsiba a ǂan. Tsîb ge ǂhâ du hâ ǀgaiba nî mā du î du mâǀgai.—2Kro. 16:9; Aoǁn. 5:8.

6. Tae-i ǃaroma i a ǂhâǂhâsa î da ǁnâuǃā, Jehovab ǀnamdab a ǃkhais ǃaroma ra ǁnama dasa? (Hebreǁîn 12:5, 6, 11)

⁶ Jehovab ga ǁnama da, o i ge kaise a tsûaǂgao kai da ǁkhā. Xawe sida tsûaǂgaob ai ǀgui da ga ǂâisa ǂnûi. O da ge ǁnamas a ǁau tsî a ǂhanuoǃnâ tamas ka io, sida ǃaroma hâ tama di a ū ǁkhā. Nēs ge a ǁkhae da ǁkhā kaise a ǂhâǂhâsa xū-e ǁnâuǃāsa. ǁNās ge Jehovab ra ǁnama dasa ǀnam dab a  amaga. (Khomai re Hebreǁîn 12:5, 6, 11 sa.) ǁNamas sida ǁgaise ra tsâ kai ǀgaus ai da ga ǂâisa ǂnûi ǀgara. O da ge Satana ǃēsa ra mā îb ǁnāǂam da. ǁÎb ge ǂhâba hâ î da tā ǁnamasa ūǃoa. Tsî ǁaeb ǀkha Jehovaba ǃoaba ǀû tsî ǀhaohâba xu ǂoa. ǁNamahe du ga o, mati du sadu ǁnâuǃāxa ǂâisa a ūhâ ǀgara ǁkhā?

7. (a) Ai-īsib ǃnâ i ra ǁgauhe khami, matib ge Petruba Jehovab xa sîsenūhe ǁnamasab ge ūǃoas khaos ai? (b) Tae-e du Petrub aiǁgausa xu ra ǁkhāǁkhāsen?

⁷ ǁNamasa ūǃoa tsî ǀkharaǀkharana dī re. ǀGuis xa ǃnāsa ǃnādeb ge Jesuba, Petruba nau apostelgu ais ai ge ǁnama. (Mrk. 8:33; Luk. 22:31-34) ǁNās ge ǀnîsi Petruba kaise ge tao kai. Xawe Petrub ge Jesub ǃoagu ǂgomǂgomsase ge hâ ǀgara. ǁÎb ge ǁnamasa ge ūǃoa tsî ǁîb dīsana xu ge ǁkhāǁkhāsen. Jehovab ge Petruba ǁîb di ǂgomǂgomsasib ǃaroma ge mādawa-am. Tsî ǂhâǂhâsa ǁgaumâide ge mā bi ǀhaohâb ǃnâ. (Jhn. 21:15-17; ǃNǃkh. 10:24-33; 1Pet. 1:1) Tae-e da Petrub aiǁgausa xu a ǁkhāǁkhāsen ǁkhā? Sada tsî naun tsîn ge ǃgâiba ra hō. Sada ǂâisa da ga taob ai mâi tama i. Tsî ǁnamasa ūǃoa tsî ǂhâbasa ǀkharaǀkharana ga ra dī o. ǁNāsa da ga dī o, da ge Jehovab tsî sada ǃgâsan tsîn xa a sîsenūhe ǁkhā.

8-9. ǁNamahe toab ges khaoǃgâb ge Bernardoba mati gere tsâ? Xawe tae-e ge hui bi, îb ǁîb ǂâiǀgauba dawa?

