47ǁÎ ǁKHĀǁKHĀǃÂS
A-i xū-i xare-e tā sado Jehovaba xu ǀgora
‘Xawe ta ge sats ai ra ǂgomaiǂnûi Jehovatse.’—PSA. 31:14.
122ǁÎ ǁNAETSANAS Mâǀgai re
ǃKHŌǀHAOS a
1. Mati da a ǂan Jehovab sida ǃoa ra ǀgū ǂgaosa?
JEHOVAB ge ra ǁkhau da î da ǁîb ǀgūse hâ. (Jak. 4:8) ǁÎb ge ra sida Elo, sida ǁGû tsî sida ǀhōsa kai ǂgao. ǁÎb ge sida ǀgorede ra ǃeream. Tsî ǃgomsin ǃnâ da ga hâ o ra huida. Tsîb ge ǁîb ǀapeǂhumisa ra sîsenū sida ǁkhāǁkhā tsî ǁkhaubasa. Xawe tae-e da a dī ǁkhā, î da ǁîba ǃoa ǀgū?
2. Mati da Jehovab ǀgūse a sī ǁkhā?
2 Jehovaba ǃoa da ge a ǀgū ǁkhā, ǀgores ǁîb mîsa khomais tsî ǂâiǃgâs ǃnâ-ū. Nēsa da ga dī o, o da ge ǀnammi tsî ganganxasib tsîna ǁîba ra ǁgau. ǂKhâǃnâhe da ge ra î da ǁîba ǁnâuǀnam tsî koa ǁîb anu hâ ǀgaub ǃnâ. (J.ǂHa. 4:11) ǃNāsase da ga Jehovaba ǂan, o da ge ǁîba ra ǂgomǃgâ. Tsî ǁîb di ǀapeǂhumis hînab mā da hâs ǃnâ.
3. ǁGâuaba mati ra dītsâ sida Jehovaba xu ǀgorasa? Xawe tae-e nî huida, î da tātsē tā Jehovab tsî ǁîb ǀapeǂhumis tsîna ǁnāxu? (Psalmdi 31:13, 14)
3 ǁGâuab ge ra dītsâ îb Jehovaba xu ǀgora da. ǃNāsase ǃgomsina da ra hōǃâ ǁaeb ǃnâ. Matib ǁîba nēsa ra dī? ǁÎb ge ǂkhariǂkharise sida ǂgomǃgâsib. Jehovab tsî ǁîb ǀapeǂhumis ǃnâ da ūhâba ra ǂkhabuǂkhabu. Xawe da ge aitsama ǁîb di ǁnāǂamde a mâǃoa ǁkhā. Sida ǂgoms ga ǀgaisa tsî i ga, Jehovab ǃnâ da ūhâ ǂgomǃgâsiba ǁnōbeǁoasa o. O da ge sida Elob tsî ǁîb di ǀapeǂhumis tsîna ǁnāxu tide.—Khomai re Psalmdi 31:13, 14 sa.
4. Tae-e da nē ǁkhāǁkhāǃâs ǃnâ nî ǃhoaǃgao?
4 Nē ǁkhāǁkhāǃâs ǃnâ da ge ǃnona ǃgomsin. Hîna ǀhaohâb ǃaugaba xu a hā ǁkhāna nî ǃhoaǃgao. Mâs hoas ge ǂgomǃgâsib hîna da Jehovab tsî. ǁÎb ǀapeǂhumisa ūba hâba a ǂkhabu kai ǁkhā. Matin nē ǃgomsina Jehovaba xu a ǀgora da ǁkhā? Tsî tae-e da a dī ǁkhā, î da ǁGâuab di dītsâde ǃkhamǃoa?