⁸ Kō re tae-i ge hāsa, Bernardob ǀkha Mozambique i ǃnâ. ǁÎb ge ǀhaohâb ǃûi-aosisa xu ge ūǁnâhe. Bernardoba mati gere tsâ? ǁÎb ge ra mî, “ǁaixa ta ge ge hâ i, māhe ta ge ǁnamas xa ta ge ǃgâibahe tama hâ i amaga.” ǁÎb ge gere ǂâiǂhansen matin nau khoen hîna ǀhaohâb ǃnâ hâna ǁîba nî mûsa. ǁÎb ge ra ǂanǃgâ, “ǁkhâga i ge ge ūte ǁnamasa ǂhanu ǀgaub ǃnâ mûsa. Tsî ǁkhapa Jehovab tsî ǁîb ǀapeǂhumisa ǂgomǃgâsa.” Tae-e Bernardoba ge hui îb ǁîb ǂâiǀgauba dawa?

⁹ Bernardob ge ǁîb di ǂâiǀgauba ge dī-ūnu. ǁÎb ge ra ǁguiǃā: “ǀHaohâb ǃûi-aose ta gere ǃoaba o, o ta ge Hebreǁîn 12:7 sa gere sîsenū. Tsî nauna gere hui în ǂhanu mûǂuiba ūhâ Jehovab di ǁnamadi ǃoagu. Nēsi ta ge ra dîsen, ‘Ham-e nē xoasa nî ûiǂui?’ Jehovab ǃoaba-aon hoana, tita tsîna ǃkhōǂgā hâse.” ǁNāpaxub ge Bernardoba ǀnî hâ ǀkharaǀkharana ge dī. Îb ǁkhapa Jehovab tsî ǁîb di ǀapeǂhumis ǃnâ ǂgomǃgâsiba  omkhâi. ǁÎb ge ǃnāsase Elobmîsa khomai tsî ǃnāsa ǁaeba ǃgamse ra ǂâiǃgâ, khomaib ra xūn xa. Matib ǁîb ǃgâsan xa ra mûhe ǀgaubab noxoba ra ǂâiǂhansen. Xaweb ge ǁîn ǀkha aoǁnâ sîsen-e gere dī. Tsî ǀhaohâb ǀhaodi tawa gere ǃeream. Egab ge Bernardoba ǁkhapa ǀhaohâb ǃûi-aose ge ǁgaumâihe. Bernardob khami ǁnamasa da ga ǃkhōǃoa o. Dītsâ re î du tā kaise nî tao kai du xūn xa ǂâi. ǁNamasa ūǃoa tsî ǂhâbasa ǀkharaǀkharana dī re. c (ǂKhm. 8:33; 22:4) Nēsa du ga dī o du ge a ǂgom ǁkhā Jehovab nî mādawa-am dusa. ǂGomǂgomsase du Jehovab tsî ǁîb ǀapeǂhumis ǃoagu ra hâ amaga.

10. Mâ ǀkharaǀkharan ǀapeǂhumis ge dīna ǀnîsi ǀnî Israelǁî-aogu ǂgomǂgomsasiba ge ǃâitsâ?

¹⁰ ǀApeǂhumis ra dī ǀkharaǀkharan ge sada ǂgomǂgomsasiba a ǃâitsâ ǁkhā. ǂAnbasen tama da ka io, da ge mā-am ǁkhā în ǁîna Jehovaba xu ǀgora da. Aiǁgause kō re mati i ge ǀapeǂhumis ge Moseb ǂhanub ǃnāka a dī ǀkharaǀkharana. ǀNî Israelǁîna a tsâǀkhā ǀgausa. ǁNā ǂhanub nî ǂnûiǂgāhes aiǃâgu ge, omaris danaga pristergu nî dī sîsen-e gere dī. ǁÎgu ge altarde gere om, tsî ǁguibade Jehovaba gere dība, ǁîgu omaridi ǃaroma. (Gen. 8:20, 21; 12:7; 26:25; 35:1, 6, 7; Job. 1:5) Xawe nē ǂhanub ge ǂnûiǂgāhe o, o gu ge omaridi danaga ge mā-amhe tama hâ i, ǁnā xūna dīsa. Jehovab ge Aronni di omarisa xu pristerga ge ǁgaumâi î gu ǁguibade dī. Nē ǂhanub di ǀkharaǀkharan ge sîsenūhe tsoatsoas khaosi. Î ga omaris dana-e Aronni di suriba xu i ǂoaxa tama hâ hîna. Pristergu di sîsen-e a dī o, ob ge ge ǃgamhe ǁkhā i. d (Lev. 17:3-6, 8, 9) Nē ǀkharaǀkharasa ǀnîsi ge ǃaroma î gu Koraxi, Datanni, Abirammi. Tsî 250 dana-aogu tsîna Moseb tsî Aronni ǂhanub ǃoagu khâikhâisen? (Num. 16:1-3) ǁNāsa da ge a mî ǁoa, xawe da ge a ǂan Koraxi. Tsî nau khoegu hîna ge ǁîb ǀkha hâ i gu tsîn ge, Jehovab ǃoagu ǂgomǂgomsase hâ tama hâ i ǃkhaisa. ǀApeǂhumis di ǀkharaǀkharan ga sadu ǂgomǂgomsasiba ǃâitsâ o, tae-e du a dī ǁkhā?

11. Tae-e da ǀnî Kohat Leviǁîgu aiǁgaude xu ra ǁkhāǁkhāsen?

¹¹ ǀOasase Jehovab ǀapeǂhumisa ǂkhâǃnâ re. ǃGarob ǃnâ gu gere ǃnarimā ǁaeb ai gu ge, Kohatǁî ga kaise ǀō-aisa ǁgaumâisa ge ūhâ i. Israelǁîn gere doe ǁaeb hoaba gu ge Kohatǁîna ǃgaeǀhaos ǂgaesa. Hoa khoen aisǀkhāb ai gere tani. (Num. 3:29, 31; 10:33; Jos. 3:2-4) Kai aiǂhanub ge ge i xawen ge xūna ǁîn ǃaroma ge dawa. Israelǁaes ge mîmâisa ǃhūb ǃnâ sī ǁan o. Tabernakela hoaǁae doe ūs ge ge ǂhâbasa tama hâ i. Salomob ge gao-aob ase ǂgaeǂgui tsoatsoa ǁaeb ai. O gu ge ǀnî Kohatǁîga ge ǁgaumâihe î gu ǁnae-aose sîsen. ǀNîgu ge ǃûi-aogu ase gere ǃoaba. Tsî nau ga ǁuigu mûǂam-aose gere kōǃgâ. (1Kro. 6:31-33; 26:1, 24) Xū-i hîna ra ǁgau i ge a ǀkhai. Kohatǁî gu ge gere ǃgaesen tamas ka io ǀkhara ǁgaumâi-e ǂhâbasa. ǁÎgu di ǃkhūhâ ǀumis ǃaroma. Tae-e da ra ǁkhāǁkhāsen? ǀOasa ǂgaob ǀkha da ge Jehovab ǀapeǂhumis ra dī ǀkharaǀkharana nî ǂkhâǃnâ, sa ǁgaumâis tsîna ǃkhōǂgā hâse. ǂKhîba ūhâ re mâ  ǁgaumâis hînats ra māhes hoas ǃnâ. ǂÂis ǃnâ ūhâ re, sa ǁgaumâis ge khoets asets a hamsa ǁgau tama. Xawe Jehovab ge sa ǁnâuǀnamxasiba sa ǁgaumâis xa ǃnāsase ra ǃgôaǃgâ.—1Sam. 15:22.