ǃGOMSINA DA GA HŌǃÂ O
5. Matin ǃgomsina sada ǂgomǃgâsiba Jehovab tsî ǁîb ǀapeǂhumis ǃoagu a ǂkhabu kai ǁkhā?
5 ǀNî ǁaeb ai da ge ǃgomsina ra hōǃâ. Aiǁgause omaris ǁanin xa mâǃoahes. Tamas ka io sîsen-e ǂoaǃnâs ǃnâ-ū. Matin nē ǃgomsina sada ǂgomǃgâsib. Hîna da Jehovab ǀapeǂhumis ǃnâ ūhâba a ǂkhabu kai ǁkhā. Tsî ǁîba xu a ǀgora da ǁkhā? ǃGomsina da ga gaxu ǁae-e ga ra hōǃâ o. O da ge ǃâubasen-e ūhâ tama xū-i khami ǂkhabuǂâi hâses tsîna a tsâ ǁkhā. ǁGâuab ge nē ǃēde ra sîsenū, tsî ra ǂâi kai da Jehovab ǀnam da tama di. ǁGâuab ge ǂhâba hâ, î da dî Jehovab tsî ǁîb ǀapeǂhumis tsîn sada ǃgomsina ra ǃaromasa. ǁNāti i xū-i ge ǀnai Israelǁaes ǀkha, Egipteb ǃnâ ge ī. ǂGurosen ge ge ǂgom hâ i, Jehovab ge Moseb. Tsî Aronni tsîna a ǁgaumâisa ikha ǁîna ǃgāsisa xu ore. (Eks. 4:29-31) Xawe egab ge Faraoba ǁîn ûiga ǃgomǃgom on ge Moseb. Tsî Aronni tsîna gere ǀhapiǂgā-am, ǁîn ǃgomsin ǃaroma. Tsî ge mîba kha: “Sakho Faraob tsî ǁîb di ǁgâiǀā-aogu ǃoagu kho go sida khâikhâiǃnâ ǃkhais ǃaroma nî ǃgam.” (Eks. 5:19-21) ǁÎn ge Elob di ǂgomǂgomsa ǃgākha gere ǀhapiǂgā-am. Kaise i ge a ǃoaxa. Gaxu ǁaeba du ga ǃgomsina ga ra hōǃâ o. Mati du sadu ǂgomǃgâsiba Jehovab. Tsî ǁîb ǀapeǂhumis ǃnâ ǀgaisase nî ūhâ ǀgara?
6. Tae-e da kēbo-aob Habakuka xu ra ǁkhāǁkhāsen, mati da sada ǃgomsin ǃnâ nî mâǀgaisa? (Habakuki 3:17-19)
6 Sadu ǂgaoba Jehovab ǃoa ǁhōǂui re. Tsî ǂkhâǃnâs ǃaroma ǁîba ǃoa kō re. Kēbo-aob Habakuki ge ǂgui ǃgomsina ge hōǃâ. ǀNî ǁaeb ge Jehovab xab gere tsâbahe ǃkhaisa gere ǂgom ǀoro. ǀGores ǃnâb ge ǁîb tsâsiga Jehovab ǃoagu ge ǁhōǂui. ǁÎb ge ge mî: “ǃKhūtse mâtikōse ta huib ǃaroma nî ǂgai, ǁnâu tets nîs aiǃâ? . . . Tarexats ǂkhabadība ra mûǃhara?” (Hab. 1:2, 3) Jehovab ge ǁîb ǃgāb ǂgaoba xu ra ǁîba ǃoa ra ǀgore, ǀgoresa ge ǃeream. (Hab. 2:2, 3) Habakuki ge ǃgamse Jehovab ge ǁîb di khoena a ore ǀgaus xa a ǂâiǃgâs. Khaoǃgâb ge ǁkhapa ǃgâiaǂgaob xa ge ǀoa. ǁÎb ge ge ǂgom tsoatsoa Jehovab ra tsâbabi ǃkhaisa. Tsî nî huibisa îb mâ ǃgomsi-i hoa-i ǃnâ mâǀgai ǁkhā. (Khomai re Habakuki 3:17-19 sa.) Tae-e da nēsa xu ra ǁkhāǁkhāsen? ǃGomsina du ga hōǃâ o Jehovaba ǃoa ǀgore re. Tsî ǁîba mîba mati du ra tsâsa. ǁNāpaxu ôa re ǁîb xa ǂkhâǃnâhesa. ǁNāsa du ga dī o, du ge a ǂgom ǁkhā. Jehovab ǂhâ du hâ ǀgaiba nî mā dusa î du mâǀgai. Tsî ǁîb ǂkhâǃnâsa du ga hōǃâ o, os ge sadu ǂgomsa ǁîb ǃnâ nî ǀgai.
7. Shirleys omarisa tae-e ǁîsa gere ǂgom kai ǂgao? Tsî tae-e ǁîsa ge hui îs tā ǁîs di ǂgomsa Jehovab ǃnâ ǂoaǃnâ?
7 Gagasi xūn hîna Jehovab ǀgūse ra ūhâ du na dī re. Kō re, ǁnās ge mati ǃgâsas Shirleys. Hîna Papua New Guineab ǃnâ ra hâsaa hui ǀgausa, ǃgomsinas gere ǃkharuǃnâ o. b Shirleys omaris ge kaise ge ǀgâsa-i. Tsî ǀnî ǁaegu ai ǂâusa ǂûna hōs di ǃgomsiba gere hōǃâ. ǁÎs omaris ǃnâ ge hâ i khoeb ge, gere dītsâ ǁîs ǂgomǃgâsib hînas Jehovab ǃnâ ūhâba ǂkhabu kaisa. ǁÎb ge ge mî: “Sas ge ra mî Elob ǃanu gagab xas ra huihe di, xawe mapab ǁîb huiba hâ? Nē omaris ge noxoba a ǀgâsa, sa ǁaebas ge ra ǂkhôa aoǁnâs ǀkha.” Shirleys ge ra ǂanǃgâ: “Aitsama ta ge ge dîsen: ‘Eloba sida tsâba i ra tamas ka iob tsâba tama?’ Tita ge ǁnā ǁaeb ǂûb ai Jehovaba ǃoa ǀgore. Tsî ti ǂâis ǃnâ ge hâ i xūn hoana ge mîba. Tita ge Elobmîs tsî sada ǂkhanina ge khomai ǀû tama hâ i. Tsî ta ge aoǁnâ sîsenni ǀkha aiǃgû tsî ǀhaodi tsîna gere hâǃnâ.” ǁÎs ge ǃhae ǁaeb ǃnâ ge mûǂan tsoatsoa Jehovab ge ǁîs omarisa gere kōǃgâsa. ǁÎs omaris ge ge ǃâ tama hâ i. Tsîn ge ǁîna ge ǂkhî i. Shirleys ge ra mî: “Hōǃâ ta ge ge Jehovab ge ti ǀgorede gere ǁnâu-amsa.” (1Tim. 6:6-8) Sadu di gagasi xūna du ga ra dī ǀgara. O du ge sadu tsîna mā-am tide ǃgomsin tamas ka io ǂgomoǃnâsib sado Jehovaba xu nî ǀgorasa.
ǃEREAMDE ŪHÂ ǃGÂSAGU GA ǃGÂI TAMASE HÂ ŪHE O
8. Tae-e a īǁkhā Jehovab ǀapeǂhumis ǃnâ ǃereamsa tani hâ ǃgâsagu ǀkha?
8 Sada khakhoen ge ǂhôan tsî internets ǃnâ-ū. Jehovab ǀapeǂhumis ǃnâ ǃereamsa ūhâ ǃgâsagu xa. ǂHumin tamas ka io ama tama xūna ra ǃhoa. (Psa. 31:13) ǀNî ǃgâsagu ge ǃkhō-oms ǃnâ ge ǂganamǂgāhe. Tsî ǂkhabadī-ao i ase ge ǁgarahe. ǃKharu ge ǁaeb Xristeǁîn tsîn ge ǁkhā mâsiba ge hōǃâ. Apostel Paulub ge ama tama xūn ai ǀhapiǂgā-amhe tsî ǃkhōhe o. Matin ge tanisen?