12. Zainasa mati gere tsâ Betelsa xus ge ǀkhara ǁgaumâisa a hō o?

¹² Kō re aiǁgaus ǃgâsas Zainas Middle East i ǃnâ gere hâs disa. Hîna ge ǀkhara ǁgaumâisa a ǃkhōǃoasa. Tsî ǁîs ǀnam hâ aiǂhanuba a ǂoaǃnâsa. ǁÎs ge ǁkhaba ge ǁgaumâihe is aoǁnâ sîsen-e dī. 23 Kurigas ge Betels ai gere ǃoabas khaoǃgâ. ǁÎs ge ra mî: “ǁÎs ǁgaumâis ǀkharaǀkharas ge kaise a ǃhuri kaisisa. Xū-e ta dīǁoa khama ta ge gere tsâ tsî ta ge gere dîsen ‘mapa ta ge dīsa? ’” ǀNî ǃgâsan ge ǀhaohâb ǃnâ ǁîs tsûb ai ǀaro tsî gere mîbasi: “ǁNātikōses ga ǃgâi hâ, os ge ǀapeǂhumisa ga ǃgû kaisi tama hâ di.” Kaxu ǁae-es ge Zainasa ǁgaise gere tsâ. Tsî mâ ǃoes hoasa gere ā. Xawes ge ra mî: “Tātsē ta ge ge mā-amsen tama hâ i. ǀApeǂhumis tamas ka io Jehovab ǀnammi xa înganǀgēsa.” Matis ge Zainasa ǁîs di ǁnâuǃāxa ǂâisa ūhâ ǀgara ǁkhā i?

13. Tae-es ge Zainasa dī, îs nē ǁgai tsâsiga dan?

¹³ Zainas ge nē ǁgai tsâsiga ge dan ǁkhā i. Mâ ǀgaub ǃnâ? ǁÎs ge sada ǂkhanin ǃnâ hâ ǁkhāǁkhāǃâde gere khomai hîna ge. ǁÎs ra hōǃâ ǃgomsina gere ǃhoaǃgaona. Nē ǁkhāǁkhāǃâs “ǃGomsina du ge a tani ǁkhā” di hâs hîna Februarib 1, 2001 di ǃKhē xu ǂgō-ommi ǃnâ ra hōhes ge kaise ge huisi. Nē ǁkhāǁkhāǃâs ge ra ǁguiǃā Elobmîs xoa-aob Markub ge ǁkhā ǃgomsiba gere hōǃâsa ǀkhara ǁgaumâisab ge māhe o. Zainas ge ra mî, “Markub di aiǁgaus ge sōǀôa-i ase ge iba te i, ǂkhabuǂâis tsâsiba dans ǃaroma.” Zainas ge ǁîs ǀhōsan ǀgūses tsîna gere hâ. ǁÎs ge ǃgâsana xu ge ǂgae-oasen tama hâ i. ǁÎs ge ǀkhomsens tsâsin tsîna ge ūhâ tama hâ i. ǁÎs ge ge mûǂan ǃanu gagab Jehovab ǀapeǂhumis ra dī, mîǁguiga ra daoǁgausa. Tsî gu ǂgaeǂgui ra ǃgâsaga ǁîsa kaise ra tsâbasa. Xawes ge ge mûǂan, Jehovab ǀapeǂhumisa a ǂhâǂhâsaba i ge, Jehovab sîsenni nî dīǀoaǀoahesa.