9. Matin ge ǀnî Xristeǁîna tanisen apostel Paulub ge ǃkhō-oms ǃnâ ǂnôa io?
9 Apostel Paulub ge Romes ǃnâ ǃkhō-oms ǃnâ ǂnôa i, on ge ǀnî Xristeǁîn ǃkharu ge ǁaeb dina ǁîba ge ǂkhâǃnâ ǀû. (2Tim. 1:8, 15) Tae-i ǃaroma? ǁÎna Paulub mâsib xa gere tao, khoen xab ge ǂkhabadī-ao i ase gere mûhe ǃkhais ǃaroma. (2Tim. 2:8, 9) Tamas ka io ǃao în gere ǃgôaǃgonhesa? Tae-i ǀgui-i ga ǁîn ǃaroma i, xawe mûnanai re matib ge Pauluba gere tsâsa. ǁÎb ge ǂgui ǃgomsigu ǃnâ ge mâǀgai. Tsî ǁîb ûib tsîna ǁîn ǃaroma ǁkhōǁkhōsa mâsib ǃnâ gere mâi. (ǃNǃkh. 20:18-21; 2Kor. 1:8) A da tātsē tā ǁnān hîna ge apostel Pauluba. ǂHâsib ǃnâb ge hâ i ǁaeb ǃnâ ǁnāxu ǃgân khami i. Tae-e da ǂâis ǃnâ nî ūhâ ǃereamsa ūhâ ǃgâsagu ga ǁgâiǀāhe o?
10. Tae-e da ǂâis ǃnâ nî ūhâ ǃereamsa ūhâ ǃgâsagu ga ǃgôaǃgonhe o tsî tae-i ǃaroma?
10 ǂÂihō re tae-i ǃaroma da ra ǁgâiǀāhesa tsî ham-i ra ǃaromasa. ǀGamǁî Timoteub 3:12 ge ra mî: “Xristub Jesub ǃnâ ra ûi ǂgao khoe-i hoa-i ge ǃgomma nî tsâ.” Tā da ge nî buru ǁGâuab ǃgōsase ǃereamsa ūhâ ǃgâsaga ra ǁnāǂamsa. ǁÎb ge ǂhâba hâ, î gu nē ǃgâsaga tā Jehovab ǃoagu ǂgomǂgomsa. Tsîb ge sida tsîna ra ǃaoǃao ǂgao.—1Pet. 5:8.
Paulub ge ǃkhō-oms ǃnâ ǂnôa i xaweb ge Onesiforub xa ǁkhoaǂgaoxase gere ǂkhâǃnâhe. Nētsēs tsînan ge sada ǃgâsana, ǁîn ǃgâsan hîna tronkhes ǃnâ ǂnôana ra ǂkhâǃnâ. Ai-īsib ǃnâ i ra ǁgauhe khami (11ǁÎ-12ǁî xoaǀgora ra khomai re)
11. Tae-e da Onesiforub di aiǁgausa xu ra ǁkhāǁkhāsen? (2 Timoteub 1:16-18)
11 Sadu ǃgâsana ǂkhâǃnâ re. Tsî ǂgomǂgomsase ǁîn ǃoagu hâ ǀgara re. (Khomai re 2 Timoteub 1:16-18 sa.) ǃKharu ge ǁaeb Xristeǁîb, Onesiforub di ǀon hâb ge ǀkhara di ge tanisen. Paulub ge ǃkhōsis ǃnâ ǂnôa io. ǁÎb ge Paulub ‘ǃkhōsis ǃnâ hâ ǃkhais di tao-i tsîna ge ūhâ tama hâ i.’ Onesiforub ge Pauluba ôa tsî hōbib ge o, dītsâ tsî ǂhâb ge hâ i xūna ge mā. ǁNāsa dīs ǃnâ-ūb ge Onesiforuba. ǁÎb di ûiba ǁkhōǁkhōsa mâsib ǃnâ gere mâi. Tae-e da nēsa xu ra ǁkhāǁkhāsen? Tā da ge nî mā-am î-i khoena ǃaosa sida ǃao kai. Tamas ka io ǁkhae da, sida ǃgâsan hîna ra ǃgôaǃgonhena ǂkhâǃnâsa xu. Xawe a da ǁkhā da i hoa-e dītsâ tsî ǁîna hui. (ǂKhm. 17:17) ǁÎn ge sida ǀnammi tsî ǂkhâǃnâs tsîna ǂhâhâ.
12. Tae-e da sida ǃgâsan hîna Russiab ǃnâ hâna xu ra ǁkhāǁkhāsen?
12 Kō re matin sida ǃgâsan hîna Russiab ǃnâ hâna. ǁÎn di ǀnamǀnamsa ǃgâsan hîna ǃkhōsis ǃnâ ǂnôana ra hui ǀgausa. ǀNîn ga ǁnâuǃgâhe on ge ǂgui ǃgâsana. ǁNâuǃgâ ǃkhaib dawa ra sī, în ǁîna sī ǂkhâǃnâ. Tae-e da nēsa xu ra ǁkhāǁkhāsen? ǂGaeǂgui ra ǃgâsagu ga mîǁgaiǁgaihe, ǃkhōhe. Tamas ka io ǃgôaǃgonhe. O du ge tā nî ǃao re. ǀGoreba gu tsî ǁîgu omaris ǁanina kōǃgâ re. Tsî ǀnî hâ ǀgauga ôa re dīgu ǃnâ du sadu di ǂkhâǃnâsa nî ǁgauga.—ǃNǃkh. 12:5; 2Kor. 1:10, 11.
ǃHŌHE DA GA O
13. Matis mîǁgaiǁgaihesa sida ǂgomǃgâsib hîna da Jehovab tsî ǁîb ǀapeǂhumis ǃoagu ūhâsa a ǂkhabu kai ǁkhā?
13 Jehovaba ǃoaba tama ǀaokhoen, sîsenǁare-aon tamas ka io skol ǀhōsan ge a ǃhōda ǁkhā. Sada aoǁnâ sîsenni tamas ka io Jehovab ǀgapi ǂhanugu. ǃOagu da ra ûi ǃkhais ǃaroma. (1Pet. 4:4) ǁÎn ge a mî ǁkhā: “Sats xa ta ge ǃgâibahe xawe sa ǂgoms ge kaise ǁkhōǁkhōsa ǂkhanuga ūhâ tsî a ǀorokam ǁaeb di.” ǀNîn ge tsū xūna a mî da ǁkhā. Mati da ǂnûiǂuihe hâ khoen ǀkha ra hâ ǀgaub ǃaroma. Tsî ra mî: “ǁNāti du ǀnamxaǃnâ khoe-i ase a ǂgaisen ǁkhā.” Nēti i mî xūn ge înganǀgē ǃkhomrode sida ǂâidi ǃnâ a ǂgā ǁkhā. ǂÂi tsoatsoa ǁkhā da ge a: ‘Jehovaba kaise ra ǃâubasen tita xu? ǁÎb ǀapeǂhumisa kaise ra ǃkhō-oa?’ ǁNāti i mâsib ǃnâ du ga hâ, o du mati Jehovab. Tsî ǁîb di ǀapeǂhumis ǀgūse a hâ ǁkhā?
Jobi ge ǁîba gere mîǁgaiǁgai ama tama ǀhōsagu ǂhumiba ge ǂgom tama hâ i. ǁNās xab ge ge mîǁgui, ǁîb di ǂgomǂgomsasiba Jehovab ǃoagu ǃkhōǀgarasa (14ǁÎ xoaǀgorasa khomai re)
14. Mati da nî tanisen nau khoen xa da ga Jehovab ǂhanugu ǃoagu da ra ûi, ǃkhais ǃaroma mîǁgaiǁgaihe o? (Psalmdi 119:50-52)
14 Jehovab ǂhanu a di ra mîna dī re. Jobi ge khoeb hîna ge Jehovab di ǂhanuba gere ǁnâuǀnamma. ǁÎ-e dīs ǃaromab gere ǃāǃāhe xawe. ǀGui khoeb hîna ge Jobi ǀhōb ase gere tanisen nî ge. Dītsâ tsî ǁîba gere ǂgom kai ǂgao. Elob ǁae tamasa Jobi ga ǁîb di ǂhanuga sao tamas ka io sao tama io. (Job. 4:17, 18; 22:3) Xawe Jobi ge ǁnā ǂhumiba ge ūǃoa tama hâ i. ǁîb ge ge ǂan i Jehovab ǂhanub ǃgâin tsî tsūn ǁaegu hâb a ǂhanu ǃkhaisa. Tsîb ge ǁîga gere ǁnâuǀnam ǂgao. ǁÎb ge ge mā-am tama hâ i nau khoen nî ǁîb di ǂhauǃnâxasiba ūbēsa. (Job. 27:5, 6) Tae-e da nēsa xu ra ǁkhāǁkhāsen? Tā mîǁgaiǁgaihesa mā-am, sado Jehovab di ǂhanugu xa dîsen kaisa. ǂÂi oa re taen ge sadu ûi ǁaeb ǃnâ a īsa. ǂGui ǃnāde du ge ǀnîsi ge hōǃâ sadu ûib a ǃgâisa. Jehovab ǂhanu a di ra mî xū-e du ge dī o. Nē ǀapeǂhumis hîna ǁnā ǂhanuga ǀgapise ra ūhâsa mîǁgui tsî ǂkhâǃnâ re. O da ge ǂgui khoen xa da ga mîǁgaiǁgaihe xawe tātsē Jehovaba ǃoaba ǀû tide.—Khomai re Psalmdi 119:50-52 sa.