14. Mâ ǀkharaǀkharan ǀapeǂhumis dina ūǃoas ǀkhab ge Vladoba ǃgombahe i? Tsî tae-e ge hui bi?

¹⁴ Vlado di ǀon hâ 73 kurixa ǀhaohâb ǃûi-aob. Hîna Sloveniab ǃnâ ra hâb ge ge ǃgombahe i. ǁÎb di ǀhaohâb ge ǀnî hâ ǀhaohâb ǀkha a ǀhaoǀhaohe o. Tsî i ge ǁîn di Gaosib ǀhû-oma a ǂganamhe o. ǁÎb ge ra  mî: “Tita ge ge ǁnâuǃā tama hâ i tae-i ǃaroma i ge ǁnati îsa Gaosib ǀhû-omma a ǂganamhe ǃkhaisa. ǀGū ǁaeb ǃnâ da ge sida ǀhû-omma dī-ūnu amaga ta ge kaise gere tsûaǂgao. Tita ge a ǃnao kuru-ao tsî ta ge ǀnî ǀasa xūna ǀhû-ommi ǃnâ ge kuru. Tsî ǀhaoǀhaohe da ge o i ge ǂgui ǀkharaǀkharana gere ǂgaoǀkhā da. Hîna ge kaira aoǁnâ-ao da supuba tama hâ ina.” Tae-e Vladoba ge hui nē daoǁgaude ǂkhâǃnâs ǀkha? ǁÎb ge ra ǁguiǃā: “Jehovab ǀapeǂhumis ra dī ǀkharaǀkharana ūǃoas ge hoaǁae ǀkhaeba ra hau. Nē ǀkharaǀkharan ge ra aiǂhumi da. Hānîǁaeb ǃnâ nî hâ kai ǀkharaǀkharan ǃaroma.” ǀHaohâba ǀhaoǀhaos tamas ka io ǀkhara ǁgaumâisa hōs di ǀkharaǀkharan ǀkha du ǃgomsiba ūhâ? ǂGomǃgâ ǁkhā du ge a Jehovab sadu tsâsiga ra ǁnâuǃāsa. ǁNāti i ǀkharaǀkharana du ga ǂkhâǃnâ. Tsî du ga Jehovab tsî ǁîb di ǀapeǂhumis hînab ra sîsenūs ǃoagu. ǂGomǂgomsase a hâ ǀgara, o du ge amase nî ǀkhaehe.—Psa. 18:25.

15. Mati da ǁnâuǃāxa ǂâisa ūhâ ǀgara ǁkhā, ǃgomsina da ga ǀhaohâb ǃnâ hōǃâ o?

¹⁵ Nē ǃhūbaib ǀams ra ǀgū khama da ge, ǃgomsina ǀhaohâb ǃnâ a ǃâubasen ǁkhā. ǁNā ǃgomsin ge sada ǂgomǂgomsasib hîna da Jehovab ǃoagu ūhâba a ǃâitsâ ǁkhā. ǁNā-amaga da ge sada ǁnâuǃāxa ǂâisa nî ūhâ ǀgara. Sada ǃgâsa-i xa da go tsūdīhe di da ga tsâ o. O da ge tā nî mā-am ǁaixa hâse hâ ǀgarasa. ǁNamasa da ga hō, o da ge tā taob ai ǂâisa nî ǂnûi. ǁNamasa ūǃoa tsî da ge ǂhâbasa ǀkharaǀkharana nî dī. Jehovab ǀapeǂhumis ra dī ǀkharaǀkharan ga sadu ûiba tsâǀkhā o. Hoa ǂgaob ǀkha ūǃoa tsî daoǁgaude ǁnâuǀnam re.

16. Mati da sada ǂgomǃgâsiba Jehovab tsî ǁîb ǀapeǂhumis ǃoagu a ūhâ ǀgara ǁkhā?

¹⁶ Sadu ǂgomǃgâsiba du ge Jehovab. Tsî ǁîb di ǀapeǂhumis ǃoagu a ūhâ ǀgara ǁkhā. Sadu ǂgomǂgomsasib ga ǃâitsâhe o. Xawe ǁnāsa dīs ǃaroma ǁnâuǃāxa ǂâisa ūhâ ǀgara re. ǁNās ge ǃnomsase hâ, ǃgāsase ǂâi. Tsî xūna Jehovab ra mû ǀgaub ǃnâ mûsa. Mîǁguib ǀkha ǁkhāǁkhāsen re Elobmîs ǃnâ hâ khoen sadu khami i ǃgomsina ge ūhâ în xa. Tsî ǁîn aiǁgaude ǂâiǃgâ re. Jehovaba ǃoa ǀgore tsî huiba ǂgan re. Tsî tātsē tā Jehovab ǀhaohâba xu ǂgae-oasen re. Tae-i ǀgui i ga ī xaweb ge Satana sada Jehovab. Tsî ǁîb ǀapeǂhumisa xu ǀgora ǁkhā tide.—Jak. 4:7.