15. Tae-i ǃaromas ge Brizitsa gere ǃhōhe?
15 ǃGâsas Brizit hîna Indiab ǃnâ ra hâs di aiǁgausa kō re. ǁÎs omaris ǁanin xas ge ǁîs ǂgoms ǃaroma gere ǃhōhe. ǁĀǁnâhe toas ges khaoǃgâ 1997 ǃnâ i ge ǁîs di aob hîna ge Jehovaba ǃoaba tama hâ iba sîsen-e ge ǂoaǃnâ. ǁÎb ge ge mî ǁîb, Brizit tsî ǁîra di ǀgôadi tsîna doe. Tsî ǁîb ǁgûra hîna ge ǀnî hâ ǃās ǃnâ gere hâra tawa sī hâ. Xawes ge Brizitsa ǂgui ǃgomsina sī nî hōǃâ. ǁÎs aob ge sîsen tama hâ i ǃkhais ǃaromas ge Brizitsa. ǀOasa ǁaeba nî sîsen îs ǁîs omaris ǂhâsigu ǃnâ hui. ǁNās xōǀkhā i ge ǀgū ge i ǀhaohâba, 350 kilometerde ǁnāpaxu ge ǃnū i. Tsûtsûxases ge ǁîs aob omaris khoen xa ǁîs ǂgoms ǃaroma gere mâǃoahe. Mâsib ge kaise ge ǁgaiǂoa tsoatsoa. Tsî i ge Brizit tsî ǁîs omaris tsîna ǁkhapa ge doe. ǁNāpaxu i ge ǃâubasen-e tama i hâse ǁîs aoba ge ǁō. Egas ge ǁîs ôaros 12 kurixasa kankers xa ge ǁō. Nēn ǂamais ge Brizits omaris khoen tsîna. ǁÎsa ī gere xūn ǃraoma gere ǀhapiǂgā-am. ǁÎn ge gere mî ǁîs ga Jehovab ǃoaba-ao kai tama hâ o, on ge nē tsūkēǃgân hoana ga ī tama hâ. Xawes ge noxoba Jehovab ǃnâ ǂgom. Tsî ǁîb ǀapeǂhumis ǀgūse ge hâ ǀgara.
16. Matis ge Brizitsa ǀkhaehe Jehovab tsî ǁîb ǀapeǂhumis ǀgūses ge hâ ǀgara o?
16 Brizit ge ǀhaohâba xu ǃnūse gere hâ. Amagab ge ǃnarimâra mûǂam-aoba ǁîsa ge ǂkhâǃnâ, îs hâs ra ǃkhaib tawa aoǁnâ. Tsî ǀhaode ǁîs oms ǃnâ dī. Tsoatsoas ǃnâs ge gere tsâ kaise a ǃgom di. Xawes ge ǃgâsab ge māsi ǀapemāsa ge sao. ǁÎs ge naun ǀkha ǃgâiǂhôasa ǀgoragu, ǀhaode ǁîs oms tawa ūhâ. Tsî ǁaeba ǁamaǂui tsî omaris ǃoabasa ǁîs ǀgôadi ǀkha gere ūhâ. ǀAmǂoasa ge tae-i? Brizit ge ǂgui Elobmîs ǁkhāǁkhāde ge tsoatsoa ǁkhā i. Tsî i ge ǁnāna xu ǂgui khoena ge ǁāǁnâhe. Tsîs ge 2005 i ǃnâ ǁnaetisa aimâba-aos ase ge ǃoaba tsoatsoa. Jehovab ǃnâs ūhâ ǂgomǃgâsib tsî ǂgomǂgomsasib. ǁÎb ǀapeǂhumis ǃoagus ūhâb ge ge mādawa-amhe. ǁÎs ǀgôadi ge Jehovaba ǂgomǂgomsase ra ǃoaba. Tsî nēsi i ge ǁîn ra hâ ǃkhaib tawa ǀgam ǀhaohâga hâ. Brizit ge ra ǂgom Jehovab xas ge ǀgaiba a māhesa. Îs ǁîs di ǃgomsina tani ǁkhā. Tsî ǁîs omaris ǁanin xas gere ǃāǃāhe o mâǀgai.
ǂGOMǂGOMSASE JEHOVAB TSÎ ǁÎB ǀAPEǂHUMIS ǃOAGU HÂ RE
17. Tae-e da nî mîǁgui dīsa?
17 ǁGâuab ge ra ǂgom kai da ǂgao, Jehovab ǃgomsiga da ra ǃkharuǃnâ ǁaeb ǃnâ ra ǁnāxu dasa. Tsî Jehovab ǀapeǂhumisa ǂkhâǃnâs. Sada ûiba kaise ǃgomǃgomba das ǀguisa nî dīsa. ǁGâuab ge ǃao da nîsa ǂhâba hâ. ǃEreamsa tani hâ ǃgâsagu ga mîǁgaiǁgaihe, ǃgôaǃgonhe tamas ka io ǃkhō-oms ǃnâ ǂgāhe o. Tsî mîǁgaiǁgais ǃnâ-ūb ge sida ǂgomǃgâsib hîna da. Jehovab ǂhanugu tsî ǁîb ǀapeǂhumis ǃnâ ūhâ ga ra ǂkhabu kai ǂgao. Xawe da ge ǃamkuse ǁîb ǂkhāba ǀapede a ǂan. Tsî da ge gāxaǃnâhe tama hâ. (2Kor. 2:11) Mîǁgui re ǁGâuab di ǂhumiga ūǃoa tama isa. Tsî Jehovab tsî ǁîb ǀapeǂhumis ǃoagu ǂgomǂgomsase hâsa. ǂÂis ǃnâ ūhâ re, Jehovab ge tātsē ǁnāxu du tide. (Psa. 28:7) ǁNā-amaga tā mā-am i-i xū-i xare-e sado Jehovaba xu ǀgora.—Rom. 8:35-39.
18. Tae-e da sao ra ǁkhāǁkhāǃâs ǃnâ nî ǃhoaǃgao?
18 Nē ǁkhāǁkhāǃâs ǃnâ da ge ǃgomsina go ǃhoaǃgao. Hîna da ǀhaohâb ǃaugaba xu a hōǃâ ǁkhāna. Xawe sida ǂgomǃgâsib hîna da Jehovab. Tsî ǁîb ǀapeǂhumis ǃoagu ūhâb tsîn ge a ǃâitsâhe ǁkhā. ǀHaohâb ǃnâ da ra hōǃâ ǃgomsin xa. Mati da ǁnā ǃgomsina ǃgâise a sîsenǂam ǁkhā? Nēsa da ge saora ǁkhāǁkhāǃâs ǃnâ nî ǃhoaǃgao.
118ǁÎ ǁNAETSANAS “ǂGomsa ǀaroba” da re
a Nē ǀuni tsēdi ǃnâ ǂgomǂgomsase mâǀgais ǃaroma da ge Jehovab. Tsî ǁîb ǀapeǂhumis ǃoagu ǂgomǃgâsiba nî ūhâ. ǁGâuab ge ǃgomsina ra sîsenū, îb ǁnā ǂgomǃgâsiba khôa. Nē ǁkhāǁkhāǃâs ge ǃnona xūn hînab ǁGâuaba ra dīna nî ǃhoaǃgao. Tsî mati da ǂgomǂgomsase Jehovab tsî ǁîb ǀapeǂhumis ǃoagu nî hâsa.
b ǀNî ǀondi ge dawahe hâ